អ្នកស្រាវជ្រាវមកពីសាកលវិទ្យាល័យ Southern Denmark បានណែនាំឱ្យមនុស្សនៅលើពិភពលោកងាកមកជិះកង់ជាចម្បង ក្នុងករណីទៅកន្លែងជិតៗក្នុងចម្ងាយផ្លូវត្រឹម៣គីឡូម៉ែត្រ ។ ការជិះកង់អាចជួយកាត់បន្ថយការបំភាយកាបូនឌីអុកស៊ីតចំនួន៦៨៦លានតោន ដែលបណ្តាលមកពីការបើកបរយានជំនិះផ្សេងៗ និងជាមូលហេតុចម្បងធ្វើឱ្យពិភពលោកក្តៅ ។

ទស្សនាវដ្តី Communications Earth and Environment បានចុះផ្សាយការស្រាវជ្រាវរបស់សាកលវិទ្យាល័យ Southern Denmark ថា បើមនុស្សនៅលើពិភពលោកនាំគ្នាជិះកង់ជំនួសការបើកបររថយន្ត វានឹងជួយកាត់បន្ថយការបំភាយកាបូន គឺស្មើគ្នានឹងចំនួនកាបូនដែលប្រទេសអូស្ត្រាលី ឬអង់គ្លេស បានបំភាយកាបូនរយៈពេល១ឆ្នាំ ។

ក្រៅពីជួយដល់ពិភពលោកហើយ ការជិះកង់ក៏ល្អសម្រាប់សុខភាពផងដែរ ព្រោះការជិះកង់ជាការហាត់ប្រាណមួយ ។ ការស្រាវជ្រាវនេះបង្ហាញទៀតថា អ្នកជិះកង់រាល់ថ្ងៃនឹងប្រឈមជំងឺមហារីក និងជំងឺបេះដូង តិចជាងមនុស្សទូទៅ ហើយវានឹងជួយកាត់បន្ថយជំងឺគាំងបេះដូងរហូតដល់៤៦% ។ ប៉ុន្តែបច្ចុប្បន្ននេះ ចំនួនអ្នកជិះកង់ជាចម្បងមានត្រឹមតែ៥% ប៉ុណ្ណោះក្នុងចំណោមមនុស្សទាំងអស់នៅលើពិភពលោក ហើយវាជាចំនួនតិចតួចបំផុត ។

បើមនុស្សទាំងអស់នាំគ្នាជិះកង់ទៅកាន់កន្លែងជិតៗ វានឹងល្អបំផុតសម្រាប់ពិភពលោករបស់យើង ។ ប៉ុន្តែកត្តាសំខាន់ត្រូវមានការគាំទ្រពីរដ្ឋាភិបាលផងដែរដូចជា ការសាងសង់ផ្លូវមានសុវត្ថិភាព និងមានកន្លែងម្លប់ដើម្បីការពារកំដៅថ្ងៃសម្រាប់អ្នកជិះកង់ផងដែរ ។ ហេតុនេះ ប្រទេសមានអាកាសធាតុត្រជាក់គួរធ្វើជាគំរូឱ្យពលរដ្ឋរបស់ខ្លួនជិះកង់ ចំណែកប្រទេសមានអាកាសធាតុក្តៅជាងតំបន់អឺរ៉ុបវិញ អាចនឹងរង់ចាំរយៈពេលយូរទៀត ព្រោះបើឱ្យពលរដ្ឋជិះកង់ទៅធ្វើការនោះ ពួកគេនឹងត្រូវងូតទឹកម្តងទៀតទើបចូលធ្វើការបាន ។ ប៉ុន្តែពលរដ្ឋរស់នៅប្រទេសក្តៅអាចជិះកង់ទៅផ្សារនៅជិតផ្ទះរបស់ខ្លួន ៕ ប្រភព ៖ environman

ក្រុមហ៊ុនផលិតរថយន្តអាល្លឺម៉ង់បានសម្ពោធរថយន្តរបស់ខ្លួនឈ្មោះថា ID.7 ជាមួយការលេងពណ៌ពេញមួយតួឡាន ក្នុងពិព័រណ៍បច្ចេកវិទ្យាអេឡិចត្រូនិក Consumer Electronics Show (CES) នៅទីក្រុង Las Vegas សហរដ្ឋអាមេរិក។

