ប្រទេសថៃ ៖ កាលពីថ្ងៃទី១៥ ខែកក្កដា កន្លងមក លោក Anon Nampha ជាសកម្មជននយោបាយប្រចាំប្រទេសថៃ បានបង្ហោះសារនៅក្នុងហ្វេសប៊ុកថា នឹងរៀបចំក្បួនមួយដើម្បីយកលិខិតលាលែងពីតំណែងទៅដាក់ជូនសមាជិកព្រឹទ្ធសភាដល់កន្លែងតែម្តង ខណៈពួកគេមិនធ្វើតាមតួនាទី ដូច្នេះ ត្រូវតែចុះចេញពីតំណែង ។ បន្ទាប់មក នៅរសៀលថ្ងៃទី១៦ ខែកក្កដា នៅទីលានអនុស្សាវរីយ៍ប្រជាធិបតេយ្យ (Democracy Monument) ស្ថិតនៅផ្លូវរ៉ាជដាំណឺនក្លាង ទីក្រុងបាងកក លោក Anon Nampha និងក្រុមបាតុ.ក.របានប្រមូលផ្តុំគ្នាជាបណ្តើរៗមករៀបចំក្បួនដង្ហែរតាមរថយន្ត ដើម្បីយកលិខិតលាលែងពីតំណែងទៅដាក់ជូនព្រឹទ្ធសភា ។

លោកវរសេនីយ៍ឯក Thosaphol Ampaiphiphatkul ដែលបានមកថែទាំសណ្តាប់ធ្នាប់នៅកន្លែងប្រមូលផ្តុំក្រុមបាតុ.ករ និយាយថា ក្រុមបាតុ.ករបានសុំអនុញ្ញាតប្រើប្រាស់ទីធ្លាប្រមូលផ្តុំគ្នាតវ៉ារួចហើយ ។ ដូច្នេះ កងកម្លាំងប៉ូលិសមិនបានរៀបចំកម្លាំងអ្វីពិសេសទេ គ្រាន់តែមានតួនាទីមើលថែសណ្តាប់ធ្នាប់ ដើម្បីផ្តល់ភាពងាយស្រួលដល់ការធ្វើចរាចរណ៍របស់ក្រុមបាតុ.ក.រ រួមទាំងបែងចែកផ្លូវធ្វើចរាចរណ៍សម្រាប់ពលរដ្ឋទូទៅ និងក្រុមបាតុ.ករ ។ យើងបានជំរុញឱ្យក្រុមបាតុ.ករធ្វើសកម្មភាពក្នុងក្របខ័ណ្ឌច្បាប់ និងដោយសន្តិវិធី ហើយកុំប្រព្រឹត្តអ្វីលើសពីនេះ គឺពួកគេត្រូវប្រមូលផ្តុំគ្នាតាមសិទ្ធិសេរីភាពស្របតាមរដ្ឋធម្មនុញ្ញ ។

លោក Anon Nampha សកម្មជននយោបាយបានផ្តល់សម្ភាសន៍មកកាន់សារព័ត៌មានថា យើងបានហែរក្បួនទៅកាន់ស្នាក់ការកងទ័ពជើងគោក កងទ័ពជើងទឹក អគ្គស្នងការនគរបាលជាតិ និងមជ្ឈមណ្ឌលសិល្បៈ និងវប្បធម៌ក្រុងបាងកក ។ ចំពោះគោលបំណងសំខាន់ គឺយើងបានដាក់សំណើអំពាវនាវឱ្យសមាជិកព្រឹទ្ធសភា ដែលមិនបានចូលរួមប្រជុំនៅថ្ងៃទី១៣ ខែកក្កដា កន្លងមក ដើម្បីឱ្យពួកគេប្តូរចិត្ត ព្រោះការមិនចូលរួមប្រជុំរបស់ពួកគេនាថ្ងៃនោះ គឺមានគោលបំណងឱ្យចំនួនសមាជិកព្រឹទ្ធសភាធ្លាក់ចុះ ហើយធ្វើឱ្យសំឡេងគាំទ្រលោក ភីតា មិនស្មើដល់៣៧៥ពិន្ទុ ។

