ប្រទេសថៃ ៖ នាយកដ្ឋានសុខភាពផ្លូវចិត្តនៅប្រទេសថៃបានស្នើឱ្យពលរដ្ឋថៃទាំងអស់កាត់បន្ថយបរិមាណការផឹកស្រា ហើយបើមានអាការៈខុសប្រក្រតី ពួកគេត្រូវប្រញាប់ទៅជួបជាមួយគ្រូពេទ្យ និងបញ្ជាក់ឱ្យច្បាស់ថា ខ្លួនឈប់ផឹកស្រា ។ ការផឹកស្រាបានធ្វើឱ្យប៉ះពាល់ដល់សុខភាពផ្លូវចិត្ត ហើយអ្នកជំងឺត្រូវតែទទួលការថែទាំពីគ្រូពេទ្យ ។

លោក Jesada Chokdamrongsuk អគ្គនាយកនៃនាយកដ្ឋានសុខភាពផ្លូវចិត្តប្រចាំប្រទេសថៃ បានលើកឡើងថា ការផឹកស្រាបានធ្វើឱ្យរាងកាយមនុស្សប្រឈមនឹងបញ្ហាជាច្រើន ជាពិសេស អំពើហិង្សាដោយសារឥទ្ធិពលគ្រឿងស្រវឹងបានគ្របដណ្តប់ខួរក្បាល ការសម្រេចចិត្ត និងការប្រើប្រាស់ហេតុផល ។ វាធ្វើឱ្យអ្នកផឹកបាត់បង់ស្មារតី, ខ្វះភាពអត់ធ្មត់, បែងចែកមិនដាច់រវាងភាពត្រឹមត្រូវ និងមិនត្រឹមត្រូវ ព្រមទាំងឈានដល់ការប្រើអំពើហិង្សាទៀតផង ។ ហេតុនេះ តែងកើតមានបញ្ហា និងងាយបង្កភាពក្តៅក្រហាយដល់អ្នកដទៃ ហើយចុងក្រោយ ក៏កើតមានអំពើឧក្រិដ្ឋកម្ម ។

លោកបន្តថា ការផឹកស្រាបានធ្វើឱ្យប៉ះពាល់ដល់សុខភាពផ្លូវចិត្តផងដែរ ហើយគេសង្កេតឃើញថា ក្នុង១ឆ្នាំៗ មានអ្នកជំងឺចូលព្យាបាលសុខភាពផ្លូវចិត្តនៅតាមមន្ទីរពេទ្យ ដោយសារការផឹកស្រា ។ ជាក់ស្តែង នៅមន្ទីរពេទ្យ Suan Prung គឺជាមជ្ឈមណ្ឌលព្យាបាលអ្នកមានបញ្ហាសុខភាពផ្លូវចិត្ត ដែលបណ្តាលមកពីការផឹកគ្រឿងស្រវឹង គឺមិនតិចជាង៤.០០០នាក់ក្នុង១ឆ្នាំ ។ គេសង្ឃឹមថា នឹងមានអ្នកជំងឺផ្លូវចិត្តជាច្រើននាក់ទៀតដោយសារការផឹកស្រា នឹងមកព្យាបាលនៅមន្ទីរពេទ្យនេះ ។

ការកាត់បន្ថយ និងបញ្ឈប់ការផឹកស្រា គឺជាវិធីដ៏ល្អបំផុត ប៉ុន្តែលោកវេជ្ជបណ្ឌិត Jesada បញ្ជាក់ថា គួរតែកាត់បន្ថយការផឹកស្រាបន្តិចម្តងៗ ដូចជា ត្រូវកំណត់បរិមាណការផឹក ដើម្បីឱ្យអ្នកផឹកមានស្មារតីអាចគ្រប់គ្រងខ្លួនឯង ។ លើសពីនេះ ពួកគេត្រូវផឹកទឹកបរិសុទ្ធផងដែរក្នុងអំឡុងពេលផឹកស្រា ដើម្បីឱ្យរយៈពេលផឹកមានគម្លាតគ្នា និងធ្វើសកម្មភាពផ្សេងៗជំនួស ដូចជា លេងតន្ត្រី ហាត់ប្រាណ ធ្វើការងារសិល្បៈ ឬការងារផ្សេងៗ និងចៀសវាងជួបជាមួយមិត្តភក្តិដែលធ្លាប់ផឹកជាមួយគ្នា ហើយត្រូវចូលរួមធ្វើសកម្មភាពនានាជាមួយអ្នកមិនផឹកស្រា ។ បើមិត្តភក្តិបបួលឱ្យផឹកស្រា ត្រូវបដិសេធថា មានបញ្ហាសុខភាព ឬគ្រូពេទ្យហាម ។

