យោងតាមរបាយការណ៍កាលពីថ្ងៃទី៣ ខែវិច្ឆិកា បានឱ្យដឹងថា តារាចម្រៀង និងជាតារាសម្តែង Park Yoo chun បច្ចុប្បន្នកំពុងមានទំនាក់ទំនងស្នេហាជាមួយនារីជំនួញម្នាក់ ដែលជាកូនស្រីរបស់មន្ត្រីជាន់ខ្ពស់ក្នុងប្រទេសថៃ។ គូស្នេហ៍របស់តារាប្រុសរូបនេះត្រូវបានដឹងថាមានអាជីវកម្មជាច្រើននៅក្នុងដៃ។

បន្ថែមពីលើនេះផងដែរ មិត្តស្រីរបស់តារាប្រុសរូបនេះត្រូវបានគេដឹងថាទើបតែបានបើកអាជីវកម្មម៉ាកផលិតផលថែរក្សាសម្រស់ ដែលនាងធ្វើជាតារាម៉ូដែលសម្រាប់ម៉ាកយីហោ ខ្លួនឯង ខណៈនារីនោះត្រូវបានគេដឹងថាបានបើកអាជីវកម្មជាច្រើនផ្សេងទៀតនៅក្នុងប្រទេសថៃ។ Park Yoo chun ត្រូវបានគេរាយការណ៍ថាបានដើរតួជាអ្នកគាំទ្រយ៉ាងខ្លាំងចំពោះមុខជំនួញរបស់មិត្តស្រីដោយចូលរួមក្នុងព្រឹត្តិការណ៍របស់នាងផ្ទាល់ ស្របពេលមានពាក្យចចាមអារ៉ាមថាទំនាក់ទំនងរបស់ពួកគេអាចនឹងឈានដល់ការរៀបការ។

អ្នកក្នុងវិស័យកម្សាន្តថៃវិញបាននិយាយថាគូស្នេហ៍មួយគូនេះបានទាក់ទងគ្នាជាងមួយឆ្នាំមកហើយ។ ទោះបីជា Park Yoo chun ត្រូវបានគេរាយការណ៍ថាមានជម្លោះជាមួយភ្នាក់ងារ Logbook Entertainment របស់ខ្លួនក្តី ប៉ុន្តែគូស្នេហ៍លោកកំពុងជួយតារាប្រុសរូបនេះជាមួយភ្នាក់ងារក្នុងស្រុកនៅប្រទេសថៃ។

គួរបញ្ជាក់ថា Park Yoo chun ត្រូវបានកាត់ទោសឱ្យជាប់ពន្ធនាគាររយៈពេល ១០ ខែ និងព្យួរទោស២ ឆ្នាំ ពីបទប្រើប្រាស់គ្រឿងញៀនជាមួយអតីតគូដណ្តឹងរបស់ខ្លួនកាលពីដើមឆ្នាំ២០១៩ ។ បច្ចុប្បន្នលោកក៏នៅតែត្រូវបានហាមឃាត់ពីសកម្មភាពផ្សព្វផ្សាយនៅក្នុងរបស់កូរ៉េបន្ទាប់ពីការស្នើសុំដកបម្រាមនេះត្រូវបានបដិសេធកាលពីខែកញ្ញា ឆ្នាំ២០២២។

ដំណឹងនៃទំនាក់ទំនងស្នេហារបស់អតីតសមាជិក TVXQ និង JYJ ជាមួយកូនស្រីមន្រ្តីជាន់ខ្ពស់របស់ថៃ អ្នកលេងបណ្តាញសង្គមកូរ៉េបានបញ្ចេញមតិជាច្រើន។ អ្នកខ្លះបានសរសេរដោយសង្ឃឹមថា Park Yoo chun ទទួលបានជោគជ័យក្នុងការរៀបការលើកនេះ រស់នៅដោយស្ងប់ស្ងាត់នៅប្រទេសថៃដោយមិនបង្កបញ្ហាអ្វីឡើយ និងចាប់ផ្តើមជីវិតថ្មីម្តងទៀត៕

