ប្រទេសថៃ ៖ នៅថ្ងៃទី១៥ ខែកញ្ញា ឆ្នាំ២០២៣ ការិយាល័យឧតុនិយមថៃបានជូនដំណឹងថា នឹងមានភ្លៀងធ្លាក់ជាបន្តបន្ទាប់ដោយសារឥទ្ធិពលខ្យល់មូសុង ដែលបានបោកបក់ខ្លាំងនៅខេត្តចំនួន៥៧ ស្ថិតក្នុងតំបន់ភាគខាងជើង, តំបន់កណ្តាល និងតំបន់ឦសានប្រទេសថៃ ។ លើសពីនេះ មានខ្យល់មូសុងនិរតីកម្រិតមធ្យមបានបក់មកលើសមុទ្រ Andaman ប្រទេសថៃ និងឈូងសមុទ្រថៃផងដែរ ។ ដូច្នេះ វានឹងធ្វើឱ្យប្រទេសថៃមានភ្លៀងធ្លាក់ខ្លាំងក្នុងតំបន់មួយចំនួននៅភាគខាងជើង, ភាគឦសាន និងភាគខាងកើត ។

ការិយាល័យឧតុនិយមថៃបានសំណូមពរឱ្យពលរដ្ឋរស់នៅតំបន់ទាំងនេះប្រុងប្រយ័ត្នខ្លួន និងចៀសផុតគ្រោះថ្នាក់ដោយសារភ្លៀងធ្លាក់ខ្លាំងជាបន្តបន្ទាប់ ព្រោះវាអាចបណ្តាលឱ្យមានទឹកជំនន់ភ្លាមៗ និងមានទឹកហូរពីតំបន់ព្រៃភ្នំ ។ លើសពីនេះ ពលរដ្ឋក៏ត្រូវបង្កើនការប្រុងប្រយ័ត្នពេលធ្វើដំណើរកាត់តាមតំបន់មានផ្គររន្ទះក្នុងអំឡុងពេលនេះផងដែរ ។

ចំណែកនៅសមុទ្រ Andaman និងឈូងសមុទ្រថៃផ្នែកខាងលើមានទឹករលកកម្ពស់១ម៉ែត្រ ទៅ២ម៉ែត្រ ខណៈបរិវេណដែលមានខ្យល់ព្យុះ និងផ្គររន្ទះ ទឹករលកមានកម្ពស់ជាង២ម៉ែត្រ ។ ហេតុនេះ សូមឱ្យប្រជានេសាទនៅបរិវេណខាងលើធ្វើការនេសាទដោយប្រុងប្រយ័ត្ន និងចៀសវាងចេញនេសាទនៅបរិវេណមានខ្យល់ព្យុះ និងផ្គររន្ទះ ។

នៅទីក្រុងបាងកក និងតំបន់ជុំវិញ នឹងមានផ្គររន្ទះ៨០% ព្រមទាំងមានភ្លៀងធ្លាក់ខ្លាំងក្នុងតំបន់ខ្លះ ។ រីឯសីតុណ្ហភាពទាបបំផុត គឺចាប់ពី២៥អង្សារសេ ទៅ២៦អង្សារសេ ហើយសីតុណ្ហភាពខ្ពស់បំផុត ចាប់ពី៣១អង្សារសេ ទៅ៣៤អង្សារសេ ព្រមទាំងមានខ្យល់បក់ពីទិសនិរតី ក្នុងល្បឿន១០-២៥គីឡូម៉ែត្រក្នុង១ម៉ោង ៕ ប្រភព ៖ Nation Online

រាជធានីបាងកក៖ វិស័យទេសចរណ៍ នៅក្នុងប្រទេសថៃ បានជួយរកប្រាក់ចំណូល សម្រាប់កំណើតសេដ្ឋកិច្ច ចំនួន១៨,៤ភាគរយ ឬ ស្មើនឹងប្រហែលជិត១ភាគប្រាំ នៃផលិតផលក្នុងស្រុកសរុបរបស់ប្រទេសថៃ ហើយបច្ចុប្បន្ន រដ្ឋាភិបាលថ្មីរបស់ប្រទេសអាស៊ានមួយនេះ កំពុងតែដាក់ចេញផែនការដ៏សំខាន់ តាមរយៈការលើកលែងទិដ្ឋាការ ដល់ប្រជាជនចិន នៅក្នុងគោលបំណងទាក់ទាញ និង កើបលុយពីអ្នកទេសចរ មកពីប្រទេសមហាយក្សអាស៊ីមួយនេះ។

