ប្រទេសចិនគឺជាប្រទេសដែលមានទឹកដីធំជាងគេបំផុតនៅក្នុងតំបន់អាស៊ី រួមជាមួយនឹងអន្តសញ្ញាណដ៏អស្ចារ្យក៏ដូចជាវប្បធម៌សម្បូរបែបដែលមានអាយុកាលជាង៥០០០ឆ្នាំមកហើយ។ ដូច្នេះជាបន្តទៅទៀតនេះ KBN យើងនឹងលើកយកនូវវប្បធម៌ជាប្រពៃណីចំនួន៧ទាក់ទងនឹងទំនៀមទម្លាប់ក៏ដូចជាអន្តសញ្ញាណរបស់ប្រទេសចិនដូចខាងក្រោម៖

១ ភាសាចិន៖ ភាសាចិនគឺជាភាសាចំណាស់មួយដែលបានកំណត់តាមជនជាតិដើមភាគតិច «ហាន»និងជនជាតិជាតិដើមភាគតិចផ្សេងៗទៀតដែលមានអាយុកាលជាង៥០០០ឆ្នាំមកហើយ។ ប្រជាជនចិនប្រមាណ១.២ពាន់លាននាក់ ប្រមាណ១៦%នៅលើពិភពលោកបានប្រើប្រាស់ភាសាចិនជាភាសាទី១របស់ពួកគេ។ សម្រាប់ភាសានៃការសរសេរវិញគឺមាន២ទម្រង់គឺ ទម្រង់សាមញ្ញ (Simplified Form) និងទម្រង់ប្រពៃណី (Traditional Form)។ រីឯភាសានិយាយវិញគឺប្រជាជនចិនជាទូទៅប្រើប្រាស់ភាសាចិនកុកងឺ ខណៈភាសាចិនកាតាំងត្រូវបានប្រើប្រាស់យ៉ាងទូលាយនៅទីក្រុងហុងកុង។

២ ជោគរាសី៖ ប្រជាជនចិនប្រកាន់យកទំនៀមទម្លាប់រាសីចក្រគឺឆ្នាំទាំង១២ដូចខ្មែរយើងដែរដែលគេឲ្យឈ្មោះថា Sheng Xiao។ វដ្តនៃឆ្នាំទាំង១២នេះផ្នែកទៅលើប្រព័ន្ធចន្ទគតិដែលឆ្នាំនីមួយៗមានរូបសត្វជាតំណាង ដូចជាជូត ឆ្លូវ ខាល ថោះ រោង ម្សាញ់ មមី មមែ វង រការ ចរ កុល។ ផ្អែកទៅលើប្រពៃណីវប្បធម៌ចិន គឺគេជឿថាចរិកលក្ខណៈក៏ដូចជាព្រេងវាសនារបស់មនុស្សម្នាក់ៗគឺសុទ្ធតែទាក់ទងទៅនឹងសត្វនៃឆ្នាំទាំង១២នេះ។

៣ វប្បធម៌នៅក្នុងក្រុមគ្រួសាខ្សែរស្រឡាយចិន៖ ការរៀបការ មានគ្រួសារ និងមានកូនពិតជាមានសារសំខាន់ណាស់នៅក្នុងវប្បធម៌ចិន។ រីឯពេលវេលាលំហែរបស់ពួកគេគឺបាននៅជួបជុំជាមួយនឹងក្រុមគ្រួសារ។ ចំពោះថ្ងៃឈប់សម្រាកនិងពិធីបុណ្យផ្សេងៗ គឺសុទ្ធតែផ្តោតទៅសកម្មភាពយ៉ាងសកម្មជាមួយនឹងគ្រួសាររៀងៗខ្លួន។ ចំណែកការងារវិញ ជនជាតិចិនតែងតែស្វែងរកការងារណានៅក្នុងស្រុកកំណើតនិងទៅផ្ទះជាប្រចាំដើម្បីជួបជុំគ្រួសារ។

