រដ្ឋធានីហ្សាការតា៖ ម៉ាឡេស៊ី កំពុងតែចេញមុខយ៉ាងខ្លាំង ជំរុញដល់ដល់កិច្ចប្រជុំកំពូលរបស់អាស៊ាន ដាក់ចេញវិធានការម៉ឺងម៉ាត់ ប្រឆាំងនឹងពួកយោធាមីយ៉ាន់ម៉ា ក្រោយពេលពួកគេ បានបង្កឲ្យវិបត្ដិយ៉ាងធ្ងន់ធ្ងរកើតឡើង ចាប់តាំងពីការកើតមានអំពើរដ្ឋប្រហារ បណ្ដេញរដ្ឋាភិបាលស៊ីវិល ជាប់ឆ្នោតតាមលទ្ធិប្រជាធិបតេយ្យ ដឹកនាំដោយលោកស្រី អ៊ោង សានស៊ូជី (Aung San Suu Kyi) ចេញពីអំណាច កាលពីថ្ងៃទី១ ខែកុម្ភៈ ឆ្នាំ២០២១រហូតមក។

សារព័ត៌មាន Al Jazeera បានចេញផ្សាយ នៅថ្ងៃអង្គារ ទី៥ ខែកញ្ញា ថា ប្រទេសម៉ាឡេស៊ី កំពុងតែអំពាវនាវ ដល់កិច្ចប្រជុំកំពូលរបស់អាស៊ាន ឱ្យមានវិធានការដ៏ខ្លាំងក្លា ប្រឆាំងនឹងមេដឹកនាំយោធាមីយ៉ាន់ម៉ា ព្រោះពួកគេ បានក្លាយជាឧបសគ្គ រារាំងដល់ការអនុវត្តផែនការស្តារសន្តិភាព អស់រយៈពេលជាង២ឆ្នាំមកនេះ ចាប់តាំងពីពួកយោធា បានដណ្តើមអំណាច នៅក្នុងអំពើរដ្ឋប្រហារ។

សារដ៏ធ្ងន់ធ្ងររបស់ម៉ាឡេស៊ី បានកើតឡើង ចំពេលសមាជិកសមាគមប្រជាជាតិអាស៊ីអាគ្នេយ៍ ហៅកាត់ អាស៊ាន កំពុងតែបើកកិច្ចប្រជុំកំពូលរបស់ខ្លួន នៅរដ្ឋធានីហ្សាកាតា។ កិច្ចប្រជុំកំពូលប្រចាំឆ្នាំរបស់អាស៊ាន នឹងមានភាពតានតឹងយ៉ាងខ្លាំង ជុំវិញបញ្ហាមីយ៉ាន់ម៉ា ក៏ដូចជា ស្ថានការណ៍នៅក្នុងសមុទ្រចិនខាងត្បូង ដែលកំពុងតែមានជម្លោះដ៏តានតឹងជាមួយនឹងសម្ពន្ធភាពរបស់ប្លុកមួយនេ។

លោក ហ្សាមប៊ី អាប់ឌូល កាឌា (Zambry Abdul Kadir) រដ្ឋមន្រ្ដីក្រសួងការបរទេសម៉ាឡេស៊ី បានប្រាប់ដល់ក្រុមអ្នកកាសែត ក្រោយកិច្ចប្រជុំកំពូលរបស់ប្រមុខការទូតអាស៊ាន នៅរដ្ឋធានីរបស់ឥណ្ឌូណេស៊ី ថា «ម៉ាឡេស៊ី និង ប្រទេសសមាជិកផ្សេងៗទៀត បានផ្តល់ទស្សនៈ ថា យើងមិនអាចអនុញ្ញាតឱ្យមីយ៉ាន់ម៉ា បន្តធ្វើសកម្មភាព ដោយគ្មានវិធានការដ៏ខ្លាំងក្លា និង មិនមានប្រសិទ្ធភាពលើរបបយោធានោះឡើយ»។

លោកឧត្តមសេនីយ៍ មីន អ៊ោងហ្លាង (Min Aung Hlaing) បានដឹកនាំកងទ័ព ធ្វើរដ្ឋប្រហារ កាលពីថ្ងៃទី១ ខែកុម្ភៈ ឆ្នាំ២០២១ ដណ្ដើមអំណាចពីរដ្ឋាភិបាលជាប់ឆ្នោតរបស់មីយ៉ាន់ម៉ា ដឹកនាំដោយលោកស្រី អ៊ោង សានស៊ូជី (Aung San Suu Kyi )។ ក្រោយអំពើរដ្ឋប្រហារនោះ មេដឹកនាំរបបសឹកបានយល់ព្រម ចំពោះអ្វីដែលហៅថាការឯកភាព៥ចំណុចដើម្បីបញ្ចប់វិបត្តិ នៅក្នុងប្រទេសមីយ៉ាន់ម៉ា នៅក្នុងកិច្ចប្រជុំកំពូលពិសេសរបស់អាស៊ាន។

