ប្រទេសបារាំង ៖ កាលពីថ្ងៃទី១៩ ខែកក្កដា កន្លងមក ក្រសួងមហាផ្ទៃបារាំងបានប្រកាសថា មានមនុស្សជាង៧០០នាក់ត្រូវបានតុលាការកាត់ទោសឱ្យជាប់ពន្ធនាគារ ។ តុលាការបានចោទប្រកាន់ពួកគេពីបទបង្កចលាចលនៅទូទាំងប្រទេសបារាំង កាលពីចុងខែមិថុនា ឆ្នាំ២០២៣ ។

រដ្ឋមន្ត្រីក្រសួងមហាផ្ទៃបារាំង លោក Eric Dupond-Moretti បានថ្លែងទៅកាន់ស្ថានីយវិទ្យុក្នុងប្រទេសថា វាចាំបាច់ណាស់ដែលអាជ្ញាធរត្រូវចាត់វិធានការប្រឆាំងដាច់ខាតនឹងការប្រើអំពើហិង្សា និងជាប្រព័ន្ធផងដែរ ពីព្រោះការរៀបចំសណ្តាប់ធ្នាប់នៅក្នុងប្រទេសបារាំង គឺជារឿងសំខាន់ ។

តុលាការបានកាត់ទោសក្រុមបង្កចលាចលសរុបចំនួន១.២៧៨នាក់ ក្នុងនោះ៩៥% ត្រូវបានតុលាការកាត់ទោសពាក់ព័ន្ធនឹងបទចោទប្រកាន់ផ្សេងៗដូចជា បំផ្លាញទ្រព្យសម្បត្តិសាធារណៈ រហូតដល់វាយតប់មន្ត្រីប៉ូលិសជាដើម ។ តុលាការបានកាត់ទោសមនុស្សជាង៧០០នាក់ឱ្យជាប់ពន្ធនាគារ ក្នុងនោះគេបានចាប់ខ្លួនមនុស្ស៦០០នាក់ទៅដាក់ពន្ធនាគាររួចហើយ ។ គេសង្កេតឃើញថា ការបង្កចលាចលនេះធ្ងន់ធ្ងរជាងកាលពីឆ្នាំ២០០៥ ទៅទៀត ខណៈកាលពីឆ្នាំ២០០៥ មានអ្នកជាប់ពន្ធនាគារប្រមាណ៤០០នាក់ ។

ការបង្កចលាចលលើកចុងក្រោយនៅប្រទេសបារាំង មានមនុស្សជាង៣.៧០០នាក់ត្រូវបានគេចាប់ខ្លួន ក្នុងនោះមានយុវជនអាយុត្រឹម១៧ឆ្នាំផងដែរ ហើយគេបានបញ្ជូនយុវជនដែលប្រព្រឹត្តខុសទៅកាន់តុលាការយុវជន ។ ចំពោះមូលហេតុនាំឱ្យមានការប្រើហិង្សានេះ ដោយសារប៉ូលិសបានបា.ញ់យុវជនម្នាក់ជនជាតិអាល់ហ្សេរី មានអាយុ១៧ឆ្នាំ បណ្តាលឱ្យស្លា.ប់កាលពីថ្ងៃទី១៧ ខែមិថុនា កន្លងមក ។ ប៉ូលិសនិយាយថា បានហៅយុវជនខាងលើឱ្យចតរថយន្ត ដើម្បីត្រួតពិនិត្យក្នុងតំបន់ Nanterre នៅភាគខាងលិចទីក្រុងប៉ារីស ។

ចាប់ពីពេលនោះមក ក៏មានការធ្វើបាតុកម្មជាប់ៗគ្នាចំនួន៤យប់ ហើយអាជ្ញាធរបានបញ្ជូនភ្នាក់ងារសន្តិសុខរហូតដល់៤៥.០០០នាក់ រួមទាំងប្រើប្រាស់រថពាសដែកផងដែរ ដើម្បីចេញល្បាតនៅតាមកន្លែងប្រើហិង្សានានា រហូតអាចគ្រប់គ្រងស្ថានការណ៍បាន ៕ ប្រភព ៖ TNN World

បច្ចុប្បន្ន អាកាសធាតុក្តៅខ្លាំងនៅតែគ្របដណ្តប់លើប្រទេសនានាក្នុងតំបន់អឺរ៉ុប និងនៅទូទាំងពិភពលោក ។ គេរាយការណ៍ថា ប្រទេសជាច្រើនបានប្រឈមនឹងសីតុណ្ហភាពកើនឡើងខ្ពស់ក្នុងប្រវត្តិសាស្ត្រ ខណៈភ្លើងឆេះព្រៃនៅប្រទេសមួយចំនួនក៏មានសភាពខ្លាំងក្លា ជាពិសេស ប្រទេសកាណាដាមិនអាចទប់ស្កាត់បានតទៅទៀត ហើយអំពាវនាវឱ្យប្រទេសនានាមកជួយអន្តរាគមន៍ ។

