ប្រទេសបារាំង ៖ លោក Brenger Coulillard អនុរដ្ឋមន្ត្រីក្រសួងបរិស្ថានបារាំងបានបង្កើតគំនិតមួយ និងរំពឹងថា នឹងអាចជួយកាត់បន្ថយសំរាមសម្លៀកបំពាក់ និងស្បែកជើងនៅប្រទេសបារាំង ជាពិសេស នៅទីក្រុងប៉ារីស ដែលជាមជ្ឈមណ្ឌលម៉ូដសម្លៀកបំពាក់ដ៏ល្បីល្បាញនៅលើពិភពលោក ។ គេបានប្រទះឃើញបរិមាណសំរាមប្រភេទនេះកើនឡើងជារៀងរាល់ឆ្នាំនៅទីក្រុងប៉ារីស ។

ប្រទេសបារាំងនឹងផ្តល់ប្រាក់ឧបត្ថម្ភចាប់ពី១០អឺរ៉ូ ទៅ២៥អឺរ៉ូ ទៅឱ្យពលរដ្ឋណាដែលបានយកសម្លៀកបំពាក់ចាស់ៗដាច់រហែករបស់ខ្លួន មកដេរសម្រាប់ប្រើប្រាស់ឡើងវិញ ហើយពួកគេនឹងទទួលបានប្រាក់ចំនួន៧អឺរ៉ូផងដែរ សម្រាប់ការយកស្បែកជើងចាស់មកដេរ ។ ប្រទេសបារាំងនឹងអនុវត្តគម្រោងនេះចាប់ពីខែតុលា ឆ្នាំ២០២៣ តទៅ ។

រដ្ឋាភិបាលបារាំងបានកំណត់ថវិកាចំនួន១៥៤លានអឺរ៉ូសម្រាប់ឆ្នាំ២០២៣ រហូតដល់ឆ្នាំ២០២៨ ។ លើសពីនេះ គេនឹងស្នើឱ្យហាងកាត់ដេរសម្លៀកបំពាក់ និងស្បែកជើង ចូលរួមក្នុងគម្រោងនេះផងដែរ ដើម្បីសហការគ្នាជួយកាត់បន្ថយសំរាមសម្លៀកបំពាក់ និងស្បែកជើងនៅប្រទេសបារាំងឱ្យនៅសល់តិច ។

តាមទិន្នន័យកាលពីឆ្នាំ២០២២ បង្ហាញថា មានការផលិតសម្លៀកបំពាក់ និងស្បែកជើងលក់ចែកចាយនៅក្នុងទីផ្សារប្រទេសបារាំង សរុបចំនួន៣.៣០០លានដុំ ហើយក្នុង១ឆ្នាំៗ ពលរដ្ឋបារាំងបានបោះចោលសម្លៀកបំពាក់ និងស្បែកជើង រហូតដល់៧សែនតោន ។ ពលរដ្ឋ២នាក់ក្នុងចំណោម៣នាក់ បានបោះសម្លៀកបំពាក់ និងស្បែកជើងរបស់ពួកគេចោលក្នុងធុងសំរាម ហើយសម្លៀកបំពាក់មួយចំនួនទៀតត្រូវបានគេបោះចោលពាសវាលពាសកាល និងក្លាយជាសំរាមបង្កគ្រោះថ្នាក់ដល់សត្វ ៕ ប្រភព ៖ Mono News

ប្រទេសចិន៖ យោងតាមប្រភពព័ត៌មាន Bloomberg កាលពីថ្ងៃទី១២ ខែកក្កដា បានឱ្យដឹងថា ក្រុមហ៊ុន Ant Group និង Alibaba បានខាតបង់សរុបជាង ៨៥៦ ពាន់លានដុល្លារក្នុងរយៈពេល ៣ ឆ្នាំចុងក្រោយនេះ។

ក្រុមហ៊ុនបច្ចេកវិទ្យាយក្សរបស់ចិន Ant Group និង Alibaba បានបាត់បង់តម្លៃរាប់ពាន់លានដុល្លារក្នុងរយៈពេលបីឆ្នាំចុងក្រោយនេះ បន្ទាប់ពីមហាសេដ្ឋី និងជាសហស្ថាបនិកនៃក្រុមហ៊ុនទាំងពីរ គឺលោក Jack Ma បានធ្វើការរិះគន់រដ្ឋាភិបាលចិន នៅក្នុងសុន្ទរកថារយៈពេល ២១ នាទីកាលពីខែតុលា ឆ្នាំ២០២០ ដោយលោក Jack Ma បានរិះគន់ថា “និយតកររបស់ប្រទេសចិនផ្តោតតែលើហានិភ័យ និងការមិនអើពើអំពីការអភិវឌ្ឍន៍ឡើយ” ។

