ក្រុមហ៊ុន Baichuan របស់ចិនគឺជាក្រុមហ៊ុនបង្កើតសញ្ញាសិប្បនិមិត្តិបានដាក់ចេញនូវគំរូ AI របស់ខ្លួនបានបង្ហាញថា វាមានលក្ខណៈពិសេសដែលអាចសង្ខេបអត្ថបទប្រលោមលោកយ៉ាងវែងបាន ហើយជាគំរូដ៏ខ្លាំងក្លាបំផុតដែលអាចបំប្លែងពីអត្ថបទវែងទៅជាអត្ថបទខ្លីៗបាន និងសមត្ថភាពលើសពី Antropic Claude 2 របស់អាមេរិក ព្រោះមានគុណភាពក្នុងការឆ្លើយតប និងមានកម្រិតយល់ដឹងនូវអត្ថបទវែងៗបានផងដែរ។

កាលពីថ្ងៃចន្ទទី៣០ខែតុលានេះ សេចក្តីរាយការចេញពីក្រុមហ៊ុន Baichuan នាទីក្រុងប៉េកាំងបាននិយាយថា កំណែទម្រង់ចុងក្រោយគេបង្អស់របស់ខ្លួនគឺជាការកំណត់យកនៅគំរូដ៏ធំនៃប្រព័ន្ធ AI « Context Window» ដែលអាចសង្ខេបអត្ថបទអក្សរចិនបានរហូតដល់ទី ៣៥០ ០០០ ពាក្យ។

បើប្រៀបធៀបជាមួយនឹង Anthropic Claude2 របស់អាមេរិក ដែលបានដាក់ចេញកាលពីខែកក្កដាកន្លងទៅថាជាប្រព័ន្ធ AI ទំនើបបំផុតលើពិភពលោក ជាគំរូដែលអ្នកប្រើប្រាស់អាចដាក់នៅក្នុង Context Window ជាភាសាអង់គ្លេសបានត្រឹមតែ ៧៥ ០០០ពាក្យតែប៉ុណ្ណោះនៃអត្ថបទ។

លើសពីនេះទៅទៀត បណ្តាញទំនាក់ទំនងសង្គមក៏ដូចជាវិដេអូហ្គេមរបស់ចិន បានបង្កើននូវការកែច្នៃគំរូសិប្បនិមិត្តរបស់ខ្លួនបន្ថែមទៀត ដែលបានបម្រើនូវសេវាកម្មក៏ដូចជាដាក់លក់ផលិតផលផ្សេងៗ ហើយការប្រកួតប្រជែងនេះទទួលបាននូវការរីកចម្រើនជាខ្លាំងជាបន្តបន្ទាប់ នាំឲ្យចិនក្លាយជាមហាអំណាចសេដ្ឋកិច្ចលំដាប់ទី២លើសកលលោក។ ពួកគេក៏នៅតែបន្តការកែលម្អទៅលើសេវាកម្មគំរូសិប្បនិមិត្តផ្សេងៗទៀតដើម្បីបម្រើនិងបង្កើនការងាយស្រួលដល់អ្នកប្រើប្រាស់។

យោងតាមក្រុមហ៊ុនបានឱ្យដឹងថា អតិថិជនមកពីគ្រប់វិស័យ រួមទាំងធ្វើអាជីវកម្ម ការអប់រំ ហិរញ្ញវត្ថុ ឱសថ និងប្រព័ន្ធផ្សព្វផ្សាយ កំពុងប្រើប្រាស់គំរូ Hunyuan របស់ក្រុមហ៊ុនចិននេះ រួចហើយ។ ម្យ៉ាងវិញទៀត វិស្វករដែលរៀនកម្មវិធីកុំព្យូទ័រទាំង៣២ជំនាញ បានប្រើប្រាស់គំរូ Hunyuan របស់ក្រុមហ៊ុនចិននេះដើម្បីជួយដល់ការសរសេរកូដ និងបំបាត់នូវកំហុសដែលកើតឡើងជាប្រចាំផងដែរ។ South China Morning Post

