ការស្រាវជ្រាវជាច្រើនបានលើកឡើងពីទំនាក់ទំនងរវាងខ្យល់ពុលនៅតាមដងផ្លូវ និងបញ្ហាការចងចាំរបស់ខួរក្បាល ។ ជាទូទៅ ការទទួលបានខ្យល់បំពុលកាន់តែយូរ វានឹងធ្វើឱ្យយើងមានបញ្ហាប្រឈមកាន់តែខ្លាំង ។ ចំណែកការស្រាវជ្រាវចុងក្រោយគេបង្ហាញថា ការទទួលខ្យល់ពុលនៅតាមដងផ្លូវត្រឹមតែរយៈពេល២ម៉ោង វានឹងធ្វើឱ្យប៉ះពាល់ដល់ខួរក្បាលរបស់យើង ។

អ្នកស្រាវជ្រាវមកពីសាកលវិទ្យាល័យ British Columbia និងសាកលវិទ្យាល័យ Victoria បានចាត់ឱ្យអ្នកស្ម័គ្រចិត្តចំនួន២៥នាក់ ដែលមានអាយុចាប់ពី១៩ឆ្នាំ ដល់៤៩ឆ្នាំ ចូលទៅក្នុងបន្ទប់មួយរយៈពេល១២០នាទី ហើយបន្ទប់នេះបានរៀបចំប្រព័ន្ធខ្យល់ ។ គេបានបែងចែកបន្ទប់មានតម្រងខ្យល់ និងបន្ទប់មានខ្យល់កខ្វក់ដោយសារផ្សែងម៉ាស៊ូត ។

ក្នុងអំឡុងពេលនោះ អ្នកស្រាវជ្រាវបានឱ្យក្រុមអ្នកស្ម័គ្រចិត្តទាំងនេះជិះកង់រយៈពេល១៥នាទីដើម្បីបង្កើនកម្លាំងដកដង្ហើម ។ បន្ទាប់មក នៅពេលគ្រប់កំណត់រយៈពេល១២០នាទី ក្រុមអ្នកស្ម័គ្រចិត្តនឹងត្រូវបានស្កេនដោយប្រព័ន្ធ MRI ដើម្បីតាមដានការធ្វើការរបស់ខួរក្បាល ។ ពេលនោះ គេសង្កេតឃើញថា ការស្រូបយកផ្សែងម៉ាស៊ូតបានកាត់បន្ថយសមត្ថភាពធ្វើការរបស់ខួរក្បាល ។ ដូច្នេះ វាជាផ្នែកសំខាន់មួយដើម្បីវាស់ថា តើផ្នែកណាខ្លះនៃខួរក្បាលមានទំនាក់ទំនងគ្នា ?

ការស្រាវជ្រាវបានបង្ហាញដែរថា ខ្យល់ពុលនៅលើបរិយាកាស មិនត្រឹមតែធ្វើឱ្យប៉ះពាល់ដល់ប្រព័ន្ធសរសៃប្រសាទប៉ុណ្ណោះទេ ប៉ុន្តែវានឹងបង្កើតហានិភ័យឈានដល់ការស្លា.ប់ទៀតផង ។ ការលើកឡើងថា ការស្រូបយកផ្សែងប្រេងម៉ាស៊ូតអាចបំផ្លាញដល់ខួរក្បាលនោះ វាមិនមែនជាការរកឃើញថ្មីទេ ជាក់ស្តែង កាលពីឆ្នាំ២០០៨ អ្នកស្រាវជ្រាវជនជាតិហូឡង់បានតាមដានអ្នកស្ម័គ្រចិត្តចំនួន១០នាក់ ដោយភ្ជាប់ពួកគេនឹងម៉ាស៊ីនអេឡិចត្រូនិកផ្នែកខួរក្បាល ខណៈពួកគេបានស្រូបយកខ្យល់ពុល និងផ្សែងម៉ាស៊ូតរយៈពេល៣០នាទី ហើយសង្កេតឃើញថា ខួរក្បាលរបស់ពួកគេមានភាពតានតឹងកើនឡើង ៕ ប្រភព ៖ TNN Health

