ប្រទេសថៃ ៖ កាលពីថ្ងៃទី៥ ខែវិច្ឆិកា ឆ្នាំ២០២៣ សារព័ត៌មានប្រទេសថៃរាយការណ៍ថា ទំព័រហ្វេសប៊ុកឈ្មោះ FM91 Trafficpro បានបង្ហោះរូបចម្លាក់យក្ស និងហនុម៉ាន ដែលគេយកមកតម្កល់នៅជិតស្ពានអាកាស និងបញ្ជាក់ថា ស្ទះចរាចរណ៍ខ្លាំងណាស់ ហើយយានជំនិះផ្សេងៗមិនអាចបើកបរបានទេ ដោយសារមានការយករូបចម្លាក់ទាំងនេះមកដាក់នៅផ្លូវព្រះរ៉ាម៩ ក្នុងទីក្រុងបាងកក ។

ក្រោយពីការបង្ហោះនេះត្រូវបានផ្សព្វផ្សាយក្នុងបណ្តាញសង្គមប្រទេសថៃ មានអ្នកលេងបណ្តាញសង្គមថៃជាច្រើននាក់បានចូលមកបញ្ចេញមតិ ហើយអ្នកខ្លះនិយាយថា ៖ «វាដូចគ្នានឹងពេលយករូបចម្លាក់គ្រូកាយកែវ ទៅដាក់នៅតាមផ្លូវរ៉ាជឆាដា រហូតដល់ល្បីល្បាញនៅប្រទេសថៃ និងលើពិភពលោក ហើយធ្វើឱ្យគេស្គាល់គ្រូកាយកែវយ៉ាងច្រើន ។ ការតម្កល់រូបចម្លាក់យក្ស និងហនុម៉ាននៅពេលនេះ តើវាជាការទាក់ទាញចំណាប់អារម្មណ៍មែនទេ ដើម្បីផ្សព្វផ្សាយពីរូបចម្លាក់» ។

ចំណែកជនជាតិថៃម្នាក់និយាយថា ៖ «មុននឹងដឹករូបចម្លាក់មកកាន់ទីនេះ តើគ្មានការត្រួតពិនិត្យមើលផ្លូវនេះជាមុន មែនទេ? ហើយតើការផ្លាស់ទីបែបនេះ ត្រូវជូនដំណឹងទៅស្ថាប័នពាក់ព័ន្ធជាមុនសិនឬអត់?» ។

ក្រុមសារព័ត៌មានថៃបានធ្វើដំណើរទៅកាន់កន្លែងតម្កល់រូបចម្លាក់ទាំងនេះនៅបរិវេណស្ពានអាកាសសម្រាប់អ្នកថ្មើរជើង ហើយក៏បានជួបបុរសម្នាក់ឈ្មោះ Pradit Charoenboon ដែលប្រកបមុខរបរបើកម៉ូតូដឹកភ្ញៀវ និយាយថា ការយករូបចម្លាក់យក្ស និងហនុម៉ានមកតម្កល់នៅទីនេះ បណ្តាលឱ្យស្ទះចរាចរណ៍យ៉ាងខ្លាំង ។ អាជ្ញាធរបានយករថយន្តមកស្ទូចរូបចម្លាក់យក្សចុះក្រោម រួចហើយក៏បញ្ជាឱ្យរថយន្តដឹករូបចម្លាក់ឈប់នៅកៀនផ្លូវ ។ បន្ទាប់មក ពួកគេក៏យករូបចម្លាក់ទាំងនេះទៅតម្កល់នៅមជ្ឈមណ្ឌលវប្បធម៌នៅតាមផ្លូវធៀមរួមមិត្ត ជំនួសវិញ ។

