ប្រទេសអេស្ប៉ាញ ៖ ជារៀងរាល់ឆ្នាំ ទីក្រុងម៉ាឌ្រីដបានរៀបចំពិធីបុណ្យគង្វាលចៀម (Fiesta de la Trashumancia) ដែលតម្រូវឱ្យកសិករចិញ្ចឹមចៀមលែងហ្វូងចៀមរាប់ពាន់ក្បាលរបស់ពួកគេឱ្យដើរមកកាន់ទីក្រុង ។ វាជាប្រពៃណីមួយបង្ហាញពីរបៀបរស់នៅតាមបែបបុរាណរបស់កសិករអេស្ប៉ាញ ក៏ដូចជាទាក់ទាញភ្ញៀវទេសចរជាតិ និងអន្តរជាតិផងដែរ ។

គេបានឃើញហ្វូងចៀមរាប់ពាន់ក្បាលដើរតម្រៀបគ្នា និងយំពាសពេញទីក្រុងម៉ាឌ្រីដ ជំនួសឱ្យការបើកបររថយន្តនៅតាមផ្លូវ ។ លើសពីនេះ ក៏មានសំឡេងតន្ត្រី និងការច្រៀងនៅតាមផ្លូវរបស់បណ្តាអ្នកចិញ្ចឹមចៀមក្នុងពិធីបុណ្យគង្វាលចៀមក្នុងទីក្រុងផងដែរ ។ វាជាប្រពៃណីបុរាណដែលរៀបចំឡើងជារៀងរាល់ឆ្នាំនៅប្រទេសអេស្ប៉ាញ ដើម្បីទាក់ទាញឱ្យភ្ញៀវទេសចរជាតិ និងអន្តរជាតិមកទស្សនាការឃ្វាលចៀមបែបបុរាណ ដែលព័ទ្ធជុំវិញទៅដោយអគារ និងលំនៅឋានតាមសម័យបច្ចុប្បន្ន ។

លោក ជីសាស់ ប៉ាស់សាល អតីតអ្នកចិញ្ចឹមចៀម ប្រាប់ថា ៖ «ខ្ញុំបានមកកាន់ Sol Square ពីព្រោះវាធ្វើឱ្យខ្ញុំនឹកឃើញឡើងវិញពីការចងចាំល្អៗ ។ ខ្ញុំធ្លាប់ចិញ្ចឹមចៀមពីមុន ហើយមនុស្សភាគច្រើនមិនធ្លាប់បានដឹងពីរឿងនេះទេ ។ វាជាមុខរបរមួយពិបាក ដែលគ្មានអ្នកណាចង់ធ្វើទេ ហើយយើងនឹងចងចាំវា តាមអ្វីដែលយើងអាចធ្វើបាន ព្រោះវាជារឿងពិសេសខ្លាំងណាស់» ។

ការរៀបចំពិធីបុណ្យគង្វាលចៀមនៅទីក្រុងម៉ាឌ្រីដ គឺដើម្បីបង្ហាញពីរបៀបរស់នៅតាមបែបបុរាណរបស់កសិករនៅប្រទេសអេស្ប៉ាញ ដែលពួកគេត្រូវឃ្វាលចៀមដើម្បីរកចំណីនៅភាគខាងត្បូងប្រទេសក្នុងរដូវរងា ។

រីឯអ្នកស្រី សានដ្រា ផានអាឃ្លេម ជាភ្ញៀវទេសចរមកលេងប្រទេសអេស្ប៉ាញនិយាយថា ៖ «វាពិតជាអស្ចារ្យណាស់! ខ្ញុំគិតថា នេះជាប្រពៃណីមានជាយូរមកហើយ ។ វាពិតជាល្អណាស់ ហើយខ្ញុំបានឃើញមនុស្សម្នាជាច្រើននាក់មកចូលរួមក្នុងពិធីបុណ្យ ហើយរីករាយជាមួយប្រពៃណីនេះ» ។

