ទីបំផុតការប្រតិកម្មពីមហាជនទៅលើតារាកំប្លែងនិងជាYoutuber ល្បីឈ្មោះលោក Nigel Ng ហៅ Uncle Roger ដែលបាននិយាយប៉ះពាល់មកលើម្ហូបខ្មែរនាំឱ្យជនបរទេសយល់ខុសមកលើម្ហូបអាហារកម្ពុជាមានប្រសិទ្ធភាពហើយ ខណៈក្រសួងទេសចរណ៍បានចេញសេចក្តីថ្លែងការណ៍ឱ្យបុគ្គលរូបនេះចេញមកសូមទោសប្រជាជនកម្ពុជានិងកែតម្រូវ វីដេអូដែលបានចុះផ្សាយនោះឡើងវិញជាបន្ទាន់នៅលើបណ្តាញសង្គមរបស់ខ្លួន។ ក្រសួងបានបញ្ជាក់ថាការវាយតម្លៃរបស់បុគ្គលរូបនេះប្រាសចាកទាំងស្រុងពីតថភាពនៃកិត្យានុភាព និងអត្តសញ្ញាណ ម្ហូបអាហារខ្មែរ។

សេចក្តីថ្លែងការណ៍នៅថ្ងៃទី៧ ខែសីហា របស់ក្រសួងទេសចរណ៍បានឱ្យដឹងថា «សូមជម្រាបជូនភ្ញៀវទេសចរជាតិ និងអន្តរជាតិ ផ្នែកឯកជនក្នុងឧស្សាហកម្មទេសចរណ៍ និងសាធារណជនទូទៅមេត្តាជ្រាបថាក្រសួងទេសចរណ៍មានការសោកស្តាយជាយ៉ាងខ្លាំងក្រោយពីបានឃើញ វីដេអូដែលវាយតម្លៃមិនល្អមកលើម្ហូបអាហារខ្មែរ នៅលើបណ្ដាញសង្គម Channel YouTube ឈ្មោះថា Nigel Ng (ណៃជែល អ៊ឹង )ចុះផ្សាយកាលពីថ្ងៃទី៣០ ខែកក្កដា ឆ្នាំ២០២៣ មានចំណងជើងថា “Uncle Roger Make Adobo”។

ការវាយតម្លៃរបស់បុគ្គលខាងលើនេះ បានប្រាសចាកទាំងស្រុងពីតថភាពនៃកិត្យានុភាព និងអត្តសញ្ញាណ ម្ហូបអាហារខ្មែរ ជាពិសេសបានធ្វើឱ្យប៉ះពាល់យ៉ាងខ្លាំងដល់ទេសចរណ៍ម្ហូបអាហារ ដែលរាជរដ្ឋាភិបាលកម្ពុជា ក៏ដូចជា ក្រសួងទេសចរណ៍ បានខិតខំជំរុញការផ្សព្វផ្សាយនៅលើឆាកអន្តរជាតិឱ្យពិភពលោកទាំងមូលបានស្គាល់ យ៉ាងទូលំទូលាយថា “កម្ពុជាមានវប្បធម៌ដ៏ល្អផូរផង់ និងមានម្ហូបអាហារដ៏សម្បូរបែប”។ ជាក់ស្ដែង កាលពីឆ្នាំ២០២២ សៀវភៅម្ហូបអាហារខ្មែរ រ “The Taste of Angkor” ដែលចងក្រងដោយក្រសួងការបរទេស និងសហប្រតិបត្តិការអន្តរជាតិកម្ពុជា បានជាប់ចំណាត់ថ្នាក់ The Best Asian Cookbook Prize នៅក្នុងកម្មវិធី The Gourmand World Cookbook Awards 2021 នៅទីក្រុងប៉ារីស។

ក្នុងន័យនេះ ក្រសួងទេសចរណ៍ កំពុងសហការជាមួយភាគីពាក់ព័ន្ធយ៉ាងជិតស្និទ្ឋ និងស្នើឱ្យបុគ្គល Nigel Ng ឬ Uncle Roger កើតថ្ងៃទី១៥ ខែមីនា ឆ្នាំ១៩៩១ ធ្វើការសុំទោសជាសាធារណៈចំពោះប្រជាជនកម្ពុជា និងកែតម្រូវ វីដេអូដែលបានចុះផ្សាយនោះឡើងវិញជាបន្ទាន់នៅលើបណ្តាញសង្គមរបស់ខ្លួន។

