ប្រទេសឡាវ ៖ សារព័ត៌មាន Xinhua បានចុះផ្សាយថា ក្រសួងសន្តិសុខសាធារណៈប្រទេសចិនរាយការណ៍ថា ជនសង្ស័យបោកប្រាស់តាមអនឡាញត្រូវបានចាប់ខ្លួន ក្នុងអំឡុងពេលការបង្ក្រាបលើកចុងក្រោយនៅប្រទេសឡាវ ហើយឡាវបានបញ្ជូនជនសង្ស័យទាំងនេះត្រឡប់មកប្រទេសចិនវិញចំនួន១៧៩នាក់ កាលពីថ្ងៃទី១១ ខែកញ្ញា ឆ្នាំ២០២៣ ។

របាយការណ៍បញ្ជាក់ថា ជនសង្ស័យទាំងនេះជាប់ពាក់ព័ន្ធនឹងករណីបោកប្រាស់តាមអនឡាញឆ្លងកាត់ព្រំដែនចំនួន២៧០ករណី ។ ពួកគេត្រូវបានឃាត់ខ្លួនក្នុងអំឡុងពេលប្រតិបត្តិការរួមគ្នារវាងសមត្ថកិច្ចចិន និងឡាវ ក្នុងរយៈពេលប៉ុន្មានខែកន្លងមក ។

កាលពីខែកក្កដា ឆ្នាំ២០២៣ ក្រសួងសន្តិសុខសាធារណៈប្រទេសចិនបានបញ្ជូនក្រុមអ្នកជំនាញទៅកាន់ប្រទេសឡាវ ដើម្បីធ្វើការរួមគ្នាជាមួយភាគីឡាវពាក់ព័ន្ធនឹងគម្រោងសហការអនុវត្តច្បាប់ ។ ក្រុមអ្នកជំនាញចិនបានគាំទ្រឱ្យសមត្ថកិច្ចឡាវធ្វើការបង្ក្រាបការបោកប្រាស់តាមអនឡាញចំនួន១០លើក, បិទទីតាំងឧក្រិដ្ឋកម្ម១០កន្លែង ព្រមទាំងចាប់ខ្លួនជនសង្ស័យផងដែរ ក្នុងនោះបានចាប់ខ្លួនប្រធានក្រុម ឬសមាជិកសំខាន់ៗនៃក្រុមឧក្រិដ្ឋកម្មចំនួន៩នាក់ ។

ក្រសួងសន្តិសុខសាធារណៈប្រទេសចិនសន្យាថា នឹងពង្រឹងកិច្ចសហប្រតិបត្តិការជាមួយបណ្តាប្រទេស និងតំបន់ពាក់ព័ន្ធផ្សេងៗដើម្បីជំរុញប្រតិបត្តិការបង្ក្រាបឧក្រិដ្ឋកម្មឆ្លងកាត់ព្រំដែនបន្តទៀត ៕ ប្រភព ៖ TNN World

រដ្ឋធានីណៃពិដោរ៖ ចាប់តាំងពីពួកឧត្ដមសេនីយ៍យោធា បានដឹកនាំកងទ័ព ធ្វើរដ្ឋប្រហារ បណ្ដេញរដ្ឋាភិបាលស៊ីវិល ជាប់ឆ្នោតតាមបែបលទ្ធិប្រជាធិបតេយ្យ ដឹកនាំដោយលោកស្រី អ៊ោង សានស៊ូជី (Aung San Suu Kyi) កាលពីថ្ងៃទី១ ខែកុម្ភៈ ឆ្នាំ២០២១ រហូតមក ហើយឥឡូវនេះ រដ្ឋាភិបាលសឹករបស់ប្រទេសអាស៊ានមួយនេះ បានបង្កើតច្បាប់ថ្មី បង្ខំឲ្យពលករចំណាកស្រុក ធ្វើការនៅក្រៅប្រទេស ត្រូវតែយកប្រាក់ចំណូលរបស់ខ្លួន បង់ប្រាក់តាមគណនីរបស់ពួកគេ ចូលមកក្នុងធនាគាររបស់ប្រទេសអាស៊ានមួយនេះ ចំនួន២៥ភាគរយ ដោយត្រូវប្ដូរជារូបិយប័ណ្ណរបស់ប្រទេស ក្រោមតម្លៃទីផ្សារ ជាង៤០ភាគរយ។