ភ្លាមៗនោះ តម្លៃភាគហ៊ុនរបស់ Alibaba បានធ្លាក់ចុះ ១០% រួមជាមួយក្រុមហ៊ុន Ant Group ដែលដំណើរការដោយកម្មវិធីទូទាត់ដ៏ពេញនិយម Alipay ក៏បានបាត់បង់ ៧៥% ផងដែរ។ នៅក្នុងឆ្នាំ២០២០ និង ២០២១ តម្លៃភាគហ៊ុនរបស់ក្រុមហ៊ុនទាំងពីរបានធ្លាក់ចុះ ៣៥០ ពាន់លានដុល្លារ។ នៅឆ្នាំដដែលនោះ ការបោះផ្សាយលក់ភាគហ៊ុន Ant Group និង Alibaba ជាសាធារណៈដ៏ធំបំផុតរបស់ពិភពលោកនៅលើទីផ្សារពីរនៃទីក្រុងហុងកុង និងសៀងហៃក៏ត្រូវបានពន្យារពេលដោយសារការទប់ស្កាត់របស់រដ្ឋាភិបាលចិន។

នៅឆ្នាំ ២០២២ តម្លៃភាគហ៊ុន Ant Group និង Alibaba របស់ Jack Ma ក៏បានធ្លាក់ចុះ ៦២០ ពាន់លានដុល្លារ។ ដូច្នេះសរុបមក ការធ្លាក់ចុះនៃភាគហ៊ុនរបស់ Jack Ma រយៈពេលបីឆ្នាំនេះ គឺដោយសារតែការបំពានប្រឆាំងនឹងការទុកចិត្តរបស់រដ្ឋាភិបាល។ នៅឆ្នាំ២០២៣នេះ ការវាយតម្លៃរបស់ក្រុមហ៊ុនទាំងពីរបានធ្លាក់ចុះជាង ៨៥៦ ពាន់លានដុល្លារ ដែលវាបានធ្វើឱ្យប៉ះពាល់ដល់ទ្រព្យសម្បត្តិសុទ្ធរបស់មហាសេដ្ឋី Jack Ma ផងដែរ។ កាលពីមុនទ្រព្យសម្បត្តិសុទ្ធរបស់គាត់មាន ៦១ ពាន់លានដុល្លារ ខណៈដែលបច្ចុប្បន្នមានត្រឹមតែ ៣៤.១ ពាន់លានដុល្លារប៉ុណ្ណោះ ៕ ប្រភព៖cafef.com

ប្រទេសថៃ ៖ កាលពីខែឧសភា ឆ្នាំ២០២៣ រដ្ឋាភិបាលថៃបានជំរុញឱ្យមានការចុះបញ្ជីក្រម៉ាជាមួយអង្គការយូណេស្កូ សម្រាប់ទុកជាមរតកវប្បធម៌របស់ថៃ ព្រោះពលរដ្ឋថៃគ្រប់រូបបានស្គាល់ពីផលប្រយោជន៍របស់ក្រម៉ា ។ ក្នុងកិច្ចប្រជុំគណៈរដ្ឋមន្ត្រីនាពេលកន្លងមក បានស្នើឱ្យក្រម៉ាដែលអាចប្រើជាប្រយោជន៍ច្រើនយ៉ាងក្នុងការរស់នៅប្រចាំថ្ងៃរបស់ពលរដ្ឋថៃ ដើម្បីចុះឈ្មោះជាសម្បត្តិវប្បធម៌របស់មនុស្សជាតិក្នុងអង្គការយូណេស្កូ ។

