រដ្ឋធានីវិលនីស (Vilnius)៖ ថ្វីបើឥឡូវនេះ ប្រទេសអ៊ុយក្រែន នៅតែមិនទាន់អាចចូលជាសមាជិកសម្ពន្ធភាពយោធារបស់លោកលិចក៏ពិតមែន ប៉ុន្ដែបណ្ដាប្រទេសអ្នកមានសេដ្ឋកិច្ចរីកចម្រើនបំផុត ឬ G7 បានប្រកាស អំពីរៀបចំកញ្ចប់ជំនួយសន្ដិសុខ រយៈពេលវែង សម្រាប់ជួយដល់រដ្ឋាភិបាលក្រុងកៀវ នៅក្នុងកិច្ចប្រជុំកំពូលរបស់អង្គការណាតូ។

សារព័ត៌មានរបស់ចក្រភពអង់គ្លេស BBC បានចេញផ្សាយ នៅថ្ងៃពុធ ទី១២ ខែកក្កដា ថា បណ្ដាសមាជិកប្រទេស G7 រួមមាន កាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស និង សហរដ្ឋអាមេរិក ត្រូវគេរំពឹង ថា នឹងផ្តល់សច្ចាប័ន លើកិច្ចព្រមព្រៀងសន្តិសុខដ៏ទូលំទូលាយមួយ ជាមួយនឹងប្រទេសអ៊ុយក្រែន នៅក្នុងកិច្ចប្រជុំកំពូលរបស់អង្គការណាតូ នៅថ្ងៃពុធ នេះ។ ប៉ុន្តែភ្លាមៗនោះ បណ្ដាប្រទេសទាំងនេះ បានឈប់ផ្តល់នូវពេលវេលា សម្រាប់រដ្ឋាភិបាលក្រុងកៀវ សម្រាប់ការចូលរួម នៅក្នុងអង្គការសម្ពន្ធភាពសន្តិសុខ ដែលនាំឲ្យការផ្ទុះកំហឹង ពីប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី (Volodymyr Zelensky)។ ការរៀបចំកញ្ចប់ជំនួយសន្តិសុខទាំងនេះ នឹងរួមបញ្ចូលទាំងឧបករណ៍ការពារ ការបណ្តុះបណ្តាល និង ការចែករំលែកព័ត៌មានសម្ងាត់ ផងដែរ។

លោក រីស៊ី ស៊ូណាក់ ( Rishi Sunak) នាយករដ្ឋមន្រ្ដី ចក្រភពអង់គ្លេស បានបញ្ជាក់ ថា កញ្ចប់ជំនួយសន្ដិសុខ រយៈពេលវែង សម្រាប់អ៊ុយក្រែន នឹងផ្ញើសារដ៏ខ្លាំងក្លាមួយ ទៅកាន់ប្រធានាធិបតីរុស្ស៊ី លោក វ៉្លាឌីមៀ ពូទីន។

ការរៀបចំកញ្ចប់ជំនួយសន្តិសុខ ជាមួយអ៊ុយក្រែន បានកើតឡើង ក្រោយពេលលោកប្រធានាធិបតី វ៉ូឡូឌីមៀរ ហ្សេឡែនស្គី បានខឹងសម្បាយ៉ាងខ្លាំង ប្រឆាំងនឹងការស្ទាក់ស្ទើររបស់អង្គការណាតូ នៅក្នុងការផ្តល់នូវពេលវេលាដ៏ជាក់លាក់ សម្រាប់អ៊ុយក្រែន ចូលរួមជាមួយសម្ពន្ធភាពយោធាមួយនេះ។

មេដឹកនាំក្រុមប្រទេស G7 នឹងចុះហត្ថលេខា លើសេចក្តីប្រកាស នៅទីក្រុងវិលនីស (Vilnius) នៅថ្ងៃពុធ នៅក្រៅកិច្ចប្រជុំកំពូលការពារជាតិរបស់អង្គការណាតូ នាថ្ងៃទី២។