ទីក្រុងសេអ៊ូលនៃប្រទេសកូរ៉េខាងត្បូងគឺជាទីក្រុងគោលដៅទេសចរណ៍មួយដ៏ពេញនិយមបំផុតនៅក្នុងប៉ែកអាស៊ី ព្រោះតាំងពីសម័យមុនរហូតដល់បច្ចុប្បន្ន កូរ៉េខាងត្បូងបានកំណត់និន្នាការពិភពលោករាប់ចាប់ពីតន្រ្តី រោងកុន ម្ហូបអាហារ និងម៉ូតពេញនិយមជាច្រើន។ ក្នុងប៉ុន្មានទតវត្សមកនេះ កូរ៉េខាងត្បូងបានទទួលរកឥទ្ធិពលពីប្រទេសជិតខាងដូចជាចិននិងជប៉ុនជាដើម ដោយសារតែកត្តាទីតាំងភូមសាស្រ្ត ដែលជាការផ្លាស់ប្តូរដ៏គួរឲ្យកត់សម្គាល់នៅក្នុងការបង្ហាញភាពអស្ចារ្យនៃប្រទេសនេះទៅកាន់ពិភពលោក។ ដូច្នេះហើយ ខាងក្រោមនេះគឺជាបទពិសោធន៍មួយចំនួនសម្រាប់អ្នកដែលមានគម្រោងមកលេងនៅទីក្រុងសេអ៊ូល ប្រទេសកូរ៉េខាងត្បូងមិនគួរមើលរំលង៖

១ ញាំអាហារនៅតាមដងផ្លូវ Street Food ៖ បទពិសោធន៍ដ៏ល្អមួយដែលគួរតែធ្វើនៅពេលដែលទៅដល់ទីក្រុងសេអ៊ូលប្រទេសកូរ៉េគឺដើរញាំអាហារនៅតាមដងផ្លូវ។ Gwangjang Market គឺជាផ្សារដ៏ធំមួយប្រចាំបប្រវត្តិសាស្រ្ត ដែលមានជម្រើសនៃស្តង់ម្ហូបជាង៥០០០ប្រភេទផ្សេងៗពីគ្នា រួមទាំងតូបលក់សម្លៀកបំពាក់ស្អាតៗ លម្អដោយភ្លើងរាត្រីចម្រុះពណ៌គួរឲ្យទាក់ចិត្តបំផុត។ ម្ហូបដ៏ពេញនិយមបំផុតនៅទីនោះគឺ Kalguksu (គុយទាវកាត់ជាមួយនឹងទឹកស៊ុបបែបកូរ៉េ) និង សាច់ជ្រូកអាំងកូរ៉េ រួមជាមួយនឹងគីមឈីជាដើម។ ម្យ៉ាងវិញទៀត ផ្សារលក់អាហារតាមដងផ្លូវ ដ៏ពេញនិយមបំផុតមួយដែរគឺផ្សារ Myeongdong ជាផ្សាររាត្រីដែលមានលក់ម្ហូបរាប់រយមុខរសជាតិឆ្ងាញ់។ មុខម្ហូបប្រចាំតំបន់ដែលគួរតែសាកពេលទៅដល់ទីនោះគឺ គីមប៉ាប់ ដែលគីមនៅទីនោះធ្វើឡើងពីសារ៉ាយសមុទ្រ និងប៉ាប់ធ្វើឡើងពី បាយម្យ៉ាង មានរសជាតិស្រដៀងនឹងស៊ូស៊ី លាយជាមួយសារ៉ាយសមុទ្រ បាយ បន្លែ សាច់ និងត្រីជាដើម។

២ ទៅធ្វើសេវាកម្ម K Beauty ៖ Myeongdoong គឺជាទីកន្លែងសម្បូរបែបនិងគួរឲ្យចង់រស់នៅបំផុត។ ពីព្រោះនៅទីនោះគឺបណ្តំទៅដោយហាងលក់គ្រឿងថែរក្សាសម្រស់លល្អៗរាប់មុឺនប្រភេទ។ ការថែរក្សាសម្រស់គឺជារឿងសំខាន់បំផុតសម្រាប់ប្រជាជនកូរ៉េទូទៅ ជាពិសេសគឺនារីកូរ៉េ។ វាមិនមែនជារឿងដែលចម្លែកទេ ដែលប្រទេសកូរ៉េជាប្រទេសមួយដែលមានចំនួនអ្នកកែសម្ភស្សច្រើនជាងគេនៅលើសកលលោក ព្រោះប្រជាជនកូរ៉េភាគច្រើននិយមចូលចិត្តវះកាត់ត្របកភ្នែករបស់ពួកគេដើម្បីឲ្យមើលទៅធំស្អាតជាងមុនក៏ដូចជាវះកាត់ថ្គាមមុខអក្សរវីជាដើម។