សារព័ត៌មានរបស់ថៃ Bangkok Post បានចេញផ្សាយ កាលពីថ្ងៃព្រហស្បតិ៍ ទី១៤ ខែកញ្ញា ថា បើតាមទីភ្នាក់ងារទេសចរណ៍ជាច្រើន បានឲ្យដឹង ថា ក្រុមហ៊ុនរកស៊ីលើវិស័យទេសចរណ៍ នៅខេត្តភូកេត មានក្តីសង្ឃឹមខ្ពស់ ចំពោះអ្នកទេសចរជនជាតិកាហ្សាក់ស្ថាន ត្រូវបានកំណត់ ថា នឹងមកដល់ តាមផែនការលើកលែងទិដ្ឋាការ ចាប់ពីថ្ងៃទី២៥ ខែកញ្ញា ឆ្នាំ២០២៣ រហូតដល់ថ្ងៃទី២៩ ខែកុម្ភៈ ឆ្នាំ២០២៤ ដោយសារតែទីផ្សារទេសចរណ៍មួយនេះ មានសក្តានុពលខ្ពស់។

អាជ្ញាធរទេសចរណ៍ថៃ ហៅកាត់ TAT បានបញ្ជាក់ ថា សមត្ថភាពកៅអី សម្រាប់ជើងហោះហើរមកពីចិន នៅក្នុងត្រីមាសចុងក្រោយ គឺមានប្រហែល ៤00 000 កៅអី ដោយមានចំនួនទាបជាង៥០ភាគរយ បើធៀបនឹងរយៈពេលដូចគ្នា នៅក្នុងឆ្នាំ២០១៩។

លោក ស៊ីសឌីវ៉ាច ឈីវ៉ារ៉ាតថាណាផន (Sisdivachr Cheewarattanaporn) ប្រធានសមាគមភ្នាក់ងារទេសចរណ៍ថៃ បានបញ្ជាក់ ថា វានឹងពិបាកបង្កើន ចំនួនការមកដល់របស់ជនជាតិចិន ប្រចាំខែ រហូតដល់ ៧00 000នាក់ ដើម្បីឈានដល់គោលដៅកំណត់របស់រដ្ឋាភិបាល ចំនួន៥លាននាក់ សម្រាប់ឆ្នាំនេះ ខណៈអ្នកទេសចរ ត្រូវតែបង្កើនទ្វេដង ចាប់ពី ៣៥0 000 នៅក្នុងរយៈពេលមួយខែ ចាប់ពីឥឡូវនេះទៅ។ អ្នកទេសចរចិន បានមកដល់ប្រទេសថៃ ប្រហែល ២,២៨លាននាក់ ត្រូវបានកត់ត្រា ចន្លោះពីថ្ងៃទី១ ខែមករា ដល់ថ្ងៃទី១០ ខែកញ្ញា ឆ្នាំ២០២៣។ រីឯគោលនយោបាយលើកលែងទិដ្ឋាការនេះ នឹងជំរុញឱ្យទីផ្សារទេសចរណ៍ កើនឡើង រហូតដល់៥០ភាគរយ»។

មន្រ្ដីមួយរូបរបស់អាជ្ញាធរទេសចរណ៍ថៃ ហៅកាត់ TAT ដោយសុំលក្ខខណ្ឌមិនអត្ដសញ្ញាណ បានអះអាង ថា គោលការណ៍គ្មានទិដ្ឋាការ នឹងមានផលប៉ះពាល់តិចតួច ប្រសិនបើចំនួនកៅអីរបស់ក្រុមហ៊ុនអាកាសចរណ៍ មិនពង្រីក ចាប់ពី ៤00 000 កៅអី ឡើងទៅ នៅក្នុងត្រីមាសចុងក្រោយ។ ទន្ទឹមគ្នាននេះ អាជ្ញាធរទេសចរណ៍ថៃ កំពុងតែធ្វើការជាមួយគ្រប់ក្រុមហ៊ុនអាកាសចរណ៍ ដើម្បីបង្កើននូវជើងហោះហើរ កាន់តែច្រើនទៅកាន់ប្រទេសចិន ហើយជំរុញកត្តាផ្ទុករហូតដល់ចន្លោះពី៨០ទៅ៨៥ភាគរយ នៅក្នុងត្រីមាសទី៤ ដោយកើនឡើងចំនួន៤០ភាគរយ ចាប់ពីបច្ចុប្បន្ននេះឡើងទៅ។

លោក ស៊ីរីផាកន ជាវសាមូត (Siripakorn Cheawsamoot) អនុប្រធានអាជ្ញាធរទេសចរណ៍ថៃ បានបញ្ជាក់ ថា ទីផ្សារទេសចណ៍ដ៏មានសក្ដានុពល គឺភ្ញៀវទេសចរម្នាក់ៗ អាចចំណាយ ចំនួន៤ ៣៦៥បាតរបស់ថៃ ឬស្មើនឹងប្រហែល១២២ដុល្លារអាមេរិក នៅក្នុង១ថ្ងៃ។ បើគិតជាមធ្យម គឺភៀវទេសចរ អាចនឹងដើរលេងកម្សាន្ដ ឬ ស្នាក់នោះ រហូតដល់១៤ថ្ងៃ។