តាមការពិចារណាពីគុណតម្លៃរបស់ក្រម៉ាពីគ្រប់ភូមិភាគ និងទីប្រជុំជនក្នុងប្រទេសថៃឃើញថា ក្រម៉ាអាចប្រើប្រាស់ធ្វើជាប្រយោជន៍បានច្រើន ងាយស្រួលរកទិញ និងមានទំនាក់ទំនងគ្នាក្នុងជីវភាពរស់នៅរបស់ពលរដ្ឋថៃ ។ ហេតុនេះ កាលពីខែឧសភា ឆ្នាំ២០២៣ លោក ប្រយុទ្ធ ចាន់អូចា បានលើកសរសើរភ្នាក់ងារពាក់ព័ន្ធ ដែលបាននាំយកក្រម៉ាមកបង្ហាញក្នុងពិធីមួយនៅទីក្រុងហ្សារកាតា ប្រទេសឥណ្ឌូណេស៊ី ។ ក្នុងពិធីនេះ ប្រទេសថៃបានបង្ហាញពីប្រវត្តិរបស់ក្រម៉ា ដែលបានប្រើប្រាស់ក្នុងជីវិតប្រចាំថ្ងៃរបស់ពលរដ្ឋថៃ រហូតអ្នកចូលរួមពិធីនេះជាច្រើននាក់នាំគ្នាទះដៃ និងសុំថតរូបទុកជាអនុស្សាវរីយ៍ ។

គួរបញ្ជាក់ថា នៅសម័យមុន ពលរដ្ឋថៃបានប្រើប្រាស់ក្រម៉ាសម្រាប់ងូតទឹក ប៉ុន្តែនាពេលបច្ចុប្បន្ននេះ ពលរដ្ឋថៃបានកែច្នៃក្រម៉ាធ្វើជាកាបូប សម្លៀកបំពាក់ និងប្រដាប់តែងខ្លួនផ្សេងៗ ជាពិសេស គេសង្កេតឃើញមានការបង្ហាញក្រម៉ានៅពិធីបង្ហាញម៉ូដសម្លៀកបំពាក់កាន់តែច្រើន ។ ហេតុនេះ ក្រម៉ាត្រូវបានប្រទេសថៃចាត់ទុកថាជា Soft Power របស់ខ្លួនផងដែរ ។

ប្រទេសថៃបានត្រៀមចុះបញ្ជីក្រម៉ាជាមួយអង្គការយូណេស្កូ តាំងពីឆ្នាំ២០២២ មកម៉្លេះ ដោយប្រទេសថៃលើកឡើងថា ពលរដ្ឋខ្លួនបានប្រើប្រាស់ក្រម៉ាអស់រយៈពេលយូរយាណាស់មកហើយ ហើយពលរដ្ឋថៃទទួលបានវប្បធម៌ប្រើប្រាស់ក្រម៉ាពីអាជីវករជនជាតិពឺសៀរក្នុងសម័យអយុធ្យា ។ ប្រទេសថៃលើកឡើងថា បើតាមការកត់ត្រារបស់ជនជាតិចិននាសម័យអង្គរវត្តបញ្ជាក់ថា ពលរដ្ឋខ្មែរមិនស្គាល់ពីការដេរប៉ាក់ និងការប្រើប្រាស់ក្រណាត់ទេ ដែលខុសពីពលរដ្ឋសៀមអាចធ្វើបានទាំងពីរយ៉ាង ។ ហេតុនេះ ថៃមានភស្តុតាងបញ្ជាក់គ្រប់គ្រាន់តាំងពីសម័យអតីតកាលមកម៉្លេះ ហើយថៃនឹងមានប្រៀបជាងប្រទេសផ្សេងទៀត ក្នុងការចុះក្រម៉ាក្នុងបញ្ជីបេតិកភណ្ឌវប្បធម៌ជាមួយអង្គការយូណេស្កូ ។

ប្រទេសថៃលើកឡើងបន្តថា បើថៃអាចចុះឈ្មោះក្រម៉ាជាមួយអង្គការយូណេស្កូបានជោគជ័យនោះ នឹងធ្វើឱ្យការសម្លៀកពាក់របស់កីឡាករគុនខ្មែរ និងសម្លៀកបំពាក់ប្រចាំជាតិរបស់កម្ពុជារងផលប៉ះពាល់មិនខាន ៕

ប្រភព៖ CH7HD

រាជធានីបាងកក៖ អតីតនាយករដ្ឋមន្រ្ដីដ៏មានឥទ្ធិពលបំផុតរបស់ប្រទេសថៃ តែងតែប្រកាស អំពីការចង់ធ្វើមាតុភូមិនិវត្ដន៍ ចូលមករស់នៅក្នុងប្រទេសកំណើតរបស់គាត់វិញ ក្រោយការនិរទេសខ្លួន ទៅរស់នៅក្រៅប្រទេស ដោយខ្លួនឯង អស់រយៈពេលជិត២០ឆ្នាំកន្លងមក ចាប់តាំងពីពួកយោធា បានធ្វើរដ្ឋប្រហារ ទម្លាក់គាត់ចេញពីតំណែងនោះមក ប៉ុន្ដែផែនការរបស់គាត់ នឹងត្រូវពន្យារពេលទៅ ដើម្បីបញ្ចៀសនូវភាពចលាចលនយោបាយ ខណៈមានភាពមិនប្រាកដប្រជា សម្រាប់បេក្ខភាពរបស់មេបក្សប្រឆាំងឈ្នះឆ្នោត ក្លាយជានាយករដ្ឋមន្រ្ដី និង បង្កើតរដ្ឋាភិបាលចម្រុះថ្មី ហើយអាជ្ញាធរថៃ ក៏ត្រៀមខ្លួន សម្រាប់ការមកដល់របស់គាត់ផងដែរ។

សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃព្រហស្បតិ៍ ទី១៣ ខែកក្កដា ឆ្នាំ២០២៣ ថា បើតាមលោកស្រី ផេថុងថាន ស៊ីណាវ៉ាត (แพทองธาร ชินวัตร Paetongtarn Shinawatra) បានឲ្យដឹង ថា ការធ្វើមាតុនិវត្ដន៍ មកកាន់ប្រទេសថៃរបស់អតីតនាយករដ្ឋមន្ត្រី ដែលកំពុងតែនិរទេសខ្លួន រស់នៅក្រៅប្រទេស លោក ថាក់ស៊ីន ស៊ីណាវ៉ាត (Thaksin Shinawatra) នៅតែបន្ដដំណើរការដដែល។ ប៉ុន្តែផែនការនេះ ទំនងជាត្រូវពន្យារពេលបន្តិច ដើម្បីបញ្ចៀសនូវភាពវឹកវរខាងនយោបាយ។

លោកស្រី ផេថុងថាន ស៊ីណាវ៉ាត បានបញ្ជាក់ ថា ឪពុករបស់លោកស្រី បានបញ្ជាក់ ក្រោយការសន្ទនាគ្នា កាលពីយប់ ថ្ងៃអង្គារ ថា គាត់នឹងនៅតែមានគម្រោង វិលត្រឡប់មកកាន់ប្រទេសកំណើតវិញដដែល ក្រោយការនិរទេសខ្លួន អស់រយៈពេលជាច្រើនឆ្នាំ កន្លងមកនេះ។ បើទោះជាយ៉ាងណា ផែនការនេះ អាចនឹងត្រូវពន្យារពេល ដោយសារតែលោកឪពុករបស់លោកស្រី សុខចិត្តរង់ចាំ រហូតដល់ស្ថានការណ៍នយោបាយ នៅក្នុងប្រទេសថៃ មានស្ថិរភាពជាងនេះបន្ដិចសិន។

លោកស្រី ផេថុងថាន ស៊ីណាវ៉ាត ជាបេក្ខនារីមួយរូប នៅក្នុងចំណោមបេក្ខជនចំនួន៣នាក់ សម្រាប់ឈរឈ្មោះកាន់កាប់តំណែងនាយករដ្ឋមន្រ្ដីរបស់គណបក្សភឿថៃ ដែលបានឈ្នះសំឡេង ភាគច្រើនលំដាប់ទី២ នៅក្នុងការបោះឆ្នោតសកល កាលពីថ្ងៃទី១៤ ខែឧសភា ថា «ឪពុករបស់លោកស្រី ប្រាកដជានឹងវិលត្រឡប់ មកកាន់ប្រទេសកំណើតវិញ។ ប្រសិនបើគាត់មិនមក នៅក្នុងខែកក្កដា ទេនោះ គាត់នឹងអាចពន្យារពេលបន្តិច។ យើងនឹងឃើញ ថាតើការបោះឆ្នោតនាយករដ្ឋមន្ត្រីថ្មីរបស់ប្រទេសថៃ ទៅយ៉ាងណា?»។

លោកស្រី ផេថុងថាន បានបន្ថែម ថា លោក ថាក់ស៊ីន មិនបាននិយាយ ថា តើគាត់នឹងវិលត្រឡប់ មកកាន់ប្រទេសកំណើតវិញ ក្រោយការបោះឆ្នោត ឬ ពេលណារដ្ឋាភិបាលថ្មី ត្រូវបានបង្កើតឡើង នោះឡើយ។ ប៉ុន្តែអ្វីដែលសំខាន់បំផុតនោះ គាត់មិនចង់ឱ្យការវិលត្រឡប់របស់គាត់ បង្កឲ្យមានបញ្ហានយោបាយណាមួយនោះដែរ។

