ស្របពេលទទួលបានឱកាសធ្វើជាពិធីការិនីនៅក្នុងកម្មវិធីមួយនៅឯប្រទេសថៃ DJ NaNa ពោលថាខ្លួនទទួលបានការឱ្យតម្លៃយកចិត្តទុកដាក់ខ្ពស់មិនចាញ់តារាចម្រៀង តារាសម្តែង ឬបវកញ្ញាឡើយ។ មិនត្រឹមតែប៉ុណ្ណោះ DJ NaNa ពោលអាណិតខ្លួនឯងថាធ្វើមាតិកាអប់រំច្រើនប៉ុណ្ណាតម្លៃនៅចាញ់គេរ៉េបបបួលគ្នាផឹក ដែលអ្នកនាងចង់សម្តៅនៅក្នុងប្រទេសកំណើតឈរលើវិស័យនេះមិនទទួលបានការឱ្យតម្លៃចំពោះខ្លួនឡើយខុសពីប្រទេសដទៃ។
DJ NaNa ត្រូវសាធារណជនស្គាល់ថាជាពិធីការិនី និងជាអ្នកបង្កើតមាតិកាអប់រំមួយរូបដែលទទួលបានការគាំទ្រយ៉ាងខ្លាំងពីទស្សនិកជនព្រោះរាល់ប្រធានបទដែលអ្នកនាងចែករំលែកសុទ្ធសឹងជាចំណេះដឹងល្អៗគួរគិតពិចារណានិងលើកទឹកចិត្តអ្នកដទៃ។
ជាមួយគ្នានេះដែរ នៅយប់ថ្ងៃទី២៧ ខែសីហា ស្រាប់តែ DJ NaNa បានពោលពាក្យយ៉ាងចាក់ដោត និងដោយក្តីអន់ចិត្តព្រោះសម្លឹងឃើញពីភាពខុសគ្នារវាងប្រទេសរបស់ខ្លួន និងប្រទេសដទៃ ដែលមិនសូវឱ្យតម្លៃពិធីករ ពិធីការិនី និងអ្នកបង្កើតមាតិកាអប់រំចាញ់អ្នកច្រៀងរ៉េបដៃកាន់ដបស្រា។
អ្នកចែករំលែកចំណេះដឹងរូបនេះបានសរសេរនៅលើបណ្តាញសង្គមថា «វគ្គអ្នកលើកទឹកចិត្តគេ ត្រូវការកម្លាំងចិត្ត យប់មួយនៅទីក្រុងបាងកក! ជាលើកទី២ដែលពិធីការនីដូចខ្ញុំនេះមានអ្នករាំអម បើកឆាកបែបហំហាន! បើនិយាយពីការយកចិត្តទុកដាក់ និងផ្តល់តម្លៃដល់ពីធីករ ខ្ញុំពិតជាអរគុណដល់ Jotun Cambodia ណាស់ (លើកទី១ក៏កម្មវិធី Jotun ដែរ ដែលគេបើកLED Screenជាពីរដើម្បីឱ្យពិធីករដើរចេញ)។
ធម្មតាពិធីករលើឆាក ជាអ្នកលើកនេះ សរសើរគេ អញ្ជើញគេ អរគុណគេ…តែនៅកម្មវិធីរបស់ Jotun រាល់ឆ្នាំដែលគាត់នាំតំណាងចែកចាយគាត់ទៅប្រទេសថៃ ពួកគាត់ធ្វើរឿងទាំងនេះឱ្យពិធីករវិញដែរ»។
អ្នកនាង នាង សុវ៉ាតនា ហៅ DJ Nana បានបន្តទៀតថា «និយាយទៅ ថាខ្ញុំដូចជាទាមទារខុសរឿងក៏ថាបាន តែខ្ញុំចេះតែឆ្ងល់ថា ហេតុអ្វីពិធីករស្រុកគេ គេឱ្យតម្លៃខ្ពស់ មិនចាញ់តារាចម្រៀង តារាសម្តែង ឬបវកញ្ញាឡើយ។ ចេះតែនិយាយៗទៅទេបងប្អូនអើយ កុំប្រកាន់អី កូនដេកលក់ទាំងពីរនាក់ ម៉ែទំនេរពេក ម្យ៉ាងកូនបៅដោះ អ័រម៉ូនប្រែប្រួល…ហាហាហា…នឹកអាណិតខ្លួនឯង មិនថាធ្វើមាតិកាអប់រំច្រើនប៉ុណ្ណា តម្លៃនៅចាញ់គេរ៉េបបបួលគ្នាផឹក»៕
