សហរដ្ឋអាមេរិក ៖ អ្នកវិទ្យាសាស្ត្រអាមេរិកបានថតយករូបភាពមឹកយក្ស «ដាំបូ» ដោយចៃដន្យ ខណៈពេលវាហែលឆ្លងកាត់មុខកាមេរ៉ារបស់នាវាត្រួតពិនិត្យនៅបាតសមុទ្រ ដែលមានជម្រៅជ្រៅរបស់អាមេរិក ។ គេបានដាក់ឈ្មោះសត្វសមុទ្រប្រភេទនេះថា «ដាំបូ» ដោយសារវាមានព្រុយនៅសងខាងក្បាល ដែលមានលក្ខណៈស្រដៀងគ្នានឹងស្លឹកត្រចៀករបស់ដំរីដាំបូ នៅក្នុងរឿង Disney ដ៏ល្បីល្បាញ ។

អ្នកវិទ្យាសាស្ត្រ Ocean Exploration Trust បានប្រទះឃើញមឹកយក្សដាំបូ ខណៈកំពុងចុះស្រាវជ្រាវនៅបាតសមុទ្រមានជម្រៅប្រមាណជាង១ពាន់ម៉ែត្រ ក្នុងតំបន់ប្រជុំកោះហាវ៉ៃ ។ អ្នកវិទ្យាសាស្ត្រលើកឡើងថា នៅសុខៗ ស្រាប់តែមឹកយក្សនេះបានហែលនៅមុខកាមេរ៉ារបស់នាវាស្រាវជ្រាវ «អ៊ីវី ណ័រទិលុស» របស់ក្រុមអ្នកស្រាវជ្រាវ ។

គេអាចឃើញមឹកយក្សដាំបូនេះក្នុងទឹកសមុទ្រនៅទូទាំងពិភពលោក គឺត្រង់បរិវេណតំបន់ក្តៅខ្លាំង និងតំបន់ក្តៅល្មម ដែលមានជម្រៅយ៉ាងហោចណាស់ ចំនួន៤ពាន់ម៉ែត្រ ឬអាចជ្រៅជាងនេះ ។ អ្នកវិទ្យាសាស្ត្រឱ្យដឹងថា មឹកយក្សដាំបូ មានរូបរាងខុសពីមឹកទូទៅ ដែលអ្នកវិទ្យាសាស្ត្រធ្លាប់ស្គាល់ពីមុនមក ៕ ប្រភព ៖ TNN World

ប្រទេសអង់គ្លេស ៖ តាមលទ្ធផលការស្រាវជ្រាវចុងក្រោយបង្ហាញថា ការចំណាយខ្ពស់ក្នុងជីវភាពរស់នៅ និងបញ្ហាអតិផរណានៅប្រទេសអង់គ្លេស កំពុងធ្វើឱ្យពលរដ្ឋរាប់ពាន់នាក់មានអាយុតិចជាងមុន ។ លើសពីនេះ វាធ្វើឱ្យវិសមភាពផ្នែកជីវភាពរបស់ពលដ្ឋកើនឡើងយ៉ាងឆាប់រហ័សទៀតផង ។

លទ្ធផលការស្រាវជ្រាវនេះបានផ្សព្វផ្សាយក្នុងទស្សនាវដ្តី BMJ Public Health កាលពីថ្ងៃទី២៥ ខែកញ្ញា ឆ្នាំ២០២៣ បញ្ជាក់ថា ក្រុមអ្នកស្រាវជ្រាវបានសិក្សាពីផលប៉ះពាល់របស់អតិផរណាចំពោះអត្រាការស្លា.ប់នៅប្រទេសស្កុតឡេន ចាប់ពីឆ្នាំ២០២២ ដល់ឆ្នាំ២០២៣ ករណីរដ្ឋាភិបាលមានវិធានការ និងគ្មានវិធានការសម្រាលទុក្ខលំបាករបស់ពលរដ្ឋ រួចហើយពួកគេយកទិន្នន័យនេះមកទស្សន៍ទាយអាយុរបស់ពលរដ្ឋ និងវិសមភាពជាទូទៅនៅប្រទេសអង់គ្លេស ។