គួរបញ្ជាក់ថា ពិធីបុណ្យគង្វាលចៀមនៅក្នុងទីក្រុងម៉ាឌ្រីដ ត្រូវបានគេផ្អាកអស់រយៈពេលជាច្រើនឆ្នាំហើយ ។ ក្រោយមក រដ្ឋាភិបាលអេស្ប៉ាញសម្រេចឱ្យរៀបចំពិធីបុណ្យនេះឡើងវិញនៅឆ្នាំ១៩៩៤ ដោយត្រូវរៀបចំឡើងនៅខែតុលា ជារៀងរាល់ឆ្នាំ ៕ ប្រភព ៖ TNN World

សហរដ្ឋអាមេរិក៖ ក្រុមហ៊ុន Meta កំពុងត្រូវបានប្តឹងដោយរដ្ឋចំនួន ៤១ របស់សហរដ្ឋអាមេរិក ដោយអះអាងថា បណ្តាញសង្គម Facebook និង Instagram បានប៉ះពាល់អវិជ្ជមានដល់កុមារ។

យោងតាមការចុះផ្សាយរបស់ The Washington Post កាលពីថ្ងៃទី ២៤ ខែតុលាថា ថ្មីៗនេះរដ្ឋចំនួន ៣០ បានដាក់ពាក្យបណ្តឹងរួមគ្នាមួយនៅតុលាការសហព័ន្ធក្នុងសង្កាត់ភាគខាងជើងនៃរដ្ឋកាលីហ្វ័រញ៉ា ដោយរដ្ឋចំនួន ១១ ទៀតបានដាក់ពាក្យបណ្តឹងតាំងពីឆ្នាំ ២០២១ មកម្លេះ។

ក្នុងពាក្យបណ្ដឹងដែលមាន ២៣៣ ទំព័រដែលដាក់ដោយរដ្ឋកាលីហ្វ័រញ៉ា Meta ត្រូវបានចោទប្រកាន់ថា “គ្រោងកេងប្រវ័ញ្ចអ្នកប្រើប្រាស់វ័យក្មេងដើម្បីរកប្រាក់ចំណេញដោយការបំភាន់ពួកគេអំពីសុវត្ថិភាព និងប្រជាប្រិយភាពនៃមាតិកាដែលរំខាន រួមទាំងការរំលោភលើច្បាប់ឯកជនភាពរបស់កុមារនៅក្នុងសហព័ន្ធ។ រដ្ឋក៏ជឿជាក់ផងដែរថា ក្រុមហ៊ុនរបស់លោក Mark Zuckerberg មានចេតនាអនុវត្តមុខងារដើម្បីរក្សាអនីតិជននៅលើ Facebook និង Instagram ឱ្យបានយូរតាមតែអាចធ្វើទៅបាន ដែលនាំឱ្យប៉ះពាល់ដល់សុខភាពរបស់ពួកគេ។

លោក Phil Weiser តំណាងតុលាការនៃរដ្ឋ Colorado បាននិយាយថា “នេះគឺជាពេលវេលាសម្រាប់ពួកយើងដើម្បីចូលរួមកម្លាំងដោះស្រាយបញ្ហាចាំបាច់បំផុត”។ លោក Rob Bonta អគ្គមេធាវីរដ្ឋកាលីហ្វ័រញ៉ាក៏បានថ្លែងថា “ការស៊ើបអង្កេត bipartisan របស់យើងបានឈានដល់ការសន្និដ្ឋានដ៏សំខាន់មួយដោយ Meta បានធ្វើឱ្យប៉ះពាល់ដល់កុមារ និងក្មេងជំទង់ជាមួយនឹងលក្ខណៈពិសេសដែលធ្វើឱ្យកុមារញៀន ដើម្បីផលប្រយោជន៍បង្កើនប្រាក់ចំណេញរបស់ក្រុមហ៊ុន”។

យោងតាមអ្នកនាំពាក្យរបស់ក្រុមហ៊ុន Meta លោកស្រី Liza Crenshaw បាននិយាយថា ក្រុមហ៊ុន “ខកចិត្តព្រោះ Meta បានធ្វើការប្រកបដោយប្រសិទ្ធភាពជាមួយអ្នកលេងឧស្សាហកម្មដើម្បីបង្កើតស្តង់ដារច្បាស់លាស់ និងសមស្របតាមអាយុសម្រាប់កម្មវិធីជាច្រើនដែលប្រើដោយមនុស្សវ័យជំទង់” ប៉ុន្តែនៅតែប្តឹង។