រថយន្ត ID.7 ជាប្រភេទតួទាបទ្វារបួន ដែលត្រូវបានបង្ហាញក្នុងពិព័រណ៍ផលិតផលបច្ចេកវិទ្យាអេឡិចត្រូនិកដ៏ធំបំផុតក្នុងពិភពលោក។ ម៉ូដែលអគ្គិសនីនេះត្រូវបានស្រោបដោយថ្នាំប្រែពណ៌ឆ្លាតវៃ ដែលលាយបញ្ចូលរវាងបច្ចេកវិទ្យាទឹកថ្នាំ និងការលាបជាច្រើនស្រទាប់នៅលើតួរថយន្ត ដែលបង្កើតបានជាចំណាំងពន្លឺយ៉ាងឡូយលើរថយន្ត ID.7។

ក្រុមហ៊ុន Volkswagen បានហៅរថយន្តនេះថា ជាយានដែលបំពាក់ដោយបច្ចេកវិទ្យាអន្តរសកម្ម ដែលជានិមិត្តរូបនៃដំណើរឆ្ពោះទៅរកបច្ចេកវិទ្យាឌីជីថលទំនើបចុងក្រោយនៃត្រកូលរថយន្តអាល្លឺម៉ង់ដ៏ល្បីល្បាញនេះ។

ការលាបពណ៌លើរថយន្តមិនតិចជាង ៤០ស្រទាប់នោះទេ ហើយស្រទាប់ខ្លះមានធាតុលោហៈចម្លងអគ្គិសនី និងកម្ដៅ រីឯស្រទាប់ខ្លះទៀតជាទឹកថ្នាំអុីសូឡង់។ ទីតាំង ២២ចំណុចលើតួរថយន្តអាចត្រូវបានបញ្ជាដាច់ដោយឡែកពីគ្នា ហើយវាត្រូវបានដំណើរការដោយថាមពលអគ្គិសនីស្ថិតនៅស្រទាប់ក្រោមនៃ ទឹកថ្នាំស្រោបផ្នែកខាងក្រៅបំផុត ដែលជាស្រទាប់អេឡិចត្រូបញ្ចេញពន្លឺ។ប្រសិនបើវាត្រូវបានភ្ជាប់នឹងប្រព័ន្ធសម្លេង ក្រុមហ៊ុន Volkswagen អះអាងថា ចង្វាក់ភ្លេងនឹងត្រូវបានរំលេចតាមរយៈពន្លឺនៅទីតាំងណាមួយនៃតួរថយន្ត។

កាន់តែចម្លែកទៅទៀតនោះ QR codes នៅលើរថយន្តទាំងសងខាង នឹងអនុញ្ញាតឱ្យម្ចាស់រថយន្តបញ្ជាពណ៌វាតាមរយៈស្មាតហ្វូន។ សមត្ថភាពប្ដូរពណ៌របស់វា ក៏ជួយបិទបាំងផ្នែកផត និងប៉ោងនៃតួរថយន្តផងដែរ។

រថយន្ត ID.7 ត្រូវបានគេរំពឹងថា នឹងអាចរត់បានចម្ងាយ ៧០០គីឡូម៉ែត្រ សម្រាប់ការសាកអគ្គិសនីម្ដង។ នៅចំកណ្ដាលរថយន្តមានអេក្រង់ ១៥អុីញ ដែលបញ្ជាចរន្តខ្យល់។ សូម្បីតែដៃចង្កូតក៏នឹងអាចបញ្ចេញកម្ដៅឧណ្ណៗ ដល់ដៃអ្នកបើកបរផងដែរ។

លោក Thomas Schäfer អគ្គនាយកក្រុមហ៊ុន Volkswagen បាននិយាយថា ID.7 ជារថយន្តមួយក្នុងចំណោមឡានអគ្គិសនីទាំង ១០ម៉ូដែលរបស់អាល្លឺម៉ង់ ដែលគ្រោងនឹងសម្ពោធការលក់នៅឆ្នាំ ២០២៦។ ពេលនេះក្រុមហ៊ុនកំពុងឆ្លើយតបនឹងមតិពីបទពិសោធន៍អ្នកប្រើប្រាស់ដើម្បីធ្វើការកែល្អ ហើយម៉ូដែល ID.7 ដែលផលិតតម្រូវសម្រាប់ទីផ្សារនឹងបង្ហាញខ្លួនជាថ្មីនៅពាក់កណ្ដាលឆ្នាំ ២០២៣ មុនការសម្ពោធលក់ជាផ្លូវការ៕