លទ្ធផលការស្រាវជ្រាវព្យាករណ៍ថា ករណីរដ្ឋាភិបាលអង់គ្លេសមានវិធានការសម្រាលទុក្ខលំបាករបស់ពលរដ្ឋ គឺចំនួនពលរដ្ឋស្លា.ប់មុនអាយុ៧៥ឆ្នាំ កើនឡើងត្រឹមតែ២% ប៉ុណ្ណោះ នៅតំបន់ដែលពលរដ្ឋមានជីវភាពខ្វះខាតតិចបំផុត ហើយវាកើនឡើងដល់៨% នៅតំបន់ដែលពលរដ្ឋមានជីវភាពខ្វះខាតច្រើនបំផុត ឬសរុបជាមធ្យមស្មើនឹង៦,៥% ។

ចំណែកករណីរដ្ឋាភិបាលគ្មានវិធានការសម្រាលទុក្ខលំបាករបស់ពលរដ្ឋ តួលេខនេះនឹងកើនឡើងស្មើ៥% នៅតំបន់ដែលពលរដ្ឋមានជីវភាពខ្វះខាតតិចបំផុត និងកើនឡើងដល់២៣% នៅតំបន់ដែលពលរដ្ឋមានជីវភាពខ្វះខាតច្រើនបំផុត ។ ក្រៅពីនេះ លទ្ធផលការស្រាវជ្រាវព្យាករណ៍ទៀតថា គ្រួសារមានជីវភាពខ្សត់ខ្សោយបំផុត នឹងស្លា.ប់មុនអាយុលើសមុន៤ដង បើធៀបនឹងគ្រួសារមានជីវភាពធូរធាបំផុត ព្រោះពួកគេត្រូវចំណាយប្រាក់ច្រើនទៅលើតម្លៃថាមពលកើនឡើង ។

អត្រាអតិផរណារបស់អង់គ្លេសនៅខែសីហា ឆ្នាំ២០២៣ ស្មើនឹង៦,៧% ហើយអត្រានេះបានធ្លាក់ចុះពីអត្រាខ្ពស់បំផុតក្នុងរយៈពេល៤១ឆ្នាំ ដែលស្មើនឹង១១,១% នៅខែតុលា ឆ្នាំ២០២២ ប៉ុន្តែវាជាអត្រាខ្ពស់បំផុតក្នុងក្រុមប្រទេសឧស្សាហកម្មឈានមុខគេចំនួន៧ (G7) ។ អត្រាអតិផរណាអង់គ្លេសកើតឡើងដោយសារកត្តាជាច្រើន ដូចជា ការបិទប្រទេសក្នុងអំឡុងពេលជំងឺកូវីដ-១៩ ឆ្លងរាតត្បាត, ការចាកចេញពីសហភាពអឺរ៉ុប (Brexit) និងសង្គ្រាមនៅប្រទេសអ៊ុយក្រែន ៕ ប្រភព ៖ Bangkok biznews

នៅថ្ងៃទី២៧ កញ្ញា តាមរយៈហ្វេកប៊ុករបស់មន្ទីរពេទ្យកុមារអង្គរបានឱ្យដឹងថា លោក ផូ ផល្លាបានរៃអង្គាសថវិកាសរុបជាង ១០ ៥០០ ដុល្លារអាម៉េរិក ជូនដល់មន្ទីរពេទ្យកុមារអង្គរ តាមរយៈការជិះកង់តែម្នាក់ឯងរយៈពេល ៤១ថ្ងៃ ឆ្លងកាត់ប្រទេសចំនួន៨ នៅអឺរ៉ុប រួមមាន៖ បារាំង ស្វីស លុចសំបួ បែលហ្ស៊ិក អង់គ្លេស អ៊ីតាលី ហូឡង់ និងអាល្លឺម៉ង់។

នៅក្នុងដំណើរជិះកង់រៃអង្គាសនោះដែរ លោក បានធ្វើទស្សនកិច្ចនៅស្ថានទូតកម្ពុជា ក្នុងប្រទេសទាំងនោះផងដែរ។ ជាមួយគ្នានេះមន្ទីរពេទ្យកុមារអង្គរ បានថ្លែងអំណរគុណយ៉ាងជ្រាលជ្រៅជាទីបំផុតចំពោះការខិតខំប្រឹងប្រែងរបស់លោក ផូ ផល្លា នូវការលះបង់ក្នុងបេសកកម្មជិះកង់រៃអង្គាសនៅក្នុងប្រទេសអឺរ៉ុបដើម្បីមន្ទីរពេទ្យកុមារអង្គរ។