ជប៉ុនគឺជាប្រទេសមហាអំណាច និងជាប្រទេសដែលមានការអភិវឌ្ឍជឿនលឿនបំផុត ទោះជាយ៉ាងណាក៏ដោយប្រជាជនជប៉ុនភាគច្រើនសុទ្ធតែប្រឈមនឹងបញ្ហាផ្លូវចិត្ត ដោយសារសម្ពាធការងារ និងបរិយាកាសជុំវិញខ្លួនរបស់ពួកគេ។ យោងតាមក្រសួងសុខាភិបាលរបស់ប្រទេសជប៉ុន បានឱ្យដឹងថា ការធ្វើអត្តឃាតគឺជាមូលហេតុនាំមុខគេនៃការស្លាប់ក្នុងចំណោមមនុស្សវ័យក្មេងជាច្រើនក្នុងអំឡុងឆ្នាំ ២០១៩ ដល់ ២០២២។ការស្ទង់មតិនេះបានធ្វើឡើងដោយ Nippon Foundation ដែលមានមូលដ្ឋាននៅទីក្រុងតូក្យូ បានបង្ហាញថា ៤៤.៨% ក្នុងចំណោមមនុស្ស ១៤,៥៥៥ នាក់ដែលមានអាយុពី ១៨ ដល់ ២៩ ឆ្នាំ សុទ្ធតែមានបទពិសោធន៍នៃការធ្វើអត្តឃាតនៅពេលប្រឈមមុខនឹងបញ្ហាដូចជាទំនាក់ទំនងពិបាកជាមួយមនុស្សជិតស្និទ្ធ ការសម្លុត ការបំពាន និងព្រួយបារម្ភអំពីផ្លូវអប់រំ ឬអាជីពនាពេលអនាគត។ ដូច្នេះប្រហែល ៤០% នៃយុវជន ៤៤.៨% “សុទ្ធតែបានប៉ុនប៉ងធ្វើអត្តឃាតខ្លួនឯង “។

យោងតាមការស្ទង់មតិបានរកឃើញទៀតថា “ការប៉ះទង្គិចផ្លូវចិត្ត ដូចជាពីការរំលោភបំពានផ្លូវភេទ និងការសម្លុតគម្រាមបានដើរតួនាទីយ៉ាងធំ ហើយនៅពេលដែលរួមបញ្ចូលគ្នា បង្កើនឱ្យមានលទ្ធភាពនៃគំនិតបែបនេះ”។
បច្ចុប្បន្នការមានគំនិតចង់ធ្វើអត្តឃាតក្នុងចំនោមមនុស្សវ័យក្មេងរបស់ប្រទេសជប៉ុនបានធ្លាក់ចុះកំណត់ត្រាចំនួនជាង ០.៥ លាននាក់នៅក្នុងចំនួនប្រជាជនដែលបានធ្លាក់ចុះរួចទៅហើយនៅឆ្នាំ ២០២២ ដែលជាការកត់សម្គាល់នូវការថយចុះ ១២ ឆ្នាំជាប់គ្នា។
ទន្ទឹមនឹងនេះ ទិន្នន័យរបស់រដ្ឋាភិបាលក៏បានបង្ហាញដែរថា ចំនួនប្រជាជនសរុបរបស់ប្រទេសនេះមាន ១២៤,៩ លាននាក់បានធ្លាក់ចុះ ៧៥០,០០០នាក់ ទៅ ១២២ លាននាក់ ដែលជាការធ្លាក់ចុះដ៏ធំបំផុតក្នុងប្រវត្តិសាស្ត្រចាប់តាំងពីឆ្នាំ ១៩៥០៕

