ចេក គឺជាផ្លែឈើរហ័សទុំ ហើយជាទូទៅ វានឹងទុំក្នុងរយៈពេលពី២ថ្ងៃ ទៅ៣ថ្ងៃ ក្រោយពីយើងបានកាត់វាពីដើម ។ បើទុកដាក់វាមិនត្រឹមត្រូវតាមក្បួនខ្នាតនោះទេ គឺអាចធ្វើឱ្យវាឆាប់ទុំ និងរលួយស្អុយបាន ។

មនុស្សភាគច្រើនតែងជួបបញ្ហាទិញចេកមកមិនបានប៉ុន្មានថ្ងៃផង វាក៏ទុំរហូតដល់បរិភោគមិនទាន់ ហើយបើបោះចោលក៏ស្តាយ ។ តើគួររក្សាទុកផ្លែចេកតាមវិធីណាដើម្បីកុំឱ្យវាឆាប់ទុំ?

*ទុកផ្លែចេកនៅកន្លែងត្រជាក់ និងស្ងួត ៖ សីតុណ្ហភាពសមស្របសម្រាប់ទុកចេកនៅកន្លែងណាមួយ គឺចាប់ពី១៣អង្សារសេ ទៅ១៨អង្សារសេ ។ ការទុកចេកនៅកន្លែងត្រជាក់ វានឹងជួយកុំឱ្យវាឆាប់ទុំ ។

*ទុកចេកឱ្យឆ្ងាយពីពន្លឺថ្ងៃ ៖ ពន្លឺថ្ងៃ គឺជាកម្លាំងជំរុញឱ្យចេករហ័សទុំ ។ ដូច្នេះ យើងគួរតែចៀសវាងទុកចេកនៅកន្លែងណាដែលត្រូវពន្លឺថ្ងៃ ។

*រុំគល់ផ្លែចេក ៖ គល់ផ្លែចេក គឺជាកន្លែងបញ្ចេញឧស្ម័នអេទីឡែន ដែលឧស្ម័ននេះជាកម្លាំងជំរុញឱ្យចេករហ័សទុំ ។ ដូច្នេះ យើងត្រូវរុំវាដោយថង់ផ្លាស្ទិក ឬក្រដាស ដើម្បីជួយការពារមិនឱ្យឧស្ម័នអេទីឡែនចេញមកខាងក្រៅ ។

*ដាក់ចេកឱ្យនៅដាច់ដោយឡែកពីគ្នា ៖ ចេកដែលទុំហើយ វានឹងបញ្ចេញឧស្ម័នអេទីឡែនមកខាងក្រៅ ។ ហេតុនេះ ការទុកចេកទុំ និងចេកមិនទាន់ទុំឱ្យនៅជាមួយគ្នា វានឹងធ្វើឱ្យចេកផ្សេងទៀតកាន់តែឆាប់ទុំ ។ ការដាក់ចេកឱ្យនៅដាច់ដោយឡែកពីគ្នា នឹងជួយឱ្យឧស្ម័នអេទីឡែនចេញមកខាងក្រៅតិចជាងមុន ។

*ដាក់ចេកក្នុងទូរទឹកកក ៖ បើត្រូវការរក្សាទុកចេកឱ្យបានយូរថ្ងៃ យើងអាចទុកវាក្នុងទូរទឹកកកបាន ពីព្រោះសីតុណ្ហភាពក្នុងទូរទឹកកក នឹងជួយកុំឱ្យវាទុំឆាប់រហ័សពេក ។ ហេតុនេះ យើងអាចទុកវាចូលក្នុងថង់ផ្លាស្ទិក ឬឧបករណ៍បិទជិត ដើម្បីការពារមិនឱ្យចេកស្ងួត ។

ខាងក្រោមនេះ គឺជាគន្លឹះរក្សាទុកផ្លែចេកឱ្យបានយូរថ្ងៃ ៖
*ជ្រើសយកផ្លែចេកណានៅស្រគាល ៖ ចេកស្រគាលដែលមិនទាន់ទុំខ្លាំង វានឹងមិនងាយទុំជោរនោះទេ ។

