ប្រទេសថៃ ៖ ប្រទេសថៃបានជាប់ចំណាត់ថ្នាក់ទី២ លើពិភពលោក ក្នុងចំណោមបញ្ជីឈ្មោះប្រទេសចំនួន៨៥ ដែលល្អបំផុតសម្រាប់ចាប់ផ្តើមប្រកបអាជីវកម្មប្រចាំឆ្នាំ២០២៣ ។ គេហទំព័រ U.S. News and World Report បានបង្ហាញលទ្ធផលចាត់ចំណាត់ថ្នាក់ប្រទេសល្អបំផុត ដើម្បីចាប់ផ្តើមអាជីវកម្មប្រចាំឆ្នាំ២០២៣ (2023 Best Countries for Starting a Business) ក្នុងនោះប្រទេសឥណ្ឌាជាប់ចំណាត់ថ្នាក់ទី១, ថៃជាប់ចំណាត់ថ្នាក់ទី២ និងចិនជាប់ចំណាត់ថ្នាក់ទី៣ ។

ចំណែកប្រទេសផ្សេងទៀតដែលបានជាប់ចំណាត់ថ្នាក់ជាប្រទេសល្អបំផុត សម្រាប់ចាប់ផ្តើមអាជីវកម្មប្រចាំឆ្នាំ២០២៣ រួមមាន ៖
-ម៉ិកស៊ិក ជាប់ចំណាត់ថ្នាក់ទី៤
-សហរដ្ឋអាមេរិក ជាប់ចំណាត់ថ្នាក់ទី៥
-ហ្វីលីពីន ជាប់ចំណាត់ថ្នាក់ទី៦
-វៀតណាម ជាប់ចំណាត់ថ្នាក់ទី៧
-ប្រេស៊ីល ជាប់ចំណាត់ថ្នាក់ទី៨
-ម៉ាឡេស៊ី ជាប់ចំណាត់ថ្នាក់ទី៩
-អេស្ប៉ាញ ជាប់ចំណាត់ថ្នាក់ទី១០

លទ្ធផលការចាត់ចំណាត់ថ្នាក់ប្រទេសនានារបស់គេហទំព័រ U.S. News and World Report បញ្ជាក់ថា ក្រុមហ៊ុនមួយអាចទទួលបានជោគជ័យបានឬអត់នោះ ត្រូវពិចារណាអំពីទីតាំងនៃការចាប់ផ្តើមអាជីវកម្មផងដែរ ដូចជា ការបង់ពន្ធ, សក្តានុពលការងារ និងកត្តាផ្សេងៗ គឺសុទ្ធតែមានឥទ្ធិពលដល់លទ្ធផលអនុវត្តការងារ ។

គេហទំព័រនេះបង្ហាញថា ការចាត់ចំណាត់ថ្នាក់ប្រទេសល្អបំផុតសម្រាប់ចាប់ផ្តើមអាជីវកម្មប្រចាំឆ្នាំ២០២៣ គឺជាការប្រមូលផ្តុំលទ្ធផលស្ទង់មតិពលរដ្ឋនៅទូទាំងពិភពលោក ស្មើជាង១៧.០០០នាក់ និងការវាយតម្លៃលើប្រទេសផ្សេងៗ ។ អ្នកឆ្លើយតបសំណួរប្រមាណ៤.៦០០នាក់ គឺជាក្រុមអ្នកសម្រេចចិត្តប្រកបអាជីវកម្ម ដូចជា នាយកគ្រប់គ្រងជាន់ខ្ពស់ក្នុងស្ថាប័ន ឬម្ចាស់ក្រុមហ៊ុនអាជីវកម្មទំហំតូច ។

ការចាត់ចំណាត់ថ្នាក់ប្រទេសល្អបំផុតសម្រាប់ប្រកបអាជីវកម្ម គឺផ្អែកលើគុណសម្បត្តិចំនួន៥ រួមមាន ៖
-តម្លៃសមរម្យ
-ប្រព័ន្ធការងាររបស់រដ្ឋាភិបាល
-ដើមទុនផ្នែកផលិតកម្មទាប
-អាចតភ្ជាប់ទៅកាន់តំបន់ផ្សេងៗនៅលើពិភពលោក
-គាំទ្រ និងផ្តល់ភាពងាយស្រួលដើម្បីទទួលបានមូលនិធិ ៕

