បរទេស៖ ប្រធានាធិបតីរុស្ស៊ីលោក វ្ល៉ាឌីមៀ ពូទីន បាននិយាយថា លោកនឹងឈរឈ្មោះជាប្រធានាធិបតីម្តងទៀតនៅក្នុងការបោះឆ្នោតឆ្នាំ ២០២៤ ខាងមុខនេះ។

យោងតាមប្រភពព័ត៌មាន CNN ដែលបានរាយការណ៍នៅថ្ងៃទី៨ ខែធ្នូថា លោកពូទីន បាននិយាយនៅក្នុងពិធីមួយនៅឯវិមានក្រឹមឡាំងដែលជាលំនៅដ្ឋានផ្លូវការរបស់ប្រធានាធិបតីរុស្ស៊ីថា លោកនឹងឈរឈ្មោះជាបេក្ខភាពប្រធានាធិបតីនៅឆ្នាំក្រោយ ដែលគ្រោងនឹងប្រព្រឹត្តទៅនៅថ្ងៃទី ១៧ ខែមីនាឆ្នាំ ២០២៤ ក្នុងគោលបំណងពង្រឹងការបន្តកាន់អំណាចរបស់គាត់ជាប្រមុខរដ្ឋ ឬជានាយករដ្ឋមន្ត្រីអស់រយៈពេលជាងពីរទសវត្សរ៍កន្លងមក។

បច្ចុប្បន្នលោកពូទីនមានអាយុ ៧១ ឆ្នាំហើយ ដូច្នេះប្រសិនបើគាត់ឈ្នះការបោះឆ្នោតនៅឆ្នាំក្រោយ លោកពូទីននឹងកាន់តំណែងជាប្រធានាធិបតីរុស្ស៊ីរហូតដល់ឆ្នាំ ២០៣០។ យោងតាមគណៈកម្មាធិការរៀបចំការបោះឆ្នោតកណ្តាលរបស់ប្រទេសរុស្ស៊ីបាននិយាយថា ខ្លួននឹងរៀបចំ “ការបោះឆ្នោតពីតំបន់មួយទៅតំបន់មួយ” ក្នុងរយៈពេលបីថ្ងៃជាប់ៗគ្នានៅថ្ងៃទី ១៥, ១៦ និង ១៧ ខែមីនា ឆ្នាំ២០២៤។ ការបោះឆ្នោតនាពេលខាងមុខនេះក៏នឹងកត់សម្គាល់ជាលើកដំបូងផងដែរដែលប្រជាជននៃតំបន់អ៊ុយក្រែនដែលរុស្ស៉ីបានកាន់កាប់ដូចជា Donetsk, Luhansk, Zaporizhzhia និង Kherson ក៏ត្រូវចូលរួមក្នុងការបោះឆ្នោតប្រធានាធិបតីរុស្ស៉ីផងដែរ។

គួរបញ្ជាក់ដែរថាលោក វ្ល៉ាឌីមៀ ពូទីន បានក្លាយជាប្រធានាធិបតីនៃប្រទេសរុស្ស៊ីក្នុងឆ្នាំ ២០០០ ដោយកាន់តំណែងនេះអស់រយៈពេល ៨ ឆ្នាំហើយបន្ទាប់មកបានក្លាយជានាយករដ្ឋមន្ត្រីនៃប្រទេសរុស្ស៊ីសម្រាប់អាណត្តិ ២០០៨-២០១២ ។ នៅឆ្នាំ ២០១២ និង ២០១៨ លោកពូទីនបានឈ្នះការបោះឆ្នោត ហើយក៏បានកាន់តំណែងជាប្រធានាធិបតីរុស្ស៊ីរហូតមកដល់សព្វថ្ងៃនេះ។ ទោះជាយ៉ាងណាក៏ដោយ បច្ចុប្បន្នយោងតាមលទ្ធផលស្ទង់មតិបង្ហាញថាលោកពូទីនទទួលបានការគាំទ្រពីប្រជាជនរុស្ស៊ីប្រមាណ៨០%៕

ប្រទេសឥណ្ឌា ៖ នៅថ្ងៃទី៩ ខែធ្នូ ឆ្នាំ២០២៣ សារព័ត៌មានបរទេសរាយការណ៍ថា ក្រសួងពាណិជ្ជកម្មឥណ្ឌាបានចេញសេចក្តីថ្លែងការណ៍មួយ កាលពីថ្ងៃទី៧ ខែធ្នូ កន្លងមក អំពីការផ្អាកការនាំចេញខ្ទឹមបារាំងទៅក្រៅប្រទេស ។ ក្នុងសេចក្តីថ្លែងការណ៍បញ្ជាក់ថា វិធានការនេះនឹងអនុវត្តរហូតដល់ថ្ងៃទី៣១ ខែមីនា ឆ្នាំ២០២៤ ។

