ប្រទេសថៃ ៖ កាលពីថ្ងៃទី២៥ ខែកក្កដា ក្រុមពលរដ្ឋដែលហៅខ្លួនឯងថា «ប្រព័ន្ធផ្សព្វផ្សាយមហាជនខេត្តប៉ាធុមថានី» បាននាំគ្នាមកដាក់លិខិត និងអានសេចក្តីថ្លែងការណ៍របស់ពួកគេ ដើម្បីបង្ហាញពីគោលជំហររបស់ក្រុមអាវក្រហមដែលផ្តល់កម្លាំងចិត្តដល់គណបក្សភឿថៃ ។ ពួកគេស្នើឱ្យគណបក្សភឿថៃប្រមូលសំឡេងគាំទ្រពីគណបក្សនយោបាយផ្សេងៗ ដែលមិនគាំទ្រការធ្វើវិសោធនកម្មច្បាប់មាត្រា១១២ មករួមគ្នាបង្កើតរដ្ឋាភិបាល ព្រមទាំងគាំទ្របេក្ខជននាយករដ្ឋមន្ត្រីមកពីគណបក្សភឿថៃ ។

ក្រុមអាវក្រហមប្រចាំខេត្តប៉ាធុមថានីលើកឡើងថា ការសហការគ្នាបង្កើតរដ្ឋាភិបាលថ្មី គឺដើម្បីដោះស្រាយបញ្ហាសេដ្ឋកិច្ច និងការប្រកបមុខរបររបស់ពលរដ្ឋឱ្យបានទាន់ពេលវេលា ។ ប្រព័ន្ធផ្សព្វផ្សាយមហាជនដើម្បីប្រជាធិបតេយ្យអាវក្រហមរីករាយគាំទ្រគណបក្សភឿថៃប្រព្រឹត្តនូវទង្វើល្អបំផុត ដើម្បីពលរដ្ឋថៃនៅទូទាំងប្រទេស ។

ជាមួយគ្នានេះ ពួកគេនិយាយថា វាដល់ពេលដែលគណបក្សភឿថៃត្រូវស្រាយខ្សែចំណងនំអន្សមហើយ ដើម្បីពិភាក្សាគ្នាពីកិច្ចព្រមព្រៀង MOU ។ ពួកគេបានយកនំអន្សមមកស្រាយខ្សែចេញ ហើយបំបែកនំអន្សមឱ្យដាច់ពីគ្នា បន្ទាប់មក បកស្លឹកចេកចេញ និងបរិភោគនំបង្ហាញក្រុមអ្នកសារព័ត៌មានថា ប្រទេសថៃត្រូវតែស្រាយខ្សែនំចេញ និងបរិភោគវាដើម្បីក្រពះ ។

ក្រោយមក លោក Anusorn Iamsa-ard សមាជិកសភាមកពីគណបក្សភឿថៃ បានចុះមកទទួលលិខិត និងស្តាប់សេចក្តីថ្លែងការណ៍បញ្ជាក់ថា បច្ចុប្បន្ននេះ គណបក្សនយោបាយចំនួន៨ ស្ថិតក្រោមការចរចាគ្នានៅឡើយ ហើយក្រុមអាវក្រហមក៏បង្ហាញក្តីបារម្ភរបស់ខ្លួនទៅកាន់គណបក្សភឿថៃផងដែរ ទាក់ទងនឹងជីវភាពរស់នៅរបស់ពលរដ្ឋ ៕ ប្រភព ៖ ch3plus

ប្រទេសវៀតណាម ៖ ក្រុមហ៊ុនផលិតរថយន្តរបស់វៀតណាមឈ្មោះ VinFast លើកឡើងថា នៅខែកក្កដា ឆ្នាំ២០២៣ ក្រុមហ៊ុននឹងចាប់ផ្តើមសាងសង់រោងចក្រផលិតរថយន្តអគ្គិសនីនៅរដ្ឋ North Carolina របស់អាមេរិក ស្មើនឹងទឹកប្រាក់ប្រមាណ៤ពាន់លានដុល្លារអាមេរិក ។ វាជាផ្នែកមួយជំរុញការលក់រថយន្តអគ្គិសនីក្នុងប្រទេសរីកចម្រើនមួយនេះ ។

