សមាគមប្រជាជាតិអាសុីអាគ្នេយ៍ ឬអាស៊ាន មានសមាជិកចំនួន ១០ប្រទេស ដោយមានប្រទេសចំនួន៤ គឺជាប្រទសដែនកោះ។

ក្នុងនោះរួមមាន៖
1. ឥណ្ឌូណេស៊ី៖ ផ្ទៃដីសរុប ១ ៩០៤ ៥៦៩ គីឡូម៉ែត្រការ៉េ
2. ហ្វីលីពីន៖ ផ្ទៃដីសរុប ៣០០ ០០០ គីឡូម៉ែត្រការ៉េ
3. ប្រ៊ុយណេ៖ ផ្ទៃដីសរុប ៥៧៦៥ គីឡូម៉ែត្រការ៉េ4. សិង្ហបុរី៖ ផ្ទៃដីសរុប ៧១៨ គីឡូម៉ែត្រការ៉េ
នៅក្នុងនោះ ឥណ្ឌូនេសុី ក៏ជាប្រទេសធំជាងគេនៅអាស៊ាន និងប្រទេសដែនកោះធំជាងគេលើពិភពលោកផងដែរ។

ឥណ្ឌូនេសុី ត្រូវបានគេទទួលស្គាល់ថា ជាប្រទេសមួយសម្បូរដោយកោះ ១៨ ១១០កោះ និងក្នុងចំណោមកោះជាង២មុឺននេះ កោះស៊ូម៉ាត្រា ជាកោះធំជាងគេទី៦លើពិភពលោក។

សូមបញ្ជាក់ថា ក្រៅពីប្រទេសទាំង៤នេះ មានតែប្រទេសឡាវតែប៉ុណ្ណោះនៅក្នុងតំបន់អាស៊ានដែលគ្មានព្រំដែនសមុទ្រ៕

មានមនុស្សមួយចំនួនឃើញរូបភាពនេះហើយឆ្ងល់ថាបង្គោលនេះគេហៅថាអ្វី? ហើយដាក់ដើម្បីអ្វី? ដោយមានអ្នកខ្លះថាបង្គោលព្រំដែន អ្នកខ្លះថាបង្គោលសម្រាប់វាស់ជម្រៅទឹក? តាមពិតទៅវាមិនមែននោះទេ។

គោលគឺជាបង្គោលដែលបានសាងសង់នៅក្នុងសម័យអាណានិគមបារាំង ដែលបានមកដាក់អាណានិគមលើប្រទេសកម្ពុជាក្នុងឆ្នាំ ១៨៦៣-១៩៥៣។ បង្គោលនេះមានកម្ពស់ចន្លោះពី ៣-៥ ម៉ែត្រ (តាមទឹករាក់ឬជ្រៅ) ឯបង្គោលខ្លះមានដាក់ដែកតឡើងលើប្រហែលជា ២-៣ ម៉ែត្រ បន្ថែមទៀតក៏មាន។

គោលនេះធ្វើឡើងដើម្បីសម្គាល់ឬបង្ហាញផ្លូវទឹក នៅតាមចំណុចដែលមានទឹករាក់ មានថ្ម និងល្បាប់ថ្មជាដើម។ ដើម្បីសុវត្ថិភាពនិងដើម្បីងាយស្រួលចំណាំផ្លូវទឹក ក្នុងការធ្វើនាវាចរណ៍ដឹកជញ្ជូនទំនិញតាមផ្លូវទឹក ពីព្រោះនៅក្នុងតំបន់នោះពោរពេញទៅដោយថ្មនិងល្បាក់ថ្ម ផ្លូវទឹកមានភាពតូចចង្អៀតដោយកន្លែងខ្លះមានទំហំត្រឹមតែ ៥០-១០០ម៉ែត្រ តែប៉ុណ្ណោះ ហើយល្បឿននៃទឹកហូរមានកម្លាំងខ្លាំងនិងកួចបោកថែមទៀតផង។ ដូច្នេះវាងាយនឹងមានគ្រោះថ្នាក់ក្នុងការធ្វើដំណើរផ្លូវទឹកប្រសិនណាជាមានការប៉ះទង្គិចបុកជាមួយនឹងថ្ម។