ជាមួយគ្នានេះដែរ ក្រសួងទេសចរណ៍ បានថ្លែងអំណរគុណចំពោះការចូលរួមផ្ដល់យោបល់កែលម្អរបស់សាធារណជន ដើម្បីលើកស្ទួយវិស័យទេសចរណ៍ជាតិ ក៏ដូចជាគាំទ្រ និងស្វាគមន៍ជានិច្ចចំពោះអ្នកលេងបណ្តាញសង្គម ឬ អ្នកមានឥទ្ឋិពលក្នុងបណ្ដាញសង្គម (Influencer) ដែលមានបំណងចូលរួមផ្សព្វផ្សាយអំពីអច្ឆរិយភាពនៃវប្បធម៌ ធម្មជាតិ និងភាពសម្បូរបែបនៃម្ហូបអាហារកម្ពុជា ដល់ទេសចរជាតិ-អន្តរជាតិជុំវិញពិភពលោក៕

កុមារី ជូរី ល្អហួស បានក្លាយជាម្ចាស់មកុដបវរកញ្ញាវ័យក្មេង Miss Preteen Cambodia ២០២៣ ដែលមានការពេញចិត្តយ៉ាងភ្លូកទឹកភ្លូកដីពីមហាជនចំពោះលទ្ធផលនេះ ខណៈ ល្អហួស បានជ្រើសប្រធានបទយ៉ាងចាក់ដោតពីការបៀតបៀននិងរំលោភកេរ្តិ៍ភេទលើកុមារ ដែលជំរុញឱ្យកុមារីអាយុ១៤ឆ្នាំរូបនេះគ្រងមកុដ ហើយនឹងតំណាងប្រទេសកម្ពុជាចូលរួមប្រកួតលើឆាកអន្តរជាតិ។

នៅយប់ថ្ងៃទី៥ សីហា កម្មវិធីប្រកួតប្រជែង Miss Preteen Cambodia ២០២៣ បានរកឃើញម្ចាស់មកុដហើយគឺបានទៅលើ ជូរី ល្អហួស ខណៈលំដាប់រងទី១បានទៅលើ ហ្រេ្វតឌ្រីកសន អេរីកាស្កាយ និងលំដាប់រងទី២បានទៅលើ សាន សំរិទ្ធិកណ្ណិកា។

អ្វីដែលកាន់តែធ្វើឱ្យមហាជនពេញចិត្តពេញថ្លើមចំពោះ ល្អហួស ដែលស័ក្តិសមជាម្ចាស់មកុដឆ្នាំ២០២៣ ដោយសារតែកុមារីដ៏ស្រស់ស្អាតរូបនេះបានសម្រេចជ្រើសយកប្រធាន «ការបៀតបៀននិងរំលោ.ភកេរ្តិ៍ភេ.ទលើកុមារ»។ ល្អហួស បានលើកឡើងថា អំពើបៀតបៀននិងការរំលោភបំពានលើកុមារជាអំពើសាហាវ ឃោរឃៅបំផុត ការបៀតបៀនគឺជាការបន្លំបំបោសអង្អែលទៅលើកុមារ ចំណែកឯការរំលោភបំពានគឺជាការបង្ខំឱ្យកុមារទៅរួមដំណេកជាមួយ រាល់ទង្វើបៀតបៀននិងការរំលោ.ភបំពានឃើញកើតមានទៅលើឪពុករំលោភកូនស្រីខ្លួនឯង ឪពុកចុងរំលោភកូនដើម ពូរំលោភក្មួយ តារំលោភចៅ និងអ្នកជិតខាងរំលោភក្មេងស្រីប្រសិនបើជាមានឱកាស។

ល្អហួស បានលើកឡើងទៀតថា អំឡុងពេលខ្លួនទៅទស្សនៈកិច្ចអង្គការAfesipដែលមានជនរងគ្រោះជាកុមារបានរងនូវអំពើបៀតបៀន។ អ្វីដែលធ្វើឱ្យ ល្អហួស មិនអាចទទួលយកបានគឺសូម្បីតែទារិកាអាយុ១៤ខែក៏រងគ្រោះអំពីការរំលោភបំពានដែរ ហើយទង្វើនេះជាស្រមោលដ៏អាក្រក់ដែលជនរងគ្រោះនៅតែដក់ជាប់នៅក្នុងអារម្មណ៍មានសម្ពាធទាំងផ្លូវកាយនិងផ្លូវចិត្ត។

