រដ្ឋធានីនីយ៉ាមេ (NIAMEY)៖ ការវាយប្រហារ ទៅលើស្ថានទូតបារាំង ប្រចាំនៅប្រទេសណៃជឺរ (Niger) ក្រោយពេលពួកយោធា បានធ្វើរដ្ឋប្រហារ កាលពីប៉ុន្មានថ្ងៃនេះរួចមក ក្រុមបណ្ដាប្រទេសអាហ្វ្រិកខាងលិច បានព្រមាន អំពីការប្រើប្រាស់កម្លាំងទ័ព ប្រឆាំងនឹងក្រុមមេដឹកនាំរដ្ឋប្រហារយោធា និង ប្រកាសដាក់ទណ្ឌកម្មដ៏ធ្ងន់ធ្ងរ។

ទីភ្នាក់សារព័ត៌មានរបស់ចក្រភពអង់គ្លេស Reuters បានចេញផ្សាយ នៅថ្ងៃចន្ទ ទី៣១ ខែកក្កដា ថា បណ្ដាប្រទេសអាហ្វ្រិកខាងលិច កាលពីថ្ងៃអាទិត្យ បានដាក់ទណ្ឌកម្ម និង គំរាមប្រើប្រាស់កម្លាំងយោធា ប្រសិនបើក្រុមមេដឹកនាំរដ្ឋប្រហាររបស់ប្រទេសណៃជឺរ នៅសប្ដាហ៍នេះ ខកខាតប្រគល់តំណែងវិញ ជូនទៅលោកប្រធានាធិបតី ម៉ូហាមមេដ បាហ្ស៊ូម (Mohammed Bazoum) ដែលត្រូវបានបណ្ដេញចេញពីតំណែង។ ស្របគ្នានេះ ក្រុមអ្នកគាំទ្រពួកយោធា បានវាយប្រហារ ទៅលើស្ថានទូតបារាំង ប្រចាំនៅក្នុងរដ្ឋធានីនីយ៉ាមេ។

សហគមន៍សេដ្ឋកិច្ចរដ្ឋអាហ្រ្វិកខាងលិច ហៅកាត់ ECOWAS (អេកូវ៉ាស) ដែលមានចំនួន១៥ប្រទេស បានឆ្លើយតប ចំពោះការធ្វើរដ្ឋប្រហារលើកទី៧ នៅក្នុងតំបន់សាហែល (Sahel) នៅក្នុងរយៈពេលប៉ុន្មានឆ្នាំកន្លងទៅថ្មីៗនេះ ខណៈហ្វូងមនុស្ស នៅក្នុងរដ្ឋធានីនីយ៉ាមេ ប្រទេសណៃជឺរ បានដុតទង់ជាតិបារាំង និង គប់ដុំថ្មទៅលើបេសកកម្មរបស់អតីតអាណានិគម ដោយបានទាញយកបំពង់ឧស្ម័នបង្ហូរទឹកភ្នែក ពីប៉ូលិស មកបាញ់។ រូបភាពជាច្រើន បានបង្ហាញពីភ្លើងឆេះ នៅតាមជញ្ជាំងស្ថានទូត និង មានមនុស្សរបួសជើង ប្រឡាក់ដោយឈាម ត្រូវគេលើកដាក់ នៅក្នុងរថយន្ដសង្គ្រោះបន្ទាន់។

នៅក្នុងកិច្ចប្រជុំបន្ទាន់មួយ នៅក្នុងប្រទេសណៃជឺរ ត្រូវពិភាក្សា ផ្ដោតទៅលើរដ្ឋប្រហារយោធា កាលពីសប្ដាហ៍មុន។ បណ្ដាមេដឹកនាំសហគមន៍សេដ្ឋកិច្ចរដ្ឋអាហ្រ្វិកខាងលិច (ECOWAS) បានអំពាវនាវឲ្យមានការស្ដារច្បាប់រដ្ឋធម្មនុញ្ញឡើងវិញ ហើយថែមទាំងព្រមាន អំពីការសងសឹក ប្រសិនបើមិនអាចស្ដារស្ថានការណ៍នេះឡើងវិញទេនោះ។

បណ្ដាមេដឹកនាំ ECOWAS ទាំង១៥ប្រទេស បានសង្កត់ធ្ងន់ ថា «វិធានការនានា អាចនឹងត្រូវអនុវត្ដ ដោយរាប់បញ្ចូលទាំងការប្រើប្រាស់កម្លាំងទ័ពផងដែរ។ ទន្ទឹមគ្នានេះ ក្រុមមន្រ្ដីក្រសួងការពារជាតិរបស់ប្រទេសទាំងនេះ នឹងជួបប្រជុំគ្នា ដើម្បីធ្វើឲ្យកិច្ចការនេះ មានប្រសិទ្ធភាព»។