ក្រុមហ៊ុន VinFast បានប្រកាសពីគម្រោងសាងសង់រោងចក្រនៅអាមេរិក តាំងពីឆ្នាំ២០២២ មកម៉្លេះ ។ ក្រុមហ៊ុនបានដាក់គោលដៅថា នឹងដំណើរការផលិតរថយន្តនៅឆ្នាំ២០២៥ ។ ហេតុនេះ ការសាងសង់រោងចក្រនៅអាមេរិកនៅឆ្នាំ២០២៣ គឺយឺតជាង១ឆ្នាំ ខណៈក្រុមហ៊ុននេះបានប្រកាសតាំងពីឆ្នាំ២០២២ ។

Thuy Le ជានាយកគ្រប់គ្រងជាន់ខ្ពស់របស់ក្រុមហ៊ុន VinFast Auto លើកឡើងថា នៅពេលចាប់ផ្តើមដំណើរការផលិតរថយន្ត រោងចក្រនេះនឹងក្លាយជាកន្លែងផ្គត់ផ្គង់ដ៏សំខាន់សម្រាប់រថយន្តអគ្គិសនីនៅទីផ្សារអាមេរិកខាងជើង ។ ដំណាក់កាលដំបូងនៃគម្រោងនេះ គឺក្រុមហ៊ុននឹងវិនិយោគក្នុងទឹកប្រាក់២ពាន់លានដុល្លារអាមេរិក ហើយរោងចក្រនឹងអាចផលិតរថយន្តបានចំនួន១៥ម៉ឺនគ្រឿងក្នុង១ឆ្នាំ ។

ក្រុមហ៊ុន VinFast ស្ថិតក្នុងចំណោមក្រុមហ៊ុនដែលទើបចាប់ផ្តើមផលិតរថយន្តអគ្គិសនី ហើយក្រុមហ៊ុននេះត្រូវព្យាយាមដើម្បីទទួលបានអតិថិជន ។ ចំណែកក្រុមហ៊ុននាំមុខគេក្នុងទីផ្សារដូចជា Tesla និង BYD របស់ប្រទេសចិន ក៏បានចូលមកប្រកួតប្រជែងតម្លៃលើទីផ្សារផងដែរ ពីព្រោះតម្រូវការទិញធ្លាក់ចុះក្នុងទីផ្សារធំៗ ។

កាលពីខែឧសភា ឆ្នាំ២០២៣ ក្រុមហ៊ុន VinFast បានប្រកាសថា នឹងសុំចុះបញ្ជីក្នុងទីផ្សារភាគហ៊ុនអាមេរិក តាមរយៈការសហការជាមួយក្រុមហ៊ុន Black Spade Acquisition ក្រោយពីទទួលបានការគាំទ្រថវិកាចំនួន២,៥ពាន់លានដុល្លារអាមេរិកពីស្ថាបនិក និងក្រុមហ៊ុនមេឈ្មោះ Vingroup ដើម្បីជំរុញការលក់នៅទីផ្សារក្រៅប្រទេស ។ ក្រុមហ៊ុនរំពឹងថា នឹងអាចលក់រថយន្តអគ្គិសនីបានចំនួន៥ម៉ឺនគ្រឿងនៅឆ្នាំ២០២៣ ដែលកើនឡើងជិត៧ដង បើធៀបនឹងឆ្នាំ២០២២ ហើយក្រុមហ៊ុននឹងទទួលបានប្រាក់ចំណេញនៅចុងឆ្នាំ២០២៤ ៕ ប្រភព ៖ AEC connect