ពាក្យចចាមអារ៉ាមជាច្រើន បានលេចឡើង ថា លោក ថាក់ស៊ីន នឹងវិលត្រឡប់ មកកាន់ប្រទេសថៃ វិញ នៅក្នុងពេលដ៏ឆាប់ៗនេះ។ ប៉ុន្ដែពាក្យទាំងនេះ បាននាំឲ្យមានការចាប់អារម្មណ៍ជាថ្មី ពីបណ្ដាប្រព័ន្ធផ្សព្វផ្សាយជាច្រើន នៅសប្តាហ៍នេះ ស្របពេលនឹងមានច្បាប់ថតចម្លង នៃការរៀបចំសន្តិសុខ សម្រាប់កិច្ចប្រជុំមួយ ហើយត្រូវបានអ្នកសារព័ត៌មាន ទទួលបាន កាលពីថ្ងៃពុធ។

របៀបវារៈ នៃកិច្ចប្រជុំ នៅថ្ងៃទី១២ ខែកក្កដា រួមមាន នីតិវិធីត្រូវអនុវត្ត នៅក្នុងករណីមានការមកដល់ នៃបុគ្គលមិនត្រូវបានបញ្ចេញឈ្មោះ ដែលប្រឈមនឹងដីកាចាប់ខ្លួន។ ច្បាប់ថតចម្លងនោះ ក៏បានរាយបញ្ជីឈ្មោះផ្លូវ អាចធ្វើទៅបានចំនួន៦ សម្រាប់ការដឹកជញ្ជូនមនុស្សនោះ ដោយចេញពីអាកាសយានដ្ឋានសុវណ្ណភូមិ ឬ ដុនមឿង ឆ្ពោះទៅកាន់គោលដៅផ្សេងៗ នៅក្នុងរាជធានីបាងកក រួមទាំង តុលាការកំពូល និង ពន្ធនាគារបាងកក ផងដែរ។

លោក វីសសានុ គ្រឿងង៉ាម (Wissanu Krea-ngam) ឧបនាយករដ្ឋមន្ត្រី ទទួលបន្ទុកក្រសួងយុត្តិធម៌ បានបញ្ជាក់ ថា ទីភ្នាក់ងារពាក់ព័ន្ធទាំងអស់ កំពុងតែរៀបចំ សម្រាប់ព្រឹត្ដិការណ៍ចាំបាច់ នៃការវិលត្រឡប់របស់លោក ថាក់ស៊ីន ដោយសារតែនាយករដ្ឋមន្ត្រី ដែលត្រូវបានបណ្តេញចេញពីតំណែង បានផ្សព្វផ្សាយ ជាសាធារណៈ អំពីផែនការរបស់គាត់ កាលពីខែមុន។

លោកឧបនាយករដ្ឋមន្រ្ដី នៃរដ្ឋាភិបាលចាំផ្ទះរបស់លោកនាយករដ្ឋមន្រ្ដី ប្រាយុទ្ធ ចាន់-អូ-ចា (Prayut Chan-o-cha) បានបញ្ជាក់ ថា ការរៀបចំបែបនេះ ក្លាយជារឿងធម្មតា ព្រោះលោក ថាក់ស៊ីន កំពុងតែប្រឈមមុខនឹងការជាប់ពន្ធនាគារ។ គេក៏រំពឹង ថា លោក ថាក់ស៊ីន នឹងទាក់ទងជាមួយអាជ្ញាធរថៃស ខណៈគាត់បានបញ្ចប់ផែនការរបស់គាត់។

លោក ថាក់ស៊ីន ស៊ីណាវ៉ាត នាយករដ្ឋមន្រ្ដីថៃ ត្រូវបានបណ្ដេញពីអំណាច ដោយរដ្ឋប្រហារយោធា នៅថ្ងៃទី១៩ ខែកញ្ញា ឆ្នាំ២០០៦។ ចាប់តាំងពីពេលនោះមក គាត់បានរស់នៅ ដោយនិរទេស ដោយខ្លួនឯង នៅក្រៅប្រទេសរហូតមកដល់ពេលនេះ។ ថ្វីត្បិតតែលោក ថាក់ស៊ីន អស់អំណាចក៏ពិតមែន ប៉ុន្ដែបេះដូងរបស់ប្រជាជាតិថៃ នៅតែគាំទ្រគាត់យ៉ាងច្រើនដដែល៕