លោក ម៉ាហាម៉ាត់ អាឌ្រីស ដេប៊ី (Mahamat Idriss Deby) ប្រធានាធិបតីឆាត (Chad) ដែលបានឡើងកាន់អំណាច នៅក្នុងអំឡុងឆ្នាំ២០២១ ក្រោយអំពើរដ្ឋប្រហារដែរនោះ បានជួបជាមួយនឹងសមភាគីនីហ្សេរីយ៉ា (Nigeria) លោក ប៉ូឡា ទីនូប៊ូ (Bola Tinubu) នៅខាងក្រៅកិច្ចប្រជុំនេះ ដោយបានស្ម័គ្រចិត្ត និយាយទៅកាន់មេដឹកនាំរដ្ឋប្រហារយោធា នៅក្នុងប្រទេសណៃជឺរ (Niger)។ នេះបើតាមជំនួយការរបស់ប្រធានាធិបតីឆាត និង នីហ្សេរីយ៉ា បានប្រាប់ទៅដល់ទីភ្នាក់ងារសារព័ត៌មាន Reuters ដោយសុំលក្ខខណ្ឌ មិនបញ្ចេញអត្ដសញ្ញាណ។

បណ្ដាមេដឹកនាំ ECOWAS និង សហភាពសេដ្ឋកិច្ច-រូបិយវត្ថុអាហ្វ្រិកខាងលិច ដែលមានសមាជិក ចំនួន៨ប្រទេស បានអះអាង ថា ការអនុវត្ដឲ្យមានប្រសិទ្ធភាពភ្លាមៗ គឺនៅតាមព្រំដែន ជាប់ជាមួយនឹងប្រទេសណៃជឺរ នឹងត្រូវតែបិទ, ជើងហោះហើរពាណិជ្ជកម្ម ត្រូវតែហាមឃាត់, ប្រតិបត្តិការហិរញ្ញវត្ថុត្រូវតែបញ្ឈប់ដំណើរការ, ទ្រព្យសម្បត្តិជាតិរបស់ប្រទេសណៃជឺឬត្រូវតែបង្កក និង ជំនួយតែបញ្ចប់។ ទន្ទឹមគ្នានេះ ក្រុមមេដឹកនាំយោធា ពាក់ព័ន្ធនឹងអំពើរដ្ឋប្រហារនេះ ក៏នឹងត្រូវតែហាមឃាត់នូវការធ្វើដំណើរចេញពីប្រទេសណៃជឺរ ហើយទ្រព្យសម្បត្ដិរបស់ពួកគេ ក៏ត្រូវតែបង្កក៕

រដ្ឋាភិបាលកូរ៉េ​ខាង​ជើង​ បាន​កាត់​ទោសក្មេង​អាយុ​ពីរ​ឆ្នាំ​ម្នាក់ ឱ្យ​ជាប់​ពន្ធនាគារអស់មួយជីវិត បន្ទាប់​ពី​ក្រុមចារកម្ម បានរកឃើញថាឪពុកម្តាយក្មេងនេះ​ បានលាក់គម្ពីរ Bible នៅក្នុងផ្ទះ។

ករណីនេះកើតឡើងតាំងពីឆ្នាំ២០០៩ តែទើបតែបែកធ្លាយកាលពីខែឧសភា ឆ្នាំ២០២៣ ដោយក្រុមចារកម្មអាមេរិក ជាអ្នកបញ្ចេញព័ត៌មាន។

នៅក្នុងប្រទេសកូរ៉េខាងជើងមានអ្នកទោសប្រមាណជា៥មុឺននាក់ ទៅ៧មុឺននាក់ ត្រូវ​បានរដ្ឋាភិបាលកូរ៉េ​ខាង​ជើង​គេ​ចាប់​​ដាក់ពន្ធនាគារអស់មួយជីវិតពី​បទ”ជា​គ្រិស្តសាសនិក”។

រដ្ឋធម្មនុញ្ញរបស់លោក គីម ជុងអ៊ុន បានអះអាងធានានូវសេរីភាព និងបើកសិទ្ធខាងជំនឿសាសនា ក៏ប៉ុន្តែវាគ្រាន់តែជាការផ្សព្វផ្សាយឱ្យពិភពលោកខាងក្រៅបានឃើញតែប៉ុណ្ណោះ។ ជាក់ស្តែងការផ្សព្វផ្សាយសាសនា នៅក្នុងប្រទេសនេះ អាចប្រឈមមុខនឹងការជាប់ពន្ធនាគារ។

