ប្រទេសថៃ ៖ បុរសម្នាក់ឈ្មោះ Xin You Chue ឬឈ្មោះ Xinba ជាស្តេចលក់ផលិតផលតាមអនឡាញមកពីប្រទេសចិន អាចឡាយលក់ទុរេនថៃបានរហូតដល់១,៦លានផ្លែ ដោយចំណាយពេលត្រឹមតែ១ថ្ងៃប៉ុណ្ណោះ ហើយទទួលបានប្រាក់ចំណូលរហូតដល់១.៥០០លានបាត ។ ក្រោយពីលោក Xinba អាចលក់ទុរេនដាច់ក្នុងចំនួនដ៏ច្រើនមក បានធ្វើឱ្យគេចាប់អារម្មណ៍ជាខ្លាំងទាំងនៅប្រទេសថៃ និងចិន ។

កាលពីថ្ងៃទី៧ ខែឧសភា កន្លងមក លោក Xinba ជាស្ថាបនិករបស់ Xinxuan Group ជាក្រុមហ៊ុនផ្សព្វផ្សាយពាណិជ្ជកម្មអេឡិចត្រូនិកឈានមុខគេនៅប្រទេសចិន បានជិះយន្តហោះមកឡាយលក់ផលិតផលអនឡាញនៅប្រទេសថៃ ព្រមទាំងជួយផ្សព្វផ្សាយផលិតផលរបស់ថៃជាច្រើនមុខ ដូចជា ទុរេន មង្ឃុត អង្ករផ្កាម្លិះ ផលិតផលថែរក្សាស្បែក និងផលិតផលធ្វើពីជ័រកៅស៊ូ ។ បន្ទាប់ពីលោក Xinba បានឡាយលក់ផលិតផលមិនយូរប៉ុន្មានឃើញថា បរិមាណការបញ្ជាទិញសរុបស្មើជាង៦,៧៨លាននាក់ ។ ថៃចាត់ទុកថា វាជារឿងអស្ចារ្យខ្លាំងណាស់សម្រាប់ប្រទេសរបស់ខ្លួន តាមរយៈការទិញផលិតផលអនឡាញរបស់ចិន ។

ចំណែកការលក់ផ្លែមង្ឃុតវិញ មានអ្នកកុម្មង់ទិញចំនួន១,២៦លាននាក់ក្នុង១វិនាទី និងទទួលបានប្រាក់ចំណូលចំនួន១០០លានយាន់ ឬប្រមាណ៤៨០លានបាត ។ រីឯទុរេនម៉ន់ថង មានអ្នកកុម្មង់ទិញសរុបចំនួន១,៦២លានផ្លែ ដែលមានទម្ងន់សរុប៤.៨០០តោន និងទទួលបានប្រាក់ចំណូលសរុបចំនួន៣០០លានយាន់ ឬប្រមាណ១.៥០០លានបាត ។

វាបានក្លាយជារឿងមួយគួរឱ្យចាប់អារម្មណ៍នៅប្រទេសចិន ខណៈអាជីវករលក់ទុរេននៅចិននិយាយថា ការឡាយលក់ផលិតផលរបស់លោក Xinba គឺជាដើមហេតុដែលធ្វើឱ្យតម្លៃទុរេននៅចិនកើនឡើងខ្ពស់ រហូតដល់ឈ្មួញតូចតាចគ្មានទុរេនលក់ និងធ្វើឱ្យខ្វះខាតទុរេនថៃនៅចិន ។ ក្នុងរយៈពេលប៉ុន្មានឆ្នាំកន្លងមកនេះ ទីផ្សារ e-commerce របស់ប្រទេសចិនបានរីកចម្រើនយ៉ាងឆាប់រហ័ស ហើយថៃត្រូវបានគេចាត់ទុកថា ជាប្រទេសធំផ្នែកកសិកម្ម និងការផលិតទំនិញ ក៏ដូចជាមានតួនាទីសំខាន់ក្នុងផ្នែកផ្គត់ផ្គង់ផងដែរ ។ ហេតុនេះ ប្រទេសថៃបានក្លាយជាគោលដៅទី១ ក្នុងការពង្រីកអាជីវកម្មនៅក្រៅប្រទេសរបស់ក្រុមហ៊ុន Xinxuan Group ។

