សហរដ្ឋអាមេរិក ៖ ភ្ញៀវទេសចរ និងមនុស្សម្នារស់នៅទីក្រុងឈីកាហ្គោ រដ្ឋអ៊ីលីណយ សហរដ្ឋអាមេរិក បានសប្បាយរីករាយ និងរំភើបនៅពេលពួកគេឃើញកូនទាជ័រតូចពណ៌លឿងគួរឱ្យស្រឡាញ់ចំនួនជាង៩ម៉ឺនក្បាល ត្រូវបានគេលែងចេញពីគូទរថយន្តធំដែលចតនៅលើស្ពាន Columbus Drive ចូលក្នុងទន្លេសំខាន់ក្នុងទីក្រុង ។

ការលែងកូនទាជ័រទាំងនេះ គឺដើម្បីធ្វើការប្រណាំងនៅលើទឹក និងទៅកាន់គោលដៅក្នុងពិធីប្រកួត Ducky Derby 2023 ។ គេសង្កេតឃើញថា មានភ្ញៀវទេសចរអន្តរជាតិ និងពលរដ្ឋរស់នៅទីនេះរាប់ពាន់នាក់ចាប់អារម្មណ៍ និងនាំគ្នាមករង់ចាំទស្សនានៅតាមមាត់ច្រាំងទាំងសងខាង ។

ពិធីប្រណាំងកូនទាលឿងបណ្តែតទឹក គឺជាផ្នែកមួយនៃការរៃអង្គាសប្រាក់ប្រចាំឆ្នាំ ដែលបើកឱកាសឱ្យពលរដ្ឋទូទៅចូលរួមបរិច្ចាគប្រាក់ដើម្បីគាំទ្រកម្មវិធី Special Olympics ។ វាជាការផ្តល់ឱកាសដល់កុមារ និងមនុស្សពេញវ័យជាង២ម៉ឺន១ពាន់នាក់ ដែលមានបញ្ហាពិការភាពផ្នែកបញ្ញានៅទូទាំងរដ្ឋ ក្នុងការប្រកួតប្រជែងកីឡា, ការសិក្សា, សុខភាព និងការអភិវឌ្ឍផ្ទាល់ខ្លួន ។

អ្នកចាប់អារម្មណ៍អាចបរិច្ចាគប្រាក់តាមការស្ម័គ្រចិត្ត គឺចាប់ផ្តើមពីចំនួន៥ដុល្លារអាមេរិកសម្រាប់កូនទាពណ៌លឿង១ក្បាល ។ ចំណែកការបរិច្ចាគជាកញ្ចប់ (Quack Pack) គឺចំណាយប្រាក់ត្រឹមតែ២៥ដុល្លារអាមេរិកប៉ុណ្ណោះសម្រាប់កូនទា៦ក្បាល ។ លើសពីនេះ អ្នកចូលរួមអាចបរិច្ចាគប្រាក់សម្រាប់កូនទា១ហ្វូងផងដែរ ដោយពួកគេត្រូវបរិច្ចាគប្រាក់ចំនួន១០០ដុល្លារអាមេរិក ។

ក្រោយពីពិធីប្រណាំងកូនទាបញ្ចប់ អ្នករៀបចំកម្មវិធីបញ្ជាក់ថា ពួកគេអាចរៃអង្គាសប្រាក់ក្នុងឆ្នាំ២០២៣ រហូតដល់ជាង៤២ម៉ឺនដុល្លារអាមេរិក ហើយពួកគេនឹងយកប្រាក់នេះទៅឧបត្ថម្ភកម្មវិធី Special Olympic បន្តទៀត ។ ជាមួយគ្នានេះ អ្នកបរិច្ចាគប្រាក់អាចទទួលបានរង្វាន់ធំផងដែរ ប្រសិនបើកូនទារបស់ខ្លួនទៅកាន់គោលដៅមុនគេ ហើយអ្នកទទួលជ័យជម្នះ Ducky Derby នឹងទទួលបានរថយន្ត Chevy Trax ឆ្នាំ២០២៤ មួយគ្រឿង ៕ ប្រភព ៖ TNN World

តំបន់​ភ្នំវល្លិ៍ អតីតតំបន់ខ្មែរក្រហមដ៏រឹងមាំមួយ ត្រូវបានអភិវឌ្ឍន៍ប្រែក្លាយឱ្យទៅជាតំបន់ទេសចរណ៍ប្រវត្តិសាស្រ្តសង្គ្រាម និងជាតំបន់កសិកម្មដ៏សំខាន់របស់ខេត្តកែប ដែលសម្បូរទៅដោយចម្ការម្រេច។