ទីភ្នាក់ងារព័ត៌មានឯករាជ្យរបស់មីយ៉ាន់ម៉ា The Irrawaddy បានរាយការណ៍ ថា ប្រាក់ដែលកម្មករមីយ៉ាន់ម៉ា ផ្ញើចូលមកក្នុងគណនីរបស់ពួកគេ នៅតាមធនាគាររបស់ប្រទេសមីយ៉ាន់ម៉ា នឹងត្រូវប្ដូរជាប្រាក់ខ្យាត (Kyat) របស់មីយ៉ាន់ម៉ា តាមអត្រាកំណត់ផ្លូវការរបស់របបយោធាដោយថោកជាង៤០ភាគរយ បើធៀបនឹងអត្រាប្ដូរប្រាក់ នៅលើទីផ្សារ។ ពួកយោធា បានកំណត់អត្រាប្តូរប្រាក់ គឹ១បាតប្រាក់ថៃ ស្មើនឹងត្រឹមតែ៥៦ខ្យាតរបស់ប្រាក់មីយ៉ាន់ម៉ា ខណៈអត្រាប្ដូរប្រាក់ នៅលើទីផ្សារ ប្រហែល១០០ខ្យាត នៅក្នុង១បាត។

រដ្ឋាភិបាលយោធាមីយ៉ាន់ម៉ា កំពុងតែទាមទារឱ្យកម្មករ និង និយោជិត ធ្វើការនៅបរទេស ត្រូវតែបង់ប្រាក់ យ៉ាងហោចណាស់ ចំនួន២៥ភាគរយ នៃប្រាក់ចំណូលតាមរូបិយប័ណ្ណបរទេស ដែលពួកគេទទួលបាន ហើយផ្ញើតាមរយៈប្រព័ន្ធធនាគាររបស់ប្រទេសមីយ៉ាន់ម៉ា។

សារព័ត៌មាន The Irrawaddy ជាទីភ្នាក់ងារព័ត៌មានឯករាជ្យរបស់មីយ៉ាន់ម៉ា បានរាយការណ៍ ថា ប្រាក់ដែលកម្មករមីយ៉ាន់ម៉ាផ្ញើមក នឹងត្រូវប្ដូរទៅជាប្រាក់ខ្យាត (Kyat) របស់មីយ៉ាន់ម៉ា តាមអត្រាផ្លូវការ ថោកជាង៤០ភាគរយ បើធៀបនឹងអត្រាទីផ្សារ ត្រូវបានប្រើប្រាស់យ៉ាងទូលំទូលាយ។ ស្ថាប័នហិរញ្ញវត្ថុតភ្ជាប់ជាមួយរដ្ឋាភិបាល នឹងមានលទ្ធភាពទទួលបានប្រភពមូលនិធិទាំងនេះ ខណៈរបបយោធាមីយ៉ាន់ម៉ា អាចនឹងប្រើប្រាស់ សម្រាប់ពង្រឹងហិរញ្ញវត្ថុ ដែលកំពុងតែរង្គោះរង្គើ។ រីឯផលប៉ះពាល់ អាចនឹងមានធ្ងន់ធ្ងរ មកលើជនជាតិមីយ៉ាន់ម៉ា ប្រមាណ២លាននាក់ ដែលកំពុងតែធ្វើការ ដោយស្របច្បាប់ នៅក្នុងប្រទេសថៃ ក៏ដូចជា ផលប៉ះពាល់ដល់ក្រុមគ្រួសាររបស់ពួកគេ នៅក្នុងប្រទេស ផងដែរ។

លោក កូ ណាយ លីន ធូ (Ko Nay Lin Thu) គណៈកម្មាធិការសម្ព័ន្ធជំនួយ ជួយដល់ពលករចំណាកស្រុក មានមូលដ្ឋាននៅក្នុងប្រទេសថៃ បានថ្កោលទោស ចំពោះច្បាប់ថ្មីរបស់រដ្ឋាភិបាលសឹកមីយ៉ាន់ម៉ា ដោយចាត់ទុក ថា វាជាសកម្មភាពគាបសង្កត់ និង ជញ្ជក់កម្លាំងញើសឈាមរបស់កម្មករចំណាកស្រុក។

