ប្រទេសឡាវ ៖ ប្រទេសថៃ និងឡាវបានប្រជុំពិភាក្សាគ្នាអំពីវិធានការទាក់ទាញភ្ញៀវទេសចរបរទេស តាមរយៈការតភ្ជាប់ផ្លូវទេសចរណ៍ និងពន្លឿនការសាងសង់ស្ពានមិត្តភាពថៃ-ឡាវ ទី២ នៅស្រុកប៉ាកឈុំ ខេត្តឡឺយ ។ វិធានការលើកលែងទិដ្ឋាការ (Free Visa) សម្រាប់ភ្ញៀវទេសចរចិន និងកាហ្សាក់ស្ថានមកកាន់ប្រទេសថៃ ក៏ធ្វើឱ្យប្រទេសឡាវទទួលបានផលប្រយោជន៍ផងដែរ ។

លោក ថាវី សឺមភក្តីគុណ (Thawee Sermphakdhikul) អភិបាលខេត្តឡឺយ ព្រមទាំងមន្ត្រីរដ្ឋាភិបាលផ្សេងទៀតបានប្រជុំជាមួយអភិបាលក្រុងវៀងចន្ទន៍ លោក ខាំផែន ស៊ីធីដាំផា (Khamphan Sithidampha) នៅប្រទេសឡាវ ពាក់ព័ន្ធនឹងបញ្ហាសន្តិសុខនៅតាមព្រំដែនថៃ-ឡាវ រវាងខេត្តឡឺយ និងក្រុងវៀងចន្ទន៍ ។ ភាគីទាំងពីរបានពិភាក្សាគ្នាក្រោមប្រធានបទផ្សព្វផ្សាយពីវិស័យទេសចរណ៍ ការផ្លាស់ប្តូរវប្បធម៌ និងកិច្ចសហការផ្នែកសេដ្ឋកិច្ច សង្គម និងសន្តិសុខ ។

ក្រោយពីរដ្ឋាភិបាលថៃសម្រេចចិត្តអនុម័តវិធានការលើកលែងទិដ្ឋាការ (Free Visa) សម្រាប់ទាក់ទាញភ្ញៀវទេសចរចិន និងកាហ្សាក់ស្ថាន ប្រទេសឡាវក៏បានរៀបចំគម្រោងអភិវឌ្ឍន៍តំបន់ព្រំដែនរបស់ទីក្រុងម៉ឺន និងទីក្រុងវៀងចន្ទន៍ ។ ការអភិវឌ្ឍនៅតំបន់ព្រំដែននេះ ក្នុងគោលបំណងទទួលភ្ញៀវទេសចរធ្វើដំណើរមកកាន់ប្រទេសឡាវជាបន្តបន្ទាប់ ដោយសារវិធានការលើកលែងទិដ្ឋាការរបស់ថៃ ។

លោក ថាវី សឺមភក្តីគុណ លើកឡើងថា ទីក្រុងម៉ឺនស្ថិតនៅមិនឆ្ងាយពីស្រុកប៉ាកឈុំប៉ុន្មានទេ ។ ដូច្នេះ វាអាចក្លាយជាច្រកតភ្ជាប់តំបន់ទេសចរណ៍ល្បីៗនៅខេត្តឡឺយ និងទីក្រុងវៀងចន្ទន៍ ដូចជា តំបន់ទេសចរណ៍ចាប់ពីស្រុកឈៀងខាន់-ស្រុកប៉ាកឈុំ ខេត្តឡឺយ រហូតដល់ទីក្រុងវ៉ាងវៀង-ទីក្រុងហ្វឿង ប្រទេសឡាវ ។ លោកបន្តថា ប្រទេសឡាវមានច្រកឆ្លងកាត់ព្រំដែនប៉ុណ្ណោះអាសន្នប៉ុណ្ណោះនៅបរិវេណព្រំដែន ហើយរដ្ឋាភិបាលថៃនឹងសុំកិច្ចសហការពីប្រទេសឡាវ ដើម្បីឱ្យច្រកឆ្លងកាត់ព្រំដែនបណ្តោះអាសន្ននេះក្លាយជាច្រកព្រំដែនជាផ្លូវការនៅចុងឆ្នាំ២០២៣ ។

