ប្រទេសថៃ ៖ នៅថ្ងៃទី២៦ ខែតុលា ឆ្នាំ២០២៣ សារព័ត៌មានថៃឈ្មោះ Thairath បានចុះសាកសួរមតិពលរដ្ឋរស់នៅខេត្ត Uthai Thani ក្រោយពីរដ្ឋាភិបាលបានផ្លាស់ប្តូរលក្ខខណ្ឌសម្រាប់អ្នកទទួលប្រាក់១ម៉ឺនបាត ។ លក្ខខណ្ឌថ្មីនេះបានកាត់ឈ្មោះអ្នកមានទ្រព្យសម្បត្តិច្រើនចេញ ដើម្បីឱ្យចំនួនការផ្តល់ប្រាក់ និងការចំណាយប្រាក់ធ្លាក់ចុះ ខណៈរដ្ឋាភិបាលមានគម្រោងផ្តល់ប្រាក់ដល់ពលរដ្ឋពីចំនួន៥៤លាននាក់ ទៅ៥៦លាននាក់ ស្មើនឹងទឹកប្រាក់ពី៥៤ម៉ឺនលានបាត ទៅ៥៦ម៉ឺនលានបាត ។

ការកំណត់លក្ខខណ្ឌថ្មីសម្រាប់ពលរដ្ឋទទួលបានប្រាក់១ម៉ឺនបាត និងកាត់ឈ្មោះអ្នកមានប្រាក់ចំណូលខ្ពស់ចេញពីគម្រោង មានដូចជា ៖
១-កាត់ក្រុមអ្នកមានប្រាក់ខែលើស២ម៉ឺន៥ពាន់បាត ឬមានប្រាក់ក្នុងបញ្ជីធនាគារលើស ១សែនបាត (នៅសល់អ្នកមានសិទ្ធិចំនួន ៤៣លាននាក់)
២-កាត់ក្រុមអ្នកមានប្រាក់ខែលើស៥ម៉ឺនបាត ឬមានប្រាក់ក្នុងបញ្ជីធនាគារលើស ៥សែនបាត (នៅសល់អ្នកមានសិទ្ធិចំនួន ៤៩លាននាក់)
៣-ផ្តល់សិទ្ធិដល់អ្នកកាន់ប័ណ្ណសុខុមាលភាពរដ្ឋ ឬប័ណ្ណក្រីក្រ (ចំនួនពី១៥លាននាក់ ទៅ១៦លាននាក់) ។

អ្នកនាង វរ៉ាដា ថងព្រីន អាយុ២៧ឆ្នាំ ជាម្ចាស់ហាងលក់ម្ហូបអាហារនៅខេត្ត Uthai Thani និយាយថា នាងចង់ឱ្យអតិថិជនមកប្រើប្រាស់សេវាកម្មក្នុងហាងរបស់នាង ប៉ុន្តែវាអាចមានបញ្ហាផ្សេងៗតាមមក ។ នាងបារម្ភពីការបង់ពន្ធ ព្រោះកន្លងមក រដ្ឋាភិបាលមានគម្រោង «ចំណាយប្រាក់ពាក់កណ្តាលម្នាក់» ដែលតម្រូវឱ្យអតិថិជនទូទាត់ប្រាក់ត្រឹមតែពាក់កណ្តាលនៃថ្លៃទំនិញ ហាងរបស់នាងក៏បានចូលរួមក្នុងគម្រោងនេះដែរ ។ ប៉ុន្តែរដ្ឋាភិបាលបានតម្រូវឱ្យហាងនាងបង់ពន្ធរហូតដល់ជាង២ម៉ឺនបាត ក្រោយពីគម្រោងនេះបញ្ចប់ ។