គោលទាំងអស់នេះសុទ្ធតែមានលាបថ្នាំដើម្បីចំណាំនៅក្បាលផ្នែកខាងលើ។ ដោយនៅលើក្បាលគោល មានលាបថ្នាំ ពណ៌ខ្មៅ និងពណ៌ក្រហម សម្រាប់សម្គាល់។ នៅពេលធ្វើដំណើរឡើង (បញ្ច្រាស់ទឹក) គោលក្បាលក្រហមស្ថិតនៅ (ខាងស្ដាំដៃ) ឯគោលក្បាលខ្មៅស្ថិតនៅ (ខាងឆ្វេងដៃ), នៅពេលធ្វើដំណើរត្រឡប់ចុះមកវិញ (បណ្ដោយទឹក) គោលក្បាលខ្មៅស្ថិតនៅ (ខាងស្ដាំដៃ) ចំណែកឯគោលក្បាលក្រហមស្ថិតនៅ (ខាងឆ្វេងដៃ) វិញម្ដង។ ប្រសិនបើអ្នកបើកបរទូកឬនាវាភ័ន្តច្រឡំនោះ គ្រោះថ្នាក់ធំនឹងកើតមានភ្លាម។

ហើយគោលទាំងអស់នេះត្រូវបានសាងសង់នៅតាមដងទន្លេមេគង្គផ្នែកខាងលើ ដែលចាប់ពីម្ដុំ ឃុំថ្មគ្រែ, អន្លង់ផ្សោត ឃុំសំបុក ស្រុកចិត្របុរី និងឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ ឡើងទៅផ្នែកខាងលើដល់ម្ដុំ អន្លង់ផ្សោត ឃុំព្រះរំកិល និងឃុំអូរស្វាយ ស្រុកបុរីអូរស្វាយសែនជ័យ (អតីតស្រុកថាឡាបរិវ៉ាត់) ក្នុងខេត្តស្ទឹងត្រែង រហូតឡើងទៅដល់ទឹកដីប្រទេសឡាវ ផងដែរ៕

ថ្មីៗនេះមានករណីនារីជនជាតិម្នាក់ បានបង្ហោះវីដេអូនៅប្រាសាទអង្គរវត្ត ដោយបានប្រើប្រាស់សម្លៀកបំពាក់បែបថៃ និងថែមទាំងប្រើប្រាស់រូបស្តេចថៃនៅក្នុងវីដេអូនោះផងដែរ ដែលធ្វើឱ្យមហាជន និងអ្នកប្រើប្រាស់បណ្តាញសង្គមបានផ្ទុះប្រតិកម្មជាខ្លាំង នឹងបានស្នើឱ្យស្ថាប័នពាក់ព័ន្ធត្រួតពិនិត្យ។ទាក់ទងនឹងករណីនេះ អាជ្ញាធរជាតិអប្សរា បានចេញលិខិតបកស្រាយដោយមានខ្លឹមសារដូចខាងក្រោម៖

១- កាលពីថ្ងៃទី២៣ ខែតុលា ឆ្នាំ២០២៣. ក្រុមភ្នាក់ងារទេសចរណ៍របស់អាជ្ញាធរជាតិអប្សរា បានហាមឃាត់អ្នកទេសចរបរទេសមួយចំនួនដែលមានបំណងថតសម្លៀកបំពាក់ច្នៃប្រឌិត ជាមួយនឹងសម្ភារៈមួយចំនួន។ បន្ទាប់ពីហាមមិនឱ្យប្រើប្រាស់សម្ភារៈមួយចំនួនមក ភ្នាក់ងារ ទេសចរណ៍ ក៏បានតាមពិនិត្យ និងបានស្នើសុំឱ្យលុបចោលរូបភាពមួយចំនួនផ្សេងៗទៀត ដែលមានលក្ខណៈមិនសមស្រប។ ជាយថាហេតុ សមាជិកនៅក្នុងក្រុមនោះដែលបានប្រើប្រាស់ ទូរសព្ទដៃជាឧបករណ៍ថត អាចនឹងធ្វើការលាក់កំបាំងហើយប្រើប្រាស់រូបភាពមួយចំនួន ទាំង ក្នុងនិងក្រៅប្រាសាទយកមកកាត់តបញ្ចូលគ្នាទាំងសម្លេង និងរូបភាពផ្សេងៗ ដើម្បីផ្សព្វផ្សាយ ក្នុងគោលបំណងមិនល្អ។

