ប្រទេសម៉ាឡេស៊ី៖ លោក Syed Saddiq ដែលជាអតីតរដ្ឋមន្ត្រីក្រសួងយុវជន និងកីឡាម៉ាឡេស៊ីត្រូវបានកាត់ទោសឱ្យជាប់ពន្ធនាគាររយៈពេល ៧ឆ្នាំ និងពិន័យជាប្រាក់ ២.១លានដុល្លារអាមេរិក ដោយសារជាប់ពាក់ព័ន្ធអំពើពុករលួយ។យោងតាមគេហទំព័រ CNA News ដែលបានចុះផ្សាយនៅថ្ងៃទី៩ ខែវិច្ឆិកាថ្មីៗនេះថា សមាជិកសភាមួយរូបនៃប្រទេសម៉ាឡេស៊ី មកពីគណបក្សមួយដែលបានដកខ្លួនចេញពី រដ្ឋាភិបាលចម្រុះកំពុងកាន់អំណាច ជុំវិញក្តីកង្វល់អំពីបញ្ហាអំពើពុករលួយ ត្រូវបានតុលាការជាន់ខ្ពស់នៃទីក្រុងគូឡាឡាំពួរកឃើញថា មានទោសពីបទប្រព្រឹត្តអំពើពុករលួយ។

លោក Syed Saddiq Syed Abdul Rahman ដែលជាសមាជិកសភាខាងលើ មកពីគណបក្ស MUDA ត្រូវបានតុលាការរកឃើញថាពិតជាមានទោសពីបទ ពាក់ព័ន្ធការរំលោភទំនុកចិត្ត ការគៃបន្លំទ្រព្យសម្បត្តិ និងការលាងលុយកខ្វក់ ហើយត្រូវបានផ្តន្ទាទោសដាក់ពន្ធនាគាររយៈពេល ៧ ឆ្នាំ រួមជាមួយការពិន័យជាប្រាក់ចំនួន ១០ លានរីងហ្គីត ឬស្មើនឹង ២.១ លានដុល្លារអាមេរិក។កន្លងទៅ កាលពីខែមីនា ឆ្នាំ២០២០ អតីតរដ្ឋមន្ត្រីក្រសួងយុវជន និងកីឡារូបនេះ ក៏ត្រូវបានចោទប្រកាន់ពីបទរំលោភលើអតីតមន្ត្រីនៃគណបក្ស Bersatu ក្នុងការក្លែងបន្លំថវិកាចំនួន ១ លានរីងហ្គីត (ជាង២១ម៉ឺនដុល្លារ) ដែលជាមូលនិធិសម្រាប់ក្រុមយុវជនរបស់គណបក្ស។

គួរបញ្ជាក់ដែរថា លោក Syed Saddiq បច្ចុប្បន្នមានអាយុ ៣០ ឆ្នាំធ្លាប់ជាប្រធានក្រុមយុវជនរបស់ Bersatu ប៉ុន្តែបានចាកចេញពីក្រុមនេះ ដើម្បីទៅបង្កើតគណបក្សផ្ទាល់ខ្លួនរបស់គាត់គឺ MUDA នៅឆ្នាំ ២០២០។ ទោះជាយ៉ាងណាក៏ដោយ យោងតាមប្រព័ន្ធផ្សព្វផ្សាយក្នុងស្រុកម៉ាឡេស៊ី តុលាការជាន់ខ្ពស់ទីក្រុងគូឡាឡាំពួ បានសម្រេចអនុញ្ញាតឱ្យលោក Syed Saddiq អាចពន្យារពេលអនុវត្តទោសជាបណ្តោះអាសន្ន ដើម្បីរង់ចាំការប្តឹងឧទ្ធរណ៍៕

ប្រទេសថៃ ៖ លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃលើកឡើងថា លោកមិនអាចទទួលយកបានទេ ករណីស្ថានីយប្រេងឥន្ធនៈមួយចំនួនដាក់ស្លាកប្រកាសប្រាប់អតិថិជនថា ប្រេងអស់ពីស្តុក ។ ក្រោយពីរដ្ឋាភិបាលមានវិធានការបញ្ចុះតម្លៃប្រេងសាំងនៅទូទាំងប្រទេស ធ្វើឱ្យពលរដ្ឋថៃសម្រុកទៅចាក់ប្រេងនៅតាមស្ថានីយប្រេងឥន្ធនៈ រហូតស្ថានីយប្រេងមួយចំនួនប្រកាសថា ប្រេងអស់ពីស្តុក ។ លោកនាយករដ្ឋមន្ត្រីថៃជឿថា ស្ថានីយទាំងនេះចង់បានប្រាក់ចំណេញច្រើន ហើយលោកក៏បញ្ជាទៅក្រសួងថាមពលឱ្យចាត់ការរឿងនេះ ។