ប្រភព ៖ Bangkok biznews

កាលពីខែមិថុនា ឆ្នាំ២០២៣ ក្រុមបច្ចេកវិទ្យាដ៏ធំមួយរបស់ពិភពលោក Apple បានដាក់ដំណើរការផលិត iPhone15 ដែលត្រូវបានគេរំពឹងថានឹងចេញលក់ជាផ្លូវការនៅក្នុងថ្ងៃទី១២ ខែកញ្ញានេះ។

បើតាមព័ត៌មានដែលបែកធ្លាយ បានចេញផ្សាយថា iPhone 15 ទាំងអស់ គឺសុទ្ធតែមាន Dynamic Island, រន្ធ USB-C និងបំពាក់ឈីប A17 ដូចៗគ្នា។ មិនតែប៉ុណ្ណោះម៉ូឌែល iPhone 15, iPhone 15 Plus, iPhone 15 Pro និង iPhone 15 Pro Max។ សម្រាប់ម៉ូឌែល Pro និង Pro Max នឹងមានគែម bezel តូចជាងមុន និងជ្រុងរាងកោង។

អ្វីដែលគួរឱ្យកត់សម្គាល់នោះ គឺទំហំផ្ទុកអង្គចងចាំរបស់វា ប្រហែលជានឹងមិនមាន128GB ដូចមុនទៀតនោះឡើយ ពោលមានចាប់ពី256GB ដល់ 2TB តែម្តង។

រីឯតម្លៃវិញ​ត្រូវបានគេរំពឹងថា តម្លៃទាបបំផុតប្រហែលជា១១០០ដុល្លារ និងថ្លៃបំផុតអាចដល់ទៅ២០០០ដុល្លារឯណោះ៕

ប្រភព៖ telegraph UK

ហុងកុង ៖ នាយកដ្ឋានគយប្រចាំអាកាសយានដ្ឋានអន្តរជាតិហុងកុងបានចេញសេចក្តីថ្លែងការណ៍មួយកាលពីថ្ងៃទី៩ ខែកញ្ញា ឆ្នាំ២០២៣ អំពីអាជ្ញាធរហុងកុងចាប់ខ្លួនជនសង្ស័យ២នាក់ពាក់ព័ន្ធនឹងការនាំចូលគ្រឿងញៀនប្រភេទកូកាអ៊ីន១,៥គីឡូក្រាម និងផ្កាកញ្ឆា៥,៣គីឡូក្រាម ស្មើទឹកប្រាក់ជាង២,៥លានដុល្លារអាមេរិក ឬប្រមាណ៨៨,៦៧លានបាត ។

ជនសង្ស័យដំបូងមានអាយុ៥៣ឆ្នាំ បានធ្វើដំណើរមកពីទីក្រុង Freetown ប្រទេសសៀរ៉ា ឡេអូន ដោយឆ្លងកាត់អាកាសយានដ្ឋានទីក្រុងអ៊ីស្តង់ប៊ុល ប្រទេសតួកគី និងបានមកដល់ហុងកុង នៅថ្ងៃទី៩ ខែកញ្ញា ។ គេបានប្រទះឃើញសារធាតុកូកាអ៊ីនលាក់ទុកក្នុងវ៉ាលិសសម្លៀកបំពាក់របស់ជនសង្ស័យរូបនេះ ។ រីឯជនសង្ស័យម្នាក់ទៀតមានអាយុ២៣ឆ្នាំ ភេទប្រុស ហើយអាជ្ញាធរបានចាប់ខ្លួននៅថ្ងៃទី១០ ខែកញ្ញា ។ ជនសង្ស័យរូបនេះបានធ្វើដំណើរចេញពីខេត្តឈៀងម៉ៃ ប្រទេសថៃ ហើយអាជ្ញាធរបានរកឃើញកញ្ឆាចំនួន២២កញ្ចប់ ដែលលាក់ទុកក្នុងថង់អាហារ១៨ដុំនៅក្នុងវ៉ាលិសធ្វើដំណើរ ។