ប្រទេសថៃ ៖ ប្រទេសក្នុងតំបន់អាស៊ីប៉ាស៊ីហ្វិកនៅតែជាគោលដៅ ដែលភ្ញៀវទេសចរថៃចាប់អារម្មណ៍ទៅកម្សាន្តច្រើនបំផុតនៅដំណាច់ឆ្នាំ២០២៣ ។ នេះបើតាមការស្ទង់មតិចុងក្រោយអំពីដំណើរកម្សាន្តនៅលើពិភពលោក ប្រចាំឆ្នាំ២០២៣ របស់ក្រុមហ៊ុន Visa Global Travel Intentions ។ លទ្ធផលស្ទង់មតិនេះ បានសិក្សាស្រាវជ្រាវស៊ីជម្រៅអំពីឥរិយាបថ និងគម្រោងការធ្វើដំណើររបស់ភ្ញៀវទេសចរ ហើយក្រុមហ៊ុន Visa ដែលផ្តល់សេវាកម្មទូទាត់ប្រាក់ឌីជីថលឈានមុខគេនៅលើពិភពលោក បានចំណាយពេលធ្វើការស្ទង់មតិយូរបំផុត ។

លទ្ធផលស្ទង់មតិនេះបង្ហាញឱ្យឃើញពីប្រទេសចំនួន៥ ដែលជាប្រទេសពេញនិយមសម្រាប់ភ្ញៀវទេសចរថៃនៅឆ្នាំ២០២៣ គឺប្រទេសជប៉ុន, កូរ៉េខាងត្បូង, ចិន, អូស្ត្រាលី និងសិង្ហបុរី ។ ចំណែកហុងកុង, អង់គ្លេស, តៃវ៉ាន់, ឡាវ និងបារាំង គឺស្ថិតក្នុងលំដាប់១០ប្រទេសដំបូងគេ ដែលភ្ញៀវទេសចរថៃចាប់អារម្មណ៍ទៅកម្សាន្ត ។

Serene Gay ជានាយកគ្រប់គ្រងក្រុមហ៊ុន Visa ប្រចាំតំបន់អាស៊ីអាគ្នេយ៍លើកឡើងថា ៖ «ប្រទេសថៃនៅតែមានការទទួលស្គាល់ថា គឺជាទីកន្លែងមួយក្នុងចំណោមទីកន្លែងពេញនិយមសម្រាប់ការដើរកម្សាន្តនៅលើពិភពលោក ។ ចំណែកពលរដ្ឋថៃវិញ ក៏ចូលចិត្តទៅដើរកម្សាន្តនៅក្រៅប្រទេសផងដែរ ហើយក្រុមហ៊ុន Visa គឺជាសមាជិកសំខាន់ក្នុងក្រុមឧស្សាហកម្មទេសចរណ៍ ។ យើងរីករាយណាស់ដែលបានបែងចែកទិន្នន័យដ៏មានប្រយោជន៍នេះ ហើយវានឹងជួយលើកកម្ពស់វិស័យទេសចរណ៍ រួមទាំងផ្តល់បទពិសោធន៍ការធ្វើដំណើរដល់ភ្ញៀវទេសចរ ដែលបានចំណាយប្រាក់តាមរយៈក្រុមហ៊ុន Visa ផងដែរ » ។

លទ្ធផលស្ទង់មតិបង្ហាញថា ភ្ញៀវទេសចរថៃដែលធ្វើដំណើរទៅកម្សាន្តនៅក្រៅប្រទេស ពួកគេបានប្រើប្រាស់កាតជំនួសប្រាក់សុទ្ធ ជាពិសេស ការចំណាយផ្សេងៗក្នុងការធ្វើដំណើរ ដូចជា ការកក់កន្លែងស្នាក់នៅជាមុន (ស្មើ៧៨%) និងការកក់សំបុត្រយន្តហោះ (ស្មើ៦២%) ។ ចំណែកការស្នាក់នៅតាមទីកន្លែងនានានៅក្រៅប្រទេស ភ្ញៀវទេសចរថៃក៏បានទូទាត់ប្រាក់តាមរយៈកាតផងដែរ ក្នុងនោះពួកគេប្រើប្រាស់កាតទូទាត់ថ្លៃទំនិញ (ស្មើ៤៤%), ថ្លៃម្ហូបអាហារ (ស្មើ៤១%) និងសេវាកម្មផ្សេងៗ (ស្មើ៤០%) ៕ ប្រភព ៖ Bangkok biznews

