្រទេសថៃ ៖ បច្ចុប្បន្ន ក្រុមអ្នកគ្មានផ្ទះសម្បែងនៅខេត្តឈៀងម៉ៃ ប្រទេសថៃ ត្រូវរស់នៅដោយភាពភ័យខ្លាច ក្រោយកើតករណីឃា.ត.ក.ម្មមកលើបុរសអនាថាម្នាក់ ។ បើទោះជាជនល្មើសត្រូវបានគេចាប់ខ្លួនយកមកកាត់ទោសក្តី ប៉ុន្តែអ្នកគ្មានផ្ទះរស់នៅមួយចំនួនបានផ្លាស់ប្តូរទម្លាប់រស់នៅប្រចាំថ្ងៃរបស់ពួកគេ ដែលធ្លាប់រស់នៅតែម្នាក់ឯង មករស់នៅជាក្រុមវិញ ដើម្បីការពារសុវត្ថិភាពឱ្យគ្នាទៅវិញទៅមក ។

ការរស់នៅរួមគ្នាជាក្រុមមានគ្នាចាប់ពី៤នាក់ ទៅ៥នាក់ គឺជាជម្រើសរបស់អ្នកគ្មានផ្ទះសម្បែង ដែលរស់នៅតាមទីកន្លែងផ្សេងៗនៅខេត្តឈៀងម៉ៃ ។ ការរស់នៅជាក្រុមបែបនេះ មានសុវត្ថិភាពជាងរស់នៅតែម្នាក់ឯង ក្រោយកើតហេតុការណ៍បុរសអនាថាម្នាក់ អាយុ៦០ឆ្នាំ ត្រូវបានគេស.ម្លា.ប់ ខណៈពេលកំពុងសម្រាកលង់លក់នៅទីសាធារណៈ កាលពីថ្ងៃទី៣១ ខែសីហា ឆ្នាំ២០២៣ ។

អ្នកគ្មានផ្ទះម្នាក់និយាយថា អ្នកគ្មានផ្ទះសម្បែងបានមករស់នៅបរិវេណនេះប្រមាណពី២០នាក់ ទៅ៣០នាក់ ។ កន្លងមក ពួកគេមិនរស់នៅជុំគ្នាបែបនេះទេ គឺរស់នៅដាច់ដោយឡែកនៅតាមចំណុចផ្សេងៗ ប៉ុន្តែក្រោយកើតករណីឃា.ត.ក.ម្ម ឃើញថា អ្នកទាំងនោះភ័យខ្លាច និងមិនហ៊ានរស់នៅម្នាក់ឯងទេ ។ ហេតុនេះ ពួកគេក៏ប្រមូលផ្តុំគ្នារស់នៅជាក្រុមដើម្បីការពារកុំឱ្យហេតុការណ៍អាក្រក់កើតឡើង និងប្រយ័ត្នមនុស្សប្លែកមុខ ។

បុរសគ្មានទីលំនៅម្នាក់និយាយថា ៖ «ខ្ញុំមិនដឹងថា តើនឹងមានហេតុការណ៍បែបនេះកើតឡើងទៀតដែរឬទេ ហើយខ្ញុំសម្រាកមិនសូវលក់ទេ ដោយសារឃើញមនុស្សប្លែកមុខ ។ ដូច្នេះ ខ្ញុំក៏សម្រេចចិត្តមករស់នៅជាមួយគេឯងដើម្បីជួយមើលគ្នា ព្រោះមនុស្សប្លែកមុខមានគ្រោះថ្នាក់ណាស់» ។

កន្លងមក រៀងរាល់ថ្ងៃចន្ទ ថ្ងៃពុធ និងថ្ងៃសុក្រ អាជ្ញាធរប្រចាំខេត្តឈៀងម៉ៃបានចុះត្រួតពិនិត្យនៅតាមបរិវេណផ្សេងៗ និងជួយឧបត្ថម្ភម្ហូបអាហារដល់អ្នកគ្មានផ្ទះសម្បែង ។ លើសពីនេះ អាជ្ញាធរបានទាក់ទងទៅមន្ទីរពេទ្យ ដើម្បីយកពួកគេទៅព្យាបាលជំងឺផងដែរ ។ ប្រសិនបើពួកគេគ្មានកន្លែងរស់នៅ និងគ្មានសាច់ញាតិថែទាំ ពួកគេអាចស្ម័គ្រចិត្តទៅរស់នៅក្នុងមជ្ឈមណ្ឌលសង្គ្រោះមនុស្សគ្មានទីពឹង ដែលគេត្រៀមទុក ។