បើតាមគេហទំព័រ Thaiwebsite បានឲ្យដឹង ថា នៅក្នុងឆ្នាំ២០២៣នេះ ថៃរំពឹង ថា នឹងទទួលបានអ្នកទេសចរ រហូតដល់២៥លាននាក់។ ចំនួនអ្នកទេសចរ មកទស្សនា នៅក្នុងប្រទេសថៃ បានកើតឡើង ពី៣៥,៣៥លាននាក់ នៅក្នុងឆ្នាំ២០១៧ ដល់ ៣៨,២៨លាននាក់ នៅក្នុងឆ្នាំ២០១៨ ហើយបន្ទាប់មក កើនដល់៣៩,៩២លាននាក់ នៅក្នុងឆ្នាំ២០១៩ នៅមុនពេលផ្ទុះវិបត្ដិជំងឺរាតត្បាតកូវីដ។

ក្រុមប្រឹក្សាជាតិអភិវឌ្ឍន៍សេដ្ឋកិច្ច និងសង្គម (NESDC) បានថ្លែង ថា វិស័យទេសចរណ៍ បានដើរតួនាទីយ៉ាងសំខាន់ សម្រាប់ការអភិវឌ្ឍប្រទេសថៃ។ វិស័យទេសចរណ៍ ជួយបង្កើនប្រាក់ចំណូលបាន ចំនួន១៨,៤ភាគរយ ឬស្មើនឹងប្រហែលជិត១ភាគប្រាំ នៃផលិតផលក្នុងស្រុកសរុបរបស់ប្រទេសថៃ៕

ប្រទេសកូរ៉េខាងត្បូង ៖ លោក Kim Young-ho រដ្ឋមន្ត្រីក្រសួងបង្រួបបង្រួមជាតិកូរ៉េខាងត្បូង និងទទួលខុសត្រូវផ្នែកទំនាក់ទំនងជាមួយកូរ៉េខាងជើង បានធ្វើសន្និសីទសារព័ត៌មានមួយកាលពីថ្ងៃទី១៤ ខែកញ្ញា ឆ្នាំ២០២៣ ថា រដ្ឋាភិបាលកូរ៉េខាងត្បូងព្រួយបារម្ភអំពីកិច្ចសហការយោធារវាងកូរ៉េខាងជើង និងរុស្ស៊ី ។

លោក Kim Young-ho រដ្ឋមន្ត្រីក្រសួងបង្រួបបង្រួមជាតិកូរ៉េខាងត្បូង លើកឡើងថា បើទោះជាលោកមិនទាន់ទទួលបានព័ត៌មានលម្អិតពាក់ព័ន្ធនឹងកិច្ចប្រជុំរវាងមេដឹកនាំកូរ៉េខាងជើង និងរុស្ស៊ី កាលពីថ្ងៃទី១៣ ខែកញ្ញា ប៉ុន្តែយើងត្រូវព្រមទទួលស្គាល់ថា វាគួរឱ្យបារម្ភយ៉ាងខ្លាំងអំពីកិច្ចសហការផ្នែកយោធា និងកិច្ចព្រមព្រៀងទិញ-លក់អាវុធរវាងប្រទេសទាំងពីរ ។

ជាមួយគ្នានេះ លោក Kim Young-ho បានអំពាវនាវជាថ្មីឱ្យប្រទេសរុស្ស៊ី និងកូរ៉េខាងជើង បញ្ឈប់រាល់សកម្មភាពខុសច្បាប់ដែលអាចនាំទៅរកភាពឯកោ និងការធ្លាក់ចុះរបស់ភាគីទាំងសងខាង ។ លើសពីនេះ ប្រទេសទាំងពីរត្រូវគោរពតាមបទប្បញ្ញត្តិអន្តរជាតិ ដូចជា សេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ។

សេចក្តីថ្លែងការណ៍របស់លោករដ្ឋមន្ត្រីក្រសួងបង្រួបបង្រួមជាតិកូរ៉េខាងត្បូង កើតឡើងក្រោយពី លោក គឹម ជុងអ៊ុន មេដឹកនាំកូរ៉េខាងជើង និងប្រធានាធិបតីរុស្ស៊ី លោក វ្ល៉ាឌីមៀ ពូទីន បានជួបគ្នានៅទីក្រុងភាគខាងកើតប្រទេសរុស្ស៊ី កាលពីថ្ងៃទី១៣ ខែកញ្ញា កន្លងមក ។ មេដឹកនាំទាំងពីររូបបានពិភាក្សាគ្នាអំពីបញ្ហាយោធា, បញ្ហាសង្គ្រាមរវាងរុស្ស៊ី និងអ៊ុយក្រែន និងភាពអាចទៅរួចដែលរុស្ស៊ីនឹងផ្តល់ជំនួយក្នុងគម្រោងផ្កាយរណបរបស់កូរ៉េខាងជើង ៕ ប្រភព ៖ TNN World