មនុស្សជាង៦មុឺននាក់ បានសម្រុកទៅទិញសំបុត្រ នៅក្នុងការប្រកួតរវាងឥណ្ឌូនេស៊ី និងម្ចាស់ជើងឯក World Cup អាហ្សង់ទីន ដោយមិនដល់មួយថ្ងៃផង សំបុត្រត្រូវបានលក់អស់គ្មានសល់។

តែយ៉ាងណាមិញ ក្រោយមកពួកគេក៏បានសម្តែងការខកចិត្តព្រោះថា Messi បានប្រកាសដកខ្លួន​ ដោយមិនកចូលរួមប្រកួតមិត្តភាពជាមួយឥណ្ឌូនេសុីនោះទេ។ ជុំវិញបញ្ហានេះ មិនមានប្រព័ន្ធផ្សព្វផ្សាយណាមួយ ចេញមកបញ្ជាក់អំពីមូលហេតុនោះទេ ក៏ប៉ុន្តែមានអ្នកវិភាគកីឡាមួយចំនួនលើកឡើងថា ដោយសារកត្តាសុវត្ថិភាពរបស់ Messi និងគ្រួសារ។

សំបុត្រចូលទស្សនារវាង ឥណ្ឌូនេស៊ី ប៉ះ អាហ្សង់ទីន គឺមានតែ ៦០,០០០ សន្លឹកប៉ុណ្ណោះ ដោយវាបដាក់លក់តាំងពីថ្ងៃទី៦ ខែមិថុនា ឆ្នាំ២០២៣  ដោយតម្លៃចាប់ពី៖

• តំបន់ CAT3 : 600,000 rupiah = 39.83 ដុល្លារ
• តំបន់ CAT2 : 1,200,000 rupiah = 79.63 ដុល្លារ
• តំបន់ CAT1 : 2,500,000 rupiah = 165.90 ដុល្លារ
• តំបន់ VIP : 4,250,000 rupiah = 282.11 ដុល្លារ

សូមជម្រាបផងដែរ ការប្រកួតនេះ នឹងប្រព្រឹត្តិទៅនៅថ្ងៃទី១៩ ខែមិថុនា ខាងមុខ នៅកីឡដ្ឋាន Gelora Bung Karno ប្រទេសឥណ្ឌូនេសុី៕

អង់គ្លេស៖ Deep Sleep Hotel គឺជាសណ្ឋាគារមួយដែលសាងសង់នៅក្នុងរូងភ្នំ Snowdonia នៃប្រទេសអង់គ្លេស និងមានទីតាំងនៅជម្រៅ ៤១៩ ម៉ែត្រ។ សណ្ឋាគារនេះបានបើកដំណើរការតាំងពីខែមេសា ហើយត្រូវបានគេហៅឈ្មោះក្រៅថា “សណ្ឋាគារជ្រៅបំផុតនៅលើភពផែនដី”។
នៅក្នុង Deep Sleep Hotel នេះមាន កន្លែងទទួលទានអាហារ, បន្ទប់ទឹកដ៏ទំនើប, បន្ទប់គេងបែបរ៉ូមែនទិក ដោយប្រើឧបករណ៍បំភ្លឺជាប្រភេទវ៉ុលទាប ដំណើរការដោយថ្ម 12v លើសពីនេះក៏មាន Wifi និងស្ទ្រីមតូចមួយនៅក្នុងអណ្តូងរ៉ែផងដែរ។