លោកនាយករដ្ឋមន្រ្ដី ចក្រភពអង់គ្លេស បានថ្លែង នៅមុនជំនួបជាមួយលោកប្រធានាធិបតី ហ្សេឡែនស្គី នៅថ្ងៃពុធ ថា «សម្ពន្ធមិត្តរបស់រដ្ឋាភិបាលក្រុងកៀវ កំពុងតែបង្កើននូវការរៀបចំកញ្ចប់ជំនួយ រយៈពេលវែង ជាផ្លូវការរបស់ខ្លួន សម្រាប់ការពារអ៊ុយក្រែន។ យើងនឹងមិនអាចមើលឃើញនូវការកើតឡើងជាដដែលៗ ចំពោះអ្វីដែលបានកើតឡើង នៅក្នុងប្រទេសអ៊ុយក្រែន។ ការប្រកាស នាពេលនេះ ចង់បញ្ជាក់ឡើងវិញនូវការប្តេជ្ញាចិត្តរបស់យើង នៅក្នុងការធានា ថា អ៊ុយក្រែន នឹងមិនត្រូវទុកឱ្យរងគ្រោះ សម្រាប់ប្រភេទអំពើឃោរឃៅរបស់រុស្ស៊ី ធ្វើមកលើប្រទេសមួយនេះ ម្តងទៀតនោះឡើយ»។

ក្រុមមន្រ្ដី ចក្រភពអង់គ្លេស បានបញ្ជាក់ ថា រដ្ឋាភិបាលក្រុងឡុងដ៍ នឹងដើរនាទីនាំមុខគេ នៅក្នុងកិច្ចព្រមព្រៀង ពាក់ព័ន្ធនឹងដៃគូ G7 រួមមាន កាណាដា បារាំង អាល្លឺម៉ង់ អ៊ីតាលី ជប៉ុន និង សហរដ្ឋអាមេរិក។ រីឯព័ត៌មានលម្អិត ត្រូវគេរំពឹង ថា នឹងប្រកាស នៅថ្ងៃពុធនេះ។

នៅមុននេះ លោក ចូ បៃដិន (Joe Biden) ប្រធានាធិបតី សហរដ្ឋអាមេរិក បានស្នើនូវគំរូមួយសម្រាប់អ៊ុយក្រែន មានលក្ខណៈស្រដៀងគ្នា ទៅនឹងកិច្ចព្រមព្រៀង រវាងក្រុងវ៉ាស៊ីនតោន ជាមួយនឹងអ៊ីស្រាអែល។ ក្រោមកិច្ចព្រមព្រៀងនេះ រដ្ឋាភិបាលក្រុងវ៉ាស៊ីនតោន បានប្តេជ្ញាផ្តល់ជំនួយយោធា មានទំហំទឹកប្រាក់ ចំនួន ៣,៨ពាន់លានដុល្លារ ក្នុងមួយឆ្នាំ រយៈពេលមួយទសវត្សរ៍។ ប៉ុន្ដែបញ្ហានេះ មិនដូចជាសមាជិកភាពរបស់អង្គការណាតូ ព្រោះករណីនេះ មិនរាប់បញ្ចូលជាមួយឃ្លាមួយ សម្រាប់កំណត់គោលដៅលើជំនួយរបស់ប្រទេសជាតិ នៅក្នុងអំឡុងរងការវាយប្រហារនោះឡើយ។

ក្រុមប្រទេស G7 បានប្រកាស អំពីការរៀបចំកញ្ចប់ជំនួយ រយៈពេលវែង សម្រាប់រដ្ឋាភិបាលក្រុងកៀវ ក្រោយពេលអង្គការណាតូ បានបញ្ជាក់ ថា អ៊ុយក្រែន អាចនឹងចូលរួមជាមួយសម្ពន្ធភាពយោធាមួយនេះបាន ខណៈសម្ពន្ធមិត្តព្រមព្រៀង និង មានលក្ខខណ្ឌជាច្រើន ត្រូវប្រឈមមុខ។ រដ្ឋាភិបាលក្រុងកៀវ បានទទួលស្គាល់ ថា អ៊ុយក្រែន មិនអាចចូល ជាសមាជិករបស់អង្គការណាតូ នាពេលនេះ ខណៈកំពុងតែធ្វើសង្គ្រាម ជាមួយនឹងរុស្ស៊ី។ ប៉ុន្ដែអ៊ុយក្រែន ចង់ចូលរួមឲ្យបានឆាប់ តាមអ្វីដែលអាចធ្វើទៅបាន ក្រោយការបញ្ចប់សង្គ្រាមនេះ៕

