ប្រទេសចិន ៖ បច្ចុប្បន្ននេះ យុវវ័យចិនបាននាំគ្នាលេងគ្រាប់ស្វាយជំនួសសត្វចិញ្ចឹម ហើយពួកគេបានចែករំលែកការកែច្នៃគ្រាប់ស្វាយធ្វើជារបស់លេងនៅលើបណ្តាញសង្គមទៀតផង ។ មុននឹងបានគ្រាប់ស្វាយលេង ពួកគេត្រូវយកវាទៅលាងទឹកឱ្យស្អាតរហូតដល់អស់សាច់ស្វាយ បន្ទាប់មក យកគ្រាប់ស្វាយទៅហាលថ្ងៃឱ្យស្ងួត ហើយយកក្រាស់មកសិតសរសៃស្វាយចុះឡើងៗ រហូតមើលទៅដូចរោមសត្វ និងមានសភាពទន់គួរឱ្យស្រឡាញ់ ។

យុវវ័យចិនបានបន្តសិតសរសៃគ្រាប់ស្វាយ និងរង់ចាំមើលការលូតលាស់របស់វា គឺពួកគេធ្វើបែបនេះដូចគ្នានឹងការចិញ្ចឹមសត្វ១ក្បាលដែរ ។ អ្នកលេងគ្រាប់ស្វាយទាំងនេះបានថតរូប និងបង្ហោះនៅក្នុងបណ្តាញសង្គម ដើម្បីអួតគ្រាប់ស្វាយគ្នាទៅវិញទៅមក រហូតក្លាយជាទម្លាប់ ។

មនុស្សជាច្រើននាក់បានស្វែងរកវិធីខុសៗគ្នាដើម្បីធ្វើឱ្យគ្រាប់ស្វាយរបស់ខ្លួនមានរោមទន់ស្អាត ខណៈអ្នកខ្លះទៀតបានយកថ្នាំពណ៌មកលាប និងតុបតែងគ្រាប់ស្វាយទៀតផង ។ ការលេងគ្រាប់ស្វាយ និងធ្វើឱ្យវាមានរោមស្អាត មិនមែនជារឿងងាយស្រួលទេ ព្រោះត្រូវផ្លុំគ្រាប់ស្វាយឱ្យស្ងួតល្អ សិតរោមវាជាប្រចាំ យកទៅហាលថ្ងៃ និងប្រមូលទុកនៅកន្លែងមានពន្លឺថ្ងៃ ដើម្បីការពារការដុះផ្សិត ។

យុវវ័យចិនជាច្រើននាក់និយាយថា ការលេងគ្រាប់ស្វាយជួយឱ្យពួកគេអាចកាត់បន្ថយភាពតានតឹង ហើយមានក្តីសុខផងដែរ ។ លើសពីនេះ ការលេងគ្រាប់ស្វាយ គឺដូចគ្នានឹងការលេងឆ្មា ឬឆ្កែក្រដាស ដែលពួកគេនិយមលេងក្នុងអំឡុងពេលជំងឺកូវីដ-១៩ ឆ្លងរាតត្បាតនៅប្រទេសចិន ។ ពេលនោះ ពួកគេបានយកក្រដាសមកតម្រៀបគ្នាធ្វើជារូបរាងសត្វផ្សេងៗជំនួសសត្វចិញ្ចឹមពិតប្រាកដដើម្បីកុំឱ្យពួកគេឯកោ និងព្យាបាលផ្លូវចិត្ត ។

ទោះយ៉ាងណា យុវវ័យមួយចំនួនគិតថា ការលេងបែបនេះធ្វើឱ្យខាតពេលវេលា ហើយអ្នកលេងសុទ្ធតែអ្នកគ្មានការងារធ្វើ អត់ដឹងធ្វើអី្វ ក៏នាំគ្នាធ្វើរឿងគ្មានប្រយោជន៍បែបនេះ ។ ចំណែកអ្នកលេងបណ្តាញសង្គមខ្លះយល់ថា វាជារឿងគួរឱ្យចាប់អារម្មណ៍ និងចង់ធ្វើតាម ដោយសារមិនចាំបាច់ចំណាយប្រាក់ច្រើនដូចការចិញ្ចឹមឆ្មា ឬឆ្កែ និងអាចកាត់បន្ថយចំនួនសត្វអនាថា ។ ដូចគ្នានេះ មនុស្សមួយចំនួនទៀតថា មានរបស់ថ្មីលេងបែបនេះ ធ្វើឱ្យពួកគេមិនចំណាយពេលចុចទូរស័ព្ទតែម្យ៉ាង ៕ ប្រភព ៖ MGRonline Live

