ព្រះអង្គម្ចាស់ នរោត្តម រ៉ាវីចក្រ រួមជាមួយព្រះរៀម ព្រះអង្គម្ចាស់ នរោត្តម ពុទ្ធពង្ស និង ព្រះអង្គម្ចាស់ នរោត្តម អម្រិតធីវង្ស សមាជិករាជវង្សានុវង្សខ្មែរ បានបណ្តាក់ទុនរួមគ្នាក្នុងក្លិបបាល់ទាត់ថៃ Police Tero FC ដោយបានក្លាយជាប្រធានក្លិបថែមទៀត។
ព្រះអង្គម្ចាស់ នរោត្តម អម្រិតធីវង្ស ដែលធ្លាប់ជាកីឡាករជម្រើសជាតិកម្ពុជាផងនោះ បានមានព្រះបន្ទូលថា៖” ខ្ញុំទទួលស្គាល់ថា បាល់ទាត់ថៃមានកម្រិតខ្ពស់ជាងកម្ពុជា ហើយខ្ញុំសង្ឃឹមថាការបណ្តាក់ទុនរួមគ្នានេះនឹងជួយកែលម្អក្រុមជម្រើសជាតិនៃប្រទេសទាំងពីរក្នុងពេលដំណាលគ្នា”។ក្រោយពីក្លាយជាប្រធានក្លិបហើយនោះ សមាជិករាជវង្សានុវង្សខ្មែរទាំងបីអង្គ ក៏មានបំណងផ្តល់ឱកាសសម្រាប់កីឡាករកម្ពុជាទៅប្រកបអាជីពក្នុងលីគដែលមានកម្រិតខ្ពស់មួយក្នុងតំបន់ផងដែរ៕

នៅព្រឹកថ្ងៃទី១០ ខែវិច្ឆិកា ឆ្នាំ២០២៣ វេលាម៉ោង៨និង៤៤នាទីនេះ មានករណីបាក់ស្រុតដីក្បែរច្រាំងមួយកន្លែង នៅភូមិព្រែកតាពៅ សង្កាត់ដើមមៀន ក្រុងតាខ្មៅ ខេត្តកណ្តាល។

ហេតុការណ៍នេះ មិនបានបង្កជាគ្រោះថ្នាក់ដល់បងប្អូនប្រជាពលរដ្ឋរស់នៅតំបន់នោះទេ ក៏ប៉ុន្តែវាបានបង្កការខូចខាតផ្លូវប្រវែង៣០ម៉ែត្រ ដែលជាផ្លូវសំខាន់បំផុតមួយ របស់អ្នកភូមិព្រែកតាពៅ សង្កាត់ដើមមៀន។

តែយ៉ាងណាមិញ ករណីនេះសមត្ថកិច្ចដាក់ការសង្ស័យថា ដោយសារតែមានភ្លៀងញឹកញាប់ពេក ទើបធ្វើឱ្យមានការបាក់ស្រុតបែបនេះ៕

រាជធានីភ្នំពេញជារាជធានីដ៏ទាក់ទាញមួយរបស់ប្រទេសកម្ពុជា។ ទីក្រុងដ៏រស់រវើកនេះមានភាពទាក់ទាញដែលមិនអាចប្រកែកបាន ដោយមានសំណង់អគារខ្ពស់ៗជាច្រើន កន្លែងដើរលេងសប្បាយៗ ព្រមទាំងនៅតាមដងផ្លូវសម្បូរទៅដោយតូបលក់អាហារ ទីផ្សារចម្រុះ និងមានភាពអ៊ូអរ។ ដូច្នេះហើយ ខាងក្រោមនេះគឺជាកន្លែងស្អាតទាំង៩ ដែលទទួលបានការចាប់អារម្មណ៍ខ្លាំងពីសំណាក់ភ្ញៀវទេសចរណ៍ជាតិនិងអន្តរជាតិ៖