ទោះជាយ៉ាងណាក៏ដោយ ផលប៉ះពាល់ដ៏គ្រោះថ្នាក់នៃប្រតិបត្តិការ Meta Platform ដូចជា Facebook និង Instagram លើកុមារបានក្លាយជាចំណុចចាប់អារម្មណ៍នៅក្នុងសហរដ្ឋអាមេរិកចាប់តាំងពីឆ្នាំ ២០២១ នៅពេលដែលអតីតបុគ្គលិក Frances Haugen បានបង្ហាញថាក្រុមហ៊ុនបានដឹងពីកម្រិតគ្រោះថ្នាក់របស់ Facebook និង Instagram ចំពោះអនីតិជនតាមរយៈផ្ទៃក្នុង ប៉ុន្តែក្រុមហ៊ុនមិនអើពើនោះទេដើម្បីចំណេញ។

គួរបញ្ជាក់ដែរថា បច្ចុប្បន្នរដ្ឋកាលីហ្វ័រញ៉ាបានអនុម័តបទប្បញ្ញត្តិដែលតម្រូវឱ្យក្រុមហ៊ុនដូចជា Meta សាកល្បងផលិតផលសម្រាប់ហានិភ័យ មុនពេលបញ្ចេញវាដល់អ្នកប្រើប្រាស់ ក៏ដូចជាបង្កើតការការពារសុវត្ថិភាព និងឯកជនភាពទៅក្នុងឧបករណ៍របស់ពួកគេ៕

ប្រទេសរុស្ស៊ី ៖ អ្នកនាំពាក្យវិមានប្រធានាធិបតីរុស្ស៊ីបានបដិសេធព័ត៌មានចចាមអារ៉ាមថា ប្រធានាធិបតីរុស្ស៊ី លោក វ្ល៉ាឌីមៀ ពូទីន កំពុងមានជំងឺ រហូតដល់បញ្ជូនឱ្យមន្ត្រីដែលមានរូបរាងស្រដៀងគ្នាជាមួយលោក មកចូលរួមក្នុងកម្មវិធីផ្សេងៗជំនួសលោក ។ អ្នកនាំពាក្យរូបនេះបញ្ជាក់ថា មេដឹកនាំប្រទេសរុស្ស៊ីមានសុខភាពល្អជាធម្មតាទេ ។

អ្នកនាំពាក្យវិមានប្រធានាធិបតីរុស្ស៊ីបានផ្តល់សម្ភាសន៍ជាមួយក្រុមអ្នកសារព័ត៌មាន ដែលពួកគេបានសាកសួរពាក់ព័ន្ធនឹងព័ត៌មានតាមតេឡេក្រាមនៅរុស្ស៊ី ហើយក្រុមសារព័ត៌មាននៅប្រទេសលោកខាងលិច ក៏បានយកព័ត៌មាននេះទៅចុះផ្សាយបន្តថា មេដឹកនាំរុស្ស៊ី លោក ពូទីន មានជំងឺកាលពីថ្ងៃទី២២ ខែតុលា ឆ្នាំ២០២៣ រហូតដល់លោកត្រូវបញ្ជូនមន្ត្រីដែលមានមុខមាត់ស្រដៀងលោក ទៅចូលរួមក្នុងកម្មវិធីផ្សេងៗជំនួសលោក ។

អ្នកនាំពាក្យរូបនេះបញ្ជាក់ថា លោក ពូទីន មានសុខភាពរឹងមាំល្អធម្មតា ហើយពាក្យចចាមអារ៉ាមអំពីសុខភាពរបស់លោក គឺជារឿងគ្មានប្រយោជន៍ ។ លោកប្រធានាធិបតី ពូទីន បានឈានចូលអាយុ៧១ឆ្នាំ កាលពីថ្ងៃទី៧ ខែតុលា កន្លងមក ហើយលោកជាមេដឹកនាំប្រទេសដែលបានហាត់ប្រាណតាមវិធីច្រើនយ៉ាង ជាពិសេស កីឡាយូដូ ។