ដោយឡែក ពួកមេដឹកនាំរបបយោធា មិននបានខិតខំប្រឹងប្រែអនុវត្តផែនការនេះទេ ហើយអំពើហិង្សា បានកើនឡើង ដោយសារតែយោធាកំពុងតែប្រយុទ្ធជាមួយក្រុមជនស៊ីវិលប្រដាប់អាវុធ ប្រឆាំងនឹងការដណ្តើមអំណាចរបស់ខ្លួន។ មេដឹកនាំរដ្ឋប្រហារយោធា បានរងនូវការចោទប្រកាន់ពីបទឧក្រិដ្ឋកម្មសង្គ្រាម សម្រាប់ការបង្ក្រាបដ៏ឃោរឃៅប្រឆាំងនឹងជនស៊ីវិល៕

ប្រទេសថៃ ៖ កាលពីថ្ងៃទី៣១ ខែសីហា ឆ្នាំ២០២៣ នៅសាលាក្រុងបាងកក លោក Chatchart Sittipunt អភិបាលក្រុងបាងកក បានបង្ហាញអំពីគោលការណ៍នៃការធ្វើដំណើរតាមរថយន្តសាធារណៈ (BRT) ។ លោកអភិបាលក្រុងលើកឡើងថា ទីក្រុងបាងកកនឹងអនុញ្ញាតឱ្យពលរដ្ឋថៃទាំងអស់ជិះរថយន្ត BRT ដោយឥតគិតថ្លៃរយៈពេល៣ខែ គឺចាប់ពីថ្ងៃទី១ ខែកញ្ញា រហូតដល់ថ្ងៃទី៣០ ខែវិច្ឆិកា ឆ្នាំ២០២៣ ដោយសារការផ្លាស់ប្តូរចំនួនរថយន្តក្រុង ។

លោក Chatchart Sittipunt លើកឡើងថា ៖ «នឹងអនុញ្ញាតឱ្យពលរដ្ឋថៃអាចជិះរថយន្ត BRT ដោយឥតគិតថ្លៃដើម្បីជួយដល់ពលរដ្ឋ ហើយមានកូនសិស្ស-និស្សិតមកប្រើប្រាស់សេវាកម្មរថយន្តនេះច្រើនផងដែរ ។ វាគឺជាជម្រើសមួយដើម្បីជួយដោះស្រាយបញ្ហាការកកស្ទះចរាចរណ៍នៅទីក្រុងបាងកក ។ ដូច្នេះ ក្នុងរយៈពេលវែងនឹងផ្លាស់ប្តូរមកប្រើប្រាស់សេវាកម្មរថភ្លើងអាកាសជំនួសវិញ ព្រមទាំងបង្កើនចំនួនរថយន្តបន្ថែមទៀត» ។

ចំណែកការរៀបចំផ្លូវសម្រាប់រថយន្ត BRT គឺរថយន្តនេះនឹងត្រូវបើកបរនៅតាមផ្លូវដើម ដោយបើកនៅផ្លូវ Narathiwat Ratchanakarin ទៅកាន់គោលដៅចុងក្រោយនៅផ្លូវបំបែក Ratchadaphisek និងផ្លូវ Ratchaphruek ប៉ុន្តែអាចនឹងមានការកាត់បន្ថយចម្ងាយផ្លូវខ្លះ នៅពេលមានមនុស្សឡើងជិះរថយន្តច្រើន ។ ហេតុនេះ ព័ត៌មានលម្អិតអំពីផ្លូវនឹងមានការជូនដំណឹងម្តងទៀត ដោយនឹងអនុញ្ញាតឱ្យពលរដ្ឋថៃទាំងអស់អាចជិះរថយន្ត BRT មិនគិតថ្លៃ ៕ ប្រភព ៖ matichon