៣ ទៅទស្សនាកន្លែងប្រវត្តិសាស្រ្តនិងស្លៀកពាក់ឈុតប្រពៃណីកូរ៉េដោយសេរី៖ នៅក្រុងសេអ៊ូល អ្នកអាចស្លៀកសម្លៀកបំពាក់កូរ៉េបានក្នុងបរិវេណទីតាំងប្រត្តិសាស្រ្តដោយសេរី។ ជាពិសេសគឺនៅតំបន់ Gyeongbokgung ជាទីតាំងប្រត្តិសាស្រ្តនៃព្រះរាជវាំងរបស់អធិរាជ Joseon Dynasty ដែលបានបង្ហាញពីសក្តានុពលផ្នែកនយោបាយនិងសេដ្ឋកិច្ចដ៏រុងរឿងមួយក្នុងអំឡុងឆ្នាំ១៣៩៥ លាតសន្ធឹងក្នុងផ្ទៃដីសរុបជាង ៤០ ០០០ម៉ែត្រការ៉េ ។នៅទីនោះក៏មានដាក់ជួលនូវសម្លៀកបំពាក់ប្រពៃណីកូរ៉េផងដែរ ដែលគេឲ្យឈ្មោះថា ហាន់ប៊ុក ជាមួយនឹងសម្លៀកបំពាក់ជាង៩០០បែបខុសៗគ្នា ដែលបង្ហាញពីការស្លៀកពាក់នៅក្នុងសម័យកាលអធិរាជ Joseon Dynasty ផ្ទាល់តែម្តង។ ជាទូទៅនៅពេលដែលអ្នកទៅដល់កន្លែងទាំងនោះអ្នកនឹងប្រទះឃើញនារីកូរ៉េភាគច្រើនថតរូបដោយមោទនភាពជាមួយនឹងឈុតប្រពៃណីពួកគេ ដោយស្លៀកសំពត់វែងច្រើនជាន់ អាវដៃវែង ដៃខ្លីមានប៉ាក់ និងតុបតែងលម្អផ្សេងៗជាដើម។

៤ ច្រៀងចម្រៀង K pop នៅការ៉ាអូខេ៖ ប្រសិនបើអ្នកទៅដល់ទីក្រុងសេអ៊ូល ហើយឃើញផ្លាកសញ្ញាដែលគេឲ្យឈ្មោះថា Noraebang សូមកុំខកខានឲ្យសោះព្រោះនោះជាទីកន្លែងច្រៀងចម្រៀងខារ៉ាអូខេជនជាតិកូរ៉េ ហើយវាក៏ទទួលបាននូវការពេញនិយមបំផុតពីស្រទាប់យុវវ័យទៅលើបទចម្រៀង K Pop នៅពេញផ្ទៃប្រទេស។ នៅទីនោះក៏មានជួលជាបន្ទប់គិតតម្លៃជាម៉ោង ជាមួយនឹងកន្លែងអង្គុយដ៏មានផាសុខភាព និងស្រ្គីនធំៗដែលបង្ហាញពីសក្តានុពលនៃសកលលោកនៃចម្រៀង K Pop ដ៏អស្ចារ្យបំផុត។