អ្នកនាង វរ៉ាដា បន្តថា នាងសូមសំណូមពរឱ្យរដ្ឋាភិបាលកែសម្រួលរឿងការបង់ពន្ធតាមក្រោយសម្រាប់ហាងនានាដែលចូលរួមក្នុងគម្រោង ព្រោះហាងទាំងនោះត្រូវបង់ពន្ធខ្ពស់ឱ្យរដ្ឋាភិបាល ។ ចំណែកគម្រោងផ្តល់ប្រាក់១ម៉ឺនបាត នាងបារម្ភថា នឹងមានបញ្ហាដែរ ព្រោះអ្នកខ្លះគ្មានចំណេះដឹងក្នុងការប្រើប្រាស់ទេ ដូចជា មនុស្សចាស់អាយុច្រើនមិនយល់ពីការចាយប្រាក់នេះនៅតាមហាងនានាទេ ។ ដូច្នេះ នាងចង់ឱ្យរដ្ឋាភិបាលចែកប្រាក់ភ្ជាប់ជាមួយអត្តសញ្ញាណប័ណ្ណ ឬប្រព័ន្ធងាយស្រួលប្រើជាងនេះ ហើយពុំចាំបាច់ស្កេនតាមទូរស័ព្ទដៃទេ ព្រោះអ្នកខ្លះគ្មានទូរស័ព្ទស្មាតហ្វូន និងគ្មានអ៊ីនធើរណេត ។

ចំណែកអ្នកស្រី ស៊ុមប៊ូន ខបក្លាងឌុន អាយុ៦៤ឆ្នាំ រស់នៅខេត្ត Uthai Thani និយាយថា បើតម្រូវឱ្យគាត់ចាយប្រាក់នេះនៅជនបទប្រមាណ៤គីឡូម៉ែត្រពីផ្ទះ គឺគ្មានហាងលក់ទំនិញច្រើនទេ ប៉ុន្តែពេលនេះ រដ្ឋាភិបាលបានប្តូរឱ្យពលរដ្ឋអាចចាយប្រាក់នេះបានគ្រប់ទីកន្លែង វាជាការល្អ ព្រោះគាត់នឹងឱ្យកូនទៅទិញសម្ភារសិក្សា ។ គាត់រង់ចាំប្រាក់១ម៉ឺនបាតពីរដ្ឋាភិបាល ប៉ុន្តែបើមិនបាន គាត់ក៏មិនថាអ្វីទេ ព្រោះគាត់មិនសូវមានទំនុកចិត្តថា ពលរដ្ឋនឹងទទួលបានប្រាក់១ម៉ឺនបាត ។

រីឯអ្នកនាង វាសនា រស់នៅខេត្ត Uthai Thani និយាយថា សម្រាប់ប្រាក់១ម៉ឺនបាតដែលរដ្ឋាភិបាលសន្យាថា នឹងចែកឱ្យពលរដ្ឋនោះ មុខជាមានបញ្ហាច្រើនមិនខាន ។ បច្ចុប្បន្ន រដ្ឋាភិបាលចាប់ផ្តើមមានគោលនយោបាយកាត់លក្ខខណ្ឌផ្សេងៗចេញ មិនដូចពេលដំបូងទេ ដែលរដ្ឋាភិបាលប្រាប់ថា ពលរដ្ឋគ្រប់រូបឱ្យតែមានសញ្ជាតិថៃនឹងទទួលបានប្រាក់គ្រប់គ្នា ប៉ុន្តែដល់ពេលចែកប្រាក់ ស្រាប់តែមានលក្ខខណ្ឌផ្សេងទៀត ។ នាងគិតថា គម្រោងនេះនឹងទទួលជោគជ័យត្រឹមតែ៧០% ប៉ុណ្ណោះ ព្រោះគម្រោងបានផ្លាស់ប្តូរលក្ខខណ្ឌចែកប្រាក់រហូត ហើយធ្វើឱ្យភាពជឿជាក់របស់ពលរដ្ឋកាន់តែធ្លាក់ចុះ ៕ ប្រភព ៖ Thairath