ក្រៅពីនេះ ខេត្តឡឺយក៏មានគម្រោងសាងសង់ស្ពានមិត្តភាពថៃ-ឡាវ ទី២ នៅស្រុកប៉ាកឈុំ ខេត្តឡឺយផងដែរ ដើម្បីជួយជំរុញវិស័យទេសចរណ៍ ពាណិជ្ជកម្ម ការវិនិយោគ និងផ្នែក Logistics ។ ចំណែកស្ពានមិត្តភាពថៃ-ឡាវ ទី១ ស្ថិតនៅខេត្តឡឺយ គឺបានតភ្ជាប់រវាងស្រុកថាលី និងទីក្រុងគែនថាវ ប្រទេសឡាវ ៕ ប្រភព ៖ AEC connect

នៅកីឡដ្ឋាន Do Son Stadium ប្រទេសវៀតណាមនាថ្ងៃទី២៣ ខែកញ្ញា ឆ្នាំ២០២៣ មាន មនុស្សប្រមាណ២ម៉ឺននាក់បានចូលរួមទស្សនាការប្រកួតប្រជល់ក្របីដើម្បីដណ្តើមជ័យលាភី ខណៈការប្រកួតនេះពោរពេញដោយភាពរន្ធត់ និងញាប់ញ័រយ៉ាងខ្លាំង។

ល្បែងប្រជល់ក្របីនេះមានក្របីដែលចូលរួមទាំងអស់១៦ក្បាលមកពីសង្កាត់ផ្សេងៗគ្នា ដោយមានការឆ្លងកាត់ ប្រកួតយ៉ាងតឹងរ៉ឹងចំនួនបីជុំមុននឹងចូលរួមក្នុងជុំចុងក្រោយ។ នៅក្នុងការប្រជល់នេះក្របី ០៩ និងក្របី ០៣ ស្ថិតក្នុងការប្រកួតចុងក្រោយ។ ការប្រកួតរបស់ក្របីលេខ ០៩ បានផ្ដួលគូប្រកួតជាច្រើនក្បាល ប៉ុន្តែមិនអាចយកឈ្នះកំពូលក្របីលេខ ០៣ បានឡើយ។

ក្របីលេខ ០៣ នេះមានអាយុ១១ឆ្នាំ នាំចូលពីប្រទេសថៃ កំពស់១.៦ម៉ែត្រ បណ្តោយ២.៤ម៉ែត្រ រង្វង់ទ្រូង២.៦ម៉ែត្រ ទម្ងន់១.៣តោន។ ជាមួយនឹងកម្លាំងដ៏ខ្លាំងក្លាដែលយកឈ្នះគូប្រកួតជាបន្តបន្ទាប់ រហូតក្លាយជាជើងឯក។ ក្របីដែលចាញ់ក្នុងការប្រកួតនឹងត្រូវយកទៅកន្លែងសត្តឃាត និងការលក់សាច់ក្របីក្នុងកីឡដ្ឋាននេះមានតម្លៃ ៣ លានដុងប្រមាណ១២៣ដុល្លារក្នុងមួយគីឡូក្រាម។

ម្ចាស់ក្របីដែលឈ្នះរង្វាន់ទី១ នឹងត្រូវទទួលពានរង្វាន់១០០លានដុង(ជាង៤០០០ដុល្លារ) រង្វាន់ទី២ ៦០លានដុង (ជាង២០០០ដុល្លារ) និងរង្វាន់ទី៣ ៣០លានដុង (ជាង១០០០ដុល្លារ)។

គួរបញ្ជាក់ថា ល្បែងប្រជល់ក្របី ត្រូវបានរាប់ជាល្បែងបុរាណកាលយូរលង់មកហើយរបស់ប្រទេសវៀតណាមហើយក៏មានភាពពេញនិយមដើម្បីទាក់ទាញអ្នកភ្ញៀវទេសចរបានច្រើន៕

ប្រទេសកូរ៉េខាងត្បូង ៖ ប្រទេសកូរ៉េខាងត្បូងបានអនុម័តច្បាប់ថ្មីដើម្បីការពារសិទ្ធិគ្រូបង្រៀន ក្រោយពីអាណាព្យាបាលសិស្សមួយចំនួនតែងទាមទារសិទ្ធិរបស់កុមារ ដោយរាយការណ៍អាក្រក់ពីគ្រូ និងធ្វើឱ្យប៉ះពាល់ដល់ការងារគ្រូ ។ កន្លងមក មានគ្រូបង្រៀននៅសាលាបឋមសិក្សាម្នាក់បានសម្លា.ប់ខ្លួ.ន ដោយសារអាណាព្យាបាលសិស្សប្តឹងច្រើនពេក ។

