បរទេស៖ ប្រទេសជប៉ុនបានកែច្នៃកាកសំណល់អេឡិចត្រូនិចដូចជា ទូរស័ព្ទដៃខូចៗចំនួន ១០,០០០ គ្រឿងទៅជាមាសប្រហែល ២៨០ក្រាម ដែលមានប្រសិទ្ធភាពជាងការជីកយករ៉ែនៅក្នុងព្រៃ ៥៦ ដង។

យោងតាមគេហទំព័រ Nikkei Asia ដែលបានចុះផ្សាយនៅថ្ងៃទី១២ ខែវិច្ឆិកាថា ប្រទេសជប៉ុនមានធនធានធម្មជាតិតិចតួចណាស់ ប៉ុន្តែគឺជាទីផ្សារដ៏មានសក្តានុពលបំផុតមួយសម្រាប់ការជីកយករ៉ែលោហៈក្នុងទីក្រុង មានន័យថាជប៉ុនបានកែច្នៃកាកសំណល់លោហៈកម្រចេញពីបន្ទះសៀគ្វីអេឡិចត្រូនិចទៅជារ៉ែមាស។

យោងតាមក្រសួងបរិស្ថានជប៉ុន បានឱ្យដឹងថា រាល់ទូរស័ព្ទ ១០,០០០ គ្រឿងអាចផ្តល់ទិន្នផលមាសប្រហែល ២៨០ ក្រាម។ ដូច្នេះ ការជីកយករ៉ែមាសពីកាកសំណល់អេឡិចត្រូនិចមានប្រសិទ្ធភាពជាងការជីកយករ៉ែមាសពីធម្មជាតិដល់ទៅ ៥៦ ដង។ នេះបើតាមរោងចក្រ Tanaka Kikinzoku Kogyo ក្នុងទីក្រុង Hiratsuka បានធ្វើការរំលាយសំណល់អេតចាយដែលជាគ្រឿងអេឡិចត្រូនិចនិងទូរស័ព្ទដៃខូចៗ ដើម្បីយកមាសមកធ្វើជាដុំមូល ឬជាគ្រាប់មូល។

លោក Akio Nagaoka ប្រធានមជ្ឈមណ្ឌលនេះបាននិយាយថា “យើងចង់ពង្រីកការប្រមូលសំណល់អេឡិកត្រូនិកមិនត្រឹមតែនៅក្នុងប្រទេសជប៉ុនប៉ុណ្ណោះទេ ថែមទាំងនៅទូទាំងអាស៊ីអាគ្នេយ៍ផងដែរ ដែលជាតម្រូវការសម្រាប់ការកែច្នៃឡើងវិញនូវគ្រឿងអេឡិចត្រូនិកកំពុងកើនឡើង។
បច្ចុប្បន្ន ទិន្នផលនៃការជីកយករ៉ែ ក៏ដូចជាការកំណត់គោលដៅរុករករ៉ែមាសពីស្មាតហ្វូន ឬគ្រឿងប្រើប្រាស់ក្នុងផ្ទះចាស់ៗ និងសំណល់អេតចាយផ្សេងទៀតកំពុងក្លាយជារឿងសំខាន់។ ដូច្នេះ អាជីវកម្មមួយចំនួនកំពុងពង្រីកការប្រមូល និងសមត្ថភាពកែច្នៃលោហៈក្នុងទីក្រុង ដើម្បីបំពេញតម្រូវការដែលកំពុងកើនឡើង។

ហេតុនេះហើយ ទើបវិទ្យាស្ថានជប៉ុនសម្រាប់ការរចនាប្រកបដោយនិរន្តរភាពបានប៉ាន់ប្រមាណថាមាសប្រហែល ៥,៣០០ តោនបានប្រមូលផ្តុំនៅក្នុងប្រទេសជប៉ុន ស្មើនឹង ១០% នៃទុនបម្រុងពិភពលោក។ បច្ចុប្បន្នរដ្ឋាភិបាលរបស់ប្រទេសនេះកំពុងជំរុញការកែច្នៃឡើងវិញនូវមាស និងលោហៈដ៏មានតម្លៃផ្សេងទៀតនៅក្នុងបន្ទះសៀគ្វីរថយន្តអគ្គិសនី ដើម្បីបង្កើនសន្តិសុខសេដ្ឋកិច្ច៕

