ខេត្តកំពង់ស្ពឺ៖ អ្នកចម្រៀង ឈ្មោះ ប៊ុត សីហា មាន ឈ្មោះបោះសម្លេង ថែមទាំងប្រឡងជាប់ចំណាត់ថ្នាក់លេខ១ផងនោះ រួមជាមួយបក្ខពួកម្នាក់ទៀតត្រូវបានកម្លាំងនគរបាលស្រុកគងពិសីឃាត់ខ្លួនជាមួយនិងគ្រឿងញៀនមួយចំនួន កសាងសំណុំរឿងចាត់ការបន្ត។

ការឃាត់ខ្លួនអ្នកចម្រៀង ប៊ុត សីហា និងបក្ខពួកធ្វើឡើងកាលពីវេលាម៉ោង០៤និង១០នាទីរសៀលថ្ងៃទី១២ ខែ កញ្ញា ឆ្នាំ២០២៣ នៅចំណុចភូមិត្រាំខ្នា ឃុំស្នំក្រពើ ស្រុកគងពិសី ខេត្តកំពង់ស្ពឺ។

នគរបាលស្រុកគងពិសីបានឱ្យដឹងថា កម្លាំងនគរបាលស្រុកគងពិសីបង្ក្រាបមុខសញ្ញាសង្ស័យពាក់ព័ន្ធនឹងគ្រឿងញៀន បាន២នាក់ ៖

ទី០១-ឈ្មោះ ឆន វល្លិន ភេទ ប្រុស អាយុ៣៨ឆ្នាំមុខរបរមិនពិតប្រាកដ រស់នៅភូមិត្រាំខ្នា ឃុំស្នំក្រពើ ស្រុកគងពិសីនិងទី០២-ឈ្មោះ ប៊ុត សីហា ភេទ ប្រុស អាយុ ២៩ឆ្នាំ(ដែលគេស្គាល់ច្បាស់ថាជាអ្នកចម្រៀងប្រឡង ជាប់លេខ១ក្នុងកម្មវិធីទូរទស្សន៍ល្បីមួយ) រស់នៅភូមិព្រះម្លប់ ឃុំភារីមានជ័យ ស្រុកបសេដ្ឋ ខេត្តកំពង់ស្ពឺ។

នគរបាលស្រុកបាននិយាយបន្តទៀតថា នៅមុនពេលឃាត់ខ្លួនក្រុមជនសង្ស័យបានគឺកម្លាំងនគរបាលស្រុកល្បាតតាមមូលដ្ឋាន ក៏ប្រទះឃើញជនសង្ស័យទាំងពីរនាក់មានការសង្ស័យសួរនាំឆែកឆេរ ដកហូតបានម្សៅក្រាមពណ៌សថ្លាសង្ស័យជាគ្រឿងញៀនចំនួន ៥កញ្ចប់ ក្នុងនោះ(៣តូច និង២មធ្យម), ទូរស័ព្ទ៣ គ្រឿង រួមនឹងឧបករណ៍ប្រើប្រាស់ គ្រឿងញៀនមួយចំនួនទៀត។

នគរបាលបញ្ជាក់ថា បច្ចុប្បន្ននេះក្រុមជនសង្ស័យរួមជាមួយវត្ថុតាងការិយាល័យជំនាញ កំពុងកសាង សំណុំរឿងចាត់ការបន្តតាមផ្លូវច្បាប់

លោក ទួន សុគា ប្រធានក្លឹបបណ្តុះបណ្តាលសិល្បៈវប្បធម៌ខ្មែរដែលមានទីតាំងនៅខេត្តសៀមរាបដែលមហាជនស្គាល់តាមរយៈកូនស្វាតូច បានអំពាវនាវដល់សប្បុរសជននានាជួយបរិច្ចាគដើម្បីទ្រទ្រង់ក្លិបក្រោយពីរកចំណូលពុំសូវបានច្រើន ខណៈក្នុងមួយខែៗត្រូវចំណាយចូលខ្ទង់១ពាន់ដុល្លារទាំងថ្លៃទឹកភ្លើង និងទីតាំង។