នាថ្ងៃទី៥ ខែកញ្ញា ឆ្នាំ២០២៣ នៅក្នុងកិច្ចប្រជុំអាស៊ានលើកទី៤៣ ដែលឥណ្ឌូនេសុីធ្វើជាម្ចាស់ផ្ទះនោះ ត្រូវបានជ្រើសរើសប្រធានបទធំៗចំនួន២ ធ្វើការពិភាក្សា និងរួមគ្នាដោះសា្រយវិបត្តិក្នុងតំបន់។ សម្រាប់ប្រធានបទធំៗចំនួន២ នោះគឹវិបត្តិនយោបាយនៅក្នុងប្រទេសមីយ៉ាន់ម៉ា និងជម្លោះសមុទ្រចិនខាងត្បូង។អស់រយៈពេលជាង ២ឆ្នាំមកនេះ ពោលគឺក្រោយការធ្វើរដ្ឋប្រហារយោធាទម្លាក់រដ្ឋាភិបាលជាប់ឆ្នោតរបស់លោកស្រី អោងសាន ស៊ូជី កាលពីឆ្នាំ២០២១មក ប្រទេសមីយ៉ាន់ម៉ា មិនទាន់មានសន្តិភាពនោះទេ ដោយភ្លើងសង្គ្រាមនៅតែកើតមានឡើងបណ្តាលឱ្យមនុស្សជាច្រើនបាត់បង់ជីវិត។
ដោយឡែកចំពោះជម្លោះសមុទ្រចិនខាងត្បូង នៅតែឡើងកម្តៅដដែល ក្រោយពីចិនគូសផែនទីសមុទ្រថ្មី ដែលបានរំលោភបំពានចូលឈូងសមុទ្រហ្វីលីពីន។សូមបញ្ជាក់ផងដែរថា កិច្ចប្រជុំពាក់អាស៊ានលើកទី៤៣នេះ នឹងប្រព្រឹត្តិទៅចាប់ពីថ្ងៃទី៤-៧ ខែកញ្ញ ឆ្នាំ២០២៣នេះ ដោយនៅក្នុងនោះមិនមានវត្តមានមេដឹកនាំនៃប្រទេសមហាអំណាចទាំងបីលើលោកនោះទេ គឺ លោក ចូ បៃដិន លោក ស៊ី ជិនពីង និងលោក ពូទីន៕

បរទេស៖ យោងតាមប្រភពព័ត៌មាន New York Times ដែលបានរាយការណ៍កាលពីថ្ងៃទី ៤ ខែកញ្ញាថា ប្រធានាធិបតីកូរ៉េខាងជើងលោក Kim Jong Un គ្រោងនឹងទៅប្រទេសរុស្ស៊ីក្នុងខែនេះ ដើម្បីជួបជាមួយប្រធានាធិបតីរុស្ស៊ីលោក Vladimir Putin ។

អត្ថបទនោះបាននិយាយថា លោក គីម ជុងអ៊ុន នឹងធ្វើដំណើរពីទីក្រុងព្យុងយ៉ាង តាមរថភ្លើង ទៅកាន់ទីក្រុង Vladivostok ដែលជាទីក្រុងមួយនៅឆ្នេរសមុទ្រប៉ាស៊ីហ្វិករបស់រុស្ស៊ី ដើម្បីជួបជាមួយប្រធានាធិបតីពូទីន។

ដំណើរទស្សនកិច្ចនេះនឹងមកដល់ ខណៈរុស្ស៊ីកំពុងពិភាក្សាអំពីការធ្វើសមយុទ្ធយោធារួមជាមួយកូរ៉េខាងជើង។ រដ្ឋមន្ត្រីការពារជាតិរុស្សី លោក Sergei Shoigu នាពេលថ្មីៗនេះ បានទៅបំពេញទស្សនកិច្ចនៅទីក្រុងព្យុងយ៉ាង ដែលលោកខាងលិចជឿថា គឺដើម្បីបញ្ចុះបញ្ចូលទីក្រុងព្យុងយ៉ាង ឱ្យលក់កាំភ្លើងធំទៅឱ្យរុស្ស៊ី។នៅថ្ងៃទី ៣០ ខែសីហា កន្លងទៅនេះ អ្នកនាំពាក្យសន្តិសុខជាតិសេតវិមាន លោក John Kirby បាននិយាយថា សហរដ្ឋអាមេរិកមានការព្រួយបារម្ភថា ការចរចាអាវុធរវាងប្រទេសទាំងពីរកំពុងដំណើរការជាវិជ្ជមាន៕ប្រភព៖cafef.com