អាហ្វ្រិកខាងត្បូង ៖ ទីផ្សាររថយន្តអគ្គិសនីនៅអាហ្វ្រិកខាងត្បូងកំពុងតែរីកចម្រើន ហើយធ្វើឱ្យនៅរយៈពេលប៉ុន្មានខែមុននេះ ក្រុមហ៊ុនផលិតរថយន្តអគ្គិសនីជាច្រើនរបស់ប្រទេសចិន រួមទាំងក្រុមហ៊ុន BYD ផងដែរបានឈានជើងចូលមកកាន់ទីផ្សារអាហ្វ្រិកខាងត្បូង ។

Build Your Dreams ឬគេស្គាល់ឈ្មោះថា BYD គឺជាក្រុមហ៊ុនរថយន្តអគ្គិសនីចុងក្រោយគេ ដែលបានចូលមកកាន់ទីផ្សារអាហ្វ្រិកខាងត្បូង ។ សម្រាប់រថយន្តអគ្គិសនី១០០% យីហោ Atto 3 នាយកប្រតិបត្តិក្រមហ៊ុន BYD លើកឡើងថា អាហ្វ្រិកខាងត្បូងបានរីកចម្រើនផ្នែកឧស្សាហកម្មរថយន្ត ហេតុនេះ ការចូលមកកាន់ទីផ្សារអាហ្វ្រិកខាងត្បូង គឺជាពេលវេលាសមរម្យក្នុងការនាំយកបច្ចេកវិទ្យា និងរថយន្តរបស់ BYD មកកាន់ទីនេះ ។ ក្រុមហ៊ុនមានទំនុកចិត្តថា នឹងអាចបំពេញចិត្តពលរដ្ឋអាហ្វ្រិកខាងត្បូងនាពេលឆាប់ៗ ។

បច្ចុប្បន្ន ពលរដ្ឋអាហ្វ្រិកខាងត្បូងចាប់ផ្តើមចាប់អារម្មណ៍រថយន្តអគ្គិសនីកាន់តែច្រើន មនុស្សភាគច្រើនចង់ទិញរថយន្តអគ្គិសនី ប៉ុន្តែពួកគេមិនទាន់មានប្រាក់គ្រប់គ្រាន់ដើម្បីទិញរថយន្តទេ ព្រោះវាមានតម្លៃខ្ពស់ គឺស្មើប្រមាណ១សែនដុល្លារអាមេរិក ។ ដូច្នេះ ក្រុមហ៊ុន BYD បានកំណត់តម្លៃលក់រថយន្តយីហោ Atto3 ប្រមាណតែ៤៥.០០០ដុល្លារអាមេរិកប៉ុណ្ណោះ ដែលរថយន្តនេះបានបញ្ចុះតម្លៃជិតពាក់កណ្តាល ។

សហស្ថាបនិកក្រុមហ៊ុន Everlectric របស់អាហ្វ្រិកខាងត្បូងលើកឡើងថា ក្នុងរយៈពេល៣ឆ្នាំកន្លងមក ចំនួនការលក់រថយន្តអគ្គិសនីនៅអាហ្វ្រិកខាងត្បូងបានកើនឡើងជិត២ដង ហើយបានរីកលូតលាស់ជាបន្តបន្ទាប់ ។ រថយន្តយីហោផ្សេងៗគ្នា រួមទាំងយីហោ Mercedes, Benz, BMW និង Audi កំពុងសម្លឹងមកកាន់ទីផ្សារកំពុងរីកលូតលាស់នៅអាហ្វ្រិកខាងត្បូង ។

នាយកប្រតិបត្តិក្រុមហ៊ុនរថយន្តបានលើកឡើងដូចគ្នាថា ទីផ្សាររថយន្តអគ្គិសនីនៅអាហ្វ្រិកខាងត្បូងរឹងមាំខ្លាំង និងអភិវឌ្ឍន៍យ៉ាងឆាប់រហ័ស ហើយក៏ជាតម្រូវការរបស់មនុស្សគ្រប់វ័យ និងគ្រប់មុខរបរ ប៉ុន្តែបញ្ហានៅត្រង់វាមានតម្លៃខ្ពស់ ។ ទោះយ៉ាងណា បច្ចេកវិទ្យាបានអភិវឌ្ឍន៍ជាបន្តបន្ទាប់ និងមានរថយន្តជាច្រើនយីហោបានចូលមកកាន់ទីផ្សារនេះ ដូច្នេះ វានឹងធ្វើឱ្យតម្លៃរថយន្តអគ្គិសនីធ្លាក់ចុះ ៕ ប្រភព ៖ Nation World