យោងតាមរបាយការណ៍២០២០ ប្រជាជនកូរ៉េខាងជើង៧១ភាគរយមិនមានជំនឿលើព្រះនោះទេ ខណៈ១១ភាគរយទៀតមានជំនឿលើសាសនាព្រះពុទ្ធ។

គួរបញ្ជាក់ផងដែរថា រដ្ឋាភិបាលប្រទេសនេះ​បានដាក់ចេញនូមនោគមវិជ្ជាមួយហៅថា “Kimilsungism-Kimjongilism” ដែលធ្វើយ៉ាងណាឱ្យប្រជាជនប្រទេសនេះ ចាត់ទុកមេដឹកនាំរបស់ខ្លួនដូចជាព្រះ វាប្រៀបនឹងប្រព័ន្ធគ្រប់គ្រង Propaganda ដូចគ្នាដែរ ដែលមនោគមវិជ្ជាបានដាក់ចេញតាំងពីជំនាន់ជីតារបស់លោកគីម ជុងអ៊ុន ឯណោះ គឺលោក គីម​ អុីល ស៊ុង៕

ប្រភព៖ economic times

ប្រទេសឥណ្ឌា ៖ ស្ថានីយទូរទស្សន៍របស់ប្រទេសឥណ្ឌាឈ្មោះ Odisha TV បានបង្ហាញខ្លួនអ្នករាយការណ៍ព័ត៌មាន AI ជាលើកដំបូង ដែលមានឈ្មោះថា «Lisa» ។ ការបង្ហាញខ្លួននេះបានធ្វើឱ្យមនុស្សមួយចំនួនសរសើរ និងខ្លះទៀតរិះគន់ថា អ្នករាយការណ៍ព័ត៌មាន AI ខ្វះខាតជំនាញ និងបទពិសោធន៍ ។

Jagi Mangat Panda ជាសហស្ថាបនិក និងនាយកគ្រប់គ្រងរបស់ស្ថានីយទូរទស្សន៍ Odisha បានលើកឡើងថា វាជាភាពជោគជ័យដ៏សំខាន់របស់ស្ថានីយទូរទស្សន៍ និងប្រព័ន្ធផ្សព្វផ្សាយឌីជីថល ។ គោលបំណងនៃការប្រើប្រាស់បច្ចេកវិទ្យា AI គឺដើម្បីជួយកាត់បន្ថយការងារដដែលៗ ហើយវាក៏ជួយឱ្យបុគ្គលិកមានពេលវេលាផ្តោតលើការងារ ដែលត្រូវប្រើគំនិតក្នុងការផ្សព្វផ្សាយព័ត៌មានឱ្យកាន់តែមានគុណភាព ។

ក្រៅពីអ្នករាយការណ៍ព័ត៌មាន AI មានសមត្ថភាពរាយការណ៍ព័ត៌មានបានចំនួន៣ភាសា គឺភាសាអង់គ្លេស ហិណ្ឌូ និងបេងហ្គាល់ វាក៏អាចរាយការណ៍ព័ត៌មានអាកាសធាតុ និងរាយការណ៍ព័ត៌មានបាន៧៥ភាសាទៀត ។ ដូច្នេះ វាមានសមត្ថភាពខ្ពស់ដែលមនុស្សធម្មតាពុំអាចធ្វើបាន ។

ជាមួយគ្នានេះ ក៏មានការជជែកគ្នាអំពីអនាគតនៃប្រព័ន្ធផ្សព្វផ្សាយក្នុងប្រទេសដែលមានពលរដ្ឋច្រើនបំផុតលើពិភពលោក ដូចជា ឥណ្ឌា ផងដែរ ដោយសារពលរដ្ឋក្នុងប្រទេសនេះបានទំនាក់ទំនងគ្នារាប់រយភាសា ហើយបច្ចេកវិទ្យា AI បានក្លាយជាកត្តាជំរុញដ៏សំខាន់ក្នុងប្រព័ន្ធផ្សព្វផ្សាយ ។ មុននេះ ក្រុមហ៊ុនផ្សព្វផ្សាយ India Today Group ក៏ធ្លាប់បានបង្ហាញអ្នករាយការណ៍ព័ត៌មាន AI ដំបូងគេផងដែរ ឈ្មោះ Sana ក្នុងប្រទេសឥណ្ឌា ។

