រាជធានីអូតតាវ៉ា៖ ថ្វីបើរដ្ឋាភិបាលក្រុងញូវដេលី បានបដិសេធយ៉ាងដាច់អហង្ការ អំពីការមិនជាប់ពាក់ព័ន្ធ នៅក្នុងករណីសម្លាប់លោក ហាឌីប សិង្ហ នីចា (Hardeep Singh Nijjar) មេដឹកនាំសាសនាសិស៊ីក (Sikh) ជនជាតិកាណាដា យ៉ាងណាក្ដី ប៉ុន្ដែកាណាដា នៅតែប្រកាន់នូវគោលជំហររបស់ខ្លួន ហើយបានបណ្ដេញអ្នកការទូតឥណ្ឌា ចេញពីប្រទេសរបស់ខ្លួន ទើបឥណ្ឌា បានសងសឹកដូច្នោះវិញ។

សារព័ត៌មានអារ៉ាប់អន្ដរជាតិ Alarabiya News បានចេញផ្សាយ កាលពីរសៀល ថ្ងៃទី១៩ ខែកញ្ញា ដោយដកស្រង់សម្ដីរបស់លោកស្រី មេឡានី ញូលី (Melanie Joly) រដ្ឋមន្រ្ដី ក្រសួងការបរទេសកាណាដា បានអះអាង ថា កាណាដា កាលពីថ្ងៃចន្ទ (ទី១៨ ខែកញ្ញា) បានបណ្ដេញមន្រ្ដីការទូតមួយរូបរបស់ឥណ្ឌា ចេញពីប្រទេស ដោយជឿ ថា ក្រុងញូវដេលី មានការជាប់ពាក់ព័ន្ធនឹងការធ្វើឃាតមេដឹកនាំសាសនាស៊ីក នៅភាគខាងលិច កាណាដា កាលពីខែមិថុនា កន្លងទៅ។

លោកស្រី រដ្ឋមន្រ្ដីក្រសួងការបរទេស បានបញ្ជាក់ ថា ការចោទប្រកាន់ទាំងនេះ នៅត្រង់ថា «តំណាងរដ្ឋាភិបាលបរទេស អាចពាក់ព័ន្ធនឹងការសម្លាប់ពលរដ្ឋកាណាដា នៅទីនេះ ស្ថិតក្នុងប្រទេសកាណាដា នៅលើទឹកដីរបស់កាណាដា… ហើយវាជាការមិនអាចទទួលយកបាននោះឡើយ។ ឥឡូវ នៅថ្ងៃនេះ យើងបានបណ្ដេញមន្រ្ដីជាន់ខ្ពស់ការទូតមួយរូបរបស់ឥណ្ឌា ចេញពីកាណាដា»។

ជាការសងសឹកវិញនោះ ឥណ្ឌា ក៏បានបញ្ជាឲ្យមន្រ្ដីការទូតជាន់ខ្ពស់មួយរូបរបស់កាណាដា ត្រូវចាកចេញពីឥណ្ឌា នៅថ្ងៃអង្គារ (ទី១៩ ខែកញ្ញា)។ ក្រសួងការបរទេសឥណ្ឌា បានសម្រេចធ្វើដូច្នេះ ត្រឹមតែប៉ុន្មានម៉ោង ក្រោយពេលរដ្ឋាភិបាលអូតតាវ់ា បានបណ្ដេញអ្នកការទូតរបស់ខ្លួន ចេញពីប្រទេសកាណាដា ជុំវិញការស្លាប់របស់មេដឹកនាំចលនាបំបែកខ្លួនស៊ីក នៅជិតទីក្រុងវ៉ាន់គូវើរ (Vancouver) ប្រទេសកាណាដា។.