៥ ទៅទស្សនាសារមន្ទីរនៃភាពច្នៃប្រឌិតដ៏អស្ចារ្យរបស់ Samsung ៖ សម្រាប់ជនជាតិកូរ៉េ Samsung គឺជាមោទនភាពមួយរបស់ជាតិ។ អ្នកនឹងឃើញ Samsung នៅគ្រប់ទីកន្លែងមិនថាជា ផ្ទាំង LED ឬ Poster យក្ស និងផ្ទាំបាដាម៉ាកយីហោល្បីៗនៅពេញផ្ទៃប្រទេស។ សារមន្ទីរនេះគឺជាទីស្នាក់កាលកណ្តាលនៃមជ្ឈមណ្ឌលកូរ៉េ និងត្រូវបានគេស្គាល់ថាជាមជ្ឈមណ្ឌលស្រាវជ្រាវនិងអភិវឌ្ឍ លាតសន្ធឹងលើផ្ទៃដីជិត២លានម៉ែត្រការ៉េ មានអាគារចំនួន១៣០ រួមមានទាំងអាហារដ្ឋានដើម្បីភ្ញៀវប្រមាណ៥០ ០០០ចានក្នុងមួយថ្ងៃ និងមានហាងកាហ្វេប្រមាណ៣០កន្លែងផ្សេងគ្នា។ បើទោះបីជាប្រទេសកូរ៉េខាងត្បូងទើបតែងើបឡើងពីសង្គ្រាមដែលបង្កឡើងដោយជនស៊ីវិលដែលធ្វើឲ្យប្រទេសខូចខាតជាខ្លាងនៅក្នុងឆ្នាំ១៩៥០ ប៉ុន្តែនៅតែអាចងើបឡើងវិញជាមួយបច្ចេកវិទ្យាខ្នាតយក្សរបស់ Samsung ដែលមានបុគ្គលិកលើសពី ៣០០ ០០០នាក់នៅជុំវិញពិភពលោក និងជាគូរប្រជែងរបស់ក្រុមហ៊ុន Apple និង Sony ផងដែរ៕

ប្រទេសវៀតណាម ៖ បច្ចុប្បន្ននេះ ប្រទេសវៀតណាមបានបង្កើនការទាក់ទាញភ្ញៀវទេសចរបរទេសឱ្យមកកម្សាន្តក្នុងប្រទេសខ្លួន មិនចាញ់ប្រទេសថៃនោះទេ ។ គេសង្កេតឃើញថា គ្រាន់តែរយៈពេល១០ខែនៃឆ្នាំ២០២៣ ប្រទេសវៀតណាមបានទទួលភ្ញៀវទេសចរបរទេសស្មើរហូតដល់១០លាននាក់ឯណោះ ។ ចំនួននេះខ្ពស់ជាងចំនួនដែលប្រទេសវៀតណាមបានដាក់គោលដៅទៅទៀត ។

យោងតាមទិន្នន័យរបស់ការិយាល័យស្ថិតិទូទៅនៅវៀតណាមបង្ហាញថា ក្នុងរយៈពេល១០ខែដំបូងនៃឆ្នាំ២០២៣ (គឺចាប់តាំងពីខែមករា រហូតដល់ខែតុលា) មានភ្ញៀវទេសចរបរទេសធ្វើដំណើរមកកម្សាន្តនៅប្រទេសវៀតណាម ចំនួន១០លាននាក់ ។ ដូច្នេះ ចំនួននេះខ្ពស់ជាងចំនួនដែលប្រទេសវៀតណាមបានដាក់គោលដៅទៅទៀត ។ ប្រទេសវៀតណាមបានដាក់គោលដៅចំនួនភ្ញៀវទេសចរបរទេសសរុបរបស់ឆ្នាំ២០២៣ គឺស្មើនឹង៨លាននាក់ ប៉ុន្តែរយៈពេលត្រឹមតែ១០ខែប៉ុណ្ណោះ មានភ្ញៀវទេសចរបរទេសធ្វើដំណើរមកវៀតណាមរហូតដល់១០លាននាក់ ហើយវាខ្ពស់ជាងវៀតណាមរំពឹងទុករហូតដល់២៥% ។

ភ្ញៀវទេសចរបរទេសមកកាន់ប្រទេសវៀតណាម ស្មើនឹង១០លាននាក់នាពេលនេះ គឺមិនទាន់រួមបញ្ចូលចំនួនភ្ញៀវទេសចរបរទេសដែលបម្រុងធ្វើដំណើរមកវៀតណាមបន្ថែមទៀត នៅខែវិច្ឆិកា និងខែធ្នូ ឆ្នាំ២០២៣ ទេ ។ នៅចុងឆ្នាំ២០២៣ គឺជារដូវកាលភ្ញៀវទេសចរបរទេសធ្វើដំណើរកម្សាន្តច្រើននៅតាមប្រទេសនានា ។ ចំណែកនៅខែតុលា ឆ្នាំ២០២៣ គឺជាខែទី៤ បន្តបន្ទាប់គ្នា ដែលមានភ្ញៀវទេសចរបរទេសធ្វើដំណើរមកវៀតណាម លើសពីចំនួន១លាននាក់ក្នុង១ខែ ។