ចំពោះបច្ចេកវិទ្យានៅពីក្រោយការបង្កើតអ្នករាយការណ៍ព័ត៌មាន AI គឺគេប្រើប្រាស់ Machine Learning ដើម្បីវិភាគទិន្នន័យពីអត្ថបទឱ្យក្លាយជាវីដេអូ ។ អ្នកធ្វើការផ្នែកទូរទស្សន៍យល់ឃើញថា បច្ចេកវិទ្យា AI នឹងក្លាយជាប្រយោជន៍ផ្នែកឧស្សាហកម្ម ពីព្រោះវានឹងជួយសន្សំសំចៃការចំណាយ, កាត់បន្ថយភាពលំបាកក្នុងការធ្វើការជាមួយមនុស្ស ហើយវាអាចរាយការណ៍ព័ត៌មានបានច្រើនភាសា ព្រមទាំងអាចធ្វើការជាមួយព័ត៌មានច្រើនក្នុងរយៈពេលខ្លី ។

មនុស្សមួយចំនួនមិនយល់ស្របនឹងការប្រើបច្ចេកវិទ្យា AI សម្រាប់រាយការណ៍ព័ត៌មានទេ ព្រោះហានិភ័យរបស់បច្ចេកវិទ្យានេះនឹងបំផ្លាញភាពជឿជាក់នៃប្រព័ន្ធផ្សព្វផ្សាយ ។ ពួកគេនិយាយថា មនុស្សយន្តខ្វះជំនាញសង្កេត និងខ្វះបទពិសោធន៍ ដែលខុសពីគ្នាពីអ្នករាយការណ៍ព័ត៌មានជាមនុស្ស ។ ម្យ៉ាងទៀត មនុស្សយន្ត AI គ្មានលក្ខណៈធម្មជាតិ និងមិនទាក់ទាញ ហើយចំណុចនេះ គឺជាមូលហេតុប៉ះពាល់ដល់ភាពជឿជាក់របស់អ្នកទស្សនា ៕ ប្រភព ៖ Thairath Money

បរទេស៖ Super moon នឹងលេចឡើងនៅជិតផែនដីក្នុងគន្លងរបស់វាដែលនឹងកើតឡើងនៅថ្ងៃទី ១ និងថ្ងៃ ៣០ ខែសីហា ឆ្នាំ២០២៣។
យោងតាមអ្នកជំនាញខាងតារាសាស្ត្រ NASA លោក Fred Espenak បាននិយាយថា យប់រដូវក្តៅនេះគឺជាពេលវេលាដ៏ល្អឥតខ្ចោះដើម្បីមើលព្រះច័ន្ទពេញវង់នៅលើមេឃភាគខាងកើតពីរបីនាទីបន្ទាប់ពីថ្ងៃលិច ហើយវានឹងកើតឡើងពីរដងក្នុងខែសីហានេះ ។

ព្រះច័ន្ទដំបូងនឹងបង្ហាញខ្លួននៅយប់ថ្ងៃទី ១ ខែសីហា ឆ្នាំ២០២៣ នៅពេលដែលព្រះច័ន្ទរះក្នុងទិសអាគ្នេយ៍។ ព្រច័ន្ទនេះនឹងលេចរូបរាងធំ និងភ្លឺខ្លាំង ព្រោះវានៅជិតផែនដីជាងធម្មតា ដែលមានចម្ងាយត្រឹមតែ ៣៥៧.៥៣០ គីឡូម៉ែត្រប៉ុណ្ណោះ ខណៈដែលចម្ងាយគិតជាមធ្យមរវាងផែនដី និងព្រះច័ន្ទគឺ ៣៨៤,៤០០ គីឡូម៉ែត្រ។ ព្រះច័ន្ទនឹងខិតកាន់តែជិតនៅថ្ងៃទី ៣០ ខែសីហា ឆ្នាំ២០២៣ ដែលមានចម្ងាយត្រឹមតែ ៣៥៧,៣៤៤ គីឡូម៉ែត្រពីផែនដី ដោយសារតែវាជាព្រះច័ន្ទពេញវង់ទីពីរក្នុងខែតែមួយ ទើបគេហៅថា Blue Moon។

យោងតាមតារាវិទូអ៊ីតាលីលោក Gianluca Masi ដែលជាស្ថាបនិកនៃគម្រោងតេឡេស្កុបនិម្មិត បានឱ្យដឹងថា ពេលវេលាចុងក្រោយនៃព្រះច័ន្ទពីរបានបង្ហាញខ្លួនក្នុងខែតែមួយគឺនៅក្នុងឆ្នាំ ២០១៨ ហើយវានឹងកើតឡើងម្តងទៀតនៅឆ្នាំ២០២៣ នេះរហូតដល់ឆ្នាំ ២០៣៧។
Supermoon ទីមួយនៃឆ្នាំនេះបានកើតឡើងម្តងហើយនៅថ្ងៃទី៣ ខែកក្កដា និងចុងក្រោយនៃឆ្នាំនេះប្រព្រឹត្តទៅនៅក្នុងខែកញ្ញា ចំណែកឯ Supermoon ខែសីហា វិញនឹងមកជិតផែនដីរហូតដល់ទៅពីរដង។

