មង្គលការជាង១០០តុ តែបែរជាគ្មានភ្ញៀវណាម្នាក់មកចូលរួមទាល់តែសោះ វាគឺជារឿងដែលហួសចិត្តមិននឹកស្មាន តែវាជាការពិត ខណៈនៅកម្ពុជារដូវរៀបអាពាហ៌ពិពាហ៌បានមកដល់ហើយ សូមនឹកពិនិត្យមើលសកម្មភាពរបស់យើងកន្លងមកជាមុនផង កុំអោយផុងខ្លួនក្នុងបំណុលព្រោះរឿងរៀបការដូចរឿងខាងក្រោមនេះ។

មង្គលការនៅក្នុងភូមិជនបទតូចមួយ ក្នុងខេត្ត Guizhuo ភាគនារតីនាប្រទេសចិន បានប្រារព្ធធ្វើឡើងយ៉ាងយកចិត្តទុកដាក់បំផុតដើម្បីអបអរសារទដល់គូរស្វាមីភរិយាថ្មី ដែលមានចំនួនជាង១០០តុ ។ ប៉ុន្តែអ្វីដែលគួរឲ្យភ្ញាក់ផ្អើល អាម៉ាស់ និងភាពងឿងឆ្ងល់បំផុតនោះគឺ អ្នកភូមិណាម្នាក់មកចូលរួមនៅក្នុងពិធីមង្គលការនោះទេ។

ពិធីមង្គលការដ៏អភ័ពនេះ ទទួលបាននូវការចាប់អារម្មណ៍និងមតិរិះគន់ជាច្រើននៅលើបណ្តាញសង្គមចិននាពេលថ្មីៗនេះ ដែលមានគ្រួសារចិនមួយបានប្រារព្ធពិធីមង្គលការឲ្យកូនៗរបស់ពួកគេ។ តាមការឲ្យដឹងអ្នកដែលរស់នៅក្នុងភូមិនោះបាននិយាយថា តាមប្រពៃណីអញ្ជើញភ្ញៀវកិត្តិយសដើម្បីចូលរួមក្នុងពិធីផ្សេងៗដូចជាពិធីមង្គលការជាដើម ដោយការអញ្ជើញធ្វើឡើងដោយគ្រាន់តែប្រើមាត់សម្រាប់ហៅតែប៉ុណ្ណោះគឺគ្មានលិខិតអញ្ជើញត្រឹមត្រូវនោះទេ។ ដូច្នេះទើបធ្វើឲ្យក្រុមគ្រួសារនោះមិនទទួលបាននូវលទ្ធផលដូចជាការរំពឹងទុករបស់ពួកគេ។

នៅក្នុងថ្ងៃអាពាហ៍ពិពាហ៍របស់ពួកគេនោះ គឺឃើញថាបានរៀបចំតុបតែងឡើងយ៉ាងប្រណិត ហើយមានតុចំនួនជាង១០០តុដាក់តម្រៀបគ្នានៅក្នុងទីធ្លាយ៉ាងទូលាយដើម្បីរងចាំស្វាគមន៍ភ្ញៀវកិត្តិយស។ ប៉ុន្តែផ្ទុយទៅវិញ គឺមានតែសាច់ញាតិបងប្អូនខាងកូនកំលោះក្រមុំមួយចំនួនតូចប៉ុណ្ណោះដែលបានបង្ហាញខ្លួននៅក្នុងកម្មវិធី ខណៈគ្មានវត្តមានរបស់អ្នកភូមិណាម្នាក់ចូលរួមនៅក្នុងកម្មវិធីនោះឡើយ។ នេះគឺពិតជាបានបង្ហាញពីបរិកាសដ៏ស្រងោចស្រងែងមួយរបស់ពិធីមង្គលនេះ ខណៈកូនក្រមុំកូនកំលោះកំពុងរង់ចាំភ្ញៀវយ៉ាងរន្ទះសារបំផុត។

ម៉្យាងវិញទៀត ការដែលក្រុមគ្រួសាររៀបចំមង្គលដ៏ធំបែបនេះ តែបែរជាគ្មានភ្ញៀវណាម្នាក់មកចូលរួមនោះគឺអាចដោយសារតែ គ្រួសារខាងកូនកំលោះគឺជាអ្នកទីក្រុងដែលទើបផ្លាស់មករស់នៅនិងរៀបចំពិធីក្នុងជនបទ។ យ៉ាងណាមិញ គ្រួសារនេះគឺមិនដែលបានមករួមក្នុងកម្មវិធីនិងធ្វើសកម្មភាពផ្សេងៗនៅជាមួយនឹងអ្នកភូមិនៅទីនោះទេ ទើបជាហេតុបណ្តាលឲ្យអ្នកភូមិនៅទីនោះមិនចូលរួមពិធីមង្គលការរបស់ពួកគេវិញដូចគ្នា។