នៅថ្ងៃទី៩ ខែវិច្ឆិកា ឆ្នាំ២០២៣ នៅវិមានរដ្ឋាភិបាល លោក សេដ្ឋា ថាវីស៊ីន នាយករដ្ឋមន្ត្រីប្រទេសថៃ បានផ្តល់សម្ភាសន៍ជាមួយក្រុមអ្នកសារព័ត៌មាន អំពីករណីពលរដ្ឋត្អូញត្អែរថា ស្ថានីយប្រេងឥន្ធនៈមួយចំនួនបានដាក់ស្លាកប្រកាសថា ប្រេងអស់ពីស្តុក ក្រោយពីរដ្ឋាភិបាលមានវិធានការបញ្ចុះតម្លៃប្រេងសាំង ។ លោកនាយករដ្ឋមន្ត្រីបញ្ជាក់ថា លោកបានជ្រាបពីបញ្ហានេះ ហើយលោកនឹងមិនយល់ស្របជាមួយស្ថានីយប្រេងទេ ។

ចំណែកលោក Peeraphan Salirathawiphak ឧបនាយករដ្ឋមន្ត្រី និងរដ្ឋមន្ត្រីក្រសួងថាមពលលើកឡើងថា លោកត្រូវតែត្រួតពិនិត្យករណីនេះ ហើយស្ថានីយប្រេងឥន្ធនៈមិនអាចខ្វះប្រេងលក់ឱ្យអតិថិជនបានទេ ។ ដូច្នេះ វាជាតួនាទីរបស់ក្រសួងថាមពល ដែលត្រូវពិនិត្យមើលបញ្ហានេះឡើងវិញ ។

ពេលអ្នកសារព័ត៌មានសួរថា តើវាជាការស្តុកទុកប្រេងដើម្បីប្រមូលប្រាក់ចំណេញមែនទេ ? លោក សេដ្ឋា ថាវីស៊ីន នាយករដ្ឋមន្ត្រីថៃលើកឡើងថា វាជារឿងដែលពួកគេចង់បានប្រាក់ចំណេញច្រើន ប៉ុន្តែយើងមិនអាចទទួលយកបានទេ ហើយយើងត្រូវចាត់ការរឿងនេះ ។

គួរបញ្ជាក់ថា តាំងពីរដ្ឋាភិបាលថៃមានវិធានការបញ្ចុះតម្លៃប្រេងសាំងនៅទូទាំងប្រទេសរយៈពេល៣ខែ ធ្វើឱ្យពលរដ្ឋថៃសម្រុកទៅចាក់ប្រេងនៅតាមស្ថានីយប្រេងឥន្ធនៈ តាំងពីព្រឹកព្រលឹម រហូតដល់ល្ងាច ។ ប៉ុន្តែស្ថានីយប្រេងឥន្ធនៈមួយចំនួនលើកឡើងថា ពួកគេខ្វះខាតប្រេង ហើយក៏ដាក់ស្លាកប្រកាសថា ប្រេងអស់ពីស្តុក ៕ ប្រភព ៖ Thairath

ប្រទេសថៃ ៖ នៅថ្ងៃទី៩ ខែវិច្ឆិកា ឆ្នាំ២០២៣ សារព័ត៌មានថៃចុះផ្សាយថា ក្រោយប្រទេសថៃឆ្លងកាត់ដំណាក់កាលឆ្លងរាតត្បាតនៃជំងឺកូវីដ-១៩ និងវិធានការលើកលែងទិដ្ឋាការដល់ភ្ញៀវទេសចរចិន និងកាហ្សាក់ស្ថានរួចមក ប៉ុន្តែស្ថានភាពទេសចរណ៍នៅតំបន់ផ្សារបណ្តែតទឹក «ដាំណឺនសាឌួក» ស្ថិតក្នុងខេត្តរាជបុរី និងផ្សារបណ្តែតទឹក «អាំផាវ៉ា» ស្ថិតក្នុងខេត្តសមុទ្រសង់ក្រាម មានសភាពស្ងប់ស្ងាត់ភ្ញៀវទេសចរមកកម្សាន្ត ។ ហេតុនេះ អ្នកប្រកបអាជីវកម្ម និងសេវាកម្មក្នុងតំបន់ទាំងពីរបានស្នើឱ្យរដ្ឋាភិបាលចេញវិធានការជំរុញវិស័យទេសចរណ៍បន្ថែមទៀត ។