១ ព្រះបរមរាជវាំង៖ ព្រះបរមរាជវាំងមានទីតាំងស្ថិតនៅចំកណ្តាលរាជធានីភ្នំពេញនៃប្រទេសកម្ពុជា គ្របដណ្តប់ដោយផ្ទៃដីសរុប៤០០ ០០០ម៉ែត្រការ៉េ នៅទល់មុខទន្លេចតុមុខដែលជាដៃទន្លេមេគង្គ។ ព្រះវាជវាំងនេះមានឈ្មោះពេញថា ព្រះបរមរាជវាំងចតុមុខ បានសាងសង់ឡើងនៅអំឡុងឆ្នាំ១៨៦៦។ ព្រះបរមរាជវាំងនេះគឺជាទីសក្ការបូជារបស់ព្រះពុទ្ធសាសនា ព្រមទាំងជាសមិទ្ធិផលនៃស្ថាបតិយ្យកម្មដ៏ប្រណិតអស្ចារ្យនៅក្នុងបរិវេណនោះរួមមានទាំង វត្តព្រះកែវមរកត ដែលជាទូទៅគេហៅថា វត្តប្រាក់ គឺវត្តស្រោបទៅដោយប្រាក់ដ៏មានតម្លៃ រួមជាមួយនឹងសាលបល្ល័ង្កដ៏មហិមា ពោរពេញទៅដោយមាស ប្រាក់កែវកង របស់មានតម្លៃដែលបានបន្សល់ទុកពីបុព្វបុរសជំនាន់មុនជាច្រើនផងដែរ។ បច្ចុប្បន្ន ព្រះរាជវាំងនេះជាកន្លែងសម្រាប់ពិធីបុណ្យសំខាន់ៗនៃជាតិដូចជា ពិធីបុណ្យគ្រងរាជ្យ ពិធីរៀបអធិសេកជាដើម។

២ សារមន្ទីរជាតិ ៖ សារមន្ទីរជាតិមានទីតាំងស្ថិតនៅចំកណ្តាលទីក្រុងភ្នំពេញ គឺខាងជើងព្រះបរមរាជវាំង ត្រូវបានសាងសង់ឡើងក្នុងឆ្នាំ១៩១៧ ដល់១៩២០។ សារមន្ទីរនេះគឺចាត់ទុកថាជាផ្ទះនៃបណ្តុំវត្ថុបុរាណវិទ្យាដែលបានបន្សល់ទុកតាំងពីសតវត្សទី៤ដល់ទី១៣ រួមមាន វត្ថុបុរាណ សាសនា និងសិល្បៈបុរាណខ្មែរជាងកន្លះលានប្រភេទផ្សេងៗគ្នា រួមជាមួយនឹងរូបចម្លាក់ឆ្លុះបញ្ចាំងពីជីវភាពរស់នៅប្រចាំថ្ងៃរបស់អ្នកភូមិសម័យមុន រូបគំនូរជាង៥០០០ផ្ទាំងដែលត្រូវបានគេអភិរក្សទុក ដែលបានបង្ហាញពីភាពសម្បូរបែបនៃរប្បធម៌ អរិយធម៌នៃព្រះរាជាណាចក្រកម្ពុជា។

៣ វត្តភ្នំ ៖ វត្តភ្នំ ជាវត្តប្រាសាទបែបបុរាណតាមលិទ្ធព្រះពុទ្ធសាសនាមួយកន្លែងនៅលើភ្នំមួយចំកណ្តាលទីក្រុងភ្នំពេញ ហើយគេចាត់ទុកវត្តនេះថាជានិមិត្តរូបនៃរាជធានីរបស់កម្ពុជាមួយដែរ។ នៅពេលគេទៅដល់ទីនោះ នឹងឃើញថាមាននាឡិការដ៏ធំនៅខាងក្រោមយ៉ាងស្រស់ស្អាតទៀតផង។ វត្តភ្នំនេះត្រូវបានគេចាត់ទុកថាជាវត្តសាកសិទ្ធ ដែលមានការបន់ស្រន់ជាហូរហែរ នាំយកចង្ហាន់ទៅប្រគេនព្រះសង្ឃ ចូលសមាធិជាដើម។ មិនត្រឹមតែប៉ុណ្ណោះ វាក៏ជាទីតាំងសម្រាប់ប្រារព្ធពិធីបុណ្យជាតិសំខាន់ៗផងដែរដូចជាបុណ្យចូលឆ្នាំជាដើម។