គេសង្កេតឃើញពលរដ្ឋ និងភ្ញៀវទេសចរនៅទីក្រុងរ៉ូម ប្រទេសអ៊ីតាលី បាននាំគ្នាដើរមកកាន់កន្លែងសាធារណៈនានាដើម្បីកាត់បន្ថយភាពក្តៅ ដូចជា នៅមុខអគារ Colosseum ដែលជាទីកន្លែងទេសចរណ៍ល្បីឈ្មោះ និងនៅតាមកន្លែងបាញ់ទឹកនានា ។ គេរំពឹងថា កោះ Sardinia និង Sicily របស់ប្រទេសអ៊ីតាលី នឹងមានសីតុណ្ហភាពកើនឡើងរហូតដល់៤៨,៨អង្សារសេ ដូចគ្នានឹងឆ្នាំ២០២១ ដែរ ។

ចំណែកនៅប្រទេសក្រិកបានជួបបញ្ហាភ្លើងឆេះព្រៃនៅជិតទីក្រុងអាថែន ហើយគេបានបញ្ជូនភ្នាក់ងារមកពន្លត់ភ្លើងឆេះព្រៃដោយការបញ្ចេញទឹកពីលើអាកាស ។ លើសពីនេះ អាជ្ញាធរពន្លត់ភ្លើងត្រូវធ្វើការពេញមួយយប់ ដើម្បីកុំឱ្យភ្លើងរាលដាលកាន់តែខ្លាំងទៅកាន់ទីប្រជុំជន ។ អាជ្ញាធរពន្លត់ភ្លើងនិយាយថា វាជាថ្ងៃធ្វើការដ៏សែនលំបាក ហើយសីតុណ្ហភាពនឹងកើនឡើងបន្តទៀត ។

នៅសហរដ្ឋអាមេរិកវិញ ក៏មានពលរដ្ឋរាប់ពាន់នាក់បានប្រឈមនឹងអាកាសធាតុក្តៅខ្លាំងដូចគ្នាដែរ ។ ការិយាល័យឧតុនិយមអាមេរិកដាស់តឿនថា នៅភាគនិរតីរបស់ប្រទេសនឹងប្រឈមជាមួយអាកាសធាតុក្តៅខ្លាំងរហូតដល់ចុងខែកក្កដា ឆ្នាំ២០២៣ ហើយអាកាសធាតុក្តៅខ្លាំងនឹងរាលដាលទៅភាគអាគ្នេយ៍ទៀតផង ។ ចំណែកនៅទីក្រុង San Angelo រដ្ឋ Texas មានសីតុណ្ហភាពចាប់ពី៤០អង្សារសេ ទៅ៤២អង្សារសេ ខណៈទីក្រុង Phoenix រដ្ឋ Arizona សីតុណ្ហភាពបានកើនឡើងដល់៤៣,៣អង្សារសេ កាលពីថ្ងៃទី១៨ ខែកក្កដា កន្លងមក ។

រីឯប្រទេសកាណាដាមិនទាន់អាចទប់ស្កាត់ភ្លើងឆេះព្រៃបានទេ ហើយភ្លើងបានឆេះរាលដាលនៅរដ្ឋចំនួន៣ គឺរដ្ឋ British, Columbia, Alberta ខណៈរដ្ឋ Quebec ភ្លើងនៅតែបន្តឆេះខ្លាំងក្លា ។ ទំហំភ្លើងឆេះព្រៃដ៏ច្រើនលើសលប់នៅប្រទេសកាណាដា គឺស្មើនឹងប្រទេសអៀរឡង់ និងបែលហ្ស៊ិករួមបញ្ចូលគ្នា ឬធំជាងរដ្ឋចំនួន៥ រួមបញ្ចូលគ្នានៅអាមេរិក គឺរដ្ឋ Massachusetts, New Jersey, Connecticut, Delaware និង Vermont ៕
ប្រភព ៖ TNN World