ប្រទេសស្រីលង្កា ៖ កិច្ចសហការរវាងប្រទេសចិន និងស្រីលង្កា នៅក្រោមគំនិតផ្តួចផ្តើមខ្សែក្រវ៉ាត់ និងផ្លូវ បានជួយលើកកម្ពស់ឧស្សាហកម្មដំណាំដូងនៅប្រទេសស្រីលង្កាយ៉ាងខ្លាំង ។ ប្រទេសស្រីលង្កាបានដាំដុះដូងអស់រយៈពេលជាច្រើនឆ្នាំមកហើយ ហើយទឹកដូងស្រីលង្កា គឺជាភេសជ្ជៈមួយទទួលបានការពេញនិយមនៅទូទាំងពិភពលោក ប៉ុន្តែការដាំដូងនៅប្រទេសនេះមានកំណត់ ដោយសារកត្តាផ្សេងៗដូចជា បញ្ហាគ្រោះរាំងស្ងួតក្នុងរយៈពេលប៉ុន្មានឆ្នាំកន្លងមក ។

ហេតុនេះ ប្រទេសចិនបានជួយស្រីលង្កាឱ្យអភិវឌ្ឍន៍ផ្នែកកសិកម្ម ដោយជំរុញឱ្យកសិករស្រីលង្កាចិញ្ចឹមសត្វ, បង្កាត់ពូជសត្វ ព្រមទាំងកែច្នៃគ្រឿងទេសក្នុងតំបន់ដាំដុះ និងតំបន់នៅក្បែរគ្នា ដើម្បីឱ្យពលរដ្ឋក្នុងតំបន់មានឱកាសទទួលបានការងារធ្វើកាន់តែច្រើន ។ អ្នកជំនាញផ្នែកកសិកម្មរបស់ចិនបានណែនាំពីបច្ចេកទេសកសិកម្ម និងការប្រើប្រាស់ផ្ទៃដីឱ្យក្លាយជាប្រយោជន៍សម្រាប់កសិករក្នុងតំបន់ ហើយវាបានជួយបង្កើនតម្លៃផ្លែដូងនៅក្នុងចម្ការផងដែរ ។

Kanchana Weerasingh ជាអ្នកគ្រប់គ្រងចម្ការដូង «Kurunegala» និយាយថា បច្ចុប្បន្ន យើងបានដាំដុះដូង, ម្រេច, កាកាវ, កាហ្វេ និងដំណាំជាច្រើនមុខទៀត ហើយធ្វើឱ្យយើងទទួលបានប្រាក់ចំណេញកើនឡើងជិត២ដង ។ ពេលនេះ យើងកំពុងធ្វើការលើទីផ្សារក្នុងស្រុក និងទីផ្សារនៅក្រៅប្រទេស ។ ចម្ការដូង «Kurunegala» បានដំណើរការដោយមានការគាំទ្រពីរដ្ឋាភិបាលស្រីលង្កា និងទទួលបានកិច្ចសហការក្រោមគំនិតផ្តួចផ្តើមខ្សែក្រវ៉ាត់ និងផ្លូវរបស់ប្រទេសចិន ។

ចំណែក ភីយ៉ាក់សេណា ជាអ្នកធ្វើការក្នុងចម្ការដូងប្រាប់ថា កន្លងមក ខ្លួនធ្លាប់ធ្វើការងារបន្តិចបន្តួចនៅក្នុងភូមិ ប៉ុន្តែនៅពេលមកធ្វើការនៅក្នុងចម្ការដូងនេះ ធ្វើឱ្យខ្លួនទទួលបានប្រាក់ចំណូលកើនឡើង ។