បរទេស៖ យោងតាមអង្គការអឌ្ឍចន្ទក្រហមរបស់ប្រទេសលីប៊ីបាននិយាយកាលពីថ្ងៃទី ១៤ ខែកញ្ញាថាមនុស្ស ១១,៣០០ នាក់ត្រូវបានស្លាប់នៅក្នុងគ្រោះមហន្តរាយនេះដែលក្នុងនោះសាកសពជិត ២,០០០ ត្រូវបានជន់លិចទៅសមុទ្រដោយទឹកជំនន់។ មន្ត្រីទីក្រុង Derna ជឿថា ចំនួនអ្នកស្លាប់អាចនឹងបន្តកើនឡើងរហូតដល់ ២០,០០០នាក់។

បច្ចុប្បន្ន ទឹកជំនន់ដោយសារឥទ្ធិពលនៃព្យុះ Daniel មានកម្ពស់រហូតដល់ ៧ម៉ែត្រ ហើយបានបោកបក់កាត់ទីក្រុងមាត់សមុទ្រប្រទេសលីប៊ី បណ្តាលឱ្យខូចខាតយ៉ាងធ្ងន់ធ្ងររហូតត្រូវចំណាយពេលជាច្រើនឆ្នាំដើម្បីសង្គ្រោះ។ លោក Yann Fridez ប្រធានគណៈប្រតិភូនៃគណៈកម្មាធិការអន្តរជាតិនៃកាកបាទក្រហម (ICRC) នៅក្នុងប្រទេសលីប៊ី បាននិយាយថា “គ្រោះមហន្តរាយនេះគឺគួរឱ្យភ័យខ្លាចបំផុត មនុស្សជាច្រើននៅតែបាត់ខ្លួន សាកសពជាច្រើនបានបោកបក់លើច្រាំង ហើយផ្ទះត្រូវបានបំផ្លាញ” ។

នាយករដ្ឋមន្ត្រី Abdul Hamid Dbeibah នៃរដ្ឋាភិបាលក្នុងរដ្ឋធានី Tripoli បានធ្វើការអំពាវនាវឱ្យមានការស៊ើបអង្កេតជាបន្ទាន់លើការបាក់ទំនប់ ក្នុងកិច្ចប្រជុំគណៈរដ្ឋមន្ត្រីកាលពីថ្ងៃទី ១៤ ខែកញ្ញា។ ក្រុមជួយសង្គ្រោះមកពីប្រទេសអេហ្ស៊ីប អ៊ីតាលី ទុយនីស៊ី អារ៉ាប់រួម ទួរគី និងកាតា បានទៅដល់ប្រទេសលីប៊ីហើយ។ ដោយប្រទេសទួរគីបានបញ្ជូនកប៉ាល់ដឹកឧបករណ៍ ដើម្បីបង្កើតមន្ទីរពេទ្យវាលចំនួនពីរ រីឯប្រទេសអ៊ីតាលីវិញបានបញ្ជូនយន្តហោះចំនួនបីគ្រឿងសម្រាប់ការផ្គត់ផ្គង់ និងនាវាកងទ័ពជើងទឹកពីរគ្រឿង។ ទោះជាយ៉ាងណាក៏ដោយ កប៉ាល់មានការពិបាកក្នុងការផ្ទុកទំនិញរបស់ពួកគេ ដោយសារតែកំពង់ផែ Derna ស្ទើរតែមិនអាចប្រើប្រាស់បាន។ អង្គការសុខភាពពិភពលោក (WHO) បាននិយាយថា ខ្លួននឹងបែងចែកថវិកាចំនួនពីរលានដុល្លារពីមូលនិធិសង្គ្រោះបន្ទាន់ ដើម្បីគាំទ្រជនរងគ្រោះ ដោយហៅទឹកជំនន់លីប៊ីថាជា “គ្រោះមហន្តរាយទ្រង់ទ្រាយធំ”៕
ប្រភព៖vnexpress

ការធ្វើជាប្រធានាធិបតី នៃប្រទេសមហាអំណាចមួយនៅលើពិភពលោក ចាំបាច់ណាស់ត្រូវតែមានកងការពារ២៤ម៉ោង ដើម្បីធានាសុត្ថិភាពដល់ប្រធានាធិបតី។

នៅក្នុងប្រវត្តិសាស្រ្តអាមេរិក មានប្រធានាធិបតី៤នាក់ ក្នុងចំណោមប្រធានាធិបតីទាំង៤៦រូប ត្រូវបានគេធ្វើឃាតបានសម្រេច ក្នុងនោះរួមមាន៖