ថ្លែងប្រាប់សារព័ត៌មាន KBN NEWS តាមប្រព័ន្ធតេលេក្រាមនាថ្ងៃទី១២ ខែកញ្ញា លោក ទួន សុគា ថាក្នុងខែកក្កដា និងសីហា រយៈពេល២ខែនេះក្លិបពុំសូវទទួលបានប្រាក់ចំណូល ច្រើនពីការសម្តែងនោះទេ ពោលគឺបានចំណូលតិចតួចបំផុតហើយត្រូវបែងចែកច្រើនដោយជួយឧបត្ថម្ភខ្លះៗទៅដល់សិស្សដែលបានចេញទៅសម្តែង និងគ្រូបង្ហាត់ដែលពួកគាត់ស្ម័គ្រចិត្តមកជួយបង្រៀនក្មេង។

ប្រធានក្លិបរូបនេះបន្តថា តាំងពីអំពាវនាវសប្បុរសជនជួយសាងសង់រោងថ្មីសម្រាប់ក្មេងៗមកហ្វឹកហាត់ដើម្បីឱ្យមានទីធ្លាធំជាងមុននៅមិនទាន់ទទួលបាននៅឡើយ ប្រការនេះ លោកត្រូវសន្សំលុយខ្លះៗទិញសម្ភារៈតិចៗបង់រំលោះ។ ថវិកាដែលទទួលបានពីការបរិច្ចាគតិចតួចពីសប្បុរសជន និងអាណាព្យាបាលសិស្សមួយចំនួនរួមទាំងខែណាដែលរកចំណូលបានច្រើនលោកឆ្លៀតសន្សំតិចៗតែពេលនេះត្រូវអក់ខាននិងអាចបញ្ឃប់ពាក់កណ្តាលទីក្នុងការសាងសង់រោងថ្មីសម្រាប់សិស្សហាត់ដោយសារពុំសូវទទួលបានចំណូល និងមិនបានចេញទៅសម្តែងច្រើនដោយសារតែជាខែភ្លៀងហើយត្រូវចំណាយច្រើនក្នុងមួយខែៗ។

តាមការឱ្យដឹងពីលោក ទួន សុគា បានឱ្យដឹងថាថ្លៃលោកជួលទីតាំង ទឹកភ្លើង និងចំណាយផ្សេងៗក្នុងមួយខែចូលខ្ទង់១ពាន់ដុល្លារ ខណៈចំណូលរកបានទៅតាមកម្មវិធីទៀត ប្រសិនជាកម្មវិធីធំគេអញ្ជើញក៏ទទួលបានច្រើនចំណែកឯកម្មវិធីខ្លះតូចៗល្មមៗគឺទៅតាមសទ្ធាជ្រះថ្លារបស់កម្មវិធី។

ជាមួយគ្នានេះដែរ លោកក៏បានជម្រាបជូនពីការសម្ដែងសិល្បៈសប្បុរសធម៌ក្រោមប្រធាន”កុមារនៃក្ដីសង្ឃឹម” រៀបចំដោយក្រុមសិល្បៈ Roof Dance Team នឹងធ្វើឡើងនៅថ្ងៃទី ១៧ ខែកញ្ញា ឆ្នាំ២០២៣នៅខេត្តសៀមរាបសម្ដែងដោយសិស្សានុសិស្សនៃក្លឹបបណ្ដុះបណ្ដាលសិល្បៈវប្បធម៌ខ្មែរអង្គដែលនឹងបង្ហាញពីទស្សនីយភាពដូចជា របាំក្បាច់បុរាណខ្មែរ
របាំប្រពៃណី ល្ខោនខោល ក្បាច់គុនល្បុក្កតោ ដែលសប្បុរសជនអាចចូលរួមបរិច្ចាគជាសម្ភារៈផ្សេងៗនិងថវិកាផងដែរ។ ប្រធានក្លិបរូបនេះក៏បានបន្ថែមដែរថាមកទល់ពេលនេះមានសិស្សមកចុះឈ្មោះចូលរួមហាត់ពីសិល្បៈបុរាណខ្មែរកាន់តែច្រើនឡើងៗដែលមានចំនួន១០៨នាក់ហើយពេលនេះ។