លោក Xinba ជាស្ថាបនិកក្រុមហ៊ុន Xinxuan Group លើកឡើងថា លោកនឹងយកបទពិសោធន៍ និងធនធានសេដ្ឋកិច្ចឌីជីថលរបស់ចិនមកកាន់ប្រទេសថៃ ព្រមទាំងជួយប្រទេសថៃឱ្យហ្វឹកហាត់អ្នកជំនាញផ្នែកឌីជីថលផងដែរ ។ លោកបន្តថា លោកនឹងប្រើប្រាស់សេដ្ឋកិច្ចឌីជីថលដើម្បីជំរុញការផ្លាស់ប្តូរ និងធ្វើឱ្យប្រសើរឡើងនូវរចនាសម្ព័ន្ធឧស្សាហកម្មរបស់ប្រទេសនានានៅលើពិភពលោក ព្រមទាំងឆ្ពោះទៅរកផ្លូវពាណិជ្ជកម្មឌីជីថល ៕ ប្រភព ៖ khaosod

បរទេស៖ ក្រុមហ៊ុនដំបូងរបស់អង់គ្លេស Solar Botanic Trees គ្រោងបង្កើតដើមឈើសាកថ្មរថយន្តអគ្គិសនី ដែលមានសមត្ថភាពពិសេសប្រមូលថាមពលពីដំបូលដែលបំពាក់ដោយបន្ទះស្រូបពន្លឺព្រះអាទិត្យ ហើយរក្សាទុកថ្មនៅក្នុងប្រអប់។
យោងតាមប្រភពសារព័ត៌មាន CNN ដែលចេញផ្សាយនៅថ្ងៃទី២៩ ខែឧសភា បានឱ្យដឹងថា ក្រុមហ៊ុន Solar Botanic Trees បានចាប់ដៃគូជាមួយក្រុមហ៊ុន Raw Charging ដើម្បីដំឡើងរោងចក្រសាកថ្មរថយន្តអគ្គិសនីនៅចុងឆ្នាំនេះ។

ដោយបច្ចុប្បន្នក្រុមហ៊ុនកំពុងត្រៀមផលិតដើមឈើអគ្គិសនី និងសាកល្បងជាមួយកម្ពស់ ៤.៥ ម៉ែត្រ ដោយដំបូលមានទទឹង ៧ ម៉ែត្រ មុនពេលចាប់ផ្តើមការផលិតជាផ្លូវការនៅចុងឆ្នាំនេះ។ ដើមឈើថាមពលរបស់ Solar Botanic Trees ក៏បានផ្តល់នូវម្លប់ និងមានសោភ័ណភាព ដែលអាចដំឡើងបានយ៉ាងងាយស្រួលនៅកន្លែងសាធារណៈ។

យោងទៅតាម Energy Saving Trust (EST) ដែលជាអង្គការរបស់ចក្រភពអង់គ្លេសដែលមានឯកទេសក្នុងដំណោះស្រាយកាបូនទាប បានឱ្យដឹងថា តម្លៃនៃដើមឈើថាមពលអគ្គិសនីអាចស្ថិតនៅក្នុងចន្លោះពី ២២,០០០ ទៅ ៣០,០០០ ដុល្លារ។ដើមឈើថាមពលអគ្គិសនីនីមួយៗនឹងត្រូវបានបំពាក់ដោយប្រព័ន្ធផ្ទុក និងគ្រប់គ្រងថាមពលដោយ AI ដែលអាចភ្ជាប់ដើមឈើជាច្រើនដើម្បីបង្កើតជាបណ្តាញខ្នាតតូចក្នុងតំបន់ ឬភ្ជាប់ដើមឈើទៅបណ្តាញជាតិដើម្បីបំប្លែងថាមពលលើស។ ដើមឈើក៏អាចទាញអគ្គិសនីពីបណ្តាញ ដើម្បីសាករថយន្តនៅពេលយប់ ឬក្នុងរដូវរងាផងដែរ។

ទោះជាយ៉ាងណាក៏ដោយ ដើម្បីកាត់បន្ថយការពឹងផ្អែកលើបណ្តាញអគ្គិសនី Solar Botanic Trees គ្រោងនឹងបញ្ចូលថ្មនៅក្នុងធុងដែលជួយផ្ទុកថាមពលលើសនៅពេលថ្ងៃសម្រាប់ប្រើប្រាស់នៅពេលយប់។ នៅឆ្នាំ ២០២៥ ក្រុមហ៊ុន Solar នឹងសាងសង់ដើមឈើអគ្គិសនីយ៉ាងហោចណាស់ ១,០០០ ដើមក្នុងមួយឆ្នាំ។ ក្រុមហ៊ុន ក៏បាននិយាយថាខ្លួននឹងសាងសង់ដើមឈើដំបូងគេនៅក្នុងចក្រភពអង់គ្លេសមុនពេលពង្រីកពាណិជ្ជកម្មនៅទូទាំងទ្វីបអឺរ៉ុបនិងអាមេរិកខាងជើង៕