លោកបន្តថា ពួកគេក៏បានស្នើសុំឱ្យសមាជិកព្រឹទ្ធសភានៅសេសសល់ ត្រូវគោរពតាមសំឡេងភាគច្រើនរបស់ពលរដ្ឋ ដែលបានបោះឆ្នោតកាលពីថ្ងៃទី១៤ ខែឧសភា ឆ្នាំ២០២៣ ។ ពួកគេសង្ឃឹមថា ការតវ៉ានេះបានជួយជំរុញទឹកចិត្តដល់សមាជិកព្រឹទ្ធសភា និងសមាជិកសភា ដែលមិនបោះឆ្នោតគាំទ្រអ្នកណាម្នាក់ឱ្យធ្វើជានាយករដ្ឋមន្ត្រី ។ លើសពីនេះ ការតវ៉ានេះ ក៏ជាចំណុចចាប់ផ្តើមនៃការបង្ហាញពីអំណាចពលរដ្ឋផងដែរ ព្រោះពេលនេះ ពលរដ្ឋត្រូវបានគេប្លន់យកសំឡេងឆ្នោត ដោយសារសមាជិករដ្ឋសភាមិនបានគាំទ្រតាមសំឡេងភាគច្រើនរបស់ពលរដ្ឋ ។ ដូច្នេះ ចង់ឱ្យពលរដ្ឋទាំងអស់នៅទូទាំងប្រទេសក្រោកឈរឡើង និងតស៊ូ ។

លោក Anon Nampha បញ្ជាក់ថា នៅថ្ងៃទី១៩ ខែកក្កដា ឆ្នាំ២០២៣ បេក្ខជនដែលត្រូវឈរឈ្មោះឱ្យគេបោះឆ្នោតធ្វើជានាយករដ្ឋមន្ត្រី គឺលោក Pita Limjaroenrat មេដឹកនាំគណបក្សកាវក្លៃ ហើយគណបក្សភឿថៃ ក៏បានគាំទ្រលោកដែរ ។ គណបក្សរួមគ្នាទាំង៨ ត្រូវសហការគ្នាឱ្យស្អិតរមួតនៅពេលចេញលទ្ធផលការបោះឆ្នោតជ្រើសរើសនាយករដ្ឋមន្ត្រី លើកទី២ ហើយលោកនៅតែគិតថា អ្នកគាំទ្រគណបក្សកាវក្លៃ និងភឿថៃ មិនព្រមជាដាច់ខាត ។

ចំណែកការដាក់ឈ្មោះលោក Prawit Wongsuwan មេដឹកនាំគណបក្សផ្លាំងប្រាឆារ៉ាត់ ឱ្យធ្វើជានាយករដ្ឋមន្ត្រីថៃ លោក Anon Nampha គិតថា អាចដាក់ឈ្មោះលោក Prawit ធ្វើជានាយករដ្ឋមន្ត្រីបាន ប៉ុន្តែមិនអាចទៅរួចទេ ឬអាចទៅរួច ដោយសារសមាជិកព្រឹទ្ធសភាបោះឆ្នោតឱ្យ ។ ទោះយ៉ាងណា រដ្ឋាភិបាលដែលទទួលបានសំឡេងឆ្នោតតិចមិនអាចដឹកនាំប្រទេសជាតិបានទេ ហើយមនុស្សទូទៅក៏មិនព្រមដែរ ។