រដ្ឋធានីណៃពិដោ៖ ក្រោយការធ្វើរដ្ឋប្រហារយោធា កាលពីថ្ងៃទី១ ខែកុម្ភៈ ឆ្នាំ២០២១ រួចមក ពួកយោធា បានចាប់ខ្លួនលោកស្រី អ៊ោង សានស៊ូជី (Aung San Suu Kyi) និង អ្នកនយោបាយសំខាន់ៗរបស់លោកស្រី ដាក់ពន្ធនាគារ អស់រយៈពេលជាង២ឆ្នាំ ប៉ុន្ដែឥឡូវបែរជារដ្ឋាភិបាលសឹក បានបន្ធូរបន្ថយទោសទណ្ឌ ចំនួន៥បទល្មើស នៅក្នុងសំណុំរឿងចោទប្រកាន់ ចំនួន១៩ករណី ប្រឆាំងនឹងលោកស្រី ទើបអតីតទីប្រឹក្សាសេដ្ឋកិច្ចរបស់លោកស្រី បានអះអាង ថា សកម្មភាពបែបនេះ ជាកាយវិការគ្មានន័យ ព្រោះមេដឹកនាំរូបនេះ មិនសមនឹងត្រូវជាប់ទោសទណ្ឌនោះឡើយ។

សារព័ត៌មានរបស់សិង្ហបុរី Channel News Asia បានចេញផ្សាយ កាលពីព្រឹក ថ្ងៃព្រហស្បតិ៍ ទី៣ ខែសីហា ថា លោក ស៊ាន ធូណែល (Sean Turnell) អតីតទីប្រឹក្សាសេដ្ឋកិច្ចរបស់លោកស្រី អ៊ោង សានស៊ូជី ទីប្រឹក្សារដ្ឋ ដែលត្រូវបានបណ្ដេញចេញពីតំណែង បានអះអាង ថា ក្រុមមេដឹកនាំរដ្ឋាភិបាលជាប់ឆ្នោត តាមបែបលទ្ធប្រជាធិបតេយ្យ មិនគួរនឹងត្រូវជាប់គុកទាល់តែសោះ។ ដោយឡែក ការបន្ធូរបន្ថយទោសនេះ ពីរដ្ឋាភិបាលសឹកមីយ៉ាន់ម៉ា ជាកាយវិការដ៏គ្មានន័យ។

រដ្ឋាភិបាលសឹកមីយ៉ាន់ម៉ា កាលពីថ្ងៃអង្គារ (ទី១ ខែសីហា) បានប្រកាស ថា រដ្ឋាភិបាល បានបន្ធូរបន្ថយទោស ដល់មន្រ្ដីសំខាន់ៗមួយចំនួនរបស់រដ្ឋាភិបាលជាប់ឆ្នោត តាមបែបលទ្ធិប្រជាធិបតេយ្យ ដែលត្រូវបានពួកយោធា ផ្ដួលរំលំ កាលពីថ្ងៃទី១ ខែកុម្ភៈ ឆ្នាំ២០២១។

លោកស្រី អ៊ោង សានស៊ូជី (Aung San Suu Kyi) ទីប្រឹក្សារដ្ឋ នៃរដ្ឋាភិបាល ដែលបានឈ្នះឆ្នោតភ្លូកទឹកភ្លូកដី នៅក្នុងខែវិច្ឆិកា ឆ្នាំ២០២០ ហើយត្រូវបានពួកយោធា បណ្ដេញចេញពីអំណាច និង ចាប់ដាក់គុក។ ប៉ុន្ដែឥឡូវ រដ្ឋាភិបាលសឹក បានបន្ធូរបន្ថយកម្រិតទោសជាប់គុក រយៈពេល៦ឆ្នាំ ពីក្នុងចំណោមទោសទណ្ឌកម្មរបស់គាត់ រយៈពេល៣៣ឆ្នាំ។ រីឯលោក វីន មីយិនត៍ (Win Myint) ប្រធានាធិបតី ដែលត្រូវបានបណ្ដេញពីអំណាច ក៏ត្រូវបានពួកយោធា បន្ថយទោសជាប់ពន្ធនាគារ រយៈពេល៤ឆ្នាំផងដែរ។ ការបន្ធូរបន្ថយកម្រិតជាប់ទោសរបស់អ្នកទោសនយោបាយផ្សេងៗទៀត ទំនងជាស្ថិតក្នុងការកាត់ទោស។

ការកាត់បន្ថយកម្រិតទោស ដល់អ្នកទោសនយោបាយ នៅក្នុងប្រទេសមីយ៉ាន់ម៉ា បានកើតឡើង ត្រឹមតែមួយថ្ងៃ ក្រោយពេលរដ្ឋាភិបាលយោធាមីយ៉ាន់ម៉ា បានពង្រីកស្ថានភាពគ្រាអាសន្នរបស់ខ្លួន ខណៈរដ្ឋាភិបាលសឹកមួយនេះ បានអះអាង ថា រដ្ឋាភិបាល នឹងគ្រប់គ្រង រយៈពេល៦ខែបន្ដទៀត។ សកម្មភាពបែបនេះ ជាការបន្ថែមស្ថានភាពគ្រាអាសន្ន ជាលើកទី៤ ដោយបំពារបំពាន ទៅលើរដ្ឋធម្មនុញ្ញរបស់មីយ៉ាន់ម៉ា ដោយកំណត់អំពីការបន្ថែមស្ថានការណ៍បែបនេះ ត្រឹមតែ២ដងប៉ុណ្ណោះ។

