ប្រទេសម៉ិកស៊ិក ៖ វាជាថ្ងៃដ៏សែនរីករាយ និងស្រស់ស្អាត ខណៈអាកាសធាតុក្តៅធ្វើឱ្យយើងអាចបង្ហោះបាឡុងឡើងទៅលើអាកាសបាន ។ ចំណែកខ្យល់វិញក៏ល្អដែរ ហើយធ្វើឱ្យយើងមានទំនុកចិត្តថា មានសុវត្ថិភាពសម្រាប់ពិធីបុណ្យនេះ ។

នេះជាការលើកឡើងរបស់អ្នកបញ្ជាបាឡុងហោះមកពីប្រទេសប្រេស៊ីល ពាក់ព័ន្ធនឹងការបង្ហោះបាឡុងទៅលើអាកាសនៅក្នុងពិធីបុណ្យបាឡុងអន្តរជាតិ លើកទី២១ ដែលរៀបចំឡើងនៅទីក្រុងឡេអន រដ្ឋក្វាណាវ៉ាតូ ប្រទេសម៉ិកស៊ិក ។

នៅក្នុងពិធីបុណ្យនេះ គេសង្កេតឃើញមានបាឡុងច្រើនទំហំ និងច្រើនម៉ូដខុសៗគ្នា ក្នុងនោះមានទាំងបាឡុងរូបតុក្កតាល្បីៗ ដូចជា តុក្កតាសាផាន់ប៉ុប, ដាយណូសឺ, យូនីខន និងដំរី ជាដើម ។

ពិធីបុណ្យបង្ហោះបាឡុងអន្តរជាតិនេះ ត្រូវបានគេរៀបចំឡើងរយៈពេល៤ថ្ងៃ ។ ចំណែកប្រទេសមកចូលរួមបង្ហោះបាឡុងក្នុងពិធីបុណ្យ មានចំនួន២៣ប្រទេស និងមានបាឡុងសរុបជាង២០០បាឡុង ។ ការរៀបចំពិធីនេះឡើង ក្នុងគោលបំណងឱ្យភ្ញៀវទេសចរជាតិ និងអន្តរជាតិបានទទួលយកបទពិសោធន៍អង្គុយនៅលើបាឡុងហោះ និងសប្បាយរីករាយ ។ ភ្ញៀវទេសចរនិយាយថា វាពិតជាប្លែកណាស់ ហើយពួកគេចង់មកចូលរួមក្នុងពិធីបុណ្យនេះជាថ្មីទៀត ។

លោក ជេវៀ អាមិរ៉េ អ្នករៀបចំកម្មវិធីបង្ហោះបាឡុងនិយាយថា ៖ «ខ្ញុំធ្លាប់បានទៅចូលរួមក្នុងពិធីបុណ្យបង្ហោះបាឡុងនៅទីក្រុងអាល់ប៊ូឃ័រី រដ្ឋញូវម៉ិកស៊ិកូ សហរដ្ឋអាមេរិក និងនៅកន្លែងផ្សេងទៀតនៅលើពិភពលោក ប៉ុន្តែវាមិនសប្បាយដូចនៅទីនេះទេ» ។

លោក ជេវៀ អាមិរ៉េ បន្តទៀតថា ៖ «ពិធីបុណ្យបង្ហោះបាឡុងពិតជាសមរម្យណាស់សម្រាប់ពលរដ្ឋម៉ិកស៊ិកដូចជាពួកយើង ។ ហេតុនេះ ទើបធ្វើឱ្យភ្ញៀវទេសចរមកពីប្រទេសនានាលើពិភពលោក ស្រឡាញ់ពិធីបុណ្យនេះ ។ ខ្ញុំគិតថា នេះជាអ្វីដែលធ្វើឱ្យពិធីបុណ្យបង្ហោះបាឡុងនៅប្រទេសម៉ិកស៊ិកមានភាពល្បីល្បាញ និងអាចទាក់ទាញភ្ញៀវទេសចរឱ្យមកកម្សាន្តនៅម៉ិកស៊ិកផងដែរ» ៕ ប្រភព ៖ TNN World