ប្រទេសឥណ្ឌា បានច្រានចោលយ៉ាងដាច់អហង្ការ ចំពោះការចោទប្រកាន់របស់លោកនាយករដ្ឋមន្រ្ដី ចាស្ទីន ទ្រូដូ (Justin Trudeau) ដោយបានលើកឡើង ថា ឥណ្ឌា មានការជាប់ពាក់ព័ន្ធនឹងការស្លាប់មេដឹកនាំសាសនាស៊ីករបស់កាណាដា។ លោក Hardeep Singh Nijjar ត្រូវបានឃាតករបាញ់សម្លាប់ នៅខាងក្រៅព្រះវិហារសាសនាស៊ីក ( Sikh temple) មួយកន្លែង កាលពីថ្ងៃទី១៨ ខែមិថុនា ឆ្នាំ២០២៣ ស្ថិតក្នុងខេត្តប៊្រីធីសកូឡុំបៀ (British Columbia)៕

ប្រទេសចិន ៖ ក្រសួងពាណិជ្ជកម្មចិន និងមន្ត្រីប្រចាំតំបន់ស្វយ័ត Guangxi Zhuang បានរៀបចំកម្មវិធីពិព័រណ៍ពាណិជ្ជកម្មចិន-អាស៊ាន លើកទី២០ ដែលធ្វើឡើងចាប់ពីថ្ងៃទី១៦ ដល់ថ្ងៃទី១៩ ខែកញ្ញា ឆ្នាំ២០២៣ នៅទីក្រុងណាននីង តំបន់ស្វយ័ត Guangxi Zhuang ។ ការរៀបចំពិព័រណ៍ពាណិជ្ជកម្មនេះ គឺមានគោលបំណងទាក់ទាញម្ចាស់អាជីវកម្មអាស៊ានឱ្យចូលមកកាន់ទីផ្សារចិន ។

ការពិភាក្សាមួយបានធ្វើឡើងនៅក្រោមប្រធានបទ ៖ «ការបើកចំហស្ថាប័នសម្រាប់កំណើនសេដ្ឋកិច្ចនៅក្នុងតំបន់ថ្មី» ដោយក្រសួងពាណិជ្ជកម្មចិនបានប្រកាសពីផែនការបង្កើនការបើកចំហស្ថាប័នជាបណ្តើរៗ និងកាត់បន្ថយការរឹតបន្តឹងការវិនិយោគពីក្រៅប្រទេស ។ ប្រទេសចិននឹងដោះស្រាយឧបសគ្គអវិជ្ជមាន ដើម្បីពង្រឹងទំនាក់ទំនងពាណិជ្ជកម្ម និងការវិនិយោគទុនជាមួយបណ្តាប្រទេសអាស៊ានផងដែរ ។

លើសពីនេះ ប្រទេសចិនមានគោលដៅគាំទ្រការនាំចូលផលិតផលកសិកម្មពីតំបន់អាស៊ាន និងពង្រីកការជួញដូរផលិតផលកម្រិតមធ្យម ដែលសំដៅដល់ផលិតផលសម្រាប់យកទៅផលិតជាផលិតផលប្រភេទផ្សេងទៀតរវាងភាគីទាំងពីរ ។

ក្រៅពីនេះ អត្ថប្រយោជន៍ផ្នែកភូមិសាស្ត្រជាយុទ្ធសាស្ត្រជាមួយតំបន់អាស៊ាន តំបន់ស្វយ័ត Guangxi Zhuang បានលើកទឹកចិត្តដល់ការបង្កើតស្ថាប័នក្រោមគំនិតផ្តួចផ្តើផ្សេងៗ ដូចជា គម្រោងសាងសង់កំពង់ផែឆ្លាតវៃរវាងប្រទេសចិន និងវៀតណាម ។ គេចាត់ទុកថា វាជាយន្តការសម្រាប់កិច្ចសហការលើសន្តិសុខស្បៀងស្ថិតក្រោមគម្រោងផ្លូវ១ ខ្សែក្រវាត់១ របស់ចិន ក៏ដូចជាការបង្កើតតុលាការពាណិជ្ជកម្មអន្តរជាតិ ។ បើគិតមកដល់ឆ្នាំ២០២២ តំបន់អាស៊ាននៅតែជាដៃគូពាណិជ្ជកម្មលេខ១ របស់តំបន់ស្វយ័ត Guangxi Zhuang អស់រយៈពេល២៣ឆ្នាំជាប់ៗគ្នា ៕ ប្រភព ៖ TNN World