ការគ្រប់គ្រងរបស់ពួកយោធា អស់រយៈពេល២ឆ្នាំកន្លះកន្លងមកនេះ បានធ្វើឲ្យប្រទេសមីយ៉ាន់ម៉ា ឈានទៅរកការបំផ្លិចបំផ្លាញមិនធ្លាប់មាន, ការសម្លាប់រាប់ពាន់នាក់ និង ការផ្លាស់ទីលំនៅរបស់ប្រជាជន ប្រហែល៣លាននាក់។ ស្របគ្នានេះ ប្រទេសជិតខាងរបស់ប្រទេសអាស៊ានមួយនេះ បានទទួលជនភៀសខ្លួនជាថ្មី មកពីប្រទេសមីយ៉ាន់ម៉ា ខណៈសេដ្ឋកិច្ចរបស់ប្រទេសភូមា កំពុងតែស្ថិតក្នុងស្ថានភាពដួលរលំ ហើយប្រជាជន ភាគច្រើន ជាពិសេស នៅតំបន់ជនបទ បានកាត់បន្ថយនូវកម្រិតរបបអាហារ ដោយសារតែពួកគេ កំពុងតែប្រឈមនឹងគ្រោះអត់ឃ្លាន។

បញ្ហាជាច្រើនរបស់ប្រទេសមីយ៉ាន់ម៉ា នឹងមិនត្រូវបានដោះស្រាយ តាមរយៈការបន្ធូរបន្ថយទោស ដល់អ្នកទោសនយោបាយ ដែលមិនគួរនឹងត្រូវកាត់ទោស តាំងពីដំណាក់កាលដំបូងមកម៉្លេះ។ ការផ្លាស់ប្តូរពិតប្រាកដ អាចនឹងធ្វើទៅបាន នៅក្នុងប្រទេសមីយ៉ាន់ម៉ា។ ប៉ុន្តែវាមិនមែន កើតចេញពីការអបអរសាទរ ដល់កាយវិការ ដោយគ្មានន័យបែបនេះឡើយ៕

ប្រទេសវៀតណាម ៖ យោងតាមទិន្នន័យរបស់នាយកដ្ឋានគយវៀតណាមបញ្ជាក់ថា នៅឆមាសទី១ ឆ្នាំ២០២៣ ចំនួនការនាំចេញទុរេនរបស់វៀតណាមទៅក្រៅប្រទេស បានកើនឡើងរហូតដល់១៩ដង បើធៀបពី១ឆ្នាំទៅ១ឆ្នាំ ហើយស្មើនឹងទឹកប្រាក់ចំនួន៨៧៦លានដុល្លារអាមេរិក ។ ក្នុងចំនួននេះ ការនាំចេញទុរេនទៅប្រទេសចិនតែមួយ ស្មើនឹងទឹកប្រាក់៨៣៥លានដុល្លារអាមេរិកឯណោះ ។

លោក Dang Phuc Nguyen លេខាធិការសមាគមបន្លែ និងផ្លែឈើវៀតណាមលើកឡើងថា ទុរេនដែលដាំនៅតំបន់ភាគខាងត្បូងប្រទេសវៀតណាម បានប្រមូលផលចាប់ខែឧសភា ដល់ខែមិថុនា ឆ្នាំ២០២៣ ហើយទុរេនដែលដាំនៅតំបន់ខ្ពង់រាបកណ្តាលនឹងដល់រដូវប្រមូលផលនៅខែសីហា ដល់ខែធ្នូ ។

កន្លងមក ទុរេនវៀតណាមអាចលក់ឱ្យបណ្តាក្រុមហ៊ុន និងឈ្មួញតូចតាចមកពីប្រទេសចិនក្នុងតម្លៃខ្ពស់ ដោយសារការដឹកជញ្ជូនទុរេនពីប្រទេសវៀតណាមទៅកាន់ចិនចំណាយពេលវេលាឆាប់រហ័ស ។ ហេតុនេះ ទើបធ្វើឱ្យផ្លែឈើនៅតែមានសភាពស្រស់ ហើយវៀតណាមមានប្រៀបក្នុងការប្រកួតប្រជែងច្រើនជាងទុរេនរបស់ថៃ ។ បច្ចុប្បន្ន ការលក់ទុរេនមានគុណភាពល្អបំផុតនៅតាមចម្ការ គឺមានតម្លៃចាប់ពី៣,៥៩ដុល្លារ ទៅ៤,២២ដុល្លារអាមេរិកក្នុង១គីឡូក្រាម ។ លើសពីនេះ នៅឆ្នាំ២០២៣ ទុរេនវៀតណាមមានគុណភាពល្អជាងឆ្នាំមុនៗ ហើយតម្រូវការក្នុងស្រុកក៏បានកើនឡើងផងដែរ ចាប់ពី១០% ទៅ១៥% ក្នុងឆមាសទី១ ឆ្នាំ២០២៣ ។