ប្រទេសថៃ ៖ ម្ចាស់ចម្ការមង្ឃុត និងទុរេននៅខេត្តភាគខាងត្បូងប្រទេសថៃបានប្រឈមនឹងបញ្ហាតម្លៃផ្លែឈើធ្លាក់ចុះ ហើយពួកគេនិយាយថា ឈ្មួញកណ្តាល និងអ្នកទទួលទិញផ្លែឈើនាំគ្នាបន្ថោកតម្លៃ ជាពិសេស មង្ឃុត ។ កាលពីមុន ការទិញ-លក់មង្ឃុតនៅចម្ការ គឺមានតម្លៃ៣៥បាតក្នុង១គីឡូក្រាម ប៉ុន្តែនៅដើមខែកញ្ញា ឆ្នាំ២០២៣ តម្លៃធ្លាក់មកនៅត្រឹមតែ៥បាតប៉ុណ្ណោះ ទើបធ្វើឱ្យម្ចាស់ចម្ការនៅខេត្ត Nakhon Si Thammarat យកមង្ឃុតមកចាក់ចោលដើម្បីអំពាវនាវឱ្យស្ថាប័នពាក់ព័ន្ធជួយដោះស្រាយបញ្ហា ។

ម្ចាស់ចម្ការមង្ឃុតនៅខេត្ត Nakhon Si Thammarat បានយកមង្ឃុតប្រមាណ២តោនមកចាក់ចោលនៅមុខសាលាស្រុកព្រំគីរី ដើម្បីអំពាវនាវឱ្យថ្នាក់ខេត្ត Nakhon Si Thammarat និងនាយកដ្ឋានពាណិជ្ជកម្មជួយដោះស្រាយរឿងទីផ្សារ ។ ការចាក់ចោលមង្ឃុតនេះ ក្រោយពីតម្លៃមង្ឃុតធ្លាក់ចុះនៅសល់ត្រឹមតែ៥បាតក្នុង១គីឡូក្រាម ដោយសារឈ្មួញកណ្តាល និងអ្នកទទួលទិញមង្ឃុតក្នុងតំបន់រួមគ្នាបន្ថោកតម្លៃធ្វើឱ្យកសិករជួបបញ្ហា ។

ម្ចាស់ចម្ការមង្ឃុតប្រាប់ថា ពេលមុន ការទិញ-លក់មង្ឃុតនៅចម្ការមានតម្លៃចាប់ពី៣០បាត ដល់៣៥បាតក្នុង១គីឡូក្រាម ប៉ុន្តែក្រោយមក តម្លៃក៏ធ្លាក់ចុះជាបន្តបន្ទាប់ នៅសល់ត្រឹមតែ១០បាតក្នុង១គីឡូក្រាម ហើយវាក៏ធ្លាក់ចុះមកត្រឹម៨បាតក្នុង១គីឡូក្រាម ។ នៅកន្លែងមួយចំនួន អាជីវករទិញមង្ឃុតក្នុងតម្លៃត្រឹមតែ៥បាតប៉ុណ្ណោះក្នុង១គីឡូក្រាម ដោយពួកគេនិយាយថា មិនអាចនាំចេញទៅក្រៅប្រទេសបាន ដូច្នេះ វាផ្ទុយគ្នានឹងតម្រូវការទីផ្សារក្រៅប្រទេសជាក់ស្តែង ។ ក្រោយពីប្រទះឃើញទីផ្សារក្រៅប្រទេសមានតម្រូវការផ្លែមង្ឃុតខ្ពស់ ការបន្ថោកតម្លៃលើកនេះ កសិករជឿថា អាជីវករ និងអ្នកទទួលទិញបានរួមគ្នាបន្ថោកតម្លៃ ទើបកសិករអំពាវនាវឱ្យស្ថាប័នពាក់ព័ន្ធជួយដោះស្រាយដើម្បីគ្រប់គ្រងតម្លៃលើទីផ្សារ និងមិនឱ្យគេដើរខ្សែលើ ។

ចំណែកម្ចាស់ចម្ការមង្ឃុតនៅខេត្តយ៉ាឡាប្រាប់ថា តម្លៃមង្ឃុតបានធ្លាក់ចុះមកនៅត្រឹមតែ១០បាតក្នុង១គីឡូក្រាម ដោយសារឈ្មួញកណ្តាលបន្ថោកតម្លៃមង្ឃុតរបស់កសិករ ។ ហេតុនេះ គាត់ក៏ឈប់លក់មង្ឃុតបន្តទៀត ហើយទុកឱ្យអ្នកភូមិបេះយកទៅហូប ព្រោះមិនរួចថ្លៃឈ្នួលបេះ និងការដឹកជញ្ជូន ។ កន្លងមក គ្មានស្ថាប័នណាមកជួយដោះស្រាយទេ និងបណ្តោយឱ្យគាត់ប្រឈមនឹងបញ្ហាបែបនេះ ។