គួរបញ្ជាក់ផងដែរថា កាលពីខែសីហា លោក ទីវ តារារិទ្ធិ ក៏បានចំណាយពេលជិត៣ខែជិះកង់ឆ្លងកាត់៦ក្នុងតំបន់អាស៊ានដោយផ្តើមចេញពីប្រទេសកម្ពុជា ឆ្ពោះទៅកាន់ប្រទេស វៀតណាម ឡាវ ថៃ ម៉ាឡេស៊ី និងប្រទេសង្ហិបុរី រៃអង្គាសប្រាក់បានជាង៥ម៉ឺនដុល្លារជូនមន្ទីរពេទ្យកុមារអង្គរ។

នេះជាការលះបង់ដ៏ធំធេងកើតចេញពីឆន្ទៈតែមួយដើម្បីអំពើសប្បុរសធម៌ជួយសង្គ្រោះអាយុជីវិតកុមារកម្ពុជា៕

ប្រទេសកូរ៉េខាងជើង ៖ សារព័ត៌មាន Straits Times បានចុះផ្សាយដោយយោងតាមប្រភពពីស្ថានីយទូរទស្សន៍ CCTV របស់រដ្ឋាភិបាលចិន និងសារព័ត៌មាន Bloomberg ថា កូរ៉េខាងជើងហាក់ដូចជាអនុញ្ញាតឱ្យភ្ញៀវទេសចរបរទេសចូលមកប្រទេសរបស់ខ្លួនលើកដំបូងក្នុងរយៈពេលជិត៤ឆ្នាំ គិតចាប់ពីកូរ៉េខាងជើងបិទព្រំដែនប្រទេសកាលពីដើមឆ្នាំ២០២០ នៅពេលជំងឺកូវីដ-១៩ ចាប់ផ្តើមឆ្លងរាតត្បាត ។

ជនបរទេសទទួលបានការអនុញ្ញាតឱ្យចូលប្រទេសកូរ៉េខាងជើង គិតចាប់ពីថ្ងៃទី២៥ ខែកញ្ញា ឆ្នាំ២០២៣ ប៉ុន្តែពួកគេត្រូវឃុំខ្លួនដាច់ដោយឡែកចំនួន២ថ្ងៃ ។ នេះចាត់ទុកថា កូរ៉េខាងជើងបានត្រឡប់មកទទួលប្រាក់ចំណូលពីភ្ញៀវទេសចរឡើងវិញ ដោយភ្ញៀវទេសចរបរទេសមកពីប្រទេសចិន គឺជាប្រភពចំណូលដ៏សំខាន់របស់រូបិយប័ណ្ណបរទេសសម្រាប់កូរ៉េខាងជើង ដែលខ្វះខាតសាច់ប្រាក់សុទ្ធ ។

ចំណែកធនាគារកណ្តាលកូរ៉េខាងត្បូងប៉ាន់ស្មានថា ការបិទប្រទេសដើម្បីទប់ស្កាត់ជំងឺកូវីដ-១៩ បានធ្វើឱ្យសេដ្ឋកិច្ចកូរ៉េខាងជើងធ្លាក់ចុះខ្លាំងជាងកាលពីមេដឹកនាំកូរ៉េខាងជើង លោក គឹម ជុងអ៊ុន ចាប់ផ្តើមឡើងកាន់អំណាចក្នុងរយៈពេលជាង១០ឆ្នាំមុន ។

រីឯផ្នែក Fitch Solutions លើកឡើងថា សញ្ញាជាច្រើនបង្ហាញថា កូរ៉េខាងជើងនឹងស្តារពាណិជ្ជកម្មជាមួយចិន ដែលចិនជាសម្ព័ន្ធមិត្តគាំទ្រកូរ៉េខាងជើងអស់រយៈពេលដ៏យូរអង្វែង ។ ហេតុនេះ វានឹងធ្វើឱ្យសេដ្ឋកិច្ចកូរ៉េខាងជើងត្រឡប់មកលូតលាស់ឡើងវិញ ក្រោយពីបានធ្លាក់ចុះអស់រយៈពេល២ឆ្នាំពេញ ដោយសារការបិទប្រទេស ។