យោងតាមឯកសារផែនការមេអភិវឌ្ឍន៍វិស័យទេសចរណ៍ខេត្តកែប ២០២៣-២០៣៥ រាជរដ្ឋាភិបាលសម្រេចនឹងប្រែក្លាយជាតំបន់​ភ្នំវល្លិ៍ ប៉ូលទេសចរណ៍ធម្មជាតិតំបន់ភ្នំវល្លិ៍ជា តំបន់កសិទេសចរណ៍ ទេសចរណ៍ប្រវត្តិសាស្រ្តសង្គ្រាម និងទេសចរណ៍ផ្សងព្រេង។

នៅក្នុងផែនការមេអភិវឌ្ឍន៍វិស័យទេសចរណ៍ខេត្តកែប ២០២៣-២០៣៥ ត្រូវបានកំណត់ជា៣ទៅលើតំបន់​ភ្នំវល្លិ៍ ដែលរួមមាន៖

• ការអភិវឌ្ឍកសិទេសចរណ៍តំបន់ភ្នំវល្លិ៍
• ទេសចរណ៍តំបន់ប្រវត្តិសាស្រ្តសង្គ្រាម
• ទេសចរណ៍ផ្សងព្រេងតំបន់ភ្នំវល្លិ៍

សូមបញ្ជាក់ផងដែរថា បើលោកអ្នកចង់ទៅទស្សនាភ្នំវល្លិ នោះលោកអ្នកត្រូចេញដំណើរពីទីប្រជុំជន ស្រុកកំពង់ត្រាចឆ្ពោះទៅកែបបានប្រមាណជិត ១០ គីឡូម៉ែត្រ នឹងបានឃើញស្លាកសញ្ញាចូលភ្នំវល្លិនៅខាងស្តាំដៃ ហើយបន្តដំណើរតែជាង ៥ គីឡូម៉ែត្រទៀត នឹងបានដល់ភ្នំវល្លិនេះ៕

បរទេស៖ យោងតាមក្រុមហ៊ុន Fitch Ratings បានឱ្យដឹងថា ទីផ្សារអង្ករពិភពលោកអាចនឹងមានភាពតានតឹងបន្ថែមទៀត នៅពេលដែលប្រទេសចិនកំពុងជួបប្រទះភ្លៀងធ្លាក់ខ្លាំង រួមជាមួយគ្រោះទឹកជំនន់។
របាយការណ៍ថ្មីមួយដោយ Fitch Ratings បានព្រមានថា ភ្លៀងធ្លាក់ខ្លាំងនៅភាគឦសានប្រទេសចិនបានកាត់បន្ថយទិន្នផល និងអាចដាក់សម្ពាធនៃការកើនឡើងលើតម្លៃអង្កររបស់ពិភពលោក។ ការព្រមានអំពីទឹកជំនន់ត្រូវបានគេលើកឡើងសម្រាប់ខេត្តចំនួនបីដែលមាន ២៣% នៃផលិតកម្មស្រូវរបស់ប្រទេសចិនគឺម៉ុងហ្គោលី ជីលីន និងហីឡុងជាំង។ តំបន់ផលិតគ្រាប់ធញ្ញជាតិសំខាន់ៗជាច្រើននៅក្នុងខេត្តទាំងបីនេះក៏ត្រូវបានរងផលប៉ះពាល់ដោយភ្លៀងធ្លាក់ខ្លាំង និងព្យុះទីហ្វុង Doksuri ផងដែរ។

សេដ្ឋកិច្ចធំទីពីររបស់ពិភពលោកត្រូវបានបំផ្លិចបំផ្លាញដោយទឹកជំនន់ក្នុងរយៈពេលប៉ុន្មានសប្តាហ៍ថ្មីៗនេះ។ ព្យុះទីហ្វុង Doksuri គឺជាព្យុះទីហ្វុងដ៏ធំបំផុតមួយដែលបានវាយប្រហារភាគខាងជើងប្រទេសចិនក្នុងរយៈពេលជាច្រើនឆ្នាំ។ រដ្ឋធានីប៉េកាំងបានទទួលរងនូវភ្លៀងធ្លាក់ខ្លាំងបំផុតក្នុងរយៈពេល ១៤០ ឆ្នាំ។ ទោះជាយ៉ាងណាក៏ដោយ ការបាត់បង់ជាក់លាក់ក្នុងផលិតកម្មធញ្ញជាតិមិនទាន់ត្រូវបានរាយការណ៍នៅឡើយទេ។