បើទោះជាស្ថានការណ៍ឆ្លងរាតត្បាតនៃជំងឺកូវីដ-១៩ បានធូរស្រាលមួយរយៈនៅប្រទេសថៃ ប៉ុន្តែផ្សារបណ្តែតទឹក «អាំផាវ៉ា» ស្ថិតក្នុងខេត្តសមុទ្រសង់ក្រាម ស្ទើរតែគ្មានភ្ញៀវទេសចរថៃ និងភ្ញៀវទេសចរបរទេសមកកម្សាន្តទេ ។ គេសង្កេតឃើញថា ហាងលក់ដូរជាច្រើនកន្លែងបានបិទទ្វារជាបន្តបន្ទាប់ និងប្រកាសលក់ហាងប្រមាណ៨០% ។

តាមការសាកសួរម្ចាស់ហាងលក់ដូរជាច្រើននាក់ទទួលស្គាល់ថា ក្រៅពីចំនួនភ្ញៀវទេសចរបានធ្លាក់ចុះហើយ មួយរយៈចុងក្រោយនេះ តម្លៃជួលហាងលក់ដូរ ក៏បានកើនឡើងផងដែរ ។ ដូច្នេះ ធ្វើឱ្យពួកគេគ្មានប្រាក់បង់ឈ្នួលតូប និងមិនអាចតស៊ូបន្តទៀតឡើយ ។

ចំណែកផ្សារបណ្តែតទឹក «ដាំណឺនសាឌួក» ស្ថិតក្នុងខេត្តរាជបុរី ដែលជាផ្សារបណ្តែតទឹកល្បីល្បាញនៅប្រទេសថៃ បើទោះជាមានភ្ញៀវទេសចរបរទេសមកដើរកម្សាន្ត និងស្នាក់នៅទីនេះក្តី ប៉ុន្តែមានចំនួនមិនច្រើន ជាពិសេស ភ្ញៀវទេសចរចិនមកកម្សាន្តនៅទីនេះមិនច្រើនដូចពេលមុនទេ ។

អ្នកនាង Supharadee Sukkasem នាយកក្រុមអភិរក្សផ្សារបណ្តែតទឹក «ដាំណឺនសាឌួក» បានអំពាវនាវឱ្យរដ្ឋាភិបាលជំរុញចាត់វិធានការជំរុញវិស័យទេសចរណ៍បន្ថែមទៀត ក្រៅពីការលើកលែងទិដ្ឋាការឱ្យភ្ញៀវទេសចរឥណ្ឌា និងតៃវ៉ាន់ ។ អ្នកនាងស្នើឱ្យរដ្ឋាភិបាលចេញវិធានការអញ្ជើញភ្ញៀវទេសចរនៅតំបន់អាស៊ីអាគ្នេយ៍ ជាពិសេស ភ្ញៀវទេសចរសិង្ហបុរី, ម៉ាឡេស៊ី និងហ្វីលីពីនមកប្រទេសថៃ ដោយសារពួកគេបានចំណាយប្រាក់ខ្ពស់ពេលដើរកម្សាន្ត ។ លើសពីនេះ រដ្ឋាភិបាលក៏ត្រូវជំរុញវិស័យទេសចរណ៍ឱ្យជនជាតិថៃដើរកម្សាន្តក្នុងប្រទេសថៃផងដែរ ។

អ្នកប្រកបអាជីវកម្មក្នុងតំបន់ទេសចរណ៍សង្ឃឹមថា ប្រទេសថៃនឹងទទួលបានភ្ញៀវទេសចរបន្ថែមទៀត ក្រោយពីគណៈរដ្ឋមន្ត្រីអនុញ្ញាតឱ្យភ្ញៀវទេសចរឥណ្ឌា និងតៃវ៉ាន់ អាចស្នាក់នៅប្រទេសថៃបានរយៈពេល៣០ថ្ងៃដោយមិនគិតថ្លៃទិដ្ឋាការ គឺអនុវត្តចាប់ពីថ្ងៃទី១០ ខែវិច្ឆិកា ឆ្នាំ២០២៣ រហូតដល់ថ្ងៃទី១០ ខែឧសភា ឆ្នាំ២០២៤ ។ ក្នុងអំឡុងពេលនេះ គឺជាអំឡុងពេលដើរកម្សាន្តរបស់ភ្ញៀវទេសចរឥណ្ឌា និងតៃវ៉ាន់ ដើម្បីជាប្រយោជន៍ដល់សេដ្ឋកិច្ចជាតិ និងកិច្ចការបរទេស ៕ ប្រភព ៖ Thai PBS

