កាហ្វេ គឺជាភេសជ្ជៈដ៏ពេញនិយមបំផុតនៅក្នុងពិភពលោក។ មនុស្សជាច្រើនតែងតែផឹកកាហ្វេជាប្រចាំដើម្បីបង្កើនការប្រុងប្រយ័ត្ន និងបង្កើនផលិតភាព។ ទោះជាយ៉ាងណាក៏ដោយ តើអ្នកដឹងទេថាពេលណាជាពេលល្អបំផុតដើម្បីផឹកកាហ្វេ? ដូច្នេះហើយខាងក្រោមនេះគឺជាពេលវេលាដ៏ល្អបំផុតដើម្បីទទួលបានអត្ថប្រយោជន៍ជាច្រើនពីកាហ្វេ៖

ជាទូទៅ ពេលវេលាដ៏ល្អបំផុតដើម្បីផឹកកាហ្វេគឺ ចន្លោះម៉ោង ៩:៣០ ដល់ ១១:៣០ ព្រឹក ព្រោះក្នុងអំឡុងពេលនេះរាងកាយបញ្ចេញអរម៉ូន cortisol ដើម្បីរៀបចំសម្រាប់ការងារឬសកម្មភាព ក្នុងជីវិតប្រចាំថ្ងៃ ជាតិកាហ្វេអ៊ីនក្នុងកាហ្វេប្រឆាំងនឹងឥទ្ធិពលរបស់អ័រម៉ូន cortisol ធ្វើឱ្យរាងកាយមានអារម្មណ៍ស្វាហាប់ និងស្រស់ស្រាយជាងមុន។ ប្រសិនបើអ្នកផឹកកាហ្វេមុនម៉ោង ៩:៣០ ព្រឹក ជាតិកាហ្វេអ៊ីននឹងចូលទៅក្នុងខួរក្បាលរបស់អ្នកច្រើនពេករហូតដល់ធ្វើឱ្យអ្នកមានអារម្មណ៍ថប់បារម្ភ ឬគេងមិនលក់។

ទោះជាយ៉ាងណាក៏ដោយ ពេលវេលាត្រឹមត្រូវក្នុងការផឹកកាហ្វេអាចប្រែប្រួលពីមនុស្សម្នាក់ទៅមនុស្សម្នាក់ វាអាស្រ័យលើកត្តាដូចជាចង្វាក់នៃការគេងរបស់អ្នក កម្រិតស្ត្រេស និងសកម្មភាពប្រចាំថ្ងៃ។ បើរកឃើញថាផឹកកាហ្វេគ្រប់ពេលហើយមានអារម្មណ៍មិនស្រួល អ្នកគួរព្យាយាមកែតម្រូវម៉ោងកាហ្វេឱ្យសមនឹងខ្លួនឯង។
ក្រៅពីម៉ោងផឹកកាហ្វេ បរិមាណកាហ្វេដែលអ្នកផឹកក៏សំខាន់ផងដែរ។ អង្គការសុខភាពពិភពលោកបានណែនាំថាអ្នកមិនគួរផឹកកាហ្វេលើសពី ៤០០ មីលីក្រាមក្នុងមួយថ្ងៃ ដែលស្មើនឹងកាហ្វេប្រហែល ៤-៥ ពែង។ កាលដែលអ្នកផឹកកាហ្វេច្រើនពេក អាចធ្វើឱ្យចង្វាក់បេះដូងលោតញាប់ គេងមិនលក់ ឬមានជំងឺពីកំណើតដូចជា ជំងឺបេះដូង ជំងឺលើសឈាម ឬជំងឺរលាកក្រពះ ជាដើម៕
ប្រភព៖sanook

សត្វប្រកួយសមុទ្រហ្វីលីពីន (The Philippine sailfin lizard) ត្រូវបានគេទទួលស្គាល់ថា វាមានរូបរាងដូចទៅនឹងសត្វនាគ ហើយបច្ចុប្បន្នវាបានលេចវត្តមាននៅបណ្តាកោះមួយចំនួននៅប្រទេសហ្វីលីពីន។

