ពិតណាស់ ជំងឺធ្លាក់ទឹកចិត្តអាចធ្វើឱ្យមនុស្សជាច្រើននាក់បាត់បង់ជីវិតបាន។ ដូច្នេះដើម្បីកាត់បន្ថយហានិភ័យនៃជំងឺធ្លាក់ទឹកចិត្តនេះ អ្នកគប្បីទៅជួបគ្រូពេទ្យជំនាញផ្នែកចិត្តសាស្ត្រ ឬក៏អាចទទួលទានអាហារសុខភាពមួយចំនួនដែលមានប្រសិទ្ធភាពកាត់បន្ថយហានិភ័យនៃជំងឺធ្លាក់ទឹកចិត្តនេះបាន ដែលអាហារទាំង ៤មុខនោះមានដូចជា៖
១.ស៊ុត៖ ស៊ុតសម្បូរទៅដោយប្រូតេអ៊ីនច្រើន រួមចំណែកដល់រាងកាយដែលមានសុខភាពល្អ សាកសមសម្រាប់អ្នកដែលចង់បង្កើតសាច់ដុំ ងាយស្រួលចម្អិន និងមានប្រសិទ្ធភាពបំផុតក្នុងការកាត់បន្ថយហានិភ័យនៃជំងឺធ្លាក់ទឹកចិត្ត។
២.ត្រីសាម៉ុន៖ ត្រីសាម៉ុង មានផ្ទុកនូវវីតាមីន D ដែលជាសារធាតុចិញ្ចឹមដ៏សំខាន់មួយ ជួយបង្កើនកម្រិត serotonin ក្នុងរាងកាយ នឹងល្អសម្រាប់សុខភាពបេះដូង សុខភាពស្បែក ជាពិសេសនោះក៏អាចកាត់បន្ថយជំងឺធ្លាក់ទឹកចិត្តបានខ្លះផងដែរ។
៣.តៅហ៊ូ ឬសណ្តែកសៀង៖ សណ្តែកសៀងគឺជាគ្រាប់ធញ្ញជាតិដែលសម្បូរទៅដោយសារធាតុ tryptophan ដូច្នេះការទទួលទានសណ្តែកសៀង ឬតៅហ៊ូធ្វើពីសណ្តែកសៀង វាមានអត្ថប្រយោជន៍ដ៏អស្ចារ្យក្នុងការជួយបង្កើនកម្រិត serotonin។
Serotonin គឺជាសារធាតុបញ្ជូនសរសៃប្រសាទដែលបង្កើតឡើងដោយរាងកាយ និងអនុវត្តមុខងារសំខាន់ៗដែលប៉ះពាល់ដល់អារម្មណ៍ ជួយគ្រប់គ្រងអារម្មណ៍នៃភាពអត់ឃ្លាន ឬមានអារម្មណ៍ងងុយគេង ជួយឱ្យគេងលក់ស្រួល និងជួយកាត់បន្ថយជំងឺធ្លាក់ទឹកចិត្ត។
៤.ទឹកដោះគោ ឬឈីស៖ ក្រៅពីជាប្រភពកាល់ស្យូមដ៏សំខាន់ដែលជួយពង្រឹងឆ្អឹង និងធ្មេញ ទឹកដោះគោ ឬឈីស ក៏អាចបង្កើនឱកាសនៃការបង្កើត serotonin បន្ថែមទៀតនៅក្នុងខ្លួនផងដែរ៕ ប្រភព៖sanook