Angelababy បច្ចុប្បន្នមានវ័យ៣៤ឆ្នាំ មានឈ្មោះពិត Yang Ying បានចូលប្រឡូកក្នុងវិស័យសិល្បៈអស់រយៈពេល ២០ឆ្នាំមកហើយដែលមានអ្នកគាំទ្រប្រហែល ១៥០ លាននាក់នៅលើបណ្តាញទំនាក់ទំនងសង្គម។ ទោះជាយ៉ាងណាក៏ដោយចាប់ពីថ្ងៃទី១ ខែវិច្ឆិកា តារាស្រីរូបនេះបានបាត់បង់សិទ្ធិក្នុងការបង្ហោះអត្ថបទ និងមតិយោបល់នៅលើបណ្តាញសង្គម លើកលែងតែគណនី Instagram។ ករណីនេះកើតឡើងបន្ទាប់ពីតារាស្រីរូបនេះបានទៅមើលការសម្តែងរបស់ Lisa សមាជិក Blackpink នៅក្នុងក្លិបកម្សាន្តស៊ិចស៊ីអាសអាភាសនៅទីក្រុងប៉ារីសកាលពីចុងខែកញ្ញាខណៈដែលអ្នកសរសេរប្លុកកម្សាន្តមួយចំនួនបាននិយាយថា Angelababy ក៏ត្រូវបានចោទប្រកាន់ពីបទឧក្រិដ្ឋកម្មមួយចំនួនទៀត។
បន្ទាប់ពីត្រឡប់មកពីប្រទេសបារាំងវិញ Angelababy បានប្រឈមមុខនឹង រលកនៃការធ្វើពហិការ ពីទស្សនិកជនចិន ដែលជឿថានាងបំពានលើបទប្បញ្ញត្តិសម្រាប់អ្នកសំដែងដែលចេញដោយអាជ្ញាធរចិន រួមទាំងបទប្បញ្ញត្តិសិល្បៈ។ ចាប់តាំងពីចុងខែកញ្ញា រហូតមកដល់ពេលនេះ តារាស្រីរូបនេះបានអវត្តមានពីការថតរឿង និងការបង្ហាញខ្លួនជាសាធារណៈផងដែរ។Angelababy ចាប់ផ្ដើមអាជីពសិល្បៈនៅអាយុ ១៣ឆ្នាំ ជាតារាបង្ហាញម៉ូដនៅហុងកុង។ នៅពេលអាយុ ១៧ ឆ្នាំនាងបានទៅប្រទេសចិនដើម្បីអភិវឌ្ឍអាជីពរបស់នាងនិងផ្សព្វផ្សាយខ្សែភាពយន្ត។ ក្រុមហ៊ុនគ្រប់គ្រងរបស់ Angelababy បានជួយតារាស្រីរូបនេះឱ្យសម្តែងក្នុង ក្នុងខ្សែភាពយន្តជាច្រើនប៉ុន្តែក៏ប្រឈមនឹងការរិះគន់ពីទស្សនិកជនដូចគ្នាដោយសារតែការសម្តែងរបស់នាងមានភាពចន្លោះខ្វះខាតសូម្បីតែឈុតធម្មតារហូតលើកឡើងថានាងគ្មានវិជ្ជាជីវៈចំពោះក្នុងការសម្តែង។ យ៉ាងណាមិញ Angelababy បានក្លាយជាតារាល្បីមានប្រជាប្រិយភាពពេញបណ្ដាញសង្គមជាមួយនឹងប្រធានបទទាក់ទងនឹងសម្រស់ និងជីវិតស្នេហា បន្ទាប់ពីមានពាក្យចចាមអារ៉ាមថាមានទំនាក់ទំនងជាមួយ Huang Xiaoming ដែលជាតារាសម្តែងដ៏ល្បីល្បាញបំផុតរបស់ប្រទេសចិនក្នុងទសវត្សរ៍មុន ចាប់តាំងពីឆ្នាំ២០១០ នៅពេលថត MV ជាមួយគ្នា។ ចាប់តាំងពីពេលនោះមក ដំណឹងទាក់ទងនឹងរឿងស្នេហារបស់មនុស្សទាំងពីរតែងតែក្លាយជាប្រធានបទក្តៅនៅលើបណ្តាញសង្គម។ អ្នកទាំងពីរមិនបាននិយាយពីទំនាក់ទំនងរបស់ពួកគេរហូតដល់ពួកគេបានសំបុត្ររៀបការក្នុងឆ្នាំ ២០១៤។