ប្រទេសថៃ ៖ កាលពីខែមីនា ឆ្នាំ២០២២ រដ្ឋាភិបាលថៃបានចេញគោលនយោបាយថ្មី ដើម្បីជំរុញឱ្យពលរដ្ឋងាកមកប្រើប្រាស់រថយន្តអគ្គិសនី (EV) ដោយដាក់គោលដៅថា នឹងផ្លាស់ប្តូរការផលិតរថយន្តជាងពាក់កណ្តាលនៅប្រទេសថៃ មកផលិតរថយន្តអគ្គិសនីនៅឆ្នាំ២០៣០ ។

តាមការស្រាវជ្រាវរបស់ Counterpoint Research បង្ហាញថា ក្រុមហ៊ុនផលិតរថយន្តរបស់ចិនមានឥទ្ធិពលលើទីផ្សាររថយន្តអគ្គិសនីនៅតំបន់អាស៊ីអាគ្នេយ៍ខ្លាំងបំផុត ។ ចំណែកប្រទេសថៃបានកាន់កាប់ចំណែកទីផ្សារជិតស្មើ៧៩% នៃចំនួនរថយន្តអគ្គិសនីទាំងអស់ដែលបានលក់នៅតំបន់អាស៊ីអាគ្នេយ៍ នៅត្រីមាសដំបូងនៃឆ្នាំ២០២៣ ។

បើទោះជាទីផ្សាររថយន្តអគ្គិសនីរបស់ថៃមានទំហំធំបំផុតក្នុងតំបន់ក្តី ក៏នៅតែមានការប្រកួតប្រជែងទៅលើម៉ាករថយន្តណាអាចលក់ដាច់ច្រើនបំផុតនៅប្រទេសថៃ ។ បច្ចុប្បន្ន ម៉ាករថយន្តអគ្គិសនីលក់ដាច់បំផុតនៅថៃ គឺរថយន្ត BYD របស់ចិន ។ ប៉ុន្តែម៉ាករថយន្តរបស់ចិនផ្សេងទៀត ក៏ចាប់ផ្តើមទទួលបានការពេញនិយមដូចគ្នាដែរ ។

ក្រៅពីនេះ ក្រុមហ៊ុនផលិតរថយន្តសង្ឃឹមថា ម៉ាករថយន្តអគ្គិសនីមួយទៀតនឹងទទួលបានការពេញនិយមនៅថៃផងដែរ គឺរថយន្ត TOYOTA របស់ជប៉ុន ខណៈរថយន្ត TOYOTA ត្រូវបានគេប្រើប្រាស់ជាទូទៅនៅថៃស្រាប់ហើយ ជាពិសេស រថយន្តតូច និងរថយន្ត១បាំងកន្លះ ។

ក្នុងឋានៈជាមជ្ឈមណ្ឌលដ៏ធំបំផុតស្ថិតក្នុងចំណាត់ថ្នាក់ទី១០ នៅលើពិភពលោក គេបានស្គាល់ថា ថៃជាប្រទេសនាំចេញរថយន្ត TOYOTA និង Honda ប៉ុន្តែដើម្បីផ្លាស់ប្តូរការផលិតរថយន្ត១ ក្នុងចំណោម៣ នៃការផលិតរថយន្តប្រចាំឆ្នាំ ស្មើនឹង២លាន៥សែនគ្រឿងឱ្យក្លាយជារថយន្តអគ្គិសនីនៅឆ្នាំ២០៣០ គឺប្រព័ន្ធអេកូឡូស៊ីនឹងក្លាយជាកូនសោរសំខាន់សម្រាប់ការផ្លាស់ប្តូរ ។

រដ្ឋាភិបាលថៃមានបំណងសហការជាមួយក្រុមហ៊ុន TOYOTA ដើម្បីជំរុញការប្រើប្រាស់រថយន្តអគ្គិសនីនៅប្រទេសថៃ រួមទាំងរថយន្ត Eco Car និងរថយន្ត១បាំងកន្លះផងដែរ ។ រដ្ឋាភិបាលថៃមានគម្រោងកាត់បន្ថយពន្ធរយៈពេល៣ឆ្នាំ សម្រាប់ក្រុមហ៊ុនផលិតរថយន្តដែលវិនិយោគក្នុងប្រព័ន្ធ Automation និង Robotics ក្រោយពីការលើកទឹកចិត្តអតិថិជនទិញរថយន្តអគ្គិសនី ។ រីឯក្រុមហ៊ុន TOYOTA មានគម្រោងសាកល្បងប្រើប្រាស់រថយន្តអគ្គិសនី១បាំងកន្លះនៅថៃ ដើម្បីជំរុញការលក់រថយន្តអគ្គិសនីក្នុងប្រទេសនេះ ៕ ប្រភព ៖ AEC connect