ប្រទេសឡាវ ៖ លោក Khamjan Wongposi រដ្ឋមន្ត្រីក្រសួងផែនការ និងការវិនិយោគប្រទេសឡាវបានរាយការណ៍ក្នុងកិច្ចប្រជុំទូទៅ លើកទី៦ របស់រដ្ឋសភានីតិកាលទី៩ អំពីប្រធានបទ «ការអនុវត្តផែនការអភិវឌ្ឍសេដ្ឋកិច្ច និងសង្គម ប្រចាំឆ្នាំ២០២៣ និងត្រៀមផែនការទិសដៅសម្រាប់ឆ្នាំ២០២៤» ថា ការរីកចម្រើនយ៉ាងរឹងមាំក្នុងផ្នែកសេវាកម្ម នៅតែជាកត្តាសំខាន់ដើម្បីជំរុញការរីកចម្រើនសេដ្ឋកិច្ចរបស់ឡាវនៅឆ្នាំ២០២៣ និងឆ្នាំ២០២៤ ។ ប្រទេសឡាវរំពឹងថា សេដ្ឋកិច្ចឡាវនឹងស្មើ៤,២% នៅឆ្នាំ២០២៣ និងស្មើ៤,៥% នៅឆ្នាំ២០២៤ ។

ទោះយ៉ាងណា អត្រាការរីកលូតលាស់ដែលប្រទេសឡាវរំពឹងទុកថា ស្មើនឹង៤,២% គឺទាបជាងគោលដៅដែលឡាវបានកំណត់ស្មើរហូតដល់៤,៥% ក្នុងផែនការអភិវឌ្ឍប្រចាំឆ្នាំ២០២៣ ។ ការកើនឡើងនៃថ្លៃដើមផលិតកម្ម និងគ្រោះរាំងស្ងួត បានប៉ះពាល់ដល់ការផលិតថាមពលវារីអគ្គិសនី ដែលជាកត្តាសំខាន់ធ្វើឱ្យអត្រាការលូតលាស់ធ្លាក់ចុះនៅឆ្នាំ២០២៣ ។

ចំណែកអាជីវកម្មលក់ដុំ និងលក់រាយ ការដឹកជញ្ជូន និងសេវាកម្មពាក់ព័ន្ធជាមួយវិស័យទេសចរណ៍ប្រទេសឡាវ គឺចាត់ទុកថា ជាអាជីវកម្មមានដំណើរការល្អបំផុត ។ វិស័យនេះបានកើនឡើង៥,៦% និងមានភាពលេចធ្លោបំផុតទាក់ទងនឹងការរួមចំណែកជាមួយផលិតផលក្នុងស្រុកសរុប (GDP) ស្មើនឹង៣៧,២% ។ បន្ទាប់មក គឺផ្នែកពន្ធ និងគយ, ឧស្សាហកម្ម រួមទាំងកសិកម្ម និងព្រៃឈើ បានកើនឡើង៣,៩%, ៣,៥% និង៣,៤% តាមលំដាប់ ។

លោក Khamjan Wongposi រដ្ឋមន្ត្រីក្រសួងផែនការ និងការវិនិយោគឡាវបានសង្កត់ធ្ងន់អំពីភាពចាំបាច់ក្នុងការរក្សាស្ថេរភាពនយោបាយ និងសណ្តាប់ធ្នាប់សង្គម ដើម្បីឱ្យមានទំនុកចិត្តលើការងារសំខាន់ៗដែលប្រទេសឡាវនឹងទទួលបានជោគជ័យ និងជំរុញផ្នែកសេវាកម្មឱ្យសម្រេចតាមគោលដៅការលូតលាស់នៅឆ្នាំ២០២៤ ផងដែរ ។

នៅឆ្នាំ២០២៤ ប្រទេសឡាវរំពឹងថា ផ្នែកឧស្សាហកម្មនឹងកើនឡើងខ្ពស់បំផុតរហូតដល់៥% បន្ទាប់មក គឺផ្នែកសេវាកម្មនឹងកើនឡើង៤,៨%, ផ្នែកពន្ធ និងគយ នឹងកើនឡើង៣,៩% ហើយផ្នែកកសិកម្មនឹងកើនឡើង២,៦% ខណៈពលរដ្ឋឡាវម្នាក់មានប្រាក់ចំណូលជាមធ្យមចំនួន១.៧៨៧ដុល្លារអាមេរិកក្នុង១ឆ្នាំ ។