Deep Sleep Hotel នេះគឺពិតជាសាកសមចំពោះភ្ញៀវទេសចរណាដែលចូលចិត្តការផ្សងព្រេងណាស់ ដោយសារតែវាស្ថិតនៅក្នុងដីដ៏ជ្រៅ និងមានសីតុណ្ហភាពជុំវិញគឺត្រជាក់ខ្លាំងរហូតដល់ ១០ អង្សាសេ។ ម្ចាស់សណ្ឋាគារបានសាងសង់ស្រទាប់ការពារយ៉ាងក្រាស់ ដូច្នេះហើយនៅខាងក្នុងបន្ទប់គេងគឺមានភាពកក់ក្តៅខ្លាំង។ ប៉ុន្តែទោះជាយ៉ាងណាក៏ដោយ ភ្ញៀវនៅតែត្រូវបានណែនាំអោយយកសំលៀកបំពាក់ក្រាស់ៗ ដែលងាយស្រួលសម្រាប់ផ្លាស់ទី។

ដើម្បីអាចទៅដល់សណ្ឋាគារនេះ ភ្ញៀវត្រូវតែឆ្លងកាត់ ដំណើរផ្សងព្រេងក្រោមដីជាមុនសិន។ ការធ្វើដំណើរចាប់ផ្តើមនៅម៉ោង ៥ ល្ងាចនៅឯមូលដ្ឋាន Tanygrisiau នៅជិតទីក្រុង Blaenau Ffestiniog។ បន្ទាប់ពីដើររយៈពេល ៤៥ នាទី ភ្ញៀវគ្រប់រូបត្រូវពាក់មួកសុវត្ថិភាព ពាក់ឧបករណ៍ការពារដូចជាភ្លើង ខ្សែពួរ និងស្បែកជើងកវែងពិសេស ដើម្បីឆ្លងកាត់ផ្លូវងងឹត រអិល ផ្លូវរដិបរដុប និងឡើងជណ្តើរ និងឆ្លងកាត់ស្ពានចាស់ជាច្រើនទៀត។

គួរបញ្ជាក់ដែរថា សណ្ឋាគារមិនទទួលយកកុមារអាយុក្រោម ១៤ ឆ្នាំទេ។ មនុស្សដែលមានអាយុ ១៤ ឆ្នាំឡើងទើបអនុញ្ញាតឱ្យទស្សនា ម្យ៉ាងវិញទៀតចំពោះការកក់ត្រូវតែធ្វើឡើងតាមអ៊ីនធឺណែតជាមុនសិន ព្រោះកន្លែងមានកំណត់។ ហើយអ្វីដែលប្លែកនោះគឺ សណ្ឋាគារនេះបើកតែម្តងក្នុងមួយសប្តាហ៍ប៉ុណ្ណោះ គឺចាប់ពីយប់ថ្ងៃសៅរ៍ ដល់ព្រឹកថ្ងៃអាទិត្យ ចំពោះតម្លៃបន្ទប់វិញគឺជាង ៤០០ ដុល្លារអាមេរិក៕ ប្រភព៖vnexpress

រដ្ឋធានីកៀវ៖ ថ្វីបើក្រុងកៀវ កំពុងតែវាយលុករុលទៅមុខ រំដោះទឹកដីរបស់ខ្លួន ចេញពីការគ្រប់គ្រងរបស់ទាហានរុស្ស៊ី ប្រកបដោយជោគជ័យ នៅលើសមរភូមិមួយចំនួនយ៉ាងណាក៏ដោយ ប៉ុន្ដែមេទ័ពចម្រុះរបស់សហរដ្ឋអាមេរិក បានចាត់ទុកការវាយបករបស់កងទ័ពអ៊ុយក្រែន ក្លាយជាការប្រយុទ្ធដ៏លំបាកបំផុត និង មានការចំណាយយ៉ាងច្រើន។

សារព័ត៌មាន Al Jazeera បានចេញផ្សាយ នៅថ្ងៃសុក្រ ទី១៦ ខែមិថុនា ថា លោកនាយឧត្ដមសេនីយ៍ ម៉ាក មីលឡេ (Mark Milley) នាយអគ្គសេនាធិការចម្រុះ នៃកងទ័ពសហរដ្ឋអាមេរិក បានបញ្ជាក់ ថា កងទ័ពអ៊ុយក្រែន កំពុងតែវាយរុលទៅមុខ នៅក្នុងការវាយបក ទៅលើកម្លាំងទាហានរុស្ស៊ី។ ជ័យជម្នះនេះ នឹងត្រូវការពេលវេលាយូរ និង មានការចំណាយខ្ពស់។

