លោក អ៊ូ ប៉ុណ្ណារ៉ាត់ ហៅ នាយក្រឹម ដែលជាតារាកំប្លែងជើងចាស់ល្បីឈ្មោះប្រចាំប្រទេសត្រូវបានមហាជនរិះគន់យ៉ាងខ្លាំងបន្ទាប់ពីនិយាយក្នុងន័យរើសអើងភេទទី៣ ព្រោះខ្លាចបាត់បង់ធនធានមនុស្ស។ ក្នុងនោះអ្នកលេងបណ្តាញសង្គមល្បីឈ្មោះ Peypey dy បានលើកឡើងយ៉ាងចាក់ដោតដោយបានលើកឡើងថាភេទទី៣មួយចំនួន និយាយស្តីបានឆ្លងកាត់ខួរ និងមានសុជីវធម៌ជាងមនុស្សប្រុសមួយចំនួន។ ចំណែកឯលោក តាន់ គឹមសួរ មិនបានរិះគន់តារាកំប្លែង នាយ ក្រឹម ទេថែមទាំងពោលអរគុណទៅវិញដោយសារតែមានហេតុផលនេះ។

ក្នុងអំឡុងពេលផ្សាយបន្តផ្ទាល់ក្នុងនាមជាគណៈកម្មការ កម្មវិធីលំដាប់ពិភពលោក Cambodia’s Got Talent កាលពីយប់ថ្ងៃទី២៨ តុលា លោក អ៊ូ ប៉ុណ្ណារ៉ាត់ ហៅ នាយក្រឹម ត្រូវបានមហាជនអ្នកលេងបណ្តាញសង្គមរិះគន់មិនសំចៃ ព្រោះក្នុងពេលផ្តល់មូលវិចារ្យទៅកាន់បេក្ខជន ណុប ដាណេ បាននិយាយរើសអើងភេទទី៣ ខ្លាចបាត់បង់ធនធានមនុស្សក្នុងសង្គមដោយសារតែកើនឡើងភេទទី៣ច្រើន។

ការនិយាយបែបនេះធ្វើឱ្យអ្នកស្រលាញ់ភេទដូចគ្នា រួមទាំងមហាជនទូទៅ អ្នកសិល្បៈច្រើនរូបមិនពេញចិត្តចំពោះពាក្យសម្តីរបស់តារាកំប្លែងល្បីឈ្មោះរូបនេះឡើយដោយបានចេញមុខការពារបេក្ខជន ណុប ដាណេ និងទាមទារសិទ្ធិរបស់ពួកគេនិងទាមទារមិនឱ្យមានការរើសអើងភេទទី៣ឡើយ។
លោក Peypey dy ដែលគេស្គាល់ថាជាបុគ្គលល្បីឈ្មោះលេចមុខច្រើនក្នុងពិភពសិល្បៈ បានលើកឡើងថា «Respect បងឃីមហើយសូមលោកពូ ក្រឹម ក្រឡេកមើលភេទទី៣មួយចំនួនធំ គេមាន business មានការងារល្អ មានចំណូល បង់ពន្ធជូនរដ្ឋដូចគ្នា។ តើធនធានមនុស្សសំដៅតែចំពោះភេទប្រុសនិងភេទស្រី ឬយ៉ាងម៉េច? ក្រែងលោកពូ ធ្លាប់សម្តែងធ្វើជាភេទទី៣ដែរតើ មិនចឹង?»។

ម្ចាស់ហាងហឹរខនណឺ រូបនេះបន្តថា «ភេទទី៣ មួយចំនួន និយាយស្តីបានឆ្លងកាត់ខួរ និងមានសុជីវធម៌ ជាងមនុស្សប្រុសមួយចំនួនផង វាមិនអាស្រ័យលើភេទទេពូ វាអាស្រ័យលើខួរនិងទង្វើរបស់មនុស្ស ពូខ្លាចបាត់បង់ធនធានមនុស្សដោយសារមានភេទទី៣ច្រើនតែខ្ញុំ ខ្លាច មនុស្សនិយាយច្រើនបាត់ខួរ »។

ទន្ទឹមនឹងមានមតិរិះគន់ តារាកំប្លែង នាយក្រឹម ងាកទៅកាន់លោក តាន់ គឹមសួរ បានបញ្ចេញមតិផ្ទុយពីមហាជនមួយចំនួនធំដោយអរគុណតារាកំប្លែងនិងជាគណៈកម្មការរូបនេះសុខចិត្តប្រើវិធីឈឺសាច់ដើម្បីបំផុសឱ្យមានការចាប់អារម្មណ៍ និងផ្ដល់តម្លៃទៅសមត្ថភាពរបស់បេក្ខជន។

លោក តាន់ គឹមសួរ បានសរសេរថា «អរគុណពូក្រឹមដែលសុខចិត្តប្រើវិធីឈឺសាច់នេះដើម្បីបំផុសបំផុលឱ្យមានការចាប់អារម្មណ៍ និងផ្ដល់តម្លៃទៅសមត្ថភាពរបស់បេក្ខជន ជាពិសេសឱ្យកម្ពុជាកាន់តែមានការយល់ដឹង អាចទទួលយក និងផ្ដល់តម្លៃទៅលើភេទទី៣»។