រូបភាពដែលយើងមើលឃើញនេះ គឺ Airlander ជានាវាហោះប្រើប្រាស់ឧស្ម័នអេលីយ៉ូម ហើយវាអាចក្លាយជាជម្រើសថ្មីសម្រាប់ការធ្វើដំណើរតាមអាកាស ។ វាសមស្របសម្រាប់ពិភពលោកនាថ្ងៃអនាគត ដោយសារវាបញ្ចេញកាបូនឌីអុកស៊ីតតិចជាងយន្តហោះទូទៅរហូតដល់៩០% បើទោះជាត្រូវប្តូរដោយគុណវិបត្តិ ដោយសារនាវាហោះអាចធ្វើដំណើរយឺតជាងយន្តហោះទូទៅក្តី ។

លោក ថម ក្រាន់ឌី នាយករបស់ Hybrid Air Vehicle ឬ HAV គឺជាអ្នកបង្កើតនាវាហោះលើកឡើងថា អ្វីដែលយើងឃើញ និងបានឮនេះ គឺជាបច្ចេកវិទ្យាមួយដែលបញ្ចេញខ្យល់ពុល និងកាបូនឌីអុកស៊ីតតិចជាងយន្តហោះ ។ វាជាជម្រើសថ្មីសម្រាប់ការធ្វើដំណើរទៅកាន់ប្រទេសផ្សេងៗនៅលើពិភពលោក ។ ដូច្នេះ បច្ចុប្បន្ននេះ ចាត់ទុកថា យើងមានជម្រើសសម្រាប់ការធ្វើដំណើរតិចតួច ។

នាវាហោះ Airlander 10 ទទួលបានការចាប់អារម្មណ៍ពីក្រុមហ៊ុនអាកាសចរណ៍, ក្រុមហ៊ុនដឹកជញ្ជូន និងក្រុមហ៊ុនឧស្សាហកម្មការពារប្រទេស ដោយសារក្រុមហ៊ុនទាំងនេះព្យាយាមរកវិធីកាត់បន្ថយការបញ្ចេញកាបូនក្នុងការដឹកជញ្ជូនតាមអាកាស ។ ចំណែក HAV កំពុងសហការជាមួយក្រុមហ៊ុន BAE Systems ដែលជាក្រុមហ៊ុនផ្នែកការពារជាតិដ៏ធំបំផុតរបស់ប្រទេសអង់គ្លេស ដើម្បីសិក្សាពីការប្រើប្រាស់ឧបករណ៍ផ្នែកដឹកជញ្ជូន និងការស៊ើបការណ៍ ។ គេរំពឹងថា នឹងអាចផលិតនាវាហោះនេះសម្រាប់បម្រើផ្នែកពាណិជ្ជកម្មបាននៅឆ្នាំ២០២៦ ។

នាវាហោះផ្ទុកទៅដោយឧស្ម័នអេលីយ៉ូមពេញ គឺវាមានទំហំស្មើនឹងទីលានប្រកួតកីឡា និងមានកម្ពស់ស្មើរថយន្តក្រុង២ជាន់ ដែលគរពីលើគ្នាចំនួន៦គ្រឿង ។ នៅក្នុងបន្ទប់អ្នកដំណើរអាចដាក់កៅអីអង្គុយបានចំនួន១០០ ឬអាចធ្វើជាបន្ទប់គេងប្រណីតបានជាច្រើនបន្ទប់ ហើយអ្នកដំណើរអាចទស្សនាទេសភាពនៅក្រៅបង្អួចបាន ។

ក្រុមហ៊ុនបញ្ជាក់ថា នាវាហោះមានគុណសម្បត្តិជាច្រើន គឺវាអាចហោះឡើងបានដោយសារឧស្ម័នអេលីយ៉ូម និងពុំចាំបាច់ប្រើប្រាស់ម៉ាស៊ីនដូចយន្តហោះទេ ។ លើសពីនេះ វាអាចនៅកណ្តាលអាកាសរហូតដល់៥ថ្ងៃ និងអាចចុះចតនៅគ្រប់ទីកន្លែងរាបស្មើ មិនថានៅលើផ្ទៃទឹក, ឆ្នេរខ្សាច់ និងព្រិល ។ ដូច្នេះ វាជាជម្រើសថ្មីសម្រាប់ដំណើរកម្សាន្តដ៏អស្ចារ្យ ឬអាចយកវាទៅប្រើប្រាស់ក្នុងផ្នែកយោធាក៏បាន ។