ប្រទេសឥណ្ឌា៖ លោក Bharat Jain គឺជាអ្នកសុំទានដែលមានជាងគេបំផុតនៅលើពិភពលោក ដោយបច្ចុប្បន្នទ្រព្យសម្បត្តិរបស់គាត់មានរហូតដល់ ១ លានដុល្លារ ដែលបានមកពីភាពសប្បុរសរបស់អ្នកឆ្លងកាត់។ ទោះបីជាលោកក្លាយជាសេដ្ឋីក៏ដោយ Bharat នៅតែដើរសុំទានតាមដងផ្លូវក្នុងទីក្រុង Mumbai ប្រទេសឥណ្ឌាជារៀងរាល់ថ្ងៃ។

ខណៈពេលដែលមនុស្សជាច្រើននៅក្នុងប្រទេសឥណ្ឌាត្រូវធ្វើការច្រើនម៉ោងក្នុងមួយថ្ងៃដើម្បីរកប្រាក់ ២០០-៣០០ រូពី (ដែលស្មើនឹង ២,៣ ដុល្លារ) ដោយឡែកលោក Bharat រកប្រាក់បាន ២,០០០-២,៥០០ រូពី (ដែលស្មើនឹង ២០,៣០ ដុល្លារ) ពីការសុំទានក្នុងរយៈពេល ១០ ទៅ ១២ ម៉ោងប៉ុណ្ណោះ។ ក្នុងមួយខែលោក Brahat រកបានពី ៦០,០០០ ទៅ ៧៥,០០០ រូពី (ស្មើនឹងជាង ៨០០ ទៅ ៩០០ ដុល្លារ) ក្រៅពីមុខរបរសុំលុយ គាត់ក៏មានហាងជួលពីរកន្លែងនៅ Thane ជាមួយនឹងប្រាក់ចំណូល ៣០,០០០ រូពី (ជាង ៣០០ ដុល្លារ) ក្នុងមួយខែ រួមជាមួយផ្ទះពីរបន្ទប់គេងរបស់គាត់នៅទីក្រុងបុមបៃមានតម្លៃជាង ១២ លានរូពី (ស្មើនឹងជាង ១៤ ម៉ឺនដុល្លារ)។

សព្វថ្ងៃ លោក Brahat រស់នៅជាមួយប្រពន្ធ កូនប្រុសពីរនាក់បងប្អូន និងឪពុកនៅទីក្រុង Mumbai ។ ដោយសារទ្រព្យសម្បត្តិ ១ លានដុល្លារ កូនៗរបស់គាត់មិនត្រូវរងទុក្ខវេទនាដូចឪពុកទេ ដែលកូនរបស់គាត់អាចចូលរៀននៅសាលាលំដាប់ៗនៃប្រទេសឥណ្ឌា។ សមាជិកគ្រួសារផ្សេងទៀតរបស់គាត់ក៏មានហាងលក់សម្ភារៈ ការិយាល័យ ភោជនីយដ្ឋាន ជាដើម។ ដូច្នេះហើយ មនុស្សជាច្រើនបានណែនាំគាត់ឱ្យឈប់សុំទាន។ ទោះជាយ៉ាងណាក៏ដោយលោក Bharat មិនអើពើនឹងដំបូន្មាននេះឡើយ ហើយបានបន្ត “អាជីព” របស់គាត់ជាអ្នកសុំទានរហូត ព្រោះការសុំទានជាប្រភពនៃទ្រព្យសម្បត្តិរបស់គាត់៕

ប្រភព៖cafef.com

ប្រទេសថៃ ៖ វាបានក្លាយជារឿងមួយដែលមានការរិះគន់នៅក្នុងបណ្តាញសង្គមប្រទេសថៃ ក្រោយពីអ្នកប្រើប្រាស់កម្មវិធី Twitter ម្នាក់បានបង្ហោះពីបទពិសោធន៍ដែលនាងជួបប្រទះ ។ នាងរៀបរាប់ថា ព្រះសង្ឃមួយអង្គនេះចូលមកទិញថ្នាំហើយ មិនព្រមឱ្យប្រាក់នាងទេ ហើយថែមទាំងនិយាយថា ចាត់ទុកថា នេះជាការថ្វាយព្រះចុះ ណាញ៉ោម ។