យោងតាមក្រុមហ៊ុនវាយតម្លៃឥណទានរបស់សហរដ្ឋអាមេរិក បានឱ្យដឹងថា តម្លៃគ្រាប់ធញ្ញជាតិក្នុងស្រុកនៃប្រទេសចិននឹងកើនឡើង ហើយប្រទេសនេះក៏ត្រូវការនាំចូលបន្ថែមទៀតនៅក្នុងឆមាសទីពីរនៃឆ្នាំ ២០២៣ ដើម្បីទូទាត់ការខាតបង់ក្នុងផលិតកម្ម។ ជាពិសេស ប្រសិនបើការប្រមូលផលស្រូវខ្វះខាត ប្រទេសចិនប្រហែលជាត្រូវបង្កើនការនាំចូល ដែលជំរុញឱ្យតម្លៃអង្ករពិភពលោកកាន់តែកើនឡើង។ ការនាំចូលអង្កររបស់ចិនក្នុងឆ្នាំនេះមានចំនួន ៧,២ លានតោន ប៉ុន្តែនេះមិនមែនជាកម្រិតកំណត់ដែលអាចត្រូវបានកែសម្រួលដើម្បីរក្សាស្ថិរភាពតម្លៃក្នុងស្រុកនោះទេ។

តម្លៃអង្ករពិភពលោកបានកើនឡើងដល់កម្រិតខ្ពស់បំផុតក្នុងរយៈពេលជិត ១២ ឆ្នាំ នេះបើយោងតាមសន្ទស្សន៍តម្លៃអង្កររបស់អង្គការស្បៀងអាហារ និងកសិកម្ម។ អនាគតអង្ករឆៅក៏ស្ថិតក្នុងកម្រិតខ្ពស់នៃមួយទសវត្សរ៍ផងដែរ ដោយឡើងដល់ ១៥,៩៨ ដុល្លារក្នុងមួយរយផោន (CWT) ឬ ៤៥,៣៦ គីឡូក្រាម។ ដូចនេះ ក្រុមអ្នកសង្កេតការណ៍រំពឹងថាតម្លៃអង្ករនឹងកើនឡើងនាពេលខាងមុខ បន្ទាប់ពីឥណ្ឌាបានហាមឃាត់ការនាំចេញអង្ករកាលពីខែមុន ហើយប្រទេសថៃក៏បានជំរុញឱ្យកសិករដាំស្រូវតិចដើម្បីសន្សំសំចៃទឹកដោយសារគ្រោះរាំងស្ងួតផងដែរ៕ ប្រភព៖vnexpress

ក្នុងរយៈពេល៦ខែចាប់ពីខែមករា-មិថុនា ឆ្នាំ២០២៣អង្គភាពស៊ីម៉ាក់បានបោសសម្អាតផ្ទៃដីចម្ការមីន/គ្រាប់បានសរុបចំនួនជាង១៥១គីឡូម៉ែត្រក្រឡា ស្មើនឹង១១៣,២៨% ធៀបនឹងផែនការឆមាសទី១ឆ្នាំ២០២៣ ដែលមានផ្ទៃដីចំនួនជាង១៣៤គីឡូម៉ែត្រក្រឡា។ ក្នុងកិច្ចប្រតិបត្តិការនេះបានរកឃើញនិងកម្ទេចចោលគ្រាប់មីន និងគ្រាប់យុទ្ធភណ្ឌមិនទាន់ផ្ទុះចំនួន៣៦.៣១៥គ្រាប់។ នេះបើយោងតាមផេក មជ្ឈមណ្ឌលសកម្មភាពកំចាត់មីនកម្ពុជា – CMAC ថ្ងៃទី១៥ សីហា។

តាមប្រភពដដែលបានបញ្ជាក់ទៀតថា ក្នុងឆមាសទី១ ឆ្នាំ២០២៣ នេះផងដែរ អង្គភាពស៊ីម៉ាក់បានផ្តល់ការអប់រំផ្សព្វផ្សាយយល់ដឹងពីគ្រោះថ្នាក់ដោយសារមីន និងសំណល់យុទ្ធភណ្ឌសង្គ្រាមដល់ក្រុមគោលដៅតាមបណ្តាខេត្តបានចំនួន១១.៦៤៨លើក ស្មើនឹង៥៧១.៨១០ ខ្នងផ្ទះ មានប្រជាពលរដ្ឋចូលរួមសរុប៨៩២.១២៩នាក់ ស្មើនឹង៥៥,៧៧% នៃផែនការឆ្នាំ២០២៣។