សត្វនេះ ជា​ប្រភេទ​សត្វ​ត្រូវបានគេអភិរក្សនៅ​ក្នុង​ប្រទេស​ប្រទេស​ហ្វីលីពីន ហើយ​វាក៏​ជា​គោលដៅ​សម្រាប់​ទាក់ទាញភ្ញៀវទេសចរណ៍មកទស្សនាសត្វដ៏កម្រនៅលើលោកមួយនេះផងដែរ។

អ្វីដែលគួរឱ្យចាប់អារម្មណ៍នោះ សត្វនេះអាចរត់លើផ្ទៃទឹក ដោយប្រើជើងទាំងពីរបានថែមទៀតផង។ ដោយសារតែរូបរាង និងសម្រស់ប្រៀបបានទៅនឹងសត្វនាគ បានធ្វើឱ្យសត្វប្រកួយសមុទ្រហ្វីលីពីន រងការគំរាមកំហែងពីសំណាកការបរបាញ់ ដោយភាគច្រើនគេចាប់វាយកទៅធ្វើជាសត្វចិញ្ចឹម។

ដោយឡែកចំពោះការបន្តពូជវិញ សត្វនេះអាចបង្កកំណើតបានមួយឆ្នាំម្តងតែប៉ុណ្ណោះ ដោយជាធម្មតាចន្លោះពី២កូន ទៅ៨កូន។ ស៊ុតទាំងនេះត្រូវបានកប់ទៅក្នុងដីរយៈពេលពីរខែមុនពេលញាស់

ជាទូទៅសត្វនេះ មានតែ៥អម្បូរប៉ុណ្ណោះ ក្នុងនោះ៤អម្បូរ រកឃើញក្នុងប្រទសឥណ្ឌូនេសុី និង១ទៀតនៅក្នុងប្រទេសហ្វីលីពីន៕

រាជធានីតូក្យូ៖ ក្រោយពេលរដ្ឋាភិបាលក្រុងតូក្យូ បានសម្រេចបង្ហូរទឹក ចេញពីរោងចក្រថាមពលនុយក្លេអ៊ែរហ៊្វូគូស៊ីម៉ា ដែលបានបន្សាបជាតិវិទ្យុសកម្ម បញ្ចូលទៅក្នុងមហាសមុទ្រប៉ាស៊ីហ្វិកនោះភ្លាម ក៏មានប្រតិកម្មយ៉ាងខ្លាំង មកពីក្រុងប៉េកាំង ហើយបានហាមឃាត់នូវការនាំចូលម្ហូបអាហារសមុទ្រ មកពីខេត្តចំនួន១០របស់ជប៉ុន ប៉ុន្ដែឥឡូវនេះ ប្រេសិតរបស់សហរដ្ឋអាមេរិក បែរយកត្រីនៅក្នុងតំបន់នោះ មករៀបចំពិធីជប់លៀង ហើយថែមទាំងបានស្ដីបន្ទោសដល់ចិន ជុំវិញបញ្ហានេះ។

សារព័ត៌មាន Channel News Asia បានចេញផ្សាយ កាលពីព្រឹក ថ្ងៃសុក្រ ទី១ ខែកញ្ញា ថា បេសកជនរបស់សហរដ្ឋអាមេរិក ប្រចាំនៅប្រទេសជប៉ុន កាលពីថ្ងៃព្រហស្បតិ៍ (ទី៣១ ខែសីហា) បានរៀបចំពិធីជប់លៀងមួយ ដោយយកត្រីចេញពីតំបន់ហ៊្វូគូស៊ីម៉ា (Fukushima) ហើយគាត់ថែមទាំងបានអះអាង ថា ទឹកបង្ហូរចេញពីរោងចក្រថាមពលនុយក្លេអែរ ដែលរងគ្រោះមហន្ដរាយ ពីមហារលកយក្សស៊ូណាមិ ដែលត្រូវបានបន្សាបជាតិវិទ្យុសកម្ម មានសុវត្ថិភាពល្អជាងទឹកបង្ហូរចេញពីរោងចក្រ នៅក្នុងប្រទេសចិន។

