យោងតាមគេហទំព័រ careeraddict.com ដែលជាអ្នកផ្តល់សេវាព័ត៌មានអាជីពតាមអ៊ីនធឺណែត បានបង្ហាញព័ត៌មានដ៏គួរឱ្យចាប់អារម្មណ៍មួយទាក់ទងទៅនឹងប្រាក់ឈ្នួលរបស់ប្រជាជនម្នាក់ៗនៅលើពិភពលោក ដោយក្នុងនោះគេរកឃើញមានតែប្រទេសចំនួន ១៣ ប៉ុណ្ណោះដែលមានប្រាក់ឈ្នួលជាមធ្យមខ្ពស់បំផុតក្នុងឆ្នាំ ២០២៣ នេះបើយោងតាមទិន្នន័យចុងក្រោយដែលចងក្រងដោយធនាគារពិភពលោក (World Bank)។ ដូច្នេះ ខាងក្រោមនេះគឺជាប្រទេសទាំង ១៣ ដែលមានប្រាក់ឈ្នួលខ្ពស់បំផុតនៅលើពិភពលោក៖

១.ប្រទេសលុចសំបួ (Luxembourg)៖ លុចសំបួរ គឺជាប្រទេសដែលមានប្រាក់ខែជាមធ្យមប្រមាណជាង ៥,២០០ ដុល្លារអាមេរិកក្នុងម្នាក់។

២.ប្រទេសស្វីស (Switzerland)៖ ស្វីស មានប្រាក់ខែជាមធ្យមប្រមាណជាង ៤,៩០០ ដុល្លារអាមេរិកក្នុងម្នាក់។

៣.ប្រទេសន័រវេស (Norway)៖ ន័រវេស មានប្រាក់ខែជាមធ្យមប្រមាណជាង ៤,១០០ ដុល្លារអាមេរិកក្នុងម្នាក់។

៤.សហរដ្ឋអាមេរិក (USA)៖ សហរដ្ឋអាមេរិក មានប្រាក់ខែជាមធ្យមប្រមាណជាង ៤,១០០ ដុល្លារអាមេរិកក្នុងម្នាក់។

៥.ប្រទេសដាណឺម៉ាក (Denmark)៖ ដាណឺម៉ាក មានប្រាក់ខែជាមធ្យមប្រមាណជាង ៤,០០០ ដុល្លារអាមេរិកក្នុងម្នាក់។

៦.ប្រទេសអ៊ីស្លង់ (Iceland)៖ អ៊ីស្លង់ មានប្រាក់ខែជាមធ្យមប្រមាណជាង ៣,៤០០ ដុល្លារអាមេរិកក្នុងម្នាក់។

៧.ប្រទេសស៊ុយអែត (Sweden)៖ ស៊ុយអែត មានប្រាក់ខែជាមធ្យមប្រមាណជាង ៣,៤០០ ដុល្លារអាមេរិកក្នុងម្នាក់។

៨.ប្រទេសហូឡង់ (Netherlands)៖ ហូឡង់ មានប្រាក់ខែជាមធ្យមប្រមាណជាង ៣,២០០ ដុល្លារអាមេរិកក្នុងម្នាក់។

៩.ប្រទេសសិង្ហបុរី (Singapore)៖ សិង្ហបុរី មានប្រាក់ខែជាមធ្យមប្រមាណជាង ៣,២០០ ដុល្លារអាមេរិកក្នុងម្នាក់។

១០.ប្រទេសអៀរឡង់ (Ireland)៖ អៀរឡង់ មានប្រាក់ខែជាមធ្យមប្រមាណជាង ៣,២០០ ដុល្លារអាមេរិកក្នុងម្នាក់។

១១.ប្រទេសអូស្ត្រាលី (Australia)៖ អូស្ត្រាលី មានប្រាក់ខែជាមធ្យមប្រមាណជាង ៣,០០០ ដុល្លារអាមេរិកក្នុងម្នាក់។

១២.ប្រទេសហ្វាំងឡង់ (Finland)៖ ហ្វាំងឡង់ មានប្រាក់ខែជាមធ្យមប្រមាណជាង ៣,០០០ ដុល្លារអាមេរិកក្នុងម្នាក់។

១៣.ប្រទេសកាតា (Qatar)៖ កាតា គឺជាប្រទេសដែលមានប្រាក់ខែជាមធ្យមប្រមាណជាង ៣,០០០ ដុល្លារអាមេរិកក្នុងម្នាក់៕