រយៈពេល៦ខែមកនេះ គម្រោងមួយចំនួនរបស់អង្គភាពស៊ីម៉ាក់មានការពន្យារពេលនិងយឺតយ៉ាវក្នុងការចាប់ផ្តើមអនុវត្តន៍ក្តី កិច្ចប្រតិបត្តិការគ្រប់មុខព្រួញរបស់អង្គភាពស៊ីម៉ាក់បានប្រព្រឹត្តទៅដោយរលូន និងទទួលលទ្ធផលល្អប្រសើរតាមផែនការដែលបានដាក់ចេញ។

គួរបញ្ជាក់ផងដែរថា កម្ពុជាបានដាក់ផែនការថានឹងអាចសម្រេចបាននូវគោលដៅ “កម្ពុជាគ្មានមីននៅឆ្នាំ២០២៥”៕

បរទេស៖ ការដំឡើងថាមពលខ្យល់នៅឯនាយសមុទ្ររបស់ប្រទេសចិនបានជាប់ចំណាត់ថ្នាក់លេខ ១ សម្រាប់ឆ្នាំទីពីរជាប់ៗគ្នា ដែលជួយឱ្យប្រទេសនេះសម្រេចបាននូវគោលដៅអព្យាក្រឹតកាបូន ២០៦០ របស់ខ្លួន។
យោងតាមប្រភពព័ត៌មាន CGTN ដែលបានរាយការកាលពីថ្ងៃទី ១២ ខែសីហាថា បន្ទាប់ពីការអភិវឌ្ឍមួយទសវត្សរ៍ សមត្ថភាពដំឡើងថាមពលខ្យល់នៅឆ្នេរសមុទ្ររបស់ប្រទេសនេះបានកើនលើស ៣០ លានគីឡូវ៉ាត់ នៅចុងឆ្នាំ ២០២២។ នេះជាឆ្នាំទីពីរជាប់គ្នាដែលចិនជាប់ចំណាត់ថ្នាក់លេខមួយក្នុងពិភពលោកសម្រាប់ខ្យល់បក់នៅសមុទ្រ។

ទួរប៊ីននេះមានទីតាំងនៅខេត្ត Fujian ភាគអាគ្នេយ៍នៃប្រទេសចិន។ រាល់ពេលដែលវាបញ្ចប់ការបង្វិលមួយដង ផ្លោងហោះលើផ្ទៃដី ៥០,០០០ ម៉ែត្រការ៉េ ដែលស្មើនឹងទីលានបាល់ទាត់ស្តង់ដារចំនួនប្រាំពីរ។ ទិន្នផលជាមធ្យមប្រចាំឆ្នាំរបស់ទួរប៊ីនគឺច្រើនជាង ៦៦ លានគីឡូវ៉ាត់ ដែលគ្រប់គ្រាន់ដើម្បីផ្តល់ថាមពលដល់គ្រួសារដែលមានសមាជិក ៣៦,០០០ ក្នុងមួយឆ្នាំ។

យោងតាមលោក Qin Haiyan អ្នកជំនាញថាមពលខ្យល់នៃសមាគមថាមពលកកើតឡើងវិញរបស់ប្រទេសចិនបានឱ្យដឹងថា តម្លៃនៃការបង្កើតអគ្គិសនីពីកសិដ្ឋានខ្យល់នៅឯនាយសមុទ្រកំពុងធ្លាក់ចុះ។ លោក Qin បាននិយាយថា “នាពេលបច្ចុប្បន្ននេះ ការចំណាយជាមធ្យមបានធ្លាក់ចុះមកនៅត្រឹម ០.៣៣ យន់ក្នុង ១ kWh ។ ការចំណាយនឹងមានកម្រិតទាបដូចប្រភពថាមពលផ្សេងទៀតនៅឆ្នាំ ២០២៥” ។

លោក Qin ក៏បានបន្តទៀតថា ប្រទេសចិនបានប្រើប្រាស់តិចជាង ១.១% នៃសក្តានុពលខ្យល់នៅឆ្នេរសមុទ្រ។ ប្រទេសនេះបានរៀបចំគម្រោងរោងចក្រថាមពល ១០ លានគីឡូវ៉ាត់ ជាបន្តបន្ទាប់នៅឆ្នេរសមុទ្រនៃខេត្ត Shandong ឧបទ្វីប Yangtze និងតំបន់ផ្សេងទៀត ដើម្បីផលិតថាមពលស្អាតបន្ថែមទៀតសម្រាប់គោលបំណងនៃកាបូនអព្យាក្រឹត៕ ប្រភព៖vnexpress