គួរបញ្ជាក់ផងដែរថា ក្លឹបបណ្តុះបណ្តាលសិល្បៈវប្បធម៌ខ្មែរមានទីតាំងស្ថិតនៅភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប៕

ប្រាសាទស្លុតតី ឬ ប្រាសាទថ្នមប្ដី ស្ថិតនៅក្នុងឃុំដា ស្រុកកំពង់លែង ខេត្តកំពង់ឆ្នាំង ក្បែរជើងភ្នំទូកមាស ចម្ងាយប្រមាណ១គីឡូម៉ែត្រ ខាងត្បូងភូមិជ្រលង និងមានចម្ងាយប្រហែល២០គីឡូម៉ែត្រ ពីទីរួមស្រុកកំពង់លែង។

ប្រាសាទថ្នមប្ដី មានប្រាង្គចំនួន២ កសាងឡើងពីឥដ្ឋ ដែលត្រូវបានកសាងឡើងទន្ទឹមគ្នា និងបែរមុខទៅទិសខាងកើត។ ប្រាង្គទាំងពីរនេះ មានទំហំ ៣.៦ម៉ែត្រ បួនជ្រុង និងមានកម្ពស់១០ម៉ែត្រ។នៅប្រាង្គខាងឆ្វេង មានទ្វារបញ្ឆោតចំនួន៣ ដែលស្ថិតនៅទិសខាងលិច ខាងជើង និងទិសខាងត្បូង ហើយនៅមានរូបរាងនៅឡើយ។ រីឯគ្រឿងតុប តែងផ្សេងៗ ដូចជាក្បាច់ផ្ដែរ សរសរពេជ្រ បានបាក់បែក។

ចំណែកប្រាង្គផ្នែកខាងស្ដាំ មានសភាពចាស់ទ្រុឌទ្រោមខ្លាំង ខូចខាតស្ទើរតែទាំងស្រុង ដែលសព្វថ្ងៃ នៅមានតែទ្វារបញ្ឆោត២ប៉ុណ្ណោះនៅសល់ គឺនៅផ្នែកខាងជើង និងខាងត្បូង ខណៈទ្វារបញ្ឆោតផ្នែកខាងលិច បានខូចខាតទាំងស្រុង។ឈ្មោះថា “ថ្នមប្ដី” គឺជាឈ្មោះដែលអ្នកស្រុករស់នៅក្នុងក្បែរប្រាសាទហៅតំបន់នេះ ហើយអ្នកស្រាវជ្រាវសម័យក្រោយក៏ហៅតាមអ្នកស្រុកថាដូច្នោះដែរ។ រឿងនោះនិទានថា “កាលពីព្រេងនាយ មានបុរសម្នាក់ មានប្រពន្ធពីរនាក់រស់នៅក្នុងប្រាសាទនេះ។ ក្រោយមក បុរសនោះក៏កើតជំងឺឃ្លង់ៗ ដោយមានភក្ដីភាពស្មោះស្ម័គ្រ នារីទាំងពីរនាក់ជាប្រពន្ធពុំបានបោះបង់បុរសជាប្ដីដែលកើតឃ្លង់នោះឡើយ ពោលគឺនាងទាំងពីរ នៅមើលថែទាំ ច្របាច់ដៃជើង ងូតទឹកឱ្យប្ដីជាប្រចាំ។

ក្រោយមក ដោយមើលឃើញពីភក្ដីភាពនេះហើយ ទើបគេហៅនាងទាំងពីរនាក់ថា នាងថ្នមប្ដី ហើយក៏ជាប់ឈ្មោះថា “ថ្នមប្ដី” នៅប្រាសាទនេះរហូតមក។ បន្ទាប់ពីបានស្ដាប់រឿងព្រេងនិទានរបស់អ្នកស្រុករួចមក យើងយល់ថារឿងនេះទំនងកើតចេញនៅពេលដែលអ្នកស្រុកបាន ឃើញផ្តែរមួយនៅលើទ្វារប្រាសាទ”៕