• ប្រធានាធិបតីទី១៦ លោក Abraham Lincoln ត្រូវបានធ្វើឃាតនៅឆ្នាំ១៨៦៥ ដោយអ្នកគាំទ្ររដ្ឋាភិបាលសហរដ្ឋអាមេរិកភាគខាងត្បូងម្នាក់ នៅឯរោងល្ខោនបន្ទាប់ពីសហរដ្ឋអាមេរិកភាគខាងត្បូងចុះចាញ់សង្រ្គាម។
• ប្រធានាធិបតីអាមេរិកទី២០ លោក James A. Garfield ត្រូវបានឃាតករ បាញ់ចំនួន២គ្រាប់ ចំដៃនិងខ្នង ពេលដើរចូលក្នុងស្ថានីយរថភ្លើង នៅឆ្នាំ ១៨៨១។• ប្រធានាធិបតីទី២៥ លោក William McKinley ត្រូវបានគេបាញ់ចំពោះចំនួន២គ្រាប់នៅឆ្នាំ១៩០១ ពេលចូលរួមក្នុងពិធីតាំងពិព័រណ៍ បន្ទាប់មកក៏បានបាត់បង់ជីវិត ក្រោយសម្រាកនៅមន្ទីពេទ្យ៨ថ្ងៃ។• ប្រធានាធិបតីអាមេរិកទី៣៥ លោក John F. Kennedy ត្រូវបានគេធ្វើឃាតនៅឆ្នាំ១៩៦៣ ដោយខ្មាន់កាំភ្លើងបានបាញ់ចំនួន៣គ្រាប់ ចេញពីបង្អួចអគារមួយ ចំក្បាលលោកចំនួន២គ្រាប់ បណ្តាលឱ្យលោកស្លាប់នៅកន្លែងកើតហេតុ។បច្ចុប្បន្ននេះ ប្រធានាធិបតីសហរដ្ឋអាមេរិកគឺលោក Joe Biden ដែលជាប្រធានាធិបតីលើកទី៤៦៕

ប្រភព៖ FOX News

បរទេស៖ យន្តហោះ S-៥១២ supersonic របស់សហរដ្ឋអាមេរិក មានចម្ងាយប្រតិបត្តិការប្រហែល ១,៨០០ គីឡូម៉ែត្រក្នុងមួយម៉ោង ដែលអាចផ្ទុកអ្នកដំណើរពី ១២ ទៅ ១៨ នាក់។ ក្រុមហ៊ុនអាកាសចរណ៍អាមេរិក Spike Aerospace បានប្រកាសថា ខ្លួននឹងចាប់ផ្តើមទទួលយកការកក់ទុកសម្រាប់ម៉ូដែលយន្តហោះ supersonic តម្លៃ ១០០ លានដុល្លាររបស់ខ្លួន នេះបើយោងតាមការចុះផ្សាយរបស់ Interesting Engineering កាលពីថ្ងៃទី ១២ ខែកញ្ញា ។

យន្តហោះ Supersonic របស់ក្រុមហ៊ុន Spike Aerospace មានឈ្មោះថា S-៥១២ ដែលផ្ទុកអ្នកដំណើរពី ១២ ទៅ ១៨ នាក់។ យានជំនិះនេះរួមបញ្ចូលគ្នានូវការធ្វើដំណើរក្នុងល្បឿនលឿនជាមួយនឹងភាពប្រណីត ដែលបង្ហាញថាវាគឺសម្រាប់អ្នកមានការប្រញាប់ដើម្បីទៅដល់គោលដៅរបស់ពួកគេ។ S-៥១២ ត្រូវបានគេរំពឹងថានឹងផ្លាស់ទីក្នុងល្បឿន Mach ១.៦ ដែលស្មើនឹង ១,៨០០ គីឡូម៉ែត្រក្នុងមួយម៉ោង។ ដូច្នេះ អ្នកដំណើរអាចហោះហើរបានយ៉ាងហោចណាស់ ៨០០ គីឡូម៉ែត្រក្នុងមួយម៉ោង លឿនជាងយន្តហោះស៊ីវិលបច្ចុប្បន្ន។

យោងតាមគេហទំព័ររបស់ក្រុមហ៊ុនអាកាសចរណ៍ បានឱ្យដឹងថា S-៥១២ មានការរចនាកាប៊ីនគ្មានបង្អួច រួមចំណែកដល់ការហោះហើរស្ងាត់ យន្តហោះនេះនឹងមិនបង្កើតសំឡេងរោទិ៍នៅពេលហោះហើរក្នុងល្បឿន supersonic នោះទេ ភាពស្ងប់ស្ងាត់ជួយឱ្យវាហោះហើរក្នុងល្បឿនលឿនសូម្បីតែនៅលើដី។ ជញ្ជាំងកាប៊ីនដើរតួនាទីជាអេក្រង់ដែលមានគុណភាពបង្ហាញខ្ពស់ ជួយឱ្យអ្នកដំណើរកម្សាន្តក្នុងអំឡុងពេលហោះហើរ។ គ្រប់គ្រងដោយឧបករណ៍ឆ្លាតវៃ ឬបន្ទះប៉ះនៅលើកៅអីនីមួយៗ ជញ្ជាំងកាប៊ីនអាចបញ្ជូនអេក្រង់ទូរស័ព្ទ ឬថេប្លេត ចាក់មាតិកាតាមតម្រូវការ ឬផ្តល់នូវទិដ្ឋភាព ៣៦០ ដឺក្រេពីខាងក្រៅ។

