ប្រទេសចិន៖ សាលាបណ្ដុះបណ្ដាលរបស់ប្រទេសចិនដែលត្រូវបានរចនាឡើងដើម្បីឱ្យសិស្សសិក្សាស្រាវជ្រាវ និងសម្រាកខួរក្បាល ក៏ដូចជាហាត់កីឡា ឬរៀនសិល្បៈផ្សេងៗ ត្រូវបានមហោស្រពស្ថាបត្យកម្មពិភពលោក (WAF) ដាក់ឈ្មោះជាអគារដ៏ល្អបំផុតរបស់ពិភពលោកប្រចាំឆ្នាំ ២០២៣ កាលពីថ្ងៃទី ១ ខែធ្នូកន្លងទៅ។

យោងតាមប្រភព័ត៌មាន CNN បានឱ្យដឹងថា សាលាវិទ្យាល័យដ៏ល្បីល្បាញនេះមានឈ្មោះថា Huizhen ស្ថិតក្នុងទីក្រុង Ningbo ខេត្ត Zhejiang ភាគខាងកើតប្រទេសចិន។ សាលារៀនដ៏សំខាន់នៃទីក្រុង Ningbo មានទីតាំងនៅលើផ្ទៃដី ៦២,០០០ ម៉ែត្រការ៉េ ដោយមានសួនច្បារលើដំបូល និងមានដើមឈើរាប់រយជុំវិញបរិវេណ រួមទាំងមានទីលានកីឡាដែលមានផ្លូវរត់ប្រវែង ៤០០ ម៉ែត្រផងដែរ។

អគារនេះមានសាលបង្រៀនបើកចំហរចំនួន ៤ និងមានថ្នាក់សម្រាប់សិក្សាចំនួន ៣០ ក៏ដូចជាមានសិស្សប្រមាណ ១,៥០០ នាក់។ នៅក្នុងទីធ្លានៃសាលារៀន Huizhen ក៏មានមានរុក្ខជាតិចំនួន ៤០ ប្រភេទដែលមានខ្យល់ចេញចូលល្អ និងមានកាប៊ីនដែលត្រូវបានរចនាឡើងដូចជាផ្ទះដើមឈើ ឬបន្ទប់ដែលមានតម្លាភាព ដែលអាចឱ្យសិស្សានុសិស្សអង្គុយលេង ឬដាំដើមឈើជាដើម។

យោងតាមស្ថាបត្យកររបស់ Approach Design Studio បាននិយាយថា សាលារៀនគឺជាកន្លែងដែលផ្តោតលើការបង្រៀនប្រកបដោយប្រសិទ្ធភាព ហើយក្នុងពេលតែមួយត្រូវការបំផុសគំនិតដោយសេរី។ នៅក្នុងការពិពណ៌នាគម្រោង ស្ថាបត្យករក៏បានពន្យល់ដែរថាពួកគេចង់ជួយសិស្សឱ្យ “សម្រាក កែសម្រួលគំនិតរបស់ពួកគេ និងស្វែងរកភាពស្រស់ស្អាត” នៅខាងក្រៅថ្នាក់រៀន។ ហេតុនេះហើយ ការរចនានេះនឹងជួយលើកទឹកចិត្តសិស្សឱ្យដើរ ស្រូបខ្យល់អាកាសបរិសុទ្ធ និងបន្ថយសម្ពាធក្នុងការសិក្សា។

ក្រុមស្ថាបត្យករបានបន្តទៀតថា ការរចនាត្រូវបានជ្រើសរើសពីគម្រោងជិត ២៥០ ដែលត្រូវបានជ្រើសរើសក្នុងបញ្ជីសម្រាំង រួមទាំងស្ថានីយថ្មីរបស់អាកាសយានដ្ឋាន Newark Liberty International Airport សារមន្ទីរ Holocaust របស់ប្រទេសអូស្ត្រាលីនៅទីក្រុងមែលប៊ន និងពហុកីឡដ្ឋានជាតិថ្មីទាំងក្នុងប្រទេសកម្ពុជា និងសេណេហ្គាល់។