ករណីនេះដូចគ្នានឹងរូបចម្លាក់គ្រូកាយកែវ ដែលគេតម្កល់នៅស្ពានអាកាសសម្រាប់អ្នកថ្មើរជើងនៅតាមផ្លូវរ៉ាជឆាដាផិសេក ដែលធ្វើឱ្យស្ទះចរាចរណ៍យ៉ាងខ្លាំងកាលពីថ្ងៃទី៩ ខែសីហា ឆ្នាំ២០២៣ កន្លងមក ។ ការតម្កល់រូបចម្លាក់គ្រូកាយកែវនៅពេលនោះបានល្បីល្បាញពេញសារព័ត៌មាន ហើយបច្ចុប្បន្ននេះ គ្រូកាយកែវ ត្រូវបានគេតម្កល់នៅសណ្ឋាគារ The Bazaar Hotel Bangkok នៅផ្លូវរ៉ាជឆាដាផិសេក ក្រុងបាងកក ៕ ប្រភព ៖ amarin news

មង្គលការជាង១០០តុ តែបែរជាគ្មានភ្ញៀវណាម្នាក់មកចូលរួមទាល់តែសោះ វាគឺជារឿងដែលហួសចិត្តមិននឹកស្មាន តែវាជាការពិត ខណៈនៅកម្ពុជារដូវរៀបអាពាហ៌ពិពាហ៌បានមកដល់ហើយ សូមនឹកពិនិត្យមើលសកម្មភាពរបស់យើងកន្លងមកជាមុនផង កុំអោយផុងខ្លួនក្នុងបំណុលព្រោះរឿងរៀបការដូចរឿងខាងក្រោមនេះ។

មង្គលការនៅក្នុងភូមិជនបទតូចមួយ ក្នុងខេត្ត Guizhuo ភាគនារតីនាប្រទេសចិន បានប្រារព្ធធ្វើឡើងយ៉ាងយកចិត្តទុកដាក់បំផុតដើម្បីអបអរសារទដល់គូរស្វាមីភរិយាថ្មី ដែលមានចំនួនជាង១០០តុ ។ ប៉ុន្តែអ្វីដែលគួរឲ្យភ្ញាក់ផ្អើល អាម៉ាស់ និងភាពងឿងឆ្ងល់បំផុតនោះគឺ អ្នកភូមិណាម្នាក់មកចូលរួមនៅក្នុងពិធីមង្គលការនោះទេ។

ពិធីមង្គលការដ៏អភ័ពនេះ ទទួលបាននូវការចាប់អារម្មណ៍និងមតិរិះគន់ជាច្រើននៅលើបណ្តាញសង្គមចិននាពេលថ្មីៗនេះ ដែលមានគ្រួសារចិនមួយបានប្រារព្ធពិធីមង្គលការឲ្យកូនៗរបស់ពួកគេ។ តាមការឲ្យដឹងអ្នកដែលរស់នៅក្នុងភូមិនោះបាននិយាយថា តាមប្រពៃណីអញ្ជើញភ្ញៀវកិត្តិយសដើម្បីចូលរួមក្នុងពិធីផ្សេងៗដូចជាពិធីមង្គលការជាដើម ដោយការអញ្ជើញធ្វើឡើងដោយគ្រាន់តែប្រើមាត់សម្រាប់ហៅតែប៉ុណ្ណោះគឺគ្មានលិខិតអញ្ជើញត្រឹមត្រូវនោះទេ។ ដូច្នេះទើបធ្វើឲ្យក្រុមគ្រួសារនោះមិនទទួលបាននូវលទ្ធផលដូចជាការរំពឹងទុករបស់ពួកគេ។