ជាមួយនឹង S-៥១២ ក្រុមហ៊ុន Spike Aerospace អះអាងថា អ្នកដំណើរអាចទៅដល់គោលដៅដែលពួកគេចង់បាន ជួបអតិថិជនកាន់តែច្រើន និងបំពេញប្រតិបត្តិការបានលឿនជាងមុន។ ការធ្វើដំណើរពីទីក្រុងឡុងដ៍ទៅទីក្រុងញូវយ៉កនឹងមានរយៈពេលមិនលើសពី ៤ ម៉ោងឡើយ ជាមួយនឹងចម្ងាយប្រហែល ១១,៥០០ គីឡូម៉ែត្រ ដូច្នេះអ្នកដំណើរអាចហោះហើរមិនឈប់ឈរពីទីក្រុងញូវយ៉កទៅកាន់ទីក្រុងឌូបៃយ៉ាងងាយស្រួល៕
ប្រភព៖vnexpress

វាមានរយៈពេល ៧ ឆ្នាំហើយចាប់តាំងពី BLACKPINK បង្ហាញខ្លួនជាលើកដំបូងជ្រកក្នុងទ្រនំ YG ខណៈមកទល់ពេលនេះការបន្តកុងត្រារបស់ពួកគេនៅតែបន្តភាពស្រពិចស្រពិលនៅឡើយ។ ប្រធានបទនេះមានអ្នកគាំទ្រ សាធារណជនទូទៅ និងអ្នកនៅក្នុងឧស្សាហកម្មកម្សាន្ត មានការចាប់អារម្មណ៍យ៉ាងខ្លាំងចំពោះរឿងនេះដោយសារតែការសម្រេចចិត្តណាមួយអាចមានផលប៉ះពាល់យ៉ាងសំខាន់សម្រាប់ទីផ្សារភាគហ៊ុន។

BLACKPINK បានបង្ហាញវត្តមានលើឆាក K-pop កាលពីថ្ងៃទី៨ ខែសីហា ឆ្នាំ២០១៦ ហើយបានប្រារព្ធខួបលើកទី៧ របស់ពួកគេនៅឆ្នាំនេះ។ BLACKPINK ជាក្រុមចម្រៀងនារីថ្មីដែលទទួលបានការគាំទ្រដោយ YG បន្ទាប់ពីឃ្លាតឆ្ងាយពីក្រុម 2NE1 ដែលជាក្រុមចម្រៀងនារីជោគជ័យមុនគេរបស់ក្រុមហ៊ុន។

នៅថ្ងៃទី៨ ខែសីហា ឆ្នាំ២០១៦ BLACKPINK ក្រោមការដឹកនាំផ្ទាល់ពីលោក Yang Hyun Suk សមាជិក YG បានរៀបចំកម្មវិធីតាំងបង្ហាញដ៏ធំនៅ Mos Studio នៅលើ Dosan-daero ក្នុងទីក្រុង Gangnam ទីក្រុងសេអ៊ូល។ ចាប់តាំងពីពេលនោះមក BLACKPINK បានបង្ហាញនូវប្រជាប្រិយភាព និងការទាក់ទាញពេញនិយមរបស់ពួកគេជាមួយនឹងបទ “Whistle” “Boombayah” “Playing with Fire” “Stay” និងជាច្រើនទៀត ដោយទទួលបានពានរង្វាន់ Rookie of the Year នៅចុងឆ្នាំ។

បន្ទាប់ពីផ្អាកមួយរយៈ ពួកគេបានត្រលប់មកវិញខ្លាំងជាងមុន ដោយផលិតបទជាប់ៗគ្នាដូចជា “Ddu-Du Ddu-Du” “Forever Young” “Kill This Love” “How You Like That” និង “Lovesick Girls” ។ ជោគជ័យដ៏អស្ចារ្យទាំងនេះបានពង្រឹងវត្តមានរបស់ពួកគេក្នុងនាមជាសិល្បករអន្តរជាតិ។

ជ័យជំនះរបស់ក្រុមនេះបានពង្រីកដល់ការប្រគំតន្ត្រីដែលលក់សំបុត្រដាច់គ្មានសល់ ទោះបីជាមានការផ្សព្វផ្សាយតិចតួចក៏ដោយ។ ពួកគេក៏បានប្រើកម្លាំងរួមគ្នានៃភាពទាក់ទាញរៀងខ្លួនរបស់សមាជិកនីមួយៗ។ សមាជិកទាំង៤ រួមមាន Lisa , Jennie, Jisoo និង rosé សុទ្ធតែមានឥទ្ធិពលមិនថានៅលើ YouTube , Instagram ផ្ទាល់របស់ពួកគេ ឬភាពជាទូតសុឆន្ទៈសម្រាប់ម៉ាកប្រណីតទេពួកគេមានមិនចាញ់គ្នាឡើយ។