*ចៀសវាងទុកចេកនៅក្បែរផ្លែឈើផ្សេងទៀត ៖ ផ្លែឈើមួយចំនួន ដូចជា ផ្លែប៉ោម, ផ្លែប័រ និងស្វាយ តែងបញ្ចេញឧស្ម័នអេទីឡែនមកខាងក្រៅ ។ ដូច្នេះ ការទុកចេកនៅក្បែរផ្លែឈើទាំងនេះ នឹងធ្វើឱ្យចេកកាន់តែឆាប់ទុំជោរ ។

*ពិនិត្យមើលចេកជារៀងរាល់ថ្ងៃ ៖ បើពិនិត្យឃើញថា ចេករបស់យើងចាប់ផ្តើមទុំហើយ យើងត្រូវប្រញាប់បរិភោគវា ឬយកវាមកធ្វើជាបង្អែម និងនំចំណីផ្សេងៗ ។

សរុបមក វិធីទាំងនេះនឹងជួយឱ្យយើងអាចរក្សាទុកផ្លែចេកបានកាន់តែយូរថ្ងៃ ហើយយើងអាចបរិភោគផ្លែចេកស្រស់ៗបានយូរផងដែរ ៕ ប្រភព ៖ sanook

ពិតណាស់ សកម្មភាព និងពាក្យសម្ដីរបស់ឪពុកម្តាយអាចជាមូលហេតុមួយដែលធ្វើឱ្យកូនកាន់តែអសមត្ថភាព។ ម្យ៉ាងវិញទៀតឪពុកម្តាយមួយចំនួនក៏តែងតែយល់ខុសចំពោះកូននូវទម្លាប់អាកប្បកិរិយាខ្លះៗ ដែលប្រៀបដូចជាការចងខ្សែសង្វាក់កូនដោយអចេតនា ក៏ដូចជាធ្វើឱ្យពួកគេធំធាត់ដោយការភ័យខ្លាច និងបាត់បង់សមត្ថភាព។ ដូច្នេះខាងក្រោមនេះគឺជារបៀបចិញ្ចឹមកូនដែលឪពុកម្តាយតែងតែយល់ខុស៖

១.បង្ខំកូនឱ្យសិក្សាមុនអាយុ៖ ជាការពិត ឪពុកម្តាយជាច្រើន តែងតែបង្ខំកូនឱ្យសិក្សា ឬបង្រៀនពួកគេមុនអាយុ ដោយសារតែមិនចង់ឱ្យយកូនខ្លួនអន់ជាងមិត្តភ័ក្តិជាដើម។ សម្រាប់កុមារ ប្រសិនបើចំណេះដឹងត្រូវបានចែកចាយលឿនពេក វានឹងធ្វើឱ្យពួកគេចុះខ្សោយបន្តិចម្តងៗ ក៏ដូចជាធ្វើឱ្យពួកគេធុញទ្រាន់ជាមួយការរៀនសូត្រ ដែលមិនមានប្រយោជន៍សម្រាប់ការអភិវឌ្ឍន៍របស់ពួកគេឡើយ។ ដូច្នេះ ក្នុងនាមជាឪពុកម្តាយ គួរតែផ្តោតលើការរៀនសូត្របំផុសគំនិត ជាជាងការដេញតាមភាពជោគជ័យ ឬបរាជ័យ។

២.ឪពុកម្តាយមិនមានទម្លាប់អានសៀវភៅទេ ដោយឱ្យកូនអានសៀវភៅម្នាក់ឯង៖ ឪពុកម្តាយដែលមិនមានទម្លាប់អាននឹងពឹងផ្អែកតែលើសភាវគតិអប់រំកូនប៉ុណ្ណោះ ដែលវាមិនល្អសម្រាប់ការលូតលាស់របស់កុមារនោះទេ។ ការអានសៀវភៅជាមួយកូនរបស់អ្នក គឺជាមធ្យោបាយដ៏ល្អមួយសម្រាប់កូនៗក្នុងការបង្ហាញចំណេះដឹងក្រៅវិសាលភាពនៃការបង្រៀននៅសាលា។ នេះក៏ជួយឱ្យកុមារអភិវឌ្ឍចំណេះដឹងចម្រុះ និងបណ្តុះបណ្តាលការគិតប្រកបដោយការរិះគន់។