បើទោះជាភាគីជាច្រើនបារម្ភពីសុវត្ថិភាព ពីព្រោះកាលពីឆ្នាំ១៩៣៧ ធ្លាប់កើតហេតុការណ៍ភ្លើងឆេះនាវាហោះផ្ទុកឧស្ម័នអ៊ីដ្រូសែននៅសហរដ្ឋអាមេរិក រហូតបណ្តាលឱ្យមានអ្នកស្លា.ប់ចំនួន៣៦នាក់ ប៉ុន្តែក្រុមហ៊ុនបញ្ជាក់ថា បច្ចុប្បន្ន បច្ចេកវិទ្យាបានអភិវឌ្ឍន៍ជឿនលឿនហើយ ។

ចុងក្រោយ ក្រុមហ៊ុនអាកាសចរណ៍ Air Nostrum របស់ប្រទេសអេស្ប៉ាញបានកក់នាវាហោះ Airlander រួចហើយចំនួន២០គ្រឿង តាំងពីមុនពេលចាប់ផ្តើមផលិតម៉្លេះ ។ ក្រុមហ៊ុននេះសង្ឃឹមថា នឹងប្រើប្រាស់វាសម្រាប់ការធ្វើដំណើរពីប្រទេសអេស្ប៉ាញ ទៅកាន់កោះប៊ែលីអ៊ែរិក ដែលស្ថិតនៅក្រៅឆ្នេរសមុទ្រអេស្ប៉ាញ ហើយនឹងចំណាយពេលធ្វើដំណើរប្រមាណ៤ម៉ោង ៕ ប្រភព ៖ TNN World

ប្រទេសរុស្ស៊ី ៖ ស្ថានីយទូរទស្សន៍ KRT និងសារព័ត៌មាន TASS របស់ប្រទេសរុស្ស៊ីរាយការណ៍ថា លោក គឹម ជុងអ៊ុន មេដឹកនាំកូរ៉េខាងជើងបានបញ្ចប់ដំណើរទស្សនកិច្ចមកកាន់ប្រទេសរុស្ស៊ីជាផ្លូវការហើយ កាលពីថ្ងៃទី១៧ ខែកញ្ញា ឆ្នាំ២០២៣ ។ ជាមួយគ្នានេះ លោក គឹម ជុងអ៊ុន បានទទួលរង្វាន់ជាច្រើនពីរុស្ស៊ី ដូចជា មួករោមសត្វ, អាវក្រោះ និងដ្រូនយោធា ។ គេចាត់ទុកថា ការគ្រប់គ្រងដ្រូនយោធារបស់កូរ៉េខាងជើង គឺជាការល្មើសនឹងការដាក់ទណ្ឌកម្មរបស់អង្គការសហប្រជាជាតិ ។

លោក គឹម ជុងអ៊ុន បានទទួលមួករោមសត្វពីរដ្ឋមន្ត្រីក្រសួងការពារជាតិរុស្ស៊ី លោក Sergei Shoigu នៅទីក្រុង Vladivostok ក្នុងអំឡុងពេលលោកដើរទស្សនាយន្តហោះទម្លាក់គ្រាប់បែកនុយក្លេអ៊ែរ, យន្តហោះចម្បាំងបំពាក់ដោយមីស៊ីលលឿនជាងសំឡេង និងនាវាចម្បាំងរុស្ស៊ី ។

ក្រៅពីនេះ លោក Oleg Kosemyako អភិបាលនៃតំបន់ Primorsky បានប្រគល់អាវក្រោះទម្ងន់ស្រាលឱ្យមេដឹកនាំកូរ៉េខាងជើងផងដែរ ។ មិនត្រឹមតែប៉ុណ្ណោះ មុនពេលលោក គឹម ជុងអ៊ុន ធ្វើដំណើរត្រឡប់ទៅកាន់ប្រទេសកូរ៉េខាងជើងវិញ រុស្ស៊ីក៏បានប្រគល់ដ្រូនវាយប្រហារចំនួន៥គ្រឿង និងដ្រូនស៊ើបការណ៍ Geranium-25 ទៀត ដែលគេបានប្រើប្រាស់នៅក្នុងសង្គ្រាមអ៊ុយក្រែន ។