ប្រភព៖vnexpress

រដ្ឋធានីព្យុងយ៉ាង៖ កូរ៉េខាងជើង បានប្រកាស អំពីការបាញ់ផ្កាយរណចារកម្មរបស់ខ្លួន ធ្លាក់ចូលទៅក្នុងសមុទ្រ ស្របពេលក្រុងតូក្យូ បានព្រមានអំពីការដាក់ពង្រាយប្រព័ន្ធការពារដែនអាកាសរបស់ខ្លួន ឲ្យស្ថិតក្នុងការប្រុងជើងការ សម្រាប់ការបាញ់កម្ទេចមីស៊ីលណាមួយរបស់ក្រុងព្យុងយ៉ាង ហោះចូលមកលើដែនអាកាសរបស់ជប៉ុន។

សារព័ត៌មានរបស់ចក្រភពអង់គ្លេស BBC បានចេញផ្សាយ កាលពីព្រឹក ថ្ងៃពុធ ទី៣១ ខែឧសភា ឆ្នាំ២០២៣ ថា កូរ៉េខាងជើង បានអះអាង ថា ឧបទ្ទវហេតុនេះ បានកើតឡើង ស្របពេលក្រុងព្យុងយ៉ាង គ្រោងនឹងបញ្ជូនផ្កាយរណបអវកាសចារកម្មរបស់ខ្លួន ជាដំបូង ទៅកាន់ទីអវកាស ប៉ុន្ដែរ៉ុក្កែតនោះ បានធ្លាក់ចូលទៅក្នុងសមុទ្រ។

ការបាញ់រ៉ុក្កែតរបស់កូរ៉េខាងជើង បានជំរុញឱ្យជប៉ុន ព្រមានដល់អ្នកស្រុករបស់ខ្លួន នៅទីក្រុងអូគីណាវ៉ា ឲ្យស្ថិតក្នុងការប្រុងប្រយ័ត្ន។ ប៉ុន្តែក្រោយមក ក៏មានសេចក្ដីរាយការណ៍ ថា ការបាញ់រ៉ុក្កែតនោះ មិនបានបង្កគ្រោះថ្នាក់ មកលើទឹកដីរបស់ជប៉ុន នោះឡើយ។

កូរ៉េខាងជើង បានប្រកាសមុននេះ ថា ក្រុងព្យុងយ៉ាង មានគម្រោងនឹងបាញ់បង្ហោះផ្កាយរណប នៅថ្ងៃទី១១ ខែមិថុនា សម្រាប់តាមដានសកម្មភាពយោធារបស់សហរដ្ឋអាមេរិក នៅលើឧបទ្វីកូរ៉េ។ ឥឡូវនេះ ក្រុងព្យុងយ៉ាង បានប្រកាស ថា កូរ៉េខាជើង នឹងមានគោលបំណង បាញ់បង្ហោះរ៉ុក្កែតចារកម្មជាលើកទី២ នៅក្នុងពេលខាងមុខដ៏ឆាប់ៗនេះ។

លោក ហ៊្វូមីអូ គីស៊ីដា (Fumio Kishida) នាយករដ្ឋមន្រ្ដីជប៉ុន បានបញ្ជាក់ ថា កូរ៉េខាងជើង ហាក់បី ដូចជា បាញ់មីស៊ីលផ្លោង ហើយក្រុងតូក្យូ កំពុងតែវិភាគព័ត៌មានលម្អិតបន្ថែមទៀត។ ឥឡូវនេះ នៅទាន់មិនមានសេចក្ដីរបាយការណ៍ អំពីការខូចខាត ក្រោយការបាញ់បង្ហោះរ៉ុក្កែតរបស់កូរ៉េខាងជើង នោះទេ។ ជប៉ុន បានអះអាង នៅមុននេះបន្ដិច ថា ក្រុងតូក្យូ បានត្រៀមខ្លួនរួចជាស្រេច ដើម្បីបាញ់ទម្លាក់រាល់មីស៊ីលណាមួយ បង្កនូវការគំរាមកំហែង មកលើទឹកដីរបស់ជប៉ុន។

ភាពវឹកវរ និង ការច្របូកច្របល់ នៅក្នុងទីក្រុងសេអ៊ូល រដ្ឋធានីរបស់កូរ៉េខាងត្បូង បានកើតឡើង កាលពីព្រឹក ថ្ងៃពុធ វេលាក្នុងស្រុក ខណៈមនុស្សបានភ្ញាក់ពីដំណេក ជាមួយនឹងការឮសំឡេងស៊ីរ៉ែនប្រកាសអាសន្ន ពីការវាយប្រហារតាមអាកាស និង សារបន្ទាន់មួយ បានប្រាប់ដល់ពួកគេ ឱ្យរៀបចំ សម្រាប់ការជម្លៀស ប៉ុន្ដែត្រឹមតែ២០នាទីក្រោយមក ក៏បានផ្ញើសារអំពីកំហុសឆ្គងនេះ។