លោកស្រី ជិរ៉ាផន មន្ត្រីផ្នែកអភិវឌ្ឍន៍សង្គម និងសន្តិសុខប្រចាំខេត្តឈៀងម៉ៃលើកឡើងថា ៖ «បើប្រទះឃើញពួកគេមានបញ្ហាផ្លូវចិត្ត ខាងយើងនឹងបញ្ជូនបន្តទៅកាន់មន្ទីរពេទ្យ ហើយមន្ទីរពេទ្យនឹងព្យាបាល ។ បើអាការៈពួកគេបានល្អប្រសើរឡើង យើងនឹងទំនាក់ទំនងទៅខាងគ្រួសារថា តើគ្រួសារអាចទទួលយកពួកគេទៅថែទាំបានទេ ព្រោះពេលខ្លះ ដោយសារមានបញ្ហាក្នុងគ្រួសារ ទើបពួកគេមិនអាចត្រឡប់ទៅផ្ទះបាន ។ ម្យ៉ាងទៀត បើពួកគេជាសះស្បើយហើយគ្មានកន្លែងទៅ យើងនឹងបញ្ជូនទៅកាន់មជ្ឈមណ្ឌលសង្គ្រោះមនុស្សគ្មានទីពឹង» ។

ចំណែកនាយកមន្ទីរពេទ្យលើកឡើងថា អ្នកមានជំងឺផ្លូវចិត្តបានកើនឡើង ហើយភាគច្រើន គឺអ្នកមានអាយុច្រើន ដោយសារជំងឺធ្លាក់ទឹកចិត្ត ។ ក្រៅពីនេះ ជាយុវវ័យដោយសារភាពតានតឹងក្នុងការរស់នៅរបស់ពួកគេ និងការជ.ក់ថ្នាំញៀ.ន ។

នាយកមន្ទីរពេទ្យ លោក Kittakwee Phonno លើកឡើងថា ៖ «បញ្ហាសង្គម និងសេដ្ឋកិច្ចផ្លាស់ប្តូរបានធ្វើឱ្យអ្នករងផលប៉ះពាល់មានបញ្ហាផ្លូវចិត្តកាន់តែច្រើន ដូចជា ការធ្លាក់ទឹកចិត្ត និងថ្នាំញៀន ហើយថ្នាំញៀនធ្វើឱ្យអ្នកកំពុងមានជំងឺផ្លូវចិត្តបង្កអំពើហិង្សា» ។

តាមការស្ទង់មតិបង្ហាញថា អ្នកគ្មានផ្ទះសម្បែងនៅខេត្តឈៀងម៉ៃ មានចំនួន១១៨នាក់ដែលបានរស់នៅតាមបរិវេណផ្សេងៗដូចជា កន្លែងដឹកជញ្ជូន, ស្ថានីយរថភ្លើង និងសួនច្បារសាធារណៈ ។ មូលហេតុភាគច្រើនកើតឡើងដោយសារពួកគេមានបញ្ហាក្នុងគ្រួសារ, គ្មានកន្លែងរស់នៅ, មានជំងឺផ្លូវចិត្ត, គ្មានការងារធ្វើ, ញៀនស្រា និងជក់ថ្នាំញៀន ៕ ប្រភព ៖ Thai PBS

កំពូលតារាចម្រៀងប៉ុប Taylor Swift នៅតែបន្តឥទ្ធិពលរបស់ខ្លួននៅក្នុងវិស័យតន្រ្តីដោយឆក់បានពានរង្វាន់ធំប្រចាំឆ្នាំរបស់សហរដ្ឋអាម៉េរិក និងបានធ្វើឱ្យអ្នកសិល្បៈផ្សេងទៀតផ្ទុះការស្ងប់ស្ងែងបន្ទាប់ពីតារាចម្រៀងរូបនេះអាចឈ្នះពានរង្វាន់វីដេអូប្រចាំឆ្នាំ(video of the year )ចំនួន២ឆ្នាំជាប់គ្នា។