លោក Anon Nampha អះអាងថា ការធ្វើបាតុ.កម្មលើកនេះ គឺជាការលើកទឹកចិត្តដល់សមាជិកព្រឹទ្ធសភាដែលមិនបញ្ចេញសំឡេង ហើយលោកជឿថា បើពលរដ្ឋបញ្ចេញមតិគាំទ្រច្រើន វានឹងធ្វើឱ្យសមាជិកព្រឹទ្ធសភាទាំងនេះប្តូរចិត្ត ។ លោកបញ្ជាក់ថា នៅថ្ងៃទី១៩ ខែកក្កដា នឹងមានការប្រមូលផ្តុំគ្នាធ្វើបាតុ.កម្មជាទ្រង់ទ្រាយធំ ។ នៅម៉ោង២សៀលថ្ងៃទី១៦ ខែកក្កដា ក្បួនបាតុ.កម្មក៏បានចាប់ផ្តើមធ្វើដំណើរចាកចេញពីទីលានអនុស្សាវរីយ៍ប្រជាធិបតេយ្យទៅកាន់ចំណុចផ្សេងៗ ៕ ប្រភព ៖ daily news

រដ្ឋធានីសេអ៊ូល៖ ក្រោយកូរ៉េខាងជើង បានបាញ់មីស៊ីលចុងក្រោយរបស់ខ្លួន គំរាមកំហែង មកលើប្រទេសជិតខាងជាសម្ពន្ធមិត្តរបស់រដ្ឋាភិបាលក្រុងវ៉ាស៊ីនតោន រួចមក សហរដ្ឋអាមេរិក កូរ៉េខាងត្បូង និង ជប៉ុន ក៏បានចាប់ផ្ដើមធ្វើសមយុទ្ធយោធារួមគ្នា ត្រៀមទប់ទល់ប្រឆាំងនឹងការបាញ់ប្រហារ ដោយមីស៊ីលរបស់រដ្ឋាភិបាលក្រុងព្យុងយ៉ាង។

សារព័ត៌មាន នៅក្នុងប្រទេសសិង្ហបុរី Channel News Asia បានចេញផ្សាយ កាលពីព្រឹក ថ្ងៃចន្ទ ទី១៧ ខែកក្កដា ថា កងទ័ពជើងទឹករបស់កូរ៉េខាងត្បូង បានបញ្ជាក់ ថា ក្រោយការបាញ់មីស៊ីលអន្ដរទ្វីប (ICBM) របស់កូរ៉េខាងជើង កាលពីប៉ុន្មានថ្ងៃមុននេះរួចមក កងទ័ពជើងទឹករបស់សហរដ្ឋអាមេរិក កូរ៉េខាងត្បូង និង ជប៉ុន កាលពីថ្ងៃអាទិត្យ (ទី១៦ ខែកក្កដា) បានធ្វើសមយុទ្ធរួមគ្នា ការពារទប់ទល់ ប្រឆាំងនឹងការគំរាមកំហែង ពីអាវុធនុយក្លេអ៊ែរ និង មីស៊ីលរបស់ក្រុងព្យុងយ៉ាង។

កូរ៉េខាងជើង បានបាញ់មីស៊ីល Hwasong-18 (វ៉ាស៊ុង-១៨) ចុងក្រោយបំផុតរបស់ខ្លួន កាលពីថ្ងៃពុធ សប្ដាហ៍មុន នៅឯឆ្នេរសមុទ្រភាគខាងកើត តាមអ្វីដែលរដ្ឋាភិបាលក្រុងព្យុងយ៉ាង បានអះអាង ថា នេះជាកម្លាំងស្នូលវាយប្រហារនុយក្លេអ៊ែររបស់ខ្លួន ព្រមានជាក់ស្តែងដ៏ខ្លាំងក្លា ប្រឆាំងនឹងសត្រូវ។

មន្រ្ដីកងទ័ពជើងទឹកកូរ៉េខាងត្បូង បានអះអាង ថា សមយុទ្ធយោធារួមគ្នា រវាងកូរ៉េខាងត្បូង ជប៉ុន និង សហរដ្ឋអាមេរិក កាលពីថ្ងៃអាទិត្យ (ទី១៦ ខែកក្កដា) ត្រូវបានរៀបចំធ្វើឡើង នៅក្នុងដែនទឹកអន្តរជាតិ រវាងកូរ៉េខាងត្បូង និង ជប៉ុន ដែលជាសម្ពន្ធមិត្តដ៏ជិតស្និទ្ធរបស់សហរដ្ឋអាមេរិក នៅតំបន់អាស៊ីបូព៌ា ដោយមានការចូលរួមពីនាវាពិឃាដ បំពាក់ដោយប្រព័ន្ធរ៉ាដា Aegis (អ៊ីជេស) មកពីប្រទេសជប៉ុនទាំង៣នេះ។