ប្រទេសឥណ្ឌាបានប្រកាសផ្អាកការនាំចេញខ្ទឹមបារាំងទៅក្រៅប្រទេស ក្រោយពីការដំឡើងអត្រាពន្ធនាំចេញខ្ទឹមបារាំងស្មើរហូតដល់៤០% តាំងពីចុងខែសីហា ឆ្នាំ២០២៣ ហើយការដំឡើងពន្ធនេះនឹងអនុវត្ត រហូតដល់ថ្ងៃទី៣១ ខែធ្នូ ឆ្នាំ២០២៣ ។ អាជ្ញាធរពាក់ព័ន្ធលើកឡើងថា វិធានការផ្អាកការនាំចេញខ្ទឹមបារាំង គឺដើម្បីរក្សាស្ថិរភាពរបស់ទីផ្សារម្ហូបអាហារក្នុងប្រទេសឥណ្ឌា ខណៈបច្ចុប្បន្ននេះ ខ្ទឹមបារាំងនៅប្រទេសឥណ្ឌាមានតម្លៃខ្ពស់ខ្លាំង ។

ប៉ុន្តែមនុស្សមួយចំនួនរិះគន់ថា វិធានការនេះ គឺជាការរកសំឡេងឆ្នោតរបស់រដ្ឋាភិបាលឥណ្ឌា ដោយសារប្រទេសឥណ្ឌានឹងធ្វើការបោះឆ្នោតនៅឆ្នាំ២០២៤ ។ បើឥណ្ឌាដែលជាប្រទេសនាំចេញខ្ទឹមបារាំងលំដាប់ទី១ នៅលើពិភពលោកធ្វើការរឹតបន្តឹងការនាំចេញបែបនេះ វាអាចនឹងធ្វើឱ្យខ្វះខាតខ្ទឹមបារាំងនៅលើទីផ្សារពិភពលោក ។ លើសពីនេះ តម្លៃខ្ទឹមបារាំងនឹងកើនឡើងខ្ពស់ទៀតផង ដោយសារប្រទេសផ្សេងទៀតមិនអាចនាំចេញទំនិញប្រភេទនេះ ក្នុងបរិមាណច្រើនដូចប្រទេសឥណ្ឌាទេ ៕ ប្រភព ៖ daily news

ប្រទេសឥណ្ឌូណេស៊ី ៖ លោក Sandiaga Uno រដ្ឋមន្ត្រីក្រសួងទេសចរណ៍ និងសេដ្ឋកិច្ចឥណ្ឌូណេស៊ី បានលើកឡើងថា រដ្ឋាភិបាលឥណ្ឌូណេស៊ីគ្រោងលើកលែងទិដ្ឋាការសម្រាប់ភ្ញៀវទេសចរមកពី២០ប្រទេស ក្នុងនោះរួមទាំងប្រទេសចិនផងដែរ ដើម្បីទាក់ទាញអ្នកធ្វើដំណើរជាជនបរទេសឱ្យកាន់តែច្រើន ។ នេះបើតាមការចុះផ្សាយរបស់សារព័ត៌មានបរទេសឈ្មោះ Mono News នៅថ្ងៃទី៩ ខែធ្នូ ឆ្នាំ២០២៣ ។

លោក Sandiaga Uno រដ្ឋមន្ត្រីក្រសួងទេសចរណ៍ និងសេដ្ឋកិច្ចឥណ្ឌូណេស៊ី បានថ្លែងទៅកាន់ក្រុមអ្នកសារព័ត៌មាន ក្រោយលោកជួបប្រជុំជាមួយលោក Joko Widodo ប្រធានាធិបតីឥណ្ឌូណេស៊ី នៅទីក្រុងហ្សាកាតា ថា គោលនយោបាយលើកលែងទិដ្ឋាការនេះ ធ្វើឡើងផ្អែកលើការពិចារណាជាច្រើនកត្តា ដូចជា ៖ ផលប៉ះពាល់ផ្នែកសេដ្ឋកិច្ច និងផ្នែកសុវត្ថិភាព ជាដើម ។ លើសពីនេះ ប្រទេសឥណ្ឌូណេស៊ីនឹងរៀបចំគោលនយោបាយនេះឱ្យរួចរាល់រយៈពេល១ខែ មុនការប្រកាសឱ្យអនុវត្តជាផ្លូវការ ។