ជំហានដំបូង ចៅក្រមបានចោទប្រកាន់ជនសង្ស័យដំបូងពីបទជួញដូរគ្រឿងញៀន និងបញ្ជូនឡើងតុលាការនៅថ្ងៃទី១១ ខែកញ្ញា ។ ចំណែកជនសង្ស័យម្នាក់ទៀតដែលអាជ្ញាធររកឃើញកញ្ឆានោះស្ថិតក្នុងការសាកសួរ ។ ទោះយ៉ាងណា គ្មានការបញ្ជាក់ថា ជនសង្ស័យទាំង២រូបនេះជាជនជាតិអ្វីទេ ។

នាពេលឆាប់ៗនេះ ហុងកុងនឹងប្រើប្រាស់វិធានការតឹងរ៉ឹងដើម្បីរកគ្រឿងញៀន ជាពិសេស សម្រាប់អ្នកដំណើរមកពីក្រុមប្រទេសមានហានិភ័យខ្ពស់ ។ យោងតាមច្បាប់របស់ហុងកុងចែងថា កញ្ឆា, សារធាតុ Tetrahydrocannabinol (THC) និងសារធាតុ Cannabidiol (CBD) ត្រូវបានចាត់ទុកថា ជាសារធាតុបង្កគ្រោះថ្នាក់ ។

ការនាំចូលផលិតផល រួមទាំងអាហារ ឬភេសជ្ជៈមានផ្ទុកកញ្ឆា, សារធាតុ THC និងសារធាតុ CBD គឺជារឿងត្រូវហាមឃាត់នៅហុងកុង លើកលែងតែករណីច្បាប់អនុញ្ញាត ។ ចំណែកការដឹកជញ្ជូនគ្រឿងញៀនត្រូវមានទោសធ្ងន់ គឺត្រូវពិន័យជាប្រាក់ចំនួន៥លានដុល្លារហុងកុង និងជាប់ពន្ធនាគារអស់មួយជីវិត ៕ ប្រភព ៖ Mono News

ប្រទេសស្វីស ៖ វាបានក្លាយជារឿងមួយល្បីល្បាញក្នុងបណ្តាញសង្គម ក្រោយពីសារព័ត៌មានបរទេសចុះផ្សាយថា យន្តហោះរបស់ក្រុមហ៊ុនអាកាសចរណ៍ដ៏ល្បីបានហោះចោលវ៉ាលិសអីវ៉ាន់អ្នកដំណើរ ដោយមិនបានជូនដំណឹងអ្វីទាំងអស់ ហើយបណ្តាលឱ្យអ្នកដំណើររង់ចាំអស់២ម៉ោងដើម្បីទទួលអីវ៉ាន់របស់ពួកគេ ។ បន្ទាប់មក ក្រុមហ៊ុនអាកាសចរណ៍នេះលើកឡើងថា ខ្វះខាតបុគ្គលិកផ្នែកទទួលខុសត្រូវអីវ៉ាន់ ។

កាលពីថ្ងៃទី១០ ខែកញ្ញា ឆ្នាំ២០២៣ សារព័ត៌មានបរទេសចុះផ្សាយថា យន្តហោះរបស់ក្រុមហ៊ុនអាកាសចរណ៍ Swiss Airlines ជើងហោះហើរពីទីក្រុង Zurich ប្រទេសស្វីស ទៅកាន់ទីក្រុង Bilbao ប្រទេសអេស្ប៉ាញ បានហោះហើរចេញពីអាកាសយានដ្ឋានទីក្រុង Zurich ដោយមិនបានផ្ទុកវ៉ាលិសអ្នកដំណើរក្នុងយន្តហោះទេ ។ ក្រុមហ៊ុនអាកាសចរណ៍មិនបានជូនដំណឹងដល់អ្នកដំណើរអំពីវ៉ាលិសពួកគេ ដោយលើកឡើងថា បុគ្គលិកមិនគ្រប់គ្រាន់ ។