មិនត្រឹមតែប៉ុណ្ណោះ ល្អហួស ក៏បានពាំនាំសម្តីក្មេងស្រីម្នាក់នៅក្នុងមណ្ឌលទាំងសម្តីក្តុកក្តួលថា សូមកុំឱ្យមជ្ឃដ្ឋានជុំវិញខ្លួនកុំមានការរើសអើងទៅលើគេអី ហើយក៏មិនចង់ឃើញឪពុករបស់ខ្លួនបំផ្លាញព្រហ្មចារីកូនខ្លួនឯងហើយជាប់ពន្ធនាគារនោះទេ ហើយគេពិតជាចង់បានគ្រួសារមួយដែលមានភាពកក់ក្តៅដូចជាគ្រួសារគេដទៃទៀត។

ការលើកយកប្រធានបទដ៏ចាក់ដោតនេះមកនិយាយក្នុងកម្មវិធី ល្អហួស ទទួលបានការកោតសរសើរយ៉ាងខ្លាំងពីសំណាក់មហាជន ខណៈគ្រាប់ពេជ្រថ្មីរូបនេះនឹងតំណាងប្រទេសកម្ពុជាចូលរួមប្រកួតនៅលើឆាកអន្តរជាតិនាពេលខាងមុខផងដែរ៕

ជនបរទេសដែលអាចសុំសញ្ជាតូបនីយកម្មបាន ត្រូវបំពេញលក្ខខណ្ឌ​ចំនួន ៦ចំណុច និងអនុវត្ត​តាម​ច្បាប់​ស្តីពី​អន្តោប្រវេសន៍ ចំពោះជនបរទេស​អន្តោប្រវេសន៍។ នេះ​បើ​យោង​​តាម​មាត្រា ១៩ នៃ​សេចក្តីព្រាង​ច្បាប់​​ស្ដីពី​សញ្ជាតិ ដែល​ត្រូវ​​បាន​​រដ្ឋសភាអនុម័ត ក្នុងអង្គប្រជុំរដ្ឋសភា កាលពីថ្ងៃ៣១ ឧសភា ២០១៩។

មាត្រា​នោះ បាន​ចែងថា៖ ជនបរទេសដែលអាចសុំសញ្ជាតូបនីយកម្មបាន ត្រូវបំពេញលក្ខខណ្ឌដូចតទៅ៖

១. មានគំនិត មារយាទ និងសីលធម៌ល្អ

២. ពុំដែលមានទោសពីបទឧក្រិដ្ឋ ឬបទមជ្ឈឹមណាមួយ

៣. មានទីលំនៅក្នុងព្រះរាជាណាចក្រកម្ពុជា ហើយស្នាក់នៅជាប់ចំនួន ៧ឆ្នាំ ដោយគិតពីថ្ងៃដែលបានទទួលប័ណ្ណស្នាក់នៅ ដែលចេញឲ្យក្នុងក្របខណ្ឌនៃច្បាប់ស្តីពីអន្តោប្រវេសន៍ ចំពោះជនបរទេសអន្តោប្រវេសន៍

៤. មានទីលំនៅក្នុងព្រះរាជាណាចក្រកម្ពុជា និងមានប័ណ្ណស្នាក់នៅដែលចេញឲ្យក្នុងក្របខណ្ឌនៃច្បាប់ស្តីពីអន្តោប្រវេសន៍ ចំពោះជនបរទេស ដែលបានកំណត់នៅក្នុងមាត្រា២១ និងមាត្រា២២ នៃច្បាប់នេះ

៥. ចេះនិយាយភាសាខ្មែរ ចេះអក្សរខ្មែរ និងយល់ដឹងប្រវត្តិសាស្ត្រខ្មែរខ្លះៗ ហើយបង្ហាញភស្តុតាងថា ខ្លួនអាចរស់នៅក្នុងសង្គមខ្មែរបានដោយសុខដុម ព្រមទាំងទទួលបាននូវទំំនៀមទម្លាប់ និងប្រពៃណីល្អរបស់ខ្មែរ