ម៉ិកស៊ិក៖ យោងតាមប្រភព The Guardian ដែលបានរាយការណ៍កាលពីថ្ងៃទី ២៤ ខែកក្កដាថា ថ្មីៗនេះរដ្ឋាភិបាលម៉ិកស៊ិកនឹងចាប់ផ្តើមគម្រោងភ្លៀងសិប្បនិម្មិតមួយក្នុងក្តីសង្ឃឹមនៃការធ្វើឱ្យប្រសើរឡើងនូវទឹកភ្លៀងចំពេលមានរលកកំដៅជាប្រវត្តិសាស្ត្រ និងគ្រោះរាំងស្ងួតជាច្រើនខែ។ គម្រោងដែលបានចាប់ផ្តើមដំបូងនៅខែកក្កដានេះ តម្រូវឱ្យយន្តហោះហោះចូលទៅក្នុងពពក ដើម្បីបញ្ចេញភាគល្អិតអ៊ីយ៉ូតប្រាក់ ដែលជួយបង្កើតដំណក់ទឹកកាន់តែច្រើន និងបង្កើនទឹកភ្លៀង។

គោលបំណងដ៏ធំនៃការបង្កើតភ្លៀងសិប្បនិម្មិតនេះ គឺដើម្បីទប់ទល់នឹងផលប៉ះពាល់នៃគ្រោះរាំងស្ងួតនៅតំបន់ជនបទ និងរួមចំណែកដល់ការបំពេញអាងទឹក។ ទោះជាយ៉ាងណាក៏ដោយ អ្នករូបវិទ្យាពពកកំពូលរបស់ប្រទេសម៉ិកស៊ិកបានសម្តែងការព្រួយបារម្ភអំពីលទ្ធភាពនៃបច្ចេកវិទ្យានេះ។ លោក Fernando García García និង Guillermo Montero Martínez អ្នករូបវិទ្យាពពកពីររូបនៅសកលវិទ្យាល័យជាតិស្វយ័តម៉ិកស៊ិក (Unam) បាននិយាយថា “មិនមានភស្តុតាងបច្ចេកទេសណាមួយដែលបង្ហាញថាទឹកភ្លៀងសិប្បនិម្មិតបង្កើនទឹកភ្លៀងនៅក្នុងតំបន់សេដ្ឋកិច្ចសំខាន់ៗនោះទេ ហើយវាមិនអាចទៅរួចទេក្នុងការដឹងច្បាស់អំពីផលប៉ះពាល់នៅខាងក្រៅតំបន់គោលដៅ”។

ទោះបីជារដ្ឋាភិបាលម៉ិកស៊ិកបានអះអាងថាសកម្មភាពទឹកភ្លៀងដែលបង្កើតឡើងដោយមនុស្សនឹងបង្កើនទឹកភ្លៀង ៤០% បើប្រៀបធៀបទៅនឹងការព្យាករណ៍ ប៉ុន្តែអ្នកវិទ្យាសាស្ត្រនិយាយថាការព្យាករណ៍ទឹកភ្លៀងមានភាពប្រែប្រួលខ្លាំង ហើយភស្តុតាងមិនឆ្លុះបញ្ចាំងពីទឹកភ្លៀងសិប្បនិម្មិតដែលទាក់ទងនឹងការកើនឡើងទឹកភ្លៀងនោះទេ។ ដូចនេះ យើងមិនទាន់ដឹងទេថា គម្រោងបង្កើតភ្លៀងសិប្បនិម្មិតរបស់ប្រទេសម៉ិចស៊ិចជោគជ័យ ឬអត់នោះទេ។