គួរបញ្ជាក់ថា ប្រទេសឥណ្ឌូណេស៊ីបានកំណត់គោលដៅទទួលយកភ្ញៀវទេសចរបរទេស ស្មើចំនួន១៤លាននាក់នៅឆ្នាំ២០២៤ ហើយឥណ្ឌូណេស៊ីសង្ឃឹមថា ចំនួននេះនឹងមានចំណែកជួយលើកកម្ពស់ដល់តម្លៃសេដ្ឋកិច្ចជាតិ ។ ទោះយ៉ាងណា គេពុំដឹងថា តើប្រទេសឥណ្ឌូណេស៊ីនឹងលើកលែងទិដ្ឋាការដល់ប្រទេសណាខ្លះទេ ក្រៅពីចិន ។

ចុងក្រោយ លោក Sandiaga Uno រដ្ឋមន្ត្រីក្រសួងទេសចរណ៍ និងសេដ្ឋកិច្ចឥណ្ឌូណេស៊ីបញ្ជាក់ថា ៖ «យើងសង្ឃឹមថា នឹងអាចបង្កើនចំនួនការធ្វើដំណើររបស់ភ្ញៀវទេសចរបរទេសស្របតាមគោលដៅកំណត់របស់យើង ។ យើងផ្តោតខ្លាំងទៅលើការកំណត់គោលដៅភ្ញៀវទេសចរបរទេសដែលចំណាយប្រាក់ច្រើន ព្រមទាំងកែលម្អសេដ្ឋកិច្ចនៅក្នុងស្រុកផងដែរ» ៕ ប្រភព ៖ Mono News

ប្រទេសជប៉ុន ៖ កាលពីថ្ងៃទី៧ ខែធ្នូ ឆ្នាំ២០២៣ រដ្ឋាភិបាលជប៉ុនបានបង្ហាញផែនការអនុញ្ញាតឱ្យអ្នកបើកបររថយន្ត ដែលមានលិខិតអនុញ្ញាតត្រឹមត្រូវអាចផ្តល់សេវាកម្មជារថយន្តតាក់ស៊ីបាន ដោយប្រើប្រាស់រថយន្តឯកជន ។ ការអនុញ្ញាតនេះដើម្បីដោះស្រាយបញ្ហាការខ្វះខាតអ្នកបើកបររថយន្តតាក់ស៊ីនៅទូទាំងប្រទេសជប៉ុន នាពេលបច្ចុប្បន្ន ។

នៅក្រោមវិធានការបន្ធូរបន្ថយនេះ បុគ្គលដែលគ្មានលិខិតអនុញ្ញាតផ្តល់សេវាកម្ម ពួកគេអាចផ្តល់សេវាកម្មរថយន្តតាក់ស៊ីបាន ដរាបណា ពួកគេបានឆ្លងកាត់ការហ្វឹកហាត់ជាមុន ហើយក្រុមហ៊ុនតាក់ស៊ីបានជួលពួកគេដោយផ្ទាល់ ។ ទោះយ៉ាងណា ពួកគេនឹងមិនទទួលការអនុញ្ញាតឱ្យបើកបររថយន្តតាក់ស៊ីធម្មតាទេ ។

បច្ចុប្បន្ន ប្រទេសជប៉ុនកំពុងខ្វះខាតអ្នកបើកបររថយន្តតាក់ស៊ីយ៉ាងខ្លាំង ស្របពេលការងើបឡើងវិញផ្នែកសេដ្ឋកិច្ច និងកំណើនភ្ញៀវទេសចរមកកម្សាន្តនៅប្រទេសជប៉ុន ក្រោយពីការឆ្លងរាតត្បាតនៃជំងឺកូវីដ-១៩ បានធូរស្រាល ។

ទោះយ៉ាងណា ក្រុមហ៊ុនជប៉ុនជាច្រើនពុំត្រូវការបុគ្គលិកបន្ថែមទៀតទេ ។ ហេតុនេះ គេនឹងរង់ចាំមើលថា តើការផ្លាស់ប្តូរវិធានការផ្សេងៗនឹងមានប្រសិទ្ធភាព ដើម្បីបង្កើនចំនួនបុគ្គលិកបើកបររថយន្តតាក់ស៊ីដែរឬទេ ។ បើទោះជាមានការផ្លាស់ប្តូរក្តី ប៉ុន្តែចំនួនរថយន្តឯកជនដែលអាចប្រើប្រាស់សេវាកម្មជារថយន្តតាក់ស៊ីបាន គឺមិនត្រូវលើសពីចំនួនរថយន្តតាក់ស៊ីទូទៅទេ ។