កាលពីថ្ងៃទី២១ ខែកញ្ញា ឆ្នាំ២០២៣ សារព័ត៌មាន BBC ចុះផ្សាយថា ប្រទេសកូរ៉េខាងត្បូងបានអនុម័តច្បាប់ថ្មីដើម្បីការពារសិទ្ធិគ្រូបង្រៀន ដោយសារការរិះគន់របស់អាណាព្យាបាលសិស្ស ។ គ្រូបង្រៀននៅកូរ៉េខាងត្បូងត្រូវបានអាណាព្យាបាលសិស្សគំរា.មកំហែ.ងជាច្រើនរឿង រហូតធ្វើឱ្យគ្រូជាច្រើននាក់នាំគ្នាធ្វើបាតុ.កម្មអស់រយៈពេល៩សប្តាហ៍ ដើម្បីទាមទារសិទ្ធិកាន់តែច្រើនក្នុងថ្នាក់រៀន ។

គ្រូបង្រៀននិយាយថា អាណាព្យាបាលសិស្សរាយការណ៍ថា គ្រូបានបំពានលើកុមារ ដើម្បីឱ្យគេបណ្តេញគ្រូចេញពីការងារ ។ គ្រូខ្លះទៀតត្រូវគេរាយការណ៍ថា បង្រៀនសិស្សដោយប្រើអំពើហិ.ង្សា ឬរិះគន់សិស្សឱ្យឈប់រៀន ។ ហេតុនេះ អាណាព្យាបាលសិស្សទាញយកផលប្រយោជន៍ពីច្បាប់ពាក់ព័ន្ធនឹងសិទ្ធិកុមារនៅឆ្នាំ២០១៤ ដែលច្បាប់នេះចែងថា គ្រូណាម្នាក់ដែលរងការចោទប្រកាន់ថា បានបំពានលើកុមារ គឺត្រូវសម្រាកពីការងារភ្លាមៗ ។

គេហៅច្បាប់ថ្មីនេះថា «ច្បាប់ស្តារសិទ្ធិគ្រូបង្រៀន» នឹងជួយគ្រូមិនឱ្យផ្លាស់ប្តូរការងារភ្លាមៗ ដោយសារត្រូវគេរាយការណ៍ថា រំលោភសិទ្ធិកុមារ ។ ប៉ុន្តែគ្រូទាំងនេះនឹងត្រូវគេត្រួតពិនិត្យ និងរកភស្តុតាងបន្ថែមទៀតពាក់ព័ន្ធនឹងការចោទប្រកាន់ ។ ចំណែកជំនួយហិរញ្ញវត្ថុនឹងផ្តល់ឱ្យគ្រូណាដែលត្រូវតទល់នឹងពាក្យបណ្តឹង ហើយនាយកសាលាអាចទទួលខុសត្រូវបន្ថែមទៀត ដើម្បីជួយការពារបុគ្គលិករបស់ខ្លួន ។

ចំណែកសមាគមគ្រូបង្រៀនកូរ៉េខាងត្បូងបានទទួលយកច្បាប់ថ្មីនេះ និងបញ្ជាក់ថា ខាងសមាគមនឹងការពារសិទ្ធិទាំងសងខាង គឺការពារសិទ្ធិគ្រូបង្រៀន និងការពារសិទ្ធិការរៀនរបស់កូនសិស្ស ។ ការតវ៉ារបស់ក្រុមគ្រូបង្រៀនបានកើតឡើង ក្រោយគេរាយការណ៍ថា គ្រូបង្រៀនម្នាក់អាយុ២៣ឆ្នាំ បង្រៀននៅសាលាបឋមសិក្សាមួយកន្លែង បានសម្លា.ប់ខ្លួ.ន កាលពីខែកក្កដា ឆ្នាំ២០២៣ ដោយសារប្រឈមនឹងពាក្យបណ្តឹងពីអាណាព្យាបាលសិស្សជាច្រើននាក់ ៕ ប្រភព ៖ Bangkok biznews