រីឯលោក សាម៉ានគុណ និយាយថា តាមរយៈបទពិសោធន៍ជិត៣០ឆ្នាំក្នុងការរៀបចំផ្ទៃដីដាំដុះ លោកបានចូលរួមក្នុងគម្រោងបណ្តុះបណ្តាល និងអភិវឌ្ឍន៍នៅខេត្តហៃណាន ប្រទេសចិន កាលពីឆ្នាំ២០១៩ ។ ពេលនេះ លោកមានបណ្តាញជាមួយចិន ហើយលោកចង់សហការជាមួយចិនក្នុងការពង្រីកទីផ្សារបន្តទៀត ។

ក្នុងរយៈពេល១០ឆ្នាំកន្លងមក ប្រទេសចិនបានចុះហត្ថលេខាលើកិច្ចព្រមព្រៀងសហការជាង២៣០ច្បាប់ជាមួយប្រទេសជាង១៥០ ព្រមទាំងអង្គការអន្តរជាតិជាង៣០ ដើម្បីរួមគ្នាអភិវឌ្ឍន៍គុណភាពជីវិតរបស់ពលរដ្ឋរស់នៅតាមតំបន់ផ្សេងៗ ៕ ប្រភព ៖ China face

ប្រទេសចិន ៖ ចំនួនការនាំចេញផលិតផលថែរក្សាស្បែក និងគ្រឿងសម្អាងរបស់ចិនបានកើនឡើងយ៉ាងឆាប់រហ័សក្នុងអំឡុងពេល៣ត្រីមាសដំបូងនៅឆ្នាំ២០២៣ ។ ចាប់ពីខែមករា រហូតដល់ខែកញ្ញា ឆ្នាំ២០២៣ ការនាំចេញផលិតផលថែរក្សាស្បែក និងគ្រឿងសម្អាងចិនបានកើនឡើង៤៧,២៧% បើធៀបនឹងរយៈពេលដូចគ្នានៅឆ្នាំ២០២២ ។

ក្នុងឋានៈចិនជាប្រទេស១ ក្នុងចំណោម៣ប្រទេសដែលបានផលិតគ្រឿងសម្អាង ទីក្រុង Huzhou ខេត្ត Zhejiang មានតម្លៃការនាំចេញគ្រឿងសម្អាងកើនឡើង២២០,៥% បើធៀបនឹងរយៈពេល៩ខែដំបូងរបស់ឆ្នាំ២០២២ ។ រីឯឧស្សាហកម្មគ្រឿងសម្អាងនៅទូទាំងពិភពលោក កំពុងប្រឈមនឹងបញ្ហា ដូចជា ការចំណាយដើមទុនកើនឡើង និងតម្រូវការលើទីផ្សារប្រែប្រួលនៅឆ្នាំ២០២៣ ប៉ុន្តែទីក្រុង Huzhou បានព្យាយាមប្រើប្រាស់ចំណុចខ្លាំងនៃខ្សែសង្វាក់ផ្គត់ផ្គង់ ដើម្បីស្វែងរកទីផ្សារថ្មីនៅក្រៅប្រទេស ។

Li Xudong នាយករងទូទៅរបស់ក្រុមហ៊ុនគ្រឿងសម្អាងនៅទីក្រុង Huzhou លើកឡើងថា ក្រុមហ៊ុនបានរៀបចំរចនាសម្ព័ន្ធផលិតផលរបស់ខ្លួន ដើម្បីបំពេញតម្រូវការរបស់អតិថិជននៅក្រៅប្រទេស ក្នុងនោះមានផលិតផលថែរក្សាស្បែក គ្រឿងសម្អាង និងទឹកអប់ ។

Liu Wenjian នាយកក្រុមហ៊ុនផលិតសម្ភារៈប្រើប្រាស់ផ្ទាល់ខ្លួន និងឧបករណ៍សម្អាតលំនៅឋាននិយាយថា បច្ចុប្បន្ន ក្រុមហ៊ុនកំពុងវាយលុកទីផ្សារអាស៊ាន ហើយក្រុមហ៊ុនបានប្រើប្រាស់យុទ្ធសាស្ត្រស្វែងរកវត្ថុធាតុដើមក្នុងស្រុក ដើម្បីសន្សំសំចៃការចំណាយដើមទុន ។ ចំណែកការគាំទ្រវិស័យនាំចេញ ទីក្រុង Huzhou បានបង្កើតក្រុមការងារពិសេសសម្រាប់ត្រួតពិនិត្យការអនុវត្តគោលនយោបាយពាណិជ្ជកម្ម និងពន្ធក្រៅប្រទេស ។