រដ្ឋាភិបាលក្រុងវ៉ាស៊ីនតោន និង សម្ពន្ធមិត្តអាស៊ីបូព៌ារបស់សហរដ្ឋអាមេរិក កំពុងតែកែលម្អនូវប្រព័ន្ធចែករំលែកព័ត៌មានរបស់ពួកគេ ជុំវិញសកម្មភាពបាញ់មីស៊ីលរបស់កូរ៉េខាងជើង។ កូរ៉េខាងត្បូង និង ជប៉ុន ត្រូវបានចងភ្ជាប់ដោយឯករាជ្យ ទៅនឹងប្រព័ន្ធរ៉ាដារបស់សហរដ្ឋអាមេរិក ប៉ុន្តែមិនមែន សម្រាប់ការផ្ដល់ឲ្យគ្នាទៅវិញទៅមកនោះឡើយ។

កងទ័ពកូរ៉េខាងត្បូង បានអះអាង ថា ការធ្វើសមយុទ្ធនេះ មានគោលបំណង ធ្វើជាម្ចាស់ ដើម្បីឆ្លើយតបរបស់សម្ពន្ធមិត្ត ទប់ទល់នឹងការបាញ់មីស៊ីលផ្លោងរបស់កូរ៉េខាងជើង ជាមួយនឹងសេណារីយ៉ូ ត្រូវបានបង្ហាញ អំពីគោលដៅនិម្មិត។

មន្ត្រីមួយរូបរបស់កងទ័ពជើងទឹកកូរ៉េខាងត្បូង បានអះអាង ថា «យើងនឹងឆ្លើយតប ដោយមានប្រសិទ្ធភាពខ្ពស់បំផុត សម្រាប់ទប់ទល់នឹងការគំរាមកំហែង ដោយអាវុធនុយក្លេអ៊ែរ និង មីស៊ីលរបស់កូរ៉េខាងជើង ជាមួយនឹងប្រព័ន្ធឆ្លើយតបដ៏រឹងមាំរបស់យោធារបស់យើង និង កិច្ចសហប្រតិបត្តិការត្រីភាគី រវាងកូរ៉េខាងត្បូង ជប៉ុន និង សហរដ្ឋអាមេរិក» ។

កូរ៉េខាងជើង កាលពីប៉ុន្មានថ្ងៃមុននេះ បានបាញ់មីស៊ីលចុងក្រោយរបស់ខ្លួន ធ្លាក់ចូលទៅក្នុងសមុទ្រ ហើយសកម្មភាពបែបនេះ បាននាំឲ្យមានការថ្កោលទោសយ៉ាងខ្លាំង ពីសហរដ្ឋអាមេរិក កូរ៉េខាងត្បូង និងជប៉ុន បើទោះជារដ្ឋាភិបាលក្រុងព្យុងយ៉ាង បានទាត់ចោលនូវការថ្កោលទោសនេះ ក្រោមហេតុផល ថា សកម្មភាពទាំងនេះ ជាការអនុវត្តនូវសិទ្ធិការពារខ្លួនយ៉ាងណាក៏ដោយ៕

ប្រទេសថៃ ៖ លោក Pita Limjaroenrat មេដឹកនាំគណបក្សកាវក្លៃ និងជាបេក្ខជននាយករដ្ឋមន្ត្រីប្រទេសថៃ បានបង្ហោះវីដេអូមួយក្នុងបណ្តាញសង្គមថា បើលោកបានធ្វើអស់ពីសមត្ថភាពហើយ ប៉ុន្តែគ្មានឱកាស គឺលោកនឹងបើកផ្លូវឱ្យគណបក្សភឿថៃដឹកនាំបង្កើតរដ្ឋាភិបាលថ្មី ។ ប៉ុន្តែលោក លោក Pita លើកឡើងថា យើងនឹងមិនព្រមចុះចាញ់ឡើយ ។