សំណួររបស់ BLACKPINK បន្តកុងត្រាថ្មីជាមួយ YG នៅតែមានតុល្យភាព។ ពួកគេបានត្រៀមបញ្ចប់ដំណើរទេសចរណ៍ជាសាកលរបស់ពួកគេនៅឯ Gocheok Sky Dome ដែលគ្រោងធ្វើនៅថ្ងៃទី១៦ និង១៧ ខែកញ្ញា ហើយអ្នកខ្លះប៉ាន់ស្មានថាការប្រគំតន្រ្តីទេសចរណ៍នេះអាចជាការបញ្ចប់សកម្មភាពពេញលេញជាក្រុមរបស់ BLACKPINK ។

ក្តីបារម្ភនេះបានកើនឡើងដោយសារតែភាពមិនប្រាកដប្រជាអំពីការអនុវត្តរបស់ពួកគេដែលជាសកម្មភាពរួមគ្នានាពេលអនាគត។ មកទល់នឹងពេលនេះ សូម្បីតែមួយខែបន្ទាប់ពីខួបលើកទី៧ របស់ពួកគេនៅថ្ងៃទី៨ ខែសីហា ក៏មិនមានការសម្រេចចិត្តច្បាស់លាស់លើការបន្តកុងត្រារបស់ពួកគេជាមួយ YG ដែរ។ ចំពេលមានការព្រួយបារម្ភ ពាក្យចចាមអារ៉ាមជាច្រើនកំពុងរីករាលដាល ជាពិសេសទាក់ទងនឹងការបន្តកុងត្រារបស់ Lisa ។ វាត្រូវបានអះអាងដោយទីភ្នាក់ងារចិនថា Lisa បានលើកឡើងពីការលំបាកក្នុងការបំពេញកាលវិភាគរបស់នាង ដោយសារតែស្ថានភាពមិនច្បាស់លាស់នៃការបន្តកុងត្រារបស់នាងជាមួយ YG កាលពីខែកក្កដា។

ទោះជាយ៉ាងណាក៏ដោយ YG បានឆ្លើយតបយ៉ាងខ្លីថា “ការលុបចោលកាលវិភាគខែសីហារបស់ Lisa មិនទាក់ទងនឹងស្ថានភាពកិច្ចសន្យារបស់នាងទេ ហើយការបន្តកុងត្រាកំពុងស្ថិតក្នុងការពិភាក្សា” ។

ជាងនេះទៅទៀត មានសេចក្តីរាយការណ៍ថា Lisa បានទទួលការផ្តល់ជូនដ៏ច្រើនពីក្រៅប្រទេស រួមទាំងប្រទេសកំណើតរបស់នាង គឺប្រទេសថៃ ដែលមានទំហំទឹកប្រាក់រាប់រយពាន់លានវ៉ុន។ មានរឿងជាច្រើនទៀតបានធ្លាយពាក្យចចាមអារ៉ាមនោះគឺ Lisa ទើបតែបានច្រានចោលសំណើទីពីរពី YG បន្ទាប់ពីការផ្តល់ជូនជាថ្មីដំបូងរបស់ពួកគេ ជាមួយនឹងពាក្យចចាមអារ៉ាមថា YG បានផ្តល់សំណើ ៥០ ពាន់លានវ៉ុន (ប្រមាណ ៣៧.៦ លានដុល្លារ) ដល់ Lisa ។

ទោះយ៉ាងណាពាក្យចចាមអារ៉ាមនេះបានធ្វើឱ្យអ្នកគាំទ្រព្រួយបារម្ភយ៉ាងខ្លាំងចំពោះអនាគតក្រុម BLACKPINK ដោយសង្ឃឹមថានេះគ្រាន់តែជាពាក្យចចាមអារ៉ាមទៅចុះ ខណៈមិនទាន់មានការប្រកាសជាផ្លូវការពីក្រុមហ៊ុនទៅលើកុងត្រារបស់ពួកគេនោះទេ៕

អ្នកគាំទ្រវិស័យបាល់ទាត់ប្រទេសចិន បានបញ្ចេញកាយវិការខឹងសម្បារជាខ្លាំង និងបានស្រែកទារលុយសំបុត្ររបស់ពួកគេមកវិញ ក្រោយពីក្រុមជម្រើសជាតិខ្លួន បានរងបរាជ័យ១-០ ក្រោមថ្វីជើងប្រទេសសុីរី នៅក្នុងទឹកដីខ្លួនឯង។នៅក្នុងការប្រកួត អំឡុងពេលសុីរីនាំមុខ១-០ អ្នកគាំទ្របានស្រែកចម្អកដល់ក្រុមកីឡាករជម្រើសជាតិខ្លាំងៗ ដោយពួកគេលើកឡើងថា៖”អ្នកគ្មានស្មារតីប្រយុទ្ធដើម្បីមុខមាត់ប្រទេសជាតិនោះទេ សងថ្លៃសំបុត្រខ្ញុំវិញមក”។លើសពីនេះទៅទៀតអ្នកគាំទ្ររាប់ពាន់នាក់បានចូលទៅបញ្ចេញមតិ (comment) ទៅលើគណនីផ្លូវការនៃបណ្តាញសង្គម Weibo របស់ក្រុមជម្រើសជាតិចិន ដោយពួកគេសម្តែងការមិនពេញចិត្តនឹងទម្រង់លេងរបស់ក្រុមជម្រើសជាតិខ្លួន។

