ប្រទេសជប៉ុន ៖ ស្របពេលសង្គ្រាមបានកើតឡើងរវាងប្រទេសរុស្ស៊ី និងអ៊ុយក្រែន ព្រមទាំងសង្គ្រាមរវាងប្រទេសអ៊ីស្រាអែល និងប៉ាឡេស្ទីន បានធ្វើឱ្យទីក្រុងតូក្យូរបស់ប្រទេសជប៉ុនសម្រេចចិត្តរៀបចំការហ្វឹកហាត់ពីវិធីជម្លៀសខ្លួនភ្លាមៗសម្រាប់ពលរដ្ឋជប៉ុន ក្នុងករណីមានការវាយប្រហារដោយមីស៊ីល ។

ការហ្វឹកហាត់ពីវិធីជម្លៀសខ្លួនលើកនេះ គេបានរៀបចំឡើងក្នុងស្ថានីយរថភ្លើងក្រោមដីនៅតំបន់នេរីម៉ា ទីក្រុងតូក្យូ រួមទាំងស្ថានីយរថភ្លើងក្រោមដីនៅតំបន់តូអេ នេរីម៉ា និងឧទ្យានហេសេ ស៊ុតស៊ុជិ កាលពីថ្ងៃទី៦ ខែវិច្ឆិកា ឆ្នាំ២០២៣ ក្នុងនោះមានអ្នកចូលរួមប្រមាណ៣០នាក់ ។

ក្នុងអំឡុងពេលហ្វឹកហាត់ អ្នកស្ថិតនៅស្ថានីយរថភ្លើងក្រោមដីនឹងចាប់ផ្តើមជម្លៀសខ្លួន នៅពេលប្រព័ន្ធប្រកាសអាសន្ននៅទូទាំងប្រទេស (J-Alert) របស់រដ្ឋាភិបាលកណ្តាលផ្តល់សញ្ញាដាស់តឿនថា មានការប្រហារដោយមីស៊ីល ។ ចំណែកសមត្ថកិច្ច និងភ្នាក់ងារពាក់ព័ន្ធនឹងជាអ្នកជួយនាំផ្លូវមនុស្សម្នាចុះជណ្តើរទៅកាន់ទ្វារពិនិត្យសំបុត្ររថភ្លើងនៅជាន់ក្រោមដី ។ បន្ទាប់មក អ្នកជម្លៀសខ្លួនទាំងនេះត្រូវអង្គុយចុះ ដើម្បីការពារខ្លួនពីការបំផ្ទុះគ្រាប់បែក ។

រដ្ឋាភិបាលជប៉ុនបានរៀបចំទីកន្លែងសុវត្ថិភាពចំនួន៤.២៥៨កន្លែងសម្រាប់ទទួលជនភៀសខ្លួនបណ្តោះអាសន្ន ដើម្បីកាត់បន្ថយការខូចខាតដោយសារការវាយប្រហារតាមមីស៊ីល ។ ទីកន្លែងដែលរដ្ឋាភិបាលបានរៀបចំភាគច្រើន គឺជាកន្លែងផ្តល់សេវាកម្មងាយស្រួលសាធារណៈ និងកន្លែងនានានៅក្រោមដី ដែលគេចាត់ទុកថា វាមានសុវត្ថិភាព ។

បុរសជប៉ុនម្នាក់មានអាយុ៦០ឆ្នាំ បានមកចូលរួមហ្វឹកហាត់ពីវិធីជម្លៀសខ្លួននិយាយថា វាជាការហ្វឹកហាត់លើកដំបូងរបស់គាត់ ដើម្បីទប់ទល់នឹងស្ថានការណ៍អាសន្ន ដោយសារការវាយប្រហារដោយមីស៊ីល ។ គាត់បានរៀនសូត្ររួចហើយអំពីវិធីយករួចខ្លួន នៅពេលជួបហេតុការណ៍អាក្រក់ ។

ចំណែកអាជ្ញាធរប្រចាំទីក្រុងតូក្យូបញ្ជាក់ថា អាជ្ញាធរមានគម្រោងរៀបចំការហ្វឹកហាត់បន្ថែមទៀតដើម្បីផ្តល់ដំណឹងឱ្យពលរដ្ឋដឹងថា ពួកគេគួរធ្វើដូចម្តេច បើជួបនឹងហេតុការណ៍បន្ទាន់កើតឡើងជាក់ស្តែង ៕ ប្រភព ៖ nation