៤ តែចិន៖ តែគឺជាភេសជ្ជៈដ៏ពេញនិយមបំផុតមួយរបស់ជាតិ ព្រោះកាលពីប្រមាណ៥០០០ឆ្នាំមុន ជនជាតិចិនសម័យដើមគឺបានរុករកឃើញថាតែគឺជាភេសជ្ជៈប៉ូវកម្លាំងដ៏ពូកែមួយ។ ជាទូទៅ គ្រប់ក្រុមគ្រួសារចិនទាំងអស់តែងតែដាក់តែក្តៅៗដើម្បីទទួលភ្ញៀវ។ លើសពីនេះ តែក៏ត្រូវបានគេដាក់ធ្វើជាភេសជ្ជៈទី១នៅក្នុងកិច្ចប្រជុំក៏ដូចជាការធ្វើអាជីវកម្មផ្សេងៗផងដែរ។

៥ ក្បាច់គុនកុងហ្វូរបស់ចិន៖ កុងហ្វូគឺជាក្បាច់គុនម្យ៉ាងផ្អែកទៅលើទស្សនៈវិជ្ជាបុរាណរបស់ចិន ដែលមានសារសំខាន់ណាស់សម្រាប់វប្បធម៌ចិន អាចចាត់ទុកថាជាកីឡាដំបូងបំផុតនិងយូរអង្វែងបំផុតក្នុងប្រវត្តិសាស្រ្តផងដែរ។ វាអាចចាត់ទុកថាជាកីឡាមួយប្រភេទដែលរួមបញ្ចូលជាមួយនឹងលំហាត់ប្រាណ ការការពារខ្លួនពីសត្រូវ ការមានវិន័យនៅក្នុងខ្លួន ក៏ដូចជាសិល្បៈផងដែរ។

៦ ម្ហូបអាហារ៖ ម្ហូបគឺពិតជាមានសារសំខាន់ណាស់នៅក្នុងវប្បធម៌ចិន។ ទំនៀមទម្លាប់នៅក្នុងការធ្វើម្ហូបគឺមកពីតំបន់ផ្សេងៗគ្នានៃប្រទេសចិនដូចជាម្ហូបតំបន់ក្វាងតុង តំបន់ស៊ីឈ័ន និងតំបន់ជើជាំងជាដើម។ ហើយប្រជាជនចិននិយមប្រើចង្កឹះដើម្បីចាប់ម្ហូបពីចាប់ហើយដាក់ចូលមាត់តែម្តង។

៧ ពិធីបុណ្យប្រពៃណីចិន៖ ពិធីបុណ្យនានាត្រូវបានបង្កើតឡើងនៅក្នុងរាជវង្សហាន អំឡុងឆ្នាំ២០៦មុនគស រហូតដល់២២០នៃគស។ ពិធីបុណ្យនីមួយៗសុទ្ធតែមានទំនៀមទម្លាប់ប្រពៃណីនិងអត្ថន័យរៀងៗខ្លួន។ រីឯពិធីបុណ្យសំខាន់ៗក្នុងប្រទេសចិនរួមមាន ពិធីបុណ្យនិទាឃរដូវ និងពិធីបុណ្យបង្ហោះគោម ពិធីបុណ្យអ៊ុទូកនាគ ពិធីបុណ្យចូលឆ្នាំចិនជាដើម៕

គម្រោងផ្លូវដែករវាងប្រទេសឡាវ និងវៀតណាមទទួលបានការអនុម័តជាផ្លូវការ និងត្រៀមចាប់ផ្តើមដំណើរការសាងសង់ហើយ ។ គម្រោងនេះនឹងក្លាយជាបណ្តាញតភ្ជាប់ដោយផ្ទាល់រវាងប្រទេសទាំងពីរ ហើយគេដាក់គោលដៅថា វាជាគម្រោងសំខាន់ដើម្បីអភិវឌ្ឍសេដ្ឋកិច្ច និងហេដ្ឋារចនាសម្ព័ន្ធក្នុងតំបន់ ។

