ប្រទេសចិន ៖ កាលពីដើមខែវិច្ឆិកា ឆ្នាំ២០២៣ សារព័ត៌មានបរទេសបានចុះផ្សាយថា នៅស្រុក Luyi ទីក្រុង Zhoukou ខេត្ត Henan ប្រទេសចិន កសិករបានចិញ្ចឹមសត្វចៀមពូជហួយសានជាច្រើនក្បាល និងល្បីល្បាញនៅក្នុងតំបន់ ។ ការលក់ដូររោម និងសាច់ចៀមរបស់អ្នកស្រុករស់នៅក្នុងតំបន់នេះបានកាក់កបជាបន្តបន្ទាប់ ប៉ុន្តែសត្វចៀមប្រភេទនេះមានរោមតិចតួចណាស់ ។

ហេតុនេះ សត្វចៀមពូជហួយសានមានរោមតិចតួច ធ្វើឱ្យពលរដ្ឋរស់នៅស្រុក Luyi មិនចាប់អារម្មណ៍យករោមចៀមទាំងនេះទៅកែច្នៃទេ ហើយពួកគេក៏យកវាទៅបោះចោលកាលពីកន្លងមក ។ ប៉ុន្តែបច្ចុប្បន្ន ពួកគេបានប្រើប្រាស់ប្រយោជន៍ពីរោមចៀម ដោយប្រមូលយករោមចៀមទុកសម្រាប់ធ្វើជក់ផាត់មុខ តាមរយៈការផលិតចំនួន១៥ដំណាក់កាល ។

ក្រុមហ៊ុននានាបានផលិតជក់សម្រាប់ប្រើប្រាស់ជាមួយគ្រឿងសម្អាងជាច្រើនប្រភេទនៅប្រទេសចិន ក្នុងនោះគេប្រទះឃើញថា មានជក់តុបតែងមុខយ៉ាងតិចចំនួន៥ ក្នុងចំណោមជក់ចំនួន១០ គឺបានផលិតនៅស្រុក Luyi ។ លើសពីនេះ ជក់តុបតែងមុខចំនួន៩ ក្នុងចំណោមជក់ចំនួន១០ ដែលប្រទេសចិនបាននាំចេញនោះ ក៏បានផលិតនៅស្រុក Luyi ផងដែរ ។ ដូចគ្នានេះ ជក់តុបតែងមុខជាច្រើនប្រភេទទៀត ដែលក្រុមហ៊ុនផលិតបានដាក់វានៅក្នុងកញ្ចប់គ្រឿងសំអាងសម្រាប់លក់នៅក្រៅប្រទេស គឺសុទ្ធតែបានផលិតនៅស្រុក Luyi ។

បច្ចុប្បន្ន នៅស្រុក Luyi មានក្រុមហ៊ុនផលិតជក់ពីរោមចៀមសម្រាប់ប្រើប្រាស់ជាមួយគ្រឿងសម្អាង ស្មើជាង១៦០ក្រុមហ៊ុន ។ ក្រុមហ៊ុនលើកឡើងថា រោមចៀមមិនត្រឹមតែក្លាយជាឧស្សាហកម្មសំខាន់នៅប្រទេសចិនប៉ុណ្ណោះទេ ប៉ុន្តែវាបានផ្តល់ឱកាសឱ្យអ្នករស់នៅក្នុងតំបន់នេះមានការងារធ្វើជិតស្មើ១សែននាក់ឯណោះ ៕ ប្រភព ៖ China face

ប្រទេសចិន៖ ប្រទេសចិនបាននិយាយថា ខ្លួននឹងអភិវឌ្ឍមនុស្សយន្ត AI ជាលក្ខណៈទ្រង់ទ្រាយធំនៅឆ្នាំ ២០២៥ ដើម្បីបំពេញតម្រូវការនៃឧស្សាហកម្ម និងវិជ្ជាជីវៈជាច្រើននៅក្នុងប្រទេស។