កោសិកា គឺជាបណ្តុំសំណង់ដែលបង្កើតឡើងជាជាលិកា និងសរីរាង្គទាំងអស់នៃរាងកាយ។ យោងតាមការសិក្សាថ្មីមួយដោយផ្អែកលើអត្ថបទស្រាវជ្រាវជាង ១,៥០០ ផ្សេងទៀត បានឱ្យដឹងថា បុរសពេញវ័យជាមធ្យមមានកោសិកាប្រហែល ៣៦ ទ្រីលាន រីឯស្ត្រីពេញវ័យវិញជាមធ្យមមាន ២៨ ទ្រីលាន ចំណែកកុមារអាយុ ១០ ឆ្នាំមានកោសិកាប្រហែល ១៧ ទ្រីលាន។ដើម្បីឈានដល់ការសន្និដ្ឋាននេះ ក្រុមការងារបានពិនិត្យមើលទំហំ និងកោសិកាចំនួន ៤០០ ប្រភេទនៅទូទាំង ៦០ ជាលិកា រួមទាំងកោសិកាភាពស៊ាំ សាច់ដុំ និងកោសិកាសរសៃប្រសាទ នេះបើយោងតាមការស្រាវជ្រាវថ្មីដែលបានចុះផ្សាយក្នុងទស្សនាវដ្ដី PNAS កាលពីថ្ងៃទី ២០ ខែកញ្ញា។

លោក Ian Hatton អ្នកដឹកនាំការស្រាវជ្រាវ និងជាអ្នកជំនាញនៅវិទ្យាស្ថាន Max Planck សម្រាប់គណិតវិទ្យាផ្នែកវិទ្យាសាស្ត្រនៅទីក្រុង Leipzig ប្រទេសអាល្លឺម៉ង់បាននិយាយថា “យើងពិតជាមានការភ្ញាក់ផ្អើលយ៉ាងខ្លាំង នៅពេលដែលបានឃើញទំនាក់ទំនងបញ្ច្រាសស្មើគ្នារវាងទំហំកោសិកា និងចំនួននៅទូទាំងរាងកាយមនុស្ស”។
ប៉ុន្តែទោះជាយ៉ាងណាក៏ដោយ ការស្រាវជ្រាវនាពេលបច្ចុប្បន្ននេះអាចនៅមានភាពមិនប្រាកដប្រជាក្នុងទិន្នន័យ ដោយសារតែពួកគេគ្រាន់តែពឹងផ្អែកលើការសន្និដ្ឋានអំពីទំហំកោសិកាដែលធ្វើឡើងដោយមីក្រូទស្សន៍ និងការវាស់វែងដោយប្រយោលផ្សេងទៀត ជាជាងការវាស់វែងដោយផ្ទាល់។

ដូច្នេះ ទំនាក់ទំនងរវាងទំហំកោសិកា និងចំនួនមិនត្រូវបានគេសិក្សានៅគ្រប់ទំហំរាងកាយទាំងអស់របស់មនុស្សនោះទេ។ លោក Hatton បាននិយាយថា យើងត្រូវតែធ្វើការស្រាវជ្រាវបន្ថែមដើម្បីបំពេញចន្លោះប្រហោងទាំងនេះ។ លោក Hatton ក៏បានបន្តទៀតថា ទោះជាយ៉ាងណាក៏ដោយ ការសិក្សាថ្មីៗនេះនឹងអាចជួយបញ្ជាក់ពីភាពខុសគ្នាមួយចំនួននៃចំនួនកោសិកាដែលបានកត់សម្គាល់នៅក្នុងការសិក្សាចាស់ៗ ដែលនេះអាចផ្តល់ព័ត៌មានដ៏មានអត្ថន័យបំផុតទាក់ទងនឹងសុខភាពរាងកាយរបស់មនុស្ស៕
ប្រភព៖vnexpress

សហរដ្ឋអាមេរិក ៖ ចំនួនជនភៀសខ្លួនឆ្លងកាត់ព្រំដែនមកពីប្រទេសម៉ិកស៊ិកចូលមកកាន់ទឹកដីសហរដ្ឋអាមេរិក ចាប់ពីរដ្ឋកាលីហ្វ័រញ៉ា ដល់រដ្ឋតិចសាស់ បានកើនឡើងខ្ពស់ រហូតធ្វើឱ្យមន្ត្រីប្រចាំរដ្ឋតិចសាស់ប្រកាសអាសន្ន និងបញ្ជូនអាជ្ញាធរមកការពារសុវត្ថិភាពនៅបរិវេណព្រំដែន ។