៦. មានបញ្ញា និងកាយសម្បទាដែលមិននាំឲ្យមានគ្រោះថ្នាក់ ឬនាំឲ្យមានបន្ទុកដល់ជាតិ

សូម​បញ្ជាក់ថា “សេចក្តី​ព្រាង​ច្បាប់​ស្តីពី​សញ្ជាតិ” មាន ១០​ជំពូក ចែកចេញ​ជា ៣៨​មាត្រា។ សេចក្តី​ព្រាងច្បាប់​នេះ មាន​គោលបំណង​ធានា​ការ​អនុវត្ត​ដែន​យុត្តាធិការ​របស់​ព្រះ​រាជាណាចក្រ​កម្ពុជា ទៅលើ​រូបវន្ត​បុគ្គល ដើម្បី​កំណត់​នូវ​សិទ្ធិ​ទទួល​បាន និង​សិទ្ធិ​លះបង់​សញ្ជាតិ​ខ្មែរ ចំពោះ​ជន​ដែល​រស់នៅ​លើ​ទឹកដី​នៃ​ព្រះ​រាជាណាចក្រ​កម្ពុជា ឬនៅ​បរទេស និង​ដែល​បាន​បំពេញ​តាម​លក្ខខណ្ឌ​នៃ​ច្បាប់នេះ៕

ប្រភព៖ COJ.GOV

ការជ្រើសរើសថ្ងៃកាត់សក់គឺមានសារសំខាន់ខ្លាំងណាស់ ដែលក្នុងមួយសប្ដាហ៍មាន៧ថ្ងៃ ថ្ងៃណាគួរកាត់សក់ និងថ្ងៃណាមិនគួរកាត់ ការកាត់សក់ចំថ្ងៃល្អអាចនាំឱ្យមានលាភសំណាង លើករាសី តែបើកាត់ចំថ្ងៃមិនល្អនឹងនាំទុក្ខ នេះបើយោងតាមក្បួនតម្រាចារអំពីថ្ងៃកាត់សក់របស់ចាស់ៗបុរាណ។ ដូច្នេះហើយខាងក្រោមនេះគឺជាថ្ងៃកាត់សក់ទាំង ៧ ដែលអ្នកគួរដឹង៖

១.កាត់សក់ចំថ្ងៃចន្ទ នឹងមានតែលាភសំណាង ។

២.កាត់សក់ចំថ្ងៃអង្គារ នឹងមានតេជះ ឫទ្ធិអំណាច មានគេខ្លបខ្លាច ។

៣.កាត់សក់ចំថ្ងៃពុធ មិនល្អទេ លាភសំណាងផ្សេងៗដែលបម្រុងហូរចូលនឹងរលាយបាត់ ហើយជំនួសមកវិញដោយសេចក្ដីទុក្ខ ។

៤.កាត់សក់ចំថ្ងៃព្រហស្បតិ៍ នឹងមានទេវតា ព្រមទាំងវត្ថុស័ក្ដិសិទ្ធិតាមជួយថែរក្សា ។

៥.កាត់សក់ចំថ្ងៃសុក្រ នឹងមានមន្តស្នេហ៍ដែលជាទីស្រឡាញ់នៃមនុស្សទាំងពួង។

៦.កាត់សក់ចំថ្ងៃសៅរ៍ ប្រពៃបំផុត គិតអ្វីៗ ឬធ្វើកិច្ចការងារអ្វីនឹងបានសម្រេចតាមបំណងប្រថ្នា នឹងមានសិរីមង្គល មានសំណាងល្អ ។

៧.កាត់សក់ចំថ្ងៃអាទិត្យ នឹងមានអាយុយឺនយូរ សុខភាពមាំមួន ប្រាសចាករោគាព្យាធិទាំងឡាយ ៕

ជឿជាក់ថាសម្រាប់អ្នកប្រើបណ្តាញសង្គមជ្រាបមកហើយករណី រ៉ូស ត្រូវគេធ្វើបាបក្រោយពីបានប្រើពាក្យសម្តីទៅលើម្ខាងទៀត។ ទោះយ៉ាងណា ការប្រើអំពើហិង្សាទៅលើ រ៉ូស ត្រូវបានលោកជំទាវឧកញ៉ា នឹម វណ្ណៈ ជួយឈឺឆ្អាលបន្តនីតិវិធីតាមផ្លូវច្បាប់ ខណៈរឿងនេះបានបញ្ជូនទៅតុលាការហើយ។