ប្រទេសថៃ ៖ តាមលទ្ធផលការស្ទង់មតិរបស់គេហទំព័រមួយឈ្មោះ Travelness បង្ហាញថា ទីក្រុងបាងកក ប្រទេសថៃ បានជាប់ចំណាត់ថ្នាក់ទី១ ដែលមានភ្ញៀវទេសចរអន្តរជាតិមកកម្សាន្តច្រើនបំផុតលើពិភពលោក ក្នុងឆ្នាំ២០២៣ ។ ការចាត់ចំណាត់ថ្នាក់នេះ គឺផ្អែកលើចំនួនភ្ញៀវទេសចរអន្តរជាតិដែលបានចូលមកស្នាក់នៅ និងបានចំណាយប្រាក់លើសេវាកម្មផ្សេងៗនៅប្រទេសថៃ ។

តាមការចាត់ចំណាត់ថ្នាក់នេះបង្ហាញថា ទីក្រុងបាងកកបានជាប់ចំណាត់ថ្នាក់ទី១ ដែលមានភ្ញៀវទេសចរមកកម្សាន្តចំនួន២២,៧៨លាននាក់ ហើយទីក្រុងបាងកកបានវ៉ាដាច់ទីក្រុងប៉ារីសរបស់ប្រទេសបារាំង ដែលមានភ្ញៀវទេសចរមកកម្សាន្តត្រឹមតែ១៩,០៩លាននាក់ ។ ដូច្នេះ ទីក្រុងប៉ារីស បានជាប់ចំណាត់ថ្នាក់ទី២ នៅឆ្នាំ២០២៣ ។

ភ្ញៀវទេសចរអន្តរជាតិមកកម្សាន្តនៅប្រទេសថៃ ពួកគេនិយមទៅលេងនៅតំបន់ទេសចរណ៍វប្បធម៌ និងទិញចំណីអាហារលក់នៅតាមផ្លូវយ៉ាវរ៉ាជ និងផ្លូវខាវសាន ក្នុងទីក្រុងបាងកក ។ លើសពីនេះ ពួកគេក៏បានទៅកម្សាន្តនៅវត្តល្បីៗជាច្រើន ដូចជា វត្តអារុណ និងវត្តព្រះស្រីរតនា សាតសាដារាម (ឬវត្តព្រះកែវ) ផងដែរ ។

លើសពីនេះ ទស្សនាវដ្តីពាណិជ្ជកម្ម និងទេសចរណ៍ (Business Traveller) បានផ្តល់ចំណាត់ថ្នាក់ទី១ ឱ្យទីក្រុងបាងកក ប្រទេសថៃ គឺជាទីក្រុងគួរមកសម្រាកលំហែកាយបំផុតនៅតំបន់អាស៊ីប៉ាស៊ីហ្វិក (Best Leisure time city in Asia-Pacific) ក្នុងរយៈពេល៦ឆ្នាំជាប់ៗគ្នា ។ នេះបើតាមការស្ទង់មតិរបស់ Business Traveller Asia-Pacific Awards 2022 កាលពីថ្ងៃទី១៤ ខែសីហា ឆ្នាំ២០២៣ ៕ ប្រភព ៖ Mono News

ប្រទេសថៃ ៖ ក្រោយពីសារព័ត៌មានជប៉ុនឈ្មោះ Global News Asia ចុះផ្សាយវីដេអូនារីជនជាតិថៃម្នាក់រាំនៅលើរថភ្លើងអាកាសប្រទេសជប៉ុន បានធ្វើឱ្យអ្នកលេងបណ្តាញសង្គមថៃជាច្រើននាក់រិះគន់នារីរូបនេះថា គ្មានមារយាទក្នុងខ្លួន និងរាំមិនចេះមើលកាលៈទេសៈ ខណៈជនជាតិជប៉ុនបានអង្គុយជិះរថភ្លើងយ៉ាងស្ងៀមស្ងាត់ ហើយអ្នកខ្លះទៀតធុញទ្រាន់នឹងទង្វើរបស់នាង ។

នារីថៃរូបនេះបានរាំនៅលើរថភ្លើងអាកាសប្រទេសជប៉ុន ដើម្បីយកទៅបង្ហោះក្នុង TikTok ហើយនាងមិនចាប់អារម្មណ៍នឹងក្រសែភ្នែករបស់អ្នកដំណើរជាជនជាតិជប៉ុនផ្សេងទៀត ដែលអង្គុយជិះរថភ្លើងជាមួយគ្នាទេ ។ គេសង្កេតឃើញថា ជនជាតិជប៉ុនទាំងអស់ដែលរួមដំណើរតាមរថភ្លើងជាមួយនាង ពួកគេអង្គុយយ៉ាងស្ងៀមស្ងាត់ ហើយអ្នកខ្លះទៀតសម្លឹងមើលនាងរាំទាំងក្រសែភ្នែកមិនពេញចិត្ត ។