តាមទិន្នន័យរបស់នាយកដ្ឋានដាំដុះរុក្ខជាតិវៀតណាមបង្ហាញថា បច្ចុប្បន្ន មានផ្ទៃដីដាំទុរេនចំនួន១១០.៣០០ហិកតា ខណៈនៅឆ្នាំ២០១៧ មានផ្ទៃដីដាំទុរេនត្រឹមតែ៣៧.០០០ហិកតាប៉ុណ្ណោះ ។ ទិន្នផលទុរេននៅឆ្នាំ២០២៣ ស្មើនឹងប្រមាណ១លានតោន និងខ្ពស់ជាងឆ្នាំ២០២២ ក្នុងអត្រា១៥,៩% ។ វៀតណាមរំពឹងថា ខ្លួននឹងអាចនាំចេញទុរេនទៅក្រៅប្រទេស ចាប់ពី៤សែន ទៅ៥សែនតោន ខណៈប្រទេសថៃបាននាំចេញទុរេនជាង៨សែនតោន កាលពីឆ្នាំ២០២២ ។

រដ្ឋាភិបាលវៀតណាមបានចុះហត្ថលេខាលើល័ក្ខខ័ណ្ឌ និងកិច្ចព្រមព្រៀងពាណិជ្ជកម្មសេរីជាច្រើនច្បាប់ ដើម្បីជំរុញការអភិវឌ្ឍទីផ្សារបន្លែ និងផ្លែឈើរបស់វៀតណាម ។ ដូច្នេះ វាធ្វើឱ្យនៅឆមាសទី១ ឆ្នាំ២០២៣ ការនាំចេញបន្លែ និងផ្លែឈើវៀតណាមកើនឡើង៦០% បើធៀបពី១ឆ្នាំទៅ១ឆ្នាំ ៕ ប្រភព ៖ AEC connect

ទីក្រុងតៃប៉ិ៖ ភាពតានតឹង រវាងតៃវ៉ាន់ និង ចិនដីគោក បានកើនឡើងខ្លាំង ចាប់តាំងពីឆ្នាំ២០១៦ រហូតមក ក្រោយពេលលោកស្រី សៃ អ៊ីងវ៉ិន បានជាប់ឆ្នោត ក្លាយជាប្រធានាធិបតី ហើយរដ្ឋាភិបាលក្រុងប៉េកាំង បាន និង កំពុងតែបង្កើនសម្ពាធយ៉ាងខ្លាំង ប្រឆាំងនឹងដែនកោះមួយនេះ ទាំងការទូត នយោបាយ សេដ្ឋកិច្ច និង យោធា ដើម្បីបង្ខំឲ្យក្រុងតៃប៉ិ ព្រមទទួលយកនូវដែនអធិបតេយ្យភាពរបស់ចិន ប៉ុន្ដែអ្នកការទូត បានអះអាង ពីជម្លោះ រវាងចិនជាមួយតៃវ៉ាន់ នឹងនាំមកនូវគ្រោះមហន្ដរាយដ៏ធ្ងន់ធ្ងរដល់ពិភពលោក។

សារព័ត៌មាន CNA បានចេញផ្សាយ កាលពីព្រឹក ថ្ងៃព្រហស្បតិ៍ ទី៣ ខែសីហា ថា រដ្ឋមន្រ្ដីក្រសួងការបរទេសតៃវ៉ាន់ លោក ចូសេប វូ (Joseph Wu) បានផ្ដល់បទសម្ភាន៍មួយ ដល់ទីភ្នាក់ងារសារព័ត៌មានរបស់បារាំង AFP កាលពីថ្ងៃពុធ (ទី២ ខែសីហា) ដោយអះអាង ថា «ប្រសិនបើចិន ប្រើប្រាស់កម្លាំង លុកលុយមកលើកោះតៃវ៉ាន់ នឹងនាំមកនូវគ្រោះមហន្ដរាយដ៏ធំបំផុត ដល់ពិភពលោក ព្រោះដែនកោះនេះ មានសារៈសំខាន់ជាយុទ្ធសាស្រ្ដ សម្រាប់ឧស្សាហកម្មបន្ទះឈីប និង ផ្លូវដឹកនាំជញ្ជូនដ៏សំខាន់បំផុតរបស់ពិភពលោក តាមច្រកសមុទ្រតៃវ៉ាន់។

ការព្រមានរបស់ប្រមុខការទូតកោះតៃវ៉ាន់ បានកើតឡើង នៅមុខពេលដែនកោះ គ្រប់គ្រង ដោយខ្លួនឯង តាមបែបប្រជាធិបតេយ្យ មួយនេះ នឹងរៀបចំការបោះឆ្នោតប្រធានាធិបតី នៅក្នុងខែមករា ឆ្នាំ២០២៤ ស្របពេលរដ្ឋាភិបាលក្រុងតៃប៉ិ កំពុងតែប្រឈមមុខនឹងសម្ពាធរបស់ចិន កាន់តែខ្លាំង ទាំងយោធា និង នយោបាយ នៅទូទាំងច្រកសមុទ្រតៃវ៉ាន់។