ស្ត្រីរូបនេះនិយាយថា មានព្រះសង្ឃមួយអង្គបានមកទិញថ្នាំនៅគ្លីនិករបស់នាង ហើយនាងប្រើពាក្យថា «ទិញ» ព្រោះព្រះសង្ឃជ្រើសយកថ្នាំដោយខ្លួនឯង ហើយមិនឱ្យនាងសាកសួរពីអាការៈជំងឺអ្វីទេ ។ នៅពេលនាងយកថ្នាំច្រកថង់ និងគិតប្រាក់ ស្រាប់តែព្រះសង្ឃប្រាប់ថា ចាត់ទុកថា នេះជាការថ្វាយព្រះចុះណាញ៉ោម ហើយក៏យកថង់ថ្នាំដើរចេញក្រៅបាត់ ។

នាងបន្តថា ព្រះសង្ឃរូបនេះជាចោរ ព្រោះនាងមិនបានថ្វាយថ្នាំអ្វីទេ ហើយថ្នាំនេះមានតម្លៃជាង២០០បាត ។ នាងទទួលបានប្រាក់ចំណេញតិចតួច ហើយព្រះសង្ឃមកយកថ្នាំនេះទៅធ្វើព្រងើយ ហើយទង្វើនេះ គេហៅថា ចោរប្លន់ ។

ក្រោយពីព័ត៌មាននេះបានបង្ហោះក្នុងបណ្តាញសង្គម ធ្វើឱ្យអ្នកលេងបណ្តាញសង្គមថៃចូលមកបញ្ចេញមតិជាច្រើននាក់ ក្នុងនោះពលរដ្ឋថៃម្នាក់និយាយថា ៖ «ខ្ញុំធ្លាប់ចូលហាងលក់ទំនិញមួយកន្លែង ហើយឃើញបុគ្គលិកហាងម្នាក់ឈរនៅជ្រុងម្ខាងសម្លឹងមើលព្រះសង្ឃ ចំណែកខ្ញុំក៏ជ្រើសទិញរបស់របរបន្តទៀត និងមិនចាប់អារម្មណ៍ទេ ។ ស្រាប់តែនៅសុខៗ ព្រះសង្ឃរូបនេះដើរមកសួរខ្ញុំថា អាមួយនេះឱ្យព្រះសង្ឃបានទេ» ។

បុរសថៃម្នាក់ទៀតនិយាយថា ៖ «ខ្ញុំបានចូលហាងលក់ទំនិញ 7-Eleven មួយកន្លែង ហើយឃើញព្រះសង្ឃឈរតម្រង់ជួរ និងកាន់ស្បោងនំចំណី និងវត្ថុផ្សេងៗ ហើយប្រាប់ខ្ញុំថា ចេញប្រាក់ឱ្យអាត្មាផង ។ ពេលនោះ ខ្ញុំក៏ឆ្លើយបដិសេធថា ប្រពន្ធឱ្យប្រាក់មកតែបន្តិចទេបាទ ហើយខ្ញុំក៏ដើរគេចចេញ» ។

ជនជាតិថៃម្នាក់ទៀតថា ៖ «ខ្ញុំក៏ធ្លាប់ជួបរឿងនេះដូចគ្នាដែរ ខ្ញុំបានលក់ទឹកសុទ្ធ និងទឹកផ្លែឈើ ហើយក៏មានព្រះសង្ឃមកយកភេសជ្ជៈពីទូរក្លាស្សេ ហើយឱ្យប្រាក់ត្រឹមតែ២០បាតប៉ុណ្ណោះ និងប្រាប់ថា ថ្វាយឱ្យព្រះសង្ឃទៅ» ៕ ប្រភព ៖ chiangmai news

