ប្រទេសថៃ ៖ កាលពីថ្ងៃទី២៧ ខែតុលា ឆ្នាំ២០២៣ ភ្លើងបានឆាបឆេះផ្សារលក់ដូរនៅព្រំដែនឆងចម ស្រុកកាប់ឈឺង ខេត្តសុរិន្ទ ដែលស្ថិតនៅជាប់ខេត្តឧត្តរមានជ័យ ព្រំដែនអូរស្មាច់ ប្រទេសកម្ពុជា ។ ផ្សារនេះមានតូបលក់ដូរជាច្រើនប្រក់ដំបូលស័ង្កសី ដែលដាក់លក់ទំនិញជាច្រើនដូចជា សម្លៀកបំពាក់កីឡា កាបូប ស្បែកជើង និងទំនិញទូទៅ ។ ក្នុងអំឡុងពេលភ្លើងឆេះ មានខ្យល់បក់ផងនោះ ហើយស្របពេលនៅខេត្តសុរិន្ទចូលដល់រដូវរងា ទើបធ្វើឱ្យភ្លើងកាន់តែឆេះខ្លាំងឡើង ។

សារព័ត៌មានថៃចុះផ្សាយថា មានអាជីវករលក់ដូរជាជនជាតិខ្មែរ និងថៃបាននាំគ្នាជញ្ជូនទំនិញចេញពីតូបលក់ដូររបស់ពួកគេ ដែលភ្លើងកំពុងតែឆេះយ៉ាងសន្ធោសន្ធៅ ។ ប៉ុន្តែអាជីវករខ្លះទៀតបានត្រឹមតែឈរមើលទំនិញដែលត្រូវភ្លើងឆេះ ហើយឱបគ្នាយំប៉ុណ្ណោះ ។

អាជ្ញាធរថៃបានបញ្ជូនរថយន្តពន្លត់ភ្លើងចំនួន៣០គ្រឿងមកកាន់ផ្សារនេះ ហើយពួកគេបានចំណាយពេល១ម៉ោង ទើបអាចគ្រប់គ្រងស្ថានការណ៍បាន ដោយការបាញ់ទឹកពន្លត់ ។ អាជ្ញាធរប្រាប់ថា ភ្លើងបានឆេះតូបលក់ដូរក្នុងផ្សារអស់ចំនួន១៣០តូប ហើយខាតបង់ទឹកប្រាក់អស់ជាង៣២០លានបាត ។ ផ្សារនេះធ្លាប់រងគ្រោះដោយសារភ្លើងឆេះម្តងហើយកាលពីឆ្នាំ២០១០ ហើយនៅពេលនោះ ភ្លើងបានឆាបឆេះទំនិញអស់ប្រមាណ៧០% និងខាតបង់ទឹកប្រាក់អស់ច្រើនជាងពេលនេះទៀត ។ ចំណែកមូលហេតុភ្លើងឆេះនៅពេលនោះ គឺបណ្តាលមកពីការផ្ទុះហ្គាសក្នុងតូបលក់ដូរ ហើយភ្លើងក៏បានរាលដាលខ្លាំង និងពន្លត់មិនទាន់ ។

រីឯមូលហេតុបណ្តាលឱ្យភ្លើងឆេះផ្សារលើកនេះ គឺត្រូវរង់ចាំការស៊ើបអង្កេតជំហានដំបូងរបស់អាជ្ញាធរ ។ បើតាមអាជីវករលក់ដូរក្នុងផ្សារនេះប្រាប់ថា មុនពេលកើតហេតុ ពួកគេបានឃើញអំពូលភ្លើងឆេះហើយរលត់វិញជាច្រើនលើក ។

ក្រោយកើតហេតុ លោក Suthiroj Charoenthanasak អភិបាលស្រុកកាប់ឈឺង ខេត្តសុរិន្ទ បានចុះមកត្រួតពិនិត្យនៅផ្សារឆងចម ហើយលោកក៏បានទំនាក់ទំនងជាមួយភ្នាក់ងារពាក់ព័ន្ធផ្សេងៗ ដើម្បីស្វែងរកកន្លែងទុកដាក់ទំនិញនៅសេសសល់ ៕ ប្រភព ៖ ch3plus

បវរកញ្ញា Nikki de Moura ជា Miss Grand Philippines 2023 បានដាច់ចិត្តទម្លាយអារម្មណ៍របស់ខ្លួនបន្ទាប់ពីរក្សាភាពស្ងប់ស្ងាត់ក្រោយពីបរាជ័យក្នុងកម្មវិធី Miss Grand International 2023 នៅប្រទេសវៀតណាម ដោយមិនបានជាប់ចំណាត់ថ្នាក់កំពូលទាំង២០ (Top20) នៃការប្រកួតឆ្នាំនេះ។ នាងបានបង្ហាញថា «បេះដូងខ្ញុំឈឺចាប់ដោយការខកចិត្ត»។