យោងតាមប្រភពព័ត៌មាន CSMP ដែលបានចុះផ្សាយនៅថ្ងៃទី៤ ខែវិច្ឆិកាថា ក្រសួងឧស្សាហកម្ម និងបច្ចេកវិទ្យាព័ត៌មានចិន (MIIT) បានចេញគោលការណ៍ចំនួន ៩ ដោយអំពាវនាវឱ្យកសាងខ្សែសង្វាក់ផ្គត់ផ្គង់ និងបង្កើនចំនួនមនុស្សយន្តក្នុងការប្រកួតប្រជែងអន្តរជាតិសម្រាប់ឧស្សាហកម្មបច្ចេកវិទ្យា ដោយមេដឹកនាំនៃប្រទេសនេះ បានមើលឃើញថា មនុស្សយន្តជាវិស័យអាទិភាពសម្រាប់ការវិនិយោគ។

MIIT ក៏បានវាយតម្លៃវត្តមានរបស់មនុស្សយន្ត AI ថានឹងនាំមកនូវរបកគំហើញស្រដៀងនឹងកុំព្យូទ័រ ស្មាតហ្វូន ឬយានជំនិះដោយប្រើថាមពលជំនួស។ គេរំពឹងថានៅឆ្នាំ ២០២៥ ប្រទេសចិននឹងបញ្ចប់ ក៏ដូចជាដាក់មនុស្សយន្តចូលទៅក្នុងការផលិតទ្រង់ទ្រាយធំ។ ដូច្នេះនៅឆ្នាំ ២០២៧ ម៉ាស៊ីនទាំងនេះនឹងក្លាយជាកត្តាជំរុញកំណើនសេដ្ឋកិច្ចឈានមុខគេមួយនៅលើពិភពលោក។

យោងតាម MIIT ក៏បានឱ្យដឹងទៀតថា ដើម្បីសម្រេចបាននូវគោលដៅ ប្រទេសចិនត្រូវធ្វើឱ្យមានភាពជឿនលឿនបន្ថែមទៀតនៅក្នុងបញ្ញាសិប្បនិមិត្ត និងការផលិតព័ត៌មានលម្អិតនៃដៃ និងជើង ដោយមនុស្សយន្តនឹងត្រូវប្រើប្រាស់ក្នុងបរិយាកាសពិសេស ប្រឈមមុខនឹងស្ថានភាពដ៏លំបាក ដូចជាការងារជួយសង្គ្រោះជាដើម។ MIIT ក៏មានបំណង “បង្កើតប្រព័ន្ធច្នៃប្រឌិតមនុស្សយន្ត ធ្វើឱ្យមានរបកគំហើញនៅក្នុងបច្ចេកវិទ្យាសំខាន់ៗមួយចំនួន និងធានានូវការផ្គត់ផ្គង់ផ្នែកស្នូលប្រកបដោយសុវត្ថិភាព និងប្រសិទ្ធភាព” នៅឆ្នាំ ២០២៥។

គួរបញ្ជាក់ដែរថា បច្ចុប្បន្នប្រទេសចិនកំពុងបង្កើនការស្រាវជ្រាវ ដើម្បីបង្កើតផលិតផលដែលមានសមត្ថភាពប្រកួតប្រជែងជាមួយសហរដ្ឋអាមេរិក ក៏ដូចជាមានមហិច្ឆតាក្នុងការនាំចេញមនុស្សយន្តទៅកាន់អន្តរជាតិជាលក្ខណៈទ្រង់ទ្រាយធំទៀតផង៕