ជនភៀសខ្លួនមួយចំនួនបានឈរចាំនៅតាមបណ្តោយរបងលួសរវាងព្រំដែនប្រទេសម៉ិកស៊ិក និងអាមេរិក នៅទីក្រុងអ៊ីកិនផាស់ រដ្ឋតិចសាស់ ។ មន្ត្រីប្រចាំរដ្ឋតិចសាស់បានសម្រេចចិត្តប្រកាសអាសន្ន ក្រោយពីមានជនភៀសខ្លួនប្រមាណ៦.០០០នាក់ធ្វើដំណើរឆ្លងកាត់ទន្លេរីអូកែន ចូលមកកាន់ទីក្រុងនេះ ដែលមានពលរដ្ឋរស់នៅប្រមាណ២ម៉ឺន៨ពាន់នាក់ ។

ក្រៅពីនេះ មន្ត្រីប្រចាំរដ្ឋតិចសាស់បានបញ្ជាឱ្យបិទស្ពាន និងការផ្តល់សេវាកម្មរថភ្លើងក្នុងទីក្រុងផងដែរ ដើម្បីបញ្ជូនអាជ្ញាធរមកការពារសុវត្ថិភាពនៅបរិវេណទាំងនេះបន្ថែមទៀត ។ ជំហានដំបូង គេមិនទាន់ដឹងថា ស្ថានការណ៍នឹងត្រឡប់មករកសភាពធម្មតាវិញនៅពេលណាទេ ។

ចំណែកស្ថានការណ៍ជនភៀសខ្លួននៅរដ្ឋកាលីហ្វ័រញ៉ា ក៏មិនខុសគ្នាពីរដ្ឋតិចសាស់ដែរ ។ មន្ត្រីក្នុងតំបន់នេះបញ្ជាក់ថា នាពេលកន្លងមក មានជនភៀសខ្លួនធ្វើដំណើរឆ្លងកាត់ព្រំដែនពីប្រទេសម៉ិកស៊ិកមកចុះឈ្មោះសុំជំនួយនៅទីក្រុងសាលឌីអែលហ្គោ រដ្ឋកាលីហ្វ័រញ៉ា ចំនួនជាង៣.០០០នាក់ ។

ចំនួនជនភៀសខ្លួនបានកើនឡើងយ៉ាងខ្លាំងនៅបរិវេណព្រំដែនអាមេរិក និងម៉ិកស៊ិក ចាប់ពីរដ្ឋកាលីហ្វ័រញ៉ា រហូតដល់រដ្ឋតិចសាស់ ។ វាបានក្លាយជាឧបសគ្គសំខាន់របស់រដ្ឋាភិបាលអាមេរិក ដែលដឹកនាំដោយលោក ចូ បៃដិន មុនការបោះឆ្នោតជ្រើសរើសប្រធានាធិបតីអាមេរិកនៅឆ្នាំ២០២៤ ។ បច្ចុប្បន្ន អាមេរិកកំពុងប្រឈមជាមួយបញ្ហាជនភៀសខ្លួនដែលហូរចូលមកក្នុងប្រទេសជាបន្តបន្ទាប់ ។

អ្នកវិភាគលើកឡើងថា អាមេរិកខ្វះខាតប្រព័ន្ធឃុំខ្លួន និងគ្រប់គ្រងជនភៀសខ្លួននៅបរិវេណព្រំដែន ដែលធ្វើឱ្យអាមេរិកមិនអាចអនុវត្តច្បាប់ដាក់ទោសតឹងរ៉ឹង ដែលធ្លាប់ប្រកាសកាលពីខែឧសភា ឆ្នាំ២០២៣ ។ ដូចគ្នានេះ ក្រសួងសន្តិសុខអាមេរិកបញ្ជាក់ថា មន្ត្រីអាមេរិកខ្វះខាតឧបករណ៍ដើម្បីធានាសុវត្ថិភាពនៅតាមព្រំដែន និងការបង្កើតប្រព័ន្ធគ្រប់គ្រងជនភៀសខ្លួនដែលមានប្រសិទ្ធភាព ៕ ប្រភព ៖ Thai PBS