ចំនួនម៉ោងនៃការគេងរបស់មនុស្សម្នាក់ៗគឺខុសគ្នា ដោយអាស្រ័យទៅតាមអាយុរបស់ពួកគេដែលមានចាប់តាំងពីទារករហូតដល់មនុស្សវ័យចំណាស់។ ជាទូទៅមនុស្សពេញវ័យគឺតម្រូវឱ្យគេងយ៉ាងហោចណាស់ ៧ ទៅ ៨ ម៉ោងក្នុងមួយថ្ងៃដើម្បីការទ្រទ្រង់សុខភាពរាងកាយរបស់ពួកគេ។ ដូច្នេះការគេងមិនបានគ្រប់គ្រាន់អាចបណ្ដាលឱ្យប៉ះពាល់ដល់សុខភាព សម្រស់ និងគុណភាពជីវិត។ ខាងក្រោមនេះគឺជារឿងគ្រោះថ្នាក់ទាំង ៥ ដែលអ្នកមិនគួរធ្វើមុនពេលចូលគេង៖

១.លេងទូរស័ព្ទ ឬមើលទូរទស្សន៍៖ ការលេងទូរស័ព្ទ មើលទូរទស្សន៍ ឬលេងអេឡិចត្រូនិចផ្សេងៗទៀត អាចរំខានដល់ការសម្រាករបស់រាងកាយ ខូចភ្នែក និងងាយធ្វើឱ្យយើងឆាប់ខូចប្រព័ន្ធសរសៃប្រសាទជាដើម។

២.ការទទួលទានអាហារ៖ ជាទូទៅការទទួលទានអាហារនៅពេលយប់ ឬកណ្តាលយប់ អាចធ្វើឱ្យអ្នកគេងមិនលក់ វិលមុខ ចុកពោះ ខ្សោយ អស់កម្លាំង រហូតដល់ពេលព្រឹក ជាដើម។

៣.ស្លៀកពាក់ខោអាវក្រាស់ពេក៖ ការស្លៀកពាក់ខោអាវគេងយប់ក្រាស់ពេកអាចធ្វើឱ្យសីតុណ្ហភាពក្ដៅដែលរំខានដល់ដំណេករបស់អ្នក ដូច្នេះអ្នកគួរជ្រើសរើសក្រណាត់ដែលទន់ ឬរលុង និងមានខ្យល់ចេញចូលល្អដូចជាលីនីនឬកប្បាសទើបល្អសម្រាប់ការស្លៀកគេងយប់។

៤.កុំលេបថ្នាំងងុយគេង៖ ការលេបថ្នាំងងុយគេងញឹកញាប់ពេក អាចធ្វើឱ្យប៉ះពាល់ដល់ ផ្នែកមួយចំនួនទៀត ដូចជា ឈឺសាច់ដុំ ឆាប់ភ្លេចភ្លាំង រលោកស្រោមខួរ និងដាច់សសៃឈាមខួរក្បាល។

៥.កុំធ្វើលំហាត់ប្រាណខ្លាំង៖ យោងតាមអ្នកជំនាញបានឱ្យដឹងថា ការធ្វើលំហាត់ប្រាណ ដោយប្រើកម្លាំងខ្លាំងពេកនៅពេលយប់ អាចធ្វើឱ្យរាងកាយរបស់យើងឡើងកម្តៅដែលជាបញ្ហាចំបងមួយមិនអាចជួយឱ្យយើងឆាប់គេងលក់ឡើយ៕ ប្រភព៖sanook

រាជធានីបាងកក៖ នៅសល់ត្រឹមតែ រយៈពេល១ថ្ងៃប៉ុណ្ណោះ សភាទាំង២របស់ប្រទេសថៃ នឹងបោះឆ្នោត ជ្រើសរើសនាយករដ្ឋមន្រ្ដីថ្មី ប៉ុន្ដែឥឡូវនេះ គណៈកម្មាធិការរៀបចំការបោះឆ្នោត (ហៅកាត់ EC ) នៅក្នុងប្រទេសអាស៊ានមួយនេះ បានបញ្ជូនសំណុំរឿងរបស់ប្រធានគណបក្សប្រឆាំងឈ្នះឆ្នោត ដែលកំពុងតែឈរឈ្មោះ សម្រាប់តំណែងកំពូលមួយនេះ ទៅកាន់តុលាការធម្មនុញ្ញ។