៤ វិមានឯករាជ្យ៖ គឺជាសំណង់ដ៏អស្ចារ្យស្ថិតនៅចំកណ្តាលទីក្រុងភ្នំពេញ សាងសង់ឡើងនៅក្នុងគោលបំណងរំលឹកដល់ការរំដោះប្រទេសកម្ពុជាពីនឹមអាណានិគមបារាំង ដែលបារាំងបានគ្រប់គ្រងមកជិត១សតវត្សគឺឆ្នាំ១៨៦៣ដល់១៩៥៣។ វិមាននេះបានសាងសង់ឡើងក្នុងឆ្នាំ១៩៥៨ និងសម្ភោធដាក់ឲ្យប្រើប្រាស់ជាផ្លូវការនៅឆ្នាំ១៩៦២ ក្នុងសម័យសង្គមរាស្រ្តនិយមរបស់ព្រះបាទសម្តេចនរោត្តមសីហនុ។

៥ វិមានឈ្នះៗ ៖ វិមានឈ្នះៗជានិមិត្តរូបតំណាងឲ្យការបង្រួបបង្រួមជាតិ បញ្ចប់នូវភ្លើងសង្គ្រាម ធ្វើឲ្យប្រទេសទទួលបាននូវសុខសន្តិភាពក្រោមនយោបាយឈ្នះៗរបស់សម្តេចតេជាហ៊ុនសែននិងសម្ភោធន៍ដាក់ឲ្យប្រើប្រាស់ជាផ្លូវការនៅចុងឆ្នាំ២០១៨។ វិមានអនុស្សាវរីយ៍ដ៏ស្រស់ស្អាតនេះលាតសន្ធឹងលើផ្ទៃដីទំហំ៨ហិកតា នៅចំពីមុខពហុកីឡាដ្ឋានមរតតេជោ ក្នុងតំបន់អភិវឌ្ឍលីយ៉ុងផាត់នៃរាជធានីភ្នំពេញ។

៦ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង ៖ គឺជាអតីតវិទ្យាល័យទួលស្វាយប្រទាល មុនពេលវាប្រែក្លាយទៅជាមជ្ឈមណ្ឌលសួរចម្លើយ ការធ្វើទារុណកម្ម និងប្រហារជីវិតក្នុងរបបខ្មែរក្រហម។ ត្រូវបានគេស្គាល់ផងដែរថាជាពន្ធនាគារ S-21 ប្រជាជនកម្ពុជាប្រមាណ 17,000 នាក់បានបានឃុំនៅក្នុងនោះ និងមានតែ ៧ នាក់ប៉ុណ្ណោះដែលអាចរស់បានរហូតដល់ចុងបញ្ចប់នៃរបបនេះ។ សារមន្ទីរនេះក៏ដាក់តាំងរូបគំនូររបស់អ្នកទោសចំនួន 6,000 សន្លឹកផងដែរដែលបានបង្ហាញពីការធ្វើទារុណកម្មតាមរបៀបផ្សេងៗ សម្រាប់អ្នកធ្វើដំណើរដើម្បីស្វែងយល់អំពីសោកនាដកម្មក្នុងប្រវត្តិសាស្ត្រកម្ពុជាអំឡុងឆ្នាំ១៩៧៥ដល់១៩៧៩

៧ ផ្សារទំនើប Aeon Mall និង Aeon 2 ៖ ផ្សារទំនើបអ៊ីអនម៉លទី១ និងផ្សារទំនើប Aeon 2 ជាផ្សារទំនើបដ៏ធំបំផុត ដែលបានដាក់តាំងទំនិញរាប់រយមុខទាំងទំនិញក្នុងស្រុក និងក្រៅស្រុក រួមមានទាំងភោជនីយដ្ឋានល្អប្រណិត ហាងអាហារចម្រុះ ហាងកាហ្វេ កន្លែងជិះស្គី រោងកុន Major Cineplex បំពាក់ដោយអេក្រង់ VIP និងកន្លែងលេងកម្សាន្តក្មេងៗជាច្រើនទៀតផងដែរ។

៨ ផ្សាររាត្រី ៖ ផ្សាររាត្រីភ្នំពេញ ជាផ្សារចុងសប្តាហ៍ ដែលមានទីតាំងនៅមាត់ទន្លេ ជិតទីប្រជុំជន។ យើងអាចរីករាយជាមួយរាត្រីដ៏ត្រជាក់នៅតាមមាត់ទន្លេ ភ្លក្សអាហារតាមដងផ្លូវ និងស្រាបៀរក្នុងស្រុក ព្រមទាំងដើរទិញសំលៀកបំពាក់ថោកៗ វត្ថុអនុស្សាវរីយ៍ និងគ្រឿងអលង្ការក្នុងស្រុក។