លោកវេជ្ជបណ្ឌិត Jesada បន្ថែមថា មិនគួរបើកបរយានជំនិះផ្សេងៗទេ ក្រោយពីបានផឹកគ្រឿងស្រវឹងរួច និងមិនគួរផឹកគ្រឿងស្រវឹងនៅពេលទទួលទានថ្នាំគ្រប់ប្រភេទរួច ។ បើមានអាការៈក្អួតចង្អោរធ្ងន់ធ្ងរ, ឆាប់ខឹង, ញ័រដៃ និងបែកញើស ត្រូវប្រញាប់ទៅជួបគ្រូពេទ្យជាបន្ទាន់ ហើយបញ្ជាក់ឱ្យច្បាស់ថា ខ្លួនឈប់ផឹកស្រា ដើម្បីទទួលការផ្តល់យោបល់ពីគ្រូពេទ្យសុខភាពផ្លូវចិត្ត ៕ ប្រភព ៖ chiangmai news

កាលពីពេលថ្មីៗនេះ ផ្កាយរណបមួយ បានបញ្ចេញរូបភាពមួយចំនួន នៃដំណើរការសាងសង់ទីក្រុងកញ្ចក់ The Line របស់ប្រទេសអារ៉ាប៊ីសាអូឌីត។

គម្រោង The Line នេះបានចាប់ផ្ដើមសាងសង់ នៅលើវាលខ្សាច់ដ៏ធំល្វឹងល្វើយ ជាមួយនឹងប្រវែង ១៧០ គីឡូម៉ែត្រ ទទឹង ២០០ ម៉ែត្រ និងកម្ពស់ ៥០០ម៉ែត្រ ដែលមានរូបរាងស្រដៀងនឹងរូបចតុកោណកែង និងអាចឱ្យមនុស្សប្រមាណជា៩លាននាក់រស់នៅទីក្រុងនេះ។

ព្រះអង្គម្ចាស់ Mohammed bin Salman នៃប្រទេសអារ៉ាបីសាអូឌីត បានបញ្ជាក់ថាគម្រោងនេះនឹងបញ្ចប់ការសាងសង់នៅឆ្នាំ២០៣០ ខាងមុខ ដោយចំណាយអស់១ពាន់ទ្រីលានដុល្លារ។

ទីក្រុងនេះ គឺគ្មានផ្លូវសម្រាប់ឱ្យរថយន្ដបើកបរនោះទេ ប៉ុន្ដែមានរថភ្លើង High-Speed ដែលអាចដឹកមនុស្សចេញពីចុងនៃទីក្រុងទៅចុងនៃទីក្រុងមួយទៀត ដោយចំណាយពេលត្រឹមតែ២០នាទីប៉ុណ្ណោះ។

ទីក្រុងកញ្ចក់ The line city នឹងប្រើប្រាស់ថាមពលដែលមិនប៉ះពាល់ដល់បរិស្ថាន១០០ភាគរយ ហើយ ៩៥ភាគរយនៃដីក្នុងទីក្រុងនេះគឺត្រូវនឹងអភិរក្សទៅដោយធម្មជាតិ៕

បរទេស៖ ក្រុមអ្នកស្រាវជ្រាវរបស់ប្រទេសស្វីសបានរកឃើញក្បាលព្រួញមួយ ដែលមានរាងដូចអាចម៍ផ្កាយ Kaalijarv។ អាចម៍ផ្កាយ Kaalijarv បានបុកផែនដីក្នុងកំឡុងយុគសម័យសំរិទ្ធ និងបានធ្លាក់មកដីចន្លោះឆ្នាំ ១៤៤០ និង ១៨៧០ មុនគ្រិស្តសករាជ។

យោងតាមប្រភពព័ត៌មាន IFL Science ដែលបានរាយការណ៍កាលពីថ្ងៃទី ២៨ ខែកក្កដាថា ក្បាលព្រួញនេះមានប្រភពមកពីសម័យសំរិទ្ធនៃ Mörigen ដែលមាននៅចន្លោះឆ្នាំ ៨០០ និង ៩០០ មុនគ.ស។ ពួកគេបានស្វែងរកនឹងប្រមូលវត្ថុបុរាណនៅជុំវិញបឹង Biel ហើយក៏បានប្រទះឃើញក្បាលព្រួញ ដែលមានទម្ងន់ ២.៩ ក្រាម និងប្រវែង ៣៩.៣ មីលីម៉ែត្រ។