គួរបញ្ជាក់ដែរថា ពានរង្វាន់កំពូលមួយនៅក្នុងឧស្សាហកម្មស្ថាបត្យកម្មនេះ ត្រូវបានវិនិច្ឆ័យជារៀងរាល់ឆ្នាំដោយក្រុមអ្នកជំនាញដែលមានសមាជិក ១៤០ នាក់ក្នុងអំឡុងពិធីបុណ្យស្ថាបត្យកម្មពិភពលោក។ ការរចនាដែលឈ្នះរង្វាន់លើកទី ១ ក្នុងឆ្នាំនេះត្រូវបានវាយតម្លៃខ្ពស់ដោយគណៈវិនិច្ឆ័យចំពោះការបំបែកអនុសញ្ញារចនាសាលា។ លោក Paul Finch នាយកកម្មវិធីរបស់ WAF បានអត្ថាធិប្បាយថា “គាត់ពិតជាភ្ញាក់ផ្អើលនិងរីករាយខ្លាំងណាស់នៅពេលដែលគាត់ទស្សនាគម្រោងរចនាដ៏ល្អឥតខ្ចោះបែបនេះ”៕

ប្រទេសថៃ ៖ មុនពេលចូលរួមក្នុងសិក្ខាសាលាដើម្បីស្តាប់យោបល់ និងតម្រូវការរបស់ពលរដ្ឋ លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានលើកឡើងអំពីវីដេអូមួយល្បីល្បាញក្នុងបណ្តាញសង្គម ដែលបង្ហាញពីភ្ញៀវទេសចរចិនម្នាក់ស្លៀកពាក់ឯកសណ្ឋានប៉ូលិសថៃ ។ ភ្ញៀវទេសចរចិនរូបនេះថែមទាំងបានបង្ហាញមួកពណ៌ខ្មៅប៉ាក់ត្រាផែនដីថៃទៀតផង ។ លោកនាយករដ្ឋមន្ត្រីថៃបញ្ជាក់ថា វាមិនត្រឹមត្រូវទេ ហើយប្រទេសថៃត្រូវតែចាត់ការបញ្ហានេះជាបន្ទាន់ ដើម្បីកុំឱ្យប៉ះពាល់ដល់វិស័យទេសចរណ៍ ។

នៅពេលអ្នកសារព័ត៌មានសួរថា តើលោកនាយករដ្ឋមន្ត្រីបានបញ្ជាឱ្យស្នងការនគរបាលជាតិដោះស្រាយបញ្ហានេះហើយឬនៅ? លោក សេដ្ឋា ថាវីស៊ីន នាយករដ្ឋមន្ត្រីថៃលើកឡើងថា លោកបានបញ្ជារួចរាល់ហើយ ហើយលោកក៏បានបញ្ជាឱ្យរដ្ឋមន្ត្រីក្រសួងទេសចរណ៍ និងកីឡា និងអាជ្ញាធរទេសចរណ៍ថៃដោះស្រាយបញ្ហានេះផងដែរ ។

លោកនាយករដ្ឋមន្ត្រីថៃបន្តថា វាមិនគួរឱ្យជឿទេ ហើយក៏មិនអាចទៅរួចដែរ ដែលមានព័ត៌មានបែបនេះផ្សព្វផ្សាយចេញមក ។ លោកបានជជែកជាមួយក្រុមការងារ ដើម្បីឱ្យពួកគេគ្រប់គ្រងការងារឱ្យបានល្អ ពីព្រោះព័ត៌មានក្លែងក្លាយធ្វើឱ្យប៉ះពាល់ដល់ភាពរីកចម្រើនរបស់ប្រទេសជាតិ ។ ចំណែកការចូលរួមក្នុងសិក្ខាសាលាវិញ លោកសប្បាយរីករាយ ដោយលោកពុំចាំបាច់និយាយអ្វីទេ ព្រោះការចូលរួមនេះ លោកគ្រាន់តែអង្គុយស្តាប់បញ្ហាផ្សេងៗរបស់ពលរដ្ឋ ។