៣.ក្មេងដែលលេងច្រើនក្នុងពេលរៀន៖ ឪពុកម្តាយជាច្រើនតែងមានការភ័ន្តច្រឡំ ដោយគិតថាកូនរបស់ពួកគេលេងខណៈពេលដែលកុមារផ្សេងទៀតកំពុងសិក្សា គឺធ្វើឱ្យ ចំណេះដឹងរវាងកុមារទាំងនោះនឹងពង្រីកកាន់តែច្រើនឡើង ខណៈដែលកូនខ្លួនឯងកាន់តែខ្សោយ។ ប៉ុន្តែតាមពិតទៅ ការលេងគឺជាការរៀន ក្មេងៗដែលចេះលេង ជាទូទៅមានសំណាងណាស់ ដូច្នេះអ្វីដែលមនុស្សពេញវ័យត្រូវធ្វើគឺមិនត្រូវហាមឃាត់កូនរបស់ពួកគេឱ្យឈប់លេងនោះទេ ប៉ុន្តែត្រូវមានតុល្យភាពរវាងការរៀន និងការលេងរបស់កុមារ ដោយបង្កើតលក្ខខណ្ឌដើម្បីជួយកុមារបញ្ចេញសម្ពាធ និងបំបាត់អារម្មណ៍ដែលមិនចាំបាច់។

៤.ប្រើអំពើហឹង្សាផ្លូវកាយ ឬពាក្យសម្ដីលើកុមារ៖ ឪពុកម្តាយជាច្រើនតែងតែធ្វើបាបកូនដោយអចេតនា និងចេតនា ឬប្រើពាក្យសំដីមិនគប្បី ហើយគិតថាធ្វើបែបនេះគឺល្អសម្រាប់កុមារ។ ប៉ុន្តែទង្វើទាំងនេះ គឺបានបង្កផលប៉ះពាល់យ៉ាងខ្លាំងដល់ផ្លូវកាយ និងផ្លូវចិត្តកុមារ។ កុមារតែងតែមានអារម្មណ៍ភ័យខ្លាច ហើយត្រូវនៅស្ងៀម ព្រោះពួកគេខ្សោយទាំងភាសា និងថាមពល បន្ទាប់មកពួកគេនឹងក្លាយជាមនុស្សបិទជិត គិតទុកជាមុន មិនចង់ជឿនរណាម្នាក់ អាចមានបញ្ហាអាកប្បកិរិយា និងភាសា ហើយសូម្បីតែបញ្ហាសរសៃប្រសាទក៏លេចឡើងផងដែរ។

៥.ឪពុកម្តាយចូលគេងយឺត កូនក៏ចូលគេងយឺតដែរ៖ ពេលខ្លះឪពុកម្តាយគ្មានជម្រើសអ្វីក្រៅតែពីការចូលគេងយឺត ដោយសារសម្ពាធក្នុងជីវិត ដែលនេះអាចធ្វើឱ្យកុមារងាយនឹងចម្លងតាម។ ដូច្នេះ ឪពុកម្តាយគួរតែបង្កើតទម្លាប់ចូលគេងលឿនជាមួយកូនមិនត្រឹមតែជួយឱ្យពួកគេឆ្លាតជាងមុនប៉ុណ្ណោះទេ ប៉ុន្តែថែមទាំងល្អសម្រាប់សុខភាពរបស់ពួកគេផងដែរ៕

អ្នកលេងបណ្តាញសង្គមកំពុងមិនពេញនិងរិះគន់យ៉ាងខ្លាំងទៅលើនារីម្នាក់ដែលគេសង្ស័យថាជាជនជាតិវៀតណាមហើយបានស្លៀកសំលៀកបំពាក់ថៃ កាត់តមានរូបទង់ជាតិនិងស្តេចថៃបង្ហោះនៅបណ្តាញសង្គមទិកតុកដោយដាក់ភ្លេងថៃទៀត ប៉ុន្តែការថតនោះគឺនៅលើទឹកដីប្រាសាទអង្គរវត្ត។ គេមិនដឹងថានារីនោះមានគោលបំណងនិងចេតនាអ្វីនោះទេដែលធ្វើបែបនេះ ខណៈអ្នកលេងបណ្តាញសង្គមស្នើទៅក្រសួងពិនិត្យលើករណីនេះ។