មេទ័ពកំពូលរបស់សហរដ្ឋអាមេរិក រូបនេះ បានសង្កត់ធ្ងន់ ថា កងទ័ពរំដោះទឹកដីរបស់អ៊ុយក្រែន ប្រឈមមុខនឹងការប្រយុទ្ធដ៏ស្វិតស្វាញ នៅក្នុងការវាយបក ដែលកំពុងតែបន្ត ប្រយុទ្ធប្រឆាំងនឹងកម្លាំងទាហានរុស្ស៊ី។ យុទ្ធនាការរំដោះទឹកដីរបស់អ៊ុយក្រែន ទំនងជានឹងមានតម្លៃខ្ពស់។

ការវាយតម្លៃរបស់សហរដ្ឋអាមេរិក លើការវាយបករបស់រដ្ឋាភិបាលក្រុងកៀវ បានកើតឡើង ស្របពេលក្រុមប្រយុទ្ធរបស់ឆេឆេន (Chechen) បានអះអាង ថា ពួកគេកំពុងតែដាក់ពង្រាយកម្លាំងទាហានរបស់ខ្លួន នៅក្នុងតំបន់បែលហ្គោរូដ (Belgorod) ទឹកដីរបស់រុស្ស៊ី នៅជាប់នឹងព្រំដែនរបស់អ៊ុយក្រែន ដើម្បីការពារនូវការវាយប្រហារណាមួយ ពីក្រុមចលនាតស៊ូរបស់រុស្ស៊ី គាំទ្រអ៊ុយក្រែន ប្រឆាំងនឹងក្រុងមូស្គូ ហើយវាស្របគ្នានឹងក្រុមមន្ត្រីយោធាអ៊ុយក្រែន កាលពីថ្ងៃព្រហស្បតិ៍ បានរាយការណ៍ អំពីការវាយលុករុលទៅមុខ នៅលើសមរភូមិជាច្រើន។

លោកនាយឧត្ដមសេនីយ៍ ម៉ាក មីលឡេ នាយអគ្គសេនាធិការចម្រុះ នៃកងទ័ពសហរដ្ឋអាមេរិក បានបញ្ជាក់ នៅក្នុងកិច្ចប្រជុំមួយ នៅឯទីស្នាក់ការកណ្ដាលរបស់អង្គការណាតូ ស្ថិតក្នុងទីក្រុងប៊្រុចសែលស៍ (Brussels) ប្រទេសប៊ែលហ្ស៊ិក កាលពីថ្ងៃព្រហស្បតិ៍ ថា «កងទ័ពអ៊ុយក្រែន បានចាប់ផ្ដើមវាយបករបស់ពួកគេ ហើយបានរុលទៅមុខជាលំដាប់។ នេះជាការប្រយុទ្ធដ៏លំបាកមួយ ហើយវាជាការប្រយុទ្ធដ៏ឃោរឃៅបំផុត។ សកម្មភាពរំដោះទឹកដីនេះ ទំនងជានឹងចំណាយពេលច្រើន និង ចំណាយខ្ពស់។

លោក ឡយដ៍ អូស្ទីន (Lloyd Austin) រដ្ឋមន្រ្ដីក្រសួងការពារជាតិសហរដ្ឋអាមេរិក បានថ្លែង ទៅកាន់កិច្ចប្រជុំ នៃក្រុមទំនាក់ទំនងរបស់ប្រទេសចំនួន៥០ ដឹកនាំដោយសហរដ្ឋអាមេរិក ដែលបានផ្តល់ជំនួយយោធាដល់អ៊ុយក្រែន ថា រដ្ឋាភិបាលក្រុងកៀវ ត្រូវការនូវការគាំទ្រ ទាំងរយៈពេលខ្លី និង រយៈពេលវែង ដោយសារតែសង្គ្រាម កំពុងតែបន្ដ នៅក្នុងរយៈពេលយូរ ហើយអ៊ុយក្រែន ត្រូវការអាវុធជាច្រើនបន្ថែមទៀត។ ថ្វីបើមានការខាតបង់ ដោយការវាយប្រហារតបតពីទាហានរុស្ស៊ី យ៉ាងណាក្ដី ក៏កងទ័ពអ៊ុយក្រែន នៅតែមានកម្លាំងច្រើន សម្រាប់ការវាយបក ទៅលើសត្រូវដែរ។