នៅពេលអ្នកដំណើរមកដល់ទីក្រុង Bilbao នៅល្ងាចថ្ងៃទី៩ ខែកញ្ញា ពួកគេបានទៅរង់ចាំទទួលវ៉ាលិសអស់រយៈពេលជាង២ម៉ោង ប៉ុន្តែពួកគេមិនទទួលបានវ៉ាលិសឡើយ ។ លោក Kevin Ampalam អ្នកនាំពាក្យក្រុមហ៊ុនអាកាសចរណ៍ Swiss Airlines បញ្ជាក់ថា វាជាការពិត យន្តហោះរបស់ក្រុមហ៊ុនដែលផ្តល់សេវាកម្មក្នុងនាមក្រុមហ៊ុនអាកាសចរណ៍ Edelweiss បានហោះចេញពីទីក្រុង Zurich ប្រទេសស្វីស និងគ្មានវ៉ាលិសអ្នកដំណើរទាំង១១១នាក់នៅលើយន្តហោះ ដោយសារខ្វះខាតបុគ្គលិកទទួលខុសត្រូវវ៉ាលិសអ្នកដំណើរ ដែលផ្ទុកនៅផ្នែកខាងក្រោមយន្តហោះ ។

លោក Kevin Ampalam បន្តថា ក្រោយពីបុគ្គលិកបម្រើការលើយន្តហោះរង់ចាំឱ្យមានការដឹកជញ្ជូនវ៉ាលិសអ្នកដំណើរមកលើយន្តហោះអស់រយៈពេលជាង១ម៉ោង នៅតែគ្មានឃើញវ៉ាលិសអ្នកដំណើរម្នាក់សោះ ហើយដោយសារហេតុផលទាក់ទងនឹងកាលវិភាគហោះហើរផងនោះ ទើបអ្នកបើកយន្តហោះសម្រេចចិត្តហោះទៅកាន់ទីក្រុង Bilbao ដោយចោលវ៉ាលិសអ្នកដំណើរ ។

លោក Kevin Ampalam បន្ថែមថា ៖ «អ្នកបើកយន្តហោះត្រូវកំណត់ពេលវេលាហោះហើរ គឺយន្តហោះនេះត្រូវទៅទទួលអ្នកដំណើរនៅទីក្រុង Bilbao រួចហោះត្រឡប់មកទីក្រុង Zurich មុនអាកាសយានដ្ឋានបិទពេលយប់ ។ ដូច្នេះ យន្តហោះមិនអាចរង់ចាំវ៉ាលិសអ្នកដំណើរបន្តទៀតទេ ហើយក្រុមហ៊ុនយល់ថា ស្ថានការណ៍នេះបានធ្វើឱ្យអ្នកដំណើរមិនពេញចិត្ត ហើយក៏សូមអរភ័យទោសផងដែរ» ។

អ្នកដំណើរនិយាយថា ៖ «អ្នកបើកយន្តហោះនេះបានសូមអភ័យទោសអ្នកដំណើររឿងការយឺតយ៉ាវ ដោយអះអាងថា បុគ្គលិកមិនគ្រប់គ្រាន់ ប៉ុន្តែពួកគេមិនបានប្រាប់ថា ពួកគេសម្រេចចិត្តបោះចោលវ៉ាលិសទាំងអស់របស់អ្នកដំណើរនៅអាកាសយានដ្ឋានទេ» ។

ចំណែកអ្នកដំណើរផ្សេងទៀតបាននិយាយប្រាប់សារព័ត៌មាននៅទីក្រុង Bilbao ថា ពេលពួកគេទៅដល់គោលដៅ ពួកគេមិនឃើញបុគ្គលិករបស់ក្រុមហ៊ុនអាកាសចរណ៍នេះឡើយ ហើយពួកគេបានរង់ចាំយកវ៉ាលិសអស់ជាង២ម៉ោង ។ ក្រោយមក មានបុគ្គលិកក្រុមហ៊ុនអាកាសចរណ៍ Iberia ប្រទេសអេស្ប៉ាញ ប្រាប់ថា យន្តហោះដែលពួកគេជិះមកបានចុះចតនៅអាកាសយានដ្ឋាន ដោយគ្មានវ៉ាលិសអ្នកដំណើរទេ ។