៩ ជិះទូកតាមដងទន្លេ៖ អ្នកអាចរីករាយជាមួយដំណើរកម្សាន្តឯកជន ជិះទូកកម្សាន្តពេលថ្ងៃលិច និងការកក់ទុកសម្រាប់ជប់លៀងនៅលើទន្លេសាប ទន្លេចតុមុខ និងទន្លេមេគង្គ ជាមួយនឹងទូកទេសចរណ៍ដែលចេញដំណើរពីកំពង់ផែបណ្តែតទឹកភ្នំពេញ។ ជិះទូកកាត់ទេសភាពដ៏ស្រស់ត្រកាលរបស់កម្ពុជាដូចជាមើលឃើញ ភូមិបណ្តែតទឹក បរិវេណព្រះបរមរាជវាំង និងទេសភាពដ៏ស្រស់ស្អាតជាច្រើនរបស់ទីក្រុងផងដែរ៕

ប្រទេសកម្ពុជាប្រទេសដែលសម្បូរទៅដោយធម្មជាតិព្រៃប្រឹក្សាដ៏ស្រស់ត្រកាល និងសម្បត្តិបុរាណខ្មែរដែលបានបន្សល់ពីបុរាណកាលជាច្រើន។ តាមរយៈកេរ្តិ៍តំណែលដែលបានបន្សល់ទុកមកនេះព្រមជាមួយភាពអំណោយផលល្អនៃធម្មជាតិ បានធ្វើឲ្យកម្ពុជាក្លាយទៅជាប្រទេសដែលសម្បូរទៅដោយកន្លែងរមនីយដ្ឋានស្អាតៗជាច្រើននិងទាក់ទាញភ្ញៀវទេសចរណ៍ទាំងក្នុងនិងក្រៅប្រទេសមកលេងកម្សាន្តជាហូហែរ។ ដូច្នេះហើយ ខាងក្រោមនេះគឺជាតំបន់ទេសចរណ៍ដ៏ស្រស់ស្អាតនិងពេញនិយមបំផុតទាំង៨នៃប្រទេសកម្ពុជា៖

១ ឧទ្យានជាតិភ្នំបូកគោ ៖ ជាឧទ្យានធម្មជាតិដ៏ស្រស់ត្រកាលនិងអាថ៌កំបាំងបំផុតនៅអាស៊ីអាគ្នេយ៍ ព្រមទាំងជាកន្លែងទេសចរណ៍ដ៏ទាក់ទាញព្រោះតែតែទិដ្ឋភាពដ៏អស្ចារ្យនៃជ្រលងភ្នំ ចុះអ័ពត្រជាក់ អមជាមួយនឹងព្រៃប្រឹក្សាដ៏ត្រជាក់ចិត្ត។ ប្រជាជននៅតំបន់នោះបានហៅថា ភ្នំបូកគោគឺផ្អែកទៅលើរូបរាង ដោយវាជាផ្នែកមួយនៃជួរភ្នំដំរី។ ឧទ្យាននេះមានកម្ពស់រហូតដល់ទៅ១០៨០ម៉ែត្រ លាតសន្ធឹងលើផ្ទែដី ១៥៨០គីឡូមែត្រក្រឡា។ រីឯសីតុណ្ហភាពនៅលើភ្នំនេះវិញគឺមានកម្រិតទាបជាងគេបំផុត ដែលជាទូទៅនៅចន្លោះពី១៥ទៅ២០អង់ស្សាសេ។

២ ឆ្នេរអូត្រេះ ៖ ជាឆ្នេរដ៏ស្រស់ស្អាតបំផុត១ក្នុងចំណោមឆ្នេរទាំង៦ក្នុងខេត្តព្រះសីហនុ ព្រមជាមួយនឹងទឹកសមុទ្រពណ៌ខៀវ ឆ្នេរខ្សាច់ពណ៌ស ខ្យល់បក់ល្វើយៗនិងទទួលទានគ្រឿងសមុទ្រស្រស់ៗគ្រប់មុខដ៏គួរឲ្យទាក់ចិត្តបំផុត។ បច្ចុប្បន្ននេះអ្នកអាចធ្វើដំណើរទៅលេងខេត្តព្រះសីហនុតាមផ្លូវល្បឿនលឿនយ៉ាងងាយស្រួលនិងរហ័សបំផុត។ ពេលទៅដល់ទីនោះអ្នកនឹងឃើញទំនើបកម្មនៃក្រុងព្រះសីហនុព្រមជាមួយនឹងសំណង់អាគារខ្ពស់ៗដ៏ស៊ីវិល័យជឿនលឿនអមជាមួយនឹងទឹកសមុទ្រដ៏ស្រស់ស្អាត។