Xie Yuequan នាយករងការិយាល័យពន្ធប្រចាំស្រុក Wuxing និយាយថា ក្នុងរយៈពេលប៉ុន្មានឆ្នាំកន្លងមកនេះ ការកែលម្អដំណើរការដកប្រាក់ពន្ធនាំចេញ និងសេវាកម្មនាំចេញបានជួយបង្កើនប្រសិទ្ធភាពដំណើរការដកប្រាក់ពន្ធនាំចេញដល់ក្រុមហ៊ុនផ្សេងៗបានយ៉ាងច្រើន ៕ ប្រភព ៖ China face

យើងបានដឹងថា អាហារសម្រាប់ជំនួយដល់សុខភាពរាងកាយមនុស្ស និងផ្តល់នូវប្រភពប្រូតេអ៊ីនខ្ពស់មានច្រើនប្រភេទ ដូចជា ទឹកដោះគោ ទឹកដោះក្របី សណ្តែកសៀង និងអាហារផ្សេងទៀត ប៉ុន្តែមានអាហារមួយប្រភេទទៀតដែលយើងនឹកស្មានពុំដល់នោះ គឺទឹកដោះកន្លាត ។ តាមការស្រាវជ្រាវបង្ហាញថា ទឹកដោះកន្លាតមានប្រូតេអ៊ីនខ្ពស់ជាងទឹកដោះក្របី រហូតដល់៣ដង ។

ក្រុមអ្នកវិទ្យាសាស្ត្រមកពីវិទ្យាស្ថាន Stem Cells and Alternative Medicine នៅប្រទេសឥណ្ឌាបានធ្វើការសិក្សាស្រាវជ្រាវ និងបោះពុម្ពផ្សាយលទ្ធផលស្រាវជ្រាវនៅក្នុងទស្សនាវដ្តីមួយឈ្មោះ The International Union of Crystallography ថា ពួកគេបានរកឃើញប្រភពប្រូតេអ៊ីន ដែលស្រដៀងគ្នានឹងទឹកដោះគោនៅក្នុងពោះសត្វកន្លាត ហើយគេដាក់ឈ្មោះថា «Diploptera Punctata» ។

ក្រុមអ្នកវិទ្យាសាស្ត្រនិយាយថា ទឹកដោះកន្លាតមានប្រូតេអ៊ីនខ្ពស់ជាងទឹកដោះក្របីរហូតដល់៣ដង ហើយវាផ្តល់នូវថាមពលខ្ពស់ដល់រាងកាយ ។ វាជាប្រភពថាមពលរបស់ប្រូតេអ៊ីន, អាស៊ីតអាមីណូ៩ប្រភេទ និងសារធាតុចិញ្ចឹមផ្សេងៗដែលអាចបំពេញដល់តម្រូវការរាងកាយរបស់មនុស្ស ថែមទាំងមានរសជាតិមិនអាក្រក់ដូចការគិតនោះទេ ។

ហេតុនេះ មុននឹងយើងទទួលបានទឹកដោះសត្វកន្លាត យើងត្រូវការកន្លាតញី និងកូនកន្លាត ប្រមាណ១.០០០ក្បាលឡើងទៅ ដើម្បីទទួលបានទឹកដោះក្នុងបរិមាណ១មីលីលីត្រ ។ នេះចាត់ទុកថា ចំនួនមានកំណត់ ហើយគេមិនអាចផលិតទឹកដោះកន្លាតដើម្បីលក់ចែកចាយនៅតាមទីផ្សារបច្ចុប្បន្នបានទេ ប៉ុន្តែវាអាចជាជម្រើសថ្មីសម្រាប់មនុស្សនាថ្ងៃអនាគត ៕ ប្រភព ៖ chiangmai news