២ – ដោយសកម្មភាពជាវីដេអូឃ្លីប មានលក្ខណៈញុះញង់ក្នុងសង្គម អាជ្ញាធរជាតិអប្សរាបានស្នើសុំ ក្រុមហ៊ុនបណ្តាញសង្គម Tik Tok ទប់ស្កាត់ការបង្ហោះវីដេអូឃ្លីប ក៏ដូចជាសំណូមពរដល់ សាធារណជនទាំងអស់ សូមមេត្តាកុំចូលរួមចែករំលែកបន្ត ពីព្រោះជាការគាំទ្រនូវការញុះញង់ ដល់សកម្មភាពអវិជ្ជមានទាំងនោះ។ ជាមួយគ្នានេះ អាជ្ញាធរជាតិអប្សរាសូមអភ័យទោស ចំពោះការខ្វះខាតមួយចំនួនដែលកើតមានឡើងជាយថាហេតុ ហើយប្តេជ្ញានឹងពង្រឹងកិច្ច ការងារក្នុងការថែរក្សានូវរូបភាពដ៏បវរនៃរមណីយដ្ឋានអង្គរបន្ថែមទៀត។

៣- អាជ្ញាធរជាតិអប្សរា សូមថ្លែងអំណរគុណដ៏ស្មោះស្ម័គ្រចំពោះស្មារតីចូលរួមរបស់សាធារណមតិ ទាំងអស់ ដែលបានរួមចំណែកជួយទប់ស្កាត់នូវករណ៏អវិជ្ជមាននានា ដែលកើតមានឡើង ក្នុងតំបន់រមណីយដ្ឋានអង្គរ ដែលជាកិច្ចជួយពង្រឹងនូវតម្លៃនៃមរតកវប្បធម៌ ដែលជាដួង ព្រលឹងរបស់ជាតិ៕

ចេក គឺជាផ្លែឈើរហ័សទុំ ហើយជាទូទៅ វានឹងទុំក្នុងរយៈពេលពី២ថ្ងៃ ទៅ៣ថ្ងៃ ក្រោយពីយើងបានកាត់វាពីដើម ។ បើទុកដាក់វាមិនត្រឹមត្រូវតាមក្បួនខ្នាតនោះទេ គឺអាចធ្វើឱ្យវាឆាប់ទុំ និងរលួយស្អុយបាន ។

មនុស្សភាគច្រើនតែងជួបបញ្ហាទិញចេកមកមិនបានប៉ុន្មានថ្ងៃផង វាក៏ទុំរហូតដល់បរិភោគមិនទាន់ ហើយបើបោះចោលក៏ស្តាយ ។ តើគួររក្សាទុកផ្លែចេកតាមវិធីណាដើម្បីកុំឱ្យវាឆាប់ទុំ?