ភ្ញៀវទេសចរបរទេសដែលធ្វើដំណើរមកប្រទេសវៀតណាមច្រើនបំផុត គឺមកពីប្រទេសកូរ៉េខាងត្បូង ស្មើនឹង២៩សែននាក់ក្នុងរយៈពេល១០ខែ ឆ្នាំ២០២៣ ។ បន្ទាប់មក គឺភ្ញៀវទេសចរចិន ។ ភ្ញៀវទេសចរបរទេសចាប់អារម្មណ៍នឹងប្រទេសវៀតណាម ដោយសារមានតំបន់ទេសចរណ៍ពេញនិយមជាច្រើនកន្លែង បើធៀបនឹងប្រទេសផ្សេងទៀតក្នុងតំបន់អាស៊ីអាគ្នេយ៍ ក្នុងនោះវៀតណាមមានតំបន់ទេសចរណ៍ធម្មជាតិ និងតំបន់ទេសចរណ៍ប្រវត្តិសាស្ត្រ ខណៈការចាយវាយផ្សេងៗ ក៏ធូរថ្លៃដែរ ។ ហេតុនេះ វាធ្វើឱ្យវៀតណាមក្លាយជាគូប្រជែងដ៏សំខាន់របស់ប្រទេសថៃសម្រាប់វិស័យទេសចរណ៍ ៕ ប្រភព ៖ nation tv

បរទេស៖ ពលរដ្ឋជាច្រើនដែលមកពីបណ្តាប្រទេសដូចជា សហរដ្ឋអាមេរិក អង់គ្លេស បារាំង និងអូស្ត្រាលី បានចាកចេញពីតំបន់ហ្គាហ្សាដោយសុវត្ថិភាព នឹងបានមកដល់ប្រទេសអេហ្ស៊ីបតាមច្រកព្រំដែនរ៉ាហ្វា។
យោងតាមគេហទំព័រ AP News ដែលបានរាយការណ៍នៅថ្ងៃទី២ ខែវិច្ឆិកាថ្មីៗនេះថា ប្រទេសជាច្រើនបានបញ្ជាក់ថា ពលរដ្ឋរបស់ពួកគេបានចាកចេញពីតំបន់ហ្គាហ្សានឹងបានឆ្លងកាត់ច្រកព្រំដែន Rafah ចូលទៅក្នុងប្រទេសអេហ្ស៊ីបដោយសុវត្ថិភាពហើយ ប៉ុន្តែមិនបានបញ្ជាក់ចំនួនពិតប្រាកដនោះទេ។

ទោះជាយ៉ាងណាក៏ដោយ យោងតាមអ្នកនាំពាក្យក្រសួងការបរទេសអាមេរិក លោក Matthew Miller បាននិយាយថា ក្រុមជនបរទេសដំបូងដែលឆ្លងកាត់ច្រកព្រំដែន Rafah ចូលទៅក្នុងប្រទេសអេហ្ស៊ីប រួមមានពលរដ្ឋអូទ្រីស ៣១នាក់ ពលរដ្ឋអូស្ត្រាលី ២០នាក់ និងពលរដ្ឋបារាំង ៥នាក់។ក្រសួងការបរទេសអូទ្រីសបាននិយាយថា «អូទ្រីសគឺជាប្រទេសដំបូងគេដែលមានពលរដ្ឋត្រូវបានជម្លៀស»។ ដូច្នេះ ក្រុមមនុស្សដែលចាកចេញភាគច្រើនសុទ្ធតែជាពលរដ្ឋដែលមានសញ្ជាតិពីរ រស់នៅក្នុងតំបន់ហ្គាហ្សា ឬទៅសួរសុខទុក្ខសាច់ញាតិ រួមទាំងអនីតិជនចំនួន ១០ នាក់ទៀត។