រដ្ឋាភិបាលក្រុងប៉េកាំង តែងតែចាត់ទុកកោះតៃវ៉ាន់ ជាទឹកដីរបស់ចិន មិនអាចត្រូវបំបែកចេញពីគ្នាបាននោះឡើយ។ លើសពីនេះទៅទៀត ចិន តែងតែគំរាមម្តងហើយម្តងទៀត ថា ក្រុងប៉េកាំង នឹងប្រើប្រាស់កម្លាំងយោធា ដណ្ដើមកាន់កាប់ដែនកោះមួយនេះ យកមកគ្រប់គ្រងវិញ នៅថ្ងៃណាមួយ ប្រសិនបើចាំបាច់។

លោក រដ្ឋមន្រ្ដី ក្រសួងការបរទេសតៃវ៉ាន់ បានសង្កត់ធ្ងន់ ថា « សកម្មភាពណាមួយ ប្រឆាំងនឹងកោះតៃវ៉ាន់ នឹងក្លាយជាការដាស់ដល់ពិភពលោកទាំងមូល។ អ្វីដែលយើង ត្រូវធ្វើ គឺការពន្យល់ទៅដល់សហគមន៍អន្តរជាតិ ថា ប្រសិនបើមានជម្លោះណាមួយ ពាក់ព័ន្ធនឹងតៃវ៉ាន់ វានឹងជះលទ្ធផលដ៏អាក្រក់បំផុត ទៅដល់ពិភពលោកទាំងមូល ដូចអ្វីដែលបានកើតចេញពីការឈ្លានពានរបស់រុស្ស៊ី នៅក្នុងប្រទេសអ៊ុយក្រែន។ បញ្ហាកង្វះខាតស្បៀងអាហារ ប្រេងឥន្ធនៈ និង អតិផរណា នៅលើពិភពលោក ក៏នឹងអាចកើនឡើង បន្ថែមទៀត»។

លោកប្រមុខការទូតតៃវ៉ាន់ បានបន្ដ ថា ផលវិបាកខាងពាណិជ្ជកម្ម កើតចេញពីជម្លោះឆ្លងច្រកសមុទ្រ នឹងរីកធំសម្បើម ដោយសារតែចំនួនកុងតឺន័ររបស់ពិភពលោក ច្រើនជាង៥០ភាគរយ ត្រូវដឹកជញ្ជូន ឆ្លងកាត់ផ្លូវទឹក មានទំហំ ១៨០គីឡូម៉ែត្រ ពុះខណ្ឌ រវាងកោះតៃវ៉ាន់ និង ចិនដីគោក។ ចំណែកសេរីភាព នៃការធ្វើនាវាចរណ៍ ក្លាយជាធាតុដ៏សំខាន់បំផុតមួយ សម្រាប់សន្តិសុខ និង វិបុលភាពអន្តរជាតិ។

រហូតមកដល់ពេលនេះ កោះតៃវ៉ាន់ កាន់កាប់សិទ្ធិផ្តាច់មុខ លើការផលិត Semiconductors ជាមីក្រូឈីប ដែលជាសរសៃឈាមជីវិត សម្រាប់សេដ្ឋកិច្ច នាសម័យទំនើប ព្រោះវានឹងផ្តល់ថាមពលដល់អ្វីៗគ្រប់យ៉ាង ដោយរាប់ចាប់តាំងពីម៉ាស៊ីនកាហ្វេយ៉ាងសាមញ្ញ រហូតដល់គ្រឿងសព្វាវុធទំនើបៗ មានដូចជា មីស៊ីល និង ហេដ្ឋារចនាសម្ព័ន្ធប្រព័ន្ធការពារ…ជាដើម។

លោក ចូសេប វូ រដ្ឋមន្រ្ដី ក្រសួងការបរទេសតៃវ៉ាន់ បានបន្ថែមថា «បើគិតអំពីការអាក់ខានដល់ខ្សែសង្វាក់ផ្គត់ផ្គង់។ យើងសង្ឃឹម ថា រដ្ឋាភិបាលចិន នឹងមិនងាកទៅរកការប្រើប្រាស់កម្លាំងយោធា ប្រឆាំងនឹងតៃវ៉ាន់ នោះឡើយ ព្រោះវាមានផលប៉ះពាល់ដ៏ធ្ងន់ធ្ងរបំផុត សម្រាប់ពិភពលោក»។

ជាមួយនឹងដែនកោះតៃវ៉ាន់ កំពុងតែត្រៀមខ្លួន រៀបចំការបោះឆ្នោតប្រធានាធិបតី នៅខែមករា ឆ្នាំ២០២៤ នោះ លោក វូ បានអះអាងទៀត ថា រដ្ឋាភិបាលដែនកោះមួយនេះ កំពុងតែមើលឃើញ អំពីយុទ្ធនាការផ្សព្វផ្សាយព័ត៌មានមិនពិត តាមបែបទំនើបជាងមុន ដើម្បីជះឥទ្ធិពលដល់ប្រជាជន ចំនួន២៣លាននាក់ កំពុងរស់នៅលើកោះតៃវ៉ាន់។ ប៉ុន្ដែអ្វីដែលចិន បាន និង កំពុងតែធ្វើ នៅក្នុងសង្គ្រាមចិត្តសាស្រ្ដបែបនេះ គឺមានការផ្លាស់ប្តូរនូវការគិតពីជនជាតិភាគតិចបំផុត ព្រោះនៅតៃវ៉ាន់ បោះឆ្នោតតាមវិធីសាស្រ្ដផ្សេង។