បរទេស៖ ប្រទេសកូរ៉េខាងជើងបាននិយាយថា ការបិទស្ថានទូតគឺជារឿងធម្មតាដើម្បីកែលម្អទំនាក់ទំនងបរទេស បន្ទាប់ពីទីក្រុងសេអ៊ូលសង្ស័យថាទីក្រុងព្យុងយ៉ាងកំពុងមានបញ្ហាផ្នែកហិរញ្ញវត្ថុ។

យោងតាមអ្នកនាំពាក្យក្រសួងការបរទេសកូរ៉េខាងជើងបាននិយាយថា “ទន្ទឹមនឹងការផ្លាស់ប្តូរបរិយាកាសអន្តរជាតិ និងគោលនយោបាយការបរទេសរបស់រដ្ឋ យើងកំពុងបិទ ហើយក៏នឹងបើកបេសកកម្មការទូតថ្មីឡើងវិញនៅក្នុងប្រទេសផ្សេងផងដែរ” នេះបើតាមគេហទំព័រ Reuters ដែលបានចុះផ្សាយនៅថ្ងៃទី៣ ខែវិច្ឆិកា។

គួររំលឹកដែរថា កន្លងទៅថ្មីៗនេះប្រព័ន្ធផ្សព្វផ្សាយរបស់កូរ៉េខាងត្បូងមួយបាននិយាយថា ការផ្លាស់ប្តូររបស់កូរ៉េខាងជើងក្នុងការបិទស្ថានទូតជាបន្តបន្ទាប់បង្ហាញថាទីក្រុងព្យុងយ៉ាងកំពុងប្រឈមមុខនឹងការលំបាកផ្នែកហិរញ្ញវត្ថុ ហើយវាពិបាកក្នុងការរក្សាទំនាក់ទំនងការទូតសូម្បីតែតិចតួចបំផុតជាមួយសម្ព័ន្ធមិត្តប្រពៃណី។

យោងតាមក្រសួងបង្រួបបង្រួមរបស់កូរ៉េខាងត្បូង បានឱ្យដឹងទៀតថា កូរ៉េខាងជើងមានទំនាក់ទំនងការទូតជាមួយប្រទេសជាង ១៥០ ប៉ុន្តែចំនួនបេសកកម្មនៅក្រៅប្រទេសបានថយចុះគួរឱ្យកត់សម្គាល់ចាប់តាំងពីទសវត្សរ៍ឆ្នាំ ១៩៩០ ដោយសារបញ្ហាហិរញ្ញវត្ថុ។

ទោះជាយ៉ាងណាក៏ដោយ កូរ៉េខាងជើងបាននិយាយថា ការបិទស្ថានទូតថ្មីៗនេះ គឺជារឿងធម្មតា ហើយប្រទេសនេះបានធ្វើជាច្រើនដងមកហើយ។ យោងតាមក្រសួងការបរទេសកូរ៉េខាងជើង ក៏បានឱ្យដឹងទៀតថា ការផ្លាស់ប្តូរបែបនេះគឺ “សំដៅលើការលើកកម្ពស់ផលប្រយោជន៍ជាតិក្នុងទំនាក់ទំនងបរទេស”៕