លោក កូ ណាយ លីន ធូ បានបញ្ជាក់ ថា «យើងមិនចង់ផ្តល់ប្រាក់ ដែលពួកយើងរកបានមកទាំងលំបាក ទៅឲ្យពួកគេនោះឡើយ។ យើងត្រូវបង់ពន្ធលើប្រាក់ចំណូលរបស់យើងរកបាន នៅក្នុងប្រទេសថៃ។ រីឯការផ្ញើប្រាក់របស់យើង នឹងត្រូវកាត់បន្ថយ នៅពេលនេះ។ វិធានការដ៏អាក្រក់បែបនេះ ជាការមិនអាចទទួលយកបាននោះឡើយ។ នេះជាការកេងប្រវ័ញ្ច និង ជញ្ជក់កម្លាំងញើសឈាមរបស់ពលករចំណាកស្រុករបស់យើង»។

រដ្ឋាភិបាលយោធាមីយ៉ាន់ម៉ា បានចេញបទប្បញ្ញត្តិថ្មី ដោយចែង ថា ចាប់ពីថ្ងៃទី១ ខែកញ្ញា ឆ្នាំ២០២៣ទៅ ជនចំណាកស្រុក ដែលនឹងត្រូវចាកចេញពីប្រទេសមីយ៉ាន់ម៉ា ទៅធ្វើការនៅបរទេស ត្រូវតែបើកគណនី នៅក្នុងធនាគារ គ្រប់គ្រងដោយធនាគារកណ្តាលមីយ៉ាន់ម៉ា ហើយត្រូវតែបញ្ជូនប្រាក់ចំណូលរបស់ពួកគេ ចំនួន២៥ភាគរយ មកកាន់គណនីធនាគារមីយ៉ាន់ម៉ា។

ធនាគារ CB Bank ជាធនាគារឯកជនដ៏ធំបំផុតមួយរបស់ប្រទេសមីយ៉ាន់ម៉ា បានប្រាប់ដល់ពលករចំណាកស្រុក នៅបរទេសរួចហើយ ថា កម្មករទាំងអស់ ត្រូវតែបង់ប្រាក់ មួយភាគបួននៃប្រាក់ខែរបស់ពួកគេរកបាន ទាំងប្រាក់ប្រចាំខែ ឬ រៀងរាល់៣ខែម្តង តាមរយៈបណ្តាញ«ផ្លូវការ»នេះ។ រីឯអត្រាប្តូរប្រាក់ នឹងត្រូវយោងតាមការកំណត់របស់របបយោធា ដោយតម្លៃក្នុង១បាតប្រាក់ថៃ ស្មើនឹងត្រឹមតែ៥៦ខ្យាតរបស់ប្រាក់មីយ៉ាន់ម៉ា ខណៈអត្រាប្ដូរប្រាក់ នៅលើទីផ្សារ ប្រហែល១០០ខ្យាត នៅក្នុង១បាតរបស់ប្រាក់ថៃ។

ជនចំណាកស្រុកមីយ៉ាន់ម៉ា ម្នាក់ៗ អាចរកប្រាក់ឈ្នួលបាន ចំនួន ២០ ០០០បាត នៅក្នុងមួយខែ ហើយពួកគេ នឹងត្រូវផ្ញើប្រាក់ ចំនួន ៥០០០បាត តាមរយៈប្រព័ន្ធធនាគារផ្លូវការរបស់មីយ៉ាន់ម៉ា។ ធនាគារមីយ៉ាន់ម៉ា នឹងប្ដូរទៅជាប្រាក់របស់ប្រទេស ត្រឹមតែ ២៨០ ០០០ខ្យាត ខណៈប្រតិបត្តិករប្តូរប្រាក់គ្មានអាជ្ញាប័ណ្ណ នឹងប្ដូរបាន រហូតដល់ទៅជិត ៥០០ ០០០ខ្យាត សម្រាប់ចំនួនតម្លៃដូចគ្នានេះ។