រដ្ឋាភិបាលក្រុងប៉េកាំង កាលពីសប្តាហ៍មុន បានហាមឃាត់នូវការនាំចូលម្ហូបអាហារសមុទ្រទាំងអស់ មកពីប្រទេសជិតខាងរបស់ចិន ក្រោយពេលជប៉ុន បានចាប់ផ្តើមបញ្ចេញទឹកសំណល់ ចេញពីរោងចក្រថាមពលនុយក្លេអ៊ែរហ៊្វគូស៊ីម៉ា ចូលទៅក្នុងមហាសមុទ្រប៉ាស៊ីហ្វិក។ ចិន បានចោទប្រកាន់ក្រុងតូក្យូ ថា ជប៉ុន ចាត់ទុកមហាសមុទ្រ ដូចជា«លូបង្ហូរទឹកសំណល់»។

លោក រ៉ាម អេម៉ាញូល (Rahm Emanuel) ឯកអគ្គរដ្ឋទូតសហរដ្ឋអាមេរិក បានថ្លែង នៅក្នុងអំឡុងទៅពិនិត្យមើលតំបន់រោងចក្រនុយក្លេអ៊ែរ ដែលត្រូវបានបំផ្លិចបំផ្លាញ នៅក្នុងអំឡុងឆ្នាំ២០១១ ថា «អស់រយៈពេលមួយទសវត្សរ៍កន្លងមកនេះ ជប៉ុនបានធ្វើរឿងត្រឹមត្រូវ តាមវិធីសាស្រ្ដដ៏ល្អ។ ភាពហ្មត់ចត់ខាងវិទ្យាសាស្រ្ដអន្ដរជាតិ តម្លាភាព និង ការអញ្ជើញសហគមន៍អន្ដរជាតិ មកតាមដានមើលដំណើរការរបស់ខ្លួន បន្សាបទឹកនៅក្នុងរោងចក្រនោះ។ ទឹកបង្ហូរចេញពីរោងចក្រថាមពលនុយក្លេអ៊ែរហ៊្វូគូស៊ីម៉ា មានសុវត្ថិភាពល្អប្រសើរជាងទឹកដែលបញ្ចេញពីរោងចក្រចំនួន៤ នៅប្រទេសចិន បង្ហូរចូលទៅក្នុងមហាសមុទ្រ ដោយមិនបានចម្រោះឲ្យល្អ។

ក្រុមហ៊ុនប្រតិបត្ដិការរោងចក្រថាមពល TEPCO បានឲ្យដឹង ថា ទឹកដែលត្រូវបានបង្ហូរ ចេញពីរោងចក្រនុយថាមពលនុយក្លេអ៊ែរហ៊្វូគូស៊ីម៉ា ត្រូវបានបន្សាប ឬ ចម្រោះជាតិវិទ្យុសកម្មទាំងអស់ លើកលែងតែសារធាតុទ្រីធៀម (Tritium)។ រីឯកម្រិត Tritium ក៏ស្ថិតនៅក្នុងដែនកំណត់សុវត្ថិភាព និង ទាបជាងការបញ្ចេញពីស្ថានីយថាមពលនុយក្លេអ៊ែរ នៅក្នុងប្រតិបត្តិការធម្មតារបស់រោងចក្រនេះ រួមទាំង រោងចក្រនៅក្នុងប្រទេសចិន ផងដែរ។

ដោយឡែក ការប្រឆាំងជាសាធារណៈ នៅក្នុងប្រទេសចិន បានកើនឡើង ចាប់តាំងពីពេលនោះមក ជាមួយនឹងការគប់ដុំឥដ្ឋ និង ស៊ុតចូលនៅក្នុងសាលារៀន និង ស្ថានកុងស៊ុលរបស់ជប៉ុន ប្រចាំនៅប្រទេសចិន។ រីឯអាជីវកម្មនៅក្នុងប្រទេសជប៉ុន ក៏បានរងនូវការហៅតាមទូរស័ព្ទរំខាន មកពីប្រេសចិន ថែមទៀតផង។