Nikki de Moura បាននិយាយនៅក្នុងការបង្ហោះ Instagram កាលពីថ្ងៃទី២៦ តុលា ថា៖ «ខ្ញុំបានយកបេះដូង និងព្រលឹងរបស់ខ្ញុំទៅតំណាងប្រទេសហ្វីលីពីន ហើយបេះដូងខ្ញុំឈឺដោយការខកចិត្ត»។ «ប៉ុន្តែទោះប្រឈមមុខនឹងការឈឺចាប់នេះ ខ្ញុំជ្រើសរើសការដឹងគុណ ជីវិតគឺជាដំណើរដែលពោរពេញទៅដោយការឡើងចុះ»។

Miss Grand Philippines 2023 វ័យ១៩ ឆ្នាំរូបនេះ បាននិយាយថា នាងមានឆន្ទៈក្នុងការធ្វើឱ្យបានច្រើនល្អបំផុតគ្រប់ពេលវេលាដោយបានទទួលស្គាល់ថាប្រហែលជាខ្លួននៅក្មេងខ្ចីនៅឡើយ។ ទោះជាយ៉ាងណា នាងនឹងបន្តខិតខំប្រឹងប្រែងរៀនសូត្របន្ថែមទៀតព្រោះខ្លួនជឿថាការខកចិត្តគ្រាន់តែជាជំហានឈានទៅរកភាពជោគជ័យនាពេលអនាគត។ បទពិសោធន៍ពេលដែលឈឺចាប់គឺគ្រាន់តែជាការចាប់ផ្តើមនៃអ្វីដែលធំជាងនេះ។

បន្ទាប់ពី Nikki de Moura បង្ហាញការឈឺចាប់ដោយការខកចិត្ត និងតាំងចិត្តបន្តឆ្ពោះទៅមុខទៀតអ្នកគាំទ្ររបស់នាងនិងបវរកញ្ញាផ្សេងទៀតជាច្រើនបានចូលរួមលើកទឹកចិត្តនាងក្នុងនោះក៏មានម្ចាស់មកុដ MGI 2023 , បវរកញ្ញាកូឡុំប៊ី លំដាប់រងទី២ MGI , Miss Grand Philippines 2021 រួមទាំងបវរកញ្ញាផ្សេងទៀត។

គួរបញ្ជាក់ថា Miss Grand Philippines 2023 រូបនេះបានកើតនៅប្រទេសប្រេស៊ីល ជាកូនកាត់ប្រេស៊ីល ហ្វីលីពីន ដោយមានឪពុកជាជនជាតិប្រេស៊ីល និងម្តាយជាជនជាតិហ្វីលីពីន។ Nikki បានផ្លាស់ទៅរស់នៅប្រទេសហ្វីលីពីនក្នុងឆ្នាំ២០១៦ ដើម្បីបន្តអាជីពជាតារាបង្ហាញម៉ូត។ Nikki de Moura បានគ្រងតំណែងជា Miss Grand Philippines 2023 នៅថ្ងៃទី១៣ ខែកក្កដា ឆ្នាំ២០២៣៕

United Nation ៖ កាលពីថ្ងៃសុក្រទី២៧ខែតុលានេះ មហាសន្និបាតអង្គការសហប្រជាជាតិបានអំពាវនាវឲ្យបញ្ឈប់ការផ្តល់ជំនួយមនុស្សធម៌ជាបន្ទាន់ទៅកាន់អ៊ីស្រាអែលនិងក្រុមប្រយុទ្ធប៉ាឡេស្ទីន ខណៈជំនួយដែលត្រូវផ្គត់ផ្គង់នោះនឹងផ្តល់អត្ថប្រយោជន៍ដល់តំបន់ហ្កាហ្សាស្ទ្រីប និងការពារជនស៊ីវិល។

សេចក្តីសម្រេចដែលបានព្រាងដោយអង្គការសហប្រជាតិនៅអារ៉ាប់នេះពិតជាសំខាន់នៅក្នុងការជួយទ្រទ្រង់កុំឲ្យរីករាលដាលកាន់តែខ្លាំងនៃភ្លើងនយោបាយ ដែលធ្វើឲ្យក្តៅក្រហាយដល់ពិភពលោកទាំងមូលព្រោះតែប្រតិបត្តិការវាយប្រហារនៅតំបន់ហ្កាហ្សាដែលជាការសងសឹកចំពោះការវាយប្រហារដ៏សាហាវឃោរឃៅបំផុតនៃក្រុមហាម៉ាស់មកលើជនស៊ីវិលរបស់អ៊ីស្រាអែលបានចាប់ផ្តើមកាលពីថ្ងៃទី៧ខែតុលានេះ។