ទោះបីជាយ៉ាងណាក៏ដោយ ក៏មានមតិលើកឡើងជាច្រើននៅលើបណ្តាញសង្គមដោយមានអ្នកមួយចំនួនបាននិយាយថា ដោយសារតែពួកគេមិនបានទៅចូលរួមក្នុងពិធីមង្គលផ្សេងៗរបស់អ្នកស្រុក ចុះរំពឹងអីឲ្យអ្នកស្រុកមកចូលរួមក្នុងពិធីរបស់ពួកគេវិញនោះ។ ខណៈអ្នកខ្លះទៀតក៏បានលើកឡើងរួមជាមួយនឹងមតិណែនាំទៅកាន់ម្ចាស់ដើមការ ដោយលើកឡើងថា គួរតែចែកម្ហូបអាហារដែលនៅសល់ទាំងអស់ទៅឲ្យអ្នកភូមិដែលរស់នៅទីនោះ បើទោះបីជាគេមិនបានមកចូលរួមក្តី គឺដើម្បីបង្កើតនូវទំនាក់ទំនងល្អក៏ដូចជាពង្រឹងនូវចំណងមិត្តភាព និងចៀសវាងមិនឲ្យរឿងបែបនេះកើតឡើងម្តងទៀតនាថ្ងៃខាងមុខ៕

អាមេរិក៖ បច្ចុប្បន្ន ការកើនឡើងនៃការប្រើប្រាស់អាភៀន ឬថ្នាំញៀនផ្សេងៗបានធ្វើឱ្យមន្ត្រីសហរដ្ឋអាមេរិកត្រូវចំណាយប្រាក់រាប់លានដុល្លារដើម្បីធ្វើការស្រាវជ្រាវវ៉ាក់សាំង និងការព្យាបាល ប៉ុន្តែពួកគេមិនបានទទួលជោគជ័យឡើយបន្ទាប់ពីធ្វើការស្រាវជ្រាវអស់រយៈពេលរាប់ទសវត្សរ៍មកហើយ។

អាមេរិក គឺជាប្រទេសដែលកំពុងប្រឈមមុខនឹងវិបត្តិអាភៀនដែលមិនធ្លាប់មានពីមុនមក។ យោងតាមរបាយការណ៍របស់ CDC ឆ្នាំ ២០២១ បានឱ្យដឹងថា មនុស្សជាង ១០០,០០០ នាក់បានស្លាប់ដោយសារការប្រើប្រាស់ថ្នាំអាភៀនហួសកម្រិតក្នុងរយៈពេល ១២ ខែ។ មូលហេតុចម្បងគឺ fentanyl ដែលជាថ្នាំសំយោគមានថាមពលខ្លាំងជាង morphine ១០០ ដង។ លើសពីនេះ ចំនួនអ្នកស្លាប់ដោយសារកូកាអ៊ីន ថ្នាំអាភៀនពាក់កណ្តាលសំយោគ និងថ្នាំបំបាត់ការឈឺចាប់តាមវេជ្ជបញ្ជាដែលមានសារធាតុញៀនក៏កើនឡើងផងដែរ។

យោងតាមការប៉ាន់ប្រមាណដោយ Washington Post ថា fentanyl គឺជាមូលហេតុចម្បងនៃការស្លាប់របស់ជនជាតិអាមេរិកដែលមានអាយុចន្លោះពី ១៨ ទៅ ៤៩ ឆ្នាំ។ ទិន្នន័យស្ទាបស្ទង់របស់សហព័ន្ធឆ្នាំ ២០២១ ក៏បានប៉ាន់ប្រមាណដែរថាមនុស្សប្រហែល ៥.៦ លាននាក់ដែលមានអាយុលើសពី ១២ ឆ្នាំសុទ្ធតែមានបញ្ហានៃការប្រើប្រាស់ថ្នាំអាភៀន។
គួរបញ្ជាក់ដែរថា ថ្មីៗនេះមន្ត្រីសហរដ្ឋអាមេរិកបានផ្តល់មូលនិធិចំនួន ១៤.៨ លានដុល្លារសម្រាប់អ្នកវិទ្យាសាស្ត្រដើម្បីស្រាវជ្រាវអង្គបដិប្រាណ monoclonal ដែលផ្តោតលើ fentanyl ។ ទោះជាយ៉ាងណាក៏ដោយ អ្នកជំនាញបានតស៊ូសិក្សាជាយូរមកហើយប៉ុន្តែនៅតែគ្មានលទ្ធផល មូលហេតុគឺដោយសារតម្លៃនៃការស្រាវជ្រាវពីបញ្ហានេះគឺត្រូវចំណាយច្រើនខ្លាំង ដោយមិនរាប់បញ្ចូលថ្លៃសេវានាំយកទៅទីផ្សារនោះទេ៕