ការដែលធ្វើឱ្យអ្នកគាំទ្រចិនខឹងសម្បារបែបនេះ ក៏ព្រោះតែ២ឆ្នាំចុងក្រោយនេះ ចិនឈ្នះតែ៤ប្រកួតប៉ុណ្ណោះ ដោយក្នុងនោះ ចិនមិនដែលចាញ់ក្រុមដែលមានចំណាត់ថ្នាក់ FIFA ទាបជាខ្លួននោះទេ ពោលគឺចិនឈរនៅលេខ៨០ ខណៈសុីរីឈរនៅលេខ៩៤ ៕

ប្រភព៖ MIDDLE EAST MONITOR

សហរដ្ឋអាមេរិក ៖ ហេតុការណ៍មួយបានធ្វើឱ្យអ្នកដំណើរតាមយន្តហោះបាត់បង់ទំនុកចិត្ត គឺវាបានកើតឡើងនៅអាកាសយានដ្ឋានអន្តរជាតិ Miami សហរដ្ឋអាមេរិក ។ កាមេរ៉ាសុវត្ថិភាពបានចាប់រូបភាពអាកប្បកិរិយារបស់បុគ្គលិកសន្តិសុខផ្នែកដឹកជញ្ជូននៅអាមេរិក (TSA) ចំនួន២នាក់ ដែលរួមដៃគ្នាលួចទ្រព្យសម្បត្តិមានតម្លៃពីកាបូបអ្នកដំណើរ ក្នុងអំឡុងពេលអ្នកដំណើរយកកាបូបពួកគេបញ្ចូលក្នុងម៉ាស៊ីនកាំរស្មីអិច ។

បុគ្គលិកសន្តិសុខនៅក្នុងរូបនេះឈ្មោះ Labarius Williams អាយុ៣៣ឆ្នាំ និងម្នាក់ទៀតឈ្មោះ Jose Gonzalez អាយុ២០ឆ្នាំ ។ បុគ្គលិកសន្តិសុខទាំង២នាក់បានរួមដៃគ្នាលួចយកទ្រព្យសម្បត្តិមានតម្លៃក្នុងកាបូបអ្នកដំណើរ កាលពីថ្ងៃទី២៩ ខែមិថុនា ឆ្នាំ២០២៣ ។

បើតាមរូបភាព គេនឹងឃើញបុរសឈ្មោះ Labarius Williams ចាប់ទាញអ្វីម្យ៉ាងចេញពីកាបូបអ្នកដំណើរបន្តិចម្តងៗ រួចដាក់វាចូលក្នុងហោប៉ៅអាវរបស់ខ្លួន ។ ដូចគ្នានេះ បុរសឈ្មោះ Jose Gonzalez បានលួចបើកកាបូបស្ពាយអ្នកដំណើរ និងដកលុយចេញមកដាក់ក្នុងហោប៉ៅខោរបស់ខ្លួន ។

ក្រោយពីសមត្ថកិច្ចទទួលបានពាក្យបណ្តឹងអំពីការបាត់បង់ទ្រព្យសម្បត្តិរបស់អ្នកដំណើរ ដែលមានតម្លៃប្រមាណ៦០០ដុល្លារអាមេរិក ក៏មានការត្រួតពិនិត្យកាមេរ៉ាសុវត្ថិភាពនៅអាកាសយានដ្ឋានអន្តរជាតិ Miami ។ ក្រោយមក សមត្ថកិច្ចបានប្រទះឃើញភស្តុតាងបញ្ជាក់យ៉ាងច្បាស់ក្នុងកាមេរ៉ាសុវត្ថិភាព និងចាប់ខ្លួនបុគ្គលិកសន្តិសុខទាំង២នាក់នេះ ។

សារព័ត៌មានបរទេសចុះផ្សាយថា បុរសឈ្មោះ Jose Gonzalez យល់ព្រមធ្វើតាមលក្ខខណ្ឌ ដូចជា បង់ប្រាក់សំណងទៅឱ្យជនរងគ្រោះ២នាក់ ចំនួន៧០០ដុល្លារអាមេរិក, ធ្វើការងារផ្នែកសង្គមរយៈពេល២៥ម៉ោង និងលាឈប់ពីការងារផងដែរ ដើម្បីជាថ្នូរមិនត្រូវគេកាត់ទោស ។ ចំណែកបុរសឈ្មោះ Labarius Williams បានបដិសេធមិនព្រមធ្វើតាមលក្ខខណ្ឌនេះទេ ហើយរូបគេនឹងបន្តរឿងក្តីនៅតុលាការ ៕ ប្រភព ៖ 3 Plus News