អាជ្ញាធរក្រុងតូក្យូ បានបញ្ជាក់ កាលពីថ្ងៃទី២៧ ខែសីហា ថា ម្ហូបអាហារសមុទ្រ នាំចេញពីខេត្តនានារបស់ជប៉ុន រកមិនឃើញមានជាតិវិទ្យុសកម្មនោះឡើយ។ ផលិតផលអាហារសមុទ្រទាំងអស់ សុទ្ធតែមានសុវត្ថិភាព។

លោក ចន លី (John Lee) មេដឹកនាំកោះហុងកុង បានបញ្ជាក់ កាលពីថ្ងៃទី២២ ខែសីហា ថា គាត់បានណែនាំដល់រដ្ឋាភិបាលរបស់គាត់ ឱ្យធ្វើសកម្មភាពភ្លាមៗ ដើម្បីការទប់ស្កាត់នូវការនាំចូលម្ហូមអាហារសមុទ្រមួយចំនួន មកពីប្រទេសជប៉ុន។

ការប្រកាសរបស់អាជ្ញាធរហុងកុង បានធ្វើឡើង ក្រោយពេលរដ្ឋបាលគយទូទៅ នៅក្នុងប្រទេសចិន បានគំរាម អំពីការហាមប្រាមដល់អាហារទាំងអស់ពីរាជធានី-ខេត្ត ចំនួន១០របស់ជប៉ុន រួមមាន រាជធានីតូក្យូ (Tokyo), ខេត្តហ៊្វូគូស៊ីម៉ា (Fukushima), ឆីបា (Chiba), តូឈីហ្គិ (Tochigi), អ៊ីប្រារ៉ាគិ (Ibaraki), ហ្គុនម៉ា (Gunma), មីយ៉ាហ្គិ (Miyagi), នីអ៊ិហ្កាតា (Niigata), ណាហ្កាណូ (Nagano) និង ខេត្ដសៃតាម៉ា (Saitama)។

ប្រទេសជប៉ុន បានប្រកាស ថា ការបញ្ចេញទឹកចេញពីរោងចក្រថាមពលនុយក្លេអ៊ែរ ដែលបានរងគ្រោះមហន្ដរាយ ដោយមហារលកយក្សស៊ូណាមិ គឺមានសុវត្ថិភាព។ ស្របគ្នានេះដែរ ទីភ្នាក់ងារថាមពលអាតូមិកអន្តរជាតិ (IAEA) ដែលជាអ្នកឃ្លាំមើលនុយក្លេអ៊ែររបស់អង្គការសហប្រជាជាតិ បានបំភ្លឺ អំពីផែនការនេះ កាលពីខែមុន ដោយបានបញ្ជាក់ ថា ទឹកចម្រោះនោះ បានបំពេញតាមស្តង់ដារអន្តរជាតិ ហើយថា ផលប៉ះពាល់របស់វា នឹងមកលើមនុស្ស និង បរិស្ថាន មានកម្រិតតិចតួចប៉ុណ្ណោះ៕

បរទេស៖ យោងតាមប្រភពព័ត៌មាន CGTN កាលពីថ្ងៃទី៣០ ខែសីហា បានឱ្យដឹងថា រោងចក្រអ៊ីដ្រូសែនពណ៌បៃតងដ៏ធំបំផុតរបស់ប្រទេសចិនចាប់ផ្តើមដំណើរការបន្ទាប់ពីបន្ទះស្រូបពន្លឺព្រះអាទិត្យដំបូងត្រូវបានដំឡើងនៅក្នុង Khoxa តំបន់ស្វយ័ត Xinjiang Uyghur។ រោងចក្រនេះអាចផលិតអ៊ីដ្រូសែនដោយមិនបញ្ចេញកាបូន នឹងជំនួសដោយវិធីសាស្រ្តចាស់នៃការប្រើប្រាស់ឧស្ម័នធម្មជាតិ។ រោងចក្ររបស់ Sinopec នៅទីក្រុង Xinjiang បានប្រើប្រាស់ថាមពលពន្លឺព្រះអាទិត្យដើម្បីផលិតអ៊ីដ្រូសែន ១០,០០០ តោន/ឆ្នាំក្នុងដំណាក់កាលដំបូង ហើយនឹងកើនឡើងជាលំដាប់ដល់ ២០,០០០ តោនក្នុងមួយឆ្នាំ។