លោក Pita បាននិយាយក្នុងវីដេអូថា សួស្តី អ្នកទាំងអស់គ្នា ជាដំបូង ខ្ញុំសូមអរគុណដល់សមាជិករដ្ឋសភាទាំង៣២៤សំឡេង ជាពិសេស សមាជិកព្រឹទ្ធសភាចំនួន១៣រូប ដែលបានបោះឆ្នោតគាំទ្រខ្ញុំ Pita Limjaroenrat ឱ្យធ្វើជានាយករដ្ឋមន្ត្រី ។ ខ្ញុំដឹងច្បាស់ថា សមាជិកព្រឹទ្ធសភាជាច្រើនរូបបានប្រឈមនឹងការដាក់សម្ពាធខ្លាំងក្លាក្នុងការសម្រេចចិត្តលើកនេះ ។ ចំណុចសំខាន់បំផុត ខ្ញុំសូមអរគុណកម្លាំងចិត្ត ការគាំទ្រពីពលរដ្ឋទាំងអស់ ប៉ុន្តែសូមអភ័យទោសអ្នកទាំងអស់ផង ដែលយើងមិនទាន់ទទួលបានជោគជ័យ ។

ទោះយ៉ាងណា ក្នុងឋានៈគណបក្សនយោបាយដែលទទួលបានសំឡេងឆ្នោតច្រើនលំដាប់ទី១ ក្នុងការបោះឆ្នោត គណបក្សកាវក្លៃមានភារកិច្ចត្រូវទទួលខុសត្រូវចំពោះពលរដ្ឋ គឺការបង្កើតរដ្ឋាភិបាលឱ្យបាន ។ យើងព្យាយាមធ្វើគ្រប់វិធីសាស្ត្រតាមលទ្ធិប្រជាធិបតេយ្យ ដើម្បីឱ្យសំឡេងរបស់ពលរដ្ឋទទួលបានការគាំទ្រ និងការគោរពសំឡេងឆ្នោតពលរដ្ឋ ។

នេះជាការតស៊ូរួមគ្នា ហើយក៏មិនមែនជាការតស៊ូរបស់គណបក្សកាវក្លៃតែមួយទេ ហើយ១៤លានសំឡេងដែលបោះឆ្នោតជ្រើសរើសគណបក្សកាវក្លៃ គឺមិនមែនជាការតស៊ូរបស់គណបក្សនយោបាយចំនួន៨ ដែលតំណាងឱ្យ២៧លានសំឡេងទេ ប៉ុន្តែវាជាការតស៊ូរបស់ពលរដ្ឋថៃនៅទូទាំងប្រទេសដើម្បីបញ្ជាក់ថា សំឡេងឆ្នោតរបស់ពលរដ្ឋត្រូវតែជាសំឡេងកំណត់អនាគតប្រទេសជាតិ ។

សូមយើងដើរទាំងអស់គ្នាបន្តទៀត ដោយបង្កើតរដ្ឋាភិបាលរបស់ពលរដ្ឋឱ្យបាន ប៉ុន្តែពេលវេលារបស់យើងនៅសល់មិនច្រើនទេ ព្រោះខ្ញុំដឹងច្បាស់ថា ប្រទេសថៃដើរទៅមុខទៀតដោយគ្មានរដ្ឋាភិបាលរបស់ពលរដ្ឋបែបនេះមិនបានយូរទេ ។ ក្នុងរយៈពេលមានកំណត់នេះ យើងនៅសល់ឱកាសមិនប៉ុន្មានលើកទៀតទេ ដែលត្រូវតស៊ូរួមគ្នាក្នុងសមរភូមិចំនួន២ ដើម្បីបង្កើតរដ្ឋាភិបាលតាមមតិសាធារណៈឱ្យបានជោគជ័យ ។