លោកបន្តថា « ខ្ញុំអាចយល់បាន ដោយសារនេះគឺជាវិធីឈឺសាច់ដែលខ្ញុំធ្លាប់បានធ្វើកន្លងមកពាក់ព័ន្ធទៅនឹងអក្សរសាស្ត្រខ្មែរ បរិស្ថាន និងគ្រឿងញៀន នេះគឺជាវិធីធ្វើរឿងអវិជ្ជមាន ដើម្បីបង្កើតរឿងវិជ្ជមាន
នេះគ្រាន់តែជាការគិតរបស់ខ្ញុំតែប៉ុណ្ណោះ ខុសត្រូវយ៉ាងណាកុំប្រកាន់អីបងប្អូន Be positive thinking»៕

នាវេលាម៉ោង៦ព្រឹក ត្រូវនឹងថ្ងៃទី៣០ ខែ១០ឆ្នាំ២០២៣នេះ មានករណីគ្រោះថ្នាក់ចរាចរណ៍មួយ ដោយនគរបាលចរាចរណ៍ម្នាក់ឈរនៅត្រង់ចំណុចផ្លូវបំបែក ស្រាប់តែត្រូវរថយន្តព្រុសពណ៌ស មួយគ្រឿងបេីកយ៉ាងលឿនបុកពេញទំហឹង។

ហេតុការណ៍នេះ កើតឡើង នៅភូមិបាក់រនាស់ សង្កាត់សង្ឃ័រ ក្រុងស្វាយរៀង ខេត្តស្វាយរៀង ដែលបណ្តាលឱ្យបូលិសចរាចរណ៍នោះ រងរបួសធ្ងន់ និងជនបង្កបានបើករត់ឡើងលឿនចេញពីកន្លែងកើតហេតុ។

ខណៈស្នងការខេត្តស្វាយរៀង បានចេញកម្លាំងតាមស្វែងរកជនបង្ក យកមកដាក់ទោសតាមផ្លូវច្បាប់៕

នាថ្ងៃទី២៩ ខែតុលា ឆ្នាំ២០២៣ វត្តមានផ្ទាល់ ព្រះធម្មវន វាសី ចន្ទមុនី នៅក្នុងវត្តរាជបូណ៌ បានធ្វើឱ្យមហាជនរាប់មុឺននាក់នៅក្នុងខេត្តសៀមរាប មានការភ្ញាក់ផ្អើលជាខ្លាំង។
ក្រោយពីនិមន្ត ដល់វត្តរាជបូណ៌ ដើម្បីជួបសម្តេចព្រះព្រហ្មរតនមុនី ពិន សែម ហើយនោះ ព្រះធម្មវន វាសី ចន្ទមុនី ក៏បានធ្វើនិមន្តទៅប្រាសាទអង្គរវត្តថែមទៀត ដែលកាន់តែនាំមហាជន នាំគ្នាទៅភ្លូកទឹកភ្លូកដី និងបានបន្សល់សំរាមជាច្រើន ពាសពេញទឹកដីអង្គរ ធ្វើឱ្យខូចសោភ័ណ្ឌភាព នៅតំបន់រមណីយដ្ឋានប្រវត្តិសាស្រ្តមួយនេះ។ដោយនៅក្នុងថ្ងៃនេះ គេឃើញមានអជ្ញាធរជាតិអប្សារាជាច្រើននាក់ បានដើរនាំគ្នាប្រមូលសំរាមជុំវិញរមណីយដ្ឋានអង្គរ ដើម្បីកែតម្រូវមុខមាត់តំបន់អង្គរឱ្យស្រស់ស្អាតឡើងវិញ។

ជុំវិញការបោះចោលសំរាមនេះ នាក់លេងបណ្តាញសង្គមមួយចំនួនបានធ្វើការិះគន់ ដោយអ្នកខ្លះលើកឡើងថា៖”ចេះយកទៅ តែបែរជាមិនចេះយកវិញ” និងអ្នកខ្លះទៀត ថា៖”នាំគ្នាទៅភ្លូកទឹកភ្លូកដី ដូចនាំគ្នាទៅចោលសំរាម”៕

ការបោះបង់ចោលកូនជាអនីតិជនដែលស្ថិត នៅក្រោមអាណាព្យាបាលរបស់ខ្លួននោះគឺជាទង្វើល្មើសច្បាប់ ដោយយោងតាមរដ្ឋធម្មនុញ្ញដែលជាច្បាប់កំពូលនៃព្រះរាជាណាចក្រកម្ពុជា បានចែងថា៖” មាតាបិតាមានកាតព្វកិច្ចថែរក្សា និងអប់រំកូនឱ្យទៅជាពលរដ្ឋល្អ”។