នៅក្នុងថ្ងៃអាពាហ៍ពិពាហ៍របស់ពួកគេនោះ គឺឃើញថាបានរៀបចំតុបតែងឡើងយ៉ាងប្រណិត ហើយមានតុចំនួនជាង១០០តុដាក់តម្រៀបគ្នានៅក្នុងទីធ្លាយ៉ាងទូលាយដើម្បីរងចាំស្វាគមន៍ភ្ញៀវកិត្តិយស។ ប៉ុន្តែផ្ទុយទៅវិញ គឺមានតែសាច់ញាតិបងប្អូនខាងកូនកំលោះក្រមុំមួយចំនួនតូចប៉ុណ្ណោះដែលបានបង្ហាញខ្លួននៅក្នុងកម្មវិធី ខណៈគ្មានវត្តមានរបស់អ្នកភូមិណាម្នាក់ចូលរួមនៅក្នុងកម្មវិធីនោះឡើយ។ នេះគឺពិតជាបានបង្ហាញពីបរិកាសដ៏ស្រងោចស្រងែងមួយរបស់ពិធីមង្គលនេះ ខណៈកូនក្រមុំកូនកំលោះកំពុងរង់ចាំភ្ញៀវយ៉ាងរន្ទះសារបំផុត។

ម៉្យាងវិញទៀត ការដែលក្រុមគ្រួសាររៀបចំមង្គលដ៏ធំបែបនេះ តែបែរជាគ្មានភ្ញៀវណាម្នាក់មកចូលរួមនោះគឺអាចដោយសារតែ គ្រួសារខាងកូនកំលោះគឺជាអ្នកទីក្រុងដែលទើបផ្លាស់មករស់នៅនិងរៀបចំពិធីក្នុងជនបទ។ យ៉ាងណាមិញ គ្រួសារនេះគឺមិនដែលបានមករួមក្នុងកម្មវិធីនិងធ្វើសកម្មភាពផ្សេងៗនៅជាមួយនឹងអ្នកភូមិនៅទីនោះទេ ទើបជាហេតុបណ្តាលឲ្យអ្នកភូមិនៅទីនោះមិនចូលរួមពិធីមង្គលការរបស់ពួកគេវិញដូចគ្នា។

ទោះបីជាយ៉ាងណាក៏ដោយ ក៏មានមតិលើកឡើងជាច្រើននៅលើបណ្តាញសង្គមដោយមានអ្នកមួយចំនួនបាននិយាយថា ដោយសារតែពួកគេមិនបានទៅចូលរួមក្នុងពិធីមង្គលផ្សេងៗរបស់អ្នកស្រុក ចុះរំពឹងអីឲ្យអ្នកស្រុកមកចូលរួមក្នុងពិធីរបស់ពួកគេវិញនោះ។ ខណៈអ្នកខ្លះទៀតក៏បានលើកឡើងរួមជាមួយនឹងមតិណែនាំទៅកាន់ម្ចាស់ដើមការ ដោយលើកឡើងថា គួរតែចែកម្ហូបអាហារដែលនៅសល់ទាំងអស់ទៅឲ្យអ្នកភូមិដែលរស់នៅទីនោះ បើទោះបីជាគេមិនបានមកចូលរួមក្តី គឺដើម្បីបង្កើតនូវទំនាក់ទំនងល្អក៏ដូចជាពង្រឹងនូវចំណងមិត្តភាព និងចៀសវាងមិនឲ្យរឿងបែបនេះកើតឡើងម្តងទៀតនាថ្ងៃខាងមុខ៕

អាមេរិក៖ បច្ចុប្បន្ន ការកើនឡើងនៃការប្រើប្រាស់អាភៀន ឬថ្នាំញៀនផ្សេងៗបានធ្វើឱ្យមន្ត្រីសហរដ្ឋអាមេរិកត្រូវចំណាយប្រាក់រាប់លានដុល្លារដើម្បីធ្វើការស្រាវជ្រាវវ៉ាក់សាំង និងការព្យាបាល ប៉ុន្តែពួកគេមិនបានទទួលជោគជ័យឡើយបន្ទាប់ពីធ្វើការស្រាវជ្រាវអស់រយៈពេលរាប់ទសវត្សរ៍មកហើយ។

