អ្នកដើរព្រៃបោះតង់សូមប្រុងប្រយ័ត្ន កម្ពុជាទើបតែប្រទះឃើញវត្តមានខ្លារខិន

យោងតាមគេហទំព័រហ្វេកប៊ុករបស់រដ្ឋលេខាធិការ ក្រសួងបរិស្ថាន ឯកឧត្តម នេត្រ ភក្រ្តា បានឱ្យដឹងថា៖ “កាលពីខែមេសា ឆ្នាំ២០២២ ក្រុមការងារអភិរក្សក្រសួងបរិស្ថាន និងអង្គការ WWF បានរកឃើញវត្តមានរបស់សត្វខ្លារខិនញី ១ក្បាលតាមរយៈរូបថតដ៏កម្រ ថតដោយម៉ាស៊ីនថតស្វ័យប្រវត្តិ ខណៈសត្វប្រភេទនេះ ស្ទើរតែផុតពូជទៅហើយ នៅលើពិភពលោក។ ប្រទេសកម្ពុជា គឺជាទីជម្រកចុងក្រោយ សម្រាប់ប្រភេទសត្វខ្លារខិននេះ ដែលអ្នកវិទ្យាសាស្ត្រ ជឿថា នៅសេសសល់ចំនួនតិចតួចបំផុត នៅលើពិភពលោក”។

ជាមួយគ្នានេះ លោក រដ្ឋលេខាធិការ បានឱ្យដឹងថា៖”ខ្លារខិន ដែលជាប្រភេទសត្វកម្រ បន្ទាប់ពីខ្លាធំ បង្ហាញវត្តមាន នៅក្នុងតំបន់ការពារធម្មជាតិនៅកម្ពុជា។ ខ្លារខិន ត្រូវបានគេដឹងថា ជាសត្វជើង ៤ រត់លើដីលឿនជាងគេក្នុងលោក”។ដោយឡែក បើយោងតាមការសិក្សាមួយចុះផ្សាយដោយទស្សនាវដ្តី វិទ្យាសាស្រ្តអាមេរិកាំង ឈ្មោះ Proceeding of the National Academy of Sciences បានឱ្យដឹងថា នៅទូទាំងពិភពលោក នៅមានវត្តមានសត្វខ្លារខិន ស្ថិតក្នុងសេរីភាពពេញលេញមិនដល់ ៧.១០០ ក្បាលផង និងដែលមាន ៩៩ ភាគរយ កំពុងរស់នៅលើទឹកដីអាហ្រ្វិក។តួលេខនៃវត្តមានសត្វខ្លារខិន ត្រូវបានគេដឹងថា បានធ្លាក់ចុះច្រើន បើធៀបនឹងតួលេខដែលបានចុះផ្សាយដោយក្រុមហ៊ុនសត្តវិទ្យា ក្នុងប្រទេសអង់គ្លេសកាលពីពេលកន្លងទៅ ដែលថា ចំនួនខ្លារខិន មានប្រមាណជា ១០០.០០០ ក្បាលនៅទូទាំងពិភពលោក នាដើមសតវត្សរ៍ទី២០។

ទាក់ទងនឹងពូជខ្លារខិនអាស៊ី គេឃើញមាននៅសល់ចំនួន ៤៣ ក្បាល នៅក្នុងប្រទេសអ៊ីរ៉ង់។ នៅក្នុងប្រទេសអាហ្រ្វិក ស៊ីមបាវ៉េ ចំនួនខ្លារខិនបានធ្លាក់ចុះពី ១.២០០ ក្បាល មកនៅត្រឹម ១៧០ ក្បាលប៉ុណ្ណោះ ក្នុងរយៈពេល ១៦ ឆ្នាំ ពោលគឺ ធ្លាក់ចុះ ៨៥%៕