អ្វីដែលអ្នកគាំទ្រទន្ទឹងរង់ចាំពេលនេះបានក្លាយជាការពិតហើយតារាចម្រៀង ជី ដេវីត នឹងមានផ្ទាំងទស្សនីយ៍ភាពបទ «មហានគរ»ក្នុងជំនួបមិត្តភាពការប្រកួតបាល់ទាត់កម្ពុជាប៉ះជាមួយបង់ក្លាដេសនាពេលខាងមុខ ហើយជាពេលវេលាដែលអ្នកគាំទ្រលោកចង់ឃើញជាទីបំផុត បន្ទាប់ពីបទនេះបានទម្លាក់។
បទ «មហានគរ» របស់ តារាចម្រៀង ជី ដេវីត ដ្បិតតែមានការជជែកវែកញែកក៏ពិតមែន ប៉ុន្តែបទនេះទទួលបានការគាំទ្រយ៉ាងខ្លាំងពីទស្សនិកមានអ្នកទស្សនារាប់លានដង ហើយអ្នកគាំទ្រក៏ចង់ឃើញមានការសម្តែងបទនេះនៅក្នុងព្រឹត្តិការណ៍ធំៗផងដែរ ព្រោះបង្កប់ខ្លឹមសារជ្រាលជ្រៅ។ យ៉ាងណា មហាជនក៏សម្តែងក្តីសោកស្តាយ និងខកចិត្តជាខ្លាំងបន្ទាប់ពីបទចម្រៀងពិសេសនេះមិនបានបង្ហាញក្នុងព្រឹត្តិការណ៍បើក-បិទ ស៊ីហ្គេម២០២៣ រួមទាំងពិធីបើកកីឡាប៉ារ៉ាហ្គេមលើកទី១២ ឆ្នាំ២០២៣។
ទោះជាយ៉ាងនេះក៏ដោយ ដ្បិតតែបទ «មហានគរ» ពុំមានវត្តមានក្នុងព្រឹត្តិការណ៍ខាងលើ តែតារាច្រៀងរូបនេះបានបង្ហាញទៅកាន់អ្នកគាំទ្ររបស់ខ្លួនថាកាលពីយប់ថ្ងៃទី៥ មិថុនា នេះថាលោកនឹងមានផ្ទាំងទស្សនីយ៍ភាពបទនេះក្នុងជំនួបមិត្តភាពបាល់ទាត់កម្ពុជា ប៉ះជាមួយបង់ក្លាដេស វេលាម៉ោង៧យប់ ថ្ងៃទី១៥ ខែមិថុនា ឆ្នាំ២០២៣ ខាងមុខនាពហុកីឡដ្ឋានជាតិអូឡាំពិក។
ការបង្ហាញដំណឹងនេះហើយ ធ្វើឱ្យអ្នកគាំទ្ររបស់តារាចម្រៀងរូបនេះសប្បាយចិត្តយ៉ាងខ្លាំងអ្វីដែលពួកគេទន្ទឹងរង់ចាំអស់រយៈពេលជាយូរបន្ទាប់ពីបទនេះទម្លាក់កាលពីថ្ងៃទី២ ខែឧសភា ឆ្នាំ២០២៣ ដែលមកទល់ពេលនេះមានអ្នកចូលស្តាប់ជាង៦លានដងនៅលើឆាណែលយូធូប បានឃើញការសម្តែងហើយ។
គួរបញ្ជាក់ផងដែរថា ការប្រកួតមិត្តភាពបាល់ទាត់កម្ពុជា ប៉ះជាមួយបង់ក្លាដេស ក៏មានកីឡារជម្រើសជាតិចាស់ជាច្រើនរូបបានចូលរួមលេងវិញមានដូចជា ចាន់ វឌ្ឍនាកា , គួច សុកុម្ភៈ , សុះ ស៊ូហ៊ាណា និង សារ៉េត គ្រីយ៉ា ជាដើម៕