ប្រទេសរុស្ស៊ីបានប្រគល់ដ្រូនឱ្យកូរ៉េខាងជើង គឺជាការរំលោភលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលប្រឆាំងនឹងកូរ៉េខាងជើង ។ រុស្ស៊ីក្នុងឋានៈជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ បានអនុម័តសេចក្តីសម្រេចហាមកូរ៉េខាងជើងធ្វើសកម្មភាពនុយក្លេអ៊ែរ និងមីស៊ីល ប៉ុន្តែរុស្ស៊ីបែរជាប្រគល់ដ្រូនឱ្យកូរ៉េខាងជើងទៅវិញ ៕ ប្រភព ៖ TNN World

បរទេស៖ Gemini ត្រូវបានគេរំពឹងថាជាកម្មវិធី AI ទំនាក់ទំនងថ្មីដែលអាចប្រកួតប្រជែងជាមួយ GPT-4 នឹងជាគំរូភាសា AI កម្រិតខ្ពស់បំផុតនាពេលបច្ចុប្បន្ននេះ។

ចាប់តាំងពីដើមឆ្នាំ ២០២៣ មក Google បានរួមបញ្ចូលគ្នានូវក្រុមអភិវឌ្ឍន៍បច្ចេកវិទ្យាបញ្ញាសិប្បនិម្មិត (AI) ចំនួនពីរដាច់ដោយឡែកពីគ្នា ក្រោមការដឹកនាំរបស់នាយកប្រតិបត្តិ Sundar Pichai ដើម្បីពន្លឿនការអភិវឌ្ឍន៍គំរូភាសាធំៗដូចជា Gemini នឹងតាមឱ្យទាន់កម្មវិធី ChatGPT របស់ OpenAI ដែលគាំទ្រដោយ Microsoft ដែលបានវាយលុកក្នុងពិភពបច្ចេកវិទ្យាក្នុងឆ្នាំ ២០២២។

AI Gemini មានសមត្ថភាពរួមបញ្ចូលគ្នានូវគុណសម្បត្តិនៃប្រព័ន្ធសិក្សាដោយខ្លួនឯង ដើម្បីបង្កើតរូបភាពពីការពិពណ៌នាអត្ថបទដែលស្រដៀងទៅនឹង GPT-4 ជាមួយនឹងសមត្ថភាពភាសានៃ chatbots ដោយផ្អែកលើគំរូភាសាធំ (LLM) ។ វាក៏អនុញ្ញាតឱ្យ Google បង្កើតផលិតផល AI សម្រាប់ការសន្ទនាដូចជា chatbots វិភាគទិន្នន័យ គំនូសតាង បង្កើតក្រាហ្វិក និងគ្រប់គ្រងកម្មវិធីដោយប្រើពាក្យបញ្ជា។

Gemini ក៏ជាក្បួនដោះស្រាយការរៀនពង្រឹង ដែលអនុញ្ញាតឱ្យកម្មវិធីរៀនពីរបៀបដោះស្រាយបញ្ហាក្នុងវិធីឡូជីខល និងជាប្រព័ន្ធ។ ដូច្នេះដើម្បីបង្កើត AI ដូច Gemini បាន វាត្រូវបានគេប៉ាន់ស្មានថាការចំណាយអាចឈានដល់រាប់រយលានដុល្លារ។