លក្ខណៈក្បាលព្រួញដែលមានរាងដូចអាចម៍ផ្កាយនេះ ត្រូវបានបញ្ជាក់ដោយអត្ថិភាពនៃអ៊ីសូតូបអាលុយមីញ៉ូម-២៦ ដែលកើតឡើងតែនៅក្នុងវត្ថុដែលលើសពីបរិយាកាសផែនដីប៉ុណ្ណោះ។ ក្រុមការងារក៏បានកំណត់ផងដែរថា ក្បាលព្រួញនេះមានសារធាតុដែក និងនីកែលពិសេស ដែលមានតែនៅក្នុងអាចម៍ផ្កាយប៉ុណ្ណោះ។ ទោះយ៉ាងណាក៏ដោយ ក្រុមអ្នកស្រាវជ្រាវមិនបានដឹងថាអាវុធនោះមានគោលបំណងសម្រាប់បរបាញ់ ឬប្រយុទ្ធនោះទេ៕ ប្រភព៖vnexpress

ប្រទេសម៉ាឡេស៊ី ៖ ស្ត្រីចំណាស់ម្នាក់រស់នៅប្រទេសម៉ាឡេស៊ីបានភ្ញាក់ផ្អើលជាខ្លាំងនៅពេលឃើញប្រាក់ចំនួន៣ម៉ឺនរីងហ្គីត ដែលគាត់បានសន្សំទុកក្នុងឡាំងក្រដាសមួយសម្រាប់ធ្វើបុណ្យនៅក្រៅប្រទេស បានខូចខាតអស់នៅសល់តែកម្ទេចកម្ទី ដោយសារសត្វកណ្តៀរបានចូលស៊ីប្រាក់ទាំងនេះ ។ គាត់លើកឡើងថា គាត់សោកស្តាយខ្លាំងណាស់ដែលបានសន្សំប្រាក់ក្នុងឡាំងក្រដាស ហើយគាត់ពុំអាចបន្ទោសអ្នកណាបានទេ ។

លោក Khairul Azar រស់នៅក្នុងរដ្ឋកាឡាន់តាន់ និងជាចៅប្រុសរបស់ស្ត្រីចំណាស់ខាងលើ បានបង្ហោះក្នុងហ្វេសប៊ុកអំពីរូបភាពក្រដាសប្រាក់ដាក់ក្នុងឡាំងក្រដាសមួយ ហើយបានក្លាយជាកម្ទេចក្រដាស ដោយសារសត្វកណ្តៀរស៊ីបំផ្លាញ ។ ក្រោយមក គាត់បានព្យាយាមប្រមូលប្រាក់ជាងពាក់កណ្តាលដែលមានសភាពល្អខ្លះៗ ដើម្បីទុកប្តូរយកប្រាក់ថ្មីជាមួយធនាគារកណ្តាលម៉ាឡេស៊ី ហើយគាត់សង្ឃឹមថា នឹងទទួលបានប្រាក់ថ្មីជំនួសវិញ ។

លោក Khairul Azar បានសរសេរនៅក្នុងហ្វេសប៊ុកថា ៖ «នៅឆ្នាំ២០២៤ លោកយាយរបស់ខ្ញុំមានផែនការទៅធ្វើបុណ្យនៅក្រៅប្រទេស ហើយលោកយាយអាចត្រូវបានគេកំណត់មិនឱ្យគាត់ទៅធ្វើបុណ្យនៅក្រៅប្រទេសទេ ។ ដូច្នេះ បញ្ហានេះធ្វើឱ្យយើងទទួលបានបទពិសោធន៍ថា កុំសន្សំប្រាក់នៅក្នុងផ្ទះឱ្យសោះ» ។

បន្ទាប់ពីមានការបង្ហោះរូបក្រដាសប្រាក់ក្នុងបណ្តាញសង្គម ក៏មានអ្នកចូលមកបញ្ចេញមតិប្រមាណ២៦០នាក់ និងត្រូវបានគេចែកចាយបន្តគ្នារហូតដល់ជាង៦៥០លើក ។ មនុស្សមួយចំនួនបានសម្តែងការអាណិតអាសូរលោកយាយ ខណៈមនុស្សខ្លះទៀតនិយាយថា បញ្ហានេះមិនពាក់ព័ន្ធនឹងការសន្សំប្រាក់នៅផ្ទះទេ ប៉ុន្តែវាអាស្រ័យលើវិធីទុកដាក់ប្រាក់ច្រើនជាង ហើយពួកគេនិយាយថា វិធីល្អជាងនេះ គឺត្រូវសន្សំប្រាក់ក្នុងកំប៉ុងសន្សំប្រាក់ ។ ចំណែកមនុស្សមួយចំនួនទៀតណែនាំថា ត្រូវយកប្រាក់ទៅប្តូរជាមាសវិញ ពីព្រោះការផ្ញើប្រាក់នៅធនាគារ ក៏មានហានិភ័យ និងត្រូវគេបោកប្រាស់ផងដែរ ៕ ប្រភព ៖ sanook