៣ ប្រាសាទអង្គរវត្ត៖ប្រាសាទអង្គរវត្តគឺជាសំណង់អច្ឆរិយដ៏ធំបំផុតមួយក្នុងចំណោមប្រាសាទទាំងអស់នៅលើពិភពលោក ដែលមានទីតាំងស្ថិតនៅខេត្តសៀមរាប នៃប្រទេសកម្ពុជា។ ប្រាសាទអង្គរវត្តជាទីសក្ការបូជាព្រះវិស្ណុនៃព្រហ្មញ្ញសាសនានៅក្នុងសម័យអាណាចក្រខ្មែរ សាងសង់ដោយព្រះបាទសូរ្យវរ្ម័នទី២ អំឡុងឆ្នាំ១១១៣ដល់១១៥០។ តាមរយៈស្ថាបតិយ្យកម្មដ៏អស្ចារ្យនេះ បានទាក់ទាញភ្ញៀវទេសចរណ៍នៅជុំវិញពិភពលោកមកគយគន់ផងដែរ។

៤ កោះរ៉ុងសន្លឹម៖ មានទីតាំងស្ថិតនៅខេត្តព្រះសីហនុ ដែលមានភាពល្បីល្បាញនិងទាក់ទាញដោយសារវាជាកោះមួយដ៏ស្ងត់ស្ងាត់និងបរិយាកាសល្អ។ អ្នកដែលបានមកលេងនៅតំបន់នោះបានឈ្មោះថាជាកោះឋានសួគ៌ ដោយមានឆ្នេរដ៏ស្រស់ស្អាត ទឹកសមុទ្រថ្លាត្រជាក់ និងអាកាសធាតុត្រូពិចក្តៅ។ កោះមានសភាពស្ងត់ស្ងាត់ល្អសម្រាប់អ្នកដែលចង់មកសម្រាកលំហែរកាយលក្ខណៈឯកជន គយគន់ទេសភាពដ៏អស្ចារ្យ គេងហាលថ្ងៃដ៏កក់ក្តៅ រៀបចំពិធីជប់លៀងតូចៗជាដើម។ រីឯការធ្វើដំណើរវិញគឺត្រូវជិះសាឡាងល្បឿនលឿនពីក្រុងព្រះសីហនុទៅកាន់កោះ។

៥ ឧទ្យានជាតិភ្នំគូលេន៖ ជាគោលដៅទេសចរណ៍ដ៏ស្រស់ស្អាតបំផុតដែរ ដែលមានទីតាំងស្ថិតលើភ្នំមួយចម្ងាយ៥០គីឡូមែត្រពីទឹកដីខេត្តសៀមរាប។ ម៉្យាងវិញទៀត គេបានដាក់ឈ្មោះភ្នំគូលេននេះដោយសារតែតែជាភ្នំសម្បូរទៅដោយដើមផ្លែគូលេននៅពាសពេញ។ នៅលើភ្នំនោះមានប្រាសាទបុរាណមួយចំនួនអាចចូលទស្សនាបានផងដែរ ក៏ដូចជាជ្រលងលិង្គ១ពាន់នៅក្បាលស្ពាន វត្តព្រះអង្គធំជាដើម ហើយក៏មានកន្លែងដើរកម្សាន្តផ្សេងៗជាច្រើនទៀត ព្រមទំាងទឹកធ្លាក់ផងដែរ។

៦ ភ្នំព្រះរាជទ្រព្យ ឬ ភ្នំឧត្តុង ៖ ភ្នំឧត្តុងស្ថិតនៅក្នុងខេត្តកណ្តាល មានចម្ងាយ៤០គីឡូម៉ែត្រពីរាជធានីភ្នំពេញ ជារមនីយដ្ឋានមួយដ៏ពេញនិយមទាំងក្មេងទាំងចាស់ព្រោះវាជាទីសក្ការៈបូជាបែបព្រះពុទ្ធសាសនានៅលើភ្នំ អមជាមួយដើមឈើយ៉ាងស្រស់ត្រកាល។ នៅទីនោះក៏ជាបណ្តុំនៃម្ហូប ចំណីអាហារខ្មែររាប់រយដាក់តម្រៀបនៅតាមតូបនីមួយៗ ជាពិសេសគឺតម្លៃសមរម្យបំផុត។