បរទេស៖ លោក Zelensky បានអញ្ជើញលោក Trump ទៅកាន់ប្រទេសអ៊ុយក្រែន ដើម្បីបង្ហាញថា ជម្លោះបច្ចុប្បន្នមិនអាចដោះស្រាយបានក្នុងរយៈពេល ២៤ ម៉ោងឡើយ។

យោងតាមប្រភពព័ត៌មាន CNN ដែលបានចុះផ្សាយនៅថ្ងៃទី៦ ខែវិច្ឆិកាថា ប្រធានាធិបតី Volodymyr Zelensky បានធ្វើការអញ្ជើញអតីតប្រធានាធិបតីអាមេរិកលោក Donald Trump ទៅកាន់ប្រទេសអ៊ុយក្រែន ដើម្បីដោះស្រាយនិងបញ្ចប់ជម្លោះក្នុងរយៈពេល ២៤ ម៉ោង។ លោក Zelensky បាននិយាយថា “ប្រសិនបើអតីតប្រធានាធិបតីអាមេរិកលោក Donald Trump អាចមកអ៊ុយក្រែនបាន គាត់នឹងត្រូវការពេលត្រឹមតែ ២៤ នាទីប៉ុណ្ណោះ ដើម្បីពន្យល់ដល់លោក Trump ថាគាត់មិនអាចដោះស្រាយជម្លោះនេះបានទេ”។

គួររំលឹកដែរថា កាលពីខែកញ្ញាកន្លងទៅលោក Trump បាននិយាយថា ប្រសិនបើលោកជាប់ឆ្នោតនៅឆ្នាំ ២០២៤ លោកនឹងដោះស្រាយជម្លោះនៅអ៊ុយក្រែនក្នុងរយៈពេលត្រឹមតែ ២៤ ម៉ោងប៉ុណ្ណោះ។ លោក Trump ក៏បានបន្តទៀតថា “គាត់នឹងនាំលោក Putin ជាមួយលោក Zelensky ចូលទៅក្នុងបន្ទប់មួយដើម្បីធ្វើការតទល់នឹងគ្នា បន្ទាប់មកយើងនឹងឈានដល់កិច្ចព្រមព្រៀងមួយ” ។

ទោះជាយ៉ាងណាក៏ដោយ លោក Trump មិនទាន់បានឆ្លើយតបនឹងការអញ្ជើញរបស់ប្រធានាធិបតីអ៊ុយក្រែនទេ។ ដោយអតីតប្រធានាធិបតីអាមេរិករូបនេះ បាននិយាយម្តងហើយម្តងទៀតថា លោកអាចបញ្ចប់ជម្លោះរុស្ស៊ី-អ៊ុយក្រែនបានយ៉ាងឆាប់រហ័ស ហើយជឿជាក់ថា រុស្ស៊ីនឹងមិនបើកយុទ្ធនាការនៅអ៊ុយក្រែនទេ ប្រសិនបើលោកនៅតែកាន់តំណែង៕

ប្រទេសអង់គ្លេស ៖ កាលពីថ្ងៃទី៦ ខែវិច្ឆិកា ឆ្នាំ២០២៣ Accenture គឺជាក្រុមហ៊ុនស្រាវជ្រាវ និងផ្តល់សេវាព័ត៌មាន បានបង្ហាញលទ្ធផលស្ទង់មតិចុងក្រោយថា ពលរដ្ឋអង់គ្លេសវ័យកណ្តាលចំនួន២នាក់ក្នុងចំណោម៣នាក់ បានដាក់ផែនការកាត់បន្ថយការចំណាយក្នុងអំឡុងពេលបុណ្យគ្រិស្តម៉ាស ឆ្នាំ២០២៣ ។ នេះឆ្លុះបញ្ចាំងឱ្យឃើញថា ពួកគេមានទស្សនៈអវិជ្ជមានចំពោះការចំណាយប្រចាំថ្ងៃ ច្រើនជាងការស្ទង់មតិជាច្រើនលើកនាពេលកន្លងមក ។