លោកនាយករដ្ឋមន្ត្រីថៃថ្លែងថា ៖ «អ្នកចូលរួមក្នុងសិក្ខាសាលាបានយល់ឃើញបែបណាខ្លះ ហើយពួកគេចង់ឱ្យប្រទេសជាតិដើរទៅរកទិសដៅណា ។ ចំណុចសំខាន់បំផុត យើងកុំភ្លេចថា សមាជិកសភាតំណាងរាស្ត្រ គឺជាអ្នកតំណាងឱ្យពលរដ្ឋ ។ ដូច្នេះហើយ ទើបខ្ញុំចង់មកស្តាប់ថា តើពួកគេគិតឃើញដូចម្តេច? ពលរដ្ឋបារម្ភលើបញ្ហាអ្វីខ្លះ ឬពលរដ្ឋចង់បានអ្វី ។ យើងក៏មានក្រុមការងារមកពីវិមានរដ្ឋាភិបាលផងដែរ បានមកចូលរួមស្តាប់ការបញ្ចេញយោបល់របស់ពលរដ្ឋ» ។

ចំណែកវីដេអូជនជាតិចិនស្លៀកពាក់ឯកសណ្ឋានប៉ូលិសថៃនេះ ទើបតែបង្ហោះក្នុងបណ្តាញសង្គមកាលពីដើមខែធ្នូ ឆ្នាំ២០២៣ ។ ពលរដ្ឋថៃលើកឡើងថា តើគិតថាខ្លួនឯងមានប្រាក់ច្រើន ចង់ធ្វើអ្វីក៏បាន មែនទេ? ខណៈពលរដ្ឋថៃខ្លះទៀតថា ជនជាតិចិនរូបនេះបានស្លៀកពាក់ឯកសណ្ឋានប៉ូលិសថៃ ថែមទាំងមានប៉ូលិសថៃឈរចាំបើកទ្វាររថយន្តឱ្យទៀតផង ។

បើតាមលោក ចាំរូន ឆៃស៊ី ជាប៉ូលិសផ្នែកហ្វឹកហាត់នៅការិយាល័យប៉ូលិសកណ្តាលប្រទេសថៃឱ្យដឹងថា ហេតុការណ៍នេះបានកើតឡើងកាលពីល្ងាចថ្ងៃទី៣ ខែធ្នូ ឆ្នាំ២០២៣ គឺមានភ្ញៀវទេសចរចិនចំនួន២នាក់បានមកហាត់បា.ញ់កាំភ្លើ.ងនៅទីលានខាងក្រោយនៃការិយាល័យប៉ូសិសបង្ក្រាបថ្នាំញៀ.ន ។ ពួកគេបានបា.ញ់កាំភ្លើងរួចរាល់នៅម៉ោង៥ល្ងាច បន្ទាប់មក ទីលានបា.ញ់កាំភ្លើ.ងបានបិទ ហើយជនជាតិចិនទាំង២នាក់គ្មានរថយន្តជិះចេញមកក្រៅទេ ។ ពួកគេត្រូវដើរឆ្ងាយរហូតដល់ជាង១គីឡូម៉ែត្រ ឃើញបែបនេះ លោកក៏ប្រាប់ឱ្យពួកគេឡើងជិះរថយន្តរបស់លោកចេញមកក្រៅទីលាន ដើម្បីហៅរថយន្តតាក់ស៊ីជិះ ។

លោក ចាំរូន ឆៃស៊ី បន្តថា នៅក្នុងរថយន្តរបស់លោក គឺមានឯកសណ្ឋានប៉ូលិសនៅក្នុងនោះ ស្រាប់តែជនជាតិចិនរូបនេះយកវាមកពាក់ខ្លួនឯង ហើយនិយាយថា ចង់ថតរូបទុកមើល ។ លោកក៏មិនដឹងថា ជនជាតិចិនរូបនេះថតវីដេអូយកទៅបង្ហោះក្នុងបណ្តាញសង្គម និងធ្វើឱ្យមានការយល់ខុសកើតឡើង ។ លោកបញ្ជាក់ថា លោកគ្រាន់តែជួយយកអាសារពួកគេ និងគ្មានចេតនាមិនល្អ ឬទទួលបានផលប្រយោជន៍អ្វីទេ ។ លោកក៏មិនយល់ថា ជនជាតិចិននិយាយបែបណាខ្លះទេក្នុងបណ្តាញសង្គម ដែលធ្វើឱ្យប៉ះពាល់ដល់មុខមាត់ប្រទេសជាតិ ៕ ប្រភព ៖ The better