ប្រទេសថៃ ៖ ក្រោយកើតហេតុការណ៍បា.ញ់ប្រហា.រនៅ Siam Paragon ស្ថិតក្នុងទីក្រុងបាងកក ប្រទេសថៃ កាលពីថ្ងៃទី៣ ខែតុលា ឆ្នាំ២០២៣ ដែលបង្កឡើងដោយក្មេងប្រុសម្នាក់អាយុ១៤ឆ្នាំ បានធ្វើឱ្យប៉ះពាល់ដល់វិស័យទេសចរណ៍នៅប្រទេសថៃ ជាពិសេស ភ្ញៀវទេសចរចិន ។ ចំណែកបណ្តាក្រុមហ៊ុន និងអ្នកប្រកបអាជីវកម្មពាក់ព័ន្ធនឹងវិស័យទេសចរណ៍នៅខេត្តភាគខាងត្បូងប្រទេសថៃ បានលើកឡើងពីចំនួនភ្ញៀវទេសចរចិនធ្លាក់ចុះ ។

គេសង្កេតឃើញថា នៅរដូវកាលទេសចរណ៍នេះ ក្រុមភ្ញៀវទេសចរបរទេសបានធ្វើដំណើរមកកាន់ខេត្តត្រាងចាប់ផ្តើមអ៊ូអរ ប៉ុន្តែបើពិនិត្យមើលឱ្យស៊ីជម្រៅឃើញថា ចំនួនភ្ញៀវទេសចរចិនបានធ្លាក់ចុះជាបន្តបន្ទាប់ ។ បុគ្គលិកក្រុមហ៊ុនទេសចរណ៍នៅខេត្តត្រាងឱ្យដឹងថា មុននេះ មានអតិថិជនចិនជាច្រើននាក់បានកក់បន្ទប់ស្នាក់នៅ និងកក់ការធ្វើដំណើរមកប្រទេសថៃ តាមរយៈក្រុមហ៊ុនរបស់ខ្លួនដើម្បីមកលេងនៅខេត្តត្រាង ។

បុគ្គលិកក្រុមហ៊ុនទេសចរណ៍នៅខេត្តត្រាងបន្តថា ប៉ុន្តែតាំងពីកើតហេតុការណ៍បា.ញ់ប្រហា.រនៅ Siam Paragon ដែលបានបណ្តាលឱ្យជនជាតិចិនស្លា.ប់បា.ត់ប.ង់ជីវិ.ត បានធ្វើឱ្យភ្ញៀវទេសចរចិនជាច្រើននាក់លុបចោលការធ្វើដំណើររបស់ពួកគេ ។ ជំហានដំបូង ខេត្តត្រាង បានបាត់បង់ភ្ញៀវទេសចរចិនប្រមាណ៤០% ហើយធ្វើឱ្យក្រុមហ៊ុនទេសចរណ៍ត្រូវលុបចោលការកក់ទូកដឹកភ្ញៀវទេសចរ ក៏ដូចជាលុបចោលការកក់រថយន្ត និងសណ្ឋាគារផ្សេងៗក្នុងរដូវកាលទេសចរណ៍ ឆ្នាំ២០២៣នេះ ។

ចុងក្រោយ បុគ្គលិកក្រុមហ៊ុនទេសចរណ៍រូបនេះបានស្នើឱ្យរដ្ឋាភិបាលថៃត្រូវឈ្វេងយល់ពីទំនុកចិត្តរបស់ភ្ញៀវទេសចរបរទេស ជាពិសេស ទំនុកចិត្តភ្ញៀវទេសចរចិន និងប្រទេសចិនឱ្យបានឆាប់រហ័សបំផុត ពីព្រោះបារម្ភថា វាអាចនឹងប៉ះពាល់ដល់វិស័យទេសចរណ៍ប្រទេសថៃក្នុងរយៈពេលយូរ ។

