តារាសម្តែងជួរមុខប្រចាំប្រទេសកម្ពុជាទាំងពីររូបរួមមានកញ្ញា ស៊ីន យូប៊ីន និងលោក ខាត់ វៃហាំង ទទួលបានការអញ្ជើញសាជាថ្មីចូលរួមកម្មវិធីសប្តាហ៍ផ្លាស់ប្តូរវប្បធម៌និងភាពយន្តកម្ពុជា-ចិន២០២៣នាឱកាសខួបទី៦៥នៃចំណងមិត្តភាពកម្ពុជា-ចិន។
នៅលើបណ្តាញសង្គមរបស់ ស៊ីន យូប៊ីន តារាសម្តែងរូបនេះបានឱ្យដឹងថា នាង ទទួលបានកាអញ្ជើញទៅកាន់ប្រទេសចិនសាជាថ្មីម្តងទៀត ដើម្បីចូលរួមក្នុងកម្មវិធីសប្តាហ៍ផ្លាស់ប្តូរវប្បធម៌និងភាពយន្តកម្ពុជា-ចិន២០២៣ ហើយនិងមានការចាក់បញ្ចាំងខ្សែភាពយន្តរបស់នាងផ្ទាល់គឺរឿង តម្លៃស្នេហ៍ ដែលធ្លាប់បានទទួលបានពានរង្វាន់ភាពយន្តឆ្នើមនិងពានរង្វាន់តារាសម្តែងស្រីឆ្នើមក្នុងឆ្នាំ២០១៧ នៅទីនោះផងដែរ។
មិនខុសពីកញ្ញា ស៊ីន យូប៊ីន ចំណែកលោក ខាត់ វៃហាំង វិញក៏ទទួលបានការអញ្ជើញដូចគ្នា ដោយលោកបញ្ជាក់លើបណ្តាញសង្គមថា «ខ្ញុំបាទ ខាត់ វ៉ៃហាំង នឹងធ្វើដំណើរទៅចូលរួមក្នុងកម្មវិធីសប្តាហ៍ផ្លាស់ប្តូរវប្បធម៌ និងភាពយន្តកម្ពុជា-ចិន នៅសៀកមិន ខេត្តហ្វុចូវ នាឱកាសខួបទី៦៥នៃចំណងមិត្តភាពកម្ពុជា-ចិន»។ បើតាមលិខិតអញ្ជើញកម្មវិធីនេះរៀបចំឡើងពីថ្ងៃទី១៩-២១ ខែធ្នូ ឆ្នាំ២០២៣។
កាលពីខែកញ្ញា កន្លងមកនេះគូស្នេហ៍មួយគូនេះបានតំណាងកម្ពុជាចូលរួមនៅក្នុងកម្មវិធីគម្រប់ខួប១០ឆ្នាំកម្មវិធី Silk Road international film festival 2023 ធ្វើឡើងនៅទីក្រុង ហ្វូចូវ នៃខេត្ត ហ្វូចៀន ប្រទេសចិន ដោយការចូលរួមមហោស្រពនេះអ្នកទាំងពីរក៏បានបកស្រាយចម្រៀងជាមួយតារាចិន២រូបផងដែរអមជាមួយទស្សនីយភាពដ៏ស្រស់ស្អាត។ ជាមួយគ្នានេះ កាលពីខែសីហាផងដែរ សប្ដាហ៍ផ្លាស់ប្តូរវប្បធម៌ និងភាពយន្តកម្ពុជា ចិន ឆ្នាំ២០២៣ ដែលធ្វើឡើងនៅកម្ពុជាលោក ខាត់ វៃហាំង និង កញ្ញា ស៊ីន យូប៊ីន ទទួលបានកិត្តិយសពិសេសបានចូលរួមសម្តែងនិងបកស្រាយបទចម្រៀងមានចំណងជើងថា «ថ្នម»អមជាមួយការសម្តែងល្ខោនខោលរួមទាំងសិល្បៈផ្សេងទៀតឱ្យកាន់តែមានភាពរស់រវើក។ លើសពីនេះ យូប៊ីន ក៏បានសម្តែងបទចម្រៀងចិនដូចគ្នា។
ការទទួលបានឱកាសជាច្រើនក្នុងការតំណាងឱ្យកម្ពុជាចូលរួមព្រឹត្តិការណ៍អន្តរជាតិអ្នកគាំទ្រសម្លឹងឃើញថាតារាសម្តែងទាំងពីរដួងនេះជាគ្រាប់ពេជ្រសម្រាប់ប្រទេសកម្ពុជា លើកស្ទួយប្រទេសជាតិជារឿយៗ ខណៈពេលដែលពួកគេចូលរួមព្រឹត្តិការណ៍សំខាន់ៗមិនភ្លេចទេពាំនាំអត្តសញ្ញាណជាតិខ្លួនបង្ហាញនៅលើឆាកអន្តរជាតិ៕