ចំណែកថ្លៃធ្វើដំណើរ គឺអាស្រ័យលើការកំណត់របស់ភ្នាក់ងារបើកបរប៉ុណ្ណោះ ។ ជាមួយគ្នានេះ រដ្ឋាភិបាលជប៉ុនបានពន្យារពេលការសម្រេចចិត្តថា នឹងលុបចោលបម្រាមប្រើប្រាស់សេវាកម្មហៅរថយន្ត ។ កន្លងមក អតីតនាយករដ្ឋមន្ត្រីជប៉ុន លោក Yoshihide Suga និងរដ្ឋមន្ត្រីក្រសួងឌីជីថល លោក Taro Kono គឺជាអ្នកគាំទ្រការលុបចោលបម្រាមប្រើប្រាស់សេវាកម្មរថយន្តក្រុង ៕ ប្រភព ៖ mgronline

ប្រទេសថៃ ៖ កាលពីថ្ងៃទី៨ ខែធ្នូ ឆ្នាំ២០២៣ ប្រព័ន្ធផ្សព្វផ្សាយថៃឈ្មោះ Thai TV5 រាយការណ៍ថា លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ នឹងជំរុញកីឡា Muay Thai ឱ្យក្លាយទៅជា Soft Power របស់ថៃ ព្រមទាំងគាំទ្រគ្រូ Muay Thai ទៅបង្រៀននៅក្រៅប្រទេសផងដែរ ។

លោកនាយករដ្ឋមន្ត្រីថៃលើកឡើងបែបនេះ ក្នុងអំឡុងពេលលោក Pimon Srivikorn គណៈកម្មការយុទ្ធសាស្ត្រ Soft Power ផ្នែកកីឡា បានដឹកនាំក្រុម One Championship មកចូលជួបលោក សេដ្ឋា ថាវីស៊ីន នាយករដ្ឋមន្ត្រីថៃ នៅបន្ទប់ពណ៌ស្វាយ អគារថៃឃូហ្វា ក្នុងវិមានរដ្ឋាភិបាល ។ក្រោយពីការជួបគ្នា លោកនាយករដ្ឋមន្ត្រីថៃលើកឡើងថា Muay Thai ចាត់ទុកថា គឺជា Soft Power ដំបូងគេរបស់ប្រទេសថៃ ។ ហេតុនេះ វាជាសកម្មភាពមួយដែលមានពាក្យថា «Thai» នៅក្នុងនោះ ដែលបានផ្តល់តម្លៃជាមួយ Soft Power របស់ប្រទេសថៃ ។ បច្ចុប្បន្ន ប្រទេសអង់គ្លេសមានកន្លែងប្រដាល់ពី៥.០០០ ទៅ៦.០០០កន្លែង ហើយបដិសេធមិនបានថា វាជា Soft Power លំដាប់ទី១ ដែលថៃបានបញ្ជូនទៅកាន់ពិភពលោក ដូចជា ៖ ការផ្សាយបន្តផ្ទាល់ Live Streaming និងលក់ឧបករណ៍កីឡាប្រដាល់ ដែលមានតម្លៃផ្នែកសេដ្ឋកិច្ចដ៏ច្រើនមហាសាល និងផ្តល់ប្រយោជន៍ដល់ប្រទេស ។

លោកនាយករដ្ឋមន្ត្រីថៃក៏បានថ្លែងអំណរគុណដល់លោក Pimon Srivikorn គណៈកម្មការយុទ្ធសាស្ត្រ Soft Power ផ្នែកកីឡា ដែលបានជំរុញកីឡា Muay Thai ។ បច្ចុប្បន្ន ប្រទេសថៃមានអ្នកប្រដាល់លំដាប់ពិភពលោក ដូចជា កីឡាករ បួ ខាវ គឺជាក្តីសង្ឃឹមរបស់ក្មេងជំនាន់ក្រោយ ដែលមានបំណងរួមចំណែកក្នុងកីឡា Muay Thai ។ ចំណែកកម្មវិធីប្រដាល់ One Championship នៅរៀងរាល់ថ្ងៃសុក្រ បានផ្សាយបន្តផ្ទាល់ Live Streaming ដែលធ្វើឱ្យមនុស្សលើពិភពលោករាប់លាននាក់បានទស្សនា ។ ដូច្នេះ រឿង Soft Power កីឡា Muay Thai ជឿថា នៅតែមានសក្តានុពលបន្តទៀត ។