ក្រៅពីនេះ រដ្ឋាភិបាលឡាវបានប្រកាសពីគោលដៅថា នឹងកាត់បន្ថយអត្រាអតិផរណានៅឆ្នាំ២០២៤ ក្រោយពីអត្រាអតិផរណាមានកម្រិតខ្ពស់បំផុតអស់រយៈពេលជាច្រើនឆ្នាំ ។ អត្រាអតិផរណាបច្ចុប្បន្ន មាននិន្នាការធ្លាក់ចុះពី៤១,២៦% នៅខែកុម្ភៈ មកស្មើត្រឹមតែ២៥,៦៩% នៅខែកញ្ញា ឆ្នាំ២០២៣ ៕ ប្រភព ៖ AEC connect

បរទេស៖ អាជ្ញាធរអ៊ីស្លង់បានជម្លៀសមនុស្សរាប់ពាន់នាក់ពេញមួយយប់ ដើម្បីចាកចេញពីទីក្រុងមួយ បន្ទាប់ពីមានការរញ្ជួយដីរាប់រយត្រូវបានកត់ត្រា ដែលបង្កឱ្យមានភាពភ័យខ្លាចនៃការផ្ទុះភ្នំភ្លើង។

យោងតាមគេហទំព័រ Euro News ដែលបានចុះផ្សាយកាលពីថ្ងៃទី១២ ខែវិច្ឆិកាថា ថ្មីៗនេះមន្ត្រីអ៊ីស្លង់បានប្រកាសដាក់ប្រទេសក្នុងភាពអាសន្ននៅលើឧបទ្វីប Reykjanes នៃភាគនិរតី បន្ទាប់ពីបានកត់ត្រាការរញ្ជួយដីភូមិសាស្ត្រសំខាន់ៗប្រហែល ៥០០ ចាប់ពីយប់ថ្ងៃទី ១០ ដល់ព្រឹកថ្ងៃទី ១១ ខែវិច្ឆិកា ដែលនេះអាចជាសញ្ញានៃការផ្ទុះកម្អែលភ្នំភ្លើងនៅតំបន់ Sundhnjukagigar នៃឧបទ្វីប។

ដូច្នេះ ប្រជាជនប្រហែល ៤,០០០ ត្រូវបានបញ្ជាឱ្យជម្លៀសចេញពេញមួយយប់ ពីទីក្រុង Grindavik ចម្ងាយប្រហែល ៤០ គីឡូម៉ែត្រភាគនិរតីនៃរដ្ឋធានី Reykjavik ។ ហេតុនេះហើយ រមណីយដ្ឋាន និងទេសចរណ៍ Blue Lagoon ក្នុងតំបន់នេះត្រូវបានបិទតាំងពីដើមសប្តាហ៍ ដើម្បីជៀសវាងហានិភ័យ។ រោងចក្រថាមពលកំដៅក្នុងផែនដី Svartsengi ដែលជាកន្លែងផ្គត់ផ្គង់អគ្គិសនី និងទឹកសំខាន់សម្រាប់អ្នកស្រុកប្រហែល ៣០,០០០ នាក់នៅលើឧបទ្វីប Reykjanes ក៏ត្រូវបានបិទមួយរយៈផងដែរ។

អ៊ីស្លង់ គឺជាប្រទេសដែលមានភ្នំភ្លើងសកម្មបំផុតនៅអឺរ៉ុប នឹងមានទីតាំងត្រួតពិនិត្យសរុបចំនួន ៣៣។ អ្នកជំនាញបាននិយាយថា បរិមាណកម្អែភ្នំភ្លើងដែលបង្ខំដោយបន្ទះភូគព្ភសាស្ត្របាននឹងកំពុងប្រមូលផ្តុំនៅជម្រៅ ៥ គីឡូម៉ែត្រក្នុងរយៈពេលប៉ុន្មានថ្ងៃកន្លងមកនេះ។ នៅយប់ថ្ងៃទី ១០ ខែវិច្ឆិកា សកម្មភាពភូគព្ភសាស្ត្របានកើតឡើងកាន់តែកៀកទៅនឹងដី ហើយកម្អែលភ្នំភ្លើងបានចាប់ផ្តើមផ្លាស់ទីបញ្ឈរ ដោយបង្រួមលើផ្ទៃផែនដី ក្នុងតំបន់រវាង Sundhnjukagigar និង Grindavik ។

