មនុស្សមួយចំនួនប្រាកដជាធ្លាប់ជួបប្រទះនឹងបញ្ហាសក់ជ្រុះ ដែលធ្វើឱ្យយើងបាត់បង់ទំនុកចិត្តលើខ្លួនឯង។ ការជ្រុះសក់អាចបណ្តាលមកពីហេតុផលជាច្រើន រួមទាំងរបៀបរស់នៅ របបអាហារ ភាពតានតឹង និងការប្រែប្រួលអ័រម៉ូន។ ទោះជាយ៉ាងណាក៏ដោយ អ្នកអាចកែលម្អវាបានទាំងស្រុងជាមួយនឹងរបបអាហារដែលមានតុល្យភាព។ ដូច្នេះខាងក្រោមនេះគឺជាអាហារមួយចំនួនដែលអាចបន្ថែមទៅក្នុងរបបអាហារដើម្បីឱ្យសក់មានសុខភាពល្អ និងស្អាតជាងមុន៖
១.ផ្លែឈើសម្បូរវីតាមីន C៖ ផ្លែឈើដែលសម្បូរទៅដោយវីតាមីន C ដូចជា គីវី ក្រូច និងក្រូចឃ្វិច គឺជាប្រភពដ៏ល្អនៃវីតាមីន C ដែលជួយឱ្យរាងកាយស្រូបយកជាតិដែកបានកាន់តែមានប្រសិទ្ធភាព ដោយហេតុនេះជំរុញការលូតលាស់សក់ និងការពារការបាត់បង់សក់។
២.ទឹកដោះគោជូរ៖ កាល់ស្យូមរបស់ទឹកដោះគោជូរ គឺជាសារធាតុរ៉ែដ៏សំខាន់បំផុតសម្រាប់ការលូតលាស់សក់។ ដូច្នេះអ្នកគួរបន្ថែមទឹកដោះគោជូរ ឬយ៉ាអួរទៅក្នុងបញ្ជីអាហារសម្រន់របស់អ្នក ក៏ដូចជាលាយគ្រាប់ធញ្ញជាតិដូចជា Walnut និង flaxseeds ដើម្បីផ្តល់សារធាតុចិញ្ចឹមបន្ថែមទៀត។
៣. Oatmeal៖ គ្រាប់ធញ្ញជាតិ Oatmeal មិនត្រឹមតែជាប្រភពដ៏ល្អនៃជាតិសរសៃប៉ុណ្ណោះទេ ប៉ុន្តែវាក៏មានផ្ទុកនូវសារធាតុចិញ្ចឹមសំខាន់ៗជាច្រើនដូចជា ជាតិដែក ស័ង្កសី និងអាស៊ីតខ្លាញ់អូមេហ្គា ៦ ដែលត្រូវបានគេស្គាល់ជាទូទៅថាជាអាស៊ីតខ្លាញ់មិនឆ្អែត (PUFA) ដែលមានសារៈសំខាន់ក្នុងការថែរក្សាសុខភាពស្បែក និងសក់។ អ្នកអាចញ៉ាំ oats សម្រាប់អាហារពេលព្រឹកពីរបីដងក្នុងមួយសប្តាហ៍ ដើម្បីធានាថាសក់របស់អ្នកទទួលបានសារធាតុចិញ្ចឹមទាំងអស់ដែលវាត្រូវការ។
៤.ដំឡូងជ្វា៖ ដំឡូងជ្វាមានសារៈសំខាន់ក្នុងការស្រូបយកវីតាមីន A ព្រោះវាសម្បូរទៅដោយសារធាតុ Beta-carotene ។ វីតាមីន A នេះមានសារៈប្រយោជន៍សម្រាប់បណ្តុះសក់ឱ្យក្រាស់ និងផលិតជាតិខ្លាញ់ រក្សាសក់ឱ្យមានសុខភាពល្អ រួមទាំងមានសំណើមតាមបែបធម្មជាតិ។ វិធីមួយដើម្បីបន្ថែមដំឡូងជ្វាទៅក្នុងអាហារគឺ ស្ងោរ ជំហុយ ឬចៀនវាជាមួយបន្លែផ្សេងទៀត។
៥.ការ៉ុត៖ ការ៉ុតមិនត្រឹមតែមានប្រយោជន៍សម្រាប់ភ្នែករបស់អ្នកប៉ុណ្ណោះទេ ប៉ុន្តែវាក៏ជាប្រភពដ៏ល្អឥតខ្ចោះនៃវីតាមីន A ដែលសក់របស់អ្នកត្រូវការផងដែរ។ ការ៉ុតមានជីវជាតិសម្រាប់ស្បែកក្បាល និងផ្តល់សំណើមដល់សក់យ៉ាងយូរពីគល់ដល់ចុង។
៦.ស៊ុត៖ ស៊ុតគឺជាប្រភពនៃប្រូតេអ៊ីន និង biotin ដែលជួយពង្រឹងសក់ កង្វះប្រូតេអ៊ីនតែងតែជាប់ទាក់ទងនឹងការជ្រុះសក់ ខណៈដែល biotin មានសារៈសំខាន់សម្រាប់ការផលិត keratin ដែលជាប្រូតេអ៊ីនសក់ផងដែរ៕