បច្ចុប្បន្ន Google បានផ្តល់សិទ្ធិចូលប្រើកំណែដំបូងនៃ Gemini ដល់ក្រុមក្រុមហ៊ុនតូចៗ រួមទាំងការចាប់ផ្តើមអាជីវកម្ម AI មួយចំនួន ដើម្បីប្រមូលមតិកែលម្អ Gemini មុនពេលចេញផ្សាយទូទៅរបស់វា។ ក្រុមហ៊ុនយក្សនេះគ្រោងនឹងធ្វើឱ្យ Gemini អាចរកបានសម្រាប់ក្រុមហ៊ុនតាមរយៈសេវាកម្ម Google Cloud Vertex AI របស់ខ្លួន។ ដូចនេះ តាមរយៈការបង្កើត AI Gemini ក្រុមហ៊ុន Google សង្ឃឹមថាកម្មវិធីនេះ និងអាចសន្ទនា ឆ្លើយតបទៅកាន់អ្នកប្រើប្រាស់ដោយធម្មជាតិ ត្រឹមត្រូវ និងច្នៃប្រឌិត៕
ប្រភព៖cfef.com

សហរដ្ឋអាមេរិក ៖ នៅថ្ងៃទី១៨ ខែកញ្ញា ឆ្នាំ២០២៣ សារព័ត៌មានប្រទេសទួរគីចុះផ្សាយថា ប្រធានាធិបតីប្រទេសទួរគី លោក Recep Tayyip Erdogan កំពុងស្ថិតនៅទឹកដីសហរដ្ឋអាមេរិក ដើម្បីចូលរួមកិច្ចប្រជុំមហាសន្និបាតអង្គការសហប្រជាជាតិ លើកទី៧៨ ។ កាលពីថ្ងៃទី១៧ ខែកញ្ញា កន្លងមក មានអ្នកប្រទះឃើញប្រធានាធិបតីប្រទេសទួរគី លោក Erdogan ជជែកជាមួយលោក Elon Musk ជា CEO របស់ក្រុមហ៊ុន Tesla នៅអគារ Turkish House ដែលអគារនេះនៅជិតការិយាល័យអង្គការសហប្រជាជាតិនៅទីក្រុងញូវយ៉ក ។

សារព័ត៌មានប្រទេសទួរគីបញ្ជាក់ថា ប្រធានាធិបតីប្រទេសទួរគី លោក Erdogan បានព្យាយាមអញ្ជើញឱ្យលោក Elon Musk សាងសង់រោងចក្រផលិតរថយន្ត Tesla នៅប្រទេសទួរគី ។ ប្រធានាធិបតីប្រទេសទួរគីអះអាងថា កាលពីខែឧសភា ឆ្នាំ២០២៣ លោក Elon Musk ធ្លាប់ប្រកាសថា ក្រុមហ៊ុន Tesla កំពុងស្វែងរកទីតាំងសាងសង់រោងចក្រថ្មីនៅចុងឆ្នាំ២០២៣ ។

បច្ចុប្បន្ន ក្រុមហ៊ុន Tesla មានរោងចក្រចំនួន៦កន្លែង ហើយក្រុមហ៊ុននេះនឹងសាងសង់រោងចក្រទី៧ នៅរដ្ឋ Nuevo León ដែលស្ថិតនៅភាគឦសានប្រទេសម៉ិកស៊ិក ។ កាលពីខែសីហា ឆ្នាំ២០២៣ លោក Elon Musk បានបង្ហាញការចាប់អារម្មណ៍សាងសង់រោងចក្រនៅប្រទេសឥណ្ឌា ដើម្បីផលិតរថយន្តអគ្គិសនីមានតម្លៃធូរថ្លៃ ។ ហេតុនេះ ការប្រកាសសាងសង់រោងចក្ររបស់លោក Elon Musk គឺជាផ្នែកមួយនៃការពង្រីកប្រតិបត្តិការនៅទូទាំងពិភពលោក របស់ក្រុមហ៊ុន Tesla ៕ ប្រភព ៖ beartaiBRIEF

បរទេស៖ រដ្ឋាភិបាលអ៊ុយក្រែនកាលពីថ្ងៃទី១៨ ខែកញ្ញា បានសម្រេចបណ្តេញអនុរដ្ឋមន្ត្រីក្រសួងការពារជាតិចំនួន ៦ រូបចេញពីតំណែង បន្ទាប់ពីបានតែងតាំងរដ្ឋមន្ត្រីថ្មីកាលពីដើមខែនេះ។