សេចក្តីប្រកាសដដែលនេះ បានអះអាង ថា សម្រាប់អ្នកនៅក្រៅប្រទេសរួចហើយ មិនបានអនុវត្តតាមច្បាប់ថ្មីនេះ នឹងត្រូវហាមឃាត់ មិនអនុញ្ញាតឱ្យចេញទៅធ្វើការ នៅបរទេស នៅក្នុងរយៈពេល៣ឆ្នាំ ក្រោយប័ណ្ណការងារបច្ចុប្បន្នរបស់ពួកគេ ផុតកំណត់។

បន្ថែមពីលើនេះ របបសឹកមីយ៉ាន់ម៉ា ក៏បានណែនាំដល់ទីភ្នាក់ងារជ្រើសរើសបុគ្គលិក ឱ្យត្រួតពិនិត្យឡើងវិញ លើកិច្ចសន្យារបស់ក្រុមហ៊ុន ជាមួយពលករចំណាកស្រុក ហើយត្រូវតែទទួលខុសត្រូវ នៅក្នុងការផ្ទេរប្រាក់ ចំនួន២៥ភាគរយ តាមរយៈបណ្ដាញប្រព័ន្ធធនាគារផ្លូវការរបស់មីយ៉ាន់ម៉ា៕

រដ្ឋាភិបាលមីយ៉ាន់ម៉ា កំពុងតែផ្តល់នូវការលើកទឹកចិត្តមួយចំនួន ដោយនិយាយ ថា អ្នកដែលបានផ្ញើប្រាក់ តាមរយៈប្រព័ន្ធធនាគារផ្លូវការ ឬ អ្នកផ្តល់សេវាហិរញ្ញវត្ថុ មានអាជ្ញាប័ណ្ណ ចេញពីធនាគារកណ្តាល អាចវិនិយោគ និង ទិញអចលនទ្រព្យ នៅក្នុងប្រទេសមីយ៉ាន់ម៉ា ដោយមិនចាំបាច់បង់ពន្ធ។

ប្រទេសថៃ ៖ កាលពីថ្ងៃទី១៣ ខែកញ្ញា ឆ្នាំ២០២៣ សមត្ថកិច្ចប្រទេសថៃប្រមាណ៣០នាក់បាននាំគ្នាចុះត្រួតពិនិត្យនៅតាមកន្លែងលក់ដូរផ្សេងៗ ក្រោយពីទទួលពាក្យបណ្តឹងពីពលរដ្ឋថា មានជនបរទេសលួចចូលមករកស៊ីលក់ដូរទំនិញខុសច្បាប់នៅមុខហាង ។ ជនបរទេសភាគច្រើនបានរស់នៅម្តុំមជ្ឈមណ្ឌលពាណិជ្ជកម្ម MBK, ផ្លូវព្យ៉ាថៃ, តំបន់ប៉ាធុមវ៉ាន់ និងវ៉ាងម៉ៃ ក្រុងបាងកក ហើយពួកគេអាចទំនាក់ទំនងជាភាសាថៃបានទៀតផង។សមត្ថកិច្ចថៃបានពង្រាយកម្លាំងនៅតាមចំណុចគោលដៅផ្សេងៗ និងអាចចាប់ខ្លួនជនបរទេសដែលលួចចូលមកប្រកបមុខរបរលក់ដូរខុសច្បាប់នៅមុខហាង ។ ក្នុងអំឡុងពេលសមត្ថកិច្ចតាមចាប់ខ្លួនជនបរទេសទាំងនេះ ពួកគេមួយចំនួនបានប្រើអាយកូមផ្តល់ដំណឹងទៅកាន់មិត្តភក្តិផ្សេងទៀតឱ្យរត់គេចខ្លួន ។ ជំហានដំបូង សមត្ថកិច្ចអាចចាប់ជនបរទេសបានចំនួន២០នាក់ គឺជនជាតិមីយ៉ាន់ម៉ា ហើយសមត្ថកិច្ចបានបញ្ជូនជនជាតិមីយ៉ាន់ម៉ាទាំងអស់ទៅសាកសួរនៅស្ថានីយប៉ូលិសប៉ាធុមវ៉ាន់ ។ ការរកស៊ីលក់ដូរ គឺជាមុខរបរដែលប្រទេសថៃមិនអនុញ្ញាតឱ្យជនបរទេសធ្វើទេ ព្រោះជាការដណ្តើមការងាររបស់ជនជាតិថៃ និងរំលោភមាត្រា៨ នៃច្បាប់ប្រទេសថៃ ។