បច្ចុប្បន្ន កសិករនៅភាគខាងជើងប្រទេសម៉ិកស៊ិកកំពុងជួបប្រទះនឹងគ្រោះរាំងស្ងួតយ៉ាងធ្ងន់ធ្ងរ។ កំដៅបានសម្លាប់សត្វពាហនៈ ធ្វើឱ្យតម្លៃសាច់ជ្រូក និងសាច់គោឡើងថ្លៃនៅក្នុងតំបន់ជាច្រើននៃប្រទេស។ ចំនួនសត្វរុយក្នុងព្រៃសើមក៏ងាប់ដែរ ដែលធ្វើឱ្យប៉ះពាល់ដល់វិស័យទេសចរណ៍។ នៅឯព្រំដែនរវាងសហរដ្ឋអាមេរិក និងម៉ិកស៊ិកក្នុងទីក្រុង Mexicali សីតុណ្ហភាពគឺ ៥០.២ អង្សាសេ ដែលបង្កើតកំណត់ត្រាជាតិ នឹងមានជនជាតិម៉ិកស៊ិកចំនួន ១៦៧ នាក់បានស្លាប់ដោយសារកំដៅផងដែរ៕ ប្រភព៖vnexpress

ក្រុមហ៊ុន Adidas បានបង្ខំចិត្តលក់ស្បែកជើងម៉ាក Yeezy បន្តទៀត ដោយសារក្រុមហ៊ុនទទួលបានការបញ្ជាទិញស្បែកជើងប្រភេទនេះច្រើនពីអតិថិជន គឺស្មើនឹងទឹកប្រាក់ប្រមាណ៥០៨លានអឺរ៉ូ ហើយការបញ្ជាទិញនេះខ្ពស់ជាងក្រុមហ៊ុនរំពឹងទុកទៅទៀត ។ តម្រូវការខ្ពស់បានធ្វើឱ្យក្រុមហ៊ុន Adidas មានចំនួនលក់ស្បែកជើងកើនឡើង និងគ្មានសល់ស្បែកជើងរាប់លានគូនៅក្នុងស្តុកទេ ។

Yeezy គឺជាម៉ាកស្បែកជើងដែលក្រុមហ៊ុន Adidas បានសហការជាមួយលោក Kanye West ជាតារាចម្រៀងរ៉េប និងអ្នករចនាម៉ូដដ៏ល្បីល្បាញម្នាក់ ប៉ុន្តែក្រោយពីកើតបញ្ហាផ្ទៃក្នុងមក ដោយសារលោក Kanye West បានរិះគន់ និងនិយាយមិនល្អពីក្រុមហ៊ុន Adidas ជាច្រើនលើក ។ ហេតុនេះ ក្រុមហ៊ុន Adidas បានប្រកាសផ្តាច់ទំនាក់ទំនងជាមួយអ្នកចម្រៀងរូបនេះ ដោយសារវាអាចធ្វើឱ្យប៉ះពាល់ដល់មុខមាត់ក្រុមហ៊ុន ។

ចាប់តាំងពីមានជម្លោះជាមួយគ្នាកាលពីចុងឆ្នាំ២០២២ មក ក្រុមហ៊ុន Adidas ក៏ប្រកាសឈប់លក់ស្បែកជើងម៉ាក Yeezy ហើយធ្វើឱ្យស្បែកជើងនេះជាប់នៅក្នុងស្តុករាប់លានគូ ។ លើសពីនេះ វាបានធ្វើឱ្យក្រុមហ៊ុនទទួលបានប្រាក់ចំណេញធ្លាក់ចុះយ៉ាងខ្លាំង ព្រោះស្បែកជើង Yeezy ជាផលិតផលដែលរកប្រាក់ចំណូលចូលក្រុមហ៊ុនបានច្រើនគួរសមដែរ ។