អាមេរិក គឺជាប្រទេសដែលកំពុងប្រឈមមុខនឹងវិបត្តិអាភៀនដែលមិនធ្លាប់មានពីមុនមក។ យោងតាមរបាយការណ៍របស់ CDC ឆ្នាំ ២០២១ បានឱ្យដឹងថា មនុស្សជាង ១០០,០០០ នាក់បានស្លាប់ដោយសារការប្រើប្រាស់ថ្នាំអាភៀនហួសកម្រិតក្នុងរយៈពេល ១២ ខែ។ មូលហេតុចម្បងគឺ fentanyl ដែលជាថ្នាំសំយោគមានថាមពលខ្លាំងជាង morphine ១០០ ដង។ លើសពីនេះ ចំនួនអ្នកស្លាប់ដោយសារកូកាអ៊ីន ថ្នាំអាភៀនពាក់កណ្តាលសំយោគ និងថ្នាំបំបាត់ការឈឺចាប់តាមវេជ្ជបញ្ជាដែលមានសារធាតុញៀនក៏កើនឡើងផងដែរ។

យោងតាមការប៉ាន់ប្រមាណដោយ Washington Post ថា fentanyl គឺជាមូលហេតុចម្បងនៃការស្លាប់របស់ជនជាតិអាមេរិកដែលមានអាយុចន្លោះពី ១៨ ទៅ ៤៩ ឆ្នាំ។ ទិន្នន័យស្ទាបស្ទង់របស់សហព័ន្ធឆ្នាំ ២០២១ ក៏បានប៉ាន់ប្រមាណដែរថាមនុស្សប្រហែល ៥.៦ លាននាក់ដែលមានអាយុលើសពី ១២ ឆ្នាំសុទ្ធតែមានបញ្ហានៃការប្រើប្រាស់ថ្នាំអាភៀន។
គួរបញ្ជាក់ដែរថា ថ្មីៗនេះមន្ត្រីសហរដ្ឋអាមេរិកបានផ្តល់មូលនិធិចំនួន ១៤.៨ លានដុល្លារសម្រាប់អ្នកវិទ្យាសាស្ត្រដើម្បីស្រាវជ្រាវអង្គបដិប្រាណ monoclonal ដែលផ្តោតលើ fentanyl ។ ទោះជាយ៉ាងណាក៏ដោយ អ្នកជំនាញបានតស៊ូសិក្សាជាយូរមកហើយប៉ុន្តែនៅតែគ្មានលទ្ធផល មូលហេតុគឺដោយសារតម្លៃនៃការស្រាវជ្រាវពីបញ្ហានេះគឺត្រូវចំណាយច្រើនខ្លាំង ដោយមិនរាប់បញ្ចូលថ្លៃសេវានាំយកទៅទីផ្សារនោះទេ៕

ប្រទេសឥណ្ឌា៖ អាជ្ញាធរនៅក្នុងរដ្ឋធានីដេលីរបស់ប្រទេសឥណ្ឌា បានបិទសាលាបឋមមួយរយៈ ដោយសារការបំពុលបរិយាកាសធ្ងន់ធ្ងរ និងគុណភាពខ្យល់កាន់តែអាក្រក់ទៅៗ។

យោងតាមគេហទំព័រ BBC News ដែលបានចុះផ្សាយនៅថ្ងៃទី៤ ខែវិច្ឆិកាថា គុណភាពខ្យល់នៅក្នុងទីក្រុងដេលីបានធ្លាក់ចុះដល់កម្រិតធ្ងន់ធ្ងរជាលើកដំបូងក្នុងរដូវកាលនេះ ដែលធ្វើឱ្យរដ្ឋធានីនៃទីក្រុងនេះក្លាយជាទីក្រុងមួយដែលមានខ្យល់បំពុលបរិស្ថានខ្លាំងបំផុតរបស់ពិភពលោក។