តៃវ៉ាន់ និង ចិន បានតានតឹង ដាក់គ្នាកាន់តែខ្លាំងឡើង ក្រោយពេលលោកស្រី សៃ អ៊ីង-វ៉ិន (Tsai Ing-wen បានជាប់ឆ្នោត ជាប្រធានាធិបតី នៅក្នុងឆ្នាំ២០១៦ ហើយចិនបានបដិសេធចូលរួមសហប្រតិបត្ដិការ ជាមួយនឹងរដ្ឋាភិបាលក្រុងតៃប៉ិ៕

ប្រទេសចិន៖ ប្រទេសចិនកំពុងព្យាយាម ប្រមូលផ្តុំមហាជនក្នុងកិច្ចប្រឹងប្រែងមួយដើម្បីលុបបំបាត់អំពើពុករលួយដែលបំផ្លាញស្តុកគ្រាប់ធញ្ញជាតិរបស់ប្រទេស។
កាលពីសប្តាហ៍មុន រដ្ឋាភិបាលចិនបានចេញសេចក្តីណែនាំដោយផ្តល់រង្វាន់ជាសាច់ប្រាក់រហូតដល់ ១៥០,០០០ យន់ (ស្មើនឹង ២០,០០០ ដុល្លារអាមេរិក) ដល់ជនណាដែលបរិហារអំពើពុករលួយក្នុងវិស័យគ្រាប់ធញ្ញជាតិរបស់ប្រទេស។

វិធានការនេះត្រូវបានគេនិយាយថាមានគោលបំណងពង្រឹងសន្តិសុខស្បៀង និងធានាថាប្រជាជនចិនមានអាហារបម្រុងគ្រប់គ្រាន់។ អាស្រ័យហេតុនេះ អ្នកដែលផ្តល់តម្រុយដ៏មានតម្លៃ ដើម្បីលាតត្រដាងអំពើខុសច្បាប់ក្នុងការលក់ និងទិញគ្រាប់ធញ្ញជាតិបម្រុងជាតិ នឹងទទួលបានរង្វាន់ជាសាច់ប្រាក់។
យោងតាមសារាចរណែនាំដែលចេញរួមគ្នាដោយរដ្ឋបាលយុទ្ធសាស្ត្រជាតិ និងបម្រុងស្បៀង នៃក្រសួងកសិកម្មរបស់ប្រទេសចិន បានឱ្យដឹងថា ពានរង្វាន់នេះគឺមានគោលបំណង “ប្រមូលផ្តុំសាធារណជន” ឱ្យរួមដៃគ្នាក្នុងការប្រយុទ្ធប្រឆាំងអំពើពុករលួយដ៏សម្បូរបែបនៅក្នុងប្រព័ន្ធសន្តិសុខសង្គម។

ការផ្លាស់ប្តូរនេះកើតឡើងចំពេលមានការប្រែប្រួលអាកាសធាតុ ភាពមិនប្រាកដប្រជានៃទីផ្សារសកលដោយសារទំនាក់ទំនងប្រេះស្រាំជាមួយលោកខាងលិច និងផលប៉ះពាល់នៃជម្លោះនៅអ៊ុយក្រែន។ ក្នុងរយៈពេលប៉ុន្មានឆ្នាំចុងក្រោយនេះ ថ្នាក់ដឹកនាំកំពូលរបស់ប្រទេសចិនបានសង្កត់ធ្ងន់កាន់តែខ្លាំងឡើងអំពីតម្រូវការក្នុងការរក្សាភាពគ្រប់គ្រាន់នៃអាហារសម្រាប់ប្រជាជនចំនួន ១.៤ ពាន់លាននាក់របស់ខ្លួន។

គួររំលឹកដែរថា កាលពីខែមេសា មេដឹកនាំបីនាក់នៃសាជីវកម្មគ្រាប់ធញ្ញជាតិដែលគ្រប់គ្រងដោយរដ្ឋនៅក្នុងខេត្ត Anhui ប្រទេសចិន ត្រូវបានចោទប្រកាន់ពីបទទទួលសំណូកដែលមានតម្លៃជាង ១០ លានយ័ន (ស្មើនឹង ១.៤ លានដុល្លារ) ដោយបានកិបកេងប្រាក់ចំនួន ២៣០ លានយ័ន (ស្មើនឹង ៣២.២ លានដុល្លារ) សម្រាប់អាហារពាណិជ្ជកម្ម។