ដូចមហាជនជ្រាបមកហើយថា អាជ្ញាធរជាតិអប្សរាបានចេញលិខិតណែនាំក្នុងគោលបំណងបញ្ចៀសនូវកំហុសឆ្គងដោយអចេតនាកើតចេញពីការផ្សព្វផ្សាយ និងអាចធ្វើឱ្យប៉ះពាល់គុណតម្លៃនៃប្រាសាទបុរាណមរតកមិនអាចកាត់ថ្លៃបានភ្ញៀវទេសចរជាតិ-អន្តរជាតិ និងសាធារណជនទាំងអស់តម្រូវឱ្យដាក់ពាក្យស្នើសុំមកអាជ្ញាធរជាតិអប្សរាចំពោះគោលបំណងមួយចំនួនដូចជា ការថតរូបភាព ថតភាពយន្ត ឬវីដេអូ ក្នុងគោលបំណងផ្សព្វផ្សាយពាណិជ្ជកម្ម ផលិតផល ឬបង្កើត អាជីវកម្មនានា។ ការប្រកបអាជីវកម្មថតសម្លៀកបំពាក់ប្រពៃណីបុរាណ (ថតរូបមុនអាពាហ៍ពិពាហ៍) ជាដើមត្រូវដាក់លិខិតអនុញ្ញាតជាមុនសិន។ ដោយឡែកសម្រាប់ការថតរូបភាពឬវីដេអូក្នុងគោលបំណងសម្រាប់ចងក្រងជាអនុស្សាវរីយ៍ផ្ទាល់ខ្លួន ឬលក្ខណៈទេសចរណ៍ពុំចាំបាច់សុំលិខិតអនុញ្ញាតជាមុននោះទេ។

ទោះយ៉ាងណាក៏ដោយ នាពេលថ្មីៗនេះមហាជនអ្នកលេងបណ្តាញសង្គមទាំងហ្វេកប៊ុក និងទិកតុកបង្ហាញជាចង្ងល់ និងរិះគន់យ៉ាងខ្លាំងទៅលើនារីម្នាក់ដែលថតនៅប្រាសាទខ្មែរប៉ុន្តែធ្វើទង្វើមិនសមទំនងយ៉ាងនេះទៅវិញ។ នារីរូបនោះត្រូវបានគេសង្ស័យថាជាជនជាតិវៀតណាម បានស្លៀកសំលៀកបំពាក់ប្រពៃណីថៃ ថតនៅប្រាសាទអង្គរវត្ត ដោយកាត់តដាក់រូបទង់ជាតិថៃ ស្តេចថៃ និងដាក់បទចម្រៀងថៃទៅវិញដោយគេមិនដឹងថានារីរូបនោះមានគោលបំណង និងចេតនាអ្វីនោះទេបានជាធ្វើបែបនេះ។

អ្នកលេងបណ្តាញសង្គមជាច្រើនបានប្រមូលគ្នា Report គណនីទិកតុកនោះនិងបានបញ្ចេញមតិរិះគន់យ៉ាងខ្លាំងនូវទង្វើរបស់នាងធ្វើដាក់កម្ពុជាបែបនេះទាំងដឹងថាប្រាសាទអង្គរវត្តជារបស់ខ្មែរ តែធ្វើយ៉ាងនេះទៅវិញ។ ជាមួយគ្នានេះដែរ ពលរដ្ឋកំពុងបង្ហាញចង្ងល់ ដូចគ្នាតើការស្លៀកឈុតបុរាណថៃថតនៅប្រាសាទខ្មែរមានទទួលបានការអនុញ្ញាតិពីអាជ្ញាធរជាតិអប្សរាហើយឬនៅ? តើការថតនេះស្ថិតក្នុងលក្ខខណ្ឌបែបណាដែរ ដោយពលរដ្ឋបានស្នើទៅក្រសួងពាក់ព័ន្ធជួយពិនិត្យមើលលើករណីនេះ៕