៧ ព្រៃកោងកាង ៖ ព្រៃកោងកាងមានទីតាំងស្ថិតនៅខេត្តកោះកុង គឺជាព្រៃលិចទឹកប្រៃដែលជាសក្ដានុពលទេសចរណ៍ដ៏សំខាន់មួយ ដោយសារតែនៅទីនេះជាជម្រកសត្វក្នុងទឹក និងសត្វស្លាប និងជាប្រព័ន្ធអេកូឡូស៊ីជីវៈចម្រុះជាច្រើនប្រភេទ។ នៅទីនេះអាចឱ្យភ្ញៀវទេសចរគយគន់ទេសភាពព្រៃកោងកាងពណ៌ខៀវស្រងាត់ ទឹកធ្លាក់ មើលឃើញឆ្នេរសមុទ្រ និងទស្សនាជីវៈចម្រុះជាច្រើនប្រភេទដែលរស់នៅក្នុងព្រៃកោងកាង ព្រមទាំងអាចស្រូបយកខ្យល់ជំនោរសមុទ្រដ៏បរិសុទ្ធបានផងដែរ។

៨ ឧទ្យានជាតិគិរីរម្យ៖ ឧទ្យានជាតិគីរីរម្យ មានទីតាំងនៅស្រុកភ្នំស្រួច ខេត្តកំពង់ស្ពឺ ឧទ្យានជាតិគិរីរម្យ ត្រូវបានបង្កើតឡើងនៅលើភ្នំប្រាំពីររយម៉ែត្រ គ្របដណ្តប់លើផ្ទៃដីជាង៣៥០០០ហិកតានៅលើភ្នំដំរី។ ឈ្មោះ គីរីរម្យ មានន័យថា ភ្នំនៃសេចក្តីអំណរ ត្រូវបានព្រះមហាក្សត្រខ្មែរ ប្រទានឱ្យ។ ឧទ្យានជាតិគីរីរម្យ ដែលជាតំបន់ខ្ពង់រាបខ្ពស់ ត្រូវបានគេស្គាល់ថាជាព្រៃស្រល់កម្ពស់ខ្ពស់ៗរាប់រយពាន់ដើម ដែលបង្កើតបានជាក្បាលទឹកជាច្រើនហូរទៅកាន់ទីរួមខេត្តកំពង់ស្ពឺ។ តាមរយៈទេសភាពខៀវស្រងាត់បែបនេះហើយបានទាក់ទាញភ្ញៀវទេសចរណ៍ទាំងក្មេងទាំងចាស់ទៅសម្រាកលំហែរនិងបោះតង់នៅទីនោះផងដែរ៕

ដើម្បីធានាថាសាប៊ូលាងចាន ដែលធ្វើដោយឯងមានសុវត្ថិភាពល្អ និងមិនបង្កគ្រោះថ្នាក់ដល់រាងកាយ ថ្ងៃនេះ KBN News នឹងណែនាំប្រិយមិត្តមកស្គាល់រូបមន្តងាយៗ ៥ យ៉ាងដើម្បីកម្ចាត់ស្នាមប្រឡាក់យ៉ាងស្អាត ក៏ដូចជាកាត់បន្ថយការចំណាយ មានសុវត្ថិភាពល្អ និងងាយស្រួលផងដែរ។ ដូច្នេះហើយ ខាងក្រោមនេះគឺជារូបមន្តធ្វើសាប៊ូលាងចានដោយខ្លួនឯងងាយៗ៖

១. Baking soda និងក្រូចឆ្មារ៖ ទាំង baking soda និងអាស៊ីតនៃក្រូចឆ្មារគឺល្អក្នុងការបំបែកស្នាមប្រឡាក់ពីលើចាននិងឆ្នាំង។ ចាប់ផ្តើមដោយលាយម្សៅ baking soda ១ ពែង ជាមួយអាស៊ីតនៃក្រូចឆ្មារ និងទឹកខ្មេះ ២ ស្លាបព្រា ដើម្បីអោយសមស្របនឹងបរិមាណចាន ឬឆ្នាំង។ បន្ទាប់មកចាក់ចូលក្នុងដបបូម មុនពេលប្រើ លាយទឹកស្អាត ២ ស្លាបព្រាបាយ រួចលាងចានឱ្យបានស្អាតជាការស្រេច។