កាលពីដើមខែតុលា ឆ្នាំ២០២៣ សារព័ត៌មានថៃឈ្មោះ Thai PBS បានចុះផ្សាយថា ភ្ញៀវទេសចរចិនបានលុបចោលការធ្វើដំណើរមកកាន់ប្រទេសថៃ ហើយពួកគេប្តូរទៅប្រទេសផ្សេងវិញ ។ អ្នកនាង ម៉ានីណាត អនផាណា អ្នករាយការណ៍ពិសេសនៅប្រទេសចិន និយាយថា ៖ «សារព័ត៌មានអនឡាញនានានៅប្រទេសចិនបានបង្ហោះវីដេអូហេតុការណ៍បា.ញ់ប្រហា.រនៅ Siam Paragon ហើយធ្វើឱ្យអ្នកលេងបណ្តាញសង្គមចិនភ្ញាក់ផ្អើលយ៉ាងខ្លាំង និងគ្មានទំនុកចិត្តមកលេងប្រទេសថៃទៀតទេ ដោយពួកគេប្តូរទៅកម្សាន្តនៅប្រទេសផ្សេងវិញ» ៕ ប្រភព ៖ Thai PBS

ក្រសួងសុខាភិបាលនាថ្ងៃទី១៧ តុលា បានប្រកាសសម្រេចបិទមន្ទីរសម្រាកព្យាបាល សែនមានជ័យ ដែលមានទីតាំងស្ថិតនៅផ្ទះលេខ ៧B3-៨B3 ផ្លូវលេខ១០៧ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។ ការបិទមន្ទីរសម្រាកព្យាបាល សែនមានជ័យ នេះ ដោយសារមូលហេតុប្រព្រឹត្តកំហុសដដែលៗបានយករថយន្ត សង្គ្រោះរបស់ខ្លួនទៅដឹកអ្នករងរបួសដោយគ្រោះថ្នាក់ចរាចរណ៍តាមដងផ្លូវសាធារណៈ មិនគោរពតាមកិច្ចសន្យាជាមួយ ក្រសួងសុខាភិបាល និងមិនមានធនធានមនុស្សគ្រប់គ្រាន់ក្នុងការផ្តល់សេវា ដូចមានក្នុងរចនាសម្ព័ន្ធដែលបានស្នើសុំ។

ក្រសួងបានបញ្ជាក់បន្ថែមថា អគ្គនាយកបច្ចេកទេសសុខាភិបាល ប្រធាននាយកដ្ឋានមន្ទីរពេទ្យ ប្រធានមន្ទីរសុខាភិបាល នៃរដ្ឋបាលរាជធានីភ្នំពេញ និង លោកវេជ្ជបណ្ឌិត អ៊ុក ពុធរតន៍ មានភារកិច្ចអនុវត្តសេចក្តីសម្រេចនេះ តាមភារកិច្ចរៀងៗខ្លួនឱ្យមានប្រសិទ្ធភាពចាប់ពីថ្ងៃចុះហត្ថលេខាតទៅ។

ថ្ងៃ១៧ ខែតុលា ដដែល ក្រសួងក៏បានប្រកាសសម្រេចបិទមន្ទីរពហុព្យាបាល មេត្រូ អអ៊ិលវី ដែលមានទីតាំងផ្ទះលេខ៦៨ ផ្លូវលេខ២៧១ សង្កាត់អូរបែកក្អម ខណ្ឌសែនសុខ រាជធានីភ្នំពេញដូចគ្នា។ ការបិទនេះក្រសួងសុខាភិបាលបានបញ្ជាក់ថា មន្ទីរពហុព្យាបាលនេះ បានប្រើប្រាស់សេវាពិគ្រោះបញ្ជូនអ្នកជំងឺទៅវះកាត់ប្តូរសរីរាង្គតម្រងនោមនៅប្រទេសឥណ្ឌា ដែលខុសទៅនឹងច្បាប់ស្តីពីការគ្រប់គ្រងលើការបរិច្ចាគ ការផ្សាំកោសិកា ជាលិកា និងសរីរាង្គមនុស្ស។

អគ្គនាយកបច្ចកទេសសុខាភិបាល ប្រធាននាយកដ្ឋានមន្ទីរពេទ្យ ប្រធានមន្ទីរសុខាភិបាល នៃរដ្ឋបាលរាជធានីភ្នំពេញ និង លោកវេជ្ជបណ្ឌិត សាំង វិចិត្រ មានភារកិច្ចអនុវត្តសេចក្ដីសម្រេចនេះ តាមភារកិច្ចរៀងៗខ្លួនឱ្យមានប្រសិទ្ធភាព៕