ប្រទេសឥណ្ឌា៖ អាជ្ញាធរនៅក្នុងរដ្ឋធានីដេលីរបស់ប្រទេសឥណ្ឌា បានបិទសាលាបឋមមួយរយៈ ដោយសារការបំពុលបរិយាកាសធ្ងន់ធ្ងរ និងគុណភាពខ្យល់កាន់តែអាក្រក់ទៅៗ។

យោងតាមគេហទំព័រ BBC News ដែលបានចុះផ្សាយនៅថ្ងៃទី៤ ខែវិច្ឆិកាថា គុណភាពខ្យល់នៅក្នុងទីក្រុងដេលីបានធ្លាក់ចុះដល់កម្រិតធ្ងន់ធ្ងរជាលើកដំបូងក្នុងរដូវកាលនេះ ដែលធ្វើឱ្យរដ្ឋធានីនៃទីក្រុងនេះក្លាយជាទីក្រុងមួយដែលមានខ្យល់បំពុលបរិស្ថានខ្លាំងបំផុតរបស់ពិភពលោក។

មូលហេតុដែលធ្វើឱ្យទីក្រុងដេលី មានបរិយាកាសមិនល្អ គឺដោយសារកត្តាផ្សេងៗ រួមទាំងការដុតបំផ្លាញដំណាំរបស់កសិករ ល្បឿនខ្យល់ទាប និងការផ្ទុះកាំជ្រួចក្នុងអំឡុងពេលពិធីបុណ្យនានាជាដើម។ យោងតាមការសិក្សាដោយគណៈកម្មាធិការត្រួតពិនិត្យការបំពុល បានបង្ហាញថា ការបំពុលខ្យល់ក្នុងទីក្រុងនឹងកើនឡើងចាប់ពីថ្ងៃទី ១ ដល់ថ្ងៃទី ១៥ ខែវិច្ឆិកា នៅពេលដែលចំនួននៃឧប្បត្តិហេតុដុតកម្ទេចចោលនៅក្នុងរដ្ឋជិតខាងបានកើនឡើង។

ដូច្នេះហើយ រដ្ឋមន្ត្រីរបស់ទីក្រុងដេលី លោក Arvind Kejriwal បានប្រកាសភ្លាមៗថា សាលាបឋមសិក្សារបស់រដ្ឋាភិបាល និងឯកជនទាំងអស់នៅក្នុងទីក្រុងនឹងត្រូវបានបិទនៅថ្ងៃសុក្រ និងថ្ងៃសៅរ៍។ ដោយជាធម្មតាសាលារៀនទាំងអស់តម្រូវឱ្យរៀនពីថ្ងៃច័ន្ទ ដល់ថ្ងៃសៅរ៍ ប៉ុន្តែដោយសារបរិកាសប្រែប្រួល ទើបរដ្ឋាភិបាលសម្រេចចិត្តបិទនៅថ្ងៃសុក្រ និងថ្ងៃសៅរ៍មួយរយៈ។ ហេតុនេះហើយ បច្ចុប្បន្នសាលារៀនបឋមបើកឱ្យសិក្សាត្រឹមថ្ងៃច័ន្ទ ដល់ថ្ងៃព្រហស្បត៌ប៉ុណ្ណោះ។

ទោះជាយ៉ាងណាក៏ដោយ ដើម្បីប្រយុទ្ធប្រឆាំងនឹងផលប៉ះពាល់នៃការបំពុលកើនឡើង គណៈគ្រប់គ្រងការបំពុលកណ្តាលបានបញ្ជាឱ្យហាមឃាត់ជាបន្ទាន់លើការងារសំណង់ដែលមិនសំខាន់នៅក្នុងទីក្រុង និងសេវាកម្មដឹកជញ្ជូនសាធារណៈទាំងអស់ រួមទាំងសេវារថភ្លើងក្រោមដី និងឡានក្រុងរបស់ក្រុងដេលី ក៏ត្រូវបានណែនាំឱ្យបង្កើនប្រេកង់របស់ពួកគេ ដើម្បីទប់ស្កាត់ការបំភាយឧស្ម័នពីយានយន្តផងដែរ។