អាមេរិក៖ លោក Alex Spiro ដែលជាមេធាវីផ្ទាល់ខ្លួនរបស់ Elon Musk បានផ្ញើលិខិតមួយច្បាប់គំរាមយក Mark Zuckerberg ទៅកាន់តុលាការ បន្ទាប់ពី Meta ណែនាំ Threads ជាមួយនឹងមុខងារស្រដៀងគ្នាទៅនឹង Twitter ។លោក Alex Spiro បានចោទប្រកាន់ថា Meta បានប្រើប្រាស់ “អាថ៌កំបាំងពាណិជ្ជកម្ម និងកម្មសិទ្ធិបញ្ញារបស់ Twitter” ដើម្បីបង្កើត Threads ដោយជួល “អតីតបុគ្គលិក Twitter រាប់សិបនាក់ អោយបង្កើតឧបករណ៍អេឡិចត្រូនិច” នៃបណ្តាញសង្គមនេះដោយខុសច្បាប់។ ដូច្នេះប្រសិនបើលោក Mark Zuckerberg នៅតែបន្តដំណើរការវេទិការបស់គាត់ទៀត Twitter នឹងប្តឹងនៅតុលាការ។

គួររំលឹកដែរថា កាលពីឆ្នាំមុន លោក Elon Musk បានកាត់បន្ថយបុគ្គលិក Twitter អស់ជាច្រើននាក់ ដោយលោក Musk បាននិយាយកាលពីចុងឆ្នាំមុនថា “សុំទោសចំពោះការបណ្តេញចេញទេពកោសល្យដ៏ឆ្នើមរបស់ពួកគេ ប៉ុន្តែអ្នកទាំងអស់គ្នាពិតជាមានប្រយោជន៍យ៉ាងខ្លាំងនៅកន្លែងផ្សេងទៀត”។

ទោះជាយ៉ាងណាក៏ដោយ ថ្មីៗនេះអ្នកលេងបណ្តាញសង្គម Twitter បានបង្ហោះចែកចាយ Status របស់លោក Elon Musk ដែលបាននិយាយកាលពីថ្ងៃទី៦ ខែកក្កដា ថា “ការប្រកួតប្រជែងគឺល្អ ប៉ុន្តែការបោកប្រាស់មិនល្អទេ” ។ ជាមួយគ្នានោះដែរ លោក Mark Zuckerberg ក៏បានបង្ហោះរូបភាពនៅលើ Twitter ជាលើកដំបូងបន្ទាប់ពីលោកបានផ្អាកលេង Twitter អស់រយៈពេល ១១ ឆ្នាំ ដោយលោកបានបង្ហោះរូប Spider-Man ពីររូបដែលប្រឈមមុខគ្នា នឹងភ្ជាប់ Caption ថា “មិនដឹងអ្នកណាជា Spider-Man ពិតប្រាកដនោះទេ”។

គួរបញ្ជាក់ដែរថា បច្ចុប្បន្នកម្មវិធី Threats របស់ Meta មានអ្នកប្រើប្រាស់ជាង ៣០ លាននាក់ក្នុងរយៈពេល ២៤ ម៉ោង ដោយមានតារាល្បីៗ ជាច្រើនក៏បានបង្កើតគណនីនៅលើ Threads ដូចជាមហាសេដ្ឋី Bill Gates តារាសម្តែង Ellen DeGeneres តារាចម្រៀង Shakira Jennifer Lopez និងកំពូលតារារ៉េប Wiz Khalifa…ជាដើម៕ ប្រភព៖vnexpress

ប្រទេសឡាវ ៖ ការធ្លាក់ថ្លៃប្រាក់គីប និងអតិផរណាកើនឡើងនាពេលបច្ចុប្បន្ន គឺជាកម្លាំងជំរុញសំខាន់ដែលធ្វើឱ្យពលរដ្ឋឡាវចេញទៅស្វែងរកការងារធ្វើនៅប្រទេសជិតខាង ។ ពលរដ្ឋឡាវទាំងនេះទទួលបានប្រាក់ខែខ្ពស់ជាងធ្វើការនៅប្រទេសរបស់ខ្លួន ហើយធ្វើឱ្យប្រទេសឡាវប្រឈមនឹងបញ្ហាខ្វះខាតកម្លាំងពលកម្ម ។