ទីបំផុតបវរកញ្ញា Sheynnis Palacios មកពីប្រទេស Nicaragua បានគ្រងមកុដ Miss Universe 2023លើកដំបូងក្នុងប្រវត្តិសាស្រ្តរបស់ខ្លួនលើទឹកដី El Salvador ។ ការផ្តល់ចម្លើយ៣នាក់ចុងក្រោយ (TOP3) បវរកញ្ញារូបនេះបានជ្រើសរើសនៅជាមួយ Mary Wollstonecraft ដែលបានទាក់ទាញការអបអរសាទរយ៉ាងខ្លាំងរហូតគណៈកម្មការសម្រេចឱ្យនាងឈ្នះ ខណៈថៃជាប់លំដាប់រងទី១។

នៅក្នុងសំណួរចម្លើយ៣នាក់ចុងក្រោយ ដែលមាន ប្រទេសថៃ អូស្រ្តាលី នីការ៉ាហ្គ័រ ពិធិករបានចោទសួរថា «ប្រសិនបើអ្នកអាចរស់នៅបានមួយឆ្នាំក្នុងខ្លួនរបស់នារីណាម្នាក់តើអ្នកនឹងជ្រើសរើសអ្នកណា? ហើយហេតុអ្វី?»។ បវរកញ្ញាចក្រវាល នីការ៉ាហ្គ័រ បានឆ្លើយថា «ខ្ញុំនឹងជ្រើសរើស Mary Wollstonecraft ព្រោះនាងជាស្ត្រីដំបូងគេដែលបើកផ្លូវសម្រាប់សិទ្ធិស្ត្រីនាងរស់នៅក្នុងស្ថានភាពលំបាកខ្លាំង។ ហើយខ្ញុំនឹងធ្វើអ្វីគ្រប់យ៉ាងដែលអាចធ្វើទៅបានដើម្បីធានាថា គម្លាតប្រាក់ឈ្នួលនៅពេលនោះគឺជាឱកាសដ៏ល្អឥតខ្ចោះសម្រាប់មនុស្សជាច្រើន។ ស្រ្តីធ្វើការនៅក្នុងតំបន់ណាមួយដែលពួកគេបានជ្រើសរើសធ្វើការ ព្រោះមិនមានដែនកំណត់សម្រាប់ស្ត្រី។ នោះគឺឆ្នាំ ១៧៥០ ឥឡូវនេះនៅឆ្នាំ២០២៣ យើងកំពុងបង្កើតប្រវត្តិសាស្ត្រ»។

ប្រិយមិត្តមួយចំនួនអាចនៅមិនទាន់ដឹងថាតើ Mary Wollstonecraft ជានរណា ដែលជាស្រ្តីជំរុញឱ្យបវរកញ្ញា នីការ៉ាហ្គ័រ លើកយកមកផ្តល់ចម្លើយរហូតគ្រងមកុដនេះ?

Mary Wollstonecraft គឺជាអ្នកនិពន្ធជនជាតិអង់គ្លេស និងជាសកម្មជនសិទ្ធិនារីដ៏ល្បីល្បាញ។ ក្នុងនាមជាម្ចាស់ជើងឯកនៃសិទ្ធិស្ត្រី។ Mary បាននិពន្ធ A Vindication of the Rights of Woman, ក្នុងឆ្នាំ១៧៩២ ដែលត្រូវបានចាត់ទុកថាជាសន្ធិសញ្ញាដំបូងបំផុត និងសំខាន់បំផុតដែលតស៊ូមតិសមភាពសម្រាប់ស្ត្រី។

នៅក្នុងសៀវភៅរបស់នាង នាងបានប្រកែកថា ធម្មជាតិមនុស្សស្រីមិនអន់ជាងបុរសទេ ប៉ុន្តែគ្រាន់តែមើលទៅដោយសារតែពួកគេខ្វះការអប់រំ។ Mary ស្នើឱ្យបុរស និងស្ត្រីត្រូវបានចាត់ទុកជាថនិកសត្វដែលមានហេតុផល ហើយស្រមៃមើលសង្គមដែលបង្កើតឡើងដោយហេតុផល។ ស្រ្តីរូបនេះត្រូវបានគេចាត់ទុកយ៉ាងទូលំទូលាយថាជាតំណាងស្ត្រី។ ការតស៊ូមតិរបស់នាងអំពីសមភាពរបស់ស្ត្រី និងការរិះគន់អំពីភាពជាស្ត្រីធម្មតាមានសារៈសំខាន់ក្នុងការវិវត្តន៍នៃភាពជាស្ត្រី៕