បរទេស៖ កូរ៉េខាងជើងបាននិយាយថា កិច្ចសហប្រតិបត្តិការយោធារវាងអាមេរិក កូរ៉េខាងត្បូង និងជប៉ុន គឺមានគ្រោះថ្នាក់ខ្លាំងណាស់ ដែលអាចនាំឱ្យមានហានិភ័យនៃសង្គ្រាមលោកលើកទី៣។យោងតាមគេហទំព័ររបស់កូរ៉េខាងជើង KCNA ដែលបានរាយការណ៍កាលពីថ្ងៃទី៤ ខែវិច្ឆិកាថា កិច្ចសហប្រតិបត្តិការយោធាត្រីភាគីរវាង សហរដ្ឋអាមេរិក កូរ៉េខាងត្បូង និងជប៉ុនបានចូលដល់ “ដំណាក់កាលដ៏គ្រោះថ្នាក់បំផុត” ហើយគ្មាននរណាម្នាក់អាចធានាបានថា វានឹងមិននាំទៅដល់ “សង្គ្រាមនុយក្លេអ៊ែរ ឬសង្គ្រាមលោកលើកទី ៣”បាននោះទេ។ ទីភ្នាក់ងារសារព័ត៌មាននេះ ក៏បានរិះគន់សម្ព័ន្ធភាពយោធាត្រីភាគីរបស់អាមេរិក កូរ៉េខាងត្បូង និង ជប៉ុន ថាជាកត្តាសក្តានុពលដែលអាចរុញច្រានស្ថានការណ៍នៅលើឧបទ្វីបកូរ៉េ «ចូលទៅក្នុងដំណាក់កាលដែលមិនអាចគ្រប់គ្រងបាន»។

លោក Rodong Sinmun រដ្ឋមន្ត្រីកូរ៉េខាងជើងបាននិយាយថា “ថ្មីៗនេះយើងបានបង្កើតយុទ្ធសាស្ត្រឆ្លើយតបខ្លាំងបំផុត ដោយបំពាក់អាវុធនុយក្លេអ៊ែរ ដើម្បីការពារអធិបតេយ្យភាព និងផលប្រយោជន៍របស់ប្រជាជនប្រឆាំងនឹងសង្រ្គាមសហរដ្ឋអាមេរិក រួមទាំងប្រទេសដែលជិតដិតជាមួយសហរដ្ឋអាមេរិក” ។ លោក Rodong Sinmun ក៏បានបន្តទៀតថា ការធ្វើបែបនេះក្នុងគោលបំណងការពារសន្តិភាព និងស្ថិរភាពក្នុងតំបន់ ក៏ដូចជាការពារទីក្រុងព្យុងយ៉ាងពី “ការឈ្លានពានរបស់សត្រូវ”។

បច្ចុប្បន្នភាពតានតឹងនៅលើឧបទ្វីបកូរ៉េនាពេលថ្មីៗនេះ បានកើនឡើងដោយសារតែការបង្កើនសកម្មភាពយោធាដោយភាគីទាំងអស់នៅក្នុងតំបន់។ ដូច្នេះកាលពីខែកញ្ញាកន្លងទៅ កូរ៉េខាងជើងបន្តធ្វើតេស្តអាវុធ ដោយសភារបស់ប្រទេសនេះបានកែសម្រួលរដ្ឋធម្មនុញ្ញរបស់ខ្លួន និងបានបន្ថែមគោលនយោបាយកសាងកម្លាំងនុយក្លេអ៊ែរផងដែរ។

ទោះជាយ៉ាងណាក៏ដោយ សហរដ្ឋអាមេរិក កូរ៉េខាងត្បូង និងជប៉ុនកាលពីខែមុនបានធ្វើសមយុទ្ធសន្តិសុខដែនសមុទ្ររួមគ្នាលើកដំបូងក្នុងរយៈពេលប្រាំពីរឆ្នាំនៅក្នុងដែនទឹកភាគខាងត្បូងនៃឧបទ្វីបកូរ៉េក្នុងគោលបំណងការពារការគំរាមកំហែងពីកូរ៉េខាងជើង។ កូរ៉េខាងត្បូង និងសម្ព័ន្ធមិត្តបានអះអាងម្តងហើយម្តងទៀតថា សមយុទ្ធនៅតំបន់នោះគ្រាន់តែជាការការពារខ្លួនប៉ុណ្ណោះ៕