ប្រទេសចិន៖ អ្នកវិទ្យាសាស្ត្រជនជាតិចិន នឹងធ្វើតេស្តលើកុមារដែលមានជំងឺអូទីស្សឹមជាលើកដំបូង ដោយប្រើប្រាស់ថ្នាំម្យ៉ាងដែលអាចបំបាត់ជំងឺនេះ បន្ទាប់ពីព្យាបាលដោយជោគជ័យលើទៅសត្វកណ្តុរ។

យោងតាមប្រភពព័ត៌មាន The Straits Times ដែលបានរាយការណ៍កាលពីថ្ងៃទី៤ ខែធ្នូថា អ្នកវិទ្យាសាស្ត្របានបង្ហាញថ្នាំមួយប្រភេទហៅថា “ស៊ូរ៉ាមីន” ដែលថ្នាំនេះត្រូវបានប្រើប្រាស់រួចជាស្រេចដើម្បីព្យាបាលជំងឺងងុយដេកនៅទ្វីបអាហ្រ្វិក ក៏ដូចជាបានពិសោធន៍រោគសញ្ញាអូទីស្សឹមទៅលើសត្វកណ្តុរដោយជោគជ័យផងដែរ។

ក្រុមអ្នកស្រាវជ្រាវដែលបានសាទរពីស្ថាប័នសិក្សា និងវេជ្ជសាស្ត្រនានាក្នុងទីក្រុងសៀងហៃ បាននិយាយថា ការព្យាបាលជម្ងឺអូទីស្សឹមអាចមានលក្ខណៈសាមញ្ញនោះទេ ដោយគ្រាន់តែផ្លាស់ប្តូរនៃហ្សែន MEF2C ដែលស្រដៀងគ្នាទៅនឹងអ្នកជំងឺហ្សែនផ្សេងទៀតផងដែរ។ អ្នកវិទ្យាសាស្ត្របានបន្តទៀតថា នៅក្នុងការពិសោធន៍កន្លងទៅ ពួកយើងបានចាក់ថ្នាំបំបាត់រោគសញ្ញានៃជំងឺអូទីស្សឹមបានតាមរយៈការកែតម្រូវហ្សែនដែលផ្លាស់ប្តូរនៅក្នុងខួរក្បាលរបស់សត្វកណ្តុរ។ទោះជាយ៉ាងណាក៏ដោយ ក្រុមអ្នកស្រាវជ្រាវនៅមិនទាន់មានវិធីព្យាបាលច្បាស់លាស់ទៅលើមនុស្សដែលមានជំងឺអូទីស្សឹមនោះទេ មានន័យថាថ្នាំដែលចេញពីវេជ្ជបញ្ជាដើម្បីជួយដល់អាកប្បកិរិយាចំពោះអ្នកជំងឺ ASD គឺជាថ្នាំពិសោធន៍ដោយជោគជ័យទៅលើសត្វកណ្តុរប៉ុណ្ណោះ ដោយមិនទាន់បានព្យាបាលទៅលើមនុស្សនៅឡើយទេ។អូទីស្សឹម (ASD) គឺជាជំងឺដែលពិបាកក្នុងការប្រាស្រ័យទាក់ទងជាមួយអ្នកដទៃ ឬអាចបង្ហាញអាកប្បកិរិយាដដែលៗ ក៏ដូចជាត្រូវបានផ្សារភ្ជាប់ទៅនឹងជំងឺសរសៃប្រសាទផ្សេងទៀតដូចជាជំងឺឆ្កួតជ្រូកជាដើម ដោយសារអ្នកជំងឺនេះមានផ្ទុកហ្សែន MEF2C។

ទោះជាយ៉ាងណា យោងតាមក្រុមអ្នកវិទ្យាសា្តស្ត្របានឱ្យដឹងទៀតថា “ការព្យាបាលដោយការកែសម្រួលហ្សែននឹងត្រូវធ្វើទៅបាននាពេលអនាគតដ៏ខ្លីខាងមុខនេះ” ដោយអ្នកជំងឺអូទីស្សឹមនឹងមានការព្យាបាលស្រដៀងគ្នាទៅនឹងអ្នកជំងឺដែលទទួលរងពីជំងឺវិវឌ្ឍន៍ហ្សែនផ្សេងទៀតផងដែរ៕