គម្រោងនេះជាផ្នែកមួយនៃផែនការអភិវឌ្ឍន៍បណ្តាញផ្លូវដែករវាងក្រុងវៀងចន្ទន៍ និងកំពង់ផែវង់អាង ចាប់ពីឆ្នាំ២០២១ ដល់ឆ្នាំ២០៣០ ហើយមានផែនការពង្រីករហូតដល់ឆ្នាំ២០៥០ ។ វាជាការវិនិយោគរួមគ្នារវាងក្រុមហ៊ុន Deo Ca Group របស់វៀតណាម និងក្រុមហ៊ុន Petroleum Trading Laos Public (PTL) ដែលស្ថិតនៅក្រោមកិច្ចសហការរវាងរដ្ឋាភិបាល និងវិស័យឯកជន ។ វាគ្របដណ្តប់លើផ្លូវចម្ងាយ១០៣គីឡូម៉ែត្រ ដែលចេញពីកំពង់ផែវង់អាង ឆ្លងកាត់ទីក្រុងតាន់អាប់ ទៅកាន់ទីក្រុងមុយ៉ា ។

លោក Chanthone Sitthixay នាយកក្រុមហ៊ុន PTL បានលើកឡើងក្នុងអំឡុងពេលចុះហត្ថលេខាលើការបណ្តាក់ទុនរួមគ្នា នៅចុងខែកុម្ភៈ ឆ្នាំ២០២៣ ថា រថភ្លើងនេះមានសក្តានុពលគ្រប់គ្រាន់ដើម្បីកសាងប្រយោជន៍យ៉ាងសំខាន់ចំពោះសេដ្ឋកិច្ច និងសង្គមរបស់ឡាវ និងវៀតណាម ។ លើសពីនេះ វានឹងពង្រឹងទំនាក់ទំនងរវាងប្រទេសទាំងពីរឱ្យកាន់តែរឹងមាំថែមទៀត ហើយគេរំពឹងថា ការសាងសង់នឹងបញ្ចប់រួចរាល់ ព្រមទាំងបើកដំណើរការនៅដើមឆ្នាំ២០២៧ ។

នៅពេលគម្រោងនេះក្លាយជាផ្នែកមួយនៃបណ្តាញផ្លូវដែករវាងក្រុងវៀងច័ន្ទ និងកំពង់ផែវង់អាង វានឹងមានតួនាទីសំខាន់សម្រាប់តភ្ជាប់ប្រទេសឡាវជាមួយពាណិជ្ជកម្មផ្នែកសមុទ្រក្នុងតំបន់, ជំរុញទំនាក់ទំនងផ្នែកសេដ្ឋកិច្ចជាមួយវៀតណាម ក៏ដូចជាទីផ្សារគោលដៅផ្សេងៗ ដូចជា ប្រទេសចិន កូរ៉េខាងត្បូង និងជប៉ុន ។

ហេតុនេះ នៅពេលផ្លូវដែកសាងសង់រួចរាល់ វានឹងតភ្ជាប់ទីក្រុងវៀងចន្ទន៍ជាមួយទីក្រុងថាក់ខេក ខេត្តខាំមួន ។ បន្ទាប់មក វានឹងតភ្ជាប់ទៅកាន់ព្រំដែនប្រទេសវៀតណាម និងទៅបញ្ចប់នៅកំពង់ផែវង់អាង ដែលស្ថិតនៅឆ្នេរសមុទ្រភាគកណ្តាលខេត្ត Ha Tinh ប្រទេសវៀតណាម ៕ ប្រភព ៖ AEC connect

នៅពេលដល់វ័យចូលនិវត្តន៍មនុស្សចាស់ភាគច្រើនតែងតែបាត់បង់នូវប្រាក់ចំណូលបន្តិចបន្តួច ក៏ដូចជាខ្សោយកម្លាំងផងដែរ។ ប៉ុន្តែនៅពេលដែលគាត់អង្គុយលេង ឬមិនបានធ្វើកិច្ចការអ្វីមួយ អាចធ្វើឱ្យពួកគាត់ឯកោ និងបាក់ទឹកចិត្ត។ ដូច្នេះ ដើម្បីបំបាត់ការអផ្សុករបស់មនុស្សចាស់ យើងសូមណែនាំការងារចំនួន ៤ ដែលមនុស្សចាស់អាចធ្វើបានក៏ដូចជារកចំណូលបានទៀតផង ដែលការងារទាំងនោះមានដូចជា៖