ទោះយ៉ាងណា តម្រូវការទិញស្បែកជើង Yeezy មិនបានធ្លាក់ចុះទេ ហើយវានៅតែជាស្បែកជើងដែលមនុស្សនៅទូទាំងពិភពលោកស្វែងរកទិញ ។ ហេតុនេះ ក្រុមហ៊ុន Adidas ត្រូវលេបទឹកមាត់ខ្លួនឯង ហើយបញ្ចេញស្បែកជើង Yeezy លក់ឡើងវិញ នៅខែឧសភា ឆ្នាំ២០២៣ កន្លងមក ។ ជាលទ្ធផលបង្ហាញថា ស្បែកជើងនេះមានតម្រូវការច្រើនពីអតិថិជន ហើយវាបានជួយក្រុមហ៊ុន Adidas កុំឱ្យខាតបង់ច្រើនជាងនេះ ។ ជំហានបន្ទាប់ គឺត្រូវកាត់បន្ថយភាគហ៊ុននៅសល់របស់ Yeezy បន្តិចម្តងៗ ហើយនៅថ្ងៃអនាគត Adidas នឹងលក់ភាគហ៊ុន Yeezy នៅសល់ផងដែរ ។

ក្នុងអំឡុងពេលគេយកស្បែកជើង Yeezy មកលក់ឡើងវិញនៅខែឧសភា ក្រុមហ៊ុន Adidas ប្រាប់ថា នឹងបរិច្ចាគប្រាក់ចំណូលមួយចំនួនដែលបានពីការលក់ស្បែកជើងជួយដល់អង្គការការពារក្រុមប្រឆាំងនឹងពួកយូដា និងការរើសអើងជាតិសាសន៍ ដើម្បីកែកំហុសដែលអ្នកចម្រៀងឈ្មោះ Kanye West ធ្លាប់បង្ហាញអាកប្បកិរិយារបស់ខ្លួន និងជាមូលហេតុធ្វើឱ្យ Adidas ឈប់សហការជាមួយគាត់ ៕ ប្រភព ៖ beartai BRIEF

ប្រទេសចិន៖ សហរដ្ឋអាមេរិកនាំមុខចិនក្នុងទិដ្ឋភាពអវកាសជាច្រើន ខណៈដែលចិនក៏បាននាំមុខសហរដ្ឋអាមេរិក ក្នុងការបាញ់បង្ហោះផ្កាយរណបលឿនបំផុតរបស់ពិភពលោកផងដែរ។

យោងតាមប្រភពព័ត៌មាន SCMP ដែលបានរាយការណ៍កាលពីថ្ងៃទី ២៤ ខែកក្កដា ថា ប្រទេសចិនអាចនឹងវ៉ាដាច់សហរដ្ឋអាមេរិក ក្នុងសមត្ថភាពនៃការបាញ់បង្ហោះ និងជំនួសផ្កាយរណបបានយ៉ាងឆាប់រហ័ស ក្នុងករណីមានជម្លោះ ឬឧបទ្ទវហេតុណាមួយកើតឡើង។ តាមរយៈការអភិវឌ្ឍរ៉ុក្កែតតូច ចល័ត និងឥន្ធនៈរឹង ដែលអាចបាញ់ចេញពីទូរស័ព្ទចល័ត ជំនួសឱ្យឧបករណ៍បាញ់បង្ហោះថេរ ប្រទេសចិនក៏បានបង្កើនសមត្ថភាពបាញ់បង្ហោះអវកាសលឿនជាយុទ្ធសាស្ត្រ (TRSL) របស់អាមេរិកក្នុងទសវត្សរ៍កន្លងមក។លោក Sam Bresnick សហអ្នកនិពន្ធនៃការសិក្សានៅ CSET បាននិយាយថា “ប្រទេសទាំងពីរបានសាងសង់គ្រឿងបរិក្ខារទំហំអវកាសជាមួយនឹងកម្មវិធីសេដ្ឋកិច្ច វិទ្យាសាស្ត្រ និងយោធាដ៏ធំទូលាយ។ ការជំនួសផ្កាយរណបដែលបានបំផ្លាញ ឬខូចខាតយ៉ាងឆាប់រហ័ស គឺជាកត្តាសំខាន់ក្នុងភាពធន់នឹងលំហ។
ទោះជាយ៉ាងណាក៏ដោយ បច្ចុប្បន្នសហរដ្ឋអាមេរិកនៅតែនាំមុខចិនក្នុងទិដ្ឋភាពអវកាស ការស្រាវជ្រាវលំហ ការសិក្សានៅគន្លងនៃភពក្រៅ និងជាច្រើនទៀត លើកលែងតែការបាញ់បង្ហោះផ្កាយរណបលឿនតែប៉ុណ្ណោះ៕ ប្រភព៖vnexpress