សមាជិករដ្ឋសភាបានអំពាវនាវឱ្យរដ្ឋាភិបាលចាត់វិធានការតឹងរ៉ឹងជាងមុនដើម្បីដោះស្រាយបញ្ហាអតិផរណា និងអត្រាប្តូរប្រាក់កើនឡើងជាបន្តបន្ទាប់ ដើម្បីសម្រាលទុក្ខលំបាករបស់ពលរដ្ឋដែលចំណាយខ្ពស់ក្នុងការរស់នៅ បើធៀបនឹងប្រាក់ខែតិច ។ សមាជិករដ្ឋសភាបញ្ជាក់ថា កម្លាំងពលកម្មក្នុងស្រុក គឺជាឆ្នឹងខ្នងរបស់ប្រទេសឡាវ ហើយការខ្វះខាតកម្លាំងពលកម្មយ៉ាងខ្លាំង នឹងធ្វើឱ្យមានផលអវិជ្ជមានចំពោះការព្យាយាមធ្វើឱ្យសេដ្ឋកិច្ចមានស្ថេរភាព ។

អត្រាអតិផរណានៅប្រទេសឡាវបានកើនឡើងតាំងពីដើមឆ្នាំ២០២២ មកម្ល៉េះ ដោយកើនឡើងពី៦,២៥% នៅខែមករា ឆ្នាំ២០២២ មកស្មើនឹង៤១,២៦% នៅខែកុម្ភៈ ឆ្នាំ២០២៣ ។ តាមទិន្នន័យរបស់ការិយាល័យស្ថិតិជាតិបង្ហាញថា អត្រាអតិផរណារបស់ឡាវ បើធៀបពីមួយឆ្នាំទៅមួយឆ្នាំ បានធ្លាក់ចុះបន្តិចមកស្មើនឹង៤០,៩៧% នៅខែមីនា, ៣៩,៨៩% នៅខែមេសា, ៣៨,៨៦% នៅខែឧសភា និងធ្លាក់ចុះមកស្មើ២៨,៦៤% នៅខែមិថុនា ឆ្នាំ២០២៣ ក្រោយពីវាបានឡើងដល់កំពូលរបស់អត្រាអតិផរណានៅខែកុម្ភៈ ។

លោក Oudet Souvannavong ប្រធានសភាពាណិជ្ជកម្ម និងឧស្សាហកម្មជាតិ បានថ្លែងក្នុងកិច្ចប្រជុំ Lao Business Forum ប្រចាំឆ្នាំលើកទី១៤ ថា ការចំណាយប្រចាំថ្ងៃបានកើនឡើងខ្ពស់យ៉ាងឆាប់រហ័ស ហើយវាបានបង្កើតបញ្ហាប្រឈមដ៏ធំសម្រាប់អាជីវកម្មផ្សេងៗក្នុងការស្វែងរកបុគ្គលិក និងជំរុញការនាំចេញផលិតផល ។ ពលរដ្ឋឡាវជាច្រើននាក់បានធ្វើដំណើរចេញពីប្រទេសឡាវ ដើម្បីទៅធ្វើការនៅប្រទេសជិតខាងដែលផ្តល់ប្រាក់ខែឱ្យពួកគេខ្ពស់ ។ លើសពីនេះ កសិករជាច្រើនបានបោះបង់ស្រែចម្ការរបស់ខ្លួន ឬដាំដំណាំតិចជាងមុន ដោយសារការចំណាយដើមទុនខ្ពស់ ។

តាមការស្រាវជ្រាវបញ្ជាក់ថា នៅឆ្នាំ២០២២ ប្រាក់ឈ្នួលអប្បបរមាប្រចាំខែនៅឡាវ គឺតិចជាងថៃជិត៤ដងឯណោះ ហើយមូលហេតុចម្បងដោយសារប្រាក់គីបធ្លាក់ថ្លៃ ។ តាមរបាយការណ៍របស់ក្រសួងការងារប្រចាំខែមេសា ឆ្នាំ២០២៣ បង្ហាញថា កាលពីឆ្នាំ២០២២ មានពលរដ្ឋឡាវចំនួន៥០០.៧១២នាក់បានទៅធ្វើការនៅក្រៅប្រទេស ។ ចំណែកនៅឆ្នាំ២០២៣ នេះ ពលរដ្ឋឡាវមានជំនាញបានទៅធ្វើការនៅក្រៅប្រទេស ចំនួន៣១.៣៩៤នាក់ ក្នុងនោះពលរដ្ឋជាង៣០.២០០នាក់បានទៅធ្វើការនៅថៃ ៕ ប្រភព ៖ AEC connect