គូស្នេហ៍មួយគូនេះបានរៀបចំពិធីមង្គលការដ៏ធំមួយកាលពីឆ្នាំ ២០១៥ ដែលប្រព័ន្ធផ្សព្វផ្សាយចាត់ទុកថាប្រណីតបំផុតក្នុងចំណោមតារាចិន។ គូស្នេហ៍មួយគូនេះបដិសេធមិនបង្ហើបថវិកាដែលចំណាយសម្រាប់ការរៀបនោះទេ ប៉ុន្តែតាមប្រភពពីសារព័ត៌មាន Sina បានឱ្យដឹងថា Huang Xiaoming បានចំណាយយ៉ាងហោចណាស់ ២០០ លានយន់ ជាង ៣០លានដុល្លារអាម៉េរិក ដើម្បីរៀបចំពិធីមង្គលការជាមួយ Angelababy ។ ក្នុងនោះរួមមានលុយទិញវីឡានៅសៀងហៃឱ្យភរិយា ថ្លៃជប់លៀងមង្គលការ ចិញ្ចៀនពេជ្រ សម្លៀកបំពាក ពីម៉ាកល្បីៗលំដាប់អន្តរជាតិ ស្បែកជើងដែលមានគ្រីស្តាល់រហូតដល់៧០០០គ្រាប់។

ទោះយ៉ាងណាចំណងអាពាហ៍ពិពាហ៍នេះត្រូវរលាយអស់បន្ទាប់ពីការប្រកាសលែងលះរបស់ពួកគេនៅដើមឆ្នាំ២០២២ ហើយ Angelababy បានបន្តសកម្មនៅក្នុងឧស្សាហកម្មកម្សាន្ត ដោយផ្សាយពាណិជ្ជកម្មឱ្យម៉ាកសម្លៀកបំពាក់ជាច្រើន។ ជារឿយៗនាងធ្វើឱ្យមានភាពចម្រូងចម្រាសអំពីភាពស្រស់ស្អាតរបស់នាង។ មនុស្សជាច្រើនជឿថា Angelababy បានធ្វើការវះកាត់កែសម្ផស្សដើម្បីឱ្យមុខស្រស់ស្អាតដូចបច្ចុប្បន្ន ប៉ុន្តែតារាស្រីរូបនេះបានបដិសេធ និងបានប្តឹងមនុស្សមួយចំនួនដែលផ្សព្វផ្សាយពាក្យចចាមអារ៉ាមថានាងបានឆ្លងកាត់មុតកំបិត។
ក្នុងរយៈពេលពីរឆ្នាំមកនេះ តំណែងរបស់ Angelababy បានរង្គោះរង្គើក្នុងវិស័យសិល្បៈ ដោយសារតែទទួលបានការរិះគន់ខ្លាំងពេកចំពោះការសម្ដែងក្នុងរឿងមុនៗ។ក្រោយមក Angelababy បានផ្តោតលើការជ្រើសរើសភាពយន្តដែលមានគុណភាពជាមួយនឹងក្រុមការងារជំនាញបន្ថែមទៀត ដើម្បីរក្សាកេរ្តិ៍ឈ្មោះ និងកេរ្តិ៍ឈ្មោះរបស់នាង។ Angelababy ក៏ត្រូវបានអ្នកគាំទ្រត្អូញត្អែរលើម៉ូតសំលៀកបំពាក់របស់នាង និងជម្រើសនៃគម្រោងភាពយន្ត។ ពួកគេតែងតែបង្កើតរលក នៃការតវ៉ា នៅលើអ៊ីនធឺណិត ប្រសិនបើពួកគេមិនពេញចិត្តនឹងរបៀបស្លៀកពាក់របស់នាងនៅពេលចូលរួមព្រឹត្តិការណ៍នានា។ លើសពីនេះ Angelababy ត្រូវបានគេចាត់ទុកថាជាតារាមានអ្នកគាំទ្រច្រើនប៉ុន្តែសមត្ថភាពសម្ដែងខ្សោយនៅក្នុងឧស្សាហកម្មកម្សាន្តរបស់ចិន។

អ្នកសរសេរប្លុកកម្សាន្តជាច្រើនជឿថា ការដាក់ទណ្ឌកម្មរបស់ Angelababy ជាថ្មីម្តងទៀតបង្ហាញពីអំណាចនៃមតិសាធារណៈ ដោយបង្ខំឱ្យបុគ្គលសាធារណៈស្តាប់មតិរបស់ទស្សនិកជន។ ចាប់តាំងពី Lisa ប្រកាសពីការសម្តែងរបស់នាងនៅ crazy horse ដោយមនុស្សជាច្រើនបានរិះគន់តារារូបនេះ រហូតមនុស្សជាច្រើនគិតថា Angelababy មិនអើពើនឹងសំឡេងរបស់ទស្សនិកជន។ ពេលត្រឡប់ទៅប្រទេសចិនវិញ មុននឹងមានរលកធ្វើពហិការ Angelababy បានរក្សាភាពស្ងៀមស្ងាត់មុនពេលមានរឿងអាស្រូវដោយមិននិយាយបកស្រាយប្រាប់ទស្សនិកជន៕