ប្រទេសសិង្ហបុរី ៖ កាលពីថ្ងៃទី៥ ខែធ្នូ ឆ្នាំ២០២៣ សារព័ត៌មានបរទេសរាយការណ៍ថា ប្រទេសសិង្ហបុរីត្រៀមបង្កើនចំនួនបុគ្គលិកបម្រើការផ្នែកបច្ចេកវិទ្យា AI រហូតដល់១៥.០០០នាក់ ដោយសិង្ហបុរីនឹងអប់រំពលរដ្ឋក្នុងតំបន់ និងជួលបុគ្គលិកមានជំនាញពីក្រៅប្រទេស ។ វាជាផ្នែកមួយនៃយុទ្ធសាស្ត្រថ្នាក់ជាតិសម្រាប់ការអភិវឌ្ឍបច្ចេកវិទ្យារបស់សិង្ហបុរី ។

លោក Lawrence Wong ឧបនាយករដ្ឋមន្ត្រីសិង្ហបុរី បានថ្លែងក្នុងពិធីមួយកាលពីថ្ងៃទី៤ ខែធ្នូ ឆ្នាំ២០២៣ ថា ៖ «ប្រទេសសិង្ហបុរីជឿជាក់ទៅលើសក្តានុពលរយៈពេលវែងរបស់បច្ចេកវិទ្យា AI ហើយយើងនឹងប្រើប្រាស់ផលប្រយោជន៍ពីសមត្ថភាពរបស់ AI ទាំងស្រុងដើម្បីកែលម្អជីវិតរបស់យើង ។ រីឯអ្នកវិទ្យាសាស្ត្រ និងវិស្វករផ្នែកស្រាវជ្រាវ ពួកគេគឺជាឆ្នឹងខ្នងរបស់ AI» ។ នេះបើយោងតាមការចុះផ្សាយរបស់សារព័ត៌មាន Bloomberg ។

ជាមួយគ្នានេះ ប្រទេសសិង្ហបុរីនឹងឈានឆ្ពោះទៅមុខជាមួយយុទ្ធសាស្ត្របច្ចេកវិទ្យា AI តាមរយៈការប្រើប្រាស់ប្រយោជន៍ផ្សេងៗរបស់រដ្ឋាភិបាល ដូចជា ការគាំទ្រគម្រោង AI របស់ក្រុមហ៊ុនទើបបង្កើតថ្មី រួមទាំងជំរុញឱ្យស្ថាប័ននានាបង្កើតមជ្ឈមណ្ឌល AI ក្នុងប្រទេស ។ សិង្ហបុរីសង្ឃឹមថា យុទ្ធសាស្ត្រនេះនឹងទាក់ទាញជនបរទេសដែលមានជំនាញផ្នែក AI ឱ្យមកធ្វើការនៅសិង្ហបុរីកាន់តែច្រើន ។

បើតាមសេចក្តីថ្លែងការណ៍ពីរដ្ឋាភិបាលសិង្ហបុរីបញ្ជាក់ថា ប្រទេសសិង្ហបុរីបានដាក់ចេញនូវផែនការយុទ្ធសាស្ត្រផ្នែកបច្ចេកវិទ្យា AI ដែលទទួលបានការកែលម្អ ។ សិង្ហបុរីមានគោលដៅបង្កើតប្រព័ន្ធអេកូឡូស៊ីប្រកបដោយទំនួលខុសត្រូវ និងអាចជឿជាក់បាន ។ វាជាការការពារផលប៉ះពាល់អវិជ្ជមាន ឬការប្រើប្រាស់បច្ចេកវិទ្យា AI នៅក្នុងផ្លូវខុស ។ លើសពីនេះ រដ្ឋាភិបាលសិង្ហបុរីក៏មានគម្រោងអប់រំពីបច្ចេកវិទ្យា AI ដល់ពលរដ្ឋរស់នៅក្នុងតំបន់ផងដែរ តាមរយៈគម្រោងអប់រំផ្សេងៗ ៕ ប្រភព ៖ Bangkok biznews