ប្រទេសរុស្សី៖ លោក Denis Vashuri បច្ចុប្បន្នមានអាយុ ៣៥ឆ្នាំ រស់នៅក្នុងភូមិតូចមួយនៅតំបន់ Krasnoyarsk នៃប្រទេសរុស្សី។ Denis គឺជាកីឡាករ និងជា You Tuber ដ៏ល្បីម្នាក់ក្នុងប្រទេសរុស្សី គាត់តែងតែសរសេរប្លុកទេសចរណ៍ ដូច្នេះគាត់ត្រូវតែកាន់សំបុត្រកំណើតដើម្បីបញ្ជាក់ថាគាត់ជាមនុស្សពេញវ័យ មិនមែនជាក្មេងប្រុសដូចដែលមនុស្សជាច្រើនគិតនោះទេ។

Denis បានចែករំលែកថា មានមនុស្សជាច្រើនបានសួរអំពីអាយុរបស់ខ្ញុំ មិនត្រឹមតែតាមអ៊ីនធឺណិតប៉ុណ្ណោះទេ ប៉ុន្តែថែមទាំងនៅក្នុងជីវិតពិតទៀតផង។ ខ្ញុំចាំបានថាធ្លាប់ត្រូវប៉ូលិសចរាចរណ៍ផាក នៅពេលដែលខ្ញុំបើកឡាន ដោយប៉ូលីស សង្ស័យថាខ្ញុំក្លែងបន្លំប័ណ្ណបើកបរ។ បន្ទាប់ពីផ្ទៀងផ្ទាត់អាយុរបស់ខ្ញុំរួច ប៉ូលីសក៏បានចាប់ផ្តើមនិយាយលេងសើចអំពីរូបរាងរបស់ខ្ញុំ រហូតធ្វើអោយខ្ញុំមិនសប្បាយចិត្ត។
Denis ក៏បានបន្តទៀតថា ខ្ញុំបានទៅមន្ទីពេទ្យអស់ជាច្រើនដងហើយ ដើម្បីពិនិត្យសុខភាព ប៉ុន្តែនៅតែរកមិនឃើញមូលហេតុ។ លោក Denis Vashuri មើលទៅដូចជាក្មេងប្រុសវ័យជំទង់ប្រហែល ១៣-១៤ ឆ្នាំ ដោយលោកក៏មិនសូវស្រួលខ្លួនដែរ ប៉ុន្តែក្រោយមក គាត់គិតថា ជីវិតរបស់គាត់នៅតែត្រូវបន្តទៅមុខទោះបីជាជួបការលំបាកក៏ដោយ ហើយតែងតែរក្សាទស្សនៈវិជ្ជមានជានិច្ច។

គួរបញ្ជាក់ដែរថា Denis មានភាពល្បីល្បាញកាលពី ២ ឆ្នាំមុនបន្ទាប់ពីត្រូវបានសម្ភាសន៍អំពីរូបរាងដ៏ប្លែករបស់គាត់។ គាត់បានធ្វើឱ្យសហគមន៍អនឡាញមានការភ្ញាក់ផ្អើលយ៉ាងខ្លាំងបន្ទាប់ពីបានបង្ហាញពីអាយុពិតរបស់គាត់ ដោយមនុស្សជាច្រើនស្ទើរតែមិនជឿនៅពេលដែលគាត់មើលទៅដូចមិនចាស់តាមពេលវេលាសោះ។ នៅក្នុង Instagram របស់ Denis បច្ចុប្បន្នទាក់ទាញអ្នកតាមដានចំនួន ២០ ពាន់នាក់៕

ប្រភព៖cafef.com

រដ្ឋធានីសេអ៊ូល៖ ក្រោយពេលទីភ្នាក់ងារថាមពលអាតូមិកអន្ដរជាតិ (IAEA) របស់អង្គការសហប្រជាជាតិ បានសម្រេចអនុញ្ញាតឲ្យបញ្ចេញទឹកសំណល់ពីរោងចក្រថាមពលនុយក្លេអ៊ែរហ៊្វូគីស៊ីម៉ា ដាយអ៊ីឈិ រួចមក សមាជិកសភា មកពីគណបក្សប្រឆាំងដ៏ធំរបស់កូរ៉េខាងត្បូង កំពុងតែបង្កើនសម្ពាធយ៉ាងខ្លាំង ទៅដល់រដ្ឋាភិបាលក្រុងសេអ៊ូល ជំរុញឲ្យថ្កោលទោស ដល់ផែនការរបស់ក្រុងតូក្យូ។