មុននេះ មេដឹកនាំកូរ៉េខាងជើង លោក គឹម ជុងអ៊ុន បានចាប់ផ្តើមបើកប្រទេសជាបណ្តើរៗ ដោយចាប់ផ្តើមពីការអញ្ជើញគណៈប្រតិភូជាន់ខ្ពស់មកពីប្រទេសចិន និងរុស្ស៊ី មកកាន់កូរ៉េខាងជើង នៅខែកក្កដា ឆ្នាំ២០២៣ ។ បន្ទាប់មក នៅខែសីហា ឆ្នាំ២០២៣ កូរ៉េខាងជើងបានបញ្ជូនយន្តហោះពាណិជ្ជកម្មទៅកាន់ទីក្រុងប៉េកាំង និងវ្ល៉ាឌីវ៉ូស្តុក របស់រុស្ស៊ី ដើម្បីទទួលមន្ត្រីទូត, និស្សិត និងពលករកូរ៉េខាងជើង ដែលជាប់នៅបរទេសដោយសារការបិទព្រំដែន ឱ្យត្រឡប់មកប្រទេសកំណើតវិញ ។ ទោះយ៉ាងណា សារព័ត៌មានរបស់រដ្ឋាភិបាលកូរ៉េខាងជើង បានរក្សាភាពស្ងៀមស្ងាត់ចំពោះបញ្ហានេះ ៕ ប្រភព ៖ TNN World

រដ្ឋធានីបាដដាដ៖ ប្រជាជនអ៊ីរ៉ាក់ ចំនួន២គ្រួសារ បានរៀបចំពិធីមង្គលការ តាមបែបប្រពៃណីរបស់ពួកគេ ដោយមានភ្ញៀវទាំងសងខាង មកចូលរួមអបអរ និង ជូនពរជ័យដល់គូស្វាមីភរិយាថ្មោងថ្មី ប៉ុន្ដែជាអកុសល សម្រាប់តែផ្ទុះនូវគ្រោះអគ្គិភ័យឆាបឆេះឡើង បណ្ដាលឲ្យមនុស្សជាង១០០នាក់ បានបាត់បង់ជីវិត និង ១៥០នាក់ផ្សេងទៀត រងរបួស កាលពីវេលារំលងអធ្រាត្រ ឈានចូលថ្ងៃពុធ ទី២៧ ខែកញ្ញា នៅក្នុងស្រុកហាមដានីយ៉ា (Hamdaniya) ខេត្តនីណេវេ (Nineveh) នាភាគខាងជើង ប្រទេសអ៊ីរ៉ាក់។

បណ្ដាញទូរទស្សន៍អារ៉ាប់អន្ដរជាតិ Al Arabiya News បានផ្សាយ កាលពីព្រឹក ថ្ងៃពុធ ទី២៧ ខែកញ្ញា ដោយដកស្រង់ប្រភព ពីអាជ្ញាធរ បានអះអាង ថា មានមនុស្ស ជាង១០០នាក់បានបាត់បង់ជីវិត និង ១៥០នាក់ផ្សេងទៀត រងរបួស នៅក្នុងហេតុការណ៍គ្រោះអគ្គិភ័យ នៅក្នុងពិធីមង្គលការមួយ នៅក្នុងស្រុក Hamdaniya។

លោក ហាសសាន់ អាល-អាល់ឡាក់ (Hassan al-Allaq) អភិបាលរងខេត្ត Nineveh បានប្រាប់ដល់ទីភ្នាក់ងារសារព័ត៌មានរបស់ចក្រភពអង់គ្លេស Reuters ថា មនុស្ស ចំនួន១១៣នាក់ បានស្លាប់ និង ១៥០នាក់ផ្សេងទៀត បានរងរបួស។ រីឯចំនួនអ្នកស្លាប់ អាចនឹងកើនឡើង បន្ថែមទៀត។

បើទោះយ៉ាងណា អាជ្ញាធរខេត្ត Nineveh នៅមិនទាន់ បានបញ្ជាក់ អំពីមូលហេតុនាំឲ្យកើតគ្រោះអគ្គិភ័យ រហូតបង្កឲ្យកើតមានសោកនាដកម្មបែបនេះឡើយ៕