ប្រទេសកូរ៉េ ត្រូវបានពុះហែកចែកគ្នាជា២ប្រទេស អស់រយៈពេល៧០ឆ្នាំកន្លងមកហើយ ក្រោមមនោគមន៍វិជ្ជាតាមបែបកុម្មុយនិស្ដ និង លោកសេរី។ ឥឡូវនេះ ភាពតានតឹង នៅលើឧបទ្វីបកូរ៉េ កំពុងតែកើនឡើង ខណៈមានការចោទប្រកាន់ ថា កូរ៉េខាងជើង កំពុងតែបង្កនូវការគំរាមកំហែង មកលើកូរ៉េខាងត្បូង។ ប៉ុន្ដែប្រសិនបើមានការប្រកាសអាសន្នណាមួយ នាពេលអនាគត នឹងនាំឲ្យមានសំណួរមួយចំនួន ចោទសួរថា តើនឹងត្រូវយកចិត្តទុកដាក់ ឬ ក៏ត្រូវលុបចោល អំពីកំហុសឆ្គងផ្សេងៗទៀត?

ទីភ្នាក់ងារសារព័ត៌មានរបស់កូរ៉េខាងត្បូង Yonhap (យ៉ុនហាប) បានរាយការណ៍ កាលពីព្រឹក ថ្ងៃពុធ ថា កងទ័ពកូរ៉េខាងត្បូង បានអះអាង ថា មីស៊ីលនោះ ប្រហែលជាបានបំផ្ទុះ នៅលើអាកាស ឬ ក៏អាចធ្លាក់មកក្នុងសមុទ្រវិញ ក្រោយពេលវាបានបាត់ ចេញពីពីប្រព័ន្ធរ៉ាដា។ ប៉ុន្ដែបើទោះជាយ៉ាងណាក្ដី ក៏កូរ៉េខាងត្បូង នឹងវិភាគលម្អិត លើបញ្ហានេះបន្ដទៀត។

ក្រុមអ្នកវិភាគ បានបញ្ជាក់ ថា ផ្ការណបនោះ ជាផ្នែកមួយ នៃកម្មវិធីបច្ចេកវិទ្យាឈ្លបយកការណ៍ ដោយរាប់បញ្ចូលទាំងដ្រូន ផងដែរ។ ក្រុងព្យុងយ៉ាង មានគោលបំណង ធ្វើឲ្យសមត្ថភាពអាវុធនុយក្លេអ៊ែររបស់កូរ៉េខាងជើង កាន់តែល្អប្រសើរឡើង សម្រាប់ការវាយប្រហារទៅលើគោលដៅនានា នៅក្នុងករណីមានសង្គ្រាមផ្ទុះឡើង។

ក្រសួងការពារជាតិជប៉ុន បានបញ្ជាក់ នៅក្នុងសេចក្ដីថ្លែងការណ៍មួយ កាលពីប៉ុន្មានថ្ងៃមុននេះ ថា «យើងនឹងចាត់វិធានការណ៍បំផ្លិចបំផ្លាញ ប្រឆាំងនឹងមីស៊ីលបាល្លិស្ទីក និង មីស៊ីលផ្សេងៗទៀត បាញ់បំពារបំពាន ចូលមកលើទឹកដីរបស់យើង។ ជប៉ុន អាចនឹងប្រើប្រាស់ប្រព័ន្ធការពារមីស៊ីល ប្រភេទ Standard Missile-3 (ស្ដែនដាដ មីស៊ីល-៣) ហៅកាត់ SM-3 ឬ មីស៊ីល Patriot PAC-3 (ប៉ាទ្រីយ៉ូត ភីអាស៊ី-3 ដើម្បីកម្ទេចមីស៊ីលរបស់កូរ៉េខាងជើង។

បណ្ដាញទូរទស្សន៍របស់ជប៉ុន NHK បានផ្សាយ កាលពីថ្ងៃចន្ទ ថា លោក ហ៊្វូមីអូ គីស៊ីដា (Fumio Kishida) នាយករដ្ឋមន្រ្ដីជប៉ុន បានសង្កត់ធ្ងន់ ថា គាត់ចង់ធ្វើការឲ្យកាន់តែជិតស្និទ្ធជាមួយសហរដ្ឋអាមេរិក និង ប្រទេសកូរ៉េខាងត្បូង ជុំវិញផែនការបាញ់បង្ហោះរបស់កូរ៉េខាងជើង តាមអ្វីដែលក្រុងព្យុងយ៉ាង ហៅថាជាផ្កាយរណបនោះ។ បើទោះជាទីក្រុងព្យុងយ៉ាង បាននិយាយសំដៅទៅលើមីស៊ីលនោះ ថា ជាការបាញ់បង្ហោះផ្កាយរណបយ៉ាងណាក៏ដោយ ក៏ការបាញ់បង្ហោះ ដោយប្រើប្រាស់បច្ចេកវិទ្យាមីស៊ីលផ្លោង បានរំលោភទៅលើដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ផងដែរ៕