រីឯម្ចាស់ចម្ការទុរេននៅស្រុកបានណាំងស្តា និយាយថា កាលពីដើមខែសីហា ឆ្នាំ២០២៣ គាត់អាចលក់ទុរេនឱ្យឈ្មួញចាប់ពី១៤៥បាត ដល់១៥០បាតក្នុង១គីឡូក្រាម ហើយធ្វើឱ្យម្ចាស់ចម្ការសង្ឃឹមថា នឹងទទួលបានប្រាក់ចំណេញ ក្រោយពីកាត់ថ្លៃចំណាយផ្សេងៗដូចជា ថ្លៃទឹក, ថ្លៃភ្លើង, ថ្លៃជី និងឈ្នួលបេះទុរេន ។ ប៉ុន្តែបច្ចុប្បន្ន ឈ្មួញកណ្តាលបានបន្ថោកតម្លៃទុរេននៅសល់ត្រឹមតែ៨០បាត ទៅ៩០បាតក្នុង១គីឡូក្រាម ហើយឈ្មួញកណ្តាលនិយាយថា មានបញ្ហាការនាំចេញទៅកាន់ទីផ្សារប្រទេសចិន គឺចិនផ្អាកនាំចូលទុរេនថៃ ៕ ប្រភព ៖ Thai PBS

ប្រទេសថៃ៖ បន្ទាប់ពីទទួលបានការយល់ព្រមជាផ្លូវការពីព្រះមហាក្សត្រ Maha Vajiralongkorn ដែលបានតែងតាំងលោក Srettha Thavisin ជានាយករដ្ឋមន្ត្រីថ្មីរបស់ប្រទេសថៃ កាលពីថ្ងៃទី ២២ ខែសីហា កន្លងទៅ។
លោក Srettha Thavisin បានអង្គុយពីរតំណែង គឺតំណែងជានាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុ។

ដូចនេះ ទាក់ទិននឹងប្រាក់បំណាច់របស់លោក Srettha Thavisin យោងតាមការស៊ើបអង្កេតឆ្នាំ ២០១៣ អំពីអត្ថប្រយោជន៍របស់សមាជិកសភា ដែលបានមកពីការពិនិត្យតាមបញ្ជីមុខតំណែង ប្រាក់បៀវត្សរ៍ និងប្រាក់ឧបត្ថម្ភផ្ទាល់ខ្លួនរបស់មន្ត្រីនយោបាយ បានបង្ហាញថា មន្ត្រីនយោបាយនឹងទទួលបានប្រាក់បៀវត្សរ៍ និងប្រាក់បំណាច់តាមមុខតំណែងដូចខាងក្រោម៖

• ដោយតំណែងនាយករដ្ឋមន្ត្រី ទទួលបានប្រាក់បៀវត្សរ៍ ៧៥.៥៩០ បាត អត្រាប្រាក់បៀវត្សរ៍ផ្ទាល់ខ្លួន ៥០.០០០ បាត សរុប ១២៥.៥៩០ បាតក្នុងមួយខែ (ជាង ៣,៥៤៥ ដុល្លារ)។
• ចំពោះតំណែងរដ្ឋមន្ត្រីវិញ ទទួលបានប្រាក់បៀវត្សរ៍ ៧៣,២៤០ បាត អត្រាប្រាក់បៀវត្សរ៍ ៤២,៥០០ បាត សរុប ១១៥,៧៤០ បាតក្នុងមួយខែ (ជាង ៣,២៦៧ ដុល្លារ)។
ដូច្នេះហើយពេលបូកបញ្ចូលប្រាក់សម្រាប់តំណែងទាំងពីរគឺនាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុ នោះមានន័យថា លោក Srettha Thavisin ទទួលបានប្រាក់បៀវត្សរ៍ប្រចាំខែ សរុបចំនួន ២៤១.៣៣០ បាត (ស្មើជាង ៦,៨១៣ ដុល្លារអាមេរិក)៕
ប្រភព៖sanook