សមរភូមិទី១ នឹងកើតឡើងនៅថ្ងៃខាងមុខ គឺការបោះឆ្នោតជ្រើសរើសនាយករដ្ឋមន្ត្រីថៃ នៅថ្ងៃទី១៩ ខែកក្កដា ឆ្នាំ២០២៣ ។ ចំណែកសមរភូមិទី២ គឺជាការស្នើធ្វើវិសោធនកម្មរដ្ឋធម្មនុញ្ញ មាត្រា២៧២ ដើម្បីកាត់បន្ថយអំណាចរបស់សមាជិកព្រឹទ្ធសភាជារៀងរហូត ក្នុងការបោះឆ្នោតជ្រើសរើសនាយករដ្ឋមន្ត្រី ។

សមរភូមិទាំងពីរនេះនឹងមិនទទួលជោគជ័យទេ បើយើងមិនអាចធ្វើឱ្យសមាជិកព្រឹទ្ធសភាប្តូរចិត្ត ឱ្យពួកគេគាំទ្រសំឡេងឆ្នោតរបស់ពលរដ្ឋ ។ ហេតុនេះ ខ្ញុំសូមឱ្យពលរដ្ឋគ្រប់រូបរួមគ្នាបំពេញភារកិច្ចជាមួយខ្ញុំក្នុងសមរភូមិទាំងពីរនេះ ដោយការផ្ញើសារទៅសមាជិកព្រឹទ្ធសភាគ្រប់មធ្យោបាយ និងជួយគ្នាអញ្ជើញឱ្យសមាជិកព្រឹទ្ធសភាបោះឆ្នោតជ្រើសរើសនាយករដ្ឋមន្ត្រីតាមមតិពលរដ្ឋ ឬបោះឆ្នោតលុបចោលមាត្រា២៧២ ដើម្បីផ្តល់អំណាចឱ្យពលរដ្ឋវិញ ។

បើពួកយើងធ្វើអស់ពីសមត្ថភាពចំពោះសមរភូមិទាំងពីរហើយ ហើយគណបក្សកាវក្លៃគ្មានឱកាសដឹកនាំបង្កើតរដ្ឋាភិបាលបានជោគជ័យ ខ្ញុំសូមបើកឱកាសឱ្យប្រទេសថៃ ដោយបើកផ្លូវឱ្យគណបក្សលំដាប់ទី២ គឺគណបក្សភឿថៃដឹកនាំបង្កើតរដ្ឋាភិបាលរបស់គណបក្សចំនួន៨ នៅក្រោមកិច្ចព្រមព្រៀងធ្វើរួមគ្នា (MOU) ហើយអ្នកតំណាងរាស្ត្រមកពីគណបក្សកាវក្លៃគ្រប់រូបនឹងគាំទ្របេក្ខជននាយករដ្ឋមន្ត្រីរបស់បក្សភឿថៃ ។

ប៉ុន្តែមុននឹងដល់ថ្ងៃនោះ យើងនឹងមិនព្រមចុះចាញ់ដាច់ខាត ហើយសូមអ្នកទាំងអស់គ្នារួមសហការតស៊ូឱ្យដល់ទីបំផុត ។ ខ្ញុំតែម្នាក់ ឬគណបក្សកាវក្លៃតែមួយ មិនអាចប្តូរចិត្តរបស់សមាជិកព្រឹទ្ធសភា និងឈានទៅបង្កើតរដ្ឋាភិបាលរបស់ពលរដ្ឋបានទេ ។ ហេតុនេះ យើងសូមកម្លាំងចិត្តពីគ្រប់គ្នាសហការបំពេញភារកិច្ចនេះ ដើម្បីឱ្យយើងអាចបង្កើតរដ្ឋាភិបាលរបស់ពលរដ្ឋបានជោគជ័យ ។ អនាគតរបស់គណបក្សកាវក្លៃដើម្បីបង្កើតរដ្ឋាភិបាល គឺស្ថិតក្នុងកណ្តាប់ដៃរបស់អ្នកទាំងអស់គ្នា និងសហការគ្នាផ្ញើសារឱ្យសមាជិកព្រឹទ្ធសភាប្តូរចិត្ត ៕ ប្រភព ៖ Chiang Mai News