បរទេស៖ ហាងស្រាអូស្ត្រាលីមួយកន្លែងរងការផាកពិន័យយ៉ាងច្រើន បន្ទាប់ពីផ្សព្វផ្សាយការចែកភេសជ្ជៈមិនគិតថ្លៃតាមទំហំអាវទ្រនាប់ បង្កការមិនពេញចិត្តពីសំណាក់ប្រជាពលរដ្ឋជាច្រើន។

យោងតាមការចុះផ្សាយរបស់គេហទំព័រ Daily Mail កាលពីថ្ងៃទី ២៤ ខែតុលាថា កន្លែងកម្សាន្តមួយដែលមានឈ្មោះថា “Woolshed on Hindley” នៅទីក្រុង Adelaide ភាគខាងត្បូងប្រទេសអូស្ត្រាលី ត្រូវបានពិន័យដោយអាជ្ញាធរ បន្ទាប់ពីហាងនេះបានផ្សព្វផ្សាយឱ្យអតិថិជនជាស្ត្រីដោះអាវទ្រនាប់ចេញ ដើម្បីទទួលបានភេសជ្ជៈឥតគិតថ្លៃតាមទំហំអាវ មានន័យថាបើទំហំអាវធំទទួលបានភេសជ្ជៈកែវធំ ប៉ុន្តែបើទំហំអាវតូចទទួលបានភេសជ្ជៈកែវតូច។

តាមស្លាកសញ្ញារបស់ហាងមានសរសេរថា Cup A ទទួលបានភេសជ្ជៈ ១ កែវ ភេសជ្ជៈ B ២ និងភេសជ្ជៈ ៣ C ដោយមានសារសរសេរនៅលើនោះថា «កាន់តែធំកាន់តែល្អ»។ ទោះជាយ៉ាងណាក៏ដោយ កន្លែងកម្សាន្តនោះត្រូវបានផាកពិន័យ ៣,៨៩៧ ដុល្លារ សម្រាប់ការផ្សព្វផ្សាយនោះ ព្រោះវាបានបំពានបទប្បញ្ញត្តិសម្រាប់ការផ្សព្វផ្សាយកន្លែង កម្សាន្ត។ យោងតាមអាជ្ញាធរក៏បានរកឃើញថាហាងនេះមិនមានកាមេរ៉ា CCTV ដែលអាចប្រើប្រាស់បាននោះទេ។ ដូច្នេះ ការផ្សព្វផ្សាយផ្អែកលើយេនឌ័រ រួមទាំងការផ្សព្វផ្សាយដែលប្រឆាំងនឹងមនុស្ស មិនត្រឹមតែមិនស្របតាមការរំពឹងទុករបស់សហគមន៍ប៉ុណ្ណោះទេ ប៉ុន្តែវាគឺជាការបំពាន។

គួរបញ្ជាក់ដែរថា ការផ្សព្វផ្សាយនេះត្រូវបានលុបចោលភ្លាមៗ ហើយម្ចាស់ហាងនេះក៏បានបង្ហោះសារសុំទោសជាសារធារណៈដល់មនុស្សគ្រប់គ្នា ដោយបញ្ជាក់ថា ការផ្សព្វផ្សាយនេះមិនមានចេតនារើសអើងដល់ស្ថាប័នរបស់ប្រជាពលរដ្ឋតាមមធ្យោបាយណាមួយឡើយ៕