សារព័ត៌មាន Al Jazeera បានចេញផ្សាយ នៅថ្ងៃពុធ ទី១២ ខែកក្កដា ថា បើតាមបណ្ដាញផ្សព្វផ្សាយនានា បានរាយការណ៍ ថា គណៈកម្មាធិការរៀបចំការបោះឆ្នោតរបស់ប្រទេសថៃ បានស្នើឱ្យតុលាការធម្មនុញ្ញរបស់ប្រទេសអាស៊ានមួយនេះ សម្រេច ថាតើករណីរបស់ប្រធានគណបក្សឆ្ពោះទៅមុខ (Move Forward Party) ហៅកាត់ MFP ដែលទទួលបានអាសនៈច្រើនជាងគេ នៅក្នុងការបោះឆ្នោតសកលរបស់ប្រទេសថៃ កាលពីថ្ងៃទី១៤ ខែឧសភា ឆ្នាំ២០២៣ គួរតែត្រូវដកសិទ្ធិរបស់គាត់ ចេញពីសភាដែរឬយ៉ាងណា។

ការបញ្ជូនសំណុំរឿង ប្រឆាំងនឹងលោក ភីថា លីមចារឿនរ៉ាត (Pita Limjaroenrat) ប្រធានគណបក្សឆ្ពោះទៅមុខ បានធ្វើឡើង នៅថ្ងៃពុធ ពោលគឺត្រឹមតែ១ថ្ងៃ នៅមុនពេលសមាជិកសភាទាំង២ គ្រោងនឹងបោះឆ្នោត ជ្រើសរើសពាណិជ្ជករ វ័យ៤២ឆ្នាំ រូបនេះ ក្លាយជានាយករដ្ឋមន្ត្រីថ្មីរបស់ប្រទេសថៃ។

លោក ភីថា លីមចារឿនរ៉ាត បានទទួលការគាំទ្រ ពីសមាជិកសភា សរុប៣១២នាក់ មកពីគណបក្សសម្ពន្ធភាពចម្រុះរបស់គាត់ ចំនួន៨គណបក្ស ខណៈពួកគេកំពុងតែស្វះស្វែងរកសំឡេងបន្ថែម សម្រាប់ឲ្យគ្រប់ តាមច្បាប់កំណត់ ដោយមានសំឡេងភាគច្រើន យ៉ាងតិច៣៧៦ មកពីក្នុងចំណោមសមាជិកសភា ចំនួន៥០០នាក់ និង សមាជិកព្រឹទ្ធសភា ចំនួន២៥០នាក់ ដើម្បីបង្កើតរដ្ឋាភិបាលថ្មី។

ទីភ្នាក់ងារសារព័ត៌មានរបស់ចក្រភពអង់គ្លេស Reuters និង បណ្ដាញផ្សព្វផ្សាយចំនួន៣ផ្សេងទៀតបានរាយការណ៍ អំពីសកម្មភាពរបស់គណៈកម្មាធិការរៀបចំការបោះឆ្នោតរបស់ប្រទេសថៃ។ ស្ថាប័នមួយនេះ កំពុងតែពិនិត្យមើល ថាតើ លោក ភីថា ដឹងខ្លួន ថា មិនសមនឹងចុះឈ្មោះ ជាបេក្ខជនតំណាងរាស្រ្ត ដោយសារតែភាពជាម្ចាស់ភាគហ៊ុន នៅក្នុងក្រុមហ៊ុនប្រព័ន្ធផ្សព្វផ្សាយ ត្រូវហាមឃាត់ ក្រោមច្បាប់បោះឆ្នោតរបស់ប្រទេសថៃ ដែរឬយ៉ាងណា។

លោក ភីថា លីមចារឿនរ៉ាត ប្រធានគណបក្សឆ្ពោះទៅមុខ បានបកស្រាយ លើបញ្ហានេះ ដោយបានលើកហេតុផល ថា ភាគហ៊ុន នៅក្នុងក្រុមហ៊ុនប្រព័ន្ធផ្សព្វផ្សាយ iTV ត្រូវបានផ្ទេរសិទ្ធិ តាំងពីពេលនោះមក ហើយក្រុមហ៊ុននេះ ក៏មិនមែនជាអង្គភាពប្រព័ន្ធផ្សព្វផ្សាយសកម្មនោះដែរ។ លោក ភីថា អាចប្រឈមមុខនឹងការដកសិទ្ធិរបស់គាត់ ចេញពីសភា ហើយអាចនឹងជាប់ពន្ធនាគារ រហូតដល់រយៈពេល១០ឆ្នាំ និង ហាមឃាត់ ដល់ការធ្វើនយោបាយ រយៈពេល២០ឆ្នាំ ប្រសិនបើរកឃើញ ថា គាត់បានបំពានលើច្បាប់។