១.ដាំបន្លែ ឬថែសួន៖ មនុស្សចាស់ដែលមានចំណេះដឹង និងសមត្ថភាពក្នុងវិស័យកសិកម្ម អាចដាំបន្លែផ្លែឈើលក់ជាមុខរបរបន្ថែម ដើម្បីបំបាត់ភាពតានតឹង ក៏ដូចជារកចំណូលបានគួរសមផងដែរ។ លើសពីនេះ ការងារដាំបន្លែ ឬថែសួន គឺស័ក្តិសមបំផុតសម្រាប់មនុស្សចាស់ ព្រោះពួកគាត់អាចរស់នៅជាមួយនឹងធម្មជាតិ រួមទាំងមានពេលទំនេរច្រើនទៀតផង។

២.សិល្បៈ ឬសិប្បកម្មផ្សេងៗ៖ សិល្បៈ ឬសិប្បកម្មផ្សេងៗគឺការងារបែបឆ្នៃប្រឌិត ដែលប្រើកម្លាំងតិចតួចបំផុត ដូច្នេះវាស័ក្តិសមខ្លាំងសម្រាប់មនុស្សចាស់ ដោយពួកគាត់អាចមានពេលទំនេរច្រើន ក៏ដូចជាជួបជុំជាមួយមិត្តភក្តិដែលមានអាយុដំណាលគ្នា និងអាចរកចំណូលបានបន្តិចបន្តួចផងដែរ។

៣.ចម្អិនម្ហូប ឬធ្វើបង្អែម៖ មនុស្សចាស់ដែលមានជំនាញធ្វើម្ហូប ឬបង្អែមរួចហើយ អាចអនុវត្តជារៀងរាល់ថ្ងៃឱ្យកូនចៅរបស់អ្នកញ៉ាំ ក៏ដូចជាធ្វើលក់បន្តិចបន្តួចដើម្បីរកចំណូលបន្ថែម ពេលដែលអ្នកចូលនិវត្តន៍ផងដែរ ហើយក៏ជាវិធីសាស្ត្របំបាត់ភាពអផ្សុក និងភាពតានតឹងដ៏មានប្រសិទ្ធភាពទៀតផង។

៤.បើកជាផ្ទះសំណាក់ ឬផ្ទះជួល៖ ប្រសិនបើផ្ទះរបស់អ្នកស្ថិតនៅក្នុងតំបន់ទេសចរណ៍ធម្មជាតិ ហើយមានកន្លែងគ្រប់គ្រាន់ក្នុងការកែលម្អវា នោះអ្នកអាចបើកផ្ទះសំណាក់សម្រាប់ភ្ញៀវទេសចរស្នាក់នៅ ឬក៏ធ្វើផ្ទះដើម្បីជួលឱ្យគេ។ វិធីនេះនឹងអាចជួយអ្នករកលុយបានដោយមិនចាំបាច់ខំប្រឹងច្រើននោះទេ ហើយការងារនេះក៏ស័ក្តិសមបំផុតសម្រាប់មនុស្សចាស់ផងដែរ៕

ប្រទេសវៀតណាម ៖ Nguyen Duc Toan ជានាយកប្រតិបត្តិរបស់ Google Cloud នៅប្រទេសវៀតណាម ជឿជាក់ថា Generative AI នឹងមានឥទ្ធិពលយ៉ាងខ្លាំងលើឧស្សាហកម្មហ្គេម ក្រោយពីការបង្ហាញខ្លួននៃរូបរាងក្រាហ្វិក 3D សម្រាប់ Real Time និងស្មាតហ្វូន ។ ក្រៅពីនេះ ឧស្សាហកម្មហ្គេមនឹងបំពេញតួនាទីជាសញ្ញាមួយដល់អាជីវកម្មផ្សេងៗ ព្រមទាំងណែនាំពីវិធីថ្មីដើម្បីផ្តល់ដំណឹង, ទាក់ទាញ និងតភ្ជាប់មនុស្សក្នុងទ្រង់ទ្រាយធំ ។