ត្បូងពេជ្រ “Bleu Royal” ដែលដាក់លើចិញ្ចៀនមួយបានស្ថិតនៅក្រោមការដេញថ្លៃក្នុងតម្លៃ ៤៣.៨ លានដុល្លារនៅឯការដេញថ្លៃរបស់ Christie ក្នុងទីក្រុងហ្សឺណែវកាលពីថ្ងៃអង្គារ ទី៧ វិច្ឆិកា នេះបានតាមសារព័ត៌មាន Reuters បានចុះផ្សាយ។

ត្បូងពណ៌ខៀវដ៏កម្រនេះក្លាយជាត្បូងពេជ្រថ្លៃបំផុតមួយដែលត្រូវបានលក់ដេញថ្លៃមិនធ្លាប់មាន ដែលលើសពីតម្លៃលក់ក្នុងការប៉ាន់ស្មានចំនួន៣៥ លានដុល្លារ។យោងតាម គេហទំព័រ មួយ បានឱ្យដឹងថា Bleu Royal គឺជាពេជ្រដ៏ធំបំផុតដែលមិនធ្លាប់មាននៅក្នុងប្រវត្តិសាស្រ្តដេញថ្លៃ ហើយត្បូងពេជ្រនេះបានទៅលើអ្នកដេញថ្លៃមកពីអាស៊ី។ Bleu Royal មានទម្ងន់ ១៧.៦១ ការ៉ាត់ ដែលជាពូជដ៏កម្រមួយនៅក្នុងពិភពលោក។ ត្បូងពេជ្រពណ៌ខៀវបង្កើតបានត្រឹមតែ 0.02% នៃពេជ្រដែលបានជីកយករ៉ែ ហើយមានតែ ១% ប៉ុណ្ណោះដែលឈានដល់កម្រិតពណ៌ខ្ពស់បំផុតហើយ Bleu Royal ស្ថិតក្នុងចំណោម១%នោះ ។
ពណ៌នៃពេជ្រត្រូវបានបង្កើតឡើងពីការគ្រីស្តាល់នៃធាតុកាបូនពីជ្រៅនៅក្នុងផែនដី ឥទ្ធិពលដោយសីតុណ្ហភាព សម្ពាធ និងបរិយាកាសជុំវិញ។ ចំនួនតិចតួចនៃអាតូមផ្សេងទៀតដែលចូលទៅក្នុងពេជ្រ ឬឥទ្ធិពលនៃវិទ្យុសកម្មធ្វើឱ្យពណ៌របស់វាផ្លាស់ប្តូរ ពណ៌ខៀវបានមកពីបរិមាណ boron នៅក្នុងរចនាសម្ព័ន្ធគ្រីស្តាល់។ បរិមាណនេះលាយបញ្ចូលគ្នាដោយចៃដន្យទៅក្នុងរចនាសម្ព័ន្ធគ្រីស្តាល់នៅពេលដែលពេជ្របង្កើត។Bleu Royal ត្រូវបានតម្កល់នៅលើចិញ្ចៀនដែលមានពេជ្រពណ៌សពីរនៅសងខាងមានទម្ងន់ប្រហែល ៣ ការ៉ាត់។ បច្ចុប្បន្ន ឯតទគ្គកម្មសម្រាប់ពេជ្រពណ៌ខៀវថ្លៃបំផុតជារបស់ Oppenheimer Blue ទម្ងន់ ១៤.៦២ ការ៉ាត់ លក់បានជាង ៥៧.៥ លានដុល្លារក្នុងឆ្នាំ២០១៦៕

ប្រទេសចិន ៖ សារព័ត៌មានចិនរាយការណ៍ថា នៅថ្ងៃចាប់ផ្តើមរដូវរងា គេសង្កេតឃើញថា ព្រិលដំបូងនៅឆ្នាំ២០២៣នេះ បានធ្លាក់ចុះមកតាមតំបន់មួយចំនួននៅភាគខាងជើងប្រទេសចិន ។ ចំណែកតំបន់ជាច្រើនទៀតរបស់ចិន ក៏បានដាក់លក់ទំនិញទេសចរណ៍ក្នុងរដូវរងា ឬរៀបចំកម្មវិធីទេសចរណ៍រដូវរងាផងដែរ ។