ក្រុមហាម៉ាស់បានស្នើឱ្យប្រទេសអ៊ីស្រាអែលដោះលែងអ្នកទោសប៉ាឡេស្ទីនសរុបចំនួន៦.០០០នាក់ដែលត្រូវបានឃុំខ្លួននៅអ៊ីស្រាអែល ដើម្បីដោះដូរជាមួយចំណាប់ខ្មាំងនៅតំបន់ Gaza Strip ។ ចំណែកកងទ័ពអ៊ីស្រាអែលប្រកាសថា មានមនុស្សត្រូវបានគេចាប់ធ្វើជាចំណាប់ខ្មាំងចំនួន១៩៩នាក់ ដែលជាចំនួនខ្ពស់ជាងការរំពឹងទុក ។

លោក ខាឡិក មេសាល (Khaled Meshaal) ជាមេដឹកនាំរបស់ក្រុមហាម៉ាស់នៅប៉ាឡេស្ទីននិយាយថា ក្រុមចំណាប់ខ្មាំងដែលក្រុមហាម៉ាស់ចាប់ខ្លួន ក្នុងនោះក៏មានមន្ត្រីជាន់ខ្ពស់របស់កងកម្លាំងការពារអ៊ីស្រាអែលនៅ Gaza ផងដែរ ។ ការលើកឡើងរបស់មេដឹកនាំក្រុមហាម៉ាស់នេះ គឺក្រោយពីក្រុមហាម៉ាស់ម្នាក់បាននិយាយទៅកាន់សារព័ត៌មាន Sky News ថា ខ្លួនមិនដឹងថា តើមានចំណាប់ខ្មាំងប៉ុន្មាននាក់ដែលនៅរស់រានមានជីវិតនោះទេ ក្រោយពីអ៊ីស្រាអែលវា.យប្រហា.រតាមផ្លូវអាកាសយ៉ាងខ្លាំង ។

ចំណែកលោក បាសេន ណេម (Basem Naim) ជាប្រធានផ្នែកនយោបាយ និងទំនាក់ទំនងអន្តរជាតិរបស់ក្រុមហាម៉ាស់បញ្ជាក់ថា លោកមិនជ្រាបពីចំនួនចំណាប់ខ្មាំងច្បាស់លាស់ទេ ក្រោយពីការទម្លាក់គ្រា.ប់បែ.កយ៉ាងខ្លាំងក្លារបស់អ៊ីស្រាអែលមកលើតំបន់ Gaza ។ លោកបន្តថា ក្រុមហាម៉ាស់ដែលគ្រប់គ្រងតំបន់ Gaza នឹងដោះលែងក្រុមចំណាប់ខ្មាំងទាំងអស់ នៅពេលអ៊ីស្រាអែលបញ្ឈប់ការវា.យប្រហា.រមកលើតំបន់ Gaza ។

ជាមួយគ្នានេះ ក្រុមហាម៉ាស់សង្ឃឹមថា នៅពេលនោះ ចំណាប់ខ្មាំងនៅតែមានជីវិត ។ កងពលតូចរបស់ Kassam ជាកងកម្លាំងប្រដាប់អាវុធរបស់ហាម៉ាស់បានប្រកាសកាលពីថ្ងៃទី១៦ ខែតុលា ឆ្នាំ២០២៣ ថា ចំណាប់ខ្មាំងចំនួន៩នាក់បានស្លា.ប់ក្រោយការវា.យប្រហា.ររបស់អ៊ីស្រាអែល ហើយកាលពី៣ថ្ងៃមុននេះ ចំណាប់ខ្មាំងបានស្លា.ប់ចំនួន១៣នាក់ រួមទាំងជនបរទេស៤នាក់ទៀត ។

រីឯសារព័ត៌មាន Sky News រាយការណ៍បន្ថែមថា កងទ័ពអ៊ីស្រាអែលបានវា.យប្រហា.រនៅជិតតំបន់ Rafah ជាច្រកព្រំដែនរវាងតំបន់ Gaza ជាមួយប្រទេសអេហ្ស៊ីប ៕ ប្រភព ៖ TNN World

បរទេស៖ ក្រុមហ៊ុន Rolls-Royce របស់ចក្រភពអង់គ្លេស គ្រោងនឹងកាត់បន្ថយការងាររហូតដល់ ២,៥០០ កន្លែងនៅចុងឆ្នាំ ២០២៤ ខណៈដែលក្រុមហ៊ុនរថយន្តអគ្គិសនីស៊ុយអែតបានប្រកាសក្ស័យធន់ នេះបើយោងតាមសារព័ត៌មាន The Guardian ដែលបានរាយការណ៍កាលពីថ្ងៃទី ១៧ ខែតុលា។