រីឯអាជីពជាអ្នកប្រដាល់ថៃ ពលរដ្ឋថៃចង់បានអាជីពមានស្ថិតស្ថេរ ។ បើក្រឡេកមើលអតីតកាលឃើញថា អាយុរបស់អាជីពប្រដាល់មានរយៈពេលតិចណាស់ ដែលអាចឡើងប្រដាល់បាន ។ បើយើងអាចយកកីឡា Muay Thai ទៅរួមបញ្ចូលក្នុងសកម្មភាពនានាលើពិភពលោក ដោយបង្កើតកន្លែងប្រដាល់ថៃនៅក្រៅប្រទេស យើងនឹងអាចពង្រីកអាជីពនេះដល់អ្នកប្រដាល់បាន ដូចជា អ្នកលេងបាល់ទាត់អាចក្លាយជាគ្រូបង្វឹកបាល់ទាត់ និងក្លាយជាអាជីពមានស្ថេរភាព ។ បច្ចុប្បន្ន មានអ្នកប្រដាល់ថៃជាច្រើននាក់ចង់ទៅបង្រៀន និងបង្កើតកន្លែងប្រដាល់នៅក្រៅប្រទេស ។

ទោះយ៉ាងណា រដ្ឋាភិបាលនឹងជំរុញ ក៏ដូចជាបញ្ជូនអ្នកប្រដាល់ថៃទៅក្រៅប្រទេស និងឱ្យភ្ញៀវទេសចរចូលមករៀនប្រដាល់នៅប្រទេសថៃ រួមទាំងអ្នកចង់បានប្រាក់ចំណូលពីផ្នែកកីឡា ដូចជា អ្នកផលិតឧបករណ៍ប្រដាល់ និងម្ចាស់តារាងបាល់ទាត់ ៕ ប្រភព ៖ Thai TV5

ប្រទេសចិន៖ រដ្ឋាភិបាលចិនបាននិយាយថា ខ្លួននឹងកាត់បន្ថយតម្លៃជាបណ្តោះអាសន្នសម្រាប់ទិដ្ឋាការធ្វើដំណើរក្នុងប្រទេសចំនួន ២៥% ដើម្បីទាក់ទាញចំនួនភ្ញៀវទេសចរបរទេសកាន់តែច្រើន។

យោងតាមប្រភពព័ត៌មាន Nikkei Asia ដែលបានរាយការណ៍នៅថ្ងៃទី៩ ខែធ្នូថ្មីៗនេះថា វិធានការនេះនឹងអនុវត្តចំពោះស្ថានទូតបរទេសទាំងអស់របស់ប្រទេសចិនចាប់ពីថ្ងៃទី១១ ខែធ្នូ ឆ្នាំ២០២៣ រហូតដល់ថ្ងៃទី ៣១ ខែធ្នូ ឆ្នាំ ២០២៤ សម្រាប់ប្រទេសមួយចំនួនដូចជា ថៃ ជប៉ុន ហ្វីលីពីន វៀតណាម ម៉ាឡេស៊ី និងសិង្ហបុរី រួមទាំងប្រទេសអឺរ៉ុបមួយចំនួនទៀតផងដែរ។

លោក Wang Wenbin អ្នកនាំពាក្យក្រសួងការបរទេសរបស់ប្រទេសចិន បាននិយាយថា «យើងត្រៀមខ្លួនជាស្រេចដើម្បីធ្វើការជាមួយប្រទេសពាក់ព័ន្ធ ក៏ដូចជាបង្កើតលក្ខខណ្ឌអំណោយផល និងផ្តល់ភាពងាយស្រួលកាន់តែខ្លាំងសម្រាប់ការធ្វើដំណើរឆ្លងកាត់ព្រំដែនដ៏ងាយស្រួល»។

យោងតាមសេចក្តីថ្លែងការណ៍របស់ក្រសួងការបរទេស និងស្ថានទូតចិន បានឱ្យដឹងទៀតថា នេះគឺជាវិធានការចុងក្រោយបង្អស់ដែលចិនបានអនុវត្តនាពេលថ្មីៗនេះ ដើម្បីបង្កើនការធ្វើដំណើរក្នុងប្រទេសពីអ្នកទេសចរបរទេស និងពាណិជ្ជករ ចំពេលមានការស្ទុះងើបឡើងវិញនៃសេដ្ឋកិច្ចធំបំផុតទីពីររបស់ពិភពលោក។

ទោះជាយ៉ាងណាក៏ដោយ បច្ចុប្បន្នគោលនយោបាយនេះគ្របដណ្តប់អ្នកធ្វើដំណើររាប់រយលាននាក់ពីប្រទេសជាច្រើន ហើយនឹងធ្វើឱ្យវាកាន់តែងាយស្រួល និងថោកសម្រាប់ពួកគេដើម្បីទទួលបានទិដ្ឋាការធ្វើដំណើរទៅកាន់ប្រទេសចិន៕