ជប៉ុនជាប្រទេសមួយដែលនៅតែមានអ្នកជឿលើអបិយជំនឿផ្សេងៗទាក់ទងអំពីខ្មោច។ រឿងរ៉ាវដ៏គួរឱ្យរន្ធត់ដែលប្រជាជនជប៉ុនតែងតែនិយាយតៗគ្នាអំពី តុក្កតាខ្មោចមានសក់វែងនោះគឺជារឿងពិត ដែលវាកើតឡើងដោយផ្ទាល់នៅក្នុងប្រទេសជប៉ុនកាលពីឆ្នាំ ១៩៣៨ មកម្លេះ។

បច្ចុប្បន្នតុក្កតា Okiku ត្រូវបានប្រជាជជប៉ុនគោរពបូជានៅប្រាសាទមួយក្នុងទីក្រុង Iwamizawa។ តុក្កតានេះ មានពាក្យចចាមអារ៉ាមថា ជាតុក្កតាខ្មោចដែលតែងតែមានសក់ដុះវែងដូចមនុស្សពិតប្រាកដ ហើយមានអ្នកខ្លះទៀតនិយាយថា វាមានវិញ្ញាណក្មេងស្រីតូចម្នាក់ចូលសណ្ឋិត។

រឿងនេះមានដំណាលមួយនិយាយថា នៅឆ្នាំ ១៩១៨ មានក្មេងប្រុសម្នាក់ឈ្មោះ Eikichi Suzuki អាយុ ១៧ ឆ្នាំ បានទិញតុក្កតាមួយទៅឱ្យប្អូនស្រីរបស់គេដែលមានឈ្មោះថា Okiku ដែលនាងមានអាយុ ៣ ឆ្នាំ។ Okiku ស្រលាញ់តុក្កតានេះខ្លាំងណាស់ មិនយូរប៉ុន្មាននាងចាប់ផ្ដើមធ្លាក់ខ្លួនឈឺ ក្ដៅខ្លាំង រហូតដល់គាំបេះដូងស្លាប់តែម្ដង។ តុក្កតានេះមានកំពស់មិនដល់ ៤០ សង់ទីម៉ែត្រនោះទេ ហើយមានសក់ត្រឹមស្មា និងមានស្លៀកឈុតបុរាណរបស់ជនជាតិជប៉ុន។
បន្ទាប់មកគ្រួសាររបស់ក្មេងស្រីនោះបានរក្សាទុកតុក្កតាមួយនេះ នៅក្នុងទីសក្ការបូជាតូចមួយនៅក្នុងផ្ទះ ហើយពួកគេក៏បានដាក់ឈ្មោះតុក្កតានោះថា Okiku ដើម្បីរក្សាទុកការចងចាំ។

រហូតដល់ថ្ងៃមួយ ពួកគេបានកត់សម្គាល់ឃើញថា មានរឿងចម្លែកកើតឡើងពីតុក្កតានោះ ដោយសក់របស់តុក្កតានោះ កាន់តែដុះវែងទៅៗមិនគួរឱ្យជឿ ប្រៀបដូចសក់មនុស្សដែលមានការលូតលាស់ជារៀងរាល់ថ្ងៃ។ រឿងចម្លែកនេះបានធ្វើឱ្យគ្រួសាររបស់ក្មេងស្រីមានជំនឿថា តុក្កតានេះមានវិញ្ញាណកូនស្រីសណ្ឋិត ហើយពួកគេជឿថា កូនស្រីរបស់ពួកគេគឺនៅរស់។

នៅឆ្នាំ ១៩៣៨ គ្រួសាររបស់ក្មេងស្រី Okiku បានផ្លាស់ប្តូរទីលំនៅ ហើយបានយកតុក្កតាខ្មោចនេះទៅប្រាសាទ Manenji ។ ក្រោយមក តុក្កតា Okiku ក៏បានក្លាយជានិមិត្តរូបនៃប្រាសាទតូចមួយនេះ ក្នុងការបួងសួងសុំកូនស្រី។ អ្វីដែលសំខាន់អ្នកដែលចូលទៅក្នុងប្រាសាទចង់ឃើញតុក្កតាខ្មោចនោះ គឺមិនត្រូវបានអនុញ្ញាតឱ្យថតរូបឡើយ។ រហូតមកទល់សព្វថ្ងៃនេះ តុក្កតាខ្មោច Okiku មានសក់ប្រវែងត្រឹមជង្គង់ ហើយនៅពេលដែលសក់របស់វាដុះវែងខ្លាំងពេក ព្រះសង្ឃដែលនៅក្នុងប្រាសាទនោះ ក៏បានកាត់វាចេញដើម្បីបូជា៕