ក្រុមហ៊ុន Rolls-Royce បានបញ្ជាក់ថា ខ្លួននឹងស្នើឱ្យកាត់បន្ថយតួនាទី ២,៥០០ នៅទូទាំងពិភពលោក ដែលចំនួននេះស្មើនឹង ៦% នៃកម្លាំងការងារពាក់កណ្តាលនៅក្នុងចក្រភពអង់គ្លេស។ នាយកប្រតិបត្តិថ្មីរបស់ក្រុមហ៊ុន Rolls-Royce បាននិយាយថា ការកាត់បន្ថយការងារគឺជាជំហានមួយនៃដំណើរផ្លាស់ប្តូររយៈពេលជាច្រើនឆ្នាំរបស់ខ្លួន ដើម្បីកសាងរថយន្ត Rolls-Royce ដែលមានដំណើរការខ្ពស់ ការប្រកួតប្រជែង ធន់ និងរីកចម្រើន។ ដូច្នេះ Rolls-Royce មានបំណង ចង់រៀបចំក្រុមហ៊ុនឡើងវិញដូចជា ហិរញ្ញវត្ថុ ច្បាប់ និងធនធានមនុស្ស ដោយផ្តល់នូវការគាំទ្ររួមគ្នាដើម្បី “លុបការចម្លង” និង “សម្រេចបាននូវប្រសិទ្ធភាពកាន់តែច្រើន”។

ទោះជាយ៉ាងណាក៏ដោយ នៅថ្ងៃដដែលនោះ ក្រុមហ៊ុនរថយន្តអគ្គិសនីស៊ុយអែត Volta Trucks ក៏បានសម្រេចចិត្តប្រកាសក្ស័យធន់ ដែលនាំឱ្យបុគ្គលិកបាត់បង់ការងារចំនួន ៦០០ នាក់នៅចក្រភពអង់គ្លេស។ ចំណែកឯអ្នករុករករ៉ែ និងពាណិជ្ជករ Glencore ដែលចុះបញ្ជីនៅក្នុងទីក្រុងឡុងដ៍ក៏មានគម្រោងបិទអណ្តូងរ៉ែទង់ដែងក្រោមដីចំនួន ៣ របស់ខ្លួននៅ Mount Isa ក្នុងរដ្ឋ Queensland សម្រាប់ចុងឆ្នាំ ២០២៥ ផងដែរ។

អ្នកជំនាញរបស់ចក្រភពអង់គ្លេសបាននិយាយថា បរិយាកាសសេដ្ឋកិច្ចបច្ចុប្បន្ន គឺមានការប្រកួតប្រជែងគ្នាយ៉ាងខ្លាំង ដែលជំរុញឱ្យមានការធ្លាក់ចុះនៅក្នុងទីផ្សារមួយចំនួន ហើយអតិថិជនបានផ្អាក ឬពន្យារពេលការងារ។ ហេតុនេះហើយ ការកាត់បន្ថយការងារបានកើតឡើងចំពេលមានភាពមិនប្រាកដប្រជាលើទស្សនវិស័យសម្រាប់សេដ្ឋកិច្ចពិភពលោក ក៏ដូចជាក្តីបារម្ភអំពីវិបត្តិសេដ្ឋកិច្ចដ៏មានសក្តានុពលនៅចក្រភពអង់គ្លេសនាពេលខាងមុខផងដែរ៕

ក្រោយការវា.យប្រហា.រគ្នារវាងក្រុមហាម៉ាស់ និងប្រទេសអ៊ីស្រាអែល បានធ្វើឱ្យ Gaza Strip ក្លាយជាតំបន់មួយគ្មានអគ្គិសនីប្រើប្រាស់ ហើយពលរដ្ឋត្រូវរស់នៅក្នុងភាពងងិត, អត់ឃ្លាន, ខ្វះខាតស្បៀងអាហារ, ទឹក និងប្រេងឥន្ធនៈ ។ ហេតុនេះ ពួកគេបានបរិភោគអាហារដោយសន្សំសំចៃបំផុត ខណៈស្បៀងអាហារជិតអស់ពីស្តុកគ្រប់ទីកន្លែង ។