ទីក្រុងហ៊ូលុនប៉ៃអឺ បានបើកគម្រោងដំណើរកម្សាន្តរដូវរងា ដែលមានគុណភាពល្អចំនួន១០គម្រោង ព្រមទាំងគម្រោងដំណើរកម្សាន្តឆ្លងកាត់ព្រំដែនចំនួន២គម្រោងទៀត ។ លើសពីនេះ ទីក្រុងហ៊ូលុនប៉ៃអឺ ក៏បានរៀបចំកម្មវិធីទេសចរណ៍ផ្នែកវប្បធម៌ផ្សេងៗ ដូចជា ការរត់ម៉ារ៉ាតុងនៅក្នុងទីក្រុងត្រជាក់បំផុតរបស់ចិន និងការស្ទូចត្រីនៅក្រោមទឹកកកក្នុងទន្លេ ។ ការរៀបចំកម្មវិធីទេសចរណ៍ទាំងនេះ គឺសង្កត់ធ្ងន់ទៅលើគុណសម្បត្តិចម្បងចំនួន៣ ដូចជា ៖ ការឆ្លងកាត់ព្រំដែន, ការសម្រាកលំហែរកាយ និងទំនៀមទម្លាប់ប្រពៃណីក្នុងតំបន់ ។

ខេត្តយូណាននឹងបង្កើតគម្រោងទេសចរណ៍ជាច្រើននៅរដូវរងាឆ្នាំ២០២៣ ដូចជា ៖
-គម្រោងទេសចរណ៍ផ្នែកវប្បធម៌ខេត្តយូណាន ដ៏ស្រស់ស្អាតបំផុត
-រដូវកាលម្ហូបអាហារឆ្នាំងភ្លើងនៅខេត្តយូណាន
-ពិធីស្វាគមន៍ឆ្នាំថ្មី ឆ្នាំសកល និងពិធីបុណ្យចូលឆ្នាំចិន
-ដំណើរកម្សាន្តក្នុងរដូវរងា
-ដំណើរកម្សាន្ត និងក្រេបរសជាតិកាហ្វេ
-ដំណើរកម្សាន្ត និងការបរិភោគផ្លែឈើ ព្រមទាំង
-ដំណើរកម្សាន្ត និងក្រេបទឹកតែ ។

លើសពីនេះ ប្រទេសចិនមានគោលនយោបាយបញ្ចុះតម្លៃទំនិញ និងសេវាកម្មពាក់ព័ន្ធនឹងវិស័យទេសចរណ៍រដូវងា ចាប់ពីឆ្នាំ២០២៣ ដល់ឆ្នាំ២០២៤ រួមទាំងវិធានការឧបត្ថម្ភប្រាក់ដល់ក្រុមហ៊ុនទេសចរណ៍, តំបន់ទេសចរណ៍, ក្រុមហ៊ុនអាកាសចរណ៍, រថយន្តទេសចរណ៍ និងក្រុមហ៊ុនដឹកជញ្ជូនអ្នកដំណើរផងដែរ ៕ ប្រភព ៖ China Face

Jennie សមាជិកក្រុម BLACKPINK បានបង្ហាញតាមរយៈ Weverse ថានាងមានការភ្ញាក់ផ្អើល និងកាដូដ៏ធំមួយសម្រាប់អ្នកគាំទ្រជាទីស្រឡាញ់របស់នាង។ ការបង្ហើបដំណឹងល្អនេះធ្វើឡើងបន្ទាប់ពី Jennie ទទួលបានចំណាត់ថ្នាក់កំពូលក្នុងតារាងតន្ត្រីអន្តរជាតិជាមួយនឹងបទទោល “You & Me” និងទទួលបានភាពជោគជ័យជាមួយនឹងបទចម្រៀងសហការ “One Of The Girls” ជាមួយតារាចម្រៀង The Weeknd និង Lily-Rose Depp។

តាមរយៈកម្មវិធីអ្នកគាំទ្រ តារារូបនេះបានសរសេរថា «វាហាក់បីដូចជាអាកាសធាតុបានប្រែជាត្រជាក់ខ្លាំង។ តើអ្នកទាំងអស់គ្នាថែរក្សាខ្លួនដោយរបៀបណា? និយាយតាមត្រង់ទៅ ខ្ញុំបានគិតចង់ cover ចម្រៀងមួយបទសម្រាប់ថ្ងៃបុណ្យនេះ ប៉ុន្តែខ្ញុំគិតថាវានឹងមានន័យជាងប្រសិនបើ BLINK ជ្រើសរើសបទចម្រៀងរួមគ្នា ជាជាងជ្រើសរើសវាតែម្នាក់ឯង… អ្នកទាំងអស់គ្នាដឹងថាខ្ញុំនឹកអ្នកទាំងអស់គ្នា…»។

តាមរយៈពាក្យសម្តីនេះសមាជិកក្រុម BLACKPINK រូបនេះបង្ហាញពីផែនការរបស់ខ្លួនក្នុងការ cover បទ Christmas ដូចនេះខែធ្នូនឹងក្លាយជាខែដ៏អស្ចារ្យជាងធម្មតាសម្រាប់អ្នកគាំទ្រ ដែលពេលនេះ Jennie នឹងធ្វើឱ្យគ្រប់គ្នារីករាយជាមួយនឹងទឹកដមសម្លេងដ៏ពីរោះរបស់តារាចម្រៀងរូបនេះ។