ជាធម្មតា ការប្រើប្រាស់មធ្យោបាយសាធារណៈនានានៅប្រទេសជប៉ុន អ្នកដំណើរទាំងអស់ត្រូវគោរពតាមវិន័យត្រឹមត្រូវ ហើយនារីថៃប្រព្រឹត្តទង្វើនេះចាត់ទុកថា ខុសសីលធម៌យ៉ាងខ្លាំង ។ ក្រោយពីវីដេអូនេះត្រូវបានគេចែកចាយបន្តគ្នាក្នុងបណ្តាញសង្គម ធ្វើឱ្យអ្នកលេងបណ្តាញសង្គមថៃសម្តែងការមិនពេញចិត្ត និងរិះគន់ផងដែរ ។ ផ្ទុយទៅវិញ នារីថៃរូបនេះបានបញ្ចេញប្រតិកម្មចំពោះការរិះគន់វិញថា អ្នកជេរស្តីនាង តើពួកគេធ្លាប់ទៅលេងប្រទេសជប៉ុនដែរឬទេ ? ពួកគេត្រូវមើលពិភពលោកថា គេដើរដល់ណាហើយ ។ នាងបន្តថា វាជាសិទ្ធិរបស់បុគ្គលម្នាក់ៗ បើបុគ្គលនោះចង់រាំ គឺវាមិនពាក់ព័ន្ធជាមួយអ្នកណាទេ ។

ចំណែកជនជាតិជប៉ុនម្នាក់បានបញ្ចេញយោបល់ថា ៖ «ដោយសារពួកយើងជាជនជាតិជប៉ុន ហេតុនេះ យើងត្រូវតែរក្សាភាពស្ងប់ស្ងាត់ និងអត់ធ្មត់ចំពោះរឿងដែលកើតឡើង ។ យើងមានចរិតបែបនេះនៅគ្រប់ទីកន្លែងលើពិភពលោក» ។

ក្រោយមក នារីជនជាតិថៃក៏បានសូមទោសចំពោះទង្វើមិនសមរម្យរបស់នាង ដោយនាងទទួលស្គាល់ថា នាងធ្វើទាំងពុំបានគិត និងមិនបានសិក្សាពីច្បាប់ទម្លាប់នៅប្រទេសជប៉ុន ។ នាងបានសូមទោសក្នុងហ្វេសប៊ុកថា ៖ «ករណីការចុះផ្សាយព័ត៌មានរឿងខ្ញុំរាំនៅលើរថភ្លើងអាកាសជប៉ុន គឺខ្ញុំមិនបានសិក្សាពីច្បាប់ទម្លាប់នៃការប្រើប្រាស់ទីកន្លែងសាធារណៈឱ្យល្អ ។ ដូច្នេះ នាងខ្ញុំសូមអភ័យទោសចំពោះជនជាតិថៃ និងជប៉ុន ព្រមទាំងសូមទោសអ្នកដំណើរលើរថភ្លើងជប៉ុនទាំងអស់ ព្រោះខ្ញុំបានថតជាប់ពួកគេយកមកបង្ហោះក្នុងបណ្តាញសង្គម ខ្ញុំសូមទោសដែលរាំមិនគិតមុខ គិតក្រោយ» ។

នារីថៃដដែលបន្តថា ខ្ញុំសូមទោសផងដែរចំពោះអ្នកចូលមកបញ្ចេញយោបល់ដាស់តឿនទាំងអស់ ដែលខ្ញុំ និងមិត្តភក្តិបានឆ្លើយតបយោបល់ទាំងនេះដោយប្រើពាក្យសម្តីមិនសុភាព ដោយសារខ្ញុំខឹង ។ ខ្ញុំ និងមិត្តភក្តិទាំងអស់នឹងប្រុងប្រយ័ត្នឱ្យខ្លាំងជាងនេះ ហើយមិនឱ្យហេតុការណ៍បែបនេះកើតឡើងទៀតទេ ។ ពេលនេះ ពួកយើងព្រមស្តាប់ពាក្យដាស់តឿន និងទទួលស្គាល់កំហុស ។ អរគុណ សម្រាប់ពាក្យជេរ និងមតិកែលម្អទាំងជនជាតិថៃ និងជប៉ុន ៕ ប្រភព ៖ Mono News