រាជធានីបាងកក៖ ក្រោយពេលមានបណ្ដឹងតវ៉ា ជុំវិញការជំទាស់នឹងការតែងតាំងជាថ្មីរបស់មេដឹកនាំគណបក្សប្រឆាំងឈ្នះឆ្នោត ក្រោយការខកខានមិនទទួលបានសំឡេងគាំទ្រភាគច្រើន ពីសមាជិកសភាទាំង២រួចមក ឥឡូវនេះ សភាថៃ បានសម្រេចពន្យារពេលបោះឆ្នោត ដោយគ្មានការកំណត់ ហើយរង់ចាំរហូតដល់មានការសម្រេច ពីតុលាការធម្មនុញ្ញ។

សារព័ត៌មានរបស់ថៃ Bangkok Post បានចេញផ្សាយ នៅថ្ងៃពុធ ទី២៦ ខែកក្កដា ថា លោកប្រធានសភា វ៉ាន់ មូហាម៉ាត់ ណ័រ ម៉ាថា (Wan Muhamad Noor Matha) បានសម្រេចពន្យារពេល ដោយគ្មានការកំណត់ ចំពោះគម្រោងបោះឆ្នោតជ្រើសរើសនាយករដ្ឋមន្រ្ដី នៅថ្ងៃព្រហស្បតិ៍ ទី២៧ ខែកក្កដា ដោយរង់ចាំ រហូតដល់តុលាការធម្មនុញ្ញ សម្រេច លើករណីបដិសេធតែងតាំងជាថ្មីរបស់សភា សម្រាប់ប្រធានគណបក្សឆ្ពោះទៅមុខ (Move Forward Party) ហៅកាត់ MFP លោក ភីថា លីមចារឿនរ៉ាត (Pita Limjaroenrat) ឈរឈ្មោះជានាយករដ្ឋមន្រ្ដីទី៣០របស់ប្រទេសថៃ។

លោក វ៉ាន់ មូហាម៉ាត់ ណ័រ ម៉ាថា បានបញ្ជាក់ កាលពីថ្ងៃអង្គារ ថា គាត់បានសម្រេចចិត្តពន្យារការប្រជុំរួមរបស់សភាទាំង២ ដោយគ្មានការកំណត់ រហូតដល់មានការសម្រេចចិត្តរបស់តុលាការ។ សកម្មភាពបែបនេះ បានកើតឡើង ក្រោយពេលគាត់មានការពិគ្រោះយោបល់ជាមួយនឹងក្រុមមន្រ្ដីច្បាប់របស់រដ្ឋសភា និង ក្រុមទីប្រឹក្សារបស់គាត់។លោក វ៉ាន់ មូហាម៉ាត់ ណ័រ ម៉ាថា ប្រធានសភា និង អតីតប្រធានសភា បានបញ្ជាក់ ថា ពួកគេមានទស្សនៈយល់ឃើញ ថា ប្រសិនបើការបោះឆ្នោតនាយករដ្ឋមន្ត្រី នឹងនៅតែបន្តធ្វើ តាមការគ្រោងទុក នៅថ្ងៃព្រហស្បតិ៍ (ទី២៧ ខែកក្កដា) ខាងមុខនោះ វាអាចនឹងនាំឱ្យមានបញ្ហា ក្រោយពេលតុលាការធម្មនុញ្ញ ធ្វើសេចក្តីសម្រេចរបស់ខ្លួន នាពេលក្រោយ។ ដូច្នេះការពន្យារពេលកិច្ចប្រជុំ នៅថ្ងៃព្រហស្បតិ៍ នឹងធ្វើឲ្យកិច្ចប្រជុំជាច្រើន ដែលមានគ្រោងនឹងធ្វើ នៅថ្ងៃពុធ ជាមួយនឹងសម្ពន្ធភាពចម្រុះ គណបក្សនយោបាយផ្សេងៗទៀត និង សមាជិកព្រឹទ្ធសភា នាពេលឥឡូវនេះ វាមិនមែនជាការចាំបាច់នោះដែរ។