ប្រទេសថៃ ៖ លោក អនុថិន ឆាន់វីរៈគូន ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃប្រទេសថៃ បានណែនាំគោលនយោបាយអនុវត្តការងារដល់អាជ្ញាធរអគ្គិសនីប្រចាំតំបន់ ក្នុងការគ្រប់គ្រងពលរដ្ឋឱ្យប្រើប្រាស់អគ្គិសនីអស់តិចបំផុត ។ ការណែនាំគោលនយោបាយនេះ ក្នុងគោលបំណងដោះស្រាយបញ្ហាអ្នកមានប្រាក់ចំណូលតិច ដែលត្រូវបានអាជ្ញាធរកាច់ផ្តាច់ចរន្តអគ្គិសនី ដោយសារពួកគេមិនបានទូទាត់ថ្លៃអគ្គិសនី ហើយត្រូវបានដោះយក Meter ក្នុងរយៈពេល១ខែ ។

លោក អនុថិន ឆាន់វីរៈគូន ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានណែនាំគោលនយោបាយនេះជាមួយអាជ្ញាធរអគ្គិសនីប្រចាំតំបន់ថា សូមឱ្យខាងអគ្គិសនីពន្យារពេលចំនួន៣ខែក្នុងការទូទាត់តម្លៃអគ្គិសនី ដើម្បីឱ្យពលរដ្ឋដែលមានប្រាក់ចំណូលតិចមានលទ្ធភាពទូទាត់ថ្លៃអគ្គិសនី និងដោះស្រាយការចំណាយផ្សេងៗ ។ ប៉ុន្តែបើជាការប្រកបអាជីវកម្មធំដុំ ហើយឆ្លៀតឱកាសមិនទូទាត់ថ្លៃអគ្គិសនីនោះ គឺមិនបានទេ ។

ចំណែកលោក ឆាតិឆ័យ ភូម៉ារីន នាយករងអាជ្ញាធរអគ្គិសនីប្រចាំតំបន់លើកឡើងថា អាជ្ញាធរអគ្គិសនីប្រចាំតំបន់កំពុងចាត់វិធានការនេះជាបន្ទាន់ ។ កាលពីថ្ងៃទី៣ ខែវិច្ឆិកា ឆ្នាំ២០២៣ ខាងអាជ្ញាធរអគ្គិសនីបានប្រជុំជាមួយស្ថាប័នពាក់ព័ន្ធទាំងអស់ ដើម្បីឱ្យការងារដំណើរការទៅមុខ ។ អាជ្ញាធរអគ្គិសនីសង្ឃឹមថា នឹងអាចអនុវត្តគោលនយោបាយនេះ នៅខែធ្នូ ឆ្នាំ២០២៣ ។

លោក ឆាតិឆ័យ ភូមិរីន នាយករងអាជ្ញាធរអគ្គិសនីប្រចាំតំបន់បន្តថា ចំណែករឿងការជួយពលរដ្ឋវិញ បើអាចធ្វើបានឆាប់រហ័ស គឺរឹតតែទទួលបានលទ្ធផលល្អ ។ ជំហានដំបូង អាជ្ញាធរអគ្គិសនីកំណត់ថា សម្រាប់លំនៅឋានណាដែលបានប្រើប្រាស់អគ្គិសនីមិនដល់៣០០បាតក្នុង១ខែ (ឬស្មើប្រមាណ៣ម៉ឺនរៀល) លំនៅឋាននោះអាចជំពាក់ថ្លៃអគ្គិសនីរយៈពេល៣ខែ ។

ហេតុនេះ អាជ្ញាធរអគ្គិសនីបានត្រៀមខ្លួនជាស្រេចដើម្បីអនុវត្តគោលនយោបាយរបស់រដ្ឋាភិបាល និងជួយសង្គ្រោះពលរដ្ឋនៅទូទាំងប្រទេសថៃ ។ ចំណែកភាគីផ្សេងៗក៏បានយល់ស្របនឹងគោលនយោបាយនេះដែរ ហើយភាគីទាំងនោះលើកឡើងថា នឹងអនុវត្តគោលនយោបាយទូទាត់ថ្លៃអគ្គិសនីឱ្យបានឆាប់រហ័ស ៕ ប្រភព ៖ beartai BRIEF