កន្លងមក លោក ពូទីន បានបង្ហាញខ្លួននៅតាមកម្មវិធី និងក្នុងប្រព័ន្ធផ្សព្វផ្សាយផ្សេងៗជាបន្តបន្ទាប់ រួមទាំងការធ្វើដំណើរទស្សនកិច្ចទៅប្រទេសចិននៅខែតុលា ឆ្នាំ២០២៣ ផងដែរ ហើយលោកបានមកកាន់ទីក្រុងចំនួន២ របស់រុស្ស៊ី ក្នុងពេលលោកត្រឡប់ពីចិន ។

នៅពេលលោក ពូទីន ផ្តល់សម្ភាសន៍ទៅកាន់ក្រុមសារព័ត៌មានកាលពីឆ្នាំ២០២០ មេដឹកនាំរុស្ស៊ីក៏បានបដិសេធព័ត៌មានដូចគ្នានេះថា លោកបានប្រើប្រាស់មន្ត្រីដែលមានរូបរាង និងមុខមាត់ស្រដៀងគ្នាជាមួយលោកទៅចូលរួមក្នុងកម្មវិធីផ្សេងៗ ។ ប៉ុន្តែលោកទទួលស្គាល់ថា លោកត្រូវគេស្នើឱ្យធ្វើបែបនេះកាលពីមុន ដោយសារហេតុផលសុវត្ថិភាព ៕ ប្រភព ៖ TNN World

មានរឿងដ៏គួរអោយភ្ញាក់ផ្អើលមួយបានកើតឡើងនៅឯប្រទេសថៃ ដោយលទ្ធផលពេលរកសាកសពបុរសជនជាតិភូមាម្នាក់ សមត្ថកិច្ចបានឃើញសត្វពស់១ក្បាលប្រវែង២ម៉ែត្រ នៅព័ទ្ធជុំវិញសាកសព្វបុរសជនជាតិភូមាដែលស្លាប់បាត់បង់ជីវិតនោះមិនចេញទៅណាឆ្ងាយពីសាកសពឡើយ បើទោះជាគេប្រឹងដេញចេញយ៉ាងណាក៏ដោយ។

ហេតុការណ៍ដ៏អាក្រក់និងចំលែកមួយ បានកើតឡើងក្នុងសហគមន៍នៃវត្តសំរោងនោ ខេត្តសាមុតប្រាកាន នៅឯប្រទេសថៃដោយតំបូងក្រុមបេសកម្មជួយសង្គ្រោះបានទាញយកយ៉ាងលំបាកលំបិននូវសាកសពបុរសវ័យ២៦ឆ្នាំម្នាក់ ជាជនជាតិភូមា ដោយបានព័ទ្ធជុំវិញដោយពស់មួយក្បាលប្រវែង២ម៉ែត្រយ៉ាងតឹងណែន។

បុរសជនជាតិភូមានោះត្រូវបានគេប្រទះឃើញស្លាប់នៅក្នុងបន្ទប់ទឹករបស់កម្មករ នៃរោងចក្រចាស់មួយ ក្នុងខេត្តសាមុតប្រាកាន នៅឯប្រទេសថៃ។ អ្វីដែលហួសចិត្ត ស្ទើរតែមិនគួរឲ្យជឿនោះគឺ មានពស់ប្រវែង២ម៉ែត្រព័ទ្ធជុំវិញសាកសពរបស់គាត់មិនព្រមចេញទៅណាទាល់តែសោះ។

យោងតាមការចុះផ្សាយរបស់សារព័ត៌មាន Amarin TV បានរាយការណ៍ថា បន្ទាប់ពីការប្រឹងប្រែងអស់រយៈពេល២ម៉ោងកន្លះ ពស់ប្រវែង២ម៉ែត្រ ត្រូវបានគេស្គាល់ថាជាប្រភេទពស់ថ្លាន់ ហើយសត្វពោះមួយក្បាលនោះត្រូវបានក្រុមអ្នកជំនាញខាងចាប់ពស់បានចាប់យកចេញរួចរាល់ហើយ។