យោងតាមមន្ត្រីអ៊ីស្លង់បានព្យាករណ៍ថា ការផ្ទុះកម្អែភ្នំភ្លើងនៅលើឧបទ្វីប Reykjanes អាចនឹងកើតឡើង “នៅប៉ុន្មានថ្ងៃខាងមុខ”។ ដូច្នេះ អ្នកស្រុក Grindavik ត្រូវបានជម្លៀសចេញពេញមួយយប់ បន្ទាប់ពីមន្ត្រីអ៊ីស្លង់បានវាយតម្លៃថា កម្អែលភ្នំភ្លើងអាចនឹងរំកិលចុះក្រោមទៅលើផ្ទៃដី។
គួរបញ្ជាក់ដែរថា ឧបទ្វីប Reykjanes មានការផ្ទុះភ្នំភ្លើងចំនួនបីនៅ Fagradalsfjall ក្នុងខែមីនា ឆ្នាំ ២០២១ និងខែសីហា ឆ្នាំ ២០២២ រួមទាំងខែកក្កដា ឆ្នាំ ២០២៣ ។ ទោះជាយ៉ាងណា ឧប្បត្តិហេតុទាំងបីនេះបានកើតឡើងនៅក្នុងតំបន់ឆ្ងាយពីហេដ្ឋារចនាសម្ព័ន្ធសេដ្ឋកិច្ច និងតំបន់លំនៅដ្ឋាន៕

ប្រទេសថៃ ៖ កាលពីថ្ងៃទី១២ ខែវិច្ឆិកា ឆ្នាំ២០២៣ នៅអាកាសយានដ្ឋានសុវណ្ណភូមិប្រទេសថៃ មុនពេលធ្វើដំណើរទៅចូលរួមកិច្ចប្រជុំមេដឹកនាំសេដ្ឋកិច្ច APEC លើកទី៣០ (2023 APEC Economic Leaders’ Meeting) នៅទីក្រុងសាន់ហ្វ្រែនស៊ីស្កូ រដ្ឋកាលីហ្វ័រញ៉ា សហរដ្ឋអាមេរិក លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានធ្វើជាប្រធានកិច្ចប្រជុំជាមួយស្ថាប័នពាក់ព័ន្ធអំពីប្រធានបទ ៖ «ការនាំចូលសាច់ជ្រូកខុសច្បាប់ និងវិធានការការពារសុវត្ថិភាពភ្ញៀវទេសចរនៅប្រទេសថៃ» ។

លោក សេដ្ឋា ថាវីស៊ីន នាយករដ្ឋមន្ត្រីថៃបានពិភាក្សាអំពីវិធានការការពារសុវត្ថិភាពភ្ញៀវទេសចរជាមួយនាយកគ្រប់គ្រងអាជ្ញាធរទេសចរណ៍ថៃ, មេបញ្ជាការប៉ូលិសស៊ើបអង្កេតកណ្តាល, មេបញ្ជាការប៉ូលិសទេសចរណ៍ និងការិយាល័យប៉ូលិសអន្តោប្រវេសន៍ ក្នុងនោះលោកនាយករដ្ឋមន្ត្រីថៃបានបញ្ជាឱ្យប៉ូលិសទេសចរណ៍ និងអាជ្ញាធរទេសចរណ៍ថៃ ខិតខំបង្កើនទំនុកចិត្តដល់ភ្ញៀវទេសចរដែលមកកម្សាន្តនៅប្រទេសថៃ ក្នុងអំឡុងពេលចុងឆ្នាំ២០២៣ ។