ប្រទេសជប៉ុន ៖ ហាងមួយកន្លែងនៅប្រទេសជប៉ុនបានផ្តល់សេវាកម្មពិសេសសម្រាប់អតិថិជន ហើយសេវាកម្មពិសេសនេះបានល្បីល្បាញនៅក្នុងបណ្តាញសង្គមជប៉ុនយ៉ាងខ្លាំង ។ ហាងនេះមានសេវាកម្មឱ្យបុគ្គលិកស្រីឈរទះកំផ្លៀងអតិថិជន មុនពេលអតិថិជនទទួលទានអាហារ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៥ ខែធ្នូ ឆ្នាំ២០២៣ ។

បើទោះជាសេវាកម្មនេះប្លែកខ្លាំងក្តី ប៉ុន្តែវាទទួលបានការគាំទ្រពីសំណាក់អតិថិជនមិនតិចនាក់ទេ ។ បុគ្គលិកធ្វើការក្នុងហាងប្រាប់ថា មានអតិថិជនជាច្រើននាក់ចាប់អារម្មណ៍ចង់ទទួលយកបទពិសោធន៍ឈឺចុកចាប់បែបថ្មីជាហូរហែ រហូតដល់ខាងហាងត្រូវបង្កើនចំនួនបុគ្គលិកបន្ថែមទៀត ។

កាលពីមុន ហាងបានកំណត់ឱ្យបុគ្គលិកស្រីជាអ្នកទះកំផ្លៀងអតិថិជនតាមការស្នើសុំពីអតិថិជនប៉ុណ្ណោះ ប៉ុន្តែនៅពេលមានអតិថិជនត្រូវការសេវាកម្មនេះកាន់តែច្រើន ហាងក៏បានជួលបុគ្គលិកពីខាងក្រៅមកជួយទះកំផ្លៀងអតិថិជនបន្ថែមទៀត ។ ចំណែកថ្លៃទះកំផ្លៀងវិញ អតិថិជនត្រូវបង់ប្រាក់ឱ្យហាង ចំនួន១០០យេនក្នុង១លើក ។

បើតាមសារព័ត៌មានចិនរាយការណ៍ថា ពេលខ្លះ ហាងនេះបានតម្រូវឱ្យអតិថិជនបង់ប្រាក់រហូតដល់៥០០យេនឯណោះសម្រាប់ការទះកំផ្លៀង១លើក ដើម្បីឱ្យអតិថិជនមានសិទ្ធិជ្រើសរើសបុគ្គលិកស្រីណាម្នាក់ ដែលខ្លួនចង់ឱ្យនាងមកទះកំផ្លៀង ។

សារព័ត៌មានរាយការណ៍ទៀតថា សេវាកម្មនេះទទួលបានការពេញនិយមខ្លាំងពីអតិថិជនបុរស និងនារី រួមទាំងភ្ញៀវទេសចរបរទេសផងដែរ ។ លើសពីនេះ គ្មានអតិថិជនណាម្នាក់បង្ហាញអាកប្បកិរិយាខឹងសម្បារ ឬមិនពេញចិត្ត ដោយសារត្រូវបានគេទះកំផ្លៀងឡើយ ។ ផ្ទុយទៅវិញ អតិថិជនបានបង្ហាញទឹកមុខរីករាយជាងមុន ក្រោយទទួលបានការទះកំផ្លៀងជាច្រើនដៃ ខណៈអ្នកខ្លះទៀតបានអរគុណដល់បុគ្គលិកទៀតផង ។

តាមរយៈវីដេអូបង្ហាញថា ការទះកំផ្លៀងអតិថិជនម្នាក់ៗ គឺជាការធ្វើឡើងយ៉ាងពិតប្រាកដ ដោយគ្មានការបន្ធូរដៃឡើយ ។ ទោះយ៉ាងណា ហាងបានសម្រេចចិត្តផ្អាកសេវាកម្មពិសេសនេះនាពេលកន្លងមក ព្រោះហាងចង់ផ្តោតសំខាន់លើអាជីវកម្មចម្បងវិញ គឺការលក់ភេសជ្ជៈ និងម្ហូបអាហារ ។ ចុងក្រោយ ហាងនេះបានសំណូមពរថា សូមអតិថិជនកុំសួរនាំរកសេវាកម្មទះកំផ្លៀងទៀត ៕ ប្រភព ៖ daily news