តារាម៉ូដែលអាស៊ី Shereen Wu ដែលជាជនជាតិតៃវ៉ាន់បានរិះគន់អ្នកច្នៃម៉ូដជនជាតិអាម៉េរិក Michael Costello ចំពោះការប្តូរមុខរបស់នាងទៅជាមនុស្សស្បែកសដោយប្រើបច្ចេកវិទ្យា AI ។

នៅថ្ងៃទី ២ ខែវិច្ឆិកា តារាម៉ូដែលតៃវ៉ាន់ Shereen Wu បានបង្ហាញការមិនពេញចិត្តរបស់នាងនៅលើ TikTok នៅពេលដែលមុខរបស់នាងត្រូវបានផ្លាស់ប្តូរ។ តារាម៉ូដែលរូបនេះបានចែករំលែករូបថតពីរសន្លឹក ដោយមួយសន្លឹកជារូបភាពនាងដើរក្នុងកម្មវិធីរបស់ Michael Costello និងរូបថតមួយសន្លឹកទៀតគឺដូចគ្នាបេះបិទ លើកលែងតែមុខជាមនុស្សស្បែកសដែលបានកែសម្រួលដោយ AI ហើយរូបភាពនោះត្រូវបានបង្ហោះនៅលើ Instagram។

តារាម៉ូដែលតៃវ៉ាន់ Shereen Wu បាននិយាយថា នាងត្រូវបានគេប្រកាន់ពូជសាសន៍ ដែលទង្វើនេះគឺជាការមិនគោរពនាងទាល់តែសោះ។ ក្នុងនោះដែរ តារាម៉ូដែលរូបនេះក៏បានបញ្ចេញរូបភាពនៃការផ្ញើសាររវាងខ្លួននាង អ្នកច្នៃម៉ូដ និងអ្នកថតរូប។ នៅក្នុងនោះ អ្នកច្នៃម៉ូដបានស្តីបន្ទោសអ្នកថតរូបសម្រាប់ការកែសម្រួលរូបថត ខណៈពេលដែលអ្នកថតរូបបានបដិសេធមិនបានប៉ះពាល់រូបថតនោះទេ។ បន្ទាប់ពីរងមតិរិះគន់ នៅលើបណ្តាញសង្គមផ្ទាល់ខ្លួនរបស់អ្នកច្នៃម៉ូដ Michael Costello បានបង្ហោះរឿងរ៉ាវអំពី AI ដោយលើកឡើងថា តារាម៉ូដែលតៃវ៉ាន់ Shereen Wu មិនគួរខឹងនោះទេ ព្រោះការប្រើប្រាស់ AI គឺជារឿងធម្មតានៅក្នុងវិស័យម៉ូដ។
មុនពេល Shereen Wu បានបោះសម្តីទៅកាន់ Michael Costello ថាមានអាកប្បកិរិយាមិនល្អ និងរិះគន់រាងកាយអ្នកដទៃក៏មានអ្នកផ្សេងទៀតបានលើកឡើងពីអ្នកច្នៃម៉ូដរូបនេះដូចគ្នាថាលោកចូលចិត្តបង្អប់រូបរាងរបស់អ្នកដទៃ។

គួរបញ្ជាក់ថា Michael Costello មានអាយុ៤០ ឆ្នាំជាអ្នកច្នៃម៉ូដជនជាតិអាម៉េរិក និងធ្លាប់បានច្នៃម៉ូដសំលៀកបំពាក់ឱ្យតារាល្បីៗជាច្រើនដូចជា Céline Dion , Jennifer Lopez , Toni Braxton, Cardi B, Kylie Jenner និង Lady Gaga ជាដើម៕