បរទេស៖ នៅថ្ងៃទី ២៥ ខែកញ្ញាក្រុមហ៊ុន Amazon បាននិយាយថាខ្លួននឹងវិនិយោគ ៤ ពាន់លានដុល្លារក្នុងការបង្កើតបញ្ញាសិប្បនិម្មិត (AI)។ ការវិនិយោគនេះគឺជាផ្នែកមួយនៃកិច្ចខិតខំប្រឹងប្រែងរបស់ក្រុមហ៊ុន Amazon ដើម្បីបង្កើនការប្រកួតប្រជែងក្នុងការប្រណាំងជាមួយគូប្រជែងដូចជា OpenAI, Alphabet និង Microsoft ។
យោងតាមប្រភព Bloomberg បានឱ្យដឹងថា ក្រុមហ៊ុន Amazon បានចុះកិច្ចព្រមព្រៀងវិនិយោគ ៤ ពាន់លានដុល្លារជាមួយក្រុមហ៊ុន Anthropic ដើម្បីបំពេញតម្រូវការទីផ្សារសម្រាប់ផលិតផលបច្ចេកវិជ្ជា AI រួមទាំងបន្ទះឈីបដែលរួមបញ្ចូល AI ។

Anthropic គឺជាក្រុមហ៊ុនមួយក្នុងចំណោមក្រុមហ៊ុនជាច្រើនដែលបង្កើត AI ជំនាន់ថ្មី ក្នុងទម្រង់នៃបញ្ញាសិប្បនិមិត្ត ដែលអាចបង្កើតខ្លឹមសារ និងគំនិតថ្មីៗ រួមទាំងការសន្ទនា រឿងរ៉ាវ រូបភាព វីដេអូ និងតន្ត្រី តាមរបៀបដែលមនុស្សធ្វើ។ ក្រុមហ៊ុន Anthropic បានយល់ព្រមក្នុងការអភិវឌ្ឍន៍បច្ចេកវិទ្យាសម្រាប់បន្ទះឈីបដែលមានកម្មសិទ្ធិរបស់ក្រុមហ៊ុន Amazon នឹងត្រូវបានគេស្គាល់ថាជាបន្ទះឈីប Inferentia និង Trainium។

នាយកប្រតិបត្តិ Amazon Web Services លោក Adam Selipsky បាននិយាយថាភាពជាដៃគូ នឹងជួយកែលម្អគំរូ AI ធ្វើឱ្យបច្ចេកវិទ្យាបន្ទះឈីបរបស់ក្រុមហ៊ុនទាំងពីរ មានហេដ្ឋារចនាសម្ព័ន្ធ AI កាន់តែប្រសើរឡើង។ ទន្ទឹមនឹងនោះ នាយកប្រតិបត្តិ Anthropic លោក Dario Amodei ក៏បាននិយាយដែរថា កិច្ចព្រមព្រៀងនេះជួយក្រុមហ៊ុនបន្តអភិវឌ្ឍម៉ូដែលដោយប្រើបច្ចេកវិទ្យា AI ។

ដូច្នេះហើយ កម្មវិធីនៃបច្ចេកវិទ្យា AI បានជួយក្រុមហ៊ុន Amazon បង្កើតប្រាក់ចំណេញយ៉ាងច្រើន។ សព្វថ្ងៃនេះ Amazon ប្រើបញ្ញាសិប្បនិម្មិតសម្រាប់អ្វីៗគ្រប់យ៉ាងចាប់ពី Alexa ដែលជាបច្ចេកវិទ្យាធ្វើឱ្យសំឡេងឈានមុខគេក្នុងឧស្សាហកម្មរបស់ខ្លួន រហូតដល់ហាងលក់គ្រឿងទេសគ្មានសាច់ប្រាក់ Amazon Go ដល់ Amazon Web Services Sagemaker ដែលជាហេដ្ឋារចនាសម្ព័ន្ធពពកមានគុណភាពខ្ពស់សម្រាប់អ្នកវិទ្យាសាស្ត្រ និងអ្នកអភិវឌ្ឍន៍ទិន្នន័យ។

ទោះជាយ៉ាងណាក៏ដោយ បច្ចុប្បន្ននេះ ដៃគូប្រកួតប្រជែងរបស់ Amazon បាននឹងកំពុងបង្កើនការវិនិយោគ ដើម្បីបង្កើតបច្ចេកវិទ្យា AI ជាបន្តបន្ទាប់ ដោយក្រុមហ៊ុន Microsoft បានវិនិយោគរាប់ពាន់លានដុល្លារដើម្បីបង្កើតភាពជាដៃគូជាមួយ OpenAI ។ ទន្ទឹមនឹងនេះដែរនៅក្នុងខែឧសភាក្រុមហ៊ុន Google របស់ Alphabet Technology Group ក៏បានវិនិយោគជិត ៤៥០ លានដុល្លារនៅក្នុង Anthropic ផងដែរ៕
ប្រភព៖cafef.com