បើពិនិត្យ និងយោងតាមជំនឿរបស់កម្មករម្នាក់ដែលជាមិត្តភ័ក្រ និងជាជនជាតិភូមាដូចគ្នាដែរ លោកបានលើកឡើងទាក់ទងទៅនឹងជំនឿរបស់ជនជាតិភូមាថា បន្ទាប់ពីបុរសម្នាក់នោះស្លាប់ ព្រលឹងរបស់គាត់នឹងចូលទៅក្នុងសត្វពស់នោះ ដូចដែលយើងបានឃើញថាសត្វពស់ថ្លាន់នោះនៅតែក្រវែលសាកសព មិនព្រមចេញទៅណាឡើយ គឺដោយសារតែព្រលឹងអ្នកស្លាប់នោះបានចូលទៅក្នុងសត្វពស់មួយក្បាលនោះផងដែរ។ បន្ទាប់ពីស្តាប់រឿងនេះរួចហើយ តើលោកអ្នកយល់យ៉ាងដែរ ពីជំនឿរបស់បងប្អូនកម្មករខាងលើនេះ?
ប្រភព៖ thethaiger

បរទេស៖ បច្ចុប្បន្នប្រាក់យ៉េនទន់ខ្សោយធ្វើឱ្យមូលនិធិរូបិយវត្ថុអន្តរជាតិ (IMF) បានព្យាករណ៍ថា GDP របស់ជប៉ុននៅឆ្នាំនេះនឹងទាបជាងប្រទេសអាឡឺម៉ង់ ដោយហេតុនេះជប៉ុនអាចនឹងបាត់បង់តំណែងជាមហាអំណាចសេដ្ឋកិច្ចទីបីរបស់ពិភពលោក។

យោងតាមប្រភពព័ត៌មាន The Japan Times ដែលបានរាយការណ៍កាលពីថ្ងៃទី ២៤ ខែតុលាថ្មីៗនេះថា IMF ទើបតែចេញផ្សាយរបាយការណ៍ទស្សនវិស័យសេដ្ឋកិច្ចសកលរបស់ខ្លួន អាស្រ័យហេតុនេះ GDP បន្ទាប់បន្សំរបស់ប្រទេសអាឡឺម៉ង់ត្រូវបានព្យាករណ៍ថានឹងលើសប្រទេសជប៉ុនក្នុងឆ្នាំនេះ។

ដូច្នេះ យោងតាមការគណនារបស់ IMF GDP បន្ទាប់បន្សំរបស់ប្រទេសអាល្លឺម៉ង់នឹងឈានដល់ ៤,៤៣០ ពាន់លានដុល្លារនៅឆ្នាំនេះ។ ទន្ទឹមនឹងនេះ តួលេខសម្រាប់ប្រទេសជប៉ុនមានត្រឹមតែ ៤,២៣០ ពាន់លានដុល្លារប៉ុណ្ណោះ ដែលនេះនឹងធ្វើឱ្យអាល្លឺម៉ង់នៅពីក្រោយតែអាមេរិក និងចិនក្នុងទំហំសេដ្ឋកិច្ច។

IMF ក៏បានព្យាករណ៍ផងដែរថា GDP ជាមធ្យមរបស់ប្រទេសអាល្លឺម៉ង់គឺ ៥២,៨២៤ ដុល្លារ ហើយប្រទេសជប៉ុនមានចំនួនត្រឹមតែ ៣៣,៩៥០ ដុល្លារ។ មូលហេតុគឺដោយសារផលិតផលក្នុងស្រុកសរុបរបស់អាឡឺម៉ង់ត្រូវបានដំណើរការប្រសើរជាងប្រាក់យ៉េនរបស់ជប៉ុន ដែលនេះបណ្តាលឱ្យ GDP របស់ប្រទេសជប៉ុនធ្លាក់ចុះនៅពេលប្តូរទៅជា USD។

រដ្ឋមន្ត្រីក្រសួងសេដ្ឋកិច្ចជប៉ុន លោក Yasutoshi Nishimura បាននិយាយថា “វាជាការពិតដែលសក្ដានុពលកំណើនរបស់ប្រទេសជប៉ុនបានថយចុះ។ ប៉ុន្តែយើងនឹងទទួលបានកំណើនកាលពីអតីតកាលឡើងវិញ តាមរយៈវិធានការនាពេលខាងមុខ” ។ ទោះជាយ៉ាងណាក៏ដោយ មន្ត្រីជប៉ុននៅតែសង្កត់ធ្ងន់លើសារៈសំខាន់នៃស្ថិរភាពរូបិយវត្ថុ ដោយពួកគេតែងតែបញ្ចេញមតិដោយប្រុងប្រយ័ត្ន នៅពេលសួរអំពីលទ្ធភាពនៃការធ្វើអន្តរាគមន៍ ដើម្បីជៀសវាងការប៉ះទង្គិចទីផ្សារ។