ដូចនេះ ក្រុមហ៊ុនគីមីឥន្ធនៈតែមួយគត់របស់ Sinopec នៅក្នុង Xinjiang បានផ្គត់ផ្គង់ប្រហែល ៧០% នៃធនធានប្រេងនៅភាគខាងត្បូង Xinjiang ។ អ៊ីដ្រូសែនដែលប្រើក្នុងដំណើរការចម្រាញ់បច្ចុប្បន្នបានបញ្ចេញកាបូនឌីអុកស៊ីតយ៉ាងច្រើន ដោយជំនួសការផលិតអ៊ីដ្រូសែនតាមរយៈឧស្ម័នធម្មជាតិនឹងប្រើ photovoltaics ដើម្បីរួមចំណែកយ៉ាងសំខាន់ក្នុងការកាត់បន្ថយការបំភាយឧស្ម័ន និងធានាបាននូវប្រភពថាមពលពន្លឺព្រះអាទិត្យដែលមានស្ថេរភាពសម្រាប់ផលិតអ៊ីដ្រូសែន។

រោងចក្រអ៊ីដ្រូសែនពណ៌បៃតងថ្មីនេះត្រូវបានគេរំពឹងថានឹងកាត់បន្ថយការបញ្ចេញកាបូនឌីអុកស៊ីតចំនួន ៤៨៥,០០០ តោនក្នុងមួយឆ្នាំ ដែលជាការកត់សម្គាល់របកគំហើញនៅក្នុងកិច្ចខិតខំប្រឹងប្រែងរបស់ប្រទេសចិនក្នុងការកាត់បន្ថយការបំភាយឧស្ម័ន។ លោក Liu Ziying អនុប្រធានផ្នែកគ្រប់គ្រងផលិតផលបាននិយាយថា ការផ្លាស់ប្តូរនៃឧស្សាហកម្មគីមីនេះដើរតួនាទីយ៉ាងសំខាន់ក្នុងការសម្រេចបាននូវគោលដៅនៃការបំភាយឧស្ម័នកាបូនិច។ ដូចនេះការបំភាយឧស្ម័នកាបូនិចនៃឧស្សាហកម្មគីមីទូទាំងប្រទេសមានចំនួនប្រហែល ២០% នៃការបំភាយឧស្ម័នឧស្សាហកម្មរបស់ប្រទេសចិន៕
ប្រភព៖vnexpress

រដ្ឋធានីកៀវ៖ រហូតមកដល់ពេលនេះ ថ្វីបើអ៊ុយក្រែន កំពុងតែធ្វើសង្គ្រាមរំដោះទឹកដីរបស់ខ្លួន ចេញពីការកាន់កាប់របស់រុស្ស៊ី យ៉ាងណាក្ដី ក៏លោកប្រធានាធិបតី ហ្សេឡែនស្គី នៅតែមិនអនុញ្ញាតឲ្យមន្រ្ដីខិលខូចមួយចំនួន នៅសំងំកើបលុយ ពីអំពើពុករលួយបានដោយស្រួលនោះដែរ ហើយឥឡូវនេះ គាត់បានអះអាង ថា សំណូកចន្លោះពី ៣០០០ដុល្លារ ទៅ ១៥ ០០០ដុល្លារ ត្រូវបានបង់ សម្រាប់ការលើកលែងកាតព្វកិច្ចការងារយោធា លើផ្នែកវេជ្ជសាស្រ្ត។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃព្រហស្បតិ៍ ទី៣១ ខែសីហា ថា លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានហៅអ្វីដែលគាត់បានពិពណ៌នា ថា អំពើពុករលួយជាប្រព័ន្ធ នៅក្នុងការលើកលែងផ្នែកវេជ្ជសាស្រ្តរបស់ប្រទេស សម្រាប់បំពេញការងារ នៅក្នុងជួរកងទ័ព។ ប្រព័ន្ធពុករលួយបែបនេះ ក្លាយជាកម្មវត្ថុ នៃការទទួលសំណូកយ៉ាងទូលំទូលាយ និង ការធ្វើដំណើរទៅក្រៅប្រទេសរបស់មនុស្សមួយចំនួន។