បណ្តាក្រុមហ៊ុនហ្គេមរបស់វៀតណាម ដូចជា VNG Games, Amanotes និង Wolffun Game បានបញ្ចេញមតិអំពីតួនាទីរបស់បច្ចេកវិទ្យា AI ដូចៗគ្នាថា បច្ចេកវិទ្យានេះបានចូលមកជួយដោះស្រាយបញ្ហាផ្សេងៗជាច្រើនទាំងផ្នែកខាងក្នុង និងខាងក្រៅនៃឧស្សាហកម្មហ្គេម ។

Vo Tuan Binh ជានាយកប្រតិបត្តិ និងសហស្ថាបនិកក្រុមហ៊ុន Amanotes លើកឡើងថា កត្តាមួយក្នុងចំណោមកត្តាដែលជួយឱ្យផលិតផលហ្គេមរបស់ក្រុមហ៊ុនមានចំនួនដោនឡូតតាមរយៈ App Stores ខ្ពស់បំផុតរហូតដល់៣ពាន់លាន គឺដោយសារការប្រើប្រាស់បច្ចេកវិទ្យា AI វិភាគទិន្នន័យ ។

រីឯ Nguyen Dinh Khanh ជានាយកប្រតិបត្តិរបស់ក្រុមហ៊ុន Wolffun Game លើកឡើងថា បុគ្គលិករបស់ក្រុមហ៊ុនអាចស្វែងរកដំណោះស្រាយក្នុងការងារផ្សេងៗពីបច្ចេកវិទ្យា AI ច្រើនជាង CEO ហើយអ្នកសរសេរ Code ក៏មានកំហុសឆ្គងតិចជាងមុនផងដែរ ព្រោះពួកគេយកបច្ចេកវិទ្យា AI មកជួយ ។ ក្រៅពីនេះ ក្រុមហ៊ុនបានដាក់គម្រោងយក Generative AI មកប្រើប្រាស់នៅក្នុង App ឈ្មោះ Thetan Creator ។ ដូច្នេះ វានឹងធ្វើឱ្យអ្នកប្រើប្រាស់អាចសម្រេចការងាររបស់ពួកគេតាមតម្រូវការ ។

ចំណែក Le Trong Giap មកពី VNG Games គឺជាក្រុមហ៊ុនចាប់ផ្តើមអាជីវកម្ម Unicorn របស់វៀតណាមមើលឃើញថា វាមិនត្រឹមតែជាឧស្សាហកម្មហ្គេមប៉ុណ្ណោះទេ ប៉ុន្តែបច្ចេកវិទ្យា AI ជាប្រធានបទក្តៅនៅគ្រប់វិស័យអាជីវកម្ម ។ ក្រុមហ៊ុន VNG Games កំពុងទាញយកបច្ចេកវិទ្យា AI មកប្រើប្រាស់ជាមួយហ្គេមដែលក្រុមហ៊ុនបានផលិតឡើង រួមទាំងហ្គេមជាច្រើនទៀតដែលក្រុមហ៊ុនបានលក់ ។ ហេតុនេះ បច្ចេកវិទ្យា AI នឹងជួយកាត់បន្ថយដំណើរការការងារ ជាពិសេស ពេលវេលាចំណាយលើការអភិវឌ្ឍផលិតផល ៕ ប្រភព ៖ AEC connect

សហរដ្ឋអាមេរិក៖ Meta ដែលជាក្រុមហ៊ុនមេរបស់ Facebook គ្រោងនឹងជ្រើសរើសបុគ្គលិកថ្មីជាច្រើននាក់បន្ថែមទៀត បន្ទាប់ពីបានកាត់បន្ថយបុគ្គលិកចំនួន ២១,០០០ នាក់ក្នុងរយៈពេលពីរជុំកន្លងមក។
យោងតាមគេហទំព័រ The Washington Post បានឱ្យដឹងថា ថ្មីៗនេះក្រុមហ៊ុនរបស់មហាសេដ្ឋី Mark Zuckerburg បានកត់ត្រាលទ្ធផលអាជីវកម្មនៅត្រីមាសទី ៣ ដ៏ផ្ទុះបន្ទាប់ពីនាំមកនូវប្រាក់ចំណូលចំនួន ៣៤,១៥ ពាន់លានដុល្លារអាមេរិក កើនឡើង ២៣% ធៀបនឹងរយៈពេលដូចគ្នាកាលពីឆ្នាំមុន ហើយប្រាក់ចំណេញសុទ្ធបានកើនឡើង ១៦៤% ដល់ ១១,៥៨ ពាន់លានដុល្លារ។ ដូច្នេះ ក្រុមហ៊ុន Meta គ្រោងនឹងបង្កើនការចំណាយសម្រាប់ការជ្រើសរើសបុគ្គលិកថ្មីបន្ថែមទៀតនៅក្នុងឆ្នាំ ២០២៤។