លទ្ធផលស្ទង់មតិបង្ហាញថា បច្ចុប្បន្ន ពលរដ្ឋអង់គ្លេសកំពុងស្វែងរកវិធីកាត់បន្ថយការចំណាយប្រាក់ រួមទាំងកាត់បន្ថយការទិញវត្ថុអនុស្សាវីរយ៍, កាត់បន្ថយការបរិភោគអាហារនៅក្រៅផ្ទះ និងកាត់បន្ថយការទិញអាហារ និងភេសជ្ជៈមកបរិភោគនៅផ្ទះ ដោយសារពួកគេបារម្ភពីជីវភាពប្រចាំថ្ងៃ ។ លទ្ធផលស្ទង់មតិបង្ហាញទៀតថា ពលរដ្ឋអង់គ្លេសមានវ័យកណ្តាលស្មើជាងពាក់កណ្តាល គ្មានគម្រោងទទួលប្រយោជន៍ពីការបញ្ចុះតម្លៃក្នុងការទិញទំនិញផ្សេងៗនៅថ្ងៃ Black Friday, Cyber Monday ឬ Boxing Day នោះទេ ។

យោងតាមទិន្នន័យផ្លូវការដែលបានផ្សព្វផ្សាយនាពេលថ្មីៗនេះបញ្ជាក់ថា ចំនួនការលក់រាយនៅប្រទេសអង់គ្លេស បានធ្លាក់ចុះខ្លាំងជាងការរំពឹងទុកនៅខែកញ្ញា ឆ្នាំ២០២៣ ទៅទៀត ។ ការធ្លាក់ចុះនេះបណ្តាលមកពីអាកាសធាតុក្តៅខុសធម្មតា ដែលបណ្តាលឱ្យការលក់សម្លៀកបំពាក់នៅរដូវស្លឹកឈើជ្រុះធ្លាក់ចុះ ។

បើទោះជាគ្រួសារនីមួយៗនៅអង់គ្លេសត្រូវប្រឈមនឹងបញ្ហាជីវភាពរស់នៅក្នុងរយៈពេល២ឆ្នាំក្តី ប៉ុន្តែជាទូទៅ តម្រូវការទិញទំនិញពីអតិថិជននៅតែកើនឡើងនៅឆ្នាំ២០២៣ ។ Next ជាក្រុមហ៊ុនលក់សម្លៀកបំពាក់រាយរបស់អង់គ្លេសលើកឡើងថា អាកាសធាតុនៅរដូវស្លឹកឈើជ្រុះមានសភាពធម្មតាវិញហើយ តាំងពីពាក់កណ្តាលខែតុលា ឆ្នាំ២០២៣ ។ ដូច្នេះ វាធ្វើឱ្យការលក់ទំនិញកើនឡើងវិញ ហើយក្រុមហ៊ុនគិតថា ការលក់នៅត្រីមាសទី៤ ឆ្នាំ២០២៣ ដែលជាអំឡុងពេលបុណ្យគ្រិស្តម៉ាសនឹងកើនឡើង២% បើធៀបពីមួយឆ្នាំទៅមួយឆ្នាំ ។

ចំណែក Tesco ជាក្រុមហ៊ុនលក់ទំនិញរាយដ៏ធំមួយនៅប្រទេសអង់គ្លេស និង Sainsbury ជាក្រុមហ៊ុនលក់ទំនិញរាយ និងជាគូប្រជែងគ្នានោះ ពួកគេមានទស្សនៈវិជ្ជមានពាក់ព័ន្ធនឹងការលក់ទំនិញក្នុងអំឡុងពេលបុណ្យគ្រិស្តម៉ាស ៕ ប្រភព ៖ Bangkok biznews

ប្រទេសថៃ ៖ នារសៀលថ្ងៃទី៦ ខែវិច្ឆិកា ឆ្នាំ២០២៣ នៅវិមានរដ្ឋាភិបាលប្រទេសថៃ លោក Somkid Chuekong អនុរដ្ឋលេខាធិការទទួលបន្ទុកកិច្ចការនយោបាយ បានផ្តល់បទសម្ភាសន៍ជាមួយក្រុមអ្នកសារព័ត៌មាន ក្រោយពីលោកចូលរួមក្នុងកិច្ចប្រជុំពិភាក្សាគ្នាជាមួយក្រសួងហិរញ្ញវត្ថុ និងក្រសួងកសិកម្ម និងសហករណ៍ថា កិច្ចប្រជុំបានពិភាក្សាពីបញ្ហាស្រូវរដូវថ្មី ដែលប្រទេសថៃនឹងទិញ ឬជួយកសិកររឿងការប្រាក់ ព្រមទាំងបញ្ហាផ្សេងៗ ។ លើសពីនេះ លោកនឹងចូលរួមប្រជុំគណៈរដ្ឋមន្ត្រី នៅថ្ងៃទី៧ ខែវិច្ឆិកា ឆ្នាំ២០២៣ ព្រោះបច្ចុប្បន្ន ជារដូវស្រូវកំពុងផ្តល់ផល ជាពិសេស ស្រូវផ្កាម្លិះនៅតំបន់ឦសានប្រទេសថៃ ។