ប្រទេសថៃ ៖ អ្នកប្រើប្រាស់កម្មវិធី TikTok ម្នាក់នៅប្រទេសថៃបានបង្ហោះរូបភាពការធ្វើពិធីបើកភ្នែកសំណាកសត្វកញ្ជ្រោងកន្ទុយ៩ នៅកន្លែងសក្ការៈបូជាគ្រូកាយកែវ ដើម្បីឱ្យពលរដ្ឋថៃមកក្រាបសំពះ ។ អ្នកបង្ហោះរូបភាពនេះអះអាងថា រូបសំណាកសត្វកញ្ជ្រោង គឺជាវត្ថុស័ក្តិសិទ្ធិដែលធ្វើឱ្យអ្នកគោរពមានសេចក្តីមេត្តា និងមន្តស្នេហ៍ ។ ហេតុនេះ ធ្វើឱ្យមានសំណួរជាច្រើនលើកឡើង ជាពិសេស អ្នកមានជំនឿទៅលើសាសនាព្រះពុទ្ធ ។

កាលពីថ្ងៃទី៤ ខែវិច្ឆិកា ឆ្នាំ២០២៣ ក្រុមការងារសារព័ត៌មាន 3Plus News បានធ្វើដំណើរទៅកាន់វត្តសួនកែវ ស្ថិតនៅស្រុកបាងញ៉ៃ ខេត្តនុនថៈបុរី ប្រទេសថៃ ដើម្បីសាកសួររឿងរ៉ាវនេះជាមួយព្រះសង្ឃព្រះនាម Phayom Kanlayano ជាចៅអធិការវត្តសួនកែវ ហើយព្រះអង្គមានសង្ឃដីកាថា តើវាជាវត្ថុស័ក្តិសិទ្ធិពិតប្រាកដតាមការលើកឡើង ឬជាការបង្កើតអបិយជំនឿ និងជាជំនឿខុស ?

ព្រះចៅអធិការវត្តសួនកែវ ព្រះនាម Phayom Kanlayano បន្តថា បច្ចុប្បន្ននេះ សត្វក៏អាចក្លាយជាវត្ថុស័ក្តិសិទ្ធិសម្រាប់ឱ្យគេគោរពបូជា រហូតដល់មានការគោរពសត្វកញ្ជ្រោងកន្ទុយ៩ ជាគូជាមួយគ្រូកាយកែវថែមទៀត ។ សូមឱ្យញាតិញ៉ោមមានសតិ និងមានប្រាជ្ញាបន្តិច ហើយសម្រាប់អ្នកមានជំនឿលើសាសនាព្រះពុទ្ធវិញ គឺការគោរពរូបសំណាកគ្រូកាយកែវ និងសត្វកញ្ជ្រោង គឺគ្មានទេ ព្រោះការគោរពសត្វមានតិចណាស់ ហើយស្ទើរតែគ្មានទៀតផង ។ រីឯក្រុមអ្នកប្រាជ្ញខាងសាសនា ពួកគេនឹងមិនយករូបសំណាកសត្វកញ្ជ្រោង, តុកកែ និងសត្វផ្សេងទៀតមកគោរពបូជានោះទេ ។

ព្រះចៅអធិការវត្តសួនកែវបន្តថា ៖ «បើយើងគោរពពួកសត្វទាំងនេះ គេហៅថា ខួរក្បាលរបស់យើងមិនបានអភិវឌ្ឍន៍ជាមនុស្សទេ ។ ដូច្នេះ យើងត្រូវជួយលើកកម្ពស់ស្មារតីខ្លួនឯងឱ្យខ្ពស់បន្តិច ហើយបើចង់គោរពអ្វីមួយត្រូវមានហេតុផល និងមានសតិផង មិនមែននាំគ្នាគោរពសត្វកញ្ជ្រោង ឬតុកកែទេ ។ បើមិនអីចឹងទេ នៅថ្ងៃមុខ យើងនឹងនាំគ្នាគោរពសត្វផ្សេងទៀតមិនខាន» ។