ប្រទេសម៉ាឡេស៊ី ៖ ក្រុមហ៊ុន Tesla បានចូលមកកាន់ទីផ្សារប្រទេសម៉ាឡេស៊ីជាផ្លូវការហើយ ក្រោយពីក្រុមហ៊ុននេះធ្វើការសម្ពោធនៅហាងទំនើបមួយឈ្មោះ Pavilion KL ក្នុងទីក្រុងកូឡាឡាំពួរ ។ ម៉ាឡេស៊ី គឺជាទីផ្សារបើកបររថយន្តប្រកាន់ស្តាំចុងក្រោយគេបំផុត ក្រោយពី Tesla បានចូលក្នុងទីផ្សារប្រទេសអង់គ្លេស ហុងកុង ម៉ាកាវ ជប៉ុន អូស្ត្រាលី សិង្ហបុរី និងថៃ ។

នៅក្នុងពិធីសម្ពោធមានការបង្ហាញរថយន្ត Tesla Model Y គ្រប់ប្រភេទជាលើកដំបូង ហើយក្រុមហ៊ុន Tesla បានប្រកាសថា នឹងដំណើរការស្ថានីយសាកថ្មរថយន្ត Supercharging លើកដំបូងនៅប្រទេសម៉ាឡេស៊ី ដែលស្ថិតនៅត្រង់បរិវេណចំណតរថយន្តក្រោមដីរបស់ហាងលក់ទំនិញខាងលើ ។ លើសពីនេះ ក្រុមហ៊ុនមានគម្រោងបើកស្ថានីយ Supercharging ជាច្រើនកន្លែងទៀតនៅតាមទីតាំងយុទ្ធសាស្ត្រផងដែរ ដើម្បីអាចគ្របដណ្តប់ចំណុចគោលដៅពេញនិយមនៅទូទាំងប្រទេស ។

ម៉ាឡេស៊ីស្ថិតក្នុងចំណោមប្រទេសទីផ្សារដែលក្រុមហ៊ុន Tesla មកវិនិយោគយឺតយ៉ាវ ខណៈក្រុមហ៊ុនគូប្រជែងក្នុងផ្នែកឧស្សាហកម្មរថយន្តអគ្គិសនីរឹងមាំជាច្រើនទៀតឈានជើងចូលមកកាន់ទីផ្សារនេះបានមួយរយៈហើយ ដូចជា ក្រុមហ៊ុន Audi, BMW, BYD, Hyundai, Kia, Mercedes Benz, Nissan, Porsche, Smart និង Volvo ។ លើសពីនេះ ក៏មានក្រុមហ៊ុននៅក្នុងស្រុកផងដែរ ដូចជា Proton ដែលសហការជាមួយក្រុមហ៊ុន Geely ។

ទោះយ៉ាងណា តម្លៃដែលអាចប្រកួតប្រជែងបាន និងបច្ចេកវិទ្យាជាន់ខ្ពស់របស់ក្រុមហ៊ុន Tesla អាចជាចំណុចមានប្រៀបមួយ ដែលជួយទាក់ទាញអតិថិជនក្នុងប្រទេសម៉ាឡេស៊ី ព្រមទាំងបង្កើនឱកាសឱ្យក្រុមហ៊ុន Tesla អាចកាន់កាប់ចំណែកទីផ្សារនាំមុខគេបាន ។

តាមទិន្នន័យរបស់ក្រសួងពាណិជ្ជកម្មអន្តរជាតិ និងឧស្សាហកម្មបង្ហាញថា ក្រុមហ៊ុន Tesla ចាំបាច់ត្រូវតែបង្កើតស្ថានីយសាកថ្មរថយន្ត Supercharger សរុបចំនួន៥០កន្លែងឱ្យរួចរាល់ក្នុងរយៈពេល៣ឆ្នាំ ហើយ៣០% របស់ស្ថានីយសាកថ្មទាំងនេះ ត្រូវអនុញ្ញាតឱ្យយីហោផ្សេងប្រើប្រាស់ផងដែរ ។ ហេតុនេះ វាជាការអនុម័តមួយដែលនឹងអនុញ្ញាតឱ្យក្រុមហ៊ុន Tesla អាចបង្កើតស្ថានីយសាកថ្មរថយន្តនៅក្នុងប្រទេសបាន ។

កាលពីដើមឆ្នាំ២០២៣ គេសង្កេតឃើញថា ម៉ាឡេស៊ីមានស្ថានីយសាកថ្មរថយន្តសរុបចំនួន៩០០កន្លែង ហើយគេសង្ឃឹមថា ប្រទេសនេះនឹងមានស្ថានីយសាកថ្មរហូតដល់៤.០០០កន្លែងនៅចុងឆ្នាំ២០២៣ ៕ ប្រភព ៖ AEC connect