លោក ម៉ូហាម៉េត អាល់អាក់យាល ជាអ្នកដុតនំប៉័ងនៅតំបន់ Gaza Strip មានគំនិតដុតនំប៉័ងក្នុងឡបុរាណមួយដោយប្រើប្រាស់អុស និងយកនំប៉័ងចែកឱ្យពលរដ្ឋរស់នៅទីក្រុងខាន យូនិស ស្ថិតនៅភាគខាងត្បូងតំបន់ Gaza Strip បានបរិភោគដើម្បីរស់រានមានជីវិត ។ លោកនិយាយថា ៖ «ហាងរបស់ខ្ញុំទទួលស្វាគមន៍មនុស្សគ្រប់គ្នា ហើយយើងបានចែកនំប៉័ងឱ្យពួកគេហូប ។ ពេលនេះ ហាងមួយចំនួនបានបិទទ្វារ ហើយយើងមិនអាចធ្វើភីសាទេ ។ នេះជាឡដុតនំដែលអាចដំណើរការដោយមិនចាំបាច់ប្រើអគ្គិសនី ព្រោះវាជាឡបុរាណ ដែលមានអាយុប្រមាណពី៧០ឆ្នាំ ទៅ៨០ឆ្នាំ» ។ចំណែកលោក ម៉ូហាប់ម៉េត ឈីរ៉ាប់ ធ្វើការនៅហាងនំប៉័ងបញ្ជាក់ថា ពលរដ្ឋនៅតំបន់ Gaza Strip ហាក់ត្រូវគេបញ្ជូនឱ្យទៅរស់នៅក្នុងសម័យបុរាណកាលពី៦០ឆ្នាំមុន ហើយអ៊ីស្រាអែលមិនសល់អ្វីដើម្បីឱ្យពួកគេប្រើប្រាស់ទេ ។ លោកនិយាយថា ៖ «ពួកគេមិនអាចដុតនំប៉័ងនៅផ្ទះបានទេ ទើបនាំគ្នាមកហាងនៅទីនេះ ។ ហាងរបស់យើងដុតនំដោយប្រើប្រាស់អុស ដែលមិនចាំបាច់ប្រើអគ្គិសនី និងប្រេងឥន្ធនៈ ។ អរគុណ ព្រះជាម្ចាស់សម្រាប់រឿងនេះ ហើយមនុស្សម្នាត្រូវរស់នៅដូចសម័យ៦០ឆ្នាំមុនអីចឹង ព្រោះអ៊ីស្រាអែលអត់នៅសល់អ្វីសម្រាប់ឱ្យយើងប្រើប្រាស់បានទេ» ។

ពលរដ្ឋភាគច្រើននៅតំបន់ Gaza Strip បានហូបនំប៉័ងជាអាហារចម្បង ប៉ុន្តែម្សៅផលិតពីស្រូវសាឡីសម្រាប់ធ្វើជាគ្រឿងផ្សំសំខាន់នោះជិតអស់គ្រប់ទីកន្លែង ហើយវាអាចគ្រប់គ្រាន់សម្រាប់តែ១សប្តាហ៍ទៀតប៉ុណ្ណោះ ។ ម្យ៉ាងទៀត នៅពេលគ្មានអគ្គិសនីប្រើប្រាស់ ឧស្សាហកម្មផលិតម្សៅពីស្រូវសាឡី មិនអាចដំណើរការបានទេ ។

សារព័ត៌មានបរទេសរាយការណ៍ថា អ្នករស់នៅតំបន់ Gaza Strip ត្រូវបរិភោគអាហារដោយសន្សំសំចៃបំផុត ហើយមនុស្សមួយចំនួនបរិភោគអាហារតែ១ពេលប៉ុណ្ណោះក្នុង១ថ្ងៃ ដោយពួកគេព្យាយាមឱ្យក្មេងៗបរិភោគឱ្យឆ្អែត ។ ចំណែកគម្រោងម្ហូបអាហារពិភពលោក ក៏បានបញ្ជូននំប៉័ងទៅកាន់កន្លែងខ្លះនៅតំបន់ Gaza Strip ផងដែរ ។ គេសង្កេតឃើញពលរដ្ឋនាំគ្នារង់ចាំការបើកច្រកព្រំដែនរ៉ាហ្វា ដែលតភ្ជាប់រវាងតំបន់ Gaza Strip ជាមួយប្រទេសអ៊ីហ្ស៊ីប ដើម្បីបញ្ជូនស្បៀងអាហារមកឱ្យពួកគេបន្ថែមទៀត ៕ ប្រភព ៖ TNN World