ព្រះចៅអធិការវត្តបញ្ជាក់ថា ៖ «ការគោរពអ្វីមិនថ្លៃថ្នូរ និងមិនចម្រើនរុងរឿង អ្នកគោរពនោះនឹងពិបាកក្លាយជាមនុស្សថ្លៃថ្នូរណាស់ ។ យើងត្រូវគោរពអ្វីដែលថ្លៃថ្នូរក្នុងភាពជាមនុស្ស និងធ្វើជាមនុស្សល្អបំផុតតាមបែបព្រះពុទ្ធសាសនា ឬព្រះយេស៊ូគ្រិស្ត ដែលគេហៅថា ជាមនុស្សដ៏ខ្ពង់ខ្ពស់ខាងសាសនា ។ ចំណែកសត្វកញ្ជ្រោងមិនធ្លាប់មាននៅក្នុងសាសនាទេ ហេតុអ្វីនាំគ្នាក្រាបគោរពបែបនេះ ? ទោះយ៉ាងណា វានៅតែជាសត្វកញ្ជ្រោង នេះបានហៅថា ហួសហេតុពេកហើយញ៉ោម» ៕ ប្រភព ៖ 3Plus News

ប្រទេសឡាវ ៖ នៅថ្ងៃទី៤ ខែវិច្ឆិកា ឆ្នាំ២០២៣ សារព័ត៌មានស៊ីនហួរបានរាយការណ៍ពីទីក្រុងវៀងចន្ទន៍ ប្រទេសឡាវថា គោលដៅបន្ទាន់របស់រដ្ឋាភិបាលឡាវនាពេលបច្ចុប្បន្ន គឺជំរុញឱ្យនិស្សិតបន្តការសិក្សានៅសាកលវិទ្យាល័យ ឬគ្រឹះស្ថានអប់រំកម្រិតខ្ពស់ ក្នុងមុខវិជ្ជាវិទ្យាសាស្ត្រធម្មជាតិ, បច្ចេកវិទ្យា, វិទ្យាសាស្ត្រ និងគណិតវិទ្យា ។ លើសពីនេះ រដ្ឋាភិបាលឡាវមានគោលដៅមួយទៀត គឺការបង្កើនអត្រាចូលរៀនថ្នាក់មត្តេយ្យរបស់កុមារអាយុ៥ឆ្នាំ ឱ្យស្មើរហូតដល់៨២% ។

លោក ខាំចេន វង្សផូស៊ី រដ្ឋមន្ត្រីក្រសួងផែនការ និងការវិនិយោគឡាវលើកឡើងថា ប្រទេសឡាវនឹងព្យាយាមបង្កើនអត្រាចុះឈ្មោះចូលរៀនរបស់សិស្សនៅកម្រិតបឋមសិក្សាឆ្នាំទី១ ឱ្យស្មើនឹង៩៨% ។ ចំណែកការចុះឈ្មោះចូលរៀននៅកម្រិតបឋមសិក្សាឆ្នាំទី៥ ប្រទេសឡាវនឹងព្យាយាមឱ្យស្មើនឹង៩៧% នៅឆ្នាំ២០២៤ ។

ជាមួយគ្នានេះ ចំនួនកូនសិស្សរៀននៅកម្រិតបឋមសិក្សាឆ្នាំទី១ ដែលឈប់រៀនពាក់កណ្តាលទី គឺមិនត្រូវមានចំនួនលើសពី៤,៤% នៃចំនួនពលរដ្ឋឡាវដែលមានអាយុចូលរៀនថ្នាក់បឋមសិក្សាទេ ។

បច្ចុប្បន្ន ប្រទេសឡាវកំពុងប្រឈមនឹងកំណើនចំនួនកូនសិស្សឈប់រៀនពាក់កណ្តាលទី រួមទាំងចំនួនការចុះឈ្មោះចូលរៀននៅតាមសាលានានា ក៏ដូចជានៅសាកលវិទ្យាល័យបានធ្លាក់ចុះជាបន្តបន្ទាប់ ។ កត្តាទាំងនេះ គឺបណ្តាលមកពីពលរដ្ឋឡាវភាគច្រើននៅតាមតំបន់ជនបទមានជីវភាពក្រីក្រ ហើយមានយុវជនឡាវជាច្រើននាក់បានសម្រេចចិត្តធ្វើចំណាកស្រុកទៅធ្វើការនៅក្រៅប្រទេស ៕ ប្រភព ៖ daily news