ប្រទេសបារាំង ៖ ប្រទេសបារាំងបានហាមឃាត់ការហោះហើរក្នុងស្រុករយៈពេលខ្លី និងមិនលើសពី២ម៉ោងកន្លះ ដើម្បីកាត់បន្ថយការបញ្ចេញកាបូនឌីអុកស៊ីត ហើយផ្លាស់ប្តូរទៅធ្វើដំណើរតាមរថភ្លើងអាកាសជំនួសវិញ ។ ប៉ុន្តែអ្នកបរិស្ថានអះអាងថា បារាំងគួរតែចាប់អារម្មណ៍លើការដោះស្រាយបញ្ហាសំខាន់ៗ និងរកមូលហេតុពិតប្រាកដច្រើនជាង ។

កាលពីមុន រដ្ឋាភិបាលបារាំងបានចេញច្បាប់ហាមឃាត់ការហោះហើររយៈពេលខ្លី ដើម្បីទប់ស្កាត់បម្រែបម្រួលអាកាសធាតុ ខណៈនាយកដ្ឋានដឹកជញ្ជូន និងបរិស្ថានអឺរ៉ុបអះអាងថា យន្តហោះដែលមានអ្នកជិះតែម្នាក់បានបញ្ចេញកាបូនឌីអុកស៊ីតច្រើនជាងរថភ្លើងរហូតដល់៧៧ដង ។ ហេតុនេះ ទើបប្រទេសបារាំងបានហាមឃាត់ការហោះហើររយៈពេលខ្លីនៅប្រទេសរបស់ខ្លួន ហើយគេសង្កេតឃើញភាគច្រើនជាការធ្វើដំណើររវាងអាកាសយានដ្ឋាន Paris Orly និងតំបន់នានា ដូចជា Nantes, Lyon និង Bordeaux ។ បើសេវាកម្មធ្វើដំណើរតាមរថភ្លើងល្អប្រសើរឡើង គេរំពឹងថា ប្រទេសបារាំងនឹងហាមឃាត់ការហោះហើរក្នុងស្រុករយៈពេលខ្លីបន្ថែមទៀត ។

ការហាមឃាត់នេះ គឺជាផ្នែកមួយរបស់ច្បាប់ពាក់ព័ន្ធនឹងអាកាសធាតុនៅប្រទេសបារាំង ដែលទើបចេញថ្មីកាលពីឆ្នាំ២០២១ ។ ពលរដ្ឋអាចធ្វើដំណើរតាមរថភ្លើងជំនួសវិញ ដោយរដ្ឋាភិបាលបារាំងបានចេញច្បាប់បន្ថែមទៀតដើម្បីផ្តល់ភាពងាយស្រួលដល់ការធ្វើដំណើរ ។ ហេតុនេះ គេបានដាក់កំណត់ឱ្យសេវាកម្មរថភ្លើងត្រូវចេញដំណើរឱ្យទៀងទាត់ពេលវេលា និងមានរថភ្លើងគ្រប់គ្រាន់សម្រាប់ទទួលចំនួនអ្នកដំណើរកើនឡើង ។

រដ្ឋមន្ត្រីក្រសួងគមនាគមន៍ លោក Clément Beaune លើកឡើងថា ៖ «វាជាជំហានសំខាន់មួយរបស់គោលនយោបាយកាត់បន្ថយការបញ្ចេញឧស្ម័នផ្ទះកញ្ចក់ ហើយខ្ញុំមានមោទនភាពដែលប្រទេសបារាំងបានគិតគូរបញ្ហាបរិស្ថាន» ។ ចំណែកមន្ត្រីគ្រប់គ្រងផ្នែកដឹកជញ្ជូនរបស់ Greenpeace ប្រទេសបារាំងនិយាយថា ៖ «ការហាមឃាត់នេះបានដំណើរការក្នុងផ្លូវត្រឹមត្រូវ ហើយយើងត្រូវមានមហិច្ឆតា និងគោលដៅឱ្យវែងឆ្ងាយជាងនេះ» ។