យោងតាមប្រភពព័ត៌មាន Reuters បានឱ្យដឹងថា ក្នុងចំណោមអ្នកដែលត្រូវបានបណ្តេញចេញនោះមានលោកស្រី Hanna Maliar ជាមន្ត្រីម្នាក់ដែលផ្តល់ព័ត៌មានថ្មីៗជាប្រចាំអំពីស្ថានភាពជម្លោះរុស្ស៊ីនិងអ៊ុយក្រែន និងលោក Oleksii Reznikov ដែលត្រូវបានជាប់ពាក់ព័ន្ធក្នុងរឿងអាស្រូវពុករលួយជាច្រើនក្នុងអំឡុងពេលលោកកាន់តំណែង រួមជាមួយអនុរដ្ឋមន្ត្រីការពារជាតិចំនួន ៤ រូបទៀត។

ការផ្លាស់ប្តូរនេះបានធ្វើឡើងពីរសប្តាហ៍បន្ទាប់ពីលោក Rustem Umerov ត្រូវបានតែងតាំងជារដ្ឋមន្ត្រីក្រសួងការពារជាតិ ដើម្បីជំនួសលោក Oleksii Reznikov។ លោក Umerov បាននិយាយនៅក្នុងសារបង្ហោះហ្វេសប៊ុកថា ក្រសួងការពារជាតិនឹងបន្តដំណើរការជាធម្មតា។ ទោះជាយ៉ាងណាក៏ដោយ រដ្ឋាភិបាលអ៊ុយក្រែនមិនបានបញ្ជាក់ពីមូលហេតុច្បាស់លាស់នៃការសម្រេចចិត្តបណ្ដេញអនុរដ្ឋមន្ត្រីការពារជាតិ ៦ រូបខាងលើនោះទេ។

យោងតាមប្រធានាធិបតី Volodymyr Zelensky បាននិយាយកាលពីដើមខែនេះថា បច្ចុប្បន្នក្រសួងការពារជាតិអ៊ុយក្រែនត្រូវការ “វិធីសាស្រ្តថ្មី” ហើយលោក Zelensky ក៏រំពឹងដែរថារដ្ឋមន្ត្រីថ្មី Umerov នឹងបន្តកំណែទម្រង់ក្នុងវិស័យការពារជាតិ ក្នុងបរិបទនៃយុទ្ធនាការវាយលុករបស់ទីក្រុងគៀវ ដែលកំពុងដំណើរការអស់រយៈពេល ៣ ខែកន្លងទៅនេះ។ រដ្ឋមន្ត្រី Umerov បាននិយាយថា គាត់នឹងធ្វើឱ្យក្រសួងក្លាយជាស្ថាប័នដ៏សំខាន់សម្រាប់ការសម្របសម្រួលកងកម្លាំងការពារ ការអភិវឌ្ឍឧស្សាហកម្មយោធារបស់អ៊ុយក្រែន និងការប្រយុទ្ធប្រឆាំងនឹងអំពើពុករលួយ៕
ប្រភព៖cafef.com

ប្រទេសថៃ ៖ ស្ថានការណ៍ទឹកជំនន់នៅខេត្តជាច្រើនក្នុងភាគឦសានប្រទេសថៃចាប់ផ្តើមបង្កផលប៉ះពាល់ជាច្រើនដូចជា ផ្លូវជាច្រើនកន្លែងត្រូវកាត់ផ្តាច់ ហើយតំបន់កសិកម្មជាច្រើនត្រូវទឹកលិច ជាពិសេស នៅខេត្តអ៊ូប៊ុន រាជថានី ។ គេសង្កេតឃើញថា ពលរដ្ឋដែលគេចពីទឹកជំនន់មករស់នៅក្នុងជម្រកបណ្តោះអាសន្នចាប់ផ្តើមខ្វះខាតស្បៀងអាហារ និងទឹកស្អាត ។