បរទេស៖ មហាសេដ្ឋី Elon Musk ដែលជាម្ចាស់ Twitter របស់វេទិកាបណ្តាញទំនាក់ទំនងសង្គមបានបាត់បង់ប្រហែលពាក់កណ្តាលនៃប្រាក់ចំណូលពីការផ្សាយពាណិជ្ជកម្មរបស់ខ្លួន។

យោងតាមក្រុមហ៊ុនស្រាវជ្រាវទីផ្សារ Insider Intelligence កាលពីថ្ងៃទី ១៥ ខែកក្កដា បានឱ្យដឹងថា Twitter បានកំណត់គោលដៅនៃប្រាក់ចំណូលចំនួន ៣ ពាន់លានដុល្លារក្នុងឆ្នាំនេះ ប៉ុន្តែវាមិនដូចការគ្រោងទុកនោះទេ ពោលគឺប្រាក់ចំណូលរបស់ Twitter បានធ្លាក់ចុះប្រហែលជាង ៣០% ស្មើនឹង ៧.៦ លានដុល្លារបើធៀបនឹងឆ្នាំមុន។ លោក Elon Musk បានទទួលស្គាល់ដោយស្មោះត្រង់នូវការលំបាកដែល Twitter កំពុងប្រឈមមុខដោយប្រកាសថា “លំហូរសាច់ប្រាក់របស់យើងនៅតែអវិជ្ជមាន ដោយសារតែការថយចុះនៃប្រាក់ចំណូលផ្សាយពាណិជ្ជកម្មប្រហែល ៥០% បូកនឹងបន្ទុកបំណុលផ្សេងទៀត” ។

Twitter បច្ចុប្បន្នកំពុងប្រឈមមុខនឹងការលំបាកជាច្រើនចាប់តាំងពីការផ្លាស់ប្តូរគោលនយោបាយរបស់ខ្លួនជានិច្ច។ ថ្មីៗនេះ ថៅកែ Twitter បានបង្ហាញពីការកំណត់គណនីយ៉ាងចម្រូងចម្រាសសម្រាប់អ្នកប្រើប្រាស់ ដោយអតិថិជន Twitter Blue អាចមើលបានរហូតដល់ ១០,០០០ ប្រកាសក្នុងមួយថ្ងៃ និងគណនីដែលបានបង្កើតឡើងយូរអាចមើលបាន ១.០០០ ប្រកាស ខណៈដែលគណនីដែលទើបបង្កើតថ្មីអាចមើលបានត្រឹមតែ ៥០០ ប្រកាសប៉ុណ្ណោះ។

Twitter ក៏កំពុងជួបប្រទះនឹងបញ្ហានេះឥតឈប់ឈរផងដែរ ដូចជាការរអាក់រអួលនៃសេវាកម្ម ភាពមិនប្រក្រតី API និងតំណភ្ជាប់ tweet ដែលខូចនៅពេលចែករំលែកជាដើម។ យោងតាមសារព័ត៌មាន Bloomberg បានឱ្យដឹងថា Twitter នឹងកាន់តែលំបាកនៅពេលដែលលោក Mark Zuckerberg បានបើកដំណើរការវេទិកាស្រដៀងគ្នាមួយដែលមានឈ្មោះថា Threads ហើយ ឈានដល់កំណត់ត្រា អ្នកប្រើប្រាស់ ១០០ លាននាក់ក្នុងរយៈពេលត្រឹមតែ ៥ ថ្ងៃ។ ខណៈពេលដែល Threads បន្តកើនឡើងនៅក្នុងលក្ខខណ្ឌនៃអ្នកប្រើប្រាស់ Twitter មាន និន្នាការធ្លាក់ចុះយ៉ាងខ្លាំងនៅក្នុងចរាចរណ៍ នាពេលថ្មីៗនេះ៕ ប្រភព៖vnexpress