នៅឆ្នាំ២០២៣ វាជារឿងគួរឱ្យភ្ញាក់ផ្អើលមួយដែលកាលពីមុនៗកម្រមានអ្នកដឹកនាំរឿងជាស្រ្តីលេចធ្លោណាស់។ ទោះយ៉ាងណាឆ្នាំនេះ អ្នកដឹកនាំជាស្រ្តីមានចំនួនតួលេខកើនឡើងនៅក្នុងបញ្ជីអាចរកប្រាក់ចំណូលបានច្រើនមិនចាញ់អ្នកដឹកនាំរឿងជាបុរសឡើយ។
ខាងក្រោមនេះ KBN NEWS នឹងលើកយកអ្នកដឹកនាំរឿងជាស្រ្តីចំនួន៩នាក់ដែលមានទ្រព្យសម្បត្តិច្រើនជាងគេនៅទូទាំងពិភពលោកក្នុងឆ្នាំ២០២៣៖

៩. លោកស្រី Greta Gerwig មានទ្រព្យសម្បត្តិសុទ្ធ ១២ លានដុល្លារ
ទ្រព្យសម្បត្តិសុទ្ធរបស់អ្នកដឹកនាំរឿងរូបនេះបានកើនឡើងឆាប់រហ័សចំនួន៣ដងនាពេលចុងក្រោយនេះពី ៤ លានដុល្លារទៅ ១២ លានដុល្លារនៅលើ Celebrity Net Worth។ទ្រព្យសម្បតិ្តដែលមានការប្រែប្រួលយ៉ាងឆាប់រហ័សនេះដោយសារតែមានជោគជ័យលើការដឹកនាំរឿង «Barbie» ។ ក្រៅពីដឹកនាំរឿងនេះ លោកស្រីបានដឹកនាំរឿងផ្សេងទៀតមានដូចជា «Lady Bird» ឆ្នាំ២០១៧ និង «Little Women» ឆ្នាំ២០១៩ ។

៨. លោកស្រី Jennifer Lee មានទ្រព្យសម្បត្តិសុទ្ធ ១២ លានដុល្លារ
លោកស្រីបានក្លាយជាស្ត្រីដំបូងគេដែលដឹកនាំរឿងរបស់ Walt Disney Animation Studios ដែលមានចំណងជើងថា Frozen រួមជាមួយអ្នកដឹកនាំរឿងលោក Chris Buck ដែលរកចំណូលបានជាង១ លានដុល្លារនៅ Box Office ។ ចាប់តាំងពីពេលនោះមក លោកស្រី Jennifer បានធ្វើជាប្រធានផ្នែកច្នៃប្រឌិតរបស់ Walt Disney Animation Studios ជាមួយនឹងទ្រព្យសម្បត្តិប៉ាន់ស្មានចំនួន ១២ លានដុល្លារ។

៧. លោកស្រី Regina King មានទ្រព្យសម្បត្តិសុទ្ធ ១៦ លានដុល្លារ
អ្នកដឹកនាំរឿងរូបនេះត្រូវបានគេស្គាល់ថាជាតារាសម្តែងម្នាក់ដែលបច្ចុប្បន្ននេះមានអាយុ ៥២ ឆ្នាំព្រមទាំងបានផលិតខ្សែភាពយន្តទូរទស្សន៍ជាច្រើនឆ្នាំហើយ។ លោកស្រីបាន ដឹកនាំរឿងដំបូងមានចំណងជើងថា One Night in Miami ឆ្នាំ២០២០ ហើយទទួលបានពានរង្វាន់ Golden Globe សម្រាប់អ្នកដឹកនាំរឿងល្អបំផុត។

៦. លោកស្រី Patty Jenkins មានទ្រព្យសម្បត្តិសុទ្ធ ២៥ លានដុល្លារ
នៅក្នុងឧស្សាហកម្មនេះអស់រយៈពេលជាងពីរទសវត្សរ៍ ហើយពេលនេះលោកស្រីមានអាយុ៥២ឆ្នាំមានទ្រព្យសម្បត្តិសុទ្ធចំនួន ២៥ លានដុល្លារ។ លោកស្រីបានបង្ហាញខ្លួនជាលើកដំបូងក្នុងរឿង Monster ក្នុងឆ្នាំ ២០០៣ ប៉ុន្តែមានភាពល្បីល្បាញខ្លាំងតាមខ្សែភាពយន្តរឿង Wonder Woman របស់ DC Comics ឆ្នាំ២០១៧ និងរឿងភាគ Wonder Woman ឆ្នាំ១៩៨៤។