ចុងក្រោយ អ្នកនាំពាក្យក្រុមហ៊ុនអាកាសចរណ៍ Swiss Airlines លោក Kevin Ampalam និយាយថា លោកមិនអាចបញ្ជាក់ថា អ្នកបើកយន្តហោះមិនបានជូនដំណឹងដល់អ្នកដំណើរអំពីការទុកអីវ៉ាន់ពួកគេនៅអាកាសយានដ្ឋានទីក្រុង Zurich ទេ ។ បច្ចុប្បន្ន ក្រុមហ៊ុនបានវិភាគពីហេតុការណ៍នេះដើម្បីផ្តល់ចម្លើយ និងដោះស្រាយបញ្ហាបន្តទៀត ៕ ប្រភព ៖ Nation Online

បរទេស៖ ថ្មីៗនេះ ក្រុមហ៊ុន Huawei បានប្រកាសពីស្មាតហ្វូនអេក្រង់បត់ Mate X5 ដែលបំពាក់ដោយការតភ្ជាប់ 5G ។

ចាប់តាំងពីត្រូវបានហាមឃាត់ដោយសហរដ្ឋអាមេរិកក្នុងឆ្នាំ ២០២០ ស្មាតហ្វូនរបស់ក្រុមហ៊ុន Huawei មានតែការតភ្ជាប់ 4G ប៉ុណ្ណោះ។ ទោះជាយ៉ាងណាក៏ដោយក្នុងរយៈពេលជាងមួយសប្តាហ៍ក្រុមហ៊ុនបានប្រកាសជាបន្តបន្ទាប់នូវ Mate 60, Mate 60 Pro, 60 Pro+ ហើយថ្មីៗនេះ Mate X5 គាំទ្រដោយ 5G ចំពោះបន្ទះឈីប Kirin 9000s ដែលផលិតនៅលើដំណើរការ 7 nm របស់ SMIC ។ យោងតាមការធ្វើតេស្តដោយអ្នកសរសេរប្លុកជនជាតិចិនលោក Vincent Zhong បានឱ្យដឹងថា Mate X5 ទទួលបានល្បឿនទាញយករហូតដល់មួយ Gbps ។

Mate X5 គឺជាកំណែ 5G របស់ Mate X3 ដែលបានចេញកាលពីខែមីនា នៅពេលដែលឧបករណ៍នេះមិនមានការផ្លាស់ប្តូរក្នុងការរចនា និងទំហំនោះទេ។ នេះគឺជាស្មាតហ្វូនដែលអាចបត់បានស្តើង និងស្រាលបំផុតនៅលើទីផ្សារ ដោយសារតែវាមានកម្រាស់ត្រឹមតែ 5.3 mm ពេលបើក 11.11 mm ពេលបត់ និងមានទម្ងន់ 243 ក្រាម។
ទូរស័ព្ទនេះមាន ៥ ពណ៌គឺ ស,មាស,ខ្មៅ,បៃតង និងស្វាយ ហើយគាំទ្រការជ្រាបទឹកដូច Galaxy Z Fold5 របស់ Samsung ដែរ។

ផលិតផលថ្មីនេះរួមបញ្ចូលនូវកាមេរ៉ាខាងក្រោយចំនួនបីជាមួយនឹងកាមេរ៉ាមេ 50-megapixel ដែលគាំទ្រ OIS, 12-megapixel periscope lens, 5x optical zoom and optical image stabilization និងចុងក្រោយគឺ 13-megapixel super wide-angle lens ។ កាមេរ៉ា Selfie ពីរនៅក្នុងអេក្រង់មេ និងទីពីរមានកម្រិតភាពច្បាស់ 8 មេហ្គាភិចសែលដូចគ្នា។ បន្ថែមពីលើការធ្វើឱ្យប្រសើរឡើងទៅប្រព័ន្ធដំណើរការ 5G Kirin 9000s X5 ក៏មានកំណែ RAM 16 GB និងអង្គចងចាំខាងក្នុងចាប់ផ្តើមពី 256 GB កើនឡើងទ្វេដង។