ប្រសិនបើមើលមិនឃើញអ្នកអាចប្រើកែវយឺត ឬតេឡេស្កុបដើម្បីជួយបង្កើនបទពិសោធន៍សម្រាប់អ្នកសង្កេតការណ៍ ដោយបង្ហាញពីរចនាសម្ព័ន្ធដូចជាសមុទ្រព្រះច័ន្ទ វាលទំនាបងងឹត និងនៅក្នុងបឹងធំៗចំនួន៥ ដែលបង្កើតឡើងដោយកម្អែលភ្នំភ្លើងហូរចេញ។ យើងអាចមើលព្រះច័ន្ទដ៏អស្ចារ្យនេះនៅគ្រប់បណ្តាប្រទេសទាំងអស់ជុំវិញពិភពលោក៕ ប្រភព៖vnexpress

ប្រទេសថៃ ៖ កាលពីថ្ងៃទី៣០ ខែកក្កដា កន្លងមក សារព័ត៌មានប្រទេសថៃរាយការណ៍ថា អាកាសធាតុប្រែប្រួល និងមានខ្យល់បក់បោកខ្លាំងនៅសមុទ្រ Andaman បានធ្វើឱ្យអ្នកប្រកបរបរនេសាទនៅខេត្តផាំងង៉ា ត្រូវយកទូករបស់ពួកគេមកចតនៅច្រាំងដើម្បីគេចពីខ្យល់ខ្លាំង ។ អ្នកនេសាទទាំងនេះនិយាយថា ពួកគេមិនហ៊ានចេញទៅនេសាទត្រីទេ ព្រោះបារម្ភខ្លាចមានគ្រោះថ្នាក់ដោយសារខ្យល់ខ្លាំង ។

គេសង្កេតឃើញថា នៅចុងខែកក្កដា ឆ្នាំ២០២៣ តម្លៃអាហារសមុទ្រនៅផ្សារបាងមួង ស្រុកតាកួប៉ា ខេត្តផាំងង៉ា បានឡើងថ្លៃជាបន្តបន្ទាប់ ដោយសារការផ្គត់ផ្គង់នៅតាមទីផ្សារនានាខ្វះខាត ហើយវាជារដូវភ្លៀងធ្លាក់ផងនោះ ទើបក្លាយជាឧបសគ្គក្នុងការនេសាទ ។ សារព័ត៌មានថៃរាយការណ៍ទៀតថា ត្រីកាម៉ុងដែលអតិថិជននិយមទិញទៅបរិភោគ កាលពីមុន មានតម្លៃ៧០បាតក្នុង១គីឡូក្រាម ប៉ុន្តែបច្ចុប្បន្ននេះ វាបានឡើងថ្លៃដល់៨០បាតក្នុង១គីឡូក្រាម ។ ចំណែកត្រី និងអាហារសមុទ្រផ្សេងទៀត ក៏បានឡើងថ្លៃតាមគ្នាដែរ ។

នាចុងខែកក្កដា ឆ្នាំ២០២៣នេះ តម្លៃម្ហូបអាហារសមុទ្រនៅខេត្តផាំងង៉ា មិនស្ថិតស្ថេរទេ ខណៈវាបានឡើងថ្លៃ និងចុះថ្លៃទៅតាមថ្ងៃខ្លះ ដែលបណ្តាលមកពីខ្យល់បក់ខ្លាំងនៅសមុទ្រ និងធ្វើឱ្យទូកនេសាទរបស់ពលរដ្ឋថៃនេសាទបានតិចជាងមុន ។ ចំណែកក្រុមទូកនេសាទក្នុងមូលដ្ឋានវិញ ក៏បានផ្អាកការនេសាទត្រីផងដែរ ទើបធ្វើឱ្យម្ហូបអាហារសមុទ្រខ្លះចាប់ផ្តើមខ្វះខាតនៅលើទីផ្សារ ។ ទោះយ៉ាងណា គេសង្ឃឹមថា នៅពេលខ្យល់ស្ងប់ស្ងាត់នឹងធ្វើឱ្យម្ហូបអាហារសមុទ្រទាំងនេះមានតម្លៃធម្មតាវិញ ៕ ប្រភព ៖ ch3plus