គួរបញ្ជាក់ដែរថា កាលពីថ្ងៃទី១ ខែវិច្ឆិកា ប្រទេសអេហ្ស៊ីបបានយល់ព្រមក្នុងការស្នើសុំរបស់រដ្ឋាភិបាលអ៊ីស្រាអែល ដើម្បីបើកច្រកព្រំដែន Rafah ជាលើកដំបូងចាប់តាំងពីមានជម្លោះហាម៉ាស- អ៊ីស្រាអែល ផ្ទុះឡើង ដោយអនុញ្ញាតឱ្យអ្នកកាន់លិខិតឆ្លងដែនបរទេសចាកចេញពីតំបន់ Gaza។ ប៉ុន្តែទោះជាយ៉ាងណាក៏ដោយ ច្រកព្រំដែនរបស់អេហ្ស៊ីបនឹងបើកក្នុងរយៈពេលមានកំណត់ ក៏ដូចជាអនុញ្ញាតឱ្យជនបរទេសនិងអ្នករងរបួសធ្ងន់ធ្ងរចាកចេញតែប៉ុណ្ណោះ៕

ប្រទេសកូរ៉េខាងជើង ៖ យោងតាមសារព័ត៌មានបរទេសចុះផ្សាយថា ប្រទេសកូរ៉េខាងជើងបានចាប់ផ្តើមបិទស្ថានទូតរបស់ខ្លួននៅក្រៅប្រទេស ដូចជា ប្រទេសអង់ហ្គោឡា និងអ៊ូហ្គង់ដា ។ ចំណែកប្រទេសកូរ៉េខាងត្បូងលើកឡើងថា ការបិទស្ថានទូតនៅក្រៅប្រទេសនេះ គឺចង្អុលបង្ហាញឱ្យឃើញថា កូរ៉េខាងជើងកំពុងជួបបញ្ហាផ្នែកសេដ្ឋកិច្ច ។កាលពីថ្ងៃទី៣១ ខែតុលា ឆ្នាំ២០២៣ សារព័ត៌មានរដ្ឋកូរ៉េខាងជើង KCNA បានរាយការណ៍ថា មន្ត្រីស្ថានទូតកូរ៉េខាងជើងប្រចាំប្រទេសអង់ហ្គោឡា និងអ៊ូហ្គង់ដា បានចូលជួបមេដឹកនាំប្រទេសទាំងពីរដើម្បីលាឈប់ពីតំណែង ដោយសារកូរ៉េខាងជើងបានបិទស្ថានទូតនៅប្រទេសទាំងពីរនេះ ។

ចំណែកក្រសួងបង្រួបបង្រួមជាតិកូរ៉េខាងត្បូងលើកឡើងថា ការបិទស្ថានទូតរបស់កូរ៉េខាងជើង គឺជាសញ្ញាចង្អុលបង្ហាញថា ប្រទេសកូរ៉េខាងជើងកំពុងប្រឈមនឹងបញ្ហាលំបាកក្នុងការស្វែងរកប្រាក់នៅក្រៅប្រទេស ដោយសារការដាក់ទណ្ឌកម្មសេដ្ឋកិច្ចពីបណ្តាប្រទេសដែលមានគោលដៅកំណត់ថវិកាសម្រាប់គម្រោងនុយក្លេអ៊ែរ និងមីស៊ីលកូរ៉េខាងជើង ។ ហេតុនេះ វាពិបាកក្នុងការថែរក្សាស្ថានទូតកូរ៉េខាងជើងនៅក្រៅប្រទេសដូចមុន ។

ប្រទេសអង់ហ្គោឡា និងអ៊ូហ្គង់ដា បានបង្កើតទំនាក់ទំនងមិត្តភាពជាមួយកូរ៉េខាងជើងតាំងពីឆ្នាំ១៩៧០ មកម៉្លេះ ហើយប្រទេសទាំងពីរនេះនៅតែរក្សាទំនាក់ទំនងផ្នែកកងទ័ព និងជាប្រភពនៃការស្វែងរកប្រាក់នៅក្រៅប្រទេស តាមរយៈគម្រោងសហការផ្សេងៗ ដូចជា គម្រោងសាងសង់រូបសំណាកជាដើម ។ មុននេះ ប្រទេសកូរ៉េខាងជើងមានទំនាក់ទំនងជាផ្លូវការជាមួយប្រទេសចំនួន១៥៩ ប៉ុន្តែមានទំនាក់ទំនងការទូតត្រឹមតែ៥៣ ប៉ុណ្ណោះនៅក្រៅប្រទេស ។