ការបន្តចេញនូវម៉ូដែលស្មាតហ្វូន 5G ត្រូវបានចាត់ទុកថាជាជំហានដំបូងសម្រាប់ក្រុមហ៊ុន Huawei ក្នុងការវិលត្រឡប់មកកាន់ទីផ្សារស្មាតហ្វូនពិភពលោកវិញ។ ក្រុមហ៊ុនក៏បានបង្កើនការព្យាករណ៍ផលិតកម្មប្រចាំឆ្នាំរបស់ខ្លួនពី 30 លានទូរស័ព្ទក្នុងខែមករាដល់ 38 លានគ្រឿងត្រឹមថ្ងៃទី 11 ខែកញ្ញា។ ក្នុងចំណោមឧបករណ៍ 38 លានគ្រឿងនេះមាន 20 លានគ្រឿងត្រូវបានដឹកជញ្ជូន។ Mate 60 Pro ដែលទើបនឹងចេញថ្មីក៏មានចំនួន 6 លានគ្រឿងក្នុងចំណោម 18 លានគ្រឿងដែលនៅសេសសល់ ដែលបង្ហាញថាក្រុមហ៊ុន Huawei មានទំនុកចិត្តលើសមត្ថភាពផលិតបន្ទះឈីបរបស់ SMIC ។ ទោះជាយ៉ាងណាក៏ដោយ តម្លៃទូរស័ព្ទថ្មី Mate X5 មិនត្រូវបានគេប្រកាសទេ ប៉ុន្តែអ្នកប្រើប្រាស់អាចបញ្ជាទិញជាមុននៅលើវេទិការបស់ចិន Vmall ដោយដាក់ប្រាក់កក់ ១,០០០ យន់សិន (ដែលស្មើនឹង ១៣៧ ដុល្លារអាមេរិក)៕
ប្រភព៖vnexpress

ប្រទេសថៃ ៖ តាមរបាយការណ៍របស់សមាគមទូរគមនាគមន៍ហិរញ្ញវត្ថុអន្តរធនាគារពិភពលោក (SWIFT) ដែលផ្តល់សេវាកម្ម និងប្រតិបត្តិការអាជីវកម្មហិរញ្ញវត្ថុអន្តរធនាគារនៅជុំវិញពិភពលោក បង្ហាញថា ប្រាក់បាតរបស់ប្រទេសថៃបានស្ថិតក្នុងលំដាប់កំពូលរូបិយប័ណ្ណទាំង១០ លើពិភពលោក សម្រាប់ការទូទាត់ជាចម្បង (Major world payment currencies) ក្នុងនោះសមាមាត្រនៃប្រាក់បាតសម្រាប់ការទូទាត់លើទីផ្សារពិភពលោក ស្មើនឹង១,០៣% ។

ទិន្នន័យរបស់ SWIFT បានចុះផ្សាយនៅខែកក្កដា ឆ្នាំ២០២៣ បង្ហាញថា សមាមាត្រនៃប្រាក់បាតសម្រាប់ការទូទាត់លើទីផ្សារពិភពលោក ស្មើនឹង១,០៣% ។ ដូច្នេះ វាបានកើនឡើងយ៉ាងខ្លាំងចាប់ពីខែកក្កដា ឆ្នាំ២០២១ ដែលពេលនោះ សមាមាត្រនៃប្រាក់បាតសម្រាប់ការទូទាត់លើទីផ្សារពិភពលោក ស្មើត្រឹមតែ០,៧៥% ប៉ុណ្ណោះ ។