ចំណែកភ្ញៀវទេសចរចិន ក្រសួងទេសចរណ៍ និងកីឡា ព្រមទាំងអាជ្ញាធរទេសចរណ៍ថៃ នឹងជជែកពិភាក្សាជាមួយស្ថានទូតចិន នៅថ្ងៃទី១៥ ខែវិច្ឆិកា ឆ្នាំ២០២៣ ដើម្បីបង្កើតគម្រោងយាមល្បាត ព្រមទាំងបញ្ជូនប៉ូលិសមកពីប្រទេសចិនមកកាន់ប្រទេសថៃ ដើម្បីមកប្រចាំការនៅតាមទីក្រុងទេសចរណ៍ធំៗ ។ គម្រោងនេះធ្លាប់បានអនុវត្តនៅតំបន់អឺរ៉ុបរួចហើយ ដូចជា ប្រទេសអ៊ីតាលី ។ ហេតុនេះ ប្រទេសថៃនឹងត្រៀមខ្លួនលើកកម្ពស់សុវត្ថិភាព ដើម្បីបង្កើតទំនុកចិត្តដល់ភ្ញៀវទេសចរចិនឱ្យបានច្រើន ។

ក្រៅពីនេះ ប្រទេសថៃនឹងចាត់វិធានការពាក់ព័ន្ធនឹងការដាក់អាវុ.ធតាមខ្លួនផងដែរ ខណៈប្រទេសថៃធ្លាប់ជួបហេតុការណ៍ផ្ទុះអាវុ.ធជាច្រើនលើកនាពេលកន្លងមក ។ ការចាត់វិធានការគ្រប់គ្រងអាវុ.ធនឹងធ្វើឱ្យភ្ញៀវទេសចរបរទេសអស់បារម្ភ ហើយថៃត្រូវការឱ្យប៉ូលិសចិនមើលឃើញពីការបំពេញការងាររបស់ថៃថា ថៃបានការពារសុវត្ថិភាពបែបណាខ្លះសម្រាប់ភ្ញៀវទេសចរបរទេស ។

វិធានការការពារសុវត្ថិភាពនៅប្រទេសថៃ មេបញ្ជាការប៉ូលិសស៊ើបអង្កេតកណ្តាល និងមេបញ្ជាការប៉ូលិសទេសចរណ៍ នឹងសហការការងារជាមួយអាជ្ញាធរទេសចរណ៍ថៃ ព្រមទាំងក្រសួងទេសចរណ៍ និងកីឡា ក្នុងនោះប្រទេសថៃនឹងយកប៉ូលិសពីប្រទេសចិនមកជួយយាមល្បាតនៅតាមទីក្រុងទេសចរណ៍ធំៗ និងតូចៗ គឺដូចគ្នានឹងប្រទេសអ៊ីតាលី ដែលធ្លាប់អនុវត្តបានជោគជ័យនាពេលកន្លងមក ។

ទោះយ៉ាងណា គេមិនទាន់ដឹងព័ត៌មានលម្អិតអំពីគម្រោងនេះទេ ប៉ុន្តែគេសង្ឃឹមថា វានឹងបង្កើនសុវត្ថិភាពដល់ភ្ញៀវទេសចរបរទេសដែលមកកម្សាន្តនៅប្រទេសថៃ ។ ម្យ៉ាងទៀត គម្រោងនេះនឹងជួយបង្កើនតួលេខភ្ញៀវទេសចរចិនក្នុងរយៈពេល២ខែនៃឆ្នាំ២០២៣ ឱ្យស្របតាមគោលដៅដែលថៃកំណត់ថា នឹងទទួលបានភ្ញៀវទេសចរចិនជាង៤លាននាក់ ។

លោក សេដ្ឋា ថាវីស៊ីន នាយករដ្ឋមន្ត្រីថៃបញ្ជាក់ថា ហេតុផលចម្បងដែលថៃចង់ឱ្យប៉ូលិសចិនចូលមកប្រទេសថៃនោះ ព្រោះយើងចង់ឱ្យប៉ូលិសចិនមើលឃើញពីការបំពេញការងាររបស់ប្រទេសថៃថា យើងបង្កើនសុវត្ថិភាពបានកម្រិតណា ។ ហេតុនេះ ប៉ូលិសចិននឹងធ្វើជាអ្នកនាំពាក្យប្រាប់ទៅភ្ញៀវទេសចរចិន ព្រោះជនជាតិចិនខ្លាចប៉ូលិសខ្លាំងណាស់ ។ ប្រសិនបើប៉ូលិសចិនមកប្រទេសថៃ វានឹងជាការបង្កើតទំនុកចិត្តដល់ប្រទេសថៃ និងភ្ញៀវទេសចរចិនមួយកម្រិតទៀត ៕ ប្រភព ៖ nation