ទោះយ៉ាងណា អ្នកបរិស្ថានជាច្រើននាក់និយាយថា ការហាមឃាត់ការធ្វើដំណើរតាមយន្តហោះរយៈពេលខ្លី គឺជាចំណុចចាប់ផ្តើមដ៏ល្អមួយ និងមានផលប៉ះពាល់តិចតួចលើការបញ្ចេញកាបូនឌីអុកស៊ីត ហើយចំណុចសំខាន់ គឺបារាំងត្រូវចាត់ការលើបញ្ហាប្រេងឥន្ធនៈហ្វូស៊ីល រួមទាំងការប្រមូលពន្ធលើការបំពុលបរិស្ថានពីក្រុមហ៊ុនអាកាសចរណ៍ផ្សេងៗ ៕ ប្រភព ៖ environman

ប្រទេសចិន ៖ អតិថិជនចិនដែលនិយមទិញទុរេនថៃអាចបរិភោគទុរេនស្រស់ជាងមុន ដោយសារការដឹកជញ្ជូនទុរេនតាមរថភ្លើងឆ្លងកាត់ប្រទេសចិន និងឡាវ មានលក្ខណៈងាយស្រួល ។ ក្រុមហ៊ុនចិននាំចូលផ្លែឈើពីតំបន់អាស៊ីអាគ្នេយ៍លើកឡើងថា នៅឆ្នាំ២០២៣ ប្រទេសថៃអាចលក់ទុរេនក្នុងតម្លៃខ្ពស់បំផុតក្នុងរយៈពេលជិត៥ឆ្នាំ ។ ដូច្នេះ ខ្សែរថភ្លើងតភ្ជាប់ពីទីក្រុងគុនមីងរបស់ចិន ទៅកាន់ទីក្រុងវៀងចន្ទន៍របស់ឡាវ បានជួយជំរុញដល់ការនាំចូលផ្លែឈើរបស់ក្រុមហ៊ុនចិន ។

ការដឹកជញ្ជូនទុរេនពីប្រទេសថៃទៅចិនបានចំណាយពេលតិចជាងមុន គឺគេចំណាយពេលត្រឹមតែ៣ថ្ងៃប៉ុណ្ណោះសម្រាប់ការដឹកជញ្ជូនទុរេនតាមរថភ្លើងចិន-ឡាវ ។ កាលពីមុន ប្រទេសចិនបាននាំចូលទុរេនមិនទាន់ទុំល្អ ព្រោះមិនអាចដឹកជញ្ជូនទុរេនទុំតាមផ្លូវគោក និងផ្លូវទឹកបានទេ ប៉ុន្តែបច្ចុប្បន្ននេះ គេអាចនាំចូលទុរេនទុំបានច្រើនជាងមុន ដោយសារការប្រើប្រាស់ផ្លូវរថភ្លើងចិន-ឡាវ បានបង្កលក្ខណៈងាយស្រួលក្នុងការដឹកជញ្ជូន ។

ចំណែកអ្នកត្រួតពិនិត្យគុណភាពទុរេនប្រចាំទីក្រុងគុនមីងលើកឡើងថា នៅឆ្នាំ២០២៣ ប្រទេសថៃបាននាំចេញទុរេនទុំមកចិនច្រើនជាងមុន ដោយសារចំណាយពេលខ្លីក្នុងការដឹកជញ្ជូន ហើយទុរេនឆ្នាំនេះមានគុណភាពល្អ និងរសជាតិផ្អែមឆ្ងាញ់ ។ តាមទិន្នន័យរបស់ក្រសួងពាណិជ្ជកម្មបង្ហាញថា ប្រទេសចិនជាទីផ្សារធំបំផុតសម្រាប់ការនាំចេញទុរេនថៃនៅឆ្នាំ២០២២ គឺស្មើនឹង៩៦% នៃបរិមាណនាំចេញសរុប និងស្មើទឹកប្រាក់ចំនួន៣.០៩ពាន់លានដុល្លារអាមេរិក ។

ក្រៅពីនេះ ផ្លែឈើផ្សេងទៀតនៅតំបន់អាស៊ាន ក៏បានដឹកជញ្ជូនតាមរយៈរថភ្លើងចិន-ឡាវផងដែរ ។ យោងតាមក្រុមហ៊ុន China Railway Kunming Group បានលើកឡើងកាលពីថ្ងៃទី១០ ខែឧសភា កន្លងមកថា ផ្លែឈើនាំចូលដូចជា មង្ឃុត ទុរេន មៀន និងផ្លែឈើផ្សេងៗសរុបចំនួន១៧.២០០តោន គឺត្រូវបានគេដឹកជញ្ជូនតាមរថភ្លើងខាងលើនេះ តាំងពីខែធ្នូ ឆ្នាំ២០២២ មកម្ល៉េះ ៕ ប្រភព ៖ AEC connect