គណបក្សឆ្ពោះទៅមុខ បានបញ្ជាក់ នៅក្នុងសេចក្ដីថ្លែងការណ៍មួយ ដោយបានចោទប្រកាន់ដល់គណៈកម្មាធិការរៀបចំការបោះឆ្នោត (EC) ថា EC បានប្រញាប់ប្រញាល់ បញ្ជូនសំណុំរឿងរបស់មេបក្សខ្លួន ទៅកាន់តុលាការធម្មនុញ្ញ។ សេចក្ដីថ្លែងការណ៍ដដែលនោះ បានសង្កត់ធ្ងន់ ថា លោក ភីថា គួរតែត្រូវបានផ្តល់ឱកាស នៅក្នុងការឆ្លើយតប និង បដិសេធ ប្រឆាំងនឹងវការចោទប្រកាន់ទាំងនេះ។

គណបក្សឆ្ពោះទៅមុខ និង គណបក្សប្រឆាំងដ៏ធំមួយផ្សេងទៀត គឺគណបក្សភឿថៃ បានធ្វើឲ្យគូប្រជែង ដែលចងសម្ពន្ធមិត្ត ជាមួយពួកយោធា រងបរាជ័យយ៉ាងធ្ងន់ធ្ងរ នៅក្នុងការបោះឆ្នោតសកលរបស់ប្រទេស នាថ្ងៃទី១៤ ឧសភា ឆ្នាំ២០២៣។ សកម្មភាពទាំងនេះ ត្រូវបានគេមើលឃើញយ៉ាងទូលំទូលាយ ថា នេះជាការបដិសេធទាំងស្រុង ប្រឆាំងនឹងរដ្ឋាភិបាល ដែលបានកាន់កាប់ប្រទេស អស់រយៈពេល៩ឆ្នាំ ក្រោមការដឹកនាំ ឬ គាំទ្រដោយពួកឧត្តមសេនីយ៍របស់ប្រទេសថៃ ចាប់តាំងពីការកើតមានអំពើរដ្ឋប្រហារយោធាមក។

របៀបវារៈបង្កើតឡើង សម្រាប់ការប្រឆាំងរបស់គណបក្សនេះ រួមមាន ការកាត់បន្ថយតួនាទីនយោបាយរបស់ពួកយោធា ការមិនធ្វើផ្តាច់មុខ និង ការពិនិត្យឡើងវិញនូវច្បាប់ដ៏ចម្រូងចម្រាស ប្រឆាំងនឹងការប្រមាថរបបរាជានិយម ក៏ដូចជា ការប៉ះទង្គិចជាមួយផលប្រយោជន៍របស់កងទ័ពរបបរាជានិយម និង ឥស្សរជនផ្នែកជំនួញដ៏មានឥទ្ធិពលខាងនយោបាយ អស់រយៈពេលជាច្រើនទសវត្សរ៍ នៅក្នុងប្រទេសមានសេដ្ឋកិច្ចធំលំដាប់លេខ២ នៅតំបន់អាស៊ីអាគ្នេយ៍ ឬ អាស៊ាន។

ក្រោយទទួលបានជ័យជម្នះ នៅក្នុងការបោះឆ្នោត កាលពីពេលថ្មីៗនេះ លោក ភីថា បានប្រឈមមុខនឹងការតវ៉ាជាច្រើន មកពីគូប្រជែង ចំនួន៣ ដែលត្រូវគណៈកម្មាធិការរៀបចំការបោះឆ្នោត ច្រានចោល។ ដោយឡែក បណ្តឹងចំនួន៤ផ្សេងទៀត គឺប្រឆាំងនឹងគណបក្សរបស់គាត់ ក៏ត្រូវបានលុបចោល ផងដែរ៕