គួរបញ្ជាក់ដែរថា ប្រទេសជប៉ុនបានរក្សាជំហររបស់ខ្លួនជាមហាអំណាចសេដ្ឋកិច្ចទីបីរបស់ពិភពលោកអស់រយៈពេលជាងមួយទសវត្សរ៍ទៅហើយ។ ខណៈដែលពីមុនពួកគេស្ថិតនៅលំដាប់ទីពីរបន្ទាប់ពីអាមេរិក ប៉ុន្តែបានប្រគល់ឱ្យចិនតាំងពីឆ្នាំ ២០១០។ ក្នុងរយៈពេលប៉ុន្មានឆ្នាំខាងមុខនេះ ចំណាត់ថ្នាក់របស់ប្រទេសជប៉ុនអាចនឹងថយចុះបន្តទៀត ដោយ IMF បានព្យាករណ៍ថា ជប៉ុននឹងធ្លាក់មកចំណាត់ថ្នាក់ទី ៥ ក្នុងរយៈពេល ២០២៦ – ២០២៨ ៕

ប្រទេសម៉ាឡេស៊ី ៖ កាលពីថ្ងៃទី២៤ ខែតុលា ឆ្នាំ២០២៣ នាយករដ្ឋមន្ត្រីម៉ាឡេស៊ី លោក Anwar Ibrahim បានថ្លែងនៅលើវេទិកាដែលមានមនុស្សចូលរួមរហូតដល់១៦.០០០នាក់ ដើម្បីបង្ហាញពីការគាំទ្រពលរដ្ឋប៉ាឡេស្ទីន ។ លោកនាយករដ្ឋមន្ត្រីបានថ្កោលទោសប្រទេសអ៊ីស្រាអែលថា ប្រព្រឹត្តអំពើព្រៃផ្សៃ ហើយលោកប្រើប្រាស់ពាក្យថា «Barbaric» សម្រាប់ការប្រព្រឹត្តមកលើជនស៊ីវិលនៅតំបន់ Gaza ។នាយករដ្ឋមន្ត្រីម៉ាឡេស៊ី លោក Anwar Ibrahim ថ្លែងថា ៖ «វាពិតជាឆ្កួតខ្លាំងណាស់ ដែលបណ្តោយឱ្យគេសម្លា.ប់ជនស៊ីវិលស្លូតត្រង់, សម្លា.ប់ទារក, បំផ្ទុះគ្រាប់បែកនៅមន្ទីរពេទ្យ និងបំផ្លាញសាលារៀននានា ។ នេះគឺជាអំពើមួយសាហា.វព្រៃផ្សៃបំផុតនៅលើពិភពលោក» ។

លោក Anwar Ibrahim បន្តទៀតថា ៖ «ហេតុការណ៍កើតឡើងនេះ មិនមែនជារឿងសាសនាតែមួយនោះទេ ប៉ុន្តែវាជារឿងមនុស្សធម៌ផងដែរ ។ ក្នុងឋានៈយើងជាមនុស្សដូចគ្នា យើងត្រូវតែមានអារម្មណ៍យល់ចិត្តគ្នាទៅវិញទៅមក» ។

បណ្តាប្រទេសនានានៅលើពិភពលោកលើកឡើងថា ម៉ាឡេស៊ីជាប្រទេសមួយក្នុងតំបន់អាស៊ី ដែលបានបង្ហាញពីគោលជំហរច្បាស់លាស់បំផុត ហើយការជួបជុំគ្នារបស់ពលរដ្ឋម៉ាឡេស៊ីលើកនេះចាត់ទុកថា គឺជាការជួបជុំដ៏ធំបំផុតដើម្បីបង្ហាញពីគោលជំហររបស់ខ្លួនក្នុងការគាំទ្រពលរដ្ឋប៉ាឡេស្ទីន ៕ ប្រភព ៖ Morning News