លោក Somkid Chuekong អនុរដ្ឋលេខាធិការទទួលបន្ទុកកិច្ចការនយោបាយបន្តថា នៅខេត្តអូប៊ុនរ៉ាជថានី តម្លៃស្រូវនៅម៉ាស៊ីនកិនស្រូវ គឺស្មើនឹង១១បាតក្នុង១គីឡូក្រាម ។ នេះចាត់ទុកថា តម្លៃមិនល្អទេ ប៉ុន្តែរដ្ឋាភិបាលនឹងរៀបចំវិធានការជាច្រើន ដូចជា ចាត់ឱ្យធនាគារថៃឈ្មោះ Bank For Agriculture And Agricultural Cooperatives (ថ.ក.ស) ផ្តល់ប្រាក់ទៅឱ្យសហករណ៍ទិញស្រូវ ក្នុងនោះមានសហករណ៍ជាង៥០០កន្លែងបានត្រៀមខ្លួនទិញស្រូវរួចហើយ ។ ដូច្នេះ ការទិញស្រូវនេះនឹងជួយបង្កើនតម្លៃស្រូវកាន់តែច្រើនសម្រាប់កសិករ ។

លោក Somkid Chuekong លើកឡើងថា ៖ «ខ្ញុំសូមជម្រាបទៅកាន់ម្ចាស់រោងម៉ាស៊ីនកិនស្រូវ ឬក្រុមហ៊ុនអាជីវកម្មថា ឱ្យអាណិតកសិករថៃ ពីព្រោះក្នុង១ឆ្នាំ ពួកគេទទួលបានទិន្នផលស្រូវតែ១លើកប៉ុណ្ណោះ ។ ចំណែកអង្ករផ្កាម្លិះនាំចេញទៅក្រៅប្រទេសវិញ គឺមានតម្លៃខ្ពស់រហូតដល់៣ម៉ឺនបាតក្នុង១តោន ដែលតម្លៃនេះខុសគ្នាចំនួន៣ពាន់បាតសម្រាប់ការលក់អង្ករក្នុងប្រទេសថៃ» ។

លោកបន្ថែមថា ៖ «ដូច្នេះ ខ្ញុំក៏សូមផ្តាំផ្ញើទៅកាន់អាជីវករទាំងអស់ថា បងប្អូនយើងកំពុងជួបទុក្ខលំបាកក្នុងរឿងតម្លៃអង្ករ ណាមួយត្រូវជួបគ្រោះទឹកជំនន់ និងគ្រោះរាំងស្ងួតទៀត ។ កសិករប្រមូលផលស្រូវតែម្តងប៉ុណ្ណោះក្នុង១ឆ្នាំ ហើយមិនមែននាំគ្នាទម្លាក់តម្លៃស្រូវនោះទេ ។ យើងត្រូវកំណត់តម្លៃមួយសមរម្យ និងមិនអនុញ្ញាតឱ្យអ្នកណាម្នាក់មានប្រៀប ឬចាញ់ប្រៀប ។ បើតម្លៃស្រូវស្មើ១២បាតក្នុង១គីឡូក្រាម លោកមិននិយាយទេ ដោយសារកសិករមិនប៉ះពាល់ខ្លាំងប៉ុន្មាន ។ ប៉ុន្តែពេលនេះ នៅកន្លែងខ្លះ ស្រូវមានតម្លៃត្រឹមតែ១០បាតក្នុង១គីឡូក្រាម» ។