ប្រទេសថៃ ៖ ថៃបានជាប់ចំណាត់ថ្នាក់ទី៤ ជាប្រទេសដែលជនជាតិចិនត្រូវការទិញអចលនទ្រព្យនៅក្រៅប្រទេសនៅឆ្នាំ២០២២ បន្ទាប់ពីប្រទេសអូស្ត្រាលី កាណាដា និងសហរដ្ឋអាមេរិក ។ ក្រុមអតិថិជនចិនបានចាប់អារម្មណ៍លើអចលនទ្រព្យនៅប្រទេសថៃជាខ្លាំង ដោយសារមានតម្លៃគួរឱ្យចាប់អារម្មណ៍ និងដើម្បីស្វែងរកប្រាក់ចំណេញពីការវិនិយោគ ជាពិសេស ខុនដូប្រណីតស្ថិតក្នុងទីតាំងល្អៗនៅទីក្រុងបាងកក ។

យោងតាមការចុះផ្សាយរបស់សារព័ត៌មាននានាបង្ហាញថា ជនជាតិចិនភាគច្រើនត្រូវការទិញខុនដូប្រណីតនៅទីតាំងល្អៗសម្រាប់ស្នាក់នៅក្នុងប្រទេសថៃ ក្នុងនោះមាន១ ឬ២បន្ទប់ និងតម្លៃចាប់ពី១៥លានបាត ដល់៣០លានបាត ។ ចំណែកលំនៅឋាននៅប្រទេសថៃវិញ ជនជាតិចិនចង់ទិញលំនៅឋានមាន៤បន្ទប់ និងមានទីតាំងនៅភាគខាងកើតទីក្រុងបាងកក ក្នុងតម្លៃចាប់ពី៣០លានបាត ដល់១០០លានបាត ហើយភាគច្រើនពួកគេទិញដើម្បីស្នាក់នៅដូចគ្នា ។

ជាក់ស្តែង នៅតំបន់ហួយខ្វាវ ជាតំបន់មួយដែលជនជាតិចិនចាប់អារម្មណ៍ទិញអចលនទ្រព្យច្រើនដូចជា គម្រោងខុនដូប្រណីតចំនួន២៩ជាន់ មាន៤៧៧បន្ទប់ ខណៈគម្រោងនេះនឹងសាងសង់រួចរាល់នៅឆ្នាំ២០២៤ ហើយក៏មានគម្រោងខុនដូប្រណីតមាន៣១ជាន់ និងបន្ទប់ចំនួន៤៥០បន្ទប់ ដែលស្ថិតនៅក្បែរគ្នាផងដែរ ។

ប្រធានគម្រោងខុនដូនេះបញ្ជាក់ថា គេបានលក់គម្រោងនេះអស់៦០%ហើយ ក្នុងនោះ២០% ជាអតិថិជនចិន ។ បរិវេណនេះទទួលបានការពេញនិយមខ្លាំង ព្រោះវាមានទីតាំងនៅជិតស្ថានទូតចិន ងាយស្រួលធ្វើដំណើរ ហើយអតិថិជនភាគច្រើនជាវិនិយោគិននៅប្រទេសថៃ ។ ចំណែកអាជីវករនៅតំបន់នេះនិយាយថា ការត្រឡប់មកវិញរបស់ជនជាតិចិនបានធ្វើឱ្យតម្លៃទិញ និងជួលអចលនទ្រព្យថៃកើនឡើងខ្ពស់ ។

លោក Wichai Wiratkaphan ជាមន្ត្រីធនាគារ និងនាយកមជ្ឈមណ្ឌលព័ត៌មានអចលនទ្រព្យបញ្ជាក់ថា ជនជាតិចិនបានមកទិញអចលនទ្រព្យថៃតាំងពីចុងឆ្នាំ២០២២ មកម៉្លេះ ។ លោករំពឹងថា នៅឆមាសទី២ ឆ្នាំ២០២៣ ការទិញអចលនទ្រព្យថៃរបស់ជនជាតិចិននឹងកើនឡើងទៀត ប៉ុន្តែអាចនឹងផ្លាស់ប្តូរខ្លះៗ គឺការទិញសម្រាប់វិនិយោគ មកសម្រាប់រស់នៅរយៈពេលយូរវិញ ព្រោះពួកគេមានបទពិសោធន៍ដោយសារចិនបិទប្រទេស ហេតុនេះ ពួកគេមានតម្រូវការទិញផ្ទះទី២ នៅក្រៅប្រទេស ។