នៅយប់ថ្ងៃទី៦ ខែសីហា តាមរយៈបណ្តាញសង្គមរបស់លោកជំទាវឧកញ៉ា នឹម វណ្ណៈ បានឱ្យដឹងថាករណីពាក្យបណ្តឹងរបស់រ៉ូសដែលត្រូវរងនូវអំពើហិង្សាបានបញ្ជូនទៅតុលាការហើយ។ លោកជំទាវ បញ្ជាក់យ៉ាងដូច្នេះថា «សំនុំរឿងដែលបានបញ្ជូនទៅដល់តុលាការហើយ មិនមាននរណាម្នាក់មានសិទ្ធអាចសម្រេចក្រៅពីលោកចៅក្រមនោះទេ។ យើងអាណិតភាគីម្ខាងៗជាសិទ្ធបុគ្គល តែប្រទេសមានច្បាប់ហើយមានដែនសមត្ថកិច្ចរៀងៗខ្លួន»។

ទោះយ៉ាងណា ក្រោយពីបញ្ជាក់ថាសំណុំរឿងរបស់ រ៉ូស បានបញ្ជូនទៅតុលាការនេះ មានគណនីហ្វេកប៊ុកមួយបានសរសេរទៅលោកជំទាវឧកញ៉ា នឹម វណ្ណ ថា «រឿងមានប្រយោជន៍ជាច្រើនបើអ្នកធំៗបែបនេះលូកដៃមិនដឹងល្អយ៉ាងណា : ឧទាហរណ៍ : ស្រូវមានតម្លៃទាប, ជ្រូកគ្មានតម្លៃល្អជារៀងរាល់ឆ្នាំនៅលើទីផ្សារ ហើយសមិទ្ធផលផ្សេងៗទៀតដែលជួយសង្គមមានច្រើនណាស់ មិចមិនជួយ មិចមិនបង្ហាញការបារម្ភផង។ល។ មិនមានជួយឈឺ ជួយដឹងឮរឿងចឹងៗហេ ចូលចិត្តណាស់រឿងបុគ្គល ម៉ាអារឿងមានទៅមានមកបែបហ្នឹង ហើយក៏មិនបានចំណេញអ្វីសោះសម្រាប់សង្គមពេលនេះ ឃើញតែរហេមរហាមទឹកភ្នែកឱ្យគេអាណិត តែអ្នកគួរអាណិតពិត មិនបង្ហាញការគិតគូរសោះ លោកៗជំទាវនិងឧកញ៉ា ហិង្សានរណាក៏មិនគាំទ្រ តែបើមាត់អ្នកមិនល្អគ្មាននរណាទៅទះមាត់អ្នកទេ»។

ការប្រើនូវពាក្យសម្តីរបស់បុគ្គលខាងលើនេះឈានចូលថ្ងៃទី៧ ខែសីហា លោកជំទាវឧកញ៉ា នឹម វណ្ណៈ បានឆ្លើយតប «ជូនចំពោះ Virak Seap អូនគិតថាការជួយមនុស្សជាការចំណាយពេលអត់ប្រយោជន៍មែនទេ??ចឹងមានន័យថាអូនមើលងាយសមត្ថកិច្ចនិងស្ថាប័នតុលាការទាំងមូល និងបានមើលងាយដល់គោរម្យងារដែលព្រះមហាក្សត្របានតាំងតែងអោយបងផងដែរ។ កិច្ចការសង្គមបងបានចូលរួមក៏មិនតិចជាងអូន ហើយបញ្ហាសង្គមមានរាជរដ្ឋាភិបាលក៏ដូចជាបងប្អូនគ្រប់លំដាក់ថ្នាក់បានចូលរួមគ្នាកសាងនិងដោះស្រាយបញ្ហានានា»។

លោកជំទាវ បន្តថា «ខ្ញុំមិនបានអង្គុយចុចទូរស័ព្ទត្រឹមចេះតែសរសេរហើយគ្មានសកម្មភាពក្នុងការជួយសង្គមនោះឡើយ។ ស្វាគមន៍ការចូលរួមដោះបញ្ហាដែលប្អូនលើកឡើងខាងលើ ក៏សង្សឹមថាអូនអាចចូលរួមច្រើនជាងនេះ ក្នុងកិច្ចការសង្គម ចៀសជាងការងារដែលត្រឹមតែចេះទិតៀនជាន់ពន្លិច ។ ការប្រព្រឹត្តអំពើហិង្សានិង គាំទ្របុគ្គលប្រើប្រាស់អំពើហិង្សានានា បងមិនគាំទ្រនោះឡើយ។ សូមអរគុណនៅការស៊ែរនិងខមមិន»៕