សារព័ត៌មាន Channel News Asia បានចេញផ្សាយ នៅថ្ងៃសុក្រ ទី៧ ខែកក្កដា ថា ក្រុមសមាជិករបស់គណបក្សប្រជាធិបតេយ្យ ដែលជាបក្សប្រឆាំងដ៏ធំ នៅក្នុងប្រទេសកូរ៉េខាងត្បូង ចាប់ផ្តើមអង្គុយពេញមួយយប់ នៅខាងក្នុងរដ្ឋសភា តវ៉ាប្រឈងនឹងរបាយការណ៍របស់ទីភ្នាក់ងារថាមពលអាតូមិកអន្ដរជាតិ (IAEA) និង ការបញ្ចេញទឹកសំណល់ ចេញពីរោងចក្រហ៊្វូគីស៊ីម៉ា (Fukushima) បង្ហូរចូលទៅក្នុងមហាសមុទ្រប៉ាស៊ីហ្វិក។

រដ្ឋាភិបាលក្រុងសេអូល បានបញ្ជាក់ នៅថ្ងៃសុក្រ (ទី៧ ខែកក្កដា) ថា «កូរ៉េខាងត្បូង គោរពការសន្និដ្ឋានលើការត្រួតពិនិត្យសុវត្ថិភាពរបស់ក្រុមឃ្លាំមើលនុយក្លេអ៊ែររបស់អង្គការសហប្រជាជាតិ ដែលបានអនុម័តចំពោះផែនការរបស់ប្រទេសជប៉ុន នៅក្នុងការបញ្ចេញទឹកសំណល់ ចេញពីរោងចក្រហ៊្វូគីស៊ីម៉ា។ រីឯកំហាប់សារធាតុវិទ្យុសកម្ម បំពេញតាមស្តង់ដារ សម្រាប់ការបញ្ចេញទឹក ទៅក្នុងមហាសមុទ្រ ដែលបានចម្រោះធាតុវិទ្យុសកម្មរួច ហើយត្រូវគេរំពឹង ថា នឹងមិនមានផលប៉ះពាល់ណាមួយ ដល់តំបន់មហាសមុទ្ររបស់យើងនោះឡើយ»។

លោក រ៉ាហ្វាអែល ហ្គ្រូសស៊ី (Rafael Grossi) អគ្គនាយកទីភ្នាក់ងារថាមពលអាតូមិកអន្តរជាតិ (IAEA) បានចុះទៅពិនិត្យទីតាំងរោងចក្រថាមពលនុយក្លេអ៊ែរហ៊្វូគីស៊ីម៉ា ដាយអ៊ីឈិ (Fukushima Daiichi) កាលពីថ្ងៃពុធ (ទី៥ ខែកក្កដា) និង បានជួបជាមួយអ្នកស្រុក។ ក្រោយមក គាត់បានអះអាង អំពីសុវត្ថិភាព សម្រាប់ផែនការរបស់ប្រទេសជប៉ុន បញ្ចេញទឹកសំណល់មានធាតុវិទ្យុសកម្ម ដែលត្រូវបានចម្រោះរួចហើយ ចេញពីរោងចក្រថាមពលនេះ ដើម្បីបង្ហូរទឹកសំណល់ទាំងនោះ ចូលទៅក្នុងមហាសមុទ្រប៉ាស៊ីហ្វិក។

ទីភ្នាក់ងារ IAEA របស់អង្គការសហប្រជាជាតិ បានបញ្ជាក់ កាលពីថ្ងៃអង្គារ នៅក្នុងព្រឹត្តិការណ៍ដ៏សំខាន់មួយ សម្រាប់ការរុះរើរោងចក្រថាមពលនុយក្លេអ៊ែរ ដែលត្រូវបានបំផ្លាញ នៅក្នុងហេតុការណ៍គ្រោះរញ្ជួយដីដ៏ខ្លាំងក្លា និង មហារលកយក្សស៊ូណាមិ កាលពីអំឡុងឆ្នាំ២០១១ ថា ការត្រួតពិនិត្យ រយៈពេល២ឆ្នាំមកនេះ រកឃើញ ថា ផែនការរបស់ជប៉ុន សម្រាប់ការបង្ហូរទឹកសំណល់ ចេញពីរោងចក្រហ៊្វូគូស៊ីម៉ា ដាយអ៊ីឈិ នេះ នឹងមានផលប៉ះពាល់តិចតួច ដល់មនុស្ស ឬ បរិស្ថាន។