បរទេស៖ ចាប់ពីខែសីហា ឆ្នាំ២០២៣ នេះតទៅ រុស្ស៊ីនឹងពិសោធន៍ជាមួយរូបិយបណ្ណឌីជីថលទាំងក្នុងប្រទេស និងក្រៅប្រទេស។
យោងតាមសេចក្តីព្រាងរូបិយប័ណ្ណឌីជីថលជាតិនឹងត្រូវបានបង្ហាញដល់ព្រឹទ្ធសភារុស្ស៊ីនៅថ្ងៃទី ១៩ ខែកក្កដា ប្រសិនបើត្រូវបានអនុម័តនៅក្នុងព្រឹទ្ធសភា និងចុះហត្ថលេខាលើច្បាប់ដោយប្រធានាធិបតី Vladimir Putin នោះធនាគារកណ្តាលនៃប្រទេសរុស្ស៊ីអាចនឹងចាប់ផ្តើមសាកល្បងប្រាក់រូបិយបណ្ណឌីជីថលភ្លាមៗនៅខែក្រោយ។

មូលនិធិរូបិយវត្ថុអន្តរជាតិ (IMF) បាននិយាយថា ជាងពាក់កណ្តាលនៃធនាគារកណ្តាលកំពុងពិចារណា និងគ្រោងអភិវឌ្ឍរូបិយប័ណ្ណឌីជីថល ដែលមានប្រទេសចំនួន ២០ កំពុងធ្វើតេស្ត រួមទាំងឥណ្ឌា ជប៉ុន និងចិន ផងដែរ។ យោងតាមការស្រាវជ្រាវដោយក្រុមហ៊ុនប្រឹក្សា Atlantic Council គម្រោងនៃប្រទេសទាំងនេះបានឈានដល់ ២៦០ លាននាក់ ដោយបានសាកល្បងលើទីតាំងជាច្រើន ចាប់ពីការដឹកជញ្ជូនសាធារណៈរហូតដល់ពាណិជ្ជកម្មអេឡិចត្រូនិច។ បុគ្គល និងអាជីវកម្មអាចប្រើប្រាស់រូបិយប័ណ្ណឌីជីថល នៅលើវេទិការបស់ធនាគារកណ្តាល ដែលប្រតិបត្តិការនេះគឺឥតគិតថ្លៃសម្រាប់បុគ្គលម្នាក់ៗ ខណៈដែលអាជីវកម្មទទួលបាន ០.៣%។

រូបិយប័ណ្ណឌីជីថលត្រូវបានចេញដោយធនាគារកណ្តាល និងគ្រប់គ្រងដោយនិយតករ។ អ្នកគាំទ្ររបស់ពួកគេអះអាងថា រូបិយប័ណ្ណនេះនឹងជួយមនុស្សកាន់តែច្រើនឱ្យចូលប្រើសេវាធនាគារ បង្កើនតម្លាភាពក្នុងការទូទាត់ និងកាត់បន្ថយថ្លៃប្រតិបត្តិការ ចំណែកអ្នកប្រឆាំងវិញបានបារម្ភអំពីបញ្ហាសន្តិសុខ។
បច្ចុប្បន្ន ប្រព័ន្ធធនាគាររុស្ស៊ីស្ថិតនៅក្រោមការដាក់ទណ្ឌកម្មរបស់លោកខាងលិចជាបន្តបន្ទាប់ក្រោយសង្គ្រាមនៅអ៊ុយក្រែន។ ដូច្នេះ ធនាគាររុស្ស៊ីបានស្វែងរកការបន្ទន់ឥទ្ធិពលរបស់ពួកគេដោយការជួញដូររូបិយប័ណ្ណជាមួយប្រទេសអព្យាក្រឹត ដូចជាប្រទេសចិន និង ឥណ្ឌា។

នៅឆ្នាំនេះ ប្រាក់រូប្លែរបស់រុស្សីបានធ្លាក់ចុះ ១៨% ធៀបនឹងដុល្លារអាមេរិក។ រូបិយប័ណ្ណនេះក៏ស្ថិតក្នុងចំណោមប្រទេសដែលកំពុងរីកចម្រើនខ្លាំងបំផុតផងដែរ។ ប្រាក់ចំណូលថាមពលបានធ្លាក់ចុះ ដែលបណ្តាលឱ្យអតិរេកគណនីចរន្តរបស់រុស្ស៊ីធ្លាក់ចុះយ៉ាងខ្លាំង។ ទន្ទឹមនឹងនេះដែរលោក Alexandra Prokopenko អតីតទីប្រឹក្សាធនាគារកណ្តាលនៃប្រទេសរុស្ស៊ីបាននិយាយថា ការប្រើប្រាស់រូបិយប័ណ្ណឌីជីថលគឺពិតជាល្អក្នុងការតភ្ជាប់ទៅប្រព័ន្ធនៃប្រទេសផ្សេងទៀតសម្រាប់ប្រតិបត្តិការអន្តរជាតិ៕ ប្រភព៖vnexpress