លោក Wichai Wiratkaphan វាយតម្លៃថា នៅឆ្នាំ២០២៣ ការផ្ទេរកម្មសិទ្ធិសម្រាប់តែជនជាតិចិននឹងកើនឡើង ស្មើនឹងទឹកប្រាក់៨ម៉ឺនលានបាត ពីចំនួនការផ្ទេរកម្មសិទ្ធិសរុបស្មើ១០០ម៉ឺនលានបាត ។ លោកបន្តថា ជនជាតិចិននាំគ្នាមកទិញអចលនទ្រព្យនៅថៃ គុណសម្បត្តិ គឺនឹងជួយដោះស្រាយបញ្ហាខុនដូប្រណីតលើសលប់ក្នុងទីផ្សារ ប៉ុន្តែគុណវិបត្តិវិញ វានឹងធ្វើឱ្យតម្លៃអចលនទ្រព្យនៅថៃកើនឡើង រហូតដល់ជនជាតិថៃគ្មានលទ្ធភាពទិញ ។ ហេតុនេះ លោកបានស្នើឱ្យរដ្ឋាភិបាលថៃប្រមូលប្រាក់បន្ថែមពីការលក់អចលនទ្រព្យឱ្យជនបរទេសដើម្បីបង្កើតមូលនិធិជួយពលរដ្ឋថៃ ៕ ប្រភព ៖ propertyjibjib

បរទេស៖ រដ្ឋមន្ត្រីក្រសួងពាណិជ្ជកម្មចិន លោក Wang Wentao បានអំពាវនាវឱ្យជប៉ុនបញ្ឈប់ការនាំចេញបច្ចេកវិទ្យាបន្ទះឈីប semiconductor របស់អាមេរិក។
នៅក្នុងសេចក្តីថ្លែងការណ៍មួយកាលពីថ្ងៃទី ២៩ ខែឧសភា លោក Wang បានរឹតបន្តឹងការនាំចេញឧបករណ៍អាមេរិកដែលជួយបង្កើតបន្ទះសៀគ្វីថាជា “ទង្វើខុសច្បាប់” និង “ការរំលោភយ៉ាងធ្ងន់ធ្ងរ” នៃច្បាប់សេដ្ឋកិច្ច និងពាណិជ្ជកម្មអន្តរជាតិ។ ការកត់សម្គាល់នេះបានធ្វើឡើងបន្ទាប់ពីកិច្ចពិភាក្សារបស់លោក Wang ជាមួយរដ្ឋមន្ត្រីពាណិជ្ជកម្មជប៉ុនលោក Yasutoshi Nishimura ក្នុងសន្និសីទកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ដែលបានធ្វើឡើងកាលពីចុងសប្តាហ៍នៅទីក្រុង Detroit ។

ក្នុងសេចក្តីរាយការណ៍នេះកាលពីពាក់កណ្តាលខែឧសភា ប្រទេសចិនក៏ធ្លាប់បានហាមឃាត់ក្រុមហ៊ុនផលិតបន្ទះឈីបអាមេរិក Micron ម្តងហើយដោយលើកឡើងពី “ហានិភ័យសន្តិសុខតាមអ៊ីនធឺណិត ដែលបង្កហានិភ័យសន្តិសុខយ៉ាខ្លាំងចំពោះខ្សែសង្វាក់ផ្គត់ផ្គង់ហេដ្ឋារចនាសម្ព័ន្ធព័ត៌មានសំខាន់ៗរបស់ប្រទេសចិន”។ ហើយក្នុងពេលជាមួយគ្នានោះដែរប្រទេសចិនក៏បានបញ្ចុះបញ្ចូលប្រទេសជប៉ុន ហូឡង់ និងកូរ៉េខាងត្បូងឱ្យបញ្ឈប់ការនាំចេញបន្ទះឈីបរបស់អាមេរិកផងដែរ។

ទោះជាយ៉ាងណាក៏ដោយ លោក Nishimura រដ្ឋមន្ត្រីពាណិជ្ជកម្មជប៉ុនបានជួបជាមួយរដ្ឋមន្ត្រីក្រសួងពាណិជ្ជកម្មអាមេរិកលោក Gina Raimondo ដោយអ្នកទាំងពីរបានព្រមព្រៀងគ្នាក្នុងការពង្រឹងកិច្ចសហប្រតិបត្តិការក្នុងការស្រាវជ្រាវ និងការអភិវឌ្ឍបន្ទះឈីប និងបច្ចេកវិទ្យាទំនើបៗដូចជា quantum computing និងសិប្បនិម្មិត។ ប្រទេសជប៉ុនបាននាំចេញឧបករណ៍បន្ទះឈីប semiconductor របស់អាមេរិកចំនួន ២៣ ប្រភេទ ដោយមិនយល់ស្របនឹងការអំពាវនាវរបស់រដ្ឋមន្ត្រីក្រសួងពាណិជ្ជកម្មចិនឡើយ៕ ប្រភព៖vnexpress