លោកប្រធានាធិបតី បានសង្កត់ធ្ងន់ ថា សំណូក ចន្លោះពី ៣ 000 ដុល្លារ ទៅ ១៥ 000ដុល្លារត្រូវបានបង់ សម្រាប់ការលើកលែងផ្នែកវេជ្ជសាស្រ្ត គេចចេញពីកាតព្វកិច្ចការងារយោធា។

បញ្ហាអំពើពុករលួយ នៅក្នុងការជ្រើសរើសយោធារបស់អ៊ុយក្រែន ត្រូវបានលាតត្រដាង កាលពីខែមិថុនា ខណៈការស៊ើបអង្កេតរបស់ប្រព័ន្ធផ្សព្វផ្សាយ បានរាយការណ៍ អំពីទ្រព្យសម្បត្តិគ្រួសាររបស់លោក យ៉ែវហេន បូរីស៊ូវ (Yevhen Borysov) មន្រ្ដីជាន់ខ្ពស់ ប្រចាំតំបន់អូដេសា (Odesa) ។ ការស៊ើបអង្កេតនោះ ក៏បានរាយការណ៍ អំពីអចលនទ្រព្យ និង រថយន្តទំនើបៗមានតម្លៃរាប់លានដុល្លារ ត្រូវបានចោទប្រកាន់ ថា ជាកម្មសិទ្ធិនៃសមាជិកគ្រួសាររបស់លោក បូរីស៊ូវ នៅក្នុងប្រទេសអេស្ប៉ាញ។

បើតាមរបាយការណ៍របស់ប្រព័ន្ធផ្សព្វផ្សាយក្នុងស្រុក បានអះអាង ថា លោក បូរីស៊ូវ ត្រូវបានចោទប្រកាន់ ពីបទ «កិបកេងទ្រព្យសម្បតិ្ដដោយខុសច្បាប់»។ ប៉ុន្ដែគាត់បានបដិសេធរាល់ការប្រព្រឹត្ដខុសឆ្គង ហើយគាត់ថែមទាំងអះអាង ថា គាត់មិនមានជាប់ពាក់ព័ន្ធជាមួយនឹងទ្រព្យសម្បត្តិ នៃគ្រួសាររបស់គាត់ នោះឡើយ។

លោកប្រធានាធិបតី ហ្សេឡែនស្គី បានបង្រ្កាបលើអំពើពុករលួយ នៅក្នុងដំណើរការពង្រាងយោធាជាអាទិភាពមួយ ខណៈកងកម្លាំងរបស់គាត់ កំពុងតែបន្តធ្វើសង្គ្រាម អស់រយៈពេល១៨ខែ កន្លងមកនេះ ដើម្បីទប់ទល់នឹងការឈ្លានពានរបស់រុស្ស៊ី។ ការលុបបំបាត់អំពើពុករលួយនៅក្នុងស្ថាប័នរដ្ឋាភិបាលរបស់អ៊ុយក្រែន ក្លាយជាកត្តាសំខាន់ សម្រាប់ប្រទេសអ៊ុយក្រែន ដើម្បីចូលរួមជាមួយសហភាពអឺរ៉ុប៕