ចុងក្រោយ លោកបញ្ជាក់ថា ៖ «នៅថ្ងៃទី៧ ខែវិច្ឆិកា ឆ្នាំ២០២៣ បើធនាគារ Bank For Agriculture And Agricultural Cooperatives (ថ.ក.ស) ប្រជុំរួចហើយនោះ នឹងមានផ្តល់ប្រាក់កម្ចីឱ្យសហករណ៍ជួយទិញស្រូវពីកសិករ ដើម្បីឱ្យស្រូវផ្កាម្លិះនៅតំបន់ឦសានប្រទេសថៃមានតម្លៃល្អ ។ រីឯវិធានការផ្សេងៗ ខាងគណៈរដ្ឋមន្ត្រីនឹងធ្វើសេចក្តីថ្លែងការណ៍» ៕ ប្រភព ៖ pptv hd

សហរដ្ឋអាមេរិក ៖ បច្ចុប្បន្ន ពលរដ្ឋអាមេរិកជាង១៧លានគ្រួសារបានចិញ្ចឹមមាន់នៅសួនច្បារក្រោយលំនៅឋានរបស់ពួកគេកាន់តែច្រើន ដោយសារតម្លៃស៊ុតមាន់កើនឡើង ។ ពលរដ្ឋអាមេរិកភាគច្រើននិយមបរិភោគស៊ុតមាន់ ក្នុងនោះមានការធ្វើម្ហូបអាហារពីស៊ុតមាន់ស្រស់ ឬនំចំណីផ្សំឡើងពីស៊ុតមាន់ ដើម្បីលើកកម្ពស់គុណភាពការចិញ្ចឹមមាន់នៅក្រោយលំនៅឋានឱ្យល្អប្រសើរឡើង ។

បច្ចេកវិទ្យាបកប្រែភាសាដោយការប្រើប្រាស់ប្រព័ន្ធបញ្ញាសិប្បនិម្មិត AI នឹងជួយឱ្យអ្នកចិញ្ចឹមមាន់នៅអាមេរិកអាចជ្រាបពីតម្រូវការរបស់ពួកវា ហើយជួយឱ្យការចិញ្ចឹមមាន់កាន់តែងាយស្រួលជាងមុន ។ ហេតុនេះ ពលរដ្ឋអាមេរិកភាគច្រើនបានជ្រើសរើសប្រើប្រាស់បច្ចេកវិទ្យាថ្មីនេះ ។

ទ្រុងមាន់ឆ្លាតវៃត្រូវបានគេផលិតឡើងដោយចំណាយពេលជាង១ម៉ឺនម៉ោង ហើយបច្ចេកវិទ្យានេះមានឈ្មោះថា Albert Eggstein ដែលជាបច្ចេកវិទ្យាជួយឱ្យអ្នកចិញ្ចឹមមាន់អាចមើលថែមាន់របស់ខ្លួននៅសួនច្បារក្រោយលំនៅឋាន និងបរិស្ថានជុំវិញបានរយៈពេល២៤ម៉ោងជារៀងរាល់ថ្ងៃ ។ លើសពីនេះ គេបានបំពាក់នូវកាមេរ៉ាចំនួន២គ្រឿង ដែលអាចថតរូបភាពបានច្បាស់ល្អ និងបញ្ជូនរូបភាពមកកាន់ទូរស័ព្ទស្មាតហ្វូន ។

ឧបករណ៍បកប្រែភាសាដោយប្រើប្រាស់បច្ចេកវិទ្យា AI នឹងមានកម្មវិធី Software សម្រាប់ចាប់សំឡេងយំរបស់មាន់ និងសំឡេងជជែកគ្នាជាមួយមាន់ផ្សេងទៀត ដើម្បីជូនដំណឹងឱ្យមនុស្សដឹងថា វាកំពុងឃ្លានចំណី, មានសេចក្តីសុខ, បារម្ភ ឬស្ថិតក្នុងគ្រោះថ្នាក់ ។ ទិន្នន័យ និងវីដេអូទាំងអស់អាចសរុបលទ្ធផល និងរាយការណ៍មកម្ចាស់ជារៀងរាល់ថ្ងៃ ។ ហេតុនេះ វានឹងជួយឱ្យអ្នកចិញ្ចឹមមាន់អាចវិភាគពីអត្តចរិតមាន់ ដូចជា បញ្ហាក្នុងហ្វូងមាន់ ។ ប្រព័ន្ធនេះក៏មានកន្លែងផ្ទុកទិន្នន័យ, រូបភាព និងសំឡេង រយៈពេល៣០ថ្ងៃទៀតផង ។