មហាសន្និបាទអង្គការសហប្រជាជាតិបានធ្វើការបោះឆ្នោតលើកចុងក្រោយទាក់ទងទៅនឹង «សេចក្តីសម្រេចឈប់ផ្តល់ជំនួយរវាងអ៊ីស្រាអែល-ហាម៉ាសនេះ» ដែលទទួលបាននូវសំឡេងគាំទ្រ១២០អសនៈ ខណៈ៤៥អសនៈជំទាស់ និង១៤អសនៈទៀតមិនបានធ្វើចូលរួមបោះឆ្នោត។ យោងទៅតាមច្បាប់រាប់សន្លឹកឆ្នោតតាមគោលការណ៍«សំឡេងឆ្នោតភាគច្រើន២ភាគ៣» ត្រូវបានកំណត់ថាសេចក្តីសម្រេចនេះជាប់ជាស្ថាពរ ខណៈសំឡេងអ្នកជំទាស់មិនត្រូវបានគេរាប់បញ្ចូលទេ។

រីឯការធ្វើវិសោធនកម្មដំណោះស្រាយរបស់កាណាដាដើម្បីកុំឲ្យមានការថ្កោលទោសទៅលើ «ការវាយប្រហារភេវកម្មនិងការចាប់ចំណាប់ខ្មាំងរបស់ក្រុមហាម៉ាស់» គឺមិនទទួលបានជោគជ័យទៅលើការបោះឆ្នោតយកសំឡេងឆ្នោតភាគច្រើន២ភាគ៣ទេ គឺមាន៨៨អសនៈ ទទួលបាននូវការគាំទ្រ៥៥អសនៈ និងប្រឆាំង២៣អសនៈ។

គួរបញ្ជាក់ផងដែរថា នៅមុនពេលបោះឆ្នោត រដ្ឋមន្រ្តីការបរទេសប្រទេសហ្សកដានីបាននិយាយថាការបោះឆ្នោតប្រឆាំងនឹងសេចក្តីសម្រេចរបស់មហាសន្និបាតអង្គការសហប្រជាជាតិ គឺជាការមានន័យថាជសង្ក្រាមនេះគឺគ្មានអត្ថន័យអ្វីទេ និងការសម្លាប់គ្នាយ៉ាងរង្គើរនេះក៏គ្មានន័យដែរ។ លោកក៏បានបង្ហោះនៅក្នុងគណនីយ Twitter ដែរថាមានមនុស្សរាប់លាននាក់កំពុងរងចាំមើលលទ្ធផលនៃការបោះឆ្នោត ហើយប្រវត្តិសាស្រ្តនឹងធ្វើការវិនិច្ឆ័យ។CAN News

កូរ៉េខាងត្បូង៖ កាលពីថ្ងៃសៅរ៍ទី២៧ខែតុលានេះ សេចក្តីរាយការណ៍មួយចេញពីទីក្រុងសេអ៊ូលបានលើកថា កូរ៉េខាងត្បូងនិងសហរដ្ឋអាមេរិកនឹងបើកប្រតិបត្តិការសមយុទ្ធរួមគ្នាមួយនាពេលអនាគតទៅលើការកែច្នៃយន្តហោះគ្មានមនុស្សបើក និងបំពាក់ឧបករណ៍ចាប់សញ្ញ”ឡាស៊ែរ” ដែលជាកិច្ចខិតខំប្រឹងប្រែងមួយក្នុងការធ្វើទំនើបកម្មយោធារបស់ពួកគេ។

យុទ្ធនាការនេះបានកើតឡើងនៅពេលដែលយោធារបស់កូរ៉េខាងត្បូងបានធ្វើសមយុទ្ធមួយឈ្មោះ Hogok កាលពីរដូវស្លឹកឈើជ្រុះមុននេះ ក្នុងគោលបំណងដើម្បីទប់ទល់ជាមួយអាវុធនុយក្លេអ៊ែរនិងមីស៊ីលរបស់កូរ៉េខាងជើង។