*ទុកផ្លែចេកនៅកន្លែងត្រជាក់ និងស្ងួត ៖ សីតុណ្ហភាពសមស្របសម្រាប់ទុកចេកនៅកន្លែងណាមួយ គឺចាប់ពី១៣អង្សារសេ ទៅ១៨អង្សារសេ ។ ការទុកចេកនៅកន្លែងត្រជាក់ វានឹងជួយកុំឱ្យវាឆាប់ទុំ ។

*ទុកចេកឱ្យឆ្ងាយពីពន្លឺថ្ងៃ ៖ ពន្លឺថ្ងៃ គឺជាកម្លាំងជំរុញឱ្យចេករហ័សទុំ ។ ដូច្នេះ យើងគួរតែចៀសវាងទុកចេកនៅកន្លែងណាដែលត្រូវពន្លឺថ្ងៃ ។

*រុំគល់ផ្លែចេក ៖ គល់ផ្លែចេក គឺជាកន្លែងបញ្ចេញឧស្ម័នអេទីឡែន ដែលឧស្ម័ននេះជាកម្លាំងជំរុញឱ្យចេករហ័សទុំ ។ ដូច្នេះ យើងត្រូវរុំវាដោយថង់ផ្លាស្ទិក ឬក្រដាស ដើម្បីជួយការពារមិនឱ្យឧស្ម័នអេទីឡែនចេញមកខាងក្រៅ ។

*ដាក់ចេកឱ្យនៅដាច់ដោយឡែកពីគ្នា ៖ ចេកដែលទុំហើយ វានឹងបញ្ចេញឧស្ម័នអេទីឡែនមកខាងក្រៅ ។ ហេតុនេះ ការទុកចេកទុំ និងចេកមិនទាន់ទុំឱ្យនៅជាមួយគ្នា វានឹងធ្វើឱ្យចេកផ្សេងទៀតកាន់តែឆាប់ទុំ ។ ការដាក់ចេកឱ្យនៅដាច់ដោយឡែកពីគ្នា នឹងជួយឱ្យឧស្ម័នអេទីឡែនចេញមកខាងក្រៅតិចជាងមុន ។

*ដាក់ចេកក្នុងទូរទឹកកក ៖ បើត្រូវការរក្សាទុកចេកឱ្យបានយូរថ្ងៃ យើងអាចទុកវាក្នុងទូរទឹកកកបាន ពីព្រោះសីតុណ្ហភាពក្នុងទូរទឹកកក នឹងជួយកុំឱ្យវាទុំឆាប់រហ័សពេក ។ ហេតុនេះ យើងអាចទុកវាចូលក្នុងថង់ផ្លាស្ទិក ឬឧបករណ៍បិទជិត ដើម្បីការពារមិនឱ្យចេកស្ងួត ។

ខាងក្រោមនេះ គឺជាគន្លឹះរក្សាទុកផ្លែចេកឱ្យបានយូរថ្ងៃ ៖
*ជ្រើសយកផ្លែចេកណានៅស្រគាល ៖ ចេកស្រគាលដែលមិនទាន់ទុំខ្លាំង វានឹងមិនងាយទុំជោរនោះទេ ។

*ចៀសវាងទុកចេកនៅក្បែរផ្លែឈើផ្សេងទៀត ៖ ផ្លែឈើមួយចំនួន ដូចជា ផ្លែប៉ោម, ផ្លែប័រ និងស្វាយ តែងបញ្ចេញឧស្ម័នអេទីឡែនមកខាងក្រៅ ។ ដូច្នេះ ការទុកចេកនៅក្បែរផ្លែឈើទាំងនេះ នឹងធ្វើឱ្យចេកកាន់តែឆាប់ទុំជោរ ។

*ពិនិត្យមើលចេកជារៀងរាល់ថ្ងៃ ៖ បើពិនិត្យឃើញថា ចេករបស់យើងចាប់ផ្តើមទុំហើយ យើងត្រូវប្រញាប់បរិភោគវា ឬយកវាមកធ្វើជាបង្អែម និងនំចំណីផ្សេងៗ ។

សរុបមក វិធីទាំងនេះនឹងជួយឱ្យយើងអាចរក្សាទុកផ្លែចេកបានកាន់តែយូរថ្ងៃ ហើយយើងអាចបរិភោគផ្លែចេកស្រស់ៗបានយូរផងដែរ ៕ ប្រភព ៖ sanook