សហព័ន្ធអារ៉ាប់រួម ៖ កាលពីថ្ងៃទី១៩ ខែវិច្ឆិកា ឆ្នាំ២០២៣ សារព័ត៌មានបរទេសរាយការណ៍ថា ក្រុមហោះហើរ «ប៉ាអ៊ី» របស់កងទ័ពអាកាសនៃកងទ័ពរំដោះប្រជាជនចិន បានធ្វើដំណើរមកដល់អាកាសយានដ្ឋាន «អាល់ម៉ាក់ធុម» ស្ថិតនៅទីក្រុងឌូបៃ សហព័ន្ធអារ៉ាប់រួម ដើម្បីចូលរួមក្នុងកម្មវិធីពិព័រណ៍អាកាសចរណ៍នៅទីក្រុងឌូបៃ លើកទី១៨ ។

ពិព័រណ៍អាកាសចរណ៍នៅទីក្រុងឌូបៃ គឺជាកម្មវិធីមួយដែលរៀបចំឡើងយ៉ាងអធិកអធមបំផុត ។ កម្មវិធីនេះប្រមូលផ្តុំទៅដោយក្រុមហ៊ុនអាកាសចរណ៍ឈានមុខលំដាប់ពិភពលោក ដើម្បីបង្ហាញលទ្ធផលការងារថ្មីចុងក្រោយបង្អស់ផ្នែកវិទ្យាសាស្ត្រ និងបច្ចេកវិទ្យា ព្រមទាំងជំរុញពាណិជ្ជកម្មផងដែរ ដែលត្រូវបានគេរៀបចំឡើងរៀងរាល់២ឆ្នាំម្តង ។

ពិព័រណ៍អាកាសចរណ៍លើកនេះ គឺជាលើកដំបូងហើយដែលកងទ័ពអាកាសចិនបានមកចូលរួមបង្ហាញយន្តហោះនៅទីក្រុងឌូបៃ ។ ក្រុមហោះហើរ «ប៉ាអ៊ី» បានធ្វើការបង្ហាញការហោះហើររបស់ពួកគេចំនួន៤លើក ដោយសហការរៀបចំកម្មវិធីជាមួយក្រុមអាកាសចរណ៍ប្រទេសរុស្ស៊ី, អ៊ីតាលី, សហព័ន្ធអារ៉ាប់រួម និងឥណ្ឌា ។

បើតាមអ្នកគ្រប់គ្រងក្រុមហោះហើរ «ប៉ាអ៊ី» ឱ្យដឹងថា ពួកគេគ្រោងបង្ហាញការហោះហើរចំនួន៣ឈុត រួមទាំងការហោះហើរសរុបជាង២០ប្រភេទ ។ ពួកគេជឿថា នឹងអាចបង្ហាញការហោះហើរដ៏អស្ចារ្យ សម្រាប់អ្នកចូលរួមទស្សនាក្នុងកម្មវិធីពិព័រណ៍អាកាសចរណ៍លើកនេះ ៕

ប្រភព ៖ China face

យោងតាមទំព័រហ្វេសប៊ុកឈ្មោះ World Culture បានចុះផ្សាយនៅខែវិច្ឆិកា ឆ្នាំ២០២៣ ថា មានប្រទេសចំនួន៥ នៅតំបន់អាស៊ីអាគ្នេយ៍បានជាប់ចំណាត់ថ្នាក់ជា «The Land of Smile ឬទឹកដីនៃស្នាមញញឹម» ដោយសារពលរដ្ឋរស់នៅប្រទេសទាំងនេះមានស្នាមញញឹមជាមួយគ្នាទៅវិញទៅមក និងជាមួយភ្ញៀវទេសចរបរទេស ហើយពួកគេមានភាពរួសរាយរាក់ទាក់បំផុតលើពិភពលោក ។ ប៉ុន្តែក្នុងចំណោមប្រទេសទាំង៥នេះ គ្មានឈ្មោះប្រទេសថៃទេ ។ តើប្រទេសទាំង៥ នេះ មានប្រទេសណាខ្លះ?