៥. លោកស្រី Sofia Coppola មានទ្រព្យសម្បត្តិសុទ្ធ ៤០លានដុល្លារ
កើតក្នុងគ្រួសារជាអ្នកផលិតខ្សែភាពយន្ត លោកស្រីមានភាពរីកចម្រើនយ៉ាងខ្លាំងនៅក្នុងឧស្សាហកម្មកម្សាន្តនេះ។ លោកស្រីបានបង្ហាញខ្លួនជាអ្នកដឹកនាំដំបូងជាផ្លូវការក្នុងឆ្នាំ ១៩៩៣ ជាមួយនឹង Walt Mink សម្រាប់បទ«Shine» មុនពេលចាប់ផ្តើមដឹកនាំរឿង «Lost in Translation » ឆ្នាំ២០០៣។ ស្រ្តីវ័យ ៥២ឆ្នាំរូបនេះក៏បានធ្វើការលើយុទ្ធនាការសម្រាប់ម៉ាកយីហោល្បីៗដូជា, Dior, Chanel និង New York City Ballet ជាដើម។

៤.លោកស្រី Kathryn Bigelow មានទ្រព្យសម្បត្តិសុទ្ធ ៥០ លានដុល្លារ
អតីតភរិយារបស់អ្នកដឹកនាំរឿង Avatar លោក James Cameron ទទួលបានភាពជោគជ័យផ្ទាល់ខ្លួនជាច្រើន ដោយបានក្លាយជាស្ត្រីដំបូងគេដែលឈ្នះពានរង្វាន់អ្នកដឹកនាំរឿងល្អបំផុតក្នុងប្រវត្តិសាស្ត្រ Oscars សម្រាប់រឿងប្រភេទសង្រ្គាមរបស់ខ្លួនមានចំណងជើងថា «The Hurt Locker» ក្នុងឆ្នាំ ២០១០។ ក្រៅពីនោះបានដឹកនាំរឿងផ្សេងទៀតរួមមាន «Point Break »ឆ្នាំ១៩៩១, រឿង Zero Dark Thirty ឆ្នាំ២០១២ ជាដើម។

៣. លោកស្រី Ava DuVernay មានទ្រព្យសម្បត្តិសុទ្ធ ៦០ លានដុល្លារ
អ្នកដឹកនាំរូបនេះបានបង្កើតស្នាដៃជាច្រើនដោយខ្លួនឯង រួមទាំងក្លាយជាស្ត្រីជនជាតិស្បែកខ្មៅដំបូងគេដែលត្រូវបានតែងតាំងដោយពានរង្វាន់ Golden Globes ជាអ្នកដឹកនាំរឿងសម្រាប់ភាពយន្តរឿងសិទ្ធិស៊ីវិល Selma ។ មិនត្រឹមតែប៉ុណ្ណោះ ក៏ជាស្ត្រីដែលមានជនជាតិស្បែកខ្មៅដំបូងគេដែលដឹកនាំរឿងរកចំណូលបាន ១០០ លានដុល្លារអាម៉េរិកចំពោះខ្សែភាពយន្ត Disney ឆ្នាំ ២០១៨ មានចំណងជើងថា «A Wrinkle in Time» ។ ពិសេសជាងនេះទៅទៀតរឿង When They See Us ក្នុងកម្មវិធី Netflix របស់អ្នកដឹកនាំរូបនេះក្លាយជាស៊េរីដែលមានអ្នកមើលច្រើនជាងគេបំផុតនៅលើវេទិកានៅពេលចាក់បញ្ចាំងនៅឆ្នាំ ២០១៩ ។

១. លោកស្រី Lana និង Lilly Wachowski មានទ្រព្យសម្បត្តិសុទ្ធ ២៥០ លានដុល្លារ
បងប្អូនស្រីត្រកូល Wachowski ទាំងពីររូបនេះបានជាប់ចំណាត់ថ្នាក់កំពូលនៅក្នុងតារាងទូទាំងពិភពលោកដែលមានទ្រព្យសម្បត្តិច្រើនជាងគេក្នុងនាមជាអ្នកដឹកនាំរឿងជាស្រ្តី។ អ្នកទាំងពីរជាម្ចាស់សិទ្ធិផ្តាច់មុខក្នុងភាពយន្ត The Matrix រួមទាំងស្នាដៃផ្សេងទៀតមានដូចជា Cloud Atlas ឆ្នាំ២០១២ , Jupiter Ascending ២០១៥ និង Sense8 ដែលជារឿងភាគទូរទស្សន៍ដែលដំណើរការពីឆ្នាំ ២០១៥-២០១៨៕