គួរបញ្ជាក់ដែរថា ខ្យល់ដែលបំពុលបានបង្កឱ្យមានបញ្ហាសុខភាពធ្ងន់ធ្ងរដល់អ្នកស្រុកដេលីជារៀងរាល់ឆ្នាំ ដោយអ្នកជំនាញផ្នែកសុខភាពក៏បានរាយការណ៍អំពីការកើនឡើងនៃករណីជំងឺហឺត និងបញ្ហាសួតក្នុងចំណោមកុមារ និងមនុស្សចាស់ ដោយសារតែគុណភាពខ្យល់កាន់តែអាក្រក់។ លោក Jugal Kishore ប្រធានផ្នែកវេជ្ជសាស្ត្រនៅមន្ទីរពេទ្យ Safdarjung នៃទីក្រុង បាននិយាយថា បច្ចុប្បន្នយើងកំពុងកត់ត្រាការកើនឡើងនៃការឆ្លងមេរោគរលាកទងសួត ក៏ដូចជាបានណែនាំដល់អ្នកដែលមានបញ្ហាផ្លូវដង្ហើមកុំឱ្យចេញក្រៅផ្ទះលុះត្រាតែមានការចាំបាច់ប៉ុណ្ណោះ៕

បរទេស៖ សហភាពអឺរ៉ុបបានខាតបង់ប្រាក់ចំនួន ១.៥ ពាន់លានដុល្លារ ដោយសារតែការដាក់ទណ្ឌកម្មដ៏ខ្លាំងក្លាទៅលើរុស្ស៊ី។

យោងតាមគេហទំព័រ RT International ដែលបានចុះផ្សាយនៅថ្ងៃទី ៤ ខែវិច្ឆិកាថា បច្ចុប្បន្ននេះ សហភាពអឺរ៉ុបបានបាត់បង់ប្រាក់ចំនួន ១.៥ ពាន់លានដុល្លារដោយសារការដាក់ទណ្ឌកម្ម និងការសម្រេចចិត្តកាត់បន្ថយកិច្ចសហប្រតិបត្តិការជាមួយរុស្ស៊ី។

កន្លងទៅ កាលពីឆ្នាំ២០១៣ ពាណិជ្ជកម្មទ្វេភាគីរវាងរុស្ស៊ីនិងសហភាពអឺរ៉ុបរកចំណូលបាន ៤១៧ ពាន់លានដុល្លារ។ ទោះជាយ៉ាងណាក៏ដោយ ចំណូលបានថយចុះមកត្រឹម ២០០ ពាន់លានដុល្លារនៅឆ្នាំ ២០២២ ហើយត្រូវបានគេរំពឹងថានឹងមានតិចជាង ១០០ ពាន់លានដុល្លារនៅឆ្នាំនេះ។ ដូច្នេះ នៅឆ្នាំក្រោយ វានឹងបន្តធ្លាក់ចុះមកត្រឹម ៥០ ពាន់លានដុល្លារ ហើយនៅឆ្នាំបន្ទាប់ៗទៀតចំណូលនឹងធ្លាក់មកដល់សូន្យតែម្តង។

លោក Aleksandr Grushko អនុរដ្ឋមន្ត្រីការបរទេសរុស្ស៊ី បាននិយាយថា បើគ្មានទណ្ឌកម្មទេ ពាណិជ្ជកម្ម EU-រុស្ស៊ី ក្នុងឆ្នាំ ២០២៣ អាចឈានដល់ ៧០០ ពាន់លានដុល្លារ។ លោក ក៏បានបន្តទៀតថា វិស័យឧស្សាហកម្មអាល្លឺម៉ង់បច្ចុប្បន្នត្រូវទិញឧស្ម័នធម្មជាតិក្នុងតម្លៃ ៣ ដងខ្ពស់ជាងតម្លៃនៅសហរដ្ឋអាមេរិក។ ទន្ទឹមនឹងនេះ ខ្សែសង្វាក់ផលិតកម្មនៅជួរមុខនៃម៉ាស៊ីនសេដ្ឋកិច្ចអឺរ៉ុបបានផ្លាស់ប្តូរបន្តិចម្តងៗទៅកាន់អាមេរិកខាងជើង។