គេសង្កេតឃើញថាមានកូនទាហានចំនួនជាង១២០នាក់របស់កូរ៉េខាងត្បូងនិងអាមេរិកដែលបានចូលរួមបណ្តុះបណ្តាលត្រៀមប្រយុទ្ធក្នុងការធ្វើសឹកសង្គ្រាមជាមួយនឹងសត្រូវ ដែលការវឹកហាត់នេះមានមជ្ឈមណ្ឌលវឹកហាត់កងទ័ពនៅលើភ្នំមួយ គឺមានលក្ខណៈស្រដៀងគ្នានឹងការវឹកហាត់នាទីក្រុងព្យុងយ៉ាងនៃប្រទេសកូរ៉េខាងជើងដែរ។

ម៉្យាងវិញទៀត សមយុទ្ធនេះបានបំពាក់ជាមួយនឹងគ្រឿងសព្វាវុធបច្ចេកទេសខ្ពស់ទាំងអស់នៅក្នុងគោលបំណងពង្រឹងនូវសមត្ថិភាពសមយុទ្ធនាពេលអនាគតដោយបានបំពាក់ជាមួយនឹងប្រព័ន្ធភ្ជាប់ឡាស៊ែរចម្រុះដើម្បីធ្វើជាឧបករណ៍ចាប់សញ្ញាផ្សេងៗក្នុងពេលធ្វើសមយុទ្ធជាក់ស្តែង។

យន្តហោះគ្មានមនុស្សបើកនេះជាច្រើនប្រភេទផ្សេងទៀតធ្វើឡើងក្នុងគោលបំណងដើម្បីធ្វើជាឈ្លបយកការ កំណត់អន្តសញ្ញាណសត្រូវ វាស់ស្ទង់ការស្លាប់របស់សត្រូវ ក៏ដូចជាបំពាក់កាំភ្លើងក្នុងការវាយប្រហារដោយស្វ័យប្រវត្តិជាដើម ខណៈកូរ៉េខាងជើងបានផលិតយន្តហោះគ្មានអ្នកបើកនេះឡើងដើម្បីដឹកមនុស្សដែលរងរបួសពីសង្គ្រាម។

មេបញ្ជាការកងពលថ្មើរជើងជំនាន់ទី២៥របស់កូរ៉េខាងត្បូងបាននិយាយថា យើងនឹងអាចដឹងពីសកម្មភាពបម្លាស់ទីរបស់សត្រូវតាមរយៈការប្រើប្រាស់ត្រូននេះ ហើយវាយប្រហារទៅលើពួកគេតាមរយៈឧបករណ៍ដ៏ទំនើបនេះ ដែលធ្វើឲ្យពួកយើងមានប្រៀបជាងនៅក្នុងការយកជ័យជំនះទៅលើសត្រូវ និងកាត់បន្ថយការខាតបង់ក៏ដូចជាកាត់បន្ថយចំនួនអ្នករងរបួស អ្នកស្លាប់នៅក្នុងជួររកងទ័ពយើងផងដែរ។

គួរបញ្ជាក់ផងដែរថា កូរ៉េខាងជើងក៏បានបង្កើតនៅក្រុមកងពលតូចមួយផងដែរដែលគឺឲ្យឈ្មោះថា Tiger កាលពីឆ្នាំមុន គឺជាអង្គភាពសាកល្បងសម្រាប់ធ្វើប្រតិបត្តិការសមយុទ្ធយោធាដំបូងនាពេលអនាគតតាមរយៈការប្រើប្រាស់ត្រូនឬគេហៅថាយន្តហោះគ្មានមនុស្សបើក ដាក់នូវប្រព័ន្ធចាប់សញ្ញា និងបំពាក់នូវឧបករណ៍វាយប្រហារដោយស្វ័យប្រវត្តិ ក្នុងគោលបំណងដើម្បីផ្លាស់ប្តូរទៅជាសមប្រយុទ្ធសម័យទំនើបផ្នែកលើគំរូនៃឆ្នាំ២០៤០។ បន្ថែមពីលើសមយុទ្ធរួមនេះ កូរ៉េខាងត្បូងក៏បានរៀបចំនូវព្រឹត្តិការប្រកួតធ្វើសង្គ្រាម«ប្រដាប់អាវុធអនាគតលក្ខណៈអន្តរជាតិ» ជាលើកដំបូងរបស់ខ្លួន ដែលមានរយៈពេល៥ថ្ងៃដោយបានបញ្ចប់នៅថ្ងៃទី២៨ខែតុលានេះផងដែរ ដែលមានការចូលរួមដោយកងទ័ពប្រមាណ៣០០នាក់ ក្នុងចំណោម៥ប្រទេសរួមមាន អាមេរិក កូរ៉េខាងត្បូង អង់គ្លេស អ៊ូសបេគីស្ថាន និងកម្ពុជា។ CAN News