រីឯសារព័ត៌មានជប៉ុនបានចុះផ្សាយកាលពីចុងខែតុលា ឆ្នាំ២០២៣ ដោយយោងតាមប្រភពមិនបង្ហាញឈ្មោះថា ប្រទេសកូរ៉េខាងជើងមានគម្រោងបិទស្ថានទូតយ៉ាងតិចចំនួន១០ នៅក្រៅប្រទេស រួមទាំងស្ថានកុងស៊ុលនៅហុងកុងផងដែរ ដោយសារមានបញ្ហាសេដ្ឋកិច្ច ៕ ប្រភព ៖ pptv hd

នៅថ្ងៃទី ១ ខែវិច្ឆិកា អ្នកនិយមលេងអ៊ីនធឺណិតមានការភ្ញាក់ផ្អើលជាខ្លាំងនៅពេលដែលដឹងថាគណនី Weibo ដែលជាបណ្តាញសង្គមចិនផ្ទាល់ខ្លួនរបស់ Lisa សមាជិក BLACKPINK មិនអាចចូលមើលបានទៀតទេ។ ការបិទនេះត្រូវបានគេជឿថាមានជាប់ពាក់ព័ន្ធនឹងការសម្តែងស៊ិចស៊ីរបស់ Lisa នៅប្រទេសបារាំងកាលពីចុងខែកញ្ញា។

អ្នកគាំទ្រជាច្រើននាក់បានព្យាយាមចូលទៅស្វែងរកគណនីបណ្តាញសង្គមចិនរបស់ Lisa ប៉ុន្តែអ្នកគាំទ្របែរជាឃើញពាក្យថា គណនីនេះត្រូវបានចោទប្រកាន់ពីបទរំលោភច្បាប់ និងបទប្បញ្ញត្តិពាក់ព័ន្ធនៃវេទិកា Weibo ហើយបច្ចុប្បន្នមិនអាចចូលប្រើបាន។ ទាក់ទិននឹងករណីនេះតារាសម្តែងចិនដ៏ល្បី Angelababy និង Jenny Zhang ដែលត្រូវគេដឹងថាបានចូលរួមទស្សនាការសម្តែងរបស់ Lisa ក៏រងផលប៉ះពាល់ផងដែរ។ បច្ចុប្បន្ននេះ អ្នកប្រើប្រាស់បណ្តាញសង្គមចិនមិនអាចចុច Follow គណនីរបស់ពួកគេបានទេ ផ្ទុយទៅវិញបានបង្ហាញថា គណនីនេះបំពានច្បាប់របស់វេទិកា។

គណនីបណ្តាញសង្គមរបស់ Lisa នៅក្នុងប្រទេសចិនត្រូវបានបិទចោលនេះត្រូវបានគេជឿថាពាក់ព័ន្ធនឹងការតវ៉ាប្រឆាំងនឹង Lisa, Angelababy និង Jenny Zhang នៅក្នុងប្រទេសចិនបន្ទាប់ពី Lisa បានសម្តែងនៅក្លិប Crazy Horse នៅប្រទេសបារាំង។ ការសម្តែងរបស់ Lisa មានមនុស្សជាច្រើនបានរិះគន់ព្រោះជាទង្វើ និងជាគំរូមិនល្អសម្រាប់អនីតិជន ដោយសារតែអ្នកគាំទ្ររបស់នាងរួមមានសិស្សស្រីជាច្រើននាក់ ស្របពេលកន្លងមក Lisa បានទៅប្រទេសចិនដើម្បីចូលរួមក្នុងកម្មវិធី និងថតផ្សាយពាណិជ្ជកម្មផងដែរ។
ចំណែកឯតារាសម្តែងចិនពីរនាក់ដែលរងផលប៉ះពាល់នេះ ក៏ត្រូវបានទស្សនិកជនរាប់លាននាក់នៅប្រទេសចិនអំពាវនាវឱ្យធ្វើពហិការចំពោះការសម្តែងរបស់ពួកគេដោយសារតែតារាសម្តែងទាំងពីរនេះ បំពានលើបទប្បញ្ញត្តិក្នុងវិស័យសិល្បៈសម្តែង ដែលកំណត់ដោយអាជ្ញាធរចិន។