ហុងកុង៖ កាលពីថ្ងៃអង្គារទី២៤ខែតុលានេះ សារព័ត៌មានរបស់រដ្ឋចិនបានរាយការណ៍ថា សភាជាតិរបស់ប្រទេសចិនបានបានអនុម័តច្បាប់ទាក់ទងទៅនឹងការពង្រឹងប្រព័ន្ធអប់រំទៅកាន់សាធារណៈជន ជាពិសេសគឺកុមារឲ្យមានឧត្តមគតិស្នេហាជាតិ ដើម្បីបញ្ជៀសនូវបញ្ហាមួយចំនួន ពិសេសកុំឲ្យកើតឡើងនូវប្រវត្តិសាស្រ្តច្រំដែលនៃ«លទ្ធិបដិវត្ត»របស់ចិននាសម័យមុន និងរក្សាបាននូវឯកភាពជាតិ។

យោងតាមភ្នាក់ងារសារព័ត៌មាន Xinhua បានឲ្យដឹងថា ច្បាប់អប់រំឧត្តមភាពស្នេហាជាតិនេះត្រូវបានផ្តល់ការធានាបាននូវនិតិវិធីជាតិនិយម ព្រោះថាមនុស្សមួយចំនួនបានភ្លេចនូវស្មារតីស្នេហាជាតិជាបណ្តើរៗហើយ។ ភ្នាក់ងារស៊ីហ័រក៏បានបន្តទៀតថា ច្បាប់នេះត្រូវបានតាក់តែងឡើងក្នុងគោលបំណងអប់រំឆ្ពោះទៅរកឧត្តមភាពស្នេហាជាតិ ដោយគោរពទៅនឹង ប្រវត្តិសាស្រ្តនិងវប្បធម៌ជាប្រពៃណីរបស់ប្រទេសដទៃនិងបំផុសគំនិតក្នុងការទទួលបាននូវសមិទ្ធផលដ៏អស្ចារ្យពីអរិយធម៌ផ្សេងៗផងដែរ។

យោងទៅតាម China Daily បានបញ្ជាក់ដែរថា ច្បាប់នេះបានអនុវត្តវិធានការទៅលើក្រុមមនុស្សផ្សេងៗរួមមានទាំងមន្ត្រីរាជការ កម្មករ អ្នកភូមិ កុមារ ជាពិសេសគឺរដ្ឋបាលនៅទីក្រុងហុងកុង និង ម៉ាកាវ ក៏ដូចជាតៃវ៉ាន់ជាដើម។

សូមរំលឹកផលដែរថា៖ ច្បាប់ឧត្តមគតិស្នេហាជាតិនេះគឺ ផ្តោតលើការបណ្តុះស្មារតីស្រលាញ់ជាតិទៅកាន់ប្រជាពលរដ្ឋ ជាពិសេសគឺកុមារនិង ក្រុមគ្រួសារ(ព្រោះគ្រួសារនឹងដើរតួនាទីយ៉ាងសំខាន់នៅក្នុងការអប់រំកូនចៅគេឲ្យស្រលាញ់មាតុភូមិ) ច្បាប់នេះក៏ជាការបើកចិត្តទូលាយទៅកាន់ពិភពលោក ប្រកាន់ភ្ជាប់នូវហេតុផលច្បាស់លាស់ អត់ធ្មត់ និងបើកចំហរ គោរពទៅនឹងអត្តសញ្ញាណក៏ដូចជាវប្បធម៌អរិយធម៌របស់ជាតិដទៃជាដើម។ ច្បាប់នេះនឹងដាក់ឲ្យអនុវត្តជាផ្លូវការចាប់ពីនៅថ្ងៃទី១ខែមករាឆ្នាំ២០២៤នេះតទៅ ដែលទណ្ឌកម្មសម្រាប់ដាក់ទោសក្នុងច្បាប់នេះមានដូចជា ការប្រមាថទង់ជាតិរបស់ប្រទេស ការសួរដេញដោលរករឿងវីរជននៃបក្សកម្មុនីសនិងសកម្មភាពផ្សេងៗទៀតផងដែរ៕
CAN News