បរទេស៖ យោងតាមគណៈកម្មាធិការការពារអ្នកសារព័ត៌មាន (CPJ) បានឱ្យដឹងថា បីសប្តាហ៍កន្លងមកនៃសង្រ្គាមអ៊ីស្រាអែល និងហាម៉ាស គឺជាគ្រោះថ្នាក់បំផុតសម្រាប់អ្នកកាសែតដែលគ្របដណ្តប់ជម្លោះក្នុងរយៈពេលជាងបីទសវត្សរ៍។
CPJ បាននិយាយនៅក្នុងសេចក្តីថ្លែងការណ៍មួយដែលបានចេញផ្សាយកាលពីថ្ងៃទី ២៧ ខែតុលាថា យ៉ាងហោចណាស់អ្នកកាសែតចំនួន ២៩ នាក់ត្រូវបានសម្លាប់ចាប់តាំងពីការវាយប្រហារលើកដំបូងដោយក្រុមហាម៉ាសកាលពីថ្ងៃទី ៧ ខែតុលា។ អង្គការនេះបានបន្ត ទៀតថា ខ្លួនបានចាប់ផ្តើមតាមដានការស្លាប់របស់អ្នកកាសែតដែលរាយការណ៍ពីជម្លោះតាំងពីឆ្នាំ ១៩៩២ មកម្លេះ។

ក្នុងចំណោមអ្នកកាសែតដែលបានស្លាប់នោះ យ៉ាងហោចណាស់មានជនជាតិប៉ាឡេស្ទីន ២៤នាក់ អ៊ីស្រាអែល ៤នាក់ និងលីបង់ ១នាក់។ ទោះជាយ៉ាងណាក៏ដោយ ក្រុមតស៊ូមតិសារព័ត៌មានបានបន្ថែមថា ពួកយើងពិតជាមានការព្រួយបារម្ភជាខ្លាំងដោយសារការដាច់ចរន្តទំនាក់ទំនងនៅហ្គាហ្សា។ សេចក្តីថ្លែងការណ៍របស់ CPJ បានសង្កត់ធ្ងន់ថា “នៅពេលដែលការិយាល័យព័ត៌មានបាត់បង់ទំនាក់ទំនងជាមួយក្រុម និងអ្នករាយការណ៍របស់ពួកគេនៅហ្គាហ្សា ដែលជាសាក្សីឯករាជ្យដែលផ្តល់ព័ត៌មានអំពីការវិវត្ត និងការស្លាប់នៅក្នុងសង្គ្រាមនេះ នោះពិភពលោកកំពុងបាត់បង់បង្អួចចូលទៅក្នុងការពិតនៃគ្រប់ភាគីពាក់ព័ន្ធក្នុងជម្លោះ”។

យោងតាមក្រុមហ៊ុនផ្តល់សេវាទូរគមនាគមន៍ក្នុងស្រុក Jawwal បានឱ្យដឹងថា ទំនាក់ទំនងនៅហ្គាហ្សាត្រូវបានរំខានយ៉ាងខ្លាំងក្នុងរយៈពេលប៉ុន្មានម៉ោងចុងក្រោយនេះ ដោយសារតែការវាយប្រហារតាមអាកាសរបស់អ៊ីស្រាអែល។ ទន្ទឹមនឹងនេះ កងកម្លាំងការពារអ៊ីស្រាអែល (IDF) បាននិយាយថា ពួកគេមិនអាចធានាសុវត្ថិភាពរបស់អ្នកកាសែតដែលរាយការណ៍ពីតំបន់ហ្គាហ្សាបាននោះទេ។

មិនត្រឹមតែអ្នកសារព័ត៌មាន បុគ្គលិកនៃអង្គការអន្តរជាតិ និងអង្គការមនុស្សធម៌ក៏ប្រឈមមុខនឹងគ្រោះថ្នាក់ដល់អាយុជីវិតរបស់ពួកគេនៅក្នុងតំបន់ហ្គាហ្សាផងដែរ។ យោងតាមសេចក្តីថ្លែងការណ៍របស់ទីភ្នាក់ងារការងារជំនួយរបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) នៅថ្ងៃទី ២៧ ខែតុលា ចំនួនបុគ្គលិកអង្គការសហប្រជាជាតិដែលត្រូវបានសម្លាប់នៅហ្គាហ្សាបានកើនឡើងដល់ ៥៣ នាក់ បន្ទាប់ពីមនុស្ស ១៤ នាក់បានស្លាប់នៅក្នុងការវាយប្រហាររយៈពេល ២៤ ម៉ោងចុងក្រោយនេះ៕
ប្រភព៖cfef.com