យោងតាមប្រភព Economic Daily កាលពីសប្តាហ៍មុនបានព្រមានថានឹងមានហានិភ័យ ជាច្រើនចំពោះសន្តិសុខស្បៀងដោយសារតែពិបាកក្នុងការរក្សាលំនឹងទំហំដីកសិកម្ម បញ្ហានៃការធានាសុវត្ថិភាពចំណីអាហារនៅតែខ្សោយ ខ្ជះខ្ជាយធនធានជាមួយនឹងករណីពុករលួយជាញឹកញាប់។ ជាមួយនឹងការសង្កត់ធ្ងន់លើសន្តិសុខកសិកម្ម ប្រទេសចិនបានកត់ត្រាការផលិតគ្រាប់ធញ្ញជាតិប្រចាំឆ្នាំច្រើនជាង ៦៥០ លានតោនសម្រាប់រយៈពេលប្រាំបីឆ្នាំជាប់ៗគ្នា។ ទោះជាយ៉ាងណាក៏ដោយ ការប្រមូលផលនៅឆ្នាំនេះត្រូវបានគេរំពឹងថានឹងរងផលប៉ះពាល់យ៉ាងខ្លាំងដោយព្រឹត្តិការណ៍អាកាសធាតុខ្លាំងជាងការរំពឹងទុក៕ ប្រភព៖cafef.com

ប្រទេសស៊ុយអែត ៖ អ្នកស្រាវជ្រាវមកពីសាកលវិទ្យាល័យ Malardalen ប្រទេសស៊ុយអែតបានលើកឡើងថា អាយុរបស់មនុស្សអាចនឹងកើនឡើងដល់១២០ឆ្នាំ ក្នុងរយៈពេលប៉ុន្មានទសវត្សរ៍ខាងមុខ ដោយសារបច្ចេកវិទ្យាកាន់តែទំនើបដូចជា ការប្រើប្រាស់បញ្ញាសិប្បនិម្មិត (AI) និងការបំពាក់នូវឧបករណ៍ទំនើបងាយស្រួលទំនាក់ទំនងជាមួយគ្រូពេទ្យ ។

Ignat Kulkov ជាអ្នកស្រាវជ្រាវមកពីសាកលវិទ្យាល័យ Malardalen លើកឡើងថា គេសង្ឃឹមថា ក្នុងរយៈពេលប្រមាណ៥០ឆ្នាំទៀត មនុស្សយើងនឹងមានអាយុវែងជាងមុន ដូចជា ពលរដ្ឋរស់នៅក្នុងប្រទេសអភិវឌ្ឍន៍រួចហើយ ពួកគេនឹងមានអាយុចាប់ពី១០០ឆ្នាំ ទៅ១២០ឆ្នាំ ។ ក្រុមអ្នកមានអាយុច្រើននឹងមានសុខភាពរឹងមាំ ដូចគ្នានឹងអ្នកមានអាយុ៤០ឆ្នាំដែរ ។ ហេតុនេះ អាយុរបស់មនុស្សនឹងវែងជាងមុន ដោយសារបច្ចេកវិទ្យាបានរីកចម្រើនយ៉ាងឆាប់រហ័ស ។

អ្នកស្រាវជ្រាវរូបនេះបន្តថា មនុស្សកាន់តែច្រើននឹងពាក់ឧបករណ៍ឆ្លាតវៃដើម្បីតាមដានសុខភាពពួកគេ ដែលឧបករណ៍ទាំងនេះងាយស្រួលទំនាក់ទំនងជាមួយគ្រូពេទ្យ និងមន្ទីរពេទ្យ ។ ពេលខ្លះ ឧបករណ៍ចាប់សញ្ញាបានបញ្ចូលទៅក្នុងខ្លួន ហើយវានឹងជួយឱ្យគ្រូពេទ្យអាចណែនាំពីរបៀបរស់នៅ ឬទម្លាប់ចាស់ៗដើម្បីឱ្យពួកគេមានសុខភាពល្អ និងអាយុកាន់តែវែង ។

ក្រៅពីនេះ ភាពរីកចម្រើនក្នុងផ្នែកផ្សេងៗនឹងរួមចំណែកដល់ការលើកកម្ពស់អាយុកាន់តែវែងរបស់មនុស្សផងដែរ ។ ការឆ្លងរាតត្បាតនៃជំងឺកូវីដ-១៩ កន្លងមក បានធ្វើឱ្យមនុស្សយើងអាចរៀនសូត្រពីរបៀបតាមដានមេរោគផ្សេងៗយ៉ាងមានប្រសិទ្ធភាពខ្លាំងឡើង ។ លើសពីនេះ បញ្ញាសិប្បនិម្មិតត្រូវបានគេប្រើប្រាស់សម្រាប់វិនិច្ឆ័យជំងឺនានាកាន់តែឆាប់រហ័សជាងមុន និងអភិវឌ្ឍន៍វិធីព្យាបាលជំងឺបែបទំនើប រួមទាំងឱសថផ្ទាល់ខ្លួន (Personalized medicine) ដែលរួមចំណែកលើកកម្ពស់សុខភាព ។