Meta បាននិយាយថា Reality Labs ដែលជាផ្នែកទទួលបន្ទុកបង្កើតពិភពនិម្មិត metaverse ទំនងជានឹងទទួលរងការខាតបង់កាន់តែច្រើននៅឆ្នាំក្រោយ។ ទន្ទឹមនឹងនេះ ក្រុមហ៊ុនបាននិយាយថា ខ្លួននឹងបន្ថែមធនធានមនុស្សបន្ថែមទៀត ដើម្បីគាំទ្រដល់វិស័យអាទិភាព ក៏ដូចជាបង្កើនចំនួនបុគ្គលិកបច្ចេកទេសខ្ពស់។ យោងតាមលោក Mark Zuckerburg ក៏បានប្រកាសដែរថា ក្រុមហ៊ុននឹងពន្លឿនការជ្រើសរើសបុគ្គលិកជាបណ្ដោះអាសន្ននៅឆ្នាំក្រោយ ដើម្បីដោះស្រាយភាពយឺតយ៉ាវនេះ។

គួរបញ្ជាក់ដែរថា កាលពីខែវិច្ឆិកា ឆ្នាំ២០២២ ក្រុមហ៊ុន Meta បានកាត់បន្ថយបុគ្គលិកប្រហែល ១១,០០០ នាក់ ដែលជាការបញ្ឈប់ការងារដ៏ធំលើកដំបូងនៅក្នុងប្រវត្តិសាស្រ្តរបស់ក្រុមហ៊ុន។ បន្ទាប់មកនៅខែមីនា ឆ្នាំ២០២៣ ក្រុមហ៊ុនបច្ចេកវិទ្យាយក្សនេះក៏បានប្រកាសពីផែនការបញ្ឈប់បុគ្គលិកចំនួន ១០,០០០ នាក់បន្ថែមទៀតដែលជាលើកទីពីររបស់ខ្លួនក្នុងការបញ្ឈប់បុគ្គលិក។ មូលហេតុនៃការបញ្ឈប់បុគ្គលិកគឺដោយសារក្រុមហ៊ុនមានភាពទន់ខ្សោយ ក៏ដូចជាខាតបង់ប្រាក់ជាច្រើនផងដែរ។

ទោះជាយ៉ាងណាក៏ដោយ បច្ចុប្បន្នក្រុមហ៊ុន Meta កំពុងបង្កើនការជ្រើសរើសបុគ្គលិកបន្ថែមទៀត ដើម្បីធ្វើការវិនិយោគក្នុងការអភិវឌ្ឍន៍ឧបករណ៍ AI សម្រាប់អ្នកផ្សាយពាណិជ្ជកម្ម និងអាជីវកម្មបញ្ញាសិប្បនិមិត្ត ក៏ដូចជាគាំទ្រដល់អាជីវកម្មដែលប្រើប្រាស់ AI ក្នុងការកំណត់អត្តសញ្ញាណអតិថិជន។ លោក Susan Li ប្រធានផ្នែកហិរញ្ញវត្ថុរបស់ Meta បានជូនដំណឹងថា បន្ថែមពីលើ AI ក្រុមហ៊ុននឹងផ្តោតលើការជួលក្នុងផ្នែកផ្សេងទៀត រួមទាំងការរកប្រាក់ ការបំប្លែងសារ និងការអនុលោមតាមច្បាប់៕