បច្ចុប្បន្ន សហភាពអឺរ៉ុបបានដាក់ចេញកញ្ចប់ទណ្ឌកម្មចំនួន ១១ ប្រឆាំងនឹងរុស្ស៊ី ជុំវិញប្រតិបត្តិការយោធារបស់ខ្លួននៅអ៊ុយក្រែន។ ចំនួននៃការរឹតបន្តឹងបានឈានដល់រាប់ម៉ឺននាក់ បើទោះបីជាមន្ត្រីនៅក្នុងសហភាពអឺរ៉ុប និងសហរដ្ឋអាមេរិកបានទទួលស្គាល់ម្តងហើយម្តងទៀតថា ផលប៉ះពាល់អវិជ្ជមាននៃវិធានការលើប្រទេសរុស្ស៊ីមិនមានអ្វីគួរឱ្យកត់សម្គាល់ដូចការរំពឹងទុកនោះទេ៕

ប្រទេសចិន ៖ កាលពីដើមខែវិច្ឆិកា ឆ្នាំ២០២៣ សារព័ត៌មានបរទេសបានចុះផ្សាយថា នៅស្រុក Luyi ទីក្រុង Zhoukou ខេត្ត Henan ប្រទេសចិន កសិករបានចិញ្ចឹមសត្វចៀមពូជហួយសានជាច្រើនក្បាល និងល្បីល្បាញនៅក្នុងតំបន់ ។ ការលក់ដូររោម និងសាច់ចៀមរបស់អ្នកស្រុករស់នៅក្នុងតំបន់នេះបានកាក់កបជាបន្តបន្ទាប់ ប៉ុន្តែសត្វចៀមប្រភេទនេះមានរោមតិចតួចណាស់ ។

ហេតុនេះ សត្វចៀមពូជហួយសានមានរោមតិចតួច ធ្វើឱ្យពលរដ្ឋរស់នៅស្រុក Luyi មិនចាប់អារម្មណ៍យករោមចៀមទាំងនេះទៅកែច្នៃទេ ហើយពួកគេក៏យកវាទៅបោះចោលកាលពីកន្លងមក ។ ប៉ុន្តែបច្ចុប្បន្ន ពួកគេបានប្រើប្រាស់ប្រយោជន៍ពីរោមចៀម ដោយប្រមូលយករោមចៀមទុកសម្រាប់ធ្វើជក់ផាត់មុខ តាមរយៈការផលិតចំនួន១៥ដំណាក់កាល ។

ក្រុមហ៊ុននានាបានផលិតជក់សម្រាប់ប្រើប្រាស់ជាមួយគ្រឿងសម្អាងជាច្រើនប្រភេទនៅប្រទេសចិន ក្នុងនោះគេប្រទះឃើញថា មានជក់តុបតែងមុខយ៉ាងតិចចំនួន៥ ក្នុងចំណោមជក់ចំនួន១០ គឺបានផលិតនៅស្រុក Luyi ។ លើសពីនេះ ជក់តុបតែងមុខចំនួន៩ ក្នុងចំណោមជក់ចំនួន១០ ដែលប្រទេសចិនបាននាំចេញនោះ ក៏បានផលិតនៅស្រុក Luyi ផងដែរ ។ ដូចគ្នានេះ ជក់តុបតែងមុខជាច្រើនប្រភេទទៀត ដែលក្រុមហ៊ុនផលិតបានដាក់វានៅក្នុងកញ្ចប់គ្រឿងសំអាងសម្រាប់លក់នៅក្រៅប្រទេស គឺសុទ្ធតែបានផលិតនៅស្រុក Luyi ។

បច្ចុប្បន្ន នៅស្រុក Luyi មានក្រុមហ៊ុនផលិតជក់ពីរោមចៀមសម្រាប់ប្រើប្រាស់ជាមួយគ្រឿងសម្អាង ស្មើជាង១៦០ក្រុមហ៊ុន ។ ក្រុមហ៊ុនលើកឡើងថា រោមចៀមមិនត្រឹមតែក្លាយជាឧស្សាហកម្មសំខាន់នៅប្រទេសចិនប៉ុណ្ណោះទេ ប៉ុន្តែវាបានផ្តល់ឱកាសឱ្យអ្នករស់នៅក្នុងតំបន់នេះមានការងារធ្វើជិតស្មើ១សែននាក់ឯណោះ ៕ ប្រភព ៖ China face