ទោះយ៉ាងណា អ្នកស្រាវជ្រាវរូបនេះឱ្យដឹងថា វាក៏មានបញ្ហាប្រឈមថ្មីៗផងដែរដូចជា បម្រែបម្រួលអាកាសធាតុនឹងធ្វើឱ្យប៉ះពាល់ខ្លាំងបំផុតដល់ប្រព័ន្ធការថែទាំសុខភាព និងការរស់នៅ ។ ដូច្នេះ យើងមិនចាំបាច់រង់ចាំដល់ពេលអនាគតទេ ប៉ុន្តែវាបានកើតឡើងរួចហើយនាពេលបច្ចុប្បន្ន ។

ការអះអាងរបស់អ្នកស្រាវជ្រាវនៅសាកលវិទ្យាល័យ Malardalen គឺបានមកពីការស្រាវជ្រាវរួមគ្នាជាមួយក្រុមអ្នកស្រាវជ្រាវប្រចាំសាកលវិទ្យាល័យផ្សេងៗនៅប្រទេសហ្វាំងឡង់ បារាំង និងអង់គ្លេស ហើយការស្រាវជ្រាវនេះបានផ្សព្វផ្សាយនៅលើទស្សនាវដ្តីវិទ្យាសាស្ត្រអនាគត (Futures) ៕ ប្រភព ៖ Mono News

ប្រទេសចិន៖ បន្ទាប់ពីការរឹតបន្តឹងអស់រយៈពេលជាង ២ ឆ្នាំ អាជីវកម្មស្មាតហ្វូនរបស់ក្រុមហ៊ុន Huawei កំពុងតែរីកចម្រើនយ៉ាងខ្លាំងម្តងទៀត ខណៈដែលការលក់របស់អ្នកប្រកួតប្រជែងមានការថយចុះ។
យោងតាមប្រភព Counterpoint Research បានឱ្យដឹងថា នៅក្នុងត្រីមាសទីពីរនៃឆ្នាំ ២០២៣ ក្រុមហ៊ុន Huawei សម្រេចបាននូវអត្រាកំណើនដ៏គួរឱ្យចាប់អារម្មណ៍ចំនួន ៥៨% ធៀបនឹងរយៈពេលដូចគ្នាកាលពីឆ្នាំមុន។ ចំណែកទីផ្សាររបស់ក្រុមហ៊ុននៅក្នុងប្រទេសចិនក៏បានកើនឡើងដល់ ១១.៣% នៅក្នុងត្រីមាសទីពីរនៃឆ្នាំ ២០២៣ នេះផងដែរ។ Counterpoint Research បានអត្ថាធិប្បាយថា កំណើនរបស់ក្រុមហ៊ុន Huawei កើតចេញពីការខិតខំប្រឹងប្រែងជាបន្តបន្ទាប់របស់ខ្លួនក្នុងការចេញលក់ផលិតផលនៅក្នុងឆមាសទីមួយនៃឆ្នាំនេះ ។ ការប្រើប្រាស់រូបភាពម៉ាកយីហោដែលមានរយៈពេលយូរ ជាពិសេសនៅតាមទីក្រុងធំៗ ក៏ដូចជាការដោះស្រាយបញ្ហាកង្វះផលិតផល ការលក់របស់ក្រុមហ៊ុន Huawei បានកើនឡើង។

ថ្មីៗនេះមានសេចក្តីរាយការណ៍ថា Huawei នឹងវិលត្រឡប់ទៅផលិតស្មាតហ្វូន 5G វិញ ដោយក្រុមហ៊ុនក៏បានរចនាបន្ទះឈីប 5G ផងដែរ។ ព័ត៌មាននេះត្រូវបានបង្ហាញដោយក្រុមហ៊ុនចំនួនបីដែលមានឯកទេសក្នុងការស្រាវជ្រាវលើឧស្សាហកម្មស្មាតហ្វូនរបស់ប្រទេសចិន។បច្ចុប្បន្ន នៅក្នុងទីផ្សារប្រទេសចិន មានតែក្រុមហ៊ុន Huawei, Vivo និង Apple ប៉ុណ្ណោះដែលបានកើនឡើង។ ក្រុមហ៊ុន Huawei បានឈរនៅលំដាប់ទី ១ ជាមួយនឹង ២១% រីឯ Apple តែឯងវិញស្ថិតក្នុងចំណាត់ថ្នាក់ទី ២ ជាមួយនឹងចំណែកទីផ្សារ ១៧.២% ។ ខណៈពេលដែលក្រុមហ៊ុន Vivo ស្ថិតនៅចំណាត់ថ្នាក់ទី ៣ ដែលមាន ១៤% Oppo និង Xiaomi ក៏បានរួមចំណែកទីផ្សារចំនួន ៨% និង ៩% រៀងៗខ្លួន ដោយឈរនៅលំដាប់ទី ៤ និងទី ៥ ក្នុងទីផ្សាររបស់ប្រទេសចិន៕ ប្រភព៖vnexpress