ក្រុមការងារបង្កើតទ្រុងមាន់ឆ្លាតវៃបានអភិវឌ្ឍន៍បច្ចេកវិទ្យាជាបន្តបន្ទាប់ ហើយសង្ឃឹមថា វានឹងអាចបង្ហាញ Features ថ្មីៗនៅថ្ងៃអនាគត ។ វានឹងជួយតាមដានបញ្ហាសុខភាពមាន់ដែលវាចូលចិត្តលាក់បាំងជំងឺ ហើយសញ្ញាដែលគេប្រើប្រាស់សម្រាប់បង្ហាញពីជំងឺមាន់នឹងធ្វើឡើងយ៉ាងលម្អិត ។ បច្ចេកវិទ្យានេះនឹងអាចផ្តល់ដំណឹងឱ្យអ្នកចិញ្ចឹមមាន់ជ្រាបពីរោគសញ្ញាផ្សេងៗ ឬការផឹកទឹកថយចុះក្នុងរយៈពេលណាមួយរបស់មាន់មួយចំនួន ៕ ប្រភព ៖ Thai PBS Sci And Tech

បរទេស៖ សហរដ្ឋអាមេរិកបានអនុម័តផែនការផ្តល់គ្រាប់បែក SPICE ដែលមានតម្លៃ ៣២០ លានដុល្លារទៅដល់អ៊ីស្រាអែល ខណៈដែលសង្រ្គាមជាមួយក្រុមហាម៉ាស់នៅតែបន្តនៅក្នុងតំបន់ហ្គាហ្សា។

យោងតាមគេហទំព័រ Forbes ដែលបានរាយការណ៍នៅថ្ងៃទី៦ ខែវិច្ឆិកាថា ប្រធានាធិបតី Joe Biden បានអនុញ្ញាតឱ្យសហគ្រាសការពារជាតិ Rafael USA កែសម្រួលកិច្ចព្រមព្រៀងជំនួយបច្ចេកទេសរបស់ខ្លួនជាមួយក្រុមមេ Rafael Advanced Defense Systems ក្នុងប្រទេសអ៊ីស្រាអែល ដើម្បីធ្វើការផ្ទេរគ្រាប់បែក SPICE ចំនួនមួយគ្រាប់ ប្រគល់ជូនក្រសួងការពារជាតិអ៊ីស្រាអែលដើម្បីប្រើប្រាស់។

SPICE គឺជាប្រភេទគ្រាប់បែកដែលបង្កើតឡើងដោយអ៊ីស្រាអែល នឹងត្រូវបានគេយកទៅជំនួសគ្រាប់បែក JDAM របស់អាមេរិក។ លក្ខណៈពិសេសរបស់គ្រាប់បែក SPICE គឺវាប្រើក្នុងចង្កោមឧបករណ៍រុករកដែលបំពាក់ដោយផ្កាយរណប និងឧបករណ៍ស៊ើបអង្កេតអុបទិក រួមជាមួយអេឡិចត្រូនិក។

ដូច្នេះ សហគ្រាសការពារជាតិ Rafael USA ក៏ទទួលខុសត្រូវក្នុងការផ្តល់ឱ្យកងទ័ពអ៊ីស្រាអែលនូវឯកសារបច្ចេកទេស ការគាំទ្រការប្រមូលផ្តុំ និងការសាកល្បងអាវុធទាំងនេះផងដែរ។ ហេតុនេះហើយ សភាអាមេរិកនឹងមានពេល ៣០ ថ្ងៃដើម្បីសម្រេចថាតើត្រូវរារាំងកិច្ចព្រមព្រៀងនេះឬអត់? ប្រសិនបើគ្មានការប្រឆាំងពីសភាទេ កិច្ចព្រមព្រៀងនឹងត្រូវបង្ហាញដល់ប្រធានាធិបតី Joe Biden ដើម្បីអនុម័ត។ ទោះជាយ៉ាងណាក៏ដោយ បច្ចុប្បន្ន ក្រសួងការបរទេសអាមេរិក និងក្រសួងការពារជាតិ ក៏ដូចជាមន្ត្រីអ៊ីស្រាអែល មិនបានធ្វើអត្ថាធិប្បាយលើព័ត៌មាននេះឱ្យច្បាស់លាស់នោះទេ៕