ការិយាល័យអន្តោប្រវេសន៍ថៃបានស្នើឱ្យពលរដ្ឋទាំងអស់ជួយតាមដាន និងផ្តល់ព័ត៌មានមកឱ្យសមត្ថកិច្ច អំពីការរស់នៅ និងប្រកបមុខរបរខុសច្បាប់របស់ជនបរទេស ។ ការិយាល័យអន្តោប្រវេសន៍បានប្រកាសទៅកាន់ពលរដ្ឋថា ប្រទេសថៃមានវិធានការត្រួតពិនិត្យ រឹតបន្តឹង និងបង្ក្រាបរាល់បទល្មើសផ្សេងៗ រួមទាំងត្រួតពិនិត្យជនបរទេសដែលមានអាកប្បកិរិយាមិនសមរម្យ, ប្រព្រឹត្តខុសច្បាប់, បង្កគ្រោះថ្នាក់ដល់ការរស់នៅដោយស្ងប់សុខ សុវត្ថិភាព និងទ្រព្យសម្បត្តិរបស់ប្រជាពលរដ្ឋ ឬធ្វើឱ្យខូចមុខមាត់ប្រទេសជាតិ ។ ហេតុនេះ បើពលរដ្ឋថៃបានប្រទះឃើញជនបរទេសប្រព្រឹត្តអំពើទាំងអស់នេះ អាចផ្តល់ដំណឹងមកកាន់ការិយាល័យអន្តោប្រវេសន៍ តាមរយៈលេខទូរស័ព្ទបន្ទាន់ ៕ ប្រភព ៖ khaosod

ក្រោយពីក្រុមហ៊ុន Apple បញ្ចេញ iPhone15 ភ្លាម បណ្តាប្រទេសមួយចំនួននៅក្នុងទ្វីបអឺរ៉ុបបារាំង អល្លឺម៉ង់ និងអេស្បាញប្រកាសហាមឃាត់ការលក់ iPhone12 ជាបន្តទៀត ក្រោយពីរកឃើញថា iPhone12 បានកើតឡើងកម្រិតជាតិវិទ្យុសកម្មខ្ពស់។

អជ្ញាធរបារាំង បានដាក់ពាក្យបណ្តឹងទៅកាន់ក្រុមហ៊ុន Apple ក្រោយពីបានធ្វើការពិសោធន៍ឃើញថា iPhone12 បានផ្ទុកប្រេកង់ជាតិវិទ្យុសកម្មខ្ពស់ លើសពីច្បាប់ ដែលបានអនុម័តកាលពីឆ្នាំ២០២០ ហេតុដូច្នេះអជ្ញាធរបារាំងបានហាមដាច់ក្នុងការនាំចូល iPhone12 ជាបន្តទៀត។

ទាក់ទងនឹងរឿងនេះ Apple ក៏បានចេញមុខបកស្រាយ៖”កាលពីឆ្នាំ២០២០ យើងបានធ្វើការតេស្តសាកល្បង ដោយមានដៃគូ៣ចូលរួមគឺ Apple អជ្ញាធរបារាំង និងសហគមអឺរ៉ុប ដោយពេលនោះភាគីទាំង៣សុទ្ធសឹងតែយល់ស្រប នូវកម្រិតជាតិវិទ្យុសកម្មដែលផ្ទុកក្នុង iPhone12។

តែយ៉ាងណាមិញ អង្គការឃ្លាំមើល នៃអជ្ញាធរជាតិបារាំង នឹងត្រួតពិនិត្យទៅលើហាង Apple ទាំងអស់នៅក្នុងប្រទេសបារាំង ដោយនឹងឃាត់យក iPhone12 មកធ្វើតេស្តសាកល្បងម្តងទៀត៕