លោកប្រធានសភា វ៉ាន់ មូហាម៉ាត់ ណ័រ ម៉ាថា បានសង្កត់ធ្ងន់ ថា ហេតុផលមួយផ្សេងៗទៀត សម្រាប់ការពន្យារពេលកិច្ចប្រជុំរួមគ្នារបស់សភាទាំង២នេះ ក៏ដោយសារតែសមាជិកសភាជាន់ទាបជាប់ឆ្នោត និង សមាជិកព្រឹទ្ធសភាជាច្រើនរូប មានការព្រួយបារម្ភ ថា ពួកគេនឹងមិនអាចទៅចូលរួមអបអរសារទរព្រះរាជពិធីបុណ្យចម្រើនព្រះជន្មរបស់ព្រះមហាក្សត្រ នៅក្នុងខេត្តរៀងៗខ្លួនរបស់ពួកគេ នៅថ្ងៃសុក្រ ខាងមុខនេះ ប្រសិនបើការអង្គុយប្រជុំយូរ នៅក្នុងរដ្ឋសភា។ ប៉ុន្ដែក្រោយការសម្រេចរបស់តុលាការធម្មនុញ្ញ សមាជិកសភាទាំង២របស់ប្រទេសថៃនឹងវិលត្រឡប់ មកអង្គុយប្រជុំរួមគ្នា ដើម្បីបោះឆ្នោតជ្រើសរើសនាយករដ្ឋមន្រ្ដីម្ដងទៀត។

ប្រធានសភាថៃ បានកំណត់យកថ្ងៃព្រហស្បតិ៍ ទី២៧ ខែកក្កដា សម្រាប់តំណាងរាស្រ្ដជាប់ឆ្នោត និង សមាជិកព្រឹទ្ធសភា វិលត្រឡប់មកប្រជុំរួមគ្នា បោះឆ្នោតជ្រើសរើសនាយករដ្ឋមន្ត្រីជាថ្មី ក្រោយការខកខានបោះឆ្នោតជ្រើសរើសនាយករដ្ឋមន្រ្ដី កាលពីថ្ងៃទី១៩ ខែកក្កដា រួចមក។ បើតាមគម្រោងការនោះ គឺបេក្ខជន អាចនឹងមកពីគណបក្សភឿថៃ ដែលជាគណបក្សធំលំដាប់ទី២ នៅក្នុងចំណោមសម្ពន្ធភាពចម្រុះទាំង៨គណបក្ស ដឹកនាំដោយគណបក្សឆ្ពោះទៅមុខ (MFP) របស់លោក ភីថា លីមចារឿនរ៉ាត។

លោក ភីថា និង គណបក្សឆ្ពោះទៅមុខរបស់គាត់ បានបើកផ្លូវដល់គណបក្សភឿថៃ ដើម្បីតែងតាំងបេក្ខជនរបស់ខ្លួន សម្រាប់តំណែងនាយករដ្ឋមន្ត្រី និង ការបង្កើតរដ្ឋាភិបាល ក្រោយពេលគាត់មិនអាចស្វែងរកសំឡេងគ្រប់គ្រាន់ ចំនួន៣៧៥សំឡេង ដើម្បីក្លាយជានាយករដ្ឋមន្រ្ដីថៃ។ គណបក្សភឿថៃ ក៏ប្រឈមមុខនឹងបញ្ហាជាច្រើន ដោយសារតែបណ្ដាគណបក្សនយោបាយរបស់ពួកយោធានិយម នៅខាងក្រៅប្លុកចម្រុះទាំង៨គណបក្សនេះ បានប្រឆាំងនឹងគោលនយោបាយរបស់គណបក្សឆ្ពោះទៅមុខ (MFP) ដែលគ្រោងនឹងធ្វើវិសោធនកម្ម លើមាត្រា១១២ នៃក្រមព្រហ្មទណ្ឌ ពាក់ព័ន្ធនឹងការប្រមាថដល់ព្រះមហាក្សត្រ។