សហជីពនេសាទជប៉ុន បានជំទាស់តវ៉ា ប្រឆាំងនឹងផែនការនេះ អស់រយៈពេលជាយូរមកហើយ ដោយបានអះអាង ថា រដ្ឋាភិបាលគួរតែលុបចោលផែនការជួសជុលនូវការខូចខាតកេរ្តិ៍ឈ្មោះរបស់ខ្លួន។ ប្រទេសមួយចំនួន បានហាមឃាត់នូវផលិតផលអាហារមួយចំនួនរបស់ជប៉ុន ព្រោះតែពួកគេភ័យខ្លាចវិទ្យុសកម្ម។ ជប៉ុន តែងតែធ្វើតេស្ត លើម្ហូបអាហារសមុទ្រ ចេញពីតំបន់ហ៊្វូគូស៊ីម៉ា (Fukushima) ជាប្រចាំ ហើយរកឃើញ ថា វាមានសុវត្ថិភាពតាមស្ដង់ដារ។

លោក វ៉ាង វ៉ែនប៊ិន (Wang Wenbin) អ្នកនាំពាក្យ ក្រសួងការបរទេសចិន កាលពីថ្ងៃពុធ បានរិះគន់ដល់ចំណាត់ការ ឆ្ពោះទៅរកការបង្ហូរទឹក បញ្ចេញពីរោងចក្រថាមពលនុយក្លេអ៊ែរហ៊្វូគីស៊ីម៉ាដាយអ៊ិឈិ ហើយថែមទាំង បានគំរាម អំពីចំណាត់វិធានការផ្សេងៗ ប្រសិនបើផែនការនេះគួរតែដំណើរការទៅមុខ។

អ្នកនាំពាក្យ ក្រសួងការបរទេសចិន បានសង្កត់ធ្ងន់ ថា «នាយកដ្ឋានពាក់ព័ន្ធរបស់រដ្ឋាភិបាលក្រុងប៉េកាំង នឹងពង្រឹងនូវការត្រួតពិនិត្យ លើបរិស្ថានដែនសមុទ្រ និង ត្រួតពិនិត្យដល់ការនាំចូលផលិតផលសមុទ្រ សម្រាប់ធានាដល់សុខភាព និង សន្តិសុខស្បៀងអាហារ សម្រាប់សាធារណជន»។ បើទោះជាយ៉ាងណាក៏ដោយ គាត់បានបដិសេធ ចំពោះការផ្តល់ព័ត៌មានលម្អិតជាក់លាក់ អំពីសកម្មភាពប្រភេទណា នឹងត្រូវរដ្ឋាភិបាលចិន ប្រកាន់យកនោះ។

ក្រុមសកម្មជនជាច្រើន នៅក្នុងប្រទេសកូរ៉េខាងត្បូង និង កូរ៉េខាងត្បូង បានបង្កើននូវការតវ៉ារបស់ពួកគេ ប្រឆាំងនឹងផែនការរបស់រដ្ឋាភិបាលជប៉ុន បញ្ចេញទឹកសំណល់ពីរោងចក្រថាមពលនុយក្លេអ៊ែរហ៊្វូគីស៊ីម៉ា ដាយអ៊ិឈិ ដោយសារតែពួកគេខ្លាចមានគ្រោះថ្នាក់ បង្កឡើងដោយវិទ្យុសកម្ម។

រដ្ឋាភិបាលក្រុងតូក្យូ និង ក្រុមមន្រ្តីជំនាញរបស់ជប៉ុន បញ្ជាក់ ថា ទឹកនៅក្នុងរោងចក្រហ៊្វូគូស៊ីម៉ា ត្រូវបានចម្រោះ យកធាតុវិទ្យុសកម្ម ចេញអស់ភាគច្រើនរួចមកហើយ ហើយវាក៏នឹងមិនមានផលប៉ះពាល់ សម្រាប់កម្រិតសុវត្ថិភាពនោះទេ។ ប៉ុន្ដែការសម្រេចចិត្តណាមួយរបស់ទីភ្នាក់ងារ IAEA ក៏ត្រូវគេរំពឹងទុក ថា អាចនឹងធ្វើឡើង នៅក្នុងសប្ដាហ៍នេះ៕