ដោយឡែក ក្រុងមូស្គូ បានបង្ហាញឃ្លីបវីដេអូ អំពីរថក្រោះ Leopard ផលិតដោយអាល្លឺម៉ង់ និង រថពាសដែកប្រយុទ្ធ Bradley (ប្រេដលី) បានផ្ដល់ឲ្យដោយសារសហរដ្ឋអាមេរិក ត្រូវបានរឹបអូសពីអ៊ុយក្រែន នៅក្នុងការចាប់ផ្ដើមវាយបករបស់ក្រុងកៀវ។

លោករដ្ឋមន្រ្ដីក្រសួងការពារជាតិសហរដ្ឋអាមេរិក បានសង្កត់ធ្ងន់ ថា «ខ្ញុំគិត ថា ទាហានរុស្ស៊ី បានបង្ហាញដល់ពួកយើង អំពីរថចម្បាំងដូចគ្នានេះ ចំនួន៥ប្រហែល១០០០ដង អំពីមុំផ្សេងៗគ្នា ចំនួន១០។ ប៉ុន្តែបើយើងនិយាយតាមត្រង់ទៅ កងទ័ពការពារទឹកដីរបស់អ៊ុយក្រែន នៅតែមានសមត្ថភាពប្រយុទ្ធ ហើយមានកម្លាំងប្រយុទ្ធច្រើន»។

លោករដ្ឋមន្រ្ដី ឡយដ៍ អូស្ទីន បានបន្ថែម ថា «នេះជាសង្គ្រាម ដូច្នេះយើងដឹង ហើយថា វាជាការប្រយុទ្ធនាំឲ្យខូចខាតដល់ភាគីទាំង២ ហើយអ្វីដែលសំខាន់បំផុតនោះ ក្រុងកៀវ មានសមត្ថភាពជួសជុលគ្រឿងយុទ្ធោបករណ៍ខូចខាត យកទៅប្រើប្រាស់ នៅលើសមរភូមិវិញ។ ចំណែកការប្រយុទ្ធ កំពុងតែបន្ដយ៉ាងស្វិតស្វាញ ដូចអ្វីដែលយើងបានរំពឹងទុកជាមុន ហើយខ្ញុំជឿជាក់ថា ចំណុលដ៏ល្អបំផុត នៅក្នុងលក្ខខណ្ឌនៃការទ្រទ្រង់ ប្រហែលជាមានអត្ថប្រយោជន៍ នៅចុងបញ្ចប់ នៃថ្ងៃនេះ»។

លោកឧត្ដមសេនីយ៍ អូឡេស៊ី ហារ៉ូម៉ូវ (Oleksii Hromov) មេបញ្ជាការកងទ័ពអ៊ុយក្រែន បានបញ្ជាក់ កាលពីថ្ងៃព្រហស្បតិ៍ ថា «អ៊ុយក្រែន បានរំដោះទីតាំងចំនួន៧ មានផ្ទៃដីទំហំ ១០០គីឡូម៉ែត្រការ៉េ នៅក្នុងការវាយបកដ៏ធំ ចំនួន២ទិសដៅ នៅភាគខាងត្បូងរបស់ប្រទេសអ៊ុយក្រែន។ បន្ថែមពីនេះ យើងត្រៀមខ្លួនជាស្រេច សម្រាប់បន្តការប្រយុទ្ធ ដើម្បីរំដោះទឹកដីរបស់យើង បើទោះជាធ្វើ ដោយដៃទទេយ៉ាងណាក៏ដោយ»។

ដោយឡែក លោក វ៉្លាឌីមៀ ពូទីន (Vladimir Putin) បានលើកឡើង នៅសប្ដាហ៍នេះ ថា កម្លាំងទាហានរុស្ស៊ី កំពុងតែបង្កឲ្យខូចខាត ដល់កងទ័ពអ៊ុយក្រែន កើនឡើងចំនួន១០ជាង ខណៈពួកគេកំពុងតែស៊ូទ្រាំ ហើយការវាយបករបស់ក្រុងកៀវ បានរងបរាជ័យ៕