ការបោះបង់អនីតិជន គឺជាបទល្មើសមជ្ឈិម ដែលយោងតាមមាត្រា ៣២១នៃក្រមព្រហ្មទណ្ឌ បានកំណត់យ៉ាងច្បាស់ថា “អំពើរបស់បុគ្គលមានអំណាចថែរក្សា ដែលបោះបង់អនីតិជនអាយុតិចជាង ១៥ឆ្នាំ ត្រូវផ្ដន្ទាទោសដាក់ពន្ធនាគារពី ១ឆ្នាំ ទៅ៥ឆ្នាំ និងត្រូវពិន័យជាប្រាក់ពី ២.០០០.០០០រៀល ទៅ១០.០០០.០០០រៀល ប្រសិនបើអំពើបោះបង់នោះបណ្ដាលឱ្យអន្តរាយដល់សុខភាព ឬសន្តិសុខរបស់អនីតិជននោះ” ។

លើសពីនេះទៅទៀត អំពើបោះបង់អនីតិជន គឺជាអំពើខុសច្បាប់ និងធ្វើឱ្យសង្គមយើងកើនឡើងនូវក្មេងអនាថា ដែលមិនមានអត្តសញ្ញាណច្បាស់លាស់ ហើយអាចឱ្យពួកគេងាយរងគ្រោះពីការកេងប្រវ័ញ្ចកម្លាំងពលកម្ម និងវាយធ្វើបាប ជាដើម៕

នៅសល់ពេលតែ១សប្តាហ៍ទៀតប៉ុណ្ណោះ ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា ២០២៣-២០២៤ នឹងឈានចូលមកដល់។

នៅក្នុងនោះ បេក្ខជន គួរណាស់សិក្សាស្វែងយល់ឱ្យបានច្បាស់អំពីទង្វើ ដែលមិនគួរធ្វើនៅពេលប្រឡង ដែលអាចឱ្យពួកគេធ្លាក់ដោយស្វ័យប្រវត្តិ ឬត្រូវចូលបន្ទប់កែពិសេសជាដើម។

ខាងក្រោមនេះ គឺជាដែលបេក្ខជនមិនគួរធ្វើដាច់ខាត៖

• ចម្លងសំណៅកិច្ចការពីអ្នកដទៃ
• ប្រើប្រាស់ទូរសព្ទដៃ និងឧបករណ៍អេឡិចត្រូនិច ក្នុងបន្ទប់ប្រឡង
• អង្គុយខុសពីលេខតុរបស់ខ្លួន ដោយគ្មានការអនុញ្ញាតពីអនុរក្ស
• រំកិលតុ ខុសពីប្លង់កំណត់ដោយគណៈមេប្រយោគ
• ប្តូរសន្លឹកកិច្ចការគ្នា
• យកជាប់នឹងខ្លួននូវសៀវភៅ ឯកសារ សំណៅឯកសារចូលក្នុងមណ្ឌលប្រឡង
• ធ្វើឱ្យខូចសណ្តាប់ធ្នាប់ របៀបរៀបរយនៃការប្រឡង

សូមបញ្ជាក់ថា ក្រសួងអប់រំ បានកំណត់យកថ្ងៃទី៦ ខែវិច្ឆិការ ឆ្នាំ២០២៣ សម្រាប់ការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៣-២០២៤៕

យោងតាមការចេញផ្សាយរបស់អាជ្ញាធរជាតិអប្សរា បានឱ្យដឹងថា ស្ពានបណ្តែតទឹលចូលប្រាសាទអង្គរ នឹងត្រូវផ្អាកដំណើរការជាបណ្តោះអាសន្នសិន។

ការផ្អាកនេះ គឺដើម្បីថែរក្សាសន្តិសុខ និងសណ្តាប់ធ្នាប់សាធារណៈក្នុងព្រះរាជពិធីសម្ភោធ ដាក់ឱ្យប្រើប្រាស់ជាផ្លូវការ “ស្ពានហាលខាងលិចប្រាសាទអង្គរវត្ត” នៅថ្ងៃទី០៤ ខែវិច្ឆិកា ឆ្នាំ២០២៣ ក្រោម ព្រះរាជាធិបតីភាពដ៏ខ្ពង់ខ្ពស់ ព្រះករុណា ជាអម្ចាស់ជីវិតលើត្បូង ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។

ហេតុដូច្នេះ អាជ្ញាធរជាតិអប្សរានឹងធ្វើការផ្អាក ការចូលទស្សនាប្រាសាទអង្គរវត្ត តាមច្រកខាងលិច(ស្ពានបណ្តែតទឹក)ខាងមុខប្រាសាទអង្គរវត្ត ចាប់ពីព្រឹកព្រលឹម ថ្ងៃទី០៤ ខែវិច្ឆិកា ឆ្នាំ២០២៣ រហូតដល់ចប់ព្រះរាជកម្មវិធី។

នៅក្នុងអំឡុងពេលនៃការផ្អាកខាងលើនេះ សាធារណជន ភ្ញៀវទេសចរជាតិ និងអន្តរជាតិ អាច ចេញ-ចូលទស្សនាប្រាសាទអង្គរវត្ត តាមច្រកចូលខាងកើតបានជាធម្មតា៕