ការសម្តែងរបស់ Lisa នៅឯប្រទេសបារាំងកាលពីខែកញ្ញា មានមនុស្សជាច្រើនបានរិះគន់ នាងដោយសារតែជឿថាការងារនេះវាជះផលអវិជ្ជមានទៅដល់យុវវ័យដែលមិនទាន់គ្រប់អា យុ។ មតិខ្លះទៀតក៏បានលើកឡើងដែរថាការសម្តែងរបស់ Lisa គ្រាន់តែជាការកម្សាន្តសុទ្ធសាធ ស្ថិតក្នុងភាពទាន់សម័យហើយនាងស្ថិតក្នុងវ័យដែលអាចសម្តែងស៊ិចស៊ីបានហើយ ៕

បរទេស៖ ក្រុម Hamas បាននិយាយថា ពួកគេកំពុងរៀបចំដោះលែងចំណាប់ខ្មាំងបរទេសមួយចំនួនក្នុងរយៈពេលប៉ុន្មានថ្ងៃខាងមុខនេះ។

យោងតាមទីភ្នាក់ងារសារព័ត៌មាន Al Jazeera ដែលបានរាយការណ៍នៅថ្ងៃទី១ ខែវិច្ឆិកាថា កងកម្លាំងហាម៉ាសរបស់ប៉ាឡេស្ទីននឹងធ្វើការដោះលែងចំណាប់ខ្មាំងបរទេសមួយចំនួនក្នុងរយៈពេលប៉ុន្មានថ្ងៃខាងមុខនេះ ដោយមិនផ្តល់ព័ត៌មានជាក់លាក់បន្ថែមទៀតនោះទេ។

ក្នុងថ្ងៃដដែលនោះ លោក Abu Obeda អ្នកនាំពាក្យកងពលតូច Kassam ក្រុមប្រដាប់អាវុធរបស់ហាម៉ាស ក៏បានផ្ញើសារគំរាមទៅដល់កងទ័ពអ៊ីស្រាអែលថានឹងប្រែក្លាយតំបន់ហ្គាហ្សាទៅជាកន្លែងបញ្ចុះសពទាហានអ៊ីស្រាអែល ចំពេលមានការបន្តកើនឡើង និងការពង្រឹងប្រតិបត្តិការលើដី។

ទោះជាយ៉ាងណាក៏ដោយ អ៊ីស្រាអែល និងក្រុមសិទ្ធិមនុស្ស រួមទាំងអង្គការសហប្រជាជាតិបានអំពាវនាវឱ្យមានការដោះលែងចំណាប់ខ្មាំងជាបន្ទាន់ ហើយអង្គការសិទ្ធិមនុស្ស (Human Rights Watch) បាននិយាយនៅក្នុងសេចក្តីថ្លែងការណ៍មុននេះថា “ក្រុមហាម៉ាស់ និងក្រុមជីហាតអ៊ីស្លាម កំពុងប្រព្រឹត្តឧក្រិដ្ឋកម្មសង្រ្គាមយ៉ាងធ្ងន់ធ្ងរបំផុត ដោយចាប់ជនជាតិអ៊ីស្រាអែល និងអ្នកផ្សេងជាច្រើននាក់ទៀតធ្វើជាចំណាប់ខ្មាំងនៅហ្គាហ្សា”។

គួរបញ្ជាក់ដែរថា កន្លងទៅមានមនុស្សជាង ២៣០ នាក់ រួមជាមួយទាហាន និងជនស៊ីវិល ក៏ដូចជាជនបរទេសមកពីបណ្តាប្រទេសជាច្រើនទៀត ត្រូវបានចាប់ខ្លួនដោយក្រុមហាម៉ាស់ និងក្រុមប្រដាប់អាវុធប៉ាឡេស្ទីនផ្សេងទៀត ក្នុងអំឡុងពេលនៃការវាយលុកយ៉ាងសាហាវទៅលើអ៊ីស្រាអែលកាលពីថ្ងៃទី ៧ ខែតុលា ដែលអាជ្ញាធរអ៊ីស្រាអែលបាននិយាយថា ក្រុមហាម៉ាស់បានសម្លាប់មនុស្សជាង ១,៤០០ នាក់ ដែលភាគច្រើនសុទ្ធតែជាជនស៊ីវិល៕