ការបើកភ្លើងសម្រាកនៅពេលយប់បានធ្វើឱ្យពន្លឺភ្លើងទៅរារាំងដល់ការបញ្ចេញរបស់សារធាតុមេឡាតូនីន (Melatonin) ដែលវាដើរតួនាទីសំខាន់ក្នុងការគ្រប់គ្រងការសម្រាក រួមទាំងប្រព័ន្ធផ្សេងៗក្នុងរាងកាយ ។ ហេតុនេះ ប្រសិនបើសារធាតុមេឡាតូនីនបញ្ចេញមកក្នុងបរិមាណតិចតួច វានឹងប៉ះពាល់ដល់ការសម្រាក និងធ្វើឱ្យយើងមានជំងឺ ។
តាមការស្រាវជ្រាវមួយដែលបានចុះផ្សាយក្នុងទស្សនាវដ្តី JAMA Internal Medicine បង្ហាញថា ពន្លឺភ្លើងបានប៉ះពាល់ដល់ការឡើងទម្ងន់ ។ គេបានធ្វើការសាកល្បងប្រៀបធៀបការបើកភ្លើង និងបិទភ្លើងសម្រាកទៅលើស្ត្រីចំនួន៤ម៉ឺននាក់រកឃើញថា អ្នកបើកភ្លើងសម្រាកបានឡើងទម្ងន់លើសអ្នកបិទភ្លើងសម្រាក រហូតដល់៥គីឡូក្រាម ។ ក្រៅពីនេះ ក្នុងចំណោមអ្នកជំងឺ Alzheimer ដំណាក់កាលដំបូងរកឃើញថា ជំងឺមួយផ្នែកបណ្តាលមកពីការថយចុះរបស់សារធាតុមេឡាតូនីន ។
អ្នកជំនាញណែនាំថា គួរតែឈប់លេងទូរស័ព្ទដៃ និងបិទទូរទស្សន៍រយៈពេល១ម៉ោងមុនចូលសម្រាក ដើម្បីជំរុញការប្រុងប្រយ័ត្ន និងមិនរារាំងការបញ្ចេញសារធាតុមេឡាតូនីន ។ វិធីល្អ គួរតែបិទភ្លើងឱ្យអស់នៅពេលសម្រាក ប៉ុន្តែប្រសិនបើអ្នកធ្លាប់សម្រាកបើកភ្លើង សូមបន្ថយពន្លឺភ្លើង ៕ ប្រភព ៖ TNN Health