គួរបញ្ជាក់ផងដែរថា មិនត្រឹមតែ Jennie ប៉ុណ្ណោះទេដែលមានគម្រោងជូនកាដូទៅកាន់ហ្វេន ជាក់ស្តែង Rosé សមាជិករួមក្រុមក៏មានកាដូជូនហ្វេននាខែធ្នូនេះដូចគ្នា ដែលធ្វើឱ្យអ្នកគាំទ្រកាន់តែរំភើបសម្រាប់រដូវកាល Christmas ៕

កីឡាការិនី ស្រួង ភាវី បានធ្វើឱ្យប្រជាជនកម្ពុជាសម្តែងក្តីមោទនភាពយ៉ាងខ្លាំងព្រោះកីឡាករិនីរូបនេះជានិច្ចកាលតែងតែលើកស្ទួយប្រទេសកំណើតខណៈនាពេលថ្មីៗនេះទៀតសោតទើបតែទទួលបានពានរង្វាន់នៅលើទឹកដីប្រទេសកូរ៉េខាងត្បូង។ ក្នុងឱកាសនេះដែរ តារាស្រី ពេជ្រ ចរណៃ បានពោលពាក្យយ៉ាងមានន័យទៅកាន់កីឡាការិនី ស្រួង ភាវី ។

នៅលើបណ្តាញសង្គមរបស់ ពេជ្រ ចរណៃល្បុក្កតោខ្មែរ បានរៀបរាប់ទៅកាន់លោកស្រី ស្រួង ភាវី ថា«មនុស្សល្អរបស់ខ្ញុំ បងស្រីល្អពេកហើយ រាល់គ្រប់ទង្វើល្អរបស់បង ខ្ញុំនិងប្រជាជនខ្មែរនិងចងចាំជានិច្ច បងស្រីបានធ្វើច្រើនណាស់សម្រាប់លើកមុខមាត់ប្រទេសជាតិយើង»។ កីឡាការិនី ស្រួង ភាវី ត្រូវបានជ្រើសរើសឱ្យទទួលពានរង្វាន់ Asia Special Award 2023 ដែលរៀបចំដោយ Asia Model Festival កាលពីថ្ងៃទី៥ ខែវិច្ឆិកា ឆ្នាំ២០២៣ នៅលើទឹកដីកូរ៉េខាងត្បូង។ ក្នុងអំឡុងពេលកីឡាការិនី ស្រួង ភាវី ឡើងទទួលពានរង្វាន់ខាងលើនេះលោកស្រីបានស្លៀកសំលៀកបំពាក់បែបខ្មែរដែលច្នៃម៉ូតឡើងយ៉ាងពិសេសលម្អទៅដោយក្បូរក្បាច់រចនា មានរូបនាគ ដំរី និងហង្ស ដែលក្រណាត់សូត្រនេះរក្សាទុកជាយូរឆ្នាំណាស់មកហើយ។

អ្វីដែលកាន់តែពិសេសនោះ កីឡាការិនីរូបនេះបានបង្ហើបទៅកាន់ជនជាតិកូរ៉េដែលបានចោតសួរខ្លួន ដោយលោកស្រីបង្ហើបថាធនធានកម្ពុជាមានច្រើនទៀតណាស់ដូចជាខ្លួនដែរ ព្រមទាំងប្តេជ្ញានឹងខិតខំបន្ថែមទៀតដើម្បីប្រជាជនកម្ពុជា។

គួរបញ្ជាក់ថា កញ្ញា ពេជ្រ ចរណៃ និងកីឡាករិនី ស្រួង ភាវី សុទ្ធតែជាបុគ្គលគម្រូនៅក្នុងសង្គមដោយខាងកញ្ញា ពេជ្រ ចរណៃ បានលើកស្ទួយក្បាច់គុនល្បុក្កតោខ្មែរបានហ្វឹកហាត់ ក្បាច់គុនបុរាណនេះនិងជួយបង្ហាត់ទៅអ្នកជំនាន់ក្រោយទៀត។ ចំណែកឯកីឡាករិនី ស្រួង ភាវី បានសាងគុណសម្បតិ្តយ៉ាងច្រើនជូនប្រទេសកម្ពុជា និងប្រជាជនកម្ពុជា តាមរយៈថ្វីដៃដ៏ចំណាននៃកីឡាស៊្នូកឃ័រប៊ីយ៉ាការ៉ុម៕