២.សាប៊ូចម្រាញ់ចេញពីអូលីវ៖ រូបមន្តនេះចាប់ផ្តើមដោយកំដៅទឹកក្តៅ ១ ពែងកន្លះ បន្ទាប់មកបន្ថែមសាប៊ូដែលចម្រាញ់ចេញពីអូលីវ ១ឬ៤ ពែង កូររហូតទាល់តែសាប៊ូរលាយ។ ពេលគ្រឿងផ្សំចូលគ្នាល្អ យកចេញពីភ្លើង រង់ចាំទឹកត្រជាក់ រួចចាក់ចូលក្នុងដបស្នប់ បន្ទាប់មកបន្ថែម baking soda ១ឬ២ ស្លាបព្រាកាហ្វេ គ្លីសេរីនបន្លែ ១ឬ២ ស្លាបព្រាកាហ្វេ និងបន្ថែមប្រេងសំខាន់ៗដែលអ្នកចូលចិត្តប្រហែល ១៥-៤០ ដំណក់ រួចអ្រងួនឱ្យល្អ កូរឱ្យសព្វ ទុកចោល ២៤ ម៉ោងមុនពេលប្រើ ប៉ុន្តែក្នុងអំឡុងពេលនោះវាត្រូវបានណែនាំឱ្យអ្រងួនដបជាទៀងទាត់។

៣. ប្រេងសំខាន់ៗ៖ ចង់បានទឹកលាងចានដែលមានក្លិនក្រអូប វាមិនពិបាកធ្វើទេ។ គ្រាន់តែលាយទឹកឆ្អិន ១ឬ២ ពែងជាមួយសាប៊ូចម្រាញ់ចេញពីអូលីវ ១ ពែង ម្សៅ Baking Soda ១ ស្លាបព្រាបាយ ប្រេងដូង ១ ស្លាបព្រាបាយ ប្រេងក្រូចថ្លុង ១២ ដំណក់ និងប្រេងសំខាន់ៗ basil ៨ ដំណក់ កូរឱ្យសព្វចូលគ្នា បន្ទាប់មកចាក់វាចូលក្នុងដបទឹកលាងចានជាការស្រេច។

៤.ប្រេងអាល់ម៉ុន៖ រូបមន្តនេះស័ក្តិសមសម្រាប់អ្នកដែលមានស្បែកងាយប្រតិកម្ម។ យកទឹកចម្រោះ ១ឬ៤ ពែង សាប៊ូអូលីវរាវ ៣ឬ៤ ពែង សូដា ១ ស្លាបព្រាបាយ ម្សៅគ្លីសេរីន ១ ស្លាបព្រាបាយ ប្រេងអាល់ម៉ុន ១ ស្លាបព្រាបាយ និងប្រេងអូលីវហួត ៦ ដំណក់ ក្លិនផ្កាឡាវេនឌឺ និងក្រូចឆ្មា លាយឱ្យបានល្អ បន្ទាប់មកចាក់វាចូលក្នុងដបស្នប់ដើម្បីឱ្យវារួចរាល់សម្រាប់ការប្រើប្រាស់។

៥.ទឹកក្រូចឆ្មារ៖ ប្រសិនបើអ្នកចង់លុបស្នាមប្រឡាក់ធ្ងន់ៗចេញទាំងអស់ ចូលយកសាប៊ូលាងចានប្រហែល ១ឬ៤ ពែង ហើយរំលាយវាក្នុងទឹកក្តៅ ២ ពែង ដាំឱ្យពុះលើកំដៅមធ្យម ឬតិច ប៉ុន្តែកុំអនុញ្ញាតឱ្យល្បាយឆ្អិន។ បន្ទាប់មកចាក់ទឹកក្រូចឆ្មា ១-២ ពែង និងគ្លីសេរីនបន្លែប្រហែល ១ ស្លាបព្រាបាយ ពេលគ្រឿងផ្សំចូលគ្នា រង់ចាំឱ្យវាត្រជាក់មួយរយៈ បន្ទាប់មកចាក់វាយឺតៗចូលទៅក្នុងដបសម្រាប់ប្រើប្រាស់ជាការស្រេច៕
ប្រភព៖kapook.com