ប្រទេសថៃ ៖ ប្រធានរដ្ឋសភាថៃបានកំណត់ថ្ងៃទី២៧ ខែកក្កដា ឆ្នាំ២០២៣ គឺជាថ្ងៃបោះឆ្នោតជ្រើសរើសនាយករដ្ឋមន្ត្រីថៃ ហើយនៅថ្ងៃនោះ គេនឹងមិនអាចដាក់ឈ្មោះលោក Pita Limjaroenrat ធ្វើជាបេក្ខជនឈរឈ្មោះទៀតទេ ។ ប្រធានរដ្ឋសភាលើកឡើងថា គណបក្សនយោបាយត្រូវតែបញ្ជាក់ពីគុណសម្បត្តិរបស់បេក្ខជនឈរឈ្មោះធ្វើជានាយករដ្ឋមន្ត្រី ឱ្យបាន៥ម៉ោងមុនពេលចាប់ផ្តើមបោះឆ្នោត ។

កាលពីថ្ងៃទី១៩ ខែកក្កដា ប្រធានរដ្ឋសភា លោក Wan Muhamad Noor Matha បានលើកឡើងថា ការប្រជុំដើម្បីបោះឆ្នោតជ្រើសរើសនាយករដ្ឋមន្ត្រីនាពេលបន្ទាប់ គឺនៅថ្ងៃទី២៧ ខែកក្កដា វេលាម៉ោង៩និង៣០នាទីព្រឹក ហើយគ្មានការរៀបចំផែនការអ្វីច្រើនទេ គឺដំណើរការតាមច្បាប់ ។ នៅពេលចូលដល់របៀបវារៈ នឹងមានការស្នើឈ្មោះបុគ្គលមកពីគណបក្សនយោបាយដែលសាកសមធ្វើជានាយករដ្ឋមន្ត្រី ។ បន្ទាប់មក នឹងបើកការពិភាក្សាអំពីលក្ខណៈសម្បត្តិរបស់បេក្ខជននីមួយៗ ហើយបើគ្មានបញ្ហាអ្វីទេ នឹងដំណើរការបោះឆ្នោតជ្រើសរើសនាយករដ្ឋមន្ត្រី ស្របតាមរដ្ឋធម្មនុញ្ញ មាត្រា២៧២ ។

លោក Wan Muhamad បន្តថា លោកមិនទាន់ជ្រាបថា នឹងមានឈ្មោះបេក្ខជននាយករដ្ឋមន្ត្រីប៉ុន្មាននាក់ទេ ប៉ុន្តែត្រូវជ្រើសរើសយកអ្នកដែលទទួលបានសំឡេងគាំទ្រលើស៣៧៤សំឡេង គឺនឹងបានក្លាយជានាយករដ្ឋមន្ត្រី ។ ចំណែកពេលវេលាសម្រាប់កិច្ចពិភាក្សាមិនទាន់បានកំណត់នៅឡើយទេ ហើយអាចនឹងជជែកគ្នាម្តងទៀត បន្ទាប់មក នឹងដំណើរការបោះឆ្នោតជ្រើសរើសនាយករដ្ឋមន្ត្រីតាមវិធីសាស្ត្រដើម ។

*តើនៅថ្ងៃទី២៧ ខែកក្កដា ការបោះឆ្នោតជ្រើសរើសនាយករដ្ឋមន្ត្រីនឹងត្រូវបញ្ចប់ឬអត់ ?
លោក Wan Muhamad ឆ្លើយថា មិនទាន់ដឹងទេ ប៉ុន្តែប្រជាពលរដ្ឋចង់ឱ្យការបោះឆ្នោតរួចរាល់ និងជ្រើសរើសនាយករដ្ឋមន្ត្រីបានឆាប់រហ័ស ។

*បើមានការផ្លាស់ប្តូរ តើអាចដាក់ឈ្មោះលោក Pita Limjaroenrat ធ្វើជាបេក្ខជននាយករដ្ឋមន្ត្រីមកពីគណបក្សកាវក្លៃដែរឬទេ ?
លោក Wan Muhamad ឆ្លើយថា យោងតាមបទប្បញ្ញត្តិទី៤១ ក្នុងការបោះឆ្នោតនាថ្ងៃនោះ នឹងមិនអាចដាក់ឈ្មោះលោក Pita Limjaroenrat បានទៀតទេ ៕ ប្រភព ៖ Mono News