ទំព័រហ្វេសប៊ុកឈ្មោះ World Culture បានលើកឡើងថា ប្រទេសដែលបានជាប់ចំណាត់ថ្នាក់ជា «The Land of Smile» រួមមាន ៖
១-ឥណ្ឌូណេស៊ី២-កម្ពុជា៣-ឡាវ៤-ហ្វីលីពីន
៥-មីយ៉ាន់ម៉ា

កន្លងមក សារព័ត៌មានរបស់កម្ពុជាបានចុះផ្សាយថា រាជធានីភ្នំពេញ ប្រទេសកម្ពុជា គឺជាទឹកដីនៃស្នាមញញឹម ហើយពលរដ្ឋខ្មែរមានទឹកចិត្តជួយគ្នាទៅវិញទៅមក ។ ប៉ុន្តែស្រាប់តែទំព័រហ្វេសប៊ុកថៃឈ្មោះ 7News បានយកព័ត៌មាននេះទៅចុះផ្សាយបន្ត ដោយលើកឡើងថា «The Land of Smile ឬទឹកដីនៃស្នាមញញឹម» គឺជាឈ្មោះរបស់ប្រទេសថៃតែមួយប៉ុណ្ណោះ ដោយសារពលរដ្ឋថៃមានភាពរួសរាយរាក់ទាក់ជាមួយភ្ញៀវទេសចរបរទេស ។ ទំព័រហ្វេសប៊ុកនេះថែមទាំងបានលើកឡើងទៀតថា «ទឹកដីនៃស្នាមញញឹម» គឺជាពាក្យដែលប្រទេសថៃធ្លាប់ប្រើប្រាស់ និងធ្វើឱ្យប្រទេសនានានៅលើពិភពលោកស្គាល់ឈ្មោះនេះ ។

បន្ទាប់មក ទំព័រហ្វេសប៊ុក 7News ថែមទាំងបានដកស្រង់ការបញ្ចេញមតិរបស់ពលរដ្ឋថៃក្នុងបណ្តាញសង្គមយកមកចុះផ្សាយទៀតផង ក្នុងនោះជនជាតិថៃដំបូងគេនិយាយថា ៖ «តើកម្ពុជា គឺជាទឹកដីនៃស្នាមញញឹមមែនទេ? ខ្ញុំប្រាកដចិត្តថា នេះជាឈ្មោះរបស់ប្រទេសថៃ» ។ រីឯជនជាតិថៃម្នាក់ទៀតថា ៖ «ទឹកដីនៃស្នាមញញឹម ស្តាប់ហើយ ដូចជាធ្លាប់ឮ ។ ខ្ញុំធ្លាប់បានឮពាក្យនេះពីមុនមក ប៉ុន្តែមិនមែនកម្ពុជាទេ ។ ទោះយ៉ាងណា ខ្ញុំក៏រីករាយដែរ ដែលគ្រប់គ្នាអាចញញឹម ហើយសូមឱ្យគ្រប់គ្នាមានសេចក្តីសុខរហូតទៅ ។ កុំភ្លេចញញឹមបន្តទៀត ហើយសង្ឃឹមថា គ្រប់គ្នានៅក្នុងប្រទេសនឹងអាចញញឹមតាមគ្នា» ។

ជនជាតិថៃម្នាក់ទៀតថា ៖ «នៅសុខៗ កម្ពុជាមកប្រើប្រាស់ពាក្យថា ទឹកដីនៃស្នាមញញឹម យ៉ាងព្រងើយ» ។ ជនជាតិថៃម្នាក់ទៀតថា ៖ «ទឹកដីនៃស្នាមញញឹម គឺជាឈ្មោះរបស់ប្រទេសថៃ ដែលពិភពលោកបានស្គាល់» ។ ជនជាតិថៃម្នាក់ទៀតថា ៖ «ទឹកដីនៃស្នាមញញឹម ខ្ញុំចូលចិត្តពាក្យនេះ ។ ទោះយ៉ាងណា បើស្វែងរកពាក្យនេះនៅក្នុង Google ខ្ញុំយល់ថា គឺសំដៅទៅលើប្រទេសថៃ» ៕ ប្រភព ៖ World Culture