មូលហេតុដែលធ្វើឱ្យទីក្រុងដេលី មានបរិយាកាសមិនល្អ គឺដោយសារកត្តាផ្សេងៗ រួមទាំងការដុតបំផ្លាញដំណាំរបស់កសិករ ល្បឿនខ្យល់ទាប និងការផ្ទុះកាំជ្រួចក្នុងអំឡុងពេលពិធីបុណ្យនានាជាដើម។ យោងតាមការសិក្សាដោយគណៈកម្មាធិការត្រួតពិនិត្យការបំពុល បានបង្ហាញថា ការបំពុលខ្យល់ក្នុងទីក្រុងនឹងកើនឡើងចាប់ពីថ្ងៃទី ១ ដល់ថ្ងៃទី ១៥ ខែវិច្ឆិកា នៅពេលដែលចំនួននៃឧប្បត្តិហេតុដុតកម្ទេចចោលនៅក្នុងរដ្ឋជិតខាងបានកើនឡើង។

ដូច្នេះហើយ រដ្ឋមន្ត្រីរបស់ទីក្រុងដេលី លោក Arvind Kejriwal បានប្រកាសភ្លាមៗថា សាលាបឋមសិក្សារបស់រដ្ឋាភិបាល និងឯកជនទាំងអស់នៅក្នុងទីក្រុងនឹងត្រូវបានបិទនៅថ្ងៃសុក្រ និងថ្ងៃសៅរ៍។ ដោយជាធម្មតាសាលារៀនទាំងអស់តម្រូវឱ្យរៀនពីថ្ងៃច័ន្ទ ដល់ថ្ងៃសៅរ៍ ប៉ុន្តែដោយសារបរិកាសប្រែប្រួល ទើបរដ្ឋាភិបាលសម្រេចចិត្តបិទនៅថ្ងៃសុក្រ និងថ្ងៃសៅរ៍មួយរយៈ។ ហេតុនេះហើយ បច្ចុប្បន្នសាលារៀនបឋមបើកឱ្យសិក្សាត្រឹមថ្ងៃច័ន្ទ ដល់ថ្ងៃព្រហស្បត៌ប៉ុណ្ណោះ។

ទោះជាយ៉ាងណាក៏ដោយ ដើម្បីប្រយុទ្ធប្រឆាំងនឹងផលប៉ះពាល់នៃការបំពុលកើនឡើង គណៈគ្រប់គ្រងការបំពុលកណ្តាលបានបញ្ជាឱ្យហាមឃាត់ជាបន្ទាន់លើការងារសំណង់ដែលមិនសំខាន់នៅក្នុងទីក្រុង និងសេវាកម្មដឹកជញ្ជូនសាធារណៈទាំងអស់ រួមទាំងសេវារថភ្លើងក្រោមដី និងឡានក្រុងរបស់ក្រុងដេលី ក៏ត្រូវបានណែនាំឱ្យបង្កើនប្រេកង់របស់ពួកគេ ដើម្បីទប់ស្កាត់ការបំភាយឧស្ម័នពីយានយន្តផងដែរ។

គួរបញ្ជាក់ដែរថា ខ្យល់ដែលបំពុលបានបង្កឱ្យមានបញ្ហាសុខភាពធ្ងន់ធ្ងរដល់អ្នកស្រុកដេលីជារៀងរាល់ឆ្នាំ ដោយអ្នកជំនាញផ្នែកសុខភាពក៏បានរាយការណ៍អំពីការកើនឡើងនៃករណីជំងឺហឺត និងបញ្ហាសួតក្នុងចំណោមកុមារ និងមនុស្សចាស់ ដោយសារតែគុណភាពខ្យល់កាន់តែអាក្រក់។ លោក Jugal Kishore ប្រធានផ្នែកវេជ្ជសាស្ត្រនៅមន្ទីរពេទ្យ Safdarjung នៃទីក្រុង បាននិយាយថា បច្ចុប្បន្នយើងកំពុងកត់ត្រាការកើនឡើងនៃការឆ្លងមេរោគរលាកទងសួត ក៏ដូចជាបានណែនាំដល់អ្នកដែលមានបញ្ហាផ្លូវដង្ហើមកុំឱ្យចេញក្រៅផ្ទះលុះត្រាតែមានការចាំបាច់ប៉ុណ្ណោះ៕