លើសពីនេះ ប្រាក់បាតរបស់ប្រទេសថៃ គឺជាប្រាក់ដែលប្រទេសជិតខាងរបស់ថៃ ដូចជា ឡាវ មីយ៉ាន់ម៉ា និងកម្ពុជា បានចាយវាយក្នុងឋានៈជាប្រាក់គោលកាន់តែទូលំទូលាយទៀតផង ។ ជាក់ស្តែង នៅប្រទេសឡាវ ពលរដ្ឋឡាវបានចាយវាយប្រាក់បាតក្នុងជីវិតប្រចាំថ្ងៃ រហូតដល់រដ្ឋាភិបាលដាស់តឿនកុំឱ្យពលរដ្ឋចាយវាយប្រាក់បរទេស ។ ទោះយ៉ាងណា ប្រាក់បាតបានឡើងថ្លៃខ្លាំង ហើយពលរដ្ឋឡាវអាចរក្សាទុកប្រាក់បាត បើប្រៀបធៀបជាមួយប្រាក់គីបដែលធ្លាក់ថ្លៃជាបន្តបន្ទាប់ ហើយឡាវបានប្រឈមនឹងអតិផរណាខ្ពស់ ។

កាលពីថ្ងៃទី១៤ ខែសីហា ឆ្នាំ២០២៣ ធនាគារកណ្តាលប្រទេសមីយ៉ាន់ម៉ាបានចេញសេចក្តីប្រកាសអនុញ្ញាតឱ្យចាយប្រាក់បាតក្នុងធនាគារ ដែលទទួលបានការអនុញ្ញាតឱ្យប្រតិបត្តិការរូបិយប័ណ្ណបរទេស ក្នុងគោលបំណងសម្រួលការទូទាត់ជាអន្តរជាតិ និងផ្តល់ភាពងាយស្រួលសម្រាប់បញ្ជីធនាគារផងដែរ ។

កាលពីថ្ងៃទី៦ ខែមិថុនា ឆ្នាំ២០២៣ ប្រទេសកម្ពុជា និងថៃ បានចាប់ផ្តើមការទូទាត់ប្រាក់រៀល និងប្រាក់បាត តាមរយៈការស្គេន QR Code ឆ្លងកាត់ប្រទេសទាំងពីរ ។ ដូច្នេះ ការទូទាត់នេះនឹងជួយឱ្យពលរដ្ឋថៃអាចទិញផលិតផលនៅកម្ពុជា ដោយប្រើប្រាស់ប្រាក់បាតបាន ។

នេះជាបញ្ជីរូបិយប័ណ្ណសម្រាប់ការទូទាត់សំខាន់ៗ និងសមាមាត្រនៃការទូទាត់លើពិភពលោក ៖
១-ប្រាក់ដុល្លារ សហរដ្ឋអាមេរិក មានសមាមាត្រនៃការទូទាត់លើពិភពលោក ស្មើ៤៦,៤៦%
២-ប្រាក់អឺរ៉ូ សហភាពអឺរ៉ុប មានសមាមាត្រនៃការទូទាត់លើពិភពលោក ស្មើ២៤,៤២%
៣-ប្រាក់ Pound Sterling (អង់គ្លេស) មានសមាមាត្រនៃការទូទាត់លើពិភពលោក ស្មើ៧,៦៣%
៤-ប្រាក់យេន ជប៉ុន មានសមាមាត្រនៃការទូទាត់លើពិភពលោក ស្មើ៣,៥១%
៥-ប្រាក់យាន់ ចិន មានសមាមាត្រនៃការទូទាត់លើពិភពលោក ស្មើ៣,០៦%
៦-ប្រាក់ដុល្លារ កាណាដា មានសមាមាត្រនៃការទូទាត់លើពិភពលោក ស្មើ២,២៦%
៧-ប្រាក់ដុល្លារ ហុងកុង មានសមាមាត្រនៃការទូទាត់លើពិភពលោក ស្មើ១,៧៥%
៨-ប្រាក់ដុល្លារ អូស្ត្រាលី មានសមាមាត្រនៃការទូទាត់លើពិភពលោក ស្មើ១,៥៧%
៩-ប្រាក់ដុល្លារ សិង្ហបុរី មានសមាមាត្រនៃការទូទាត់លើពិភពលោក ស្មើ១,០៩%
១០-ប្រាក់បាត ថៃ មានសមាមាត្រនៃការទូទាត់លើពិភពលោក ស្មើ១,០៣% ៕

ប្រភព ៖ The better