ស្របគ្នានេះដែរ គណបក្សចំនួន៨ នៅក្នុងសម្ពន្ធភាពចម្រុះ ដឹកនាំដោយគណបក្សឆ្ពោះទៅមុខ គ្រោងនឹងជួបប្រជុំគ្នា នៅរសៀល ថ្ងៃអង្គារ ដើម្បីស្តាប់របាយការណ៍វឌ្ឍនភាព មកពីគណបក្សភឿថៃ។ ប៉ុន្តែកិច្ចប្រជុំនោះ បានលុបចោលទៅវិញ នៅនាទីចុងក្រោយ ក្រោយពេលគណបក្សភឿថៃ បានទទួលស្គាល់ ថា វាមានដំណើរការតិចតួច នៅក្នុងសេចក្ដីរាយការណ៍នោះ រហូតមកដល់ពេលនេះ ។

គណបក្សឆ្ពោះទៅមុខ បានទទួច ថា គណបក្ស MFP នឹងនៅតែបន្តកិច្ចខិតខំប្រឹងប្រែងរបស់ខ្លួន សម្រាប់ជំរុញដល់លោក ភីថា ត្រូវតែងតាំងជានាយករដ្ឋមន្ត្រី ថ្វីបើគាត់មិនបានឈ្នះសំឡេងភាគច្រើន ពីសមាជិកសភាទាំងពីរ នៅក្នុងការបោះឆ្នោតជ្រើសរើសនាយករដ្ឋមន្ត្រីថ្មី កាលពីនៅថ្ងៃទី១៣ ខែកក្កដា ឆ្នាំ២០២៣យ៉ាងណាក្ដី។

លោក ភីថា ត្រូវបានតែងតាំងជាថ្មី សម្រាប់តំណែងកំពូលមួយនេះ ដើម្បីឲ្យសមាជិកសភាទាំង២ បោះឆ្នោត នៅថ្ងៃទី១៩ ខែកក្កដា ម្ដងទៀត ប៉ុន្តែសភាបានបដិសេធនូវការតែងតាំងនោះ ដោយផ្អែកលើមូលដ្ឋាននីតិវិធី។ ក្រុមអ្នកប្រឆាំងបានអះអាង ថា ការតែងតែងជាថ្មីបែបនេះសម្រាប់លោក ភីថា បំពារបំពាននឹងបទប្បញ្ញត្តិរបស់សភា លើមាត្រា៤១ ដោយបានហាមមិនឲ្យមានការដាក់សំណើដែលបានទទួលបរាជ័យ នៅក្នុងសម័យប្រជុំសភាដដែល។

ដោយឡែក ក្រុមអ្នកគាំទ្ររបស់លោក ភីថា លីមចារឿនរ៉ាត និង ក្រុមអ្នកសិក្សាស្រាវជ្រាវជាច្រើន បានប្រឆាំងនឹងដំណោះស្រាយរបស់សភា។ ជាមួយគ្នានេះដែរ ពួកគេបានស្នើសុំទៅកាន់តុលាការធម្មនុញ្ញ ដើម្បីសម្រេចអំពីភាពស្របច្បាប់ នៅក្នុងការតែងតាំងជាថ្មីជូនលោក ភីថា សម្រាប់តំណែងនាយករដ្ឋមន្ត្រី៕