នៅក្នុងកម្មវិធីប្រគល់ពានរង្វាន់ប្រចាំឆ្នាំ MTV Video Music Awards នាពេលថ្មីៗនេះ Taylor Swift
បានឈ្នះពានរង្វាន់ video of the year ទៅលើបទចម្រៀងរបស់នាងមានចំណងជើងថា «Anti-Hero» ខណៈកាលពីឆ្នាំមុន Taylor Swiftបានឈ្នះពានរង្វាន់ដូចគ្នាសម្រាប់វីដេអូតន្ត្រី “All Too Well ” ។

មិនត្រឹមតែពានរង្វាន់ខាងលើនេះទេ ប៉ុន្តែកំពូលតារាចម្រៀងរូបនេះបានឈ្នះពានរង្វាន់ផ្សេងទៀតដូចពានរង្វាន់ song of the year, best pop និង best direction តាមរយៈបទ “Anti-Hero”។ មិនត្រឹមតែប៉ុណ្ណោះនាងក៏ត្រូវបានតែងតាំងពានផ្សេងទៀតដូចជា artist of the year, best cinematography, best visual effects និង best editing ដែលមិនត្រូវបានបង្ហាញក្នុងអំឡុងពេលការផ្សាយបន្តផ្ទាល់។

អំឡុងពេល Taylor Swift ឡើងទទួលយកពាន song of the year នាងបាននិយាយថា៖ «ខ្ញុំពិតជាសប្បាយចិត្តណាស់ ព្រោះនេះជាការបញ្ជាក់ពីផ្នែកដែលខ្ញុំចូលចិត្តធ្វើ»។
Taylor Swift គឺជាតារាចម្រៀង-អ្នកនិពន្ធបទចម្រៀងដែលបានបង្ហាញខ្លួនដំបូងក្នុងឆ្នាំ ២០០៦ ហើយត្រូវបានជ្រើសរើសដោយ Billboard ជាសិល្បការិនីដែលទទួលបានជោគជ័យបំផុតនៃទសវត្សរ៍ឆ្នាំ ២០១០ ខណៈមកទល់ពេលនេះឥទ្ធិពលរបស់តារាចម្រៀងរូបនេះនៅតែខ្លាំងក្លាមិនធម្មតាដដែល៕

ប្រទេសថៃ ៖ ប្រទេសថៃបានតាមដានស្ថានការណ៍ជំងឺគ្រុនឈាមនៅឆ្នាំ២០២៣ យ៉ាងដិតដល់ ព្រោះចំនួនអ្នកជំងឺគ្រុនឈាមបានកើនឡើងច្រើនជាងឆ្នាំ២០២២ ជាពិសេស នៅខេត្តភាគឦសានចំនួន៤ ។ គេសង្កេតឃើញថា រយៈពេលត្រឹមតែ២ខែប៉ុណ្ណោះ មានអ្នកកើតជំងឺនេះរហូតដល់ជាង៤.០០០នាក់ ។ ចំណែកនៅខេត្តនគររាជសីម៉ា មានអ្នកជំងឺគ្រុនឈាមច្រើនជាងឆ្នាំមុន រហូតដល់៥ដង ។

អាជ្ញាធរនៅស្រុកផិម៉ាយ ខេត្តនគររាជសីម៉ា បានបាញ់ផ្សែងកម្ចាត់មូសនៅតាមសាលារៀន ព្រមទាំងប្រកាសឱ្យពលរដ្ឋប្រយ័ត្នគ្រោះថ្នាក់ដោយសារជំងឺគ្រុនឈាម ។ លើសពីនេះ អាជ្ញាធរក៏បានផ្តល់ចំណេះដឹងអំពីការបំផ្លាញកន្លែងប្រភពមូសនៅតាមលំនៅឋាន ក៏ដូចជាផ្តល់ថ្នាំអាបេតកម្ចាត់ដង្កូវមូស ក្រោយពីប្រទះឃើញអ្នកជំងឺគ្រុនឈាមកើនឡើងនៅខេត្តនេះ ។