ប្រភព៖ NY POST

បរទេស៖ អង្គការស្រាវជ្រាវរបស់អង់គ្លេស DEEP គ្រោងនឹងសាងសង់លំនៅដ្ឋាននៅបាតសមុទ្រដែលមានឈ្មោះថា Sentinel ដោយរំពឹងថានឹងបើកដំណើរការនៅឆ្នាំ ២០២៧។

យោងតាមប្រភពព័ត៌មាន Design Boom ដែលបានរាយការណ៍កាលពីថ្ងៃទី ១១ ខែកញ្ញាថា លំនៅដ្ឋាននេះអនុញ្ញាតឱ្យអ្នកវិទ្យាសាស្ត្ររស់នៅក្នុងទឺកជម្រៅ ២០០ ម៉ែត្ររយៈពេល ២៨ ថ្ងៃ ដោយអាចឱ្យពួកគេសិក្សាកាន់តែដិតដល់លើធ្នើទ្វីប។ អ្នកវិទ្យាសាស្ត្រអាចសង្កេត តាមដានយ៉ាងដិតដល់ និងយល់កាន់តែច្បាស់អំពីជីវិតក្នុងសមុទ្រ នៅពេលដែលគម្រោងនេះដំណើរការ។ Sentinel មានទម្រង់ជាម៉ូឌុល ដែលរំពឹងថានឹងរួមបញ្ចូលលំនៅដ្ឋាន មន្ទីរពិសោធន៍ស្រាវជ្រាវ និងកន្លែងសង្កេតការណ៍នៅបាតសមុទ្រ។

ការដ្ឋានសាងសង់លំនៅដ្ឋានត្រូវបានគេរំពឹងថានឹងស្ថិតនៅចន្លោះភាគនិរតីនៃប្រទេសអង់គ្លេស និងប្រទេសវែល។ កន្លែងនេះត្រូវបានជ្រើសរើសដោយសារតែដីសមរម្យ ទឹកស្អាត និងនៅជិតក្រុមហ៊ុនមួយចំនួនដែលមានឯកទេសខាងវិស្វកម្មសមុទ្រ ការមុជទឹក សម្ពាធខ្ពស់ និងនាវាមុជទឹក។ អ្នកជំនាញនឹងសាងសង់ Sentinel ដោយប្រើប្រាស់បច្ចេកវិទ្យាស្រដៀងនឹងការបោះពុម្ព 3D ជាមួយនឹងសម្ភារៈលោហៈ រួមបញ្ចូលជាមួយឧបករណ៍ទំនាក់ទំនងផ្កាយរណបរបស់ DEEP និងប្រភពថាមពលកកើតឡើងវិញ។ ដោយសារគម្រោងនេះអាចទប់ទល់នឹងសម្ពាធខ្ពស់ខ្លាំង ហើយប្រព័ន្ធម៉ូឌុលអាចសម្របប្ដូរតាមបំណង និងផ្លាស់ប្តូរប្លង់ដោយភាពបត់បែន។ ម៉ូឌុលនីមួយៗមានអង្កត់ផ្ចិត ៦ ម៉ែត្រ ទទឹងប្រហែលស្មើនឹងតួយន្តហោះ Boeing ៧៧៧ ហើយអាចផ្ទុកមនុស្សបាន ៦ នាក់។

លោក Steve Etherton អ្នកដឹកនាំនៅ DEEP បាននិយាយថា “យើងត្រូវអភិរក្សមហាសមុទ្រ ដើម្បីធ្វើដូច្នេះបាន យើងត្រូវយល់ពីពួកវាសិន” ។ តាមរយៈការស្រាវជ្រាវតាមមហាសមុទ្រ DEEP កំណត់គោលដៅឱកាស និងដំណោះស្រាយក្នុងការស្រាវជ្រាវឱសថ ការចាប់យកកាបូន និងឱសថប្រកបដោយភាពច្នៃប្រឌិត។ ក្រុមអ្នកជំនាញនៅ DEEP ក៏កំពុងស្រាវជ្រាវម៉ាស៊ីនប្រតិកម្មជីវសាស្ត្រខ្នាតធំ ដើម្បីព្យាបាលកាកសំណល់ទាំងអស់ផងដែរ៕
ប្រភព៖vnexpress