ពលរដ្ឋគេចពីទឹកជំនន់មករស់នៅក្នុងជម្រកបណ្តោះអាសន្ននៅសួនសាធារណៈហួយមួង ខេត្តអ៊ូប៊ុន រាជថានី បានយកអាហារស្រស់មកធ្វើម្ហូបដើម្បីបរិភោគក្នុងគ្រួសារ ក្រោយពីអាជ្ញាធរបានយកស្បៀងអាហារមកចែកជូន ។ ពលរដ្ឋភាគច្រើនដែលបានមករស់នៅក្នុងជម្រកបណ្តោះអាសន្ននេះ ប្រកបមុខរបរដើរស៊ីឈ្នួលគេ និងក្រងកម្រងផ្កាលក់ ។ ពលរដ្ឋខ្លះនិយាយថា ពួកគេបាត់បង់ប្រាក់ចំណូលប្រចាំថ្ងៃដោយសារទឹកជំនន់ ហើយពេលនេះ អាហារក្រៀម និងទឹកស្អាតមិនគ្រប់គ្រាន់ទេ ។

ស្ថានការណ៍ទឹកជំនន់នៅខេត្តអ៊ូប៊ុន រាជថានី មានទីប្រជុំជនចំនួន៤ បានជួបគ្រោះទឹកជំនន់ គឺទីប្រជុំជនវ៉ាំងឌែង, វាំងវ៉ាត់បូរ៉ាផា, កិកែវ និងថាបុងមាំង ក្នុងនោះមានពលរដ្ឋចំនួន៣៥គ្រួសារបានជម្លៀសទៅរស់នៅក្នុងជម្រកបណ្តោះអាសន្ន ។ បុរសម្នាក់បានគេចពីទឹកជំនន់នៅខេត្តអ៊ូប៊ុន រាជថានី ហើយមករស់នៅក្នុងជម្រកបណ្តោះអាសន្ននិយាយថា ៖ «ពួកយើងត្រូវការអាហារក្រៀម ទឹកស្អាត និងកម្រាលសម្រាប់សម្រាកផងដែរ» ។

ចំណែកភ្នាក់ងារគ្រប់គ្រងប្រចាំស្រុកឌូធុង ស្រុកយ៉ាក់សូថន បានដាក់ស្លាកសញ្ញាប្រកាសហាមចូល និងបិទផ្លូវបណ្តោះអាសន្ន ដើម្បីហាមយានជំនិះគ្រប់ប្រភេទបើកឆ្លងកាត់ផ្លូវ ដែលតភ្ជាប់រវាងស្រុកយ៉ាក់សូថន ទៅកាន់ស្រុកសេរ៉ាភូមិ ខេត្តរ៉យអេត ។ ការបិទផ្លូវនេះ ដោយសារទឹកជំនន់បានលិចផ្លូវក្នុងកម្ពស់ជាង៥០សង់ទីម៉ែត្រ និងមានប្រវែង១គីឡូម៉ែត្រ ។ ទឹកជំនន់បានលិចផ្លូវអស់រយៈពេល១សប្តាហ៍ ហើយធ្វើឱ្យផ្លូវក្នុងតំបន់មួយចំនួនខូចខាត ។ នៅថ្ងៃទី១៨ ខែកញ្ញា ឆ្នាំ២០២៣ ទឹកនៅតែហូរខ្លាំង ហើយអាជ្ញាធរបារម្ភខ្លាចកើតគ្រោះថ្នាក់ដោយសារការប្រើប្រាស់ផ្លូវ ។

ដូចគ្នានេះដែរ ផ្លូវនៅតាមមាត់ទន្លេឈី នៅស្រុកមឿងមហាសារ៉ាខាម បានខូចខាតប្រវែង៥០ម៉ែត្រ ហើយអាជ្ញាធរបានដាក់ស្លាកសញ្ញាដាស់តឿនដល់អ្នកបើកបរទាំងអស់ និងមានដាក់ភ្លើងបំភ្លឺផ្លូវផងដែរ ដើម្បីផ្តល់ភាពងាយស្រួលដល់អ្នកធ្វើដំណើរ ។ អាជ្ញាធររំពឹងថា នឹងអាចជួសជុលផ្លូវនេះឱ្យដូចដើមវិញ ក្នុងរយៈពេលពី២ថ្ងៃ ទៅ៣ថ្ងៃ ៕ ប្រភព ៖ Thai PBS