លោកវេជ្ជបណ្ឌិត Thaweechai Wisanuyothin ប្រធានការិយាល័យបង្ការ និងទប់ស្កាត់ជំងឺប្រចាំខេត្តនគររាជសីម៉ា លើកឡើងថា ចាប់ពីថ្ងៃទី១ ខែមករា រហូតដល់ថ្ងៃទី២ ខែកញ្ញា ឆ្នាំ២០២៣ មានអ្នកជំងឺគ្រុនឈាមចំនួន៦.៣៤៩នាក់ និងមានអ្នកស្លា.ប់៤នាក់ ។ បើធៀបនឹងរយៈពេលដូចគ្នាកាលពីឆ្នាំ២០២២ ឃើញថា ចំនួនអ្នកកើតជំងឺគ្រុនឈាមបានកើនឡើងខ្លាំងជាងឆ្នាំ២០២២ ។ ចំណែកចាប់ពីថ្ងៃទី៩ ខែកក្កដា រហូតដល់ថ្ងៃទី២ ខែកញ្ញា ឆ្នាំ២០២៣ ជំងឺគ្រុនឈាមបានឆ្លងរាតត្បាតយ៉ាងឆាប់រហ័ស គឺមានអ្នកជំងឺរហូតដល់៤.១៨១នាក់ ក្នុងនោះអ្នកជំងឺភាគច្រើនមានអាយុចាប់ពី១០ឆ្នាំ ដល់១៤ឆ្នាំ ។

ចំនួនអ្នកជំងឺគ្រុនឈាមកើនឡើងខ្ពស់បំផុត គឺចាប់ពីថ្ងៃទី៩ ខែកក្កដា រហូតដល់ថ្ងៃទី២ ខែកញ្ញា ឆ្នាំ២០២៣ នៅខេត្តចំនួន៤ រួមមាន ៖
១-ខេត្តសុរិន្ទ មានអ្នកជំងឺគ្រុនឈាមចំនួន ១.៤២៦នាក់ បើធៀបនឹងរយៈពេលដូចគ្នានៅឆ្នាំ២០២២ គឺស្មើត្រឹមតែ ២៧៤នាក់
២-ខេត្តនគររាជសីម៉ា មានអ្នកជំងឺគ្រុនឈាមចំនួន ១.៣០៤នាក់ បើធៀបនឹងរយៈពេលដូចគ្នានៅឆ្នាំ២០២២ គឺស្មើត្រឹមតែ ២៧១នាក់
៣-ខេត្តបុរីរាំ មានអ្នកជំងឺគ្រុនឈាមចំនួន ៧៥៧នាក់
៤-ខេត្តជ័យភូមិ មានអ្នកជំងឺគ្រុនឈាមចំនួន ៦៩៤នាក់ ។

ចំណែកស្ថានការណ៍ជំងឺគ្រុនឈាមនៅទូទាំងប្រទេសថៃ ចាប់ពីថ្ងៃទី១ ខែមករា រហូតដល់ថ្ងៃទី៤ ខែកញ្ញា ឆ្នាំ២០២៣ គឺមានអ្នកជំងឺគ្រុនឈាមរហូតដល់៨៧.១៦៣នាក់ និងអ្នកស្លា.ប់ចំនួន៧៣នាក់ ក្នុងនោះអ្នកកើតជំងឺគ្រុនឈាមច្រើនបំផុតមានអាយុចាប់ពី១៥ឆ្នាំ ដល់២៤ឆ្នាំ ។

លោកវេជ្ជបណ្ឌិតថៃណែនាំថា ត្រូវតាមដានអ្នកជំងឺ ជាពិសេស ក្មេងតូចដែលរស់នៅមណ្ឌលអភិវឌ្ឍន៍កុមារ និងកូនសិស្សនៅតាមសាលារៀន ។ ប្រសិនបើរកឃើញអ្នកណាម្នាក់កើតជំងឺគ្រុនឈាម គឺត្រូវតាមដានមនុស្សនៅជុំវិញផងដែរ និងអនុវត្តតាមវិធានការគ្រប់គ្រងជំងឺ ។ លើសពីនេះ ត្រូវបង្កើនការផ្សព្វផ្សាយដើម្បីឱ្យពលរដ្ឋបានយល់ដឹង ដើម្បីរួមគ្នាការពារជំងឺគ្រុនឈាមនៅផ្ទះរបស់ខ្លួន ។ ចំណែកសមាជិកគ្រួសារត្រូវជួយថែទាំគ្នា ដោយអនុវត្តតាមវិធានការណែនាំដូចជា រៀបចំផ្ទះឱ្យស្រឡះល្អ, កើបសំរាម និងបិទគម្របធុងទឹក ឬពាងទឹក ដើម្បីការពារប្រភពមូស ៕ ប្រភព ៖ Mono News

នេះមិនមែនជាលើកទី១នោះទេដែលប្រទេសកម្ពុជាទទួលបានការសរសើរមិនដាច់ពីមាត់ពីជនបរទេសនៅពេលភ្ញៀវទេសចរបានមកកម្សាន្តលើទឹកដីអច្ឆរិយនេះ។ ជាក់ស្តែងជនបរទេសជាគូស្នេហ៍មួយគូបានបាក់ចិត្តស្រលាញ់ប្រទេសកម្ពុជាយ៉ាងខ្លាំងនិងបានប្រាប់ទៅអ្នកផ្សេងទៀតថាបើមកលេងអាស៊ីអាគ្នេហ៍ហើយមិនបានមកលេងប្រទេសកម្ពុជាគឺអត់ន័យតែម្តង។ លើសពីនេះក៏បានបញ្ជាក់ទៀតថា ប្រទេសកម្ពុជាជាឋានសួគ៌លាក់ខ្លួនទឹកដីពោរពេញដោយស្នាមញញឹមពិតប្រាកដ។ នាពេលថ្មីៗនេះមានការចែកចាយយ៉ាងច្រើនពេញបណ្តាញសង្គមបន្ទាប់ពីជនបរទេសបានរៀបរាប់យ៉ាងមានអត្ថន័យខ្លឹមសារពេញដោយសេចក្តីស្រលាញ់មកលើប្រទេសកម្ពុជា។ នារីជាជនបរទេសរូបនោះមានបណ្តាញសង្គមឈ្មោះថា wanderlust ems។

តាមការចែករំលែកនៅលើបណ្តាញសង្គម បានឱ្យដឹងថា ភ្ញៀវអឺរ៉ុបនិយាយអំពីទេសចរណ៍នៅកម្ពុជា និង នៅក្នុង Comment រាប់សិបសុទ្ធតែវិជ្ជមាន ដែលនិយាយថា ពួកគេគម្រោងមកថៃ និង វៀតណាម តែឆ្លៀតចូលលេងកម្ពុជា បានបាក់ចិត្តនឹងទឹកដីកម្ពុជាតែម្តង ខុសពីការគិត។ ក្នុងនោះបានបញ្ជាក់ទៀតថា បើមកលេងអាស៊ីអាគ្នេយ៍ ហើយមិនបានមកលេងកម្ពុជា គឺអត់ន័យតែម្តង។
មតិរាប់រយ Comment បញ្ចេញមកគឺដូចគ្នាគេថាឋានសួគ៌លាក់ខ្លួនគ្មានអ្នកដឹង ព្រមទាំងបញ្ចេញមតិថា អ្នកមានគម្រោងមកអាស៊ីអាគ្នេហ៍ ដាច់ខាតគួរតែចូលមកលេងកម្ពុជា ។
ជាមួយគ្នានេះដែរ ជនបរទេសក៏បាននិយាយថា កម្ពុជាជាទឹកដីពោរពេញដោយស្នាមញញឹមពិតប្រាកដ (True Smile) ហើយអ្នកខ្លះថាពួកគេនឹងមកម្តងទៀតព្រមទាំងអួតថាកម្ពុជាជាប្រទេសដែលពួកគេចូលចិត្តបំផុត។ មតិខ្លះថា មកលេងឱ្យហើយទៅ ព្រោះមិនទាន់មានភ្ញៀវស្គាល់បុកទៅច្រើន។

លើសពីនេះ នៅក្នុងខម្មិនដែលបានបញ្ចេញមតិទៅលើការបង្ហោះរបស់ នារីជនបរទេសខាងលើគ្មានភ្ញៀវអឺរ៉ុបណាម្នាក់និយាយអាក្រក់នោះទេ។ គ្រាន់តែគេថា មិនដែលឮពីកម្ពុជានោះទេ តែមកលេងដោយចៃដន្យក៏បាក់ចិត្តតែម្តង។ ក្នុងនោះដែរ ជនបរទេសសរសើរទៀតថា កម្ពុជាមានប្រាទប្រាសាទធំជាងគេលើលោក ព្រៃភ្នំ ឆ្នេរសមុទ្រពណ៌ស ជុំវិញកោះមានទឹកសមុទ្រថ្លាមើលឃើញបាត និង ទឹកសមុទ្រកម្ពុជាងូតហើយមិនរមាស់ខ្លួននោះទេ ហើយពិសេសអាហារឆ្ងាញ់ និងសិទ្ធិសេរីភាពរបស់ភ្ញៀវទេសចរ៕

រទេសថៃ ៖ ក្នុងអំឡុងខែកញ្ញា ឆ្នាំ២០២៣ កសិកររស់នៅឃុំដងយ៉ៃ ស្រុកផិម៉ាយ ខេត្តនគររាជសីម៉ា បានប្រឈមនឹងបញ្ហាភ្លៀងធ្លាក់មិនទៀងទាត់ ដោយសារបាតុភូតអេលនីណូ ។ បច្ចុប្បន្ន ពួកគេបាននាំគ្នាដាំឪឡឹក និងធ្វើប្រព័ន្ធទឹកស្រោចស្រព ជំនួសការធ្វើស្រែដែលប្រឈមនឹងការខ្វះខាតទឹកជាប្រចាំ ។

អ្នកនាង សាខន ថាន់ក្លា អាយុ៣៧ឆ្នាំ ជាកសិកររស់នៅឃុំដងយ៉ៃ ប្រាប់ថា មុននេះ ផ្ទៃដីស្រែរបស់នាងបានជួបនឹងបញ្ហាទឹកជំនន់ធ្វើឱ្យទិន្នផលស្រូវខូចខាត ។ លើសពីនេះ នៅរដូវប្រាំង នាងក៏ប្រឈមនឹងការខ្វះខាតទឹកសម្រាប់ធ្វើស្រែ ទើបនាងប្តូរមកដាំឪឡឹកវិញ និងធ្វើប្រព័ន្ធទឹកស្រោចស្រពដើម្បីកាត់បន្ថយហានិភ័យ ។

អ្នកនាងបន្តថា កន្លងមក រដ្ឋាភិបាលថៃបានប្រកាសប្រាប់ពលរដ្ឋអំពីភ្លៀងធ្លាក់មិនទៀងទាត់នៅប្រទេសថៃ ដោយសារមានបាតុភូតអេលនីណូ ហើយផ្ទៃដីស្រែរបស់កសិករអាចរងផលប៉ះពាល់ផងដែរ ព្រោះត្រូវប្រើប្រាស់ទឹកសម្រាប់ធ្វើស្រែច្រើនជាងការដាំឪឡឹក ។ ដូច្នេះ ទើបនាងងាកមកដាំឪឡឹកជំនួសវិញ ព្រោះវាមិនសូវប្រឈមដូចការធ្វើស្រែទេ ។

ពេលដំបូង នាងបានចំណាយដើមទុនចំនួន២ម៉ឺនបាតសម្រាប់ដាំឪឡឹកនៅលើផ្ទៃដី៩រ៉ៃ និងធ្វើប្រព័ន្ធទឹកស្រោចស្រព ។ នាងបានចំណាយពេលវេលាដាំដុះត្រឹមតែ៥០ថ្ងៃប៉ុណ្ណោះឃើញថា អាចប្រមូលផលឪឡឹកលក់បានហើយ ក្នុងនោះឪឡឹក១ផ្លែ នាងលក់ចាប់ពីតម្លៃ២០បាត ទៅ៨០បាត គឺតាមទំហំផ្លែរបស់វា ។

អ្នកនាង សាខន ថាន់ក្លា បន្ថែមថា ចំណែកប្រាក់ចំណូលដែលនាងទទួលបានពីការលក់ឪឡឹក គឺ១លើកៗ មិនក្រោម១សែនបាតទេ ហើយនាងអាចប្រមូលប្រាក់ចំណូលបានច្រើនជាងការធ្វើស្រែទៅទៀត ដោយសារការដាំឪឡឹកប្រើប្រាស់ទឹកតិច, រយៈពេលដាំដុះខ្លី ថែមទាំងមិនសូវមានអ្នកដាំទេ ។ អ្នកស្រុកភាគច្រើនប្រកបមុខរបរធ្វើស្រែ ទើបធ្វើឱ្យឪឡឹកលក់ដាច់ជាពិសេស ៕ ប្រភព ៖ khaosod

ពានរង្វាន់ «2023 MTV Video Music Awards’ (MTV VMA)» ដែលប្រព្រឹត្តទៅនៅក្នុងរដ្ឋ New Jersey ត្រូវបានគេទទួលស្គាល់ថាជាពិធីប្រគល់ពានរង្វាន់តន្ត្រីកំពូលទាំងបួននៅសហរដ្ឋអាម៉េរិក រួមជាមួយនឹងពានរង្វាន់ Grammy, Billboard Music Awards និងពានរង្វាន់ American Music Awards ។ ឆ្នាំនេះ ‘MTV VMA’ បានតែងតាំងបេក្ខភាពតារា K-pop ចំនួន៨មានដូចជា JungKook BTS , BLACKPINK, TXT, STRAY KIDS, FIFTY FIFTY, SEVENTEEN ,aespa និង NewJeans ។ ក្នុងចំណោមពួកគេ TXT និង Stray Kids មានវត្តមាននៅក្នុងកម្មវិធីផ្ទាល់ផងដែរ។

ជាលទ្ធផលនៅក្នុងកម្មវិធីដ៏អស្ចារ្យនេះ ក្រុមចម្រៀង BLACKPINK បានឈ្នះពានរង្វាន់ចំនួន២។ ពានរង្វាន់ទី១ គឺជាប់ជា “Best Group” និងពានរង្វាន់ទី២ បានឈ្នះជា “Best Choreography” ទៅលើបទចម្រៀង “Pink Venom” ។ ចំណែកឯ JungKook BTS វិញបានឈ្នះពានរង្វាន់ “Song Of The Summer” ទៅលើបទចម្រៀងមានចំណងជើងថា “Seven”។ ការឈ្នះពានរង្វាន់របស់ JungKook នេះបានជំរុញឱ្យគេ ក្លាយជាសិល្បករកូរ៉េទោលដំបូងគេដែលឈ្នះពានរង្វាន់នេះ។

សម្រាប់វិស័យ Kpop ដែលឈ្នះពានរង្វាន់ជាបន្តទៀតនោះគឺក្រុម TXT (TOMORROW X TOGETHER ) បានឈ្នះលើពានរង្វាន់ “Push Performance of The Year” និងក្រុម STRAY KIDS បានឈ្នះពាន“ Best Kpop” ទៅលើបទ “S-Class” ៕

សហរដ្ឋអាមេរិក ៖ ក្នុងរយៈពេលប៉ុន្មានឆ្នាំកន្លងមកនេះ អ្នកគ្មានផ្ទះសម្បែងនៅទីក្រុងញូវយ៉ក សហរដ្ឋអាមេរិក បានកើនឡើងយ៉ាងខ្ពស់ បើគិតចាប់ពីមានបញ្ហាសេដ្ឋកិច្ចធ្លាក់ចុះជាខ្លាំងនៅអំឡុងឆ្នាំ១៩៣០ ។ កាលពីពាក់កណ្តាលខែសីហា ឆ្នាំ២០២៣ មានមនុស្សរស់នៅក្នុងមជ្ឈមណ្ឌលទីក្រុងញូវយ៉កជាង១១ម៉ឺននាក់ក្នុង១យប់ ហើយតួលេខនេះមិនរាប់បញ្ចូលអ្នកគ្មានផ្ទះសម្បែងរាប់ពាន់នាក់ទៀតទេ ដែលពួកគេបានសម្រាកនៅតាមផ្លូវ, បរិវេណរថភ្លើងក្រោមដី និងសួនច្បារនានាក្នុងទីក្រុង ។

លោក ថូនី អាយុ៥៣ឆ្នាំ រស់នៅទីក្រុងញូវយ៉ក បានរៀបរាប់ពីរឿងរ៉ាវគ្មានផ្ទះសម្បែងជាមួយសារព័ត៌មាន Reuters ថា លោកបានកើតនៅតំបន់ម៉ែនហាតតាន់ និងបានធំឡើងក្នុងគ្រួសារមានទ្រព្យសម្បត្តិមធ្យម ។ លោកបានបញ្ចប់ការសិក្សាក្នុងសាលារៀនបច្ចេកទេសឃ្វីន ហើយលោកមិនធ្លាប់គិតថា ជីវិតរបស់លោកត្រូវមករស់នៅតាមចិញ្ចើមផ្លូវបែបនេះទេ ។

លោក ថូនី និយាយថា ៖ «ជាច្រើនឆ្នាំកន្លងមក ការរស់នៅរបស់ខ្ញុំល្អប្រសើរ រហូតដល់ម្តាយខ្ញុំចែ.កឋា.ន ហើយខ្ញុំគ្មានឈ្មោះនៅក្នុងបញ្ជីកិច្ចសន្យាជួលផ្ទះទេ ។ ដូច្នេះ ខ្ញុំត្រូវផ្លាស់ប្តូរទីលំនៅយ៉ាងឆាប់រហ័ស ។ វាធ្វើឱ្យខ្ញុំត្រៀមខ្លួនមិនទាន់ ព្រោះម្ចាស់ផ្ទះជួលបានដំឡើងថ្លៃផ្ទះភ្លាមៗ គឺពីតម្លៃ១.១០០ដុល្លារអាមេរិកក្នុង១ខែ មកស្មើនឹង៣.២០០ដុល្លារអាមេរិក ហើយខ្ញុំគ្មានជម្រើសផ្សេងទៀតទេ ក្រៅពីការចាកចេញពីផ្ទះជួល» ។

ចំនួនមនុស្សគ្មានផ្ទះសម្បែងនៅទីក្រុងញូវយ៉កបានកើនឡើងដោយសារបញ្ហាជាច្រើនយ៉ាងដូចជា ការបណ្តេញជនភៀសខ្លួនចេញពីព្រំដែនភាគខាងត្បូងសហរដ្ឋអាមេរិក ។ ការិយាល័យអភិបាលក្រុងញូវយ៉កបញ្ជាក់ថា បច្ចុប្បន្ន មានជនភៀសខ្លួននៅទីក្រុងញូវយ៉ក ចំនួនជាង៥៨.៥០០នាក់ ដែលធ្វើឱ្យទីក្រុងនេះខ្វះខាតថវិកាសម្រាប់ជនភៀសខ្លួន ។

ចំណែកលោក ជេហ្វី នីវមន ជា CEO របស់ Backpacks for the Street និយាយថា ៖ «ការពិតនៃបញ្ហានេះ តាមអ្វីដែលអ្នកឃើញ និងគ្រប់គ្នាឃើញ គឺមនុស្សមួយក្រុមតូច ដោយសារពួកគេចេញទៅខាងក្រៅ ។ ប៉ុន្តែអ្នកគ្មានផ្ទះសម្បែងភាគច្រើន សុទ្ធតែជាអ្នកចង់បានការងារធ្វើ ហើយពួកគេមិនចង់ក្លាយជាអ្នកគ្មានទីលំនៅទេ » ៕ ប្រភព ៖ TNN World