បរទេស៖ អ្នកគាំទ្រស្តាំនិយមរាប់ពាន់នាក់បានដើរដង្ហែក្នុងទីក្រុង Warsaw ដោយអំពាវនាវឱ្យប្រទេសប៉ូឡូញត្រៀមខ្លួនចាកចេញពីសហភាពអឺរ៉ុប បន្ទាប់ពីក្រុមប្រឆាំងដែលគាំទ្រសហភាពអឺរ៉ុបបានឈ្នះការបោះឆ្នោតនីតិបញ្ញត្តិ។
យោងតាមគេហទំព័រ France 24 ដែលបានរាយការណ៍នៅថ្ងៃទី ១១ ខែវិច្ឆិកាថា មានមនុស្សប្រហែល ៤០,០០០ នាក់បានកាន់ទង់ជាតិប៉ូឡូញរួចស្រែកឱ្យប្រទេសនេះចាកចេញពីសហភាពអឺរ៉ុប ខណៈដែលប្រព័ន្ធផ្សព្វផ្សាយមួយចំនួនបានប៉ាន់ស្មានថាមនុស្សដែលចូលរួមក្នុងការដង្ហែក្បួននេះមាន ៩០,០០០ នាក់។

លោក Marcin Kowalski មេដឹកនាំក្រុមស្តាំនិយម (All-Polishi Youth) បាននិយាយថា “ប្រសិនបើសន្ធិសញ្ញាអឺរ៉ុបផ្លាស់ប្តូរ ប៉ូឡូញត្រូវតែត្រៀមខ្លួនជាស្រេចដើម្បីចាកចេញពី EU”។ លោកក៏បានព្រមានទៀតថាការផ្លាស់ប្តូរនឹងប្រែក្លាយសហភាពអឺរ៉ុបឱ្យទៅជា “សមូហភាពសហព័ន្ធនិយមអឺរ៉ុប” ដែលដឹកនាំដោយគណៈកម្មការអឺរ៉ុប។
ព្រឹត្តិការណ៍នេះបានកើតឡើងតិចជាងមួយខែបន្ទាប់ពី ប្រទេសប៉ូឡូញ បានរៀបចំការបោះឆ្នោតសភា ដោយគណបក្សស្តាំនិយម និងយុត្តិធម៌ (PiS) ដែលកំពុងកាន់អំណាច ទទួលបានសំឡេងគាំទ្រច្រើនជាងគេ ប៉ុន្តែមិនមានអាសនៈគ្រប់គ្រាន់ដើម្បីបង្កើតរដ្ឋាភិបាលទេ។

ទន្ទឹមនឹងនេះ សម្ព័ន្ធ Civic Coalition (CC) ដែលជាគណបក្សឆ្វេងនិយមរបស់អតីតមេដឹកនាំ Donald Tusk បានបញ្ចប់ក្នុងចំណាត់ថ្នាក់លេខ ២ នឹងបានរួមបញ្ចូលគ្នាជាមួយគណបក្សកណ្តាលនិយមដើម្បីទទួលបានអាសនៈចំនួន ២៤៨ ក្នុងចំណោមអាសនៈសភាសរុបចំនួន ៤៦០ ។ ទោះជាយ៉ាងណាក៏ដោយ បក្សស្តាំនិយមជឿថាលទ្ធផលបោះឆ្នោតនឹងធ្វើឱ្យឯករាជ្យភាពរបស់ប៉ូឡូញចុះខ្សោយ។

គួរបញ្ជាក់ដែរថា បច្ចុប្បន្នសភាអឺរ៉ុបកំពុងពិចារណាលើការផ្លាស់ប្តូរច្រើនជាង ២០០ លើសន្ធិសញ្ញាសហភាពអឺរ៉ុប ដែលមួយចំនួនរួមមានធាតុចម្រូងចម្រាស ដូចជាការដកសិទ្ធិវេតូរបស់រដ្ឋជាសមាជិក និងការផ្ដល់អំណាចធ្វើសេចក្តីសម្រេចគោលនយោបាយបន្ថែមទៀតនៅក្នុងវិស័